“O Aʻu Uō Outou”

“O aʻu uō outou pe afai tou te faia mea ua ou poloaʻi atu ai iā te outou.”—IOA. 15:14.

1, 2. (a) O ā talaaga o olaga o uō a Iesu? (e) Aiseā e tāua ai le avea o i tatou ma uō a Iesu?

O TANE o loo nonofo faatasi ma Iesu i le potu pito i luga, e eseese o latou talaaga. O le ʻauso o Peteru ma Aneterea, o ni tagata faifaiva. O Mataio, sa avea muamua ma aolafoga, o se galuega sa inosia e tagata Iutaia. O isi e pei o Iakopo ma Ioane, e foliga mai na la iloa Iesu a o laiti. Ae o Natanielu, atonu na ia iloa o ia mo ni nai tausaga. (Ioa. 1:43-50) Peitaʻi, sa talitonu i latou uma na iai i lenā po tāua i le Paseka i Ierusalema, o Iesu o le Mesia na folafolaina, o le Alo o le Atua soifua. (Ioa. 6:68, 69) E mautinoa lava sa faamāfanafanaina o latou loto ina ua faalogo atu o faapea mai o ia: “Ua ou taʻua outou o uō, auā ua ou faailoa atu iā te outou mea uma na ou faalogo ai i loʻu Tamā.”—Ioa. 15:15.

² O na fetalaiga a Iesu i ona aposetolo faamaoni, o loo faatatauina muamua i Kerisiano faauuina uma i aso nei, ma ua faalautele atu foʻi i a latou aumea o “isi mamoe.” (Ioa. 10:16) Po o ā lava o tatou talaaga, ae e mafai ona tatou maua le faaeaga o le avea ma uō a Iesu. E matuā tāua la tatou faauōga ma Iesu, ona o le avea ma ana uō, ua avea ai foʻi i tatou ma uō a Ieova. Auā o le mea moni, e lē mafai ona tatou faalatalata atu iā Ieova pe a leai se faauōga ma Keriso. (Faitau le Ioane 14:6, 21.) O le ā la e ao ona tatou faia ina ia avea ai ma uō a Iesu, ma faatumau ai i lenā faauōga ma ia? A o leʻi talanoaina lenā mataupu tāua, seʻi o tatou iloiloina le faaaʻoaʻoga a Iesu i le avea ma uō lelei, ma aʻoaʻoina mai i le auala na tali atu ai ona soo iā te ia.

Le Faaaʻoaʻoga a Iesu i le Avea o se Uō Lelei

3. O ā mea sa lauiloa ai Iesu?

³ Na tusi le tupu poto o Solomona e faapea: ‘E toʻatele uō a le mauʻoa.’ (Faata. 14:20) Ua faatatau lenā faamatalaga i le faanaunauga o tagata lē lelei atoatoa e faia se faauōga e faavae i mea e maua mai ai, nai lo o mea e foaʻi atu. E leʻi faapena Iesu. E leʻi taaʻina o ia i le tamaoaiga po o le tulaga maualuga o se tagata. E moni, na lagona e Iesu le alofa i le talavou mauʻoa ma valaaulia o ia e avea ma ona soo. Peitaʻi, na faatonuina o ia e Iesu e faatau atu mea ua iā te ia, ma foaʻi atu i tagata matitiva. (Mare. 10:17-22; Luka 18:18, 23) Na lauiloa Iesu i lona faauō i tagata faatauvaa ma inosia, ae e lē ona o le faatasitasi ma tagata mauoloa ma lauiloa.—Mata. 11:19.

