O le feʻau autū lava o le Tusi Paia, e faatatau atu i le Malo o le Atua. O le a faaaogā e Ieova lenā Malo e faataunuuina lona finagalo na iai mo le lalolagi. O le ā lenā Malo? E faapefea ona tatou iloa ua pule nei lenā Malo? O ā mea ua uma ona faataunuuina e le Malo, ma o ā mea o le a faataunuuina i le lumanaʻi? O le a taliina nei fesili i le lesona lenei, ma lesona e lua o loo sosoo mai.

1. O le ā le Malo o le Atua, ma o ai o le a avea ma Tupu?

O lenei Malo o se faigāmalo ua faavaeina e Ieova le Atua. O lona Tupu o Iesu Keriso, ma e pule mai i le lagi. (Mataio 4:​17; Ioane 18:36) Ua faapea mai le Tusi Paia e uiga iā Iesu: “O le a fai o ia ma Tupu . . . e faavavau.” (Luka 1:​32, 33) I le avea ai o Iesu ma Tupu o le Malo o le Atua, o le a ia pule mai i tagata uma i luga o le lalolagi.

2. O ai e pule faatasi ma Iesu?

E lē na o Iesu o le a avea ma pule. E iai tagata “mai i ituaiga uma, ma gagana uma, ma nuu uma, ma atunuu uma . . . e latou te pule mai foʻi o ni tupu i le lalolagi.” (Faaaliga 5:​9, 10) E toʻafia i latou o le a pule faatasi ma Keriso? E faitau miliona Kerisiano ua avea ma soo o Iesu, talu mai le taimi na afio mai ai o ia i le lalolagi. Ae e na o le 144,000 i latou e ō atu i le lagi e pule faatasi ma Iesu. (Faitau le Faaaliga 14:​1-4.) O isi Kerisiano uma i le lalolagi, o le a avea ma tagatānuu o le Malo.​—Salamo 37:29.

3. Aiseā e sili atu ai le faigāmalo a le Atua nai lo faigāmalo a tagata?

E tusa pe taumafai taʻitaʻi o malo e faia mea lelei, ae e lē o iā i latou le malosi e faataunuu ai mea uma e mananaʻo e fai. A o faagasolo taimi, o le a suia i latou e nisi taʻitaʻi manatu faapito ma e lē mananaʻo e faia mea lelei mo tagata. Ae e lē mafai e se tasi ona suia le Pule o le Malo o le Atua, o Iesu. Ua ʻfaatūina e le Atua le malo e lē faaumatia lava.’ (Tanielu 2:​44) O le a pule mai Iesu i le lalolagi atoa, ma e na te lē faaalia le faailoga tagata. Ae o le a ia faaalia le alofa, agalelei ma le faamasinotonu, ma o le a ia aʻoaʻoina tagata e feutagaʻi foʻi ma isi i lenā lava auala.​—Faitau le Isaia 11:9.

4. O le a pulea e se faigāmalo malosi le lalolagi atoa

E sili atu le pule o loo iā Iesu Keriso, nai lo o se isi lava pule i le talafaasolopito. Faitau le Mataio 28:​18, ona talanoa lea i le fesili lenei:

• E faapefea ona sili atu le pule a Iesu na i lo pule faaletagata?

E fesuisuiaʻi faigāmalo a tagata, ma e na o ni nai vaega o le lalolagi e latou te pule ai. Ae ā le Malo o le Atua? Faitau le Tanielu 7:​14, ona talanoa lea i fesili nei:

• Aiseā o se tala lelei ai le iloa, ʻe lē faaumatiaina’ le Malo o le Atua?

• Faamata o ā ni aogā e tatou te maua pe a pulea e le Malo o le Atua le lalolagi atoa?

5. E tatau ona suia faigāmalo a tagata

Aiseā e tatau ai ona suia e le Malo o le Atua faigāmalo a tagata? Faaali le VITIŌ, ona talanoa lea i le fesili lenei:

VITIŌ: O le ā le Malo o le Atua?​—Vaaiga Puupuu (1:​41)

• O ā iʻuga o pulega a tagata?

Faitau le Failauga 8:​9, ona talanoa lea i fesili nei:

• Pe e te manatu e tatau ona suia e le Malo o le Atua faigāmalo a tagata? Aiseā?

6. E malamalama lelei pule o le Malo o le Atua iā i tatou

Talu ai na soifua lo tatou tupu o Iesu o se tagata, e mafai la ona ia “tigā alofa faatasi ma i tatou i o tatou vaivaiga.” (Eperu 4:15) O tane ma fafine faamaoni e 144,000 lea o le a pule faatasi ma Iesu, na filifilia e Ieova “mai i ituaiga uma, ma gagana uma, ma nuu uma, ma atunuu uma.”​—Faaaliga 5:9.

