“Ua Faapea Ona Alofa Mai o le Atua ia te i Tatou”

“Afai ua faapea ona alofa mai o le Atua ia te i tatou, e tatau ai ona tatou fealofani.”—1 IOANE 4:11.

1. Ia Mati 23 pe a goto le la, aisea o le a faapotopoto ai le faitau miliona o tagata i Maota o le Malo ma isi nofoaga o sauniga i le lalolagi aoao?

I LE Aso Sa, Mati 23, 1997, pe a goto le la, e lē taumatea o le a silia i le 13,000,000 tagata i le lalolagi aoao o le a faapotopoto i Maota o le Malo ma isi nofoaga o sauniga ua faaaogā e Molimau a Ieova. Aisea? Talu ai ua pāʻia o latou loto e le faailoaga silisili o le alofa o le Atua i tagata. Na tataʻi atu e Iesu Keriso manatu i lena faamaoniga mataina o le alofa o le Atua, i lona fetalai: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.”—Ioane 3:16.

2. O ā fesili e mafai ona aogā ia i tatou le fesiligia ai o i tatou lava e tusa ai o la tatou tali atu i le alofa o le Atua?

² A o tatou talanoaina le alofa ua faaalia mai e le Atua, e lelei pe a tatou fesili ifo ia i tatou lava, ‘Po o oʻu talisapaia moni ea mea ua faia e le Atua? Po o avatu ea e le auala o loo oʻu faaaogā ai loʻu olaga se faamaoniga o lena talisapaia?’

“O le Atua, o le Alofa Lava Ia”

3. (a) Aisea e lē o se mea fou ai i le Atua le faaaliaina o le alofa? (e) Ua faapefea ona faaalia mai le malosi ma le atamai i ana galuega o le foafoaga?

³ E lē o se mea fou i le Atua lona faaaliaina o le alofa, auā “o le Atua, o le alofa lava ia.” (1 Ioane 4:8) Ua avea le alofa ma ona uiga autū. A o ia sauniunia le lalolagi e avea ma nofoaga e mau ai le tagata, na avea ai lona faatupuina aʻe o mauga ma le aoaoina o le suavai e fai ai vaituloto ma le sami, o se faaaliga e matuā maofa ai o le malosi. (Kenese 1:9, 10) Ina ua faagaoioia e le Atua le faataamilosaga o le vai, ma le faataamilosaga o le okesene, ina ua ia fuafuaina le lē mafaitaulia o meaola ninii ma ituaiga eseese o laautotō e faaliliuina ai ni elemeni o le eleele e avea ma meaʻai e mafai e tagata ona faaaogā mo le tausia o o latou ola, ina ua ia faatulagaina le faagasologa o gaoioiga o o latou tino ia fesootai lelei ma le umi o aso ma masina o lenei paneta ua taʻua o le Lalolagi, o nei mea ua faaalia mai ai le tele o le atamai. (Salamo 104:24; Ieremia 10:12) Ae, ua sili atu ona tumatilatila i le foafoaga faitino le faamaoniga o le alofa o le Atua.

4. I le foafoaga faitino, o le ā le faamaoniga o le alofa o le Atua e tatau ia i tatou uma lava ona iloa ma talisapaia?

⁴ E taʻu mai ia i tatou e o tatou gutu o loo tofo ai mea, le alofa o le Atua pe a tatou ʻaina se fua pula susua o se fualaau ʻaina, lea e mautinoa na fai ina ia lē gata e faatumauina ai lo tatou malosi ae tatou te maua ai foi le fiafia. Ua vaaia e o tatou mata ni faamaoniga moni o lea mea i le maofa i le goto matagofie atu o le la, o le lagi ua faatumulia i fetu i se po maninoa, o ituaiga eseese ma lanu mananaia o fugalaau, o āga mālie a tamai manuvaefa, ma foliga ʻataʻata māfana mai o uo. E faamanatu mai e o tatou isu pe a tatou mānavaina le manogi sasala o fugalaau ua mātala mai. E lagonaina e o tatou taliga a o tatou faalogo atu i le paʻō mai o se āfu, o pesega a manufelelei, ma siufofoga o ē pele ia i tatou. E tatou te lagonaina pe a fusi mai ma le māfana i tatou e sē pele ia i tatou. Ua iai i nisi o meaola ni tomai e vaai, faalogo, pe sogisogi ai i mea e lē o mafai e le tagata ona faia faapea. Ae peitai o le tagata, lea na faia i le faatusa o le Atua, ua ia te ia le tomai e lagona ai le alofa o le Atua i se uiga e lē mafai e meaola ona faia.—Kenese 1:27.