4. Aiseā e faapea atu ai na iai masei o uō a Iesu?

⁴ E mautinoa na iai masei o uō a Iesu. Sa iai taimi na lē taulau ai Peteru i le vaai i mea e tusa ma le silafaga a le Atua. (Mata. 16:21-23) Sa iloa le uiga fia sili o Iakopo ma Ioane, ina ua la talosaga atu iā Iesu mo ni tofiga maualuluga i lona Malo. Na tupu ai le ita o isi aposetolo, ma sa avea pea lea uiga fia sili ma pogai o finauga. Peitaʻi, sa taumafai pea ma le onosai Iesu e faasaʻo mafaufauga o ana uō, ma e leʻi vave ona ita o ia iā i latou.—Mata. 20:20-28.

5, 6. (a) Aiseā na tumau ai ona uō Iesu ma le toʻatele o ona aposetolo? (e) Aiseā na faauma ai e Iesu le la faauōga ma Iuta?

⁵ E leʻi faapea na tumau ona uō Iesu ma nei tane lē lelei atoatoa, ona o lona faatuutuu i o latou vaivaiga pe na leʻi iloa o latou faalētonu. Ae na ia taulaʻi atu i o latou faanaunauga saʻo ma uiga lelei. O se faaaʻoaʻoga, e leʻi lagolagoina e Peteru, Iakopo ma Ioane Iesu i lona taimi e sili ona mafatia ai, ae sa momoe. E mautinoa lava le faanoanoa o Iesu i lea tulaga. Ae ui i lea, na ia iloa uunaʻiga lelei iā i latou ma fetalai atu: ‘Ua naunau i ai le loto, a ua vaivai le tino.’—Mata. 26:41.

⁶ Peitaʻi, sa faauma e Iesu le la faauōga ma Iuta le Sekara. E ui sa faafoliga atu Iuta o se uō, ae na silafia e Iesu ua leaga lona loto. Talu ai ua faauō atu Iuta i le lalolagi, ua faia ai e ia o ia lava ma fili o le Atua. (Iako. 4:4) O lea la, ina ua uma ona faateʻa e Iesu Iuta, ona ia faailoa atu lea i le ʻauaposetolo faamaoni e toʻa 11, o ana uō i latou.—Ioa. 13:21-35.

7, 8. Na faaalia faapefea e Iesu lona alofa mo ana uō?

⁷ E leʻi vaavaai Iesu i masei o ana uō faamaoni, ae na ia faia le mea e sili mo i latou. O se faataʻitaʻiga, na ia tatalo i lona Tamā ina ia puipuia i latou pe a tofotofoina. (Faitau le Ioane 17:11.) Sa faaalia e Iesu le magafagafa i mea na gata mai ai lo latou malosi. (Mare. 6:30-32) Sa fiafia o ia e lē na ona taʻu atu o ona manatu, ae sa faalogologo foʻi ma malamalama i o latou manatu ma faalogona.—Mata. 16:13-16; 17:24-26.

⁸ Na soifua ma maliu Iesu mo ana uō. E moni na ia silafia e ao ona ofo atu lona ola e tusa o le tulafono, ona o le faamasinotonu o lona Tamā. (Mata. 26:27, 28; Epe. 9:22, 28) Peitaʻi, na ofo atu e Iesu lona ola e faaalia ai lona alofa. Na fetalai Iesu: “E leai lava se tasi e sili atu lona alofa nai lo o lenei, o le foaʻiina atu lea e se tasi o lona ola mo ana uō.”—Ioa. 15:13.

O le ā le Tali Atu a le ʻAusoo i le Faauōga ma Iesu?

9, 10. Na faapefea ona tali atu tagata i le agalelei o Iesu?

⁹ Sa agalelei Iesu i le faaaogā o lona taimi ma alāmanuia, ma le faaalia atu o ona lagona. O lea, na māfana ai tagata iā te ia ma fiafia e foaʻi atu iā te ia. (Luka 8:1-3) O mea na oo iā te ia na faapea mai ai Iesu: “Ia outou foaʻi atu pea, ona foaʻi mai lea o tagata iā te outou. Latou te sasaa ifo i o outou ʻie pulupulu ni fua lelei, ua lolomi, ma lūlūina, ma ua tumu. Auā o le fua tou te fuaina atu, e toe fuaina mai iā te outou.”—Luka 6:38.