• Pe e faamāfanafanaina oe i le iloaina, e malamalama lelei Iesu ma i latou e pule faatasi ma ia i tulaga o tagata? Aiseā?

7. E sili atu ona lelei tulafono a le Malo o le Atua

E saunia e faigāmalo a tagata tulafono mo le lelei ma le puipuiga o tagatānuu. E iai foʻi tulafono a le Malo o le Atua e tatau ona usitaʻia e ona tagatānuu. Faitau le 1 Korinito 6:​9-​11, ona talanoa lea i fesili nei:

• O le a faapeʻī le lalolagi pe a mulimuli tagata uma i tulafono tauamio a le Atua?a

• Pe e talafeagai ona faatalitalia e Ieova tagatānuu o le Malo e usitaʻia nei tulafono? Aiseā?

• E faapefea ona tatou iloa, e mafai e tagata e lē usitaʻia nei tulafono ona faia suiga?​—Tagaʻi i le fuaiupu 11.

AOTELEGA

O le Malo o le Atua o se faigāmalo moni i le lagi, ma o le a pule mai i le lalolagi atoa.

Fesili Autalu

• O ai pule o le Malo o le Atua?

• E faapefea ona sili atu le Malo o le Atua nai lo o faigāmalo a tagata?

• O ā nisi o mea e faatalitalia e Ieova mai i tagatānuu o le Malo?

MANATU FAAOPOOPO

Iloilo aʻoaʻoga a Iesu e faatatau i le nofoaga moni e iai le Malo.

“Po o le Malo o le Atua o se Mea e i le Loto o le Tagata?” (Mataupu i le jw.org)

Aiseā e sili atu ai i Molimau a Ieova le faamaoni i le Malo o le Atua nai lo o faigāmalo a tagata?

Tuutoina Atoatoa i le Malo o le Atua (1:​43)

Iloilo le faamatalaga a le Tusi Paia e faatatau i le 144,000 lea ua filifilia e Ieova e pule faatasi ma Iesu.

“O Ai e Ō i le Lagi?” (Mataupu i le jw.org)

O le ā na faatalitonuina ai se fafine na faafalepuipui, e na o le Atua e mafai ona aumaia se lalolagi amiotonu?

“Aʻoaʻoina le Mea Moni e Faatatau i Faiga Lē Tonu” (Mataupu o le Ala Mai!)

Na aʻoaʻo mai e Iesu, “e lē o ni tagata o le lalolagi” ona soo. (Ioane 15:19) E aofia ai le faaalia o le solitū, po o le leai o sa latou vaega e fai i mataupu faapolotiki a le lalolagi ma taua. O le mea moni, e lē faigofie i taimi uma ona faaalia le solitū. E ono tauemua ai i tatou ona o le faaalia o lenei uiga. E faapefea ona tatou tausisia le solitū ma faamaoni pea iā Ieova le Atua?

1. O le ā le vaaiga a Kerisiano moni i faigāmalo a tagata?

E faaalia e Kerisiano le faaaloalo i faigāmalo. E tatou te mulimuli i le faatonuga a Iesu ina ia “totogi atu mea a Kaisara iā Kaisara.” O lona uiga, e tatou te usiusitaʻi i tulafono a le atunuu, e pei o le totogiina o lafoga. (Mareko 12:17) Ua aʻoaʻo mai e le Tusi Paia, ua iai i faigāmalo a tagata le pule, ona ua faatagaina i latou e le Atua. (Roma 13:1) Ua tatou malamalama la, e lē mafai ona sili atu le pule a faigāmalo a tagata nai lo le pule a le Atua. E tatou te maufaatuatuaina le Atua ma lona Malo i le lagi, e foʻia faafitauli o tagata.

2. E faapefea ona faailoa atu lo tatou solitū?

I le pei o Iesu, e leai sa tatou vaega fai i mataupu faapolotiki. Ina ua vāai tagata i se tasi o vavega na faia e Iesu, na latou taumafai ai e avea o ia ma o latou tupu, ae e leʻi manaʻo i ai Iesu. (Ioane 6:15) Aiseā? Auā na ia fetalai i se taimi mulimuli ane, “o loʻu Malo e lē mai le lalolagi lenei.” (Ioane 18:36) I le avea ai ma soo o Iesu, e faaalia lo tatou solitū i le tele o auala. Mo se faataʻitaʻiga, e lē mafai ona tatou auai i taua. (Faitau le Mika 4:3.) E tatou te faaaloalo i faailoga e iloa ai atunuu, e pei o fuʻa, ae e tatou te lē tapuaʻi i ai. (1 Ioane 5:21) E tatou te lē lagolagoina foʻi pe tetee atu i so o se vaega faapolotiki, po o se sui tauvā i faiga palota. I nei auala ma isi, e tatou te matuā faaalia ai le faamaoni i le faigāmalo a le Atua, po o lona Malo.