5. Na faaalia faapefea e Ieova le anoanoai o le alofa ia Atamu ma Eva?

⁵ Ina ua foafoaina e Ieova le Atua uluai tagata, o Atamu ma Eva, na matuā tele faamaoniga o lona alofa sa la iloa. Na ia totoina se faatoaga, se parataiso, ma faatutupu aʻe ai ituaiga uma o laau. Na ia saunia se vaitafe ina ia faasūsū ai le faatoaga ma faatumu i manufelelei mananaia ma meaola. Na ia tuuina atu nei mea uma ia Atamu ma Eva e avea ma o la aiga. (Kenese 2:8-10, 19) Sa feutagai Ieova ma i laua o sana fanau, o se vaega o lona aiga aoao. (Luka 3:38) I le saunia o Etena e avea o se faataitaiga, na faatulaga ai e le Tamā faalelagi o lenei uluai ulugalii se tofiga e fiafia ai, o le faalauteleina atu lea o le Parataiso ina ia ufitia ai le lalolagi aoao. Sa tatau ona ʻaināina le lalolagi atoa i a la fanau.—Kenese 1:28.

6. (a) O le ā sou lagona i le ala fouvale lea na uia e Atamu ma Eva? (e) O le ā atonu e faaalia ai ua tatou aʻoaʻoina se lesona mai le mea na tupu i Etena ma ua tatou maua ai aogā mai lena malamalamaga?

⁶ Peitai e lei umi lava, ae fesagai loa Atamu ma Eva ma se tofotofoga o le usiusitai, se tofotofoga o le faamaoni. Na muamua le tasi, sosoo atu ai ma le isi i lo la lē taulau ona faaalia le talisapaia mo le alofa na tuuina atu ia i laua. O le mea na la faia sa matuā faateʻia ai lava. Sa aunoa ma se faamolemolega! O le iuga, na la lē toe maua ai la laua faiā ma le Atua, sa tutuliesea mai lona aiga, ma ua tuu ai i fafo atu o Etena. O loo tatou lagonaina pea i aso nei āuga o le la agasala. (Kenese 2:16, 17; 3:1-6, 16-19, 24; Roma 5:12) Ae pe ua tatou aʻoaʻoina ea se lesona mai le mea na tupu? Po o faapefea ona tatou tali atu i le alofa o le Atua? Po o faaalia ea i faaiuga o tatou faia i aso taitasi e faapea o loo tatou talisapaia lona alofa?—1 Ioane 5:3.

7. E ui lava i le mea na faia e Atamu ma Eva, ae na faapefea ona faaalia e Ieova le alofa mo a la fanau?

⁷ E ui lava ina matuā leai se talisapaia na faaalia e o tatou uluai mātua faaletagata mo mea uma na faia e le Atua mo i laua, ae sa lei taofia mai ai e le Atua lona lava alofa. Ona o lona alofa mutimutivale mo tagata e lei fananau mai—e aofia ai i tatou o loo ola mai i aso nei—na faataga ai e le Atua Atamu ma Eva ina ia faia sa la fanau a o lei feoti. (Kenese 5:1-5; Mataio 5:44, 45) Pe ana ia lē faia lena fuafuaga, semanū e leai se isi o i tatou e fanau mai. E ala i le faasolosolo pea ona faaalia mai o lona finagalo, ua saunia ai foi e Ieova mo le fanau uma a Atamu se faavae mo le faamoemoe mo ē uma e faaalia le faatuatua. (Kenese 3:15; 22:18; Isaia 9:6, 7) O lana fuafuaga e aofia ai le auala e mafai ai e tagata o atunuu uma ona toe maua le mea na leiloa ia Atamu, o le ola lelei atoatoa i le avea o ni tagata ua faamaonia o le aiga aoao o le Atua. Na ia faia lenei mea e ala i le saunia mai o le togiola.