¹⁰ O le mea moni, na fia faauō nisi iā Iesu ona o mea e maua mai iā te ia. Ae na tuulafoaʻi e na uō pepelo Iesu ina ua lē malamalama i sana faamatalaga na fai. Nai lo le faatuatuaina o Iesu ina ua latou lē malamalama, sa latou faia se faaiʻuga sesē ma fulitua iā te ia. Peitaʻi, sa faamaoni pea le ʻauaposetolo. E iai taimi na oo ai ni faigatā i la latou faauōga ma Keriso, ae na latou faia le mea sili e lagolagoina ai o ia i taimi lelei ma taimi lē lelei. (Faitau le Ioane 6:26, 56, 60, 66-68.) I lona pō mulimuli i le lalolagi a o avea o se tagata, na faaali atu ai e Iesu i ana uō lona talisapaia o i latou ma faapea atu: “O outou foʻi, ua outou tumau iā te aʻu i taimi o oʻu puapuaga.”—Luka 22:28.

11, 12. O le ā le faamautinoaga na avatu e Iesu i le ʻausoo, ma o le ā la latou tali mai?

¹¹ E leʻi pine talu ona faamālō atu Iesu i ona soo ona o lo latou faamaoni, ae latou tuulafoaʻi loa o ia. Na avea le fefe i tagata ma mea na mou atu ai lo latou alofa iā Keriso mo sina taimi. Ae na toe faamagaloina i latou e Iesu. Ina ua mavae lona maliu ma le toetū, na faaali atu o ia iā i latou ma faamautinoa atu i ai lana faauōga. E lē gata i lea, na ia tuuina atu iā i latou se tofiga paia, ina ia “fai tagata o nuu uma lava” ma soo, ma molimau iā te ia “i tuluʻiga uma o le lalolagi.” (Mata. 28:19; Galu. 1:8) O le ā le tali atu a le ʻausoo?

¹² Na tuuina atu e le ʻausoo lo latou malosi atoa i le faasalalauina o le feʻau o le Malo. E leʻi pine ae faatumuina Ierusalema i la latou aʻoaʻoga ona o le lagolagosua a le agaga paia o Ieova. (Galu. 5:27-29) E leʻi avea le ono faasalaina o i latou i le oti ma mea e taofia ai lo latou usitaia o le poloaʻiga a Iesu, ia faia isi ma soo. E leʻi atoa se tolusefulu tausaga talu ona latou maua le poloaʻiga a Iesu ae faapea mai le aposetolo o Paulo, ua talaʻiina le tala lelei “i le lalolagi aoao.” (Kolo. 1:23) Ioe, na faamaonia e nei soo e tāua iā i latou le faauōga ma Iesu!

13. O ā auala na taaʻina ai soo o Iesu i ana aʻoaʻoga?

¹³ O aʻoaʻoga a Iesu na taaʻina ai olaga o i latou na avea ma ona soo. O le uiga o lea mea i le toʻatele, o le faia lea o ni suiga tetele i a latou amio ma o latou uiga. O nisi o soo fou sa tauatane, mulilulua, onanā, ma gāoi. (1 Kori. 6:9-11) O isi sa tatau ona suia la latou vaaiga i tagata o isi lanu. (Galu. 10:25-28) Peitaʻi, na latou usiusitai iā Iesu. Sa latou tuu ese le tagata tuai ae oofu i le tagata fou. (Efe. 4:20-24) Sa latou faamasani i “manatu o Keriso,” ma sa malamalama ma faaaʻoaʻo i le auala e mafaufau ma gaoioi ai o ia.—1 Kori. 2:16.