SAʻILIʻILI ATILI

3. E faaalia e Kerisiano moni le solitū

Na faataatia e Iesu ma ona soo le faaaʻoaʻoga mo i tatou. Faitau le Roma 13:1, 5-7 ma le 1 Peteru 2:13, 14, ona faaali lea o le VITIŌ ma talanoa i fesili nei:

VITIŌ: E Faaalia e Kerisiano Moni le Solitū​—Vaega 1 (4:28)

• Aiseā e tatau ai ona tatou faaaloalo i faigāmalo?

• O ā auala e faaalia ai lo tatou gauaʻi iā i latou?

I taimi o taua, e faapea mai nisi atunuu e latou te solitū, ae e latou te lagolagoina itu uma o le taua. O le ā moni le uiga o le solitū? Faitau le Ioane 17:16, ona faaali lea o le VITIŌ ma talanoa i le fesili lenei:

VITIŌ: E Faaalia e Kerisiano Moni le Solitū​—Vaega 2 (3:10)

• O le ā le uiga o le solitū?

Ae faapefea pe a faapea mai faigāmalo e faia se mea e feteenaʻi ma le tulafono a le Atua? Faitau le Galuega 5:28, 29, ona faaali lea o le VITIŌ ma talanoa i fesili nei:

VITIŌ: E Faaalia e Kerisiano Moni le Solitū​—Vaega 3 (1:20)

• Pe a feteenaʻi tulafono a tagata ma tulafono a le Atua, o lē fea tulafono e tatau ona tatou usitaʻia?

• O ā tulaga e ono lē usiusitaʻi ai Kerisiano i faigāmalo?

4. Ia solitū i mafaufauga ma gaoioiga

Faitau le 1 Ioane 5:21, ona faaali lea o le VITIŌ ma talanoa i fesili nei:

VITIŌ: Māfuaaga e Manaʻomia ai Ona Lototetele Kerisiano Moni​—Ina ia Tumau i le Solitū (2:49)

• I le vitiō, aiseā na lē auai ai Ayenge i se vaega faapolotiki, pe faia sana vaega i sauniga faalemalo e pei o le sisiina o le fuʻa?

• Pe na filifili o ia ma le atamai?

O ā nisi tulaga e ono tofotofoina ai lo tatou solitū? Faaali le VITIŌ, ona talanoa lea i fesili nei:

VITIŌ: Lesona Mai Le Olomatamata​—Tausisia lo Tatou Solitū i se Lalolagi Fevaevaeaʻi (5:16)

• E faapefea ona tausisia pea lo tatou solitū, pe a matamata i ni taaloga i le va o atunuu?

• E faapefea ona tausisia pea lo tatou solitū, e tusa pe tatou te aafia i ni faaiʻuga a tagata faipolotiki?

• E faapefea ona aafia lo tatou solitū i mea tatou te faalogo ai i faasalalauga ma isi tagata?

AOTELEGA

E taumafai malosi Kerisiano e tausisia lo latou solitū mai faiga faapolotiki e ala i mafaufauga, faamatalaga ma gaoioiga.

Fesili Autalu

• O le ā e tatau ona tatou avatu i faigāmalo a tagata?

• Aiseā e tatou te tausisia ai le solitū mai i faiga faapolotiki?

• O ā tulaga e tofotofoina ai lo tatou solitū?

MANATU FAAOPOOPO

O ā faataulaga e ono manaʻomia ona tatou faia ina ia tausisia ai le solitū?

E Leʻi Tuulafoaʻia e Ieova i Matou (3:14)

O le ā e mafai ona fai e aiga ina ia sauniuni mamao ai mo tofotofoga o le solitū?

Tausisia Pea le Solitū pe a Tulaʻi Mai Tulaga e Luʻia Ai (4:25)

Aiseā e lē avea ai le puipuia e se tasi o lona atunuu o se tofiga e sili ona maualuga?

“E Mafaia e le Atua Mea Uma Lava” (5:19)

Iloilo pe faapefea ona lē avea i tatou o ni tagata o le lalolagi pe a faia filifiliga i galuega.

“E Taʻitasi ma Ave i Lana Lava Avega” (Le Olomatamata, Mati 15, 2006)