Perofeta Pepelo i Aso Nei
SA AUAUNA Ieremia o se perofeta a le Atua i Ierusalema i se taimi ina o taatele ifoga i tupua, amioga lē mamā, iʻuvale, ma le sasaaina o le toto o ē lē sala i le aai. (Ieremia 7:8-11) Sa lē na o ia le perofeta tinoū i lena taimi, ae o le toatele lava o isi, sa auauna mo lo latou lava lelei ma le iʻuvale. I le ā le auala? Ua faalauiloa mai e Ieova: “O perofeta foi atoa ma ositaulaga ua amio pepelo i latou uma. Ua latou fofo faatauvaa le manua o . . . loʻu nuu, ua faapea ane, E manuia, e manuia; a e leai se manuia.”—Ieremia 6:13, 14.
Sa taumafai perofeta pepelo e faafoliga mai faapea, e ui lava i mea iʻuvale uma na faia i le nuu, ae sa lelei mea uma ma sa nonofo fifilemu tagata ma le Atua; ae sa lē o le tulaga lena na iai. Sa latou faatalitalia le faamasinoga a le Atua, e pei ona folafola atu ma le lē fefe e Ieremia. Sa taʻutonuina le perofeta moni o Ieremia, ae e lē o perofeta pepelo, ina ua soloia e fitafita Papelonia Ierusalema i le 607 T.L.M., sa faaumatia le malumalu, ma o tagatānuu, sa lē fasiotia sa tatoso faamalosi ese atu faatagataotauaina i Papelonia mamao. O nai tagata faanoanoa toʻaitiiti na totoe ai i le nuu, sa sosola i Aikupito.—Ieremia 39:6-9; 43:4-7.
O le ā na faia e perofeta pepelo? “O le mea lea faauta, e fai ai moʻu fili o perofeta, o e o fegaoiai aʻu upu, o loo fetalai mai ai Ieova.” (Ieremia 23:30) Sa gaoia e perofeta pepelo le malosi ma āuga o afioga a le Atua e ala i le faalaeiauina o tagata e faalogologo i pepelo na i lo le faalogologo atu i le lapataiga moni mai le Atua. Sa latou taʻu atu, e lē o ‘mea mamana a le Atua,’ ae o o latou lava manatu, o mea sa fia faalogologo i ai tagata. O le feau a Ieremia, sa sau moni mai le Atua, ma ana faapea sa faia e tagata Isaraelu e tusa o ana afioga, semanu e faasaoina i latou. O perofeta pepelo sa latou ‘gaoia afioga a le Atua’ ma na taʻitaʻiina atu ai tagata i le mala. E pei lava ona fetalai Iesu e uiga i taʻitaʻi lotu lē faamaoni o ona aso: “O tauaso i latou e taʻitaʻi i e ua tauaso; afai foi e taʻitaʻiina le tauaso e le tauaso, ona la pauu uma ai lea i le lua.”—Galuega 2:11; Mataio 15:14.
E pei ona iai i aso o Ieremia, ua iai foi perofeta pepelo i aso nei ua faapea mai o i latou o sui o le Atua o le Tusi Paia; ae o i latou foi ua gaoia afioga a le Atua e ala i le talaʻi atu o mea e faatosina ese ai tagata mai mea o fetalai moni ai le Atua e ala i le Tusi Paia. I le ā le auala? Seʻi o tatou taliina lena fesili e ala i le faaaogāina o le aʻoaʻoga faavae o le Tusi Paia e uiga i le Malo o se taʻiala.
Le Upu Moni e Uiga i le Malo
O le Malo o le Atua o le matua autū lena o le aʻoaʻoga a Keriso, ma o loo taʻua e sili atu i le faaselau taimi i tusi Evagelia. I le amataga o lana faiva, na fetalai ai Iesu: “E tatau ona ou folafola le tala lelei o le malo o le Atua i nisi aai foi; auā o le mea lea na auina mai ai aʻu.” Sa ia aʻoaʻo ona soʻo ia tatalo: “Ia oo mai lou malo.”—Luka 4:43; 11:2.
O le ā la le Malo? E tusa ai ma le The New Thayer’s Greek English Lexicon, o le upu Eleni ua faaliliuina i le “malo” i le Tusi Paia o lona uiga muamua, “o le pule mamalu, tulaga tautupu, malo, pulega” ma lona lua, “o le oganuu i lalo o le pulega a se tupu.” Ona o lenei mea, o le a tatou faia ai ma le tonu se faaiʻuga faapea, o le Malo o le Atua o se pulega moni e pulea e se Tupu. Pe o le tulaga ea lea o iai?