Faauōga ma Keriso i Aso Nei

14. O le ā na folafola mai e Iesu o le a ia faia i le ‘faaiʻuiʻuga o le faiga o mea a le lalolagi’?

¹⁴ O le toʻatele o Kerisiano i le uluaʻi senituri, na latou masani lelei iā Iesu pe na vāaitino foʻi i lona toetū mai. Ae e tatou te leʻi maua lenā avanoa. E faapefea la ona avea i tatou ma uō a Keriso? O se tasi o auala, o le usiusitai lea i le taʻitaʻiga a le pologa faamaoni ma le faautauta, lea e faia aʻe i uso faauuina o Iesu o loo soifua pea i le lalolagi. Na folafola e Iesu e faapea, i le ‘faaiʻuiʻuga o le faiga o mea a le lalolagi,’ o le a ia tofia ai lenei pologa “e vaavaaia ana mea uma.” (Mata. 24:3, 45-47) I aso nei, o le toʻatele o ē o loo fia avea ma uō a Keriso, e lē o ni sui o lenei vasega. E faapefea i la latou tali atu i le taʻitaʻiga a le pologa faamaoni, ona aafia ai la latou faauōga ma Keriso?

15. E faapefea ona iloa le tagata po o ia o se mamoe po o se oti?

¹⁵ Faitau le Mataio 25:31-40. Na taʻu e Iesu i latou o loo faia aʻe ai le vasega o le pologa faamaoni, o ona uso. I le talafaatusa e uiga i le tuueseeseina o mamoe ma oti, na faamanino ai e Iesu e faapea, o le auala o loo tatou faia ai ona uso, e pei o loo tatou faia lea iā te ia. Na fetalai Iesu, e iloa le tagata po o ia o se mamoe po o se oti i le auala e na te faia ai ‘ona uso e sili ona faatauvaa.’ O lea la, o ē e faamoemoe e ola i le lalolagi, o le auala sili e iloa ai lo latou naunau e fia avea ma uō a Keriso, o le lagolagoina lea o le vasega o le pologa faamaoni.

16, 17. E faapefea ona iloa o loo tatou faauō atu i uso o Keriso?

¹⁶ Afai o lou faamoemoe o le ola i le lalolagi i le pulega a le Malo o le Atua, e faapefea ona iloa o loo e faauō atu i uso o Keriso? E na o le tolu ni auala o le a iloiloina. Muamua, o le auai lea ma le lotoatoa i le galuega talaʻi. Na faatonu e Keriso ona uso ia talaʻi le tala lelei i le lalolagi aoao. (Mata. 24:14) Peitaʻi, e faigatā i ē o totoe o uso o Keriso i le lalolagi i aso nei ona faataunuuina lenei tiute tauave, e aunoa ma le fesoasoani a a latou aumea o isi mamoe. O le mea moni, o taimi uma lava e auai ai isi mamoe i le galuega talaʻi, ua latou fesoasoani i uso o Keriso e faataunuu lo latou tofiga paia. E matuā talisapaia e Iesu ma le vasega o le pologa faamaoni lenei gaoioiga o le faauōga.

¹⁷ O le auala lona lua e fesoasoani ai isi mamoe i uso o Keriso, o le lagolagoina lea o le galuega talaʻi i foaʻi tautupe. Na faalaeiau e Iesu ona soo ina ia faia ni uō mo i latou e ala i ‘ʻoa o le amiolētonu.’ (Luka 16:9) E lē faatauina i tupe se faauōga ma Iesu ma Ieova. Ae o le faaaogāina o a tatou meafaitino e faaauiluma ai manaʻoga o le Malo, ua faamaonia ai e faavae la tatou faauōga ma lo tatou alofa i “gaoioiga ma le upu moni,” ae e lē na o upu. (1 Ioa. 3:16-18) Ua tatou avatu le lagolagosua tautupe pe a tatou auai i le galuega talaʻi, pe a faameaalofa atu tupe mo faugāfale ma le faaleleia o maota mo sauniga, ma pe a tatou foaʻi atu meaalofa mo le galuega talaʻi i le lalolagi aoao. Pe itiiti pe tele la tatou foaʻi, ae e matuā talisapaia e Ieova ma Iesu pe a foaʻi ma le lotofiafia.—2 Kori. 9:7.

