Ola mo le Finagalo o le Atua—Nei e oo i le Faavavau
“Outou foi . . . ia le toe usiusitai [outou] i tuinanau o tagata, i ona tausaga ua totoe i le tino, a ia usiusitai i le finagalo o le Atua.”—1 PETERU 4:1, 2.
1, 2. (a) E faapefea ona gaoioi le toatele i le manatu o le usiusitai atu i le finagalo o se tasi tagata? (e) O a ni uiga atonu e i nisi o le faapotopotoga Kerisiano? (i) O lea, o a ni fesili ua lāgā?
E FAAPEFEA ona e gaoioi i le manatu ia tuu atu lou olaga e pulea e le Atua? E toatele i aso nei ua latou inoino i le manatu faapea e lolo atu i le finagalo o se tasi. E oo lava i sosaiete ua manatu i ai faapea e solo lelei ua tulai mai ai e fouvale faasaga i le pule. O le lē taupulea, tetee, faasoesa, ma le saua o mea masani ia o loo faafesagai i aso taitasi. I lalo o omiga ua oo ai ina manifinifi ma maaleale le tulaga malamalama.—2 Timoteo 3:1-3.
2 I le eseesega, ua faaalia ai e Molimau a Ieova faapea ua latou ola mo le finagalo o le Atua e ala i lo latou faamaoni, mo se faaaʻoaʻoga i la latou faiva mai lea fale i lea fale. Ui i lea, e oo lava i totonu o le faapotopotoga Kerisiano, o le agaga fia tutoatasi, ua folasia mai e nisi i le faagasologa o taimi. Atonu e faatava i aʻoaiga a le autoeaina. E faaalia foi e le toaitiiti le lē faaaloalo i le vasega o le “auauna faamaoni ma le mafaufau” ma lana Vaega Pule. (Mataio 24:45-47; Galuega 15:2, 23) O lea ua mapuna ae ai ni fesili: Ai se a e ao ai ona ou gauai atu i le finagalo o le Atua? Ai se a e ao ai ona pulea e le Atua loʻu olaga?
Faaaʻoaʻoga Lē Manatu Faapito
3. O le a le faatonuga na tuuina mai e Peteru e faatatau i ō tatou manatu?
3 O Peteru, o le sa tele ni mea na oo i ai faatasi ma Iesu, sa talitonu e i ai se mafuaaga lelei tele e ola ai mo le finagalo o le Atua na i lo o le faia o le loto o le tagata lava ia. Na ia faapea mai: “O lenei, ua tigaina Keriso i le tino o le sui o i tatou, ia fai ma auupega ia outou foi lea lava loto, auā o le ua tiga i le tino, ua tuu e ia le agasala; ina ia le toe usiusitai o ia i tuʻinanau o tagata, i ona tausaga ua totoe i le tino, a ia usiusitai i le finagalo o le Atua.”—1 Peteru 4:1, 2.
4. Na faapefea ona faaalia e Iesu lona gauai atu i lona Tamā?
4 Ai se a na puapuagatia ai Keriso i le tino? Auā na ia lagolagoina le itu a lona Tamā i le finauga o le silisiliese i le vateatea, po o le pulega. Sa ia faamaonia ai e moni le Atua, a e pepelo Satani. Ma na ia faia lena i lona faatagaina o lona olaga ia pulea e le Atua, e ui lava ina iu ai i le maliu faamaturo.—2 Korinito 5:14, 15.
5. O le a le luʻi ua faataatia e le faaaʻoaʻoga a Iesu i ō tatou luma?
5 A e peitai, o lena maliu o se faaleoga lena o le alofa o le Atua e ala ia Keriso. (1 Ioane 4:10) Ai se a ua faapea ai? Auā o lona iuga, na maua ai e le fanau uma lava a tagata aoga. (Roma 5:8; 6:23) A e pe toafia ua loto malilie e faaaʻoaʻo ia Keriso ma faataulagaina o latou lava manaoga i le gauai atu lea i le finagalo o le Atua?—Eperu 13:15, 17.
Aoga Nei ma i le Lumanai
6, 7. O a aoga o i le gauai atu i le finagalo o Ieova?