Ioe, o lea lava, ma o le Tupu e leai lava se isi, ua na o Iesu Keriso. A o leʻi fanau mai Iesu, na faapea atu le agelu o Kaperielu ia Maria: “E sili o ia, e taʻua foi o le Alo o le Silisili ese; e foai atu e le Alii [o Ieova] ia te ia le nofoaiga a Tavita lona tamā.” (Luka 1:32) O le mauaina e Iesu o se nofoālii ua faamaonia ai o ia o se Tupu, o se Pule faalemalo. O se isi foi faamaoniga faapea o le Malo o se pulega moni, o le valoaga lea a Isaia: “Auā ua fanau mai mo i tatou le tama, ua foaiina mai mo i tatou le atalii, e i lona ua le malo, . . . E leai se mea e gata mai ai ona tele o lona malo ma le filemu o lona malo.”—Isaia 9:6, 7.
O fea e pule ai Iesu? I Ierusalema ea? E leai. Sa vaaia e le perofeta o Tanielu se vaaiga o Iesu o loo tuuina atu i ai le Malo, ma i lana vaaiga o loo vaaia ai Iesu i le lagi. (Tanielu 7:13, 14) Ua talafeagai lenei ma le auala na fetalai ai Iesu e uiga i le Malo. Sa masani lava ona ia taʻua lea o “le malo o le lagi.” (Mataio 10:7; 11:11, 12) E ioe foi lenei manatu ma upu a Iesu ia Pilato ina o faamasinoina Iesu i ona luma: “E le mai le lalolagi nei loʻu malo; afai ana mai le lalolagi nei loʻu malo, po ua tau aʻu auauna, ina neʻi tuuina atu aʻu ia Iutaia; a o lenei, e le mai iinei loʻu malo.” (Ioane 18:36) Pe sa aʻoaʻo atu e la outou faifeau po o la outou patele ia te oe faapea o le Malo o Iesu o se pulega moni lava, o loo pule mai le lagi? Pe sa ia aʻoaʻo atu ia te oe faapea o le Malo ua na o se mea i le loto? Afai o lea, ua ia gaoia la afioga a le Atua mai ia te oe.
O le ā le sootaga i le va o le pulega a le Malo ma ituaiga eseese uma lava o pulega faaletagata? E tusa ai ma le tusi The Encyclopedia of Religion, na faatonutonuina e Mircea Eliade, ina o talanoaina e le tagata Toefuatai o Matini Luteru le Malo, sa ia fautuaina faapea: “O le pulega faalelalolagi . . . atonu e mafai foi ona taʻua o le malo o le Atua.” Ua aʻoaʻo e nisi faapea e mafai e tagata, e ala i a latou lava taumafaiga, ona aumaia pulega faaletagata e tali tutusa ma le pulega a le Malo o le Atua. I le 1983 na faamautinoa mai ai e le Komiti o Lotu i le Lalolagi e faapea: “A o tatou molimau i lo tatou faanaunauga moni mo le filemu faatasi ma gaoioiga maʻoti, ua mafai e le Agaga o le Atua ona faaaogā a tatou taumafaiga faalēlava mo le aumaia o malo o lenei lalolagi ia tali tutusa ma le malo o le Atua.”
E ui i lea, ia matau faapea, i le Tatalo a le Alii (lo “Matou Tamā e”), na aʻoaʻo ai e Iesu ona soʻo e tatalo mo le Malo o le Atua ina ia oo mai, ma i le na o lena lava taimi na ia taʻu atu ai i ona soʻo ina ia tatalo: “Ia faia lou [Atua] finagalo i le lalolagi, e pei ona faia i le lagi.” (Mataio 6:10) I se isi faaupuga, e lē mafaia e tagata ona faaoo mai le Malo e ala i lo latou faia o le finagalo o le Atua. O le oo mai o le Malo ua faapogaia ai ona faia o le finagalo o le Atua i le lalolagi. Faapefea?
Seʻi faalogo i le mea ua fai mai ai le valoaga i le Tanielu mataupu e 2, fuaiupu e 44 e faapea: “O ona po o ia tupu [pule faaletagata i taimi o le iʻuga] e faatuina ai e le Atua o le lagi o le malo e le faaumatia e faavavau; . . . na te tuʻimomomoina ma faaumatia ia malo uma lava.” E lētioa ona fai mai Iesu e lē mai le lalolagi nei lona Malo! Na i lo o lea, o lea Malo o le a na faaumatia malo, pulega, a lenei lalolagi ma tu ai i o latou tulaga i le puleaina o le fanau a tagata. I le avea o le pulega mai le Atua e pulea le fanau a tagata, o le a faamautinoa la e le Malo ua faia le finagalo o le Atua i le lalolagi.