Aisea na Saunia ai le Togiola?

8. Aisea na lē lava ai le tau ina poloai mai o le Atua e faapea, e ui lava e tatau ona oti Atamu ma Eva, ae leai se tasi o a la fanau o le a tatau ona oti?

⁸ Pe sa manaomia moni ea ona totogiina le tau o le togiola i se ola faaletagata? Pe na lei mafai ea e le Atua ona tau lava ina poloaia e faapea, e ui lava e tatau ona oti Atamu ma Eva mo lo la fouvale, ae o a la fanau uma o ē o le a usiusitai i le Atua o le a mafai ona ola e faavavau? Atonu ua talafeagai lena pe a fua i manatu e gata mai o tagata. Peitai ane, o Ieova “e fiafia o ia i le amiotonu ma le faamasinoga.” (Salamo 33:5) Na faatoʻā maua fanau a Atamu ma Eva ae ua avea i laua o ni ē agasala; e leai la se isi o le la fanau na fanau mai o lelei atoatoa. (Salamo 51:5) Sa tuufaasolo mai ia i latou uma lava le agasala, ma o le totogi mo le agasala o le oti. Pe ana fai e lē amanaia e Ieova lenei tulaga, o le ā la le ituaiga o faaaoaoga o le a faataatia ai e lena mea mo tagata o lona aiga aoao? E lē mafai ona ia faaleamanaiaina ana lava tapulaa amiotonu. Sa ia tausisia mea e manaomia mo le faamasinoga tonu. E leai lava se tasi e mafai ona ia faitioina ma le saʻo le auala na feutagai ai le Atua ma mataupu o loo aofia ai.—Roma 3:21-23.

9. E tusa ai o le faatulagaga tauatua o le faamasinotonu, o le ā le ituaiga o togiola sa manaomia?

⁹ E mafai la faapefea, ona saunia se faavae talafeagai mo le faasaoina o i latou o le fanau a Atamu o ē faaalia le usiusitai ma le alofa ia Ieova? Pe afai o se tagata lelei atoatoa e maliu faataulagaina, ona mafai ai lea e le faamasinotonu ona faatagaina le aogā o lena ola lelei atoatoa ina ia saunia se totogi mo agasala a i latou o ē o le a talia ma le faatuatua le togiola. Talu ai o le agasala a le tagata e toatasi, o Atamu, ua faapogaia ai ona agasala le aiga atoa faaletagata, o le faamaligiina la o le toto o le isi tagata lelei atoatoa, ona o le tutusa o le tāua, ua mafai ai ona faapaleniina le tulaga o le faamasinogatonu. (1 Timoteo 2:5, 6) Ae o fea e mafai ona maua i ai se tagata faapena?

O le ā le Telē o le Faataulagaina?

10. Aisea sa lē mafai ai e fanau a Atamu ona saunia le togiola na manaomia?

¹⁰ Mai ē na tupuga mai i le tagata agasala o Atamu, sa leai se tasi na mafai ona ia saunia le mea na manaomia ina ia mafai ona toe faatau mai ai faamoemoega o le ola lea na faaleagaina e Atamu. “E le mafaia lava e so latou ona faatau i lona uso, pe avatu i le Atua se togiola mo ia, (auā e matuā faigata le togiola o latou agaga, e le mafaia lava ia e faavavau;) ina ia ola pea ia e faavavau; ia le iloa e ia le tuugamau.” (Salamo 49:7-9) Nai lo le tuulafoai o tagata e aunoa ma se faamoemoe, na faia ai ma le alofa mutimutivale e Ieova lava ia se sauniuniga.

