O Ē Pele ia te Oe ua Maliliu—Pe o le a E Toe Vaai ia i Latou?
SA NA o le iva tausaga o Ioane ina ua maliu lona tinā. Mulimuli ane, sa ia manatua le mea na tupu i le fale maliu: “Sa ou tusia se ata mo ia ma tusi ai i le ata sina tusi puupuu, e talosaga atu ai ia te ia e faatali mai i le lagi mo i matou uma lava. Sa ou avatua ia Tamā lea ata ina ia tuu i totonu o le pusa maliu faatasi ma ia, ma e ui lava ua oti o ia, ae sa ou fiafia pea e manatu, sa ia maua lea feau mulimuli mai ia te aʻu.”—How It Feels When a Parent Dies, tusia e Jill Krementz.
E lē taumatea sa alofa faapelepele Ioane i lona tinā. Ina ua uma ona faamatala ona uiga lelei, ona ia faapea mai lea: “Atonu ona ou te lē manao e manatua ni mea leaga, ae ou te lē manatua lava se mea leaga e uiga ia te ia. O ia o se tamaitai aupito sili ona aulelei ua ou vaaia i loʻu olaga atoa.”
I le pei o Ioane, e toatele lava e iai manatunatuga lelei e uiga i ē pele ia i latou ua maliliu, ma oo ai le faalogona ootia o le manao e toe fia vaai ia i latou. Fai mai Edith, o lē na maliu lana tama e 26 tausaga le matua i le maʻi o le kanesa, e faapea: “Sa ou manao ina ia ou talitonu o loo ola si aʻu tama i se isi mea, ae ou te lē iloa po o fea. Po o le a ou toe vaai ea ia te ia? Ou te lē iloa, ae ou te faamoemoe o le a ou toe vaai i ai.”
E mautinoa, o Lē alofa na Foafoaina le tagata, e lē faapea e lē o iai sona faalogona alofa faapena e uiga i lenei faanaunauga masani o le tagata. O le mafuaaga lena na ia folafola mai ai e faapea, e oo mai le taimi o le a toe feiloai ai le faitau miliona o tagata ma ē pele ia i latou ua maliliu. O loo i le Afioga a le Atua le anoanoai o faasinoga i lenei folafolaga i se toetu o loo fotuai mai o ē ua maliliu.—Isaia 26:19; Tanielu 12:2, 13; Hosea 13:14; Ioane 5:28, 29; Faaaliga 20:12, 13.
O Ai e Toe Faatutuina i le Lagi?
Seʻi o tatou talanoaina le faamoemoe o Ioane e faapea o loo faatali mai lona tinā pele mo ia i le lagi. O le toatele o tagata e ō i lotu, o loo iai lenei faamoemoe po o le talitonuga. I le taumafai e lagolagoina na manatu, ua faatatauseseina ai e taʻitaʻi lotu, ma tagata e faigaluega mo le lelei lautele o ē pagatia, mau mai le Tusi Paia.
Mo se faaaʻoaʻoga, na faapea mai se tamaitai tomai i le avatua o fesoasoani i ē faanoanoa, o Dr. Elisabeth Kübler-Ross, i lana tusi On Children and Death: “O le oti o lona uiga, ua na ona lafoaia o o tatou tino e pei ona tatou lafoaia o se ofu tuai ua masaesae, po o se laasaga mai le tasi potu i le isi. I le Failauga 12:7, ua tatou faitau ai e faapea: ‘Ma toe foi atu le efuefu i le eleele e pei ona i ai ia, ma toe foi atu le agaga i le Atua o le na foaiina mai ai.’ Na fetalai Iesu e faapea: ‘Ou te alu e sauni se mea e nonofo ai outou, ina ia iai outou i le mea ou te iai aʻu.’ Ma na faapea atu i le faomea sa i luga o le koluse: ‘O le asō ta te faatasi ai ma oe i parataiso.’”
Po o le uiga moni o mau na o loo i luga e faapea, o ē pele ia i tatou ua maliliu, o loo ola nei, ma o loo faatalitali mai ia i tatou i le lagi? Seʻi o tatou iloiloina ma le matuā faaeteete nei mau, e amata mai i le Failauga 12:7. E manino lava, o le tagata poto na ia tusia na upu, sa leʻi iai sona faanaunauga e faafeteenai ma isi faamatalaga na ua uma ona ia taʻua i le tusi lava lea e tasi o le Tusi Paia: “O e ua ola, ua latou iloa e oti i latou; a o e ua oti, latou te le iloa se mea.” (Failauga 9:5) Sa ia talanoaina le maliu o tagata lautele. Po o se mea saʻo le talitonu faapea, e toe foi atu i le Atua i latou uma ua taʻutino mai e lē talitonu i le Atua, ma tagata amio leaga e lē salamō pe a feoti i latou? Ailoga. O le mea moni, e lē mafai ona fai mai se isi o i tatou faapea tatou te toe foi atu i le Atua, e tusa pe tatou te manatu ia i tatou e lelei pe leaga. Ona e leai se tasi o i tatou sa iai ma le Atua i le lagi, e faapefea la ona fai mai tatou te toe foi atu ia te ia?