O le mafuaaga mo le faia o lea gaoioiga matuā malosi e le Malo, ua agaʻi ina sili atu ona manino pe a tatou manatunatu po o ai lē o pulea lenei lalolagi. Na tusi le aposetolo o Ioane: “A o le lalolagi uma o loo nofo toilalo i [lē o] leaga.” (1 Ioane 5:19) “O [lē o] leaga” o Satani le Tiapolo, o lē na taʻua e Paulo o “le atua o le lalolagi nei.” (2 Korinito 4:4) E leai se auala e mafai ai e ni faalapotopotoga i se lalolagi ua avea ai Satani le Tiapolo ma ona atua ona mataulia faatasi ma le Malo o le Atua.
O le tasi lenei o mafuaaga na ala ai ona lē aafia Iesu i faiga faapolotiki. Ina ua taumafai pulega lautele faa-Iutaia e fai o ia ma tupu, sa ia aloese mai ia i latou. (Ioane 6:15) E pei ona tatou vāai i ai, sa ia taʻu saʻo atu ia Pilato: “E le mai le lalolagi nei loʻu malo.” Ma i le ōgatasi ai ma lenei mea, na ia fetalai ai e uiga i ona soʻo: “E le ni o le lalolagi i latou, faapei o aʻu foi, ou te le so le lalolagi aʻu.” (Ioane 17:16) O le mea lea, o taʻitaʻi lotu o ē o aʻoaʻo faapea o le oo mai o le Malo o le Atua ua faanatinati e ala i le toe fuataʻiina o lenei faiga o mea ma o ē o loo faalaeiauina a latou lafu ina ia galulue agaʻi i lena sini, o perofeta pepelo i latou. Ua latou gaoia le malosi ma āuga o mea ua fai mai moni ai le Tusi Paia.
Aiseā e Tāua ai Lea Mea?
Pe ua na o se finauga o mafaufauga ona pau lea? E matuā leai lava. O aʻoaʻoga sese e uiga i le Malo o le Atua ua taʻitaʻiseseina ai le toatele ma ua oo lava ina aafia ai le faagasologa o le talafaasolopito. Mo se faaaʻoaʻoga, i le lomiga o le Théo, ua faapea mai ai se lomifefiloi Katoliko Roma: “Ua agaʻi i luma tagata o le Atua i se Malo o le Atua na amataina e Keriso i luga o le lalolagi . . . O le lotu o le fatu lea o lenei Malo.” O le faailoaina o le Lotu Katoliko ma le Malo o le Atua, na avatu ai i le lotu le malosi tele faalemalo i le vaitaimi o le pouliuli i le Taulotoaiga o Tausaga. E oo lava i aso nei, ua taumafai ai pule faalelotu e taaʻina le auala o faiga o mea a le lalolagi, ua galulue ona o le manao o isi faiga faapolotiki ma faasagatau atu ai i isi.
Na faailoa mai e se tasi tagata fai mafaufau se isi foi manatu ua taatele i aso nei ina ua ia faapea mai: “O le pogai o le fouvalega ona o le malo auā o le fouvalega o tagata ia ua ō atu faatasi i se faiga faaletagata na faavaeina e se faaaʻoaʻo tauatua na tuuina mai e ala i le tagata o le upu moni—o Iesu lea . . . o Gandhi ma le au Berrigan.” O le aʻoaʻoga faapea e mafai ona faaauilumaina le Malo o le Atua i faiga faapolotiki ma le lē amanaiaina o mea moni e uiga i le Malo, ua taʻitaʻiina atu ai taʻitaʻi lotu e tauva mo galuega po o tulaga faapolotiki. Ua taʻitaʻiina ai foi isi ina ia faaaafia i latou i taua faifai pea a atunuu ma oo ai foi ina fai se vaega i faiga taua a fitafita lalafi solo. E leai lava se mea o nei mea e ōgatasi ma le upu moni faapea e lē mai le lalolagi nei le Malo. Ma o taʻitaʻi lotu o ē ua matuā aafia loloto i faiga faapolotiki e matuā mamao lava mai le lē ni o le lalolagi, e pei ona fetalai Iesu o le a faapena ona soʻo moni. O i latou o aʻoaʻo faapea ua maua le Malo o le Atua e ala i gaoioiga faapolotiki, o perofeta pepelo i latou. Ua latou gaoia afioga a le Atua mai tagata.
