Faamasinoina e le Saniterini Ona Taʻitaʻia Atu ai Lea iā Pilato

Na faafitia faatolu e Peteru Iesu ina ua lata ina ao. Ua uma le faamasinoga lē tonu sa faia e le Saniterini, ma ua taape i latou. Ua oo nei i le taeao o le Aso Faraile, ma ua latou toe potopoto uma mai e faaauau le faamasinoga. Ua latou faia faapea atonu ina ia faafoliga atu ai, e faaletulafono le faamasinoga sa latou faia i le pō o le Paseka. Ua toe aumai foʻi Iesu i o latou luma.

Ua toe faapea atu le Faamasinoga Sili: “Afai o oe o le Keriso, ia taʻu mai iā i matou.” Ua tali mai Iesu: “E tusa lava po ou te taʻuina atu, ae tou te lē talitonu lava. Afai foʻi ou te fesili atu iā te outou, tou te lē tali mai lava.” Peitaʻi ua faailoa atu ma le lototele e Iesu, o ia lea o loo faatatau i ai le valoaga i le Tanielu 7:13. Ua fetalai atu o ia: “E amata atu nei ona nofo le Atalii o le tagata i le itu taumatau malosi o le Atua.”—Luka 22:67-69; Mataio 26:63.

Ua toe fesili atu le faamasinoga: “Po o oe o le Alo o le Atua?” Ua tali mai Iesu: “O lenā tonu lava ua outou fai mai ai.” O lenā faamatalaga ua latou manatu ai ua tatau ona fasiotia Iesu, i le moliaga e faapea ua upuleaga o ia i le Atua. Ua latou faapea atu: “Aiseā e toe manaʻomia ai fua nisi molimau?” (Luka 22:70, 71; Mareko 14:64) O lea ua latou saisaia ai Iesu, ma taʻitaʻi atu o ia i le kovana Roma o Ponotio Pilato.

Atonu ua iloa atu e Iuta le Sekara ia Iesu, a o taʻitaʻi ese atu iā Pilato. O lea, ina ua ia iloa ua faia le faaiʻuga e faasalaina Iesu, ona ia lagona ai lea o lona sesē. Ae nai lo o le liliu atu i le Atua ma le salamō moni, ua alu o ia ma toe faafoʻi tupe siliva e 30. Ua ia fai atu i le ʻaufaitaulaga sili: “Ua ou agasala ina ua ou faalataina le tagata amiotonu.” Peitaʻi ua latou tali mai e aunoa ma le popole iā te ia: “E leai sa matou feʻau i lenā mea! Faitalia oe!”—Mataio 27:4.

Ua lafoaʻi nei e Iuta tupe siliva e 30 i le malumalu, ma faia se isi gaoioiga leaga o le taumafai lea e pule i lona ola. E foliga mai ua gau le lālā sa nonoa ai le maea, a o ia taumafai e sisi o ia. O lea ua paʻū ifo ai o ia i luga o maa, ma “pā ai lona manava ma sau ai i fafo lona gaʻau.”—Galuega 1:17, 18.

Ua ave Iesu i le maota o le kovana Roma o Ponotio Pilato, a o leʻi taitai lava le taeao. Peitaʻi, ua mumusu tagata Iutaia o loo taʻitaʻia atu Iesu e ō i totonu o lea maota. E latou te manatu o le iai faatasi ma tagata o Nuu Ese, o le a lē mamā ai i latou. O le a lē agavaa ai i latou e aai i le taumafataga lea e faia iā Nisani 15, le aso muamua o le Tausamiga o Falaoa e Lē Faafefeteina. E manatu tagata Iutaia e aofia lenā tausamiga i le vaitaimi o le Paseka.

Ua sau i fafo Pilato ma fesili atu iā i latou: “O le ā se mea ua outou molia ai lenei tagata?” Ua latou tali mai: “Ana lē faia e lenei tagata se mea sesē, semanū matou te lē molia mai o ia iā te oe.” Atonu i le manatu o Pilato o loo latou taumafai e faamalosia o ia e faia se faaiʻuga. O lea ua ia faapea atu ai: “Ia outou ave o ia ma faamasino e tusa ma la outou tulafono.” Ua faaalia e tagata Iutaia lo latou faanaunauga e fasioti Iesu i le tali mai: “E sā i le tulafono ona matou fasiotia se tasi.”—Ioane 18:29-31.

O le mea moni o le a vevesi tagata Iutaia, pe afai e fasioti e taʻitaʻi lotu Iesu a o faagasolo le vaitaimi o le Paseka. E mafai e tagata Roma ona faasalaina i le oti i latou ua molia i moliaga e faasaga i le malo o Roma. O lea, pe afai e mafai e taʻitaʻi lotu Iutaia ona uunaʻia tagata Roma e fasiotia Iesu, o le a lē tuuaʻia ai i latou e tagata Iutaia mo le faasalaina o Iesu i le oti.

E lē o taʻuina atu e taʻitaʻi lotu iā Pilato, ua latou faia le faaiʻuga i le faamasinoga o Iesu ona ua upuleaga o ia i le Atua. Ua latou fafau aʻe ni moliaga sesē e faapea: ʻO lenei tagata ua ia [1] faatupu le fouvale i lo tatou nuu, [2] vavao le totogiina atu o lafoga iā Kaisara, ma [3] ua ia faapea mai foʻi o ia o Keriso o le tupu.’—Luka 23:2.

I le avea ai o Pilato ma sui o Roma, ua iai la māfuaaga e popole ai o ia i le moliaga e faapea, ua fai mai Iesu o ia o le Tupu. Ua toe ulu atu nei o ia i lona maota, ua valaau iā Iesu ma fesili atu: “Po o oe ea o le tupu o tagata Iutaia?” I se isi faaupuga, e tusa o loo ia fesili atu ʻPo ua e solia le tulafono a le emepaea o Roma, e ala i le faapea atu o oe o le tupu e tetee iā Kaisara?’ Atonu ina ia iloa po o le ā le tele o mea ua faalogo ai Pilato e faatatau iā te ia, ua fesili atu Iesu: “Po o ou lava manatu ua e fai mai ai, pe na taʻua aʻu e nisi iā te oe?”—Ioane 18:33, 34.

Ua tali mai Pilato: “O aʻu ea o se Iutaia? O lou lava nuu ma le ʻaufaitaulaga sili ua latou aumaia oe iā te aʻu. O le ā se mea ua e faia?” (Ioane 18:35) O le tali a Pilato, ua faailoa ai lona lē iloa o ni mea moni e faatatau iā Iesu, ma o loo naunau ina ia aʻoaʻoina na mea.

E lē o taumafai Iesu e ʻalofia le talanoaina o le mataupu autū lenei, o le tulaga tautupu. Nai lo o lea, ua ia tali atu i se auala ua matuā faateʻia ai le kovana o Pilato.