E Faapefea Ona e Aafia i Lou Silafia o le Mea Moni e Uiga i Seoli?

O I LATOU e aʻoaʻoina faapea o seoli o se nofoaga e faapuapuagatia ai, ua matuā sesē ona latou faamatala mai Ieova le Atua faapea ma ona uiga. E moni o loo faapea mai le Tusi Paia o le a faaumatia e le Atua tagata amioleaga. (2 Tesalonia 1:6-9) Ae o le toʻasā amiotonu, e lē o le uiga autū lea o le Atua.

E lē ita faamoemoe le Atua. Na ia fesili foʻi: “Ou te fiafia ea i le oti o lē ua amio leaga?” Esekielu 18:23) Afai e lē fiafia le Atua i le oti o ē amioleaga, e faapefea la ona ia fiafia pe a ia silasila atu o faapuapuagatia i latou e faavavau?

O le uiga autū o le Atua o le alofa. (1 Ioane 4:8) O le mea moni, “O loo agalelei mai Ieova i mea uma, o lona alofa mutimuti vale foʻi ua i ana mea uma na fai.” (Salamo 145:9) I le tali atu i lona alofa mutimuti vale, e finagalo le Atua ia tatou atiaʻe le alofa mai se loto atoa mo ia.—Mataio 22:35-38.

Po o Uunaʻia Oe e le Fefe i Seoli, po o le Alofa i le Atua?

O le aʻoaʻoga lea e faapea e faapuapuagatia tagata i seoli, ua uunaʻia ai le fefefe i le Atua. Ae o lē e aʻoaʻoina le mea moni e faatatau i le Atua ma alofa iā te ia, o le a ia atiaʻe se mataʻu talafeagai. O loo faamatala mai e le Salamo 111:10: “O le mataʻu iā Ieova, o le amataga lea o le poto; ua i ai le mafaufau lelei iā te i latou uma o ē fai ia mea.” O lenei mataʻu i le Atua, e lē o le matuā fefe iā te ia, ae o le āva ma le migao ona o ia Lē na foafoaina mea uma. E faatupuina ai iā i tatou se mataʻu talafeagai ia aua le faia se mea e ono lē maua ai lona finagalo malie.

Seʻi mātau le auala na aafia ai Katerina, o se tamaʻitaʻi e 32 tausaga, ina ua ia iloaina le mea moni e faatatau i seoli, ma ua ia lē toe faaaogāina fualaau faasāina. Sa masani lona olaga i patī, faiga sauā, o le lē fiafia iā te ia lava, ma amioga lē mamā. Na ia taʻutino mai: “Pe a ou vaai atu i si aʻu tama teine faatoʻa atoa lona tausaga ma ou mafaufau ai, ‘Seʻi vaai i aʻu mea ua fai i si aʻu tama. O le a ou mū nei i seoli.’” Sa taumafai Katerina e taofia lona faaaogāina o fualaau faasāina, ae sa ia lē taulau. Na ia faapea mai, “Sa ou manaʻo e avea ma tagata lelei, ae sa iʻu i le faanoanoa loʻu olaga ma lenei lalolagi. E leai se uiga ou te lelei ai.”

Ona feiloaʻi loa lea o Katerina ma Molimau a Ieova. Na faapea mai Katerina, “Na ou aʻoaʻoina ai e leai se afi i seoli. Sa matuā talafeagai faamaoniga mai le Tusi Paia. O loʻu iloaina o le a lē susunuina aʻu i le afi, na pei ua matuu atu ai se avega mamafa.” Ae sa ia aʻoaʻoina foʻi le folafolaga a le Atua, e mafai ona ola e faavavau tagata i se lalolagi e leai se amioleaga. (Salamo 37:10, 11, 29; Luka 23:43) Sa ia faapea mai ma le mautinoa, “O lea ua ou maua nei loʻu faamoemoe moni, o le ola lea e faavavau i le Parataiso!”

Po ua mafai e Katerina ona taofia le faaaogā sesē o fualaau e aunoa ma le fefe i le susunuina o ia i le afi i seoli? Sa ia faamatala mai: “Pe a tagi mai loʻu tino mo fualaau faasāina, ou te tatalo, ma ōle atu iā Ieova le Atua mo se fesoasoani. Ou te mafaufau i lana silafaga i nei masaniga leaga, ma ou te lē manaʻo e faatigā iā te ia. Sa ia faafofoga mai i aʻu tatalo.” (2 Korinito 7:1) O lenei mataʻu ina neʻi lē fiafia mai le Atua, sa mafai ai e Katerina ona saʻoloto mai masaniga leaga.

O le atiaʻe o le alofa mo le Atua ma se mataʻu talafeagai mo ia, ae lē o le fefe neʻi susunuina i seoli, o le a uunaʻia ai i tatou e faia le finagalo o le Atua ina ia maua ai se fiafiaga tumau. Na tusi le faisalamo: “Amuia i latou uma o ē matataʻu iā Ieova, o ē savavali i ona ala.”—Salamo 128:1.

[Pusa/Ata i le itulau 9]

O AI O LE A FAASAʻOLOTOINA MAI SEOLI?

Ua tele le fenumiaʻi ona o nisi faaliliuga o le Tusi Paia o upu Eleni e lua o le—Geʹen·na ma le Haiʹdes—ua faaliliuina i le upu e tasi, o “seoli.” Ae i le Tusi Paia, o loo faatatau atu le upu Geʹen·na (Kena) i le faaumatiaga aʻiaʻi, ma e leai se faamoemoe o le toetū. Ae o i latou o loo i Haiʹdes, po o Seoli, e iai lo latou faamoemoe e toetutū mai.

O lea la, ina ua mavae le maliu ma le toetū mai o Iesu, na faamautinoa atu e le aposetolo o Peteru i lana ʻaufaalogologo “e leʻi tuua o ia [Iesu] i Seoli.” (Galuega 2:27, 31, 32; Salamo 16:10, King James Version) O le upu o loo faaliliuina “seoli” i le mau lenei, o le upu Eleni Haiʹdes. E leʻi iai Iesu i se nofoaga e iai le afi. O “seoli,” o le tuugamau. Ae e lē na o Iesu o le a faasaʻolotoina e le Atua mai seoli.

I le fesootaʻi atu i le toetū, o loo faapea mai le Tusi Paia: “Ua avaʻe foʻi e le oti ma seoli ē na oti sa i ai.” (Faaaliga 20:13, 14, KJ) O le faagaogaoina o “seoli,” o lona uiga o le a toe faafoʻisia le ola iā i latou ua finagalo le Atua e tatau i ai le toetū. (Ioane 5:28, 29; Galuega 24:15) E matuā mataʻina lava le faamoemoe mo le lumanaʻi, o le vaavaai atu lea o toetutū mai ē e pele iā i tatou mai le tuugamau! O Ieova, le Atua o le alofa e lē mavae, o le a ia faatinoina lenei mea.