6 O lea maeu le talafeagai e oo lava i o tatou aso o le valaau a Ieova na tuuina atu ia Isaraelu i le 2,700 tausaga ua mavae: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i ala e te ui ai. E! ana uai mai ou taliga i aʻu poloaiga, po ua tusa ma se vaitafe lou manuia; ma lau amiotonu, e tusa lea ma peau o le sami.”—Isaia 48:17, 18; faatusatusa le Kenese 22:18.
7 Ua aʻoaʻoina i tatou e Ieova ia tatou maua aoga mo i tatou lava e ala lea i lo tatou ola mo lona finagalo—ma ona aoga e le na o le filemu ma le amiotonu i inei ma le taimi nei lava. E aofia ai ma faamanuiaga i le lumanai o le ola e faavavau, e pei lava ona sa folafola mai e Iesu: “O lenei foi le finagalo o le ua auina mai aʻu [lou Tamā], ia maua le ola e faavavau e i latou uma o e vaai i le Atalii, ma faatuatua i a te ia, ou te toe faatuina foi i latou i le aso gataaga.”—Ioane 6:40.
8. O le a le auala ua faaamafanafana mai ai le folafolaga a Iesu e uiga i le toetu ia i tatou i aso nei?
8 O na upu o se faamafanafanaga sili i Kerisiano faamaoni i aso nei o ē ua agai atu i le tagata matua i tausaga. O lenei faiga o mea ua i ai nei i lona 72 tausaga talu mai le aso faitaulia o le 1914. Ua faaumiumi pea ona i ai le lalolagi a Satani na i lo o le mea na mantu i ai le toatele. O le mea moni, o nisi o Kerisiano faamaoni sa manatu o le a vaai ia Amaketo ma le amataga o le faiga fou o mea i ō latou olaga, ua maliliu. Peitai o ō latou ola, na tuuina atu i le faia o le finagalo o le Atua, o le a le iuvale. E faamaoni Iesu i lana upu, o le a ia toe faatutuina i latou ma avatu i ai le aoga o le ola e faavavau.—Ioane 5:28, 29; 1 Korinito 15:58.
Tulaga o le Loto o Keriso
9, 10. (a) O le a e tatau ona faaauupegaina ai i tatou? (Filipi 2:5-8) (e) O le a se mea faapitoa e uiga i le upu Eleni o loo faasino i le “tulaga o le loto’ e pei ona taʻua i le 1 Peteru 4:1?
9 O le a e mafai ai ona faigofie ona tatou gauai atu i le finagalo o le Atua? E tusa ai ma le faatonuga a Peteru o loo taʻua i le palakalafa e 3, e tatau ona faaauupegaina i tatou “i lea lava loto” sa ia Iesu.—1 Peteru 4:1.
10 Ua faaaogaina e Peteru i inei se upu Eleni e na o le faalua lava ona maua i Tusitusiga Eleni—enʹnoi·a. E ui ina ua faasino e nisi tagata faaliliu i le “manatu,” i le faa-Eleni nous. O le mea lea, i lalo o le faagaeega sa i ai ni manatu faapitoa i le mafaufau o Peteru ina ua ia filifilia lenei nauna e le faaaogaina soo. Fai mai le tagata suesue i le faa-Eleni o W. E.Vine o le enʹnoi·a “e faailoa ai se fuafuaga, ni manatu, po o se ata.” I le usi a J. H.Thayer le Greek-English Lexicon o loo faamatalaina ai o “se laasaga o manatu ma faalogona.”
11. O le a e mafai ona tatou aʻoaʻoina mai le faaaʻoaʻoga a Iesu e tusa ai ma le auala e faaaogaina ai o tatou olaga?
11 O le pogai o le gaoioiga faataulagaina totino a Iesu na faaalia a lana fuafuaga, po o le faatatau. Sa lei ola i se olaga faatagafai, e na ona sailia o fiafiaga ma faamalieina. Sa ia silafia lelei lava e lei lafoia lona uluai soifuaga faalelagi ina ia faamaumauina ai i ni nai tausaga i luga o le lalolagi mo ni fuafuaga manatu faapito. (Tagai i le faaeseesega i le Kenese 6:1, 2, 4, ma Iuta 6.) O lea, sa ia fetalai: “Auā ou te lei alu ifo mai le lagi e fai loʻu loto, a o le finagalo o le ua auina mai aʻu.” (Ioane 6:38) E tasi pē le mea na taulai atu i ai Iesu i lona tuutoina atu lea i ala o lona Tamā, i le faamuamua pea lava e Iesu le finagalo o lona Tamā na i lo o ona lava manaoga, e oo lava i le taimi o lona maliu tiga.—Luka 22:42.