O le ā la le uiga o le tala a le tusitala o le Tusi Paia e faapea, i le oti, ‘e toe foi atu le agaga i le Atua moni’? I le faaaogāina o le upu Eperu lea ua faaliliuina o le “agaga,” sa leʻi faasino atu o ia i se mea tutasi, e faaesea ai le tasi tagata mai le isi. Na i lo o lea, i le Failauga 3:19, ua faamatala mai ai e le tusitala lava lea o le Tusi Paia e faapea, o tagata ma manu “e tasi lava le mānava [“agaga,” NW] ia te i latou uma.” E manino lava la, sa ia faauiga faapea o le “agaga,” o le malosi o le ola i sela na o loo faia aʻe ai tino o tagata ma manu. Tatou te leʻi maua tuusao mai lenei agaga mai le Atua. Sa tuufaasolo mai ia i tatou e o tatou mātua faaletagata ina o afuafua i tatou ma fananau mai ai mulimuli ane. E lē gata i lea, o le agaga lenei e lē malaga moni atu i le vateatea ma toe foi atu i le Atua pe a oti le tagata. O le faaupuga, ‘e toe foi atu le agaga i le Atua moni,’ o se faamatalaga faafaatusa, o lona uiga e faapea, o le faamoemoe mo le ola i le lumanai o le tagata ua maliu, ua faalagolago atu nei i le Atua. O ia la e filifilia po o ai o le a ia manatua, ma toe faatuina ai mulimuli ane. Ia mātau lelei e oe lava ia po ua faapefea ona faaalia manino mai lenei mea i le Tusi Paia i le Salamo 104:29, 30.
Na fuafuaina e Ieova le Atua e faapea, o se fuainumera faatapulaaina o soʻo faamaoni o Keriso, e na o le 144,000 le aofai, o le a toe faatutuina i le ola faalelagi e avea o atalii agaga o le Atua. (Faaaliga 14:1, 3) O i latou nei ua faia aʻe ai le pulega faalelagi faatasi ma Keriso, ina ia tuuina mai faamanuiaga i tagata i le lalolagi.
O uluai tagata lava na latou aʻoaʻoina e uiga i lenei mea, o aposetolo faamaoni o Iesu, o ē na ia fetalai atu i ai: “E tele mea e nonofo ai i le maota o loʻu Tamā; ana leai, po ua ou fai atu ia te outou; ou te alu e sauni se mea e nonofo ai outou. Afai foi ou te alu ma sauni se mea e nonofo ai outou, ou te toe sau, ou te talia foi outou ia faatasi ma aʻu; ina ia i ai outou i le mea ou te i ai aʻu.” (Ioane 14:2, 3) O na aposetolo ma isi uluai Kerisiano na maliliu, ma sa faatali ma le lē iloa o se mea i le oti seia afio mai Iesu e tauia i latou i se toetu faalelagi. O le mafuaaga lena ua tatou faitau ai e faapea, o le uluai maturo Kerisiano, o Setefano, na “moe i le oti.”—Galuega 7:60, NW; 1 Tesalonia 4:13.
Toetu i le Ola i le Lalolagi
Ae faapefea le folafolaga a Iesu i le pagota o lē na oti i ona tafatafa? I le pei o le toatele o tagata Iutaia i lena taimi, na talitonu lenei tagata e faapea, o le a auina mai e le Atua se Mesia o lē o le a na faavaeina se malo ma toe faafoisia le filemu ma le saogalemu i le nuu o Iutaia i le lalolagi. (Faatusatusa le 1 Tupu 4:20-25 i le Luka 19:11; 24:21 ma le Galuega 1:6.) E lē gata i lea, na faaalia e le pagota le faatuatua e faapea, o Iesu sa o Ia tonu lava lea na filifilia e le Atua e avea ma Tupu. Ae peitai, i lena lava taimi, o le maliu o Iesu e pei o se tagata agasala lea ua toeitiiti oo i ai, na foliga mai ai o le a lē taunuu lena folafolaga. O le pogai lena na faamautinoa atu ai e Iesu i le pagota e ala i le faailoa atu o Lana folafolaga i upu nei: “E moni ou te fai atu ia te oe i le asō, O le a ta faatasi ma oe i Parataiso.”—Luka 23:42, 43, NW.