11. O le ā le auala na saunia ai e Ieova le ola lelei atoatoa faaletagata lea sa manaomia mo se togiola talafeagai?

¹¹ Sa lei auina mai e Ieova se agelu i le lalolagi e faatagā foliga ua oti i le tino ae ua toe ola mai i se isi tino peitai o loo faaauau pea ona ola o se agaga. Nai lo o lea, e ala i le faatinoina o se vavega e na o le Atua, o Lē na Foafoaina Mea e mafai ona ia mafaufauina, sa ia faaliliu mai ai le malosi ola ma uiga faaletagata o se atalii faalelagi i le manava o se fafine, o Maria le afafine o Heli, o le ituaiga o Iuta. O le mana galue o le Atua, lona agaga paia, na leoleomaluina le tuputupu aʻe o le tamaitiiti i totonu o le manava o lona tinā, ma fanau mai ai o se tagata lelei atoatoa. (Luka 1:35; 1 Peteru 2:22) O ia la lenei, na aumaia i lona maliu, le tau na manaomia e saunia ai le togiola o le a faamalieina atoatoa ai mea sa manaomia i le faamasinoga tonu a le Atua.—Eperu 10:5.

12. (a) O le ā le uiga ua taʻua ai Iesu o le “Alo e toatasi” o le Atua? (e) Na faapefea e le auina mai e le Atua o ia lenei e saunia ai le togiola ona faamamafaina ai Lona alofa mo i tatou?

¹² O lē fea la o ana mano o atalii faalelagi na avatu i ai e Ieova lenei tofiga? I lē ua faamatalaina i le Tusi Paia o lona “Alo e toatasi.” (1 Ioane 4:9) Ua faaaogā lenei faaupuga e faamatala ai, e lē o le tulaga na iai o ia ina ua fanau mai o se tagata, ae o le tulaga na iai i le lagi a o lei fanau mai o se tagata. E na o ia lava na foafoaina tuusao e Ieova e aunoa ma le lagolagosua i ai o se isi. O ia o le Ulumatua o foafoaga uma. O ia lea na faaaogā e le Atua mo le aumaia i le ola o isi foafoaga ola uma. O agelu o atalii o le Atua, e pei ona sa avea Atamu ma atalii o le Atua. Peitai ua faamatalaina Iesu e faapea ua ia te ia se “mamalu; o le mamalu lava lea o le Alo e toatasi o le Tamā.” Ua taʻua o ia o loo nofo “i le fatafata o le Tamā.” (Ioane 1:14, 18) O lana faiā ma le Tamā o se faiā e vavalalata, e patino ia i laua lava, e matuā māfana. Ua ia te ia le alofa o lona Tamā mo tagata. Ua faamatala mai i le Faataoto 8:30, 31 lagona o lona Tamā i lenei Atalii ma lagona o le Atalii i tagata: “Na fai foi aʻu mona fiafia [le fiafia o Ieova] i lea aso ma lea aso; sa ou olioli i ona luma i aso uma lava. O loʻu [Iesu, le Matai Tufuga a Ieova, le faatinoga o le atamai] fiafia foi, sa i le fanau o tagata lea.” O le Atalii sili ona pele lenei na auina mai e le Atua i le lalolagi e saunia le togiola. O lea la, e maeu le uigā o le faamatalaga a Iesu: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi”!—Ioane 3:16.

13, 14. O le ā e tatau i le tala a le Tusi Paia e faatatau i le taumafai o Aperaamo e ofoina atu Isaako, ona fesoasoani ia i tatou e talisapaia ai le mea na faia e Ieova? (1 Ioane 4:10)

¹³ Ina ia fesoasoani ia i tatou e tau malamalama i le uiga o lena mea, i tuā lava a o lei afio mai Iesu i le lalolagi, na faatonu atu ai le Atua ia Aperaamo, i le tusa ma le 3,890 tausaga ua mavae, e faapea: “Ia e ave lou atalii, o lou atalii e toatasi, o le ua pele ia te oe, o Isaako lava, ma e alu i le nuu o Moria; ma avatu ia te ia e fai ma taulaga mu i lea mea i le tasi mauga ou te taʻuina atu ai ia te oe.” (Kenese 22:1, 2) Sa usiusitai Aperaamo ona o le faatuatua. Seʻi faapea la o oe o Aperaamo. E faapefea pe ana fai o lou atalii lena, e na o le pau lena o lou atalii e te alofa faapelepele i ai? O ā ni lagona o le a ia te oe a o e isiisiina fafie mo le afi o le taulaga, lou faimalaga atu mo ni aso i le laufanua o Moria, ma faataatia lou atalii i luga o le fata faitaulaga?