12, 13. (a) Na faapefea ona faailoa e Iesu le tulaga o lona loto i le vaipuna o Iakopo? (e) O le a sa uiga i ai Iesu ina o ia fetalai atu,“O ia te aʻu mea e ʻai tou te le iloa”?
12 E oo lava foi ina ua vaivai ma fia taumafa, sa faaalia manino e Iesu le tulaga o lona loto agai le finagalo o lona Tamā. I se tasi o mea na tupu, a o ō atu ona soo e faatau ma ni mea ʻai, sa ia malolo i le vaipuna o Iakopo. Na i lo o le faia o sina malologa ua tatau ai i le moe seia foi mai le ausoo, na faamalosia o ia e faia le finagalo o le Atua. Sa ia faia se laasaga e lē masani ai mo se Iutaia, Na ia faatalanoaina se fafine Samaria. Sa ia faapupula ona mata i se malamalamaga e uiga i le Atua moni. O le iuga la, “e toatele Samaria i lea aai na faatuatua ia te ia, ona o le upu a le fafine na ia fai atu ai.”—Ioane 4:6-26, 39-42.
13 Ina ua foi mai ona soo, sa latou nanati atu ia te ia ia taumafa loa. O le a lana tali ia i latou? “O ia te aʻu mea e ʻai tou te le iloa.” Sa fememeai le au soo i lana tali ona ia toe faapea atu lea: “O laʻu mea e ʻai, ia ou faia le finagalo o le na auina mai aʻu, ma i le taumafaina o mea ʻai lelei sa olioli ai o ia i le faamalie loto moni na iu i ai. Pe afai tatou te mananao ia maua se lagona moni e faataunuuina i ō tatou olaga, e leai lava se mea e sili atu ona lelei e faia na i lō o le mulimuli atu i le faaaʻoaʻoga a Iesu Keriso.—Ioane 4:31-38.
Aafiaga o le Tulaga o le Loto o Keriso
14. O le a tatou te manaomia ina ia maua le tulaga o le loto o Keriso? Faataʻitaʻi.
14 E faapefea ona aafia i tatou i le mauaina o le tulaga o le loto o Keriso? Afai tatou te aʻoaʻo ia manatu e pei o Keriso, ona ia i tatou lea o se malosi i totonu o le a taʻitaʻiina ai i tatou e faia mea sa faia e Iesu i lalo o so o se tulaga. (Luka 22:42; Efeso 4:23, 24) O lenei malosi e le na o se iuga o le mataʻu ona o se faasalaga, e pei o aʻoaiga mai le autoeaina i le faapotopotoga, a e mai le talisapaia atoatoa o tulafono a Ieova ma ana mataupu silisili. E mafai ona tatou faatusatusaina lenei tulaga i se tagata e faatoa usiusitai lava i tulafono tau auala pe a vaaia se leoleo—e na ona gauai atu i se faatosinaga ona o le vaaiga i fafo. A e o le tagata e faitaulia ia te ia le ola, e alofa i lona tuaoi, ma talia le atamai o le i ai o tulafono tau auala ma o le a ia usiusitai auā e faaaloalo i le tulafono. E i ai la se uunaiga malosi i totonu ia te ia.—Salamo 51:10.
15. (a) O le a e faaamonia ai sa i ai se malosi i totonu o Iesu e faagaoioia ai lona mafaufaua? (Efeso 4:23) (e) O a faaaʻoaʻoga o le faamaoni ua aumaia ai se faamaoniga o le tulaga o le loto o Keriso i Kerisiano i aso nei?
15 Sa ia Iesu lena ‘malosi i totonu e faagaoioia ai lona mafaufau.’ O lea na faamaoni ai o ia i le finagalo o lona Tamā, e oo lava i le oti. Sa ia tumau i tiga e aunoa ma se faitio po o se upu i ē na faasaua ia te ia. (1 Peteru 2:21-24) O nisi taimi o i tatou i le avea o ni Kerisiano atonu tatou te oo ai foi i lalo o ni omiga faapena. O pule e tetee mai atonu latou te taumafai e taofia le galuega talai ma sauniga, e pei ona latou faia i Sepania i le vaitaimi o Franco ma le tele lava o atunuu Europa i le vaitaimi o pulega faa-Nase. Na sauaina nisi o uso ma tuafafine ona o se taumafaiga ia latou faalataina uso sa taimua o le faapotopotoga. E ui lava i sauaga, a e o le toatele na tutu mausali. (Tagai i le 1978 Yearbook of Jehovahʻs Witnesses, itulau 171-2, 182-3; ma le 1986 Yearbook of Jehovahʻs Witnesses, itulau 137-59.)