18. Aiseā e ao ai ona tatou usiusitai i le taʻitaʻiga e faavae i le Tusi Paia ua aumaia e toeaina o le faapotopotoga?

¹⁸ O le auala lona tolu e faamaonia ai o i tatou o uō a Keriso, o le usiusitai lea i le taʻitaʻiga ua aumaia e toeaina o le faapotopotoga. Ua tofia na tane e le agaga paia i le taʻitaʻiga a Keriso. (Efe. 5:23) Na faapea mai le aposetolo o Paulo: “Ia usiusitai i ē o taʻitaʻia outou ma ia gauaʻi iā i latou.” (Epe. 13:17) I nisi taimi, atonu e faigatā ona tatou usiusitai i le taʻitaʻiga e faavae i le Tusi Paia ua aumaia e toeaina. Atonu ua tatou iloa ni o latou vaivaiga, ma e ono sesē ai la tatou vaai i a latou fautuaga. Peitaʻi, ua fiafia Keriso, o le Ulu o le faapotopotoga, e faaaogā nei tane lē lelei atoatoa. O lea la, o le auala e tatou te tali atu ai iā i latou, e aafia ai la tatou faauōga ma Keriso. Pe a tatou lē vāai i masei o toeaina ae mulimuli ma le fiafia i la latou taʻitaʻiga, ua faaalia ai lo tatou alofa iā Keriso.

Le Mea e Maua ai Uō Lelei

19, 20. O le ā e tatou te maua i totonu o le faapotopotoga, ma o le ā o le a tatou iloiloina i le mataupu o sosoo mai?

¹⁹ Ua faaauau pea ona tausia i tatou e Iesu, e lē gata e ala mai i le taʻitaʻiga a leoleo mamoe alolofa, ae faapea foʻi o tatou tinā ma uso ma tuafāfine faaleagaga i le faapotopotoga. (Faitau le Mareko 10:29, 30.) Ina ua amata ona e aufaatasi ma le faalapotopotoga a Ieova, o le ā le tali mai a ou tauaiga? E lelei pe afai na latou lagolagoina au taumafaiga e faalatalata i le Atua ma Keriso. Ae na lapataʻi mai Iesu, e iai taimi ‘e fai ai le aiga o le tagata ma ona fili.’ (Mata. 10:36) Maʻeu le faalaeiauina ai i le iloa, e tatou te maua i totonu o le faapotopotoga i latou e sili ona māfana mai i lo le uso!—Faata. 18:24.

²⁰ E pei ona faaalia i alofaaga o Paulo i le faaiʻuga o lana tusi i le faapotopotoga i Roma, e tele ana uō mamae na iai. (Roma 16:8-16) Na faaiʻu e le aposetolo o Ioane lana tusi i upu nei: “Ia momoli atu oʻu alofaaga i uso taʻitoʻatasi.” (3 Ioa. 14) E tele foʻi ni ana uō lelei na maua. E faapefea ona tatou mulimuli i le faaaʻoaʻoga a Iesu ma uluaʻi Kerisiano, i le amataina ma le faatumauina lea o faauōga lelei ma o tatou uso ma tuafāfine faaleagaga? O le a iloiloina le tali o lenā fesili i le mataupu o sosoo mai.

O le ā Lau Tali?

• O le ā le faaaʻoaʻoga na faataatia e Iesu i le avea o se uō lelei?

• O le ā le tali atu a le ʻausoo i la latou faauōga ma Iesu?

• E faapefea ona tatou faaalia o i tatou o uō a Keriso?

[Ata i le itulau 14]

Na manaʻo Iesu ia iloa manatu ma faalogona o ana uō

[Ata i le itulau 16]

E faapefea ona iloa lo tatou naunau e fia faauō iā Keriso?