¹⁴ Aisea e oo ai i se matua loto alofa na lagona? Ua faapea mai le Kenese 1:27, na foafoaina e le Atua le tagata i Lona faatusa. O o tatou faalogona o le alofa ma le alofa mutimutivale e atagia atu ai i sina tulaga itiiti le alofa o Ieova lava ia ma lona alofa mutimutivale. I le tulaga o Aperaamo, sa faalaa ane le Atua, ina ia lē faaaogā moni ai Isaako mo le taulaga. (Kenese 22:12, 13; Eperu 11:17-19) Peitai, i lona lava tulaga, na lei foi Ieova e oo lava i le toe taimi i le saunia o le togiola, e ui lava ina matuā telē se faataulagaina mo ia ma lona Alo. O le mea na faia, e lē ona o se mea e tatau i le Atua ona fai, peitai, o se faailoaga o le agalelei faifua e matuā matilatila. Pe o tatou talisapaia atoatoa ea?—Eperu 2:9.

Le Mea ua Mafai Ona o le Togiola

15. Ua faapefea i le togiola ona aafia ai ola o tagata e oo lava i lenei faiga o mea?

¹⁵ Ua iai se aogā atoatoa o lena sauniuniga alofa na faia e le Atua, i olaga o i latou e taliaina ma faatuatua i ai. I le taimi muamua, sa tagata ese i latou i le Atua ona o le agasala. Sa pei i latou, e pei ona fai mai ai lana Afioga, o ni ‘fili auā o o latou mafaufau sa lolo atu i galuega o le amioleaga.’ (Kolose 1:21-23) Peitai na oo ina latou “lelei . . . ma le Atua i le maliu o lona Alo.” (Roma 5:8-10) Ona o le suia o o latou ala o le olaga ma talia le faamagaloga ua faaavanoa mai e le Atua ia i latou o ē faaalia le faatuatua i le taulaga a Keriso, ua faamanuiaina ai i latou i le mauaina o se loto fuatia ifo mamā.—Eperu 9:14; 1 Peteru 3:21.

16. O ā faamanuiaga ua tuuina mai i le lafu mamoe itiiti ona o lo latou faatuatua i le togiola?

¹⁶ Ua tatala atu e Ieova i se vaega faatapulaaina o i latou nei, o le lafu mamoe itiiti, le faamanuiaga faifua o le auaufaatasi ma lona Alo i le Malo faalelagi, ma le fuafuaga ina ia tauaveina atu le uluai fuafuaga a le Atua mo le lalolagi. (Luka 12:32) O i latou nei ua aumaia “mai ituaiga uma, ma gagana eseese, ma nuu, atoa ma atunuu . . . e faia foi i latou ma nuu faatupu, o ositaulaga foi i lo matou Atua; e fai foi i latou ma tupu i le lalolagi.” (Faaaliga 5:9, 10) O i latou nei, na tusi i ai le aposetolo o Paulo e faapea: “Ua outou maua le Agaga o tamafai, tou te valaau atu ai, ‘Ava, le Tamā e!’ O loo molimau mai lea lava Agaga i o tatou agaga, o fanau i tatou a le Atua. Afai foi o fanau i tatou, o suli foi, o suli lava o le Atua, o suli faatasi ma Keriso.” (Roma 8:15-17) I le avea ma ataliifai o le Atua, ua latou mauaina ai se faiā faapelepeleina lea na leiloa ia Atamu; ae o le a tuuina atu i nei atalii ni faaeaga faaopoopo o le auaunaga faalelagi—o se mea sa lei maua lava e Atamu. E letioa ona faapea mai le aposetolo o Ioane: “Faauta i le silisili o le alofa ua foaiina mai e le Tamā ia te i tatou, ina ua taʻua i tatou o le fanau a le Atua”! (1 Ioane 3:1) O i latou na ua faaali atu i ai e le Atua e lē gata i le alofa e faavae i mataupu silisili (a·gaʹpe) ae o le alofa faapelepeleina (phi·liʹa), lea ua faamatalaina ai le fusi o loo iai i le va o uo moni.—Ioane 16:27.