16. O a nisi o auala atonu e tofotofoina ai i tatou i aso nei? E faapefea ona tatou teena?
16 A e atonu o le a oo mai ia i tatou ni omiga ona o le solitu faa-Kerisiano po o le tuuina o le toto. (Galuega 5:29; 15:28, 29) O lea, ua tulai mai ai se fesili, Pe tatou te ola ea mo le finagalo o le Atua po o loto o tagata? Po o le tulai ma foi o se tofotofoga fuilua ona o manaoga o le tino ma aumea faalemanuia. Atonu po o aʻoga po o le mea e faigaluega ai, o le a aumaia ai le avanoa e faatosina ai ia ulaula pe o le inuina foi o vailaau faasaina e aunoa ma le iloa e se tasi i le faapotopotoga. A e faapefea le tofotofoga o se lūlū? Po o le faia o le faitaaga ma le mulilua? O lea, e masani lava o amioga i galuega faalelalolagi e aumaia ai mafaufauga ma gaoioiga sese—sei vagana ua ia i tatou le taotasi o Keriso faatatau i le faia o le finagalo o le Atua. O le a o le a e faia? Pe o le a ia te oe le malosi saʻo e faagaoioia ai lou mafaufau ina ia e mulimuli i le ala o Keriso ma gaoioi ai i lalo o ia tulaga.?—Efeso 4:17-20; 1 Ioane 2:15,16.
17, 18 (a) O le a le manatu malosi ua tuuina mai e Peteru e faatatau ia i latou e agasala pea? (e) O le a e manaomia ina ia teena le aafiaga i le agasala?
17 Sa faamamafa atili mai e Peteru le manaoga mo le faia o le finagalo o le Atua ina o ia faatonu mai: “Auā ia gata ia i aso ua mavae o le olaga nei ona fai ai e i tatou o le manao o e faapaupau, sa savavali i le faamatāitu ma tuʻinanau, ma le inu tele i uaina, ma poula, inugāava, ma le ifo i tupua e soli ai tulafono. O le mea lea e ofo ai ma faifai ia i latou, auā tou te le taufetuli ma i latou i lea lava ulavale silisili; latou te tala atu le tala i le ua saunia e faamasino i e ola ma e ua oti.”—1 Peteru 4:3-5.
18 Ua faamalosia e Peteru le manatu i inei—o i latou o ē e le amanaia le finagalo o le Atua e tau salaina. (Faatusatusa le Roma 14:12 ma le Eperu 13:17) Sa faia foi e Paulo se faaiuga faapena i lana tusi ia Kolose, lea na ia tusi ai: “O lenei, ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tuʻinanauga leaga, ma le matapeapea, (o le ifo i tupua lava lea); o mea ia e oo mai ai le toasa o le Atua i e le faalogo.” O i latou uma e faia mea faapena, o le mea moni e le o ola e tusa ai ma le finagalo o le Atua a e, e mo le faamalieina o o latou lava manaoga o tuʻinanauga. A e mafai ona ō ese tagata mai na amioga leaga, auā e pei ona tusia e Paulo, “O outou foi na outou savavali ai foi anamua, a o outou nonofo ai,”—Kolose 3:5-7; Efeso 4:19; tagai foi i le 1 Korinito 6:9-11.