O faaliliuga o le Tusi Paia na latou faaofi le koma i luma o le upu “asō,” ua latou faatupuina se faafitauli mo tagata o ē o loo fia malamalama i upu a Iesu. E leʻi alu atu Iesu i se parataiso i lena lava aso. Na i lo o lea, sa taoto ma le lē silafia o se mea i le maliu mo aso e tolu, seia oo ina toe faatuina o ia e le Atua. E oo lava i le taimi ina ua uma ona toe faatuina Iesu ma afio atu i le lagi, sa faatali o ia i le itu taumatau o lona Tamā seia oo i le taimi mo ia, e pule ai o se Tupu i luga o tagata. (Eperu 10:12, 13) Ua lē pine, ona aumaia lea e le pulega a le Malo o Iesu le mapusaga i tagata ma faaliliuina le lalolagi atoa i se parataiso. (Luka 21:10, 11, 25-31) Ona ia faataunuuina loa lea o lana folafolaga i lena pagota e ala i le faatuina o ia i le ola i le lalolagi. Ma o le a faatasi Iesu ma lea tagata i se uiga faapea, o le a Ia fesoasoani i manaoga uma o lea tagata, e aofia ai ma le manaoga ia ogatasi lona olaga ma tulafono amiotonu a le Atua.
Toe Faatutuina o le Toatele
E pei o lena pagota na salamō, o le a toe tutū ai foi le toatele o tagata i inei i le lalolagi. Ua ogatasi lenei mea ma le fuafuaga a le Atua na foafoaina ai le tagata. Sa tuuina le uluai tane ma le fafine i se faatoaga parataiso, ma taʻu atu ia i laua ina ia faatoilalo le lalolagi. Ana tumau lo la usiusitai i le Atua, semanu la te lē matutua ma feoti. I le taimi atofa a le Atua, o le a faatoilaloina ai le lalolagi uma, ma faia le lalolagi aoao o se parataiso e Atamu ma ē lelei atoatoa e tupuga mai ia te ia.—Kenese 1:28; 2:8, 9.
Ae peitai, ona sa agasala ma le loto i ai Atamu ma Eva, na la aumaia ai le oti ia i laua lava ma a la fanau i le lumanai. (Kenese 2:16, 17; 3:17-19) O le mea lena ua fai mai ai le Tusi Paia e faapea: “Faapei ona oo mai o le agasala i le lalolagi i le tagata e toatasi [o Atamu], o le oti foi ona o le agasala, ona oo mai ai lea o le oti i tagata uma lava, auā ua agasala uma lava.”—Roma 5:12.
E na o le toatasi lava le tagata na fanau mai e aunoa ma se agasala tuufaasolo. O le Alo lelei atoatoa lena o le Atua, o Iesu Keriso, o lē na faaliliuina mai lona soifua mai le lagi i le manava o se taupou Iutaia, o Maria. Sa tumau pea le lē agasala o Iesu, ma sa lē tatau ai ona fasiotia o ia. O lea la, o lona maliu, sa aogā mo le togiolaina o “le agasala a le lalolagi.” (Ioane 1:29; Mataio 20:28) O le pogai lena na mafai ai ona faapea atu Iesu: “O aʻu nei o le toe tu ma le ola; o lē faatuatua mai ia te au, e ui lava ina oti, ae ola lava ia.”—Ioane 11:25.
Ioe, e mafai ona e mautinoa i le faamoemoe o le toe aufaatasi atu lea ma ē pele ia te oe ua maliliu, ae e manaomia e lenei mea le faaalia o lou faatuatua ia Iesu o Lē na te Togiolaina oe, ma usiusitai ia te ia o le Tupu tofia a le Atua. E lē o toe umi se taimi ona tafiesea lea e le Malo o le Atua mea leaga uma mai lenei lalolagi. O tagata uma e mumusu e gauai i lenei pulega, o le a faaumatia. Ae peitai, o le a faasaoina tagatanuu o le Malo o le Atua ma o le a tele a latou feau i le galuega o le faaliliuina o lenei lalolagi i se parataiso.—Salamo 37:10, 11; Faaaliga 21:3-5.
Ia ona oo mai loa lea o le taimi e matuā fiafia ai mo le amataina o le toetu. Po o le a e iai e faafeiloaia ē ua maliliu? E faalagolago mea uma i le mea o loo e faia nei. O faamanuiaga matagofie o loo i luma mo i latou uma e gauai atu nei i le pulega a le Malo o Ieova e ala i lona Alo, o Iesu Keriso.