Afai na aʻoaʻo moni e taʻitaʻi lotu i Kerisinetoma mea o fai mai ai le Tusi Paia, atonu la o le a iloa e a latou lafu faapea, o le a foia moni lava e le Malo o le Atua faafitauli e pei o le mativa, faamaʻi, le faailoga lanu, ma teteega. Ae o le a oo mai i le taimi atofa a le Atua ma i le auala a le Atua. O le a lē oo mai i le toe faaleleia o faiga o mea faapolotiki, na o le a mavae ese atu pe a oo mai le Malo. Ana faapea sa avea na taʻitaʻi lotu o ni perofeta moni, semanu latou te aʻoaʻoina a latou lafu faapea, a o faatalitali mo le Malo o le Atua e gaoioi, o le a mafai ona latou maua le fesoasoani aogā moni, mai le Atua e foia ai faafitauli ua faapogaia e le lē faamasinotonu o lenei lalolagi.
I le faaiʻuga, semanu latou te aʻoaʻoina a latou lafu faapea, o tulaga ua faateleina le leaga o loo iai i le lalolagi na ua faapogaia le tele o mafatiaga faalemafaufau, sa valoia i le Tusi Paia ma o se faailoga faapea ua latalata ona oo mai le Malo. Ioe, ua lē o toe umi ona faalaa mai loa lea o le Malo o le Atua ma suia fausaga faapolotiki o iai i le taimi nei. Maeu se faamanuiaga o le a iai!—Mataio 24:21, 22, 36-39; 2 Peteru 3:7; Faaaliga 19:11-21.
Le Fanau a Tagata i Lalo o le Malo o le Atua
O le ā le uiga o le oo mai o le Malo o le Atua mo le fanau a tagata? Ia, pe mafai ona e vaai faalemafaufau i lou ala aʻe i taeao uma ua atoa lelei lou malosi? E leai se tasi e te vaaia e maʻi pe oti. E oo lava i ē pele ia te oe na maliliu ua toe foi mai ia te oe e ala i le toetu. (Isaia 35:5, 6; Ioane 5:28, 29) E lē toe iai ni popolega tau i le tamaoaiga na faapogaia e faatauoa manatu faapito po o faiga lē tutusa tau tamaoaiga. O le a iai lou lava fale talafeagai lelei ma le tele o fanua e faatoʻa e totō ai mea uma e te manaomia mo le fafagaina o le aiga. (Isaia 65:21-23) E mafai ona e fesavaliaʻi solo i so o se mea i so o se taimi o le ao po o le po e aunoa ma le fefe ina neʻi faamanuʻalia oe. E lē toe iai ni taua—leai se mea e faavevesi ai lou saogalemu. O le a vaavaai tagata uma mo lou lelei. Ua leai se tagata amio leaga. Ua pule le alofa ma le amiotonu. Pe mafai ona e vaai faalemafaufau i se taimi faapena? O le ituaiga lena o lalolagi o le a aumaia e le Malo.—Salamo 37:10, 11; 85:10-13; Mika 4:3, 4.
Pe o lenei mea ua na o se miti e foliga mai e lē faataunuuina? E leai. Faitau mau o loo sii mai i le palakalafa lea ua muamua atu, ona e iloa ai lea faapea o mea uma na taʻua i inā ua faaatagia ai folafolaga maʻoti a le Atua. Afai e lē o ia te oe nei le ata manino o mea e mafaia ona faia e le Malo o le Atua ma o le a faia foi mo le fanau a tagata, o lona uiga la ua gaoia e se tasi afioga a le Atua mai ia te oe.
E fiafia lava, ona o le a lē tumau ona iai mea i lena auala. Na fetalai Iesu faapea, i o tatou aso “e talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) O le mekasini o loo e faitauina o se vaega lena o lenei galuega talaʻi. Matou te faalaeiauina oe ina ia aloese mai le faaseseina o oe e perofeta pepelo. Ia suʻe loloto i le Afioga a le Atua ina ia maua le upu moni e uiga i le Malo o le Atua. Ona e gauai atu loa lea i lena Malo, o se sauniuniga a le Leoleo Mamoe Sili, o Ieova le Atua. O le mea moni, ua na o lea le faamoemoe o le fanau a tagata, ma o le a lē mafai ona lē taulau.
[Ata i le itulau 5]
Sa aʻoaʻo e Luteru faapea sa mafai ona manatu i pulega faaletagata e avea o le Malo o le Atua
[Ē Ana le Ata]
Courtesy of the Trustees of the British Museum
[Ata i le itulau 7]
I le faapei o se Leoleo Mamoe alofa, o le a aumaia ai e Ieova e ala i lona Malo tulaga e lē mafai e se tagata ona aumaia