Ia Iloa Le Finagalo o le Atua
19. Ua faapefea e le toatele ona faaalia nei faapea o loo latou ola mo le finagalo o Ieova.? (Roma 12:1,2.)
19 I nei tausaga mulimuli o le 20 senituri, e sili atu i le tolu miliona tagata ua iloa po le ā le finagalo o le Atua mo i latou. Ma o le iuga, ua latou talaia nei ma le maelega le pulega a le Malo o le Atua. (Galuega 8:12; Mareko 13:10) Latou te lē o ola mo i latou lava e pei ona faia e le toatele o tagata. Ua latou iloa e le o toe umi a e aumaia e le Atua le iuga o lenei faiga iuvale, ma ua latou faia le faataulagaina e fesoasoani atu ai i isi ina ia maua lenei poto saʻo, e pei ona faatonu mai e le aposetolo o Paulo: “Ia faaeteete outou ina ia outou savavali ma le faautauta, aua neʻi faapei o e valelea, a ia faapei o e popoto; ia faaaogaina e outou aso o lenei olaga, auā o ona po nei ua leaga. O lenei, aua neʻi faavalea outou, a ia outou iloa le finagalo o le Alii [o Ieova].”—Efeso 5:15-17.
20, 21. (a) E faapefea ona tatou vaaia le meaalofa o le ola? (Iakopo 4:13-17) (e) E faapefea ona mafai ona tatou aloese mai le amio faatasi ma le lalolagi?
20 O le olaga e pei o se ipu, vai malū. I uluai tausaga o le olaga o le tagata, e “inu” manavanava loloa ai ma faatopetope—seia oo ina ia taumanatunatu pe toe fia ni tausaga o le olaga o loo totoe i totonu o le “ipu.” O le palo lena ua iso ai tagata uma. O lea, maeu le tāua o le ola i se olaga o tiute fai agai i le Atua ma uso a tagata! Maeu le faitaulia o le faia o le finagalo o le Atua a e lē o le manao o le loto faapito o le tagata lava ia!—Mataio 7:21,24,26.
21 A e peitai, o le ola i le lalolagi o loo pulea e le agaga o Satani e pei ona tatou i ai nei, e le faigofie ai ona tatou ola mo le finagalo o le Atua. (Faaaliga 12:9) O loo fetuleni mai pea i taimi uma omiga ina ia taʻitaʻi atu ai i tatou i manaoga o le lalolagi ma uiga o ona manatu. O aga tifiga ma fesuisuiaiga eseese e mafai ona tosina atu ai nisi o le faapotopotoga, ina ia latou pei o tagata e tupuga mai i tagata faafiafia lauiloa. Maeu le talafeagai, o le fautuaga a Paulo: “Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se ā le finagalo o le Atua, o mea ua lelei, ma le mālie ma le atoatoa”!—Roma 12:2.
22. (a) O le a le finagalo o le Atua mo o tatou aso? (e) E faapefea ona tatou faailoa atu o loo tatou ola mo le finagalo o le Atua? (i) O le a le faamanuiaga o loo tatalia mai i latou o loo ola moni mo le finagalo o le Atua?
22 O le finagalo o le Atua ia “talaiina atu foi lenei tala lelei o le Malo” i le lalolagi atoa a o ia lei aumaia le iuga i le faiga o mea a le lalolagi o i ai nei. (Mataio 24:14; Faaaliga 14:6, 7) O lenei mea ua aumaia ai se mafuaaga sili e tali atu ai i le valaau mo nisi foi faifeau sauatoa pe a tusa ai ma ou tulaga. O le mafuaaga foi lenei mo toeaina ma auauna o le faiva ina ia faaavanoaina i latou e ō atu i faapotopotoga i se mea atonu o manaomia ai la latou fesoasoani. O se mafuaaga e ufitia ai lenei mo Molimau moni taitoatasi uma ina ia avea ma molimau Kerisiano faamaoni— ia lē na ona fai o se igoa a e ia ola moni mo le finagalo o le Atua nei e oo i le faavavau. Ia e iloa o lou faia faapea o le a e “teua ai oa mo oe lava ma le saogalemu o se faavae lelei mo le lumanai, ina ia e tago atu i le ola e faavavau.”—1 Timoteo 6:19.
O le a Faapefea ona E Talia?
◻ Na faapefea ona faaalia e Iesu sa ia ola mo le finagalo o le Atua?
◻ O a aoga ua avanoa nei mo i latou e ola mo le finagalo o le Atua?
◻ O le a le tulaga o le loto o Keriso agai i le finagalo o le Atua?
◻ E faapefea ona aafia i tatou i le ‘malosi lea e faagaoioia le mafaufau’?
◻ E faapefea la tatou vaaiga i le ola?
[Ata i le itulau 15]
Ua e usiusitai ea ona o lou talisapaia o le tulafono, pe ona ua i ai se leoleo?