17. (a) O le ā le avanoa ua tuuina atu ia i latou uma o loo faaalia le faatuatua i le togiola? (e) O le ā o le a uiga i ai mo i latou “le saolotoga o le fanau a le Atua e manuia ai”?

¹⁷ O isi foi—o ē uma e faaalia le faatuatua i le sauniuniga agaalofa a le Atua mo le ola e ala mai ia Iesu Keriso—ua tatalaina i ai e Ieova le avanoa ina ia maua ai le faiā tautele lea na leiloa ia Atamu. Na faamatala mai e le aposetolo o Paulo e faapea: “O loo faatalitali mea uma na faia [le foafoaga faaletagata na tupuga mai ia Atamu] ma le naunau i le faaalia mai o atalii o le Atua [o lona uiga, ua latou faatali i le taimi e faaali manino mai ai, ua faia e atalii o le Atua o ē ua fai ma suli faatasi ma Keriso i le Malo faalelagi, ni gaoioiga mautinoa mo le lelei o tagata]. Auā ua faatoilaloina mea uma na faia i le iu vale [sa fananau mai i latou i le agasala ma le faamoemoe o le oti, ma sa leai se avanoa e mafai ai ona latou faasaʻolotoina i latou lava], (e le o lona loto lea, a e peitai ona o ia na na faatoilaloina ai,) ma le faamoemoe [na foaiina mai le Atua] ia tuusaunoa ia lava mea na faia ia le faapologaina e le iu vale, a e oo i le saʻolotoga o le fanau a le Atua e manuia ai.” (Roma 8:19-21) O le ā o le a uiga i ai lena saʻolotoga? Ua latou saʻoloto mai le faapologaina i le agasala ma le oti. O le a latou maua le lelei atoatoa o le mafaufau ma le tino, o le a fai le Parataiso ma o latou aiga, ma le ola e faavavau lea latou te olioli ai i le lelei atoatoa ma faaali atu ai lo latou talisapaia ia Ieova, o le Atua moni e toatasi. Ae na faapefea ona mafai nei mea uma? E ala mai i le taulaga togiola a le Atalii pele e toatasi o le Atua.

18. Ia Mati 23 pe a goto le la, o le ā le mea o le a tatou faia, ma aisea?

¹⁸ Ia Nisani 14, 33 T.A., i le afeafe pito i luga o se fale i Ierusalema, na faavaeina ai e Iesu le Faamanatuga o lona maliu. O le faamanatuina faaletausaga o lona maliu ua avea o se mea tāua i olaga o Kerisiano moni uma. O Iesu lava ia na poloai mai: “Tou te faia le mea nei e fai ma faamanatuga ia te au.” (Luka 22:19) I le 1997 o le a faia ai le Faamanatuga pe a goto le la ia Mati 23 (lea e amata ai Nisani 14). I lena aso, e leai se mea e mafai ona sili atu lona tāua nai lo le auai atu mo lenei faatasiga o le Faamanatuga.

O le a Faapefea Ona E Tali?

◻ I ā auala ua faaalia ai le anoanoai o le alofa o le Atua mo tagata?

◻ Aisea na manaomia ai se ola faaletagata lelei atoatoa e togiolaina le fanau a Atamu?

◻ O le ā le tele o le faataulagaina na faia e Ieova i le saunia o le togiola?

◻ O le ā le mea ua mafaia ona o le togiola?

[Ata i le itulau 10]

Na foaiina mai e le Atua lona Alo pele e toatasi