O Ieova o Lo Tatou Pule!
“E tusa ona sili o lo matou anaana i le Atua i lo matou anaana i tagata.”—GALUEGA 5:29.
1, 2. O le ā le tulaga faaaposetolo e tauaveina e Molimau a Ieova pe a tapā e tagata ni mea e feteenai ma le finagalo tauatua?
SA FAATAGAINA e Ieova le Atua tane e 12 ina ia tuuina atu i luma o se faamasinoga sili. O le tausaga lea e 33 T.A., ma o le faamasinoga sa o le au Saneterini Iutaia. O ē sa faamasinoina o aposetolo o Iesu Keriso. Faalogo! ‘Na matou faatonuina outou ina ia aua neʻi tou aʻoaʻo atu e faavae i lenei igoa,’ ua fai atu ai le faitaulaga sili, ‘ae ua outou faatumuina Ierusalema i a outou aʻoaʻoga.’ I lena, na faalauiloa atu ai e Peteru ma isi aposetolo e faapea: “E tusa ona sili o lo matou anaana i le Atua i lo matou anaana i tagata.” (Galuega 5:27-29) O le uiga moni na latou faapea atu: ‘O Ieova o lo matou Pule!’
2 Ioe, o Ieova o le Pule o soʻo moni o Iesu. Ua faamanino mai lenei mea i le tusi o le Tusi Paia o Galuega a le au Aposetolo, na tusia i Roma pe ā ma le 61 T.A. e “Luka le fomai pele.” (Kolose 4:14) I le pei o le au aposetolo, ua usiusitai ai faapena tagata o Ieova i aso nei i lo latou Pule faalelagi pe a tapā e tagata ni mea e feteenai ma lona finagalo. Ae o ā isi mea e mafai ona tatou aʻoaʻoina mai i le Galuega? (I suesuega totino, ua matou fautuaina oe ina ia faitau vaega o le tusi na ua faasino faapitoa mai i mataitusi matamata tetele.)
Ua Tofia e Iesu Molimau
3. Ina ua papatisoina soʻo o Iesu “i le Agaga Paia,” o le ā le mea na muamua ona latou manatu mamafa i ai?
3 Sa ono mafai e le au aposetolo ona faia se tulaga mausalī mo le Atua auā sa faamalosia faaleagaga i latou. Na maliu Keriso i le satauro, ae na latou iloa sa toe faatuina mai o ia. (1:1-5) Sa “faailoa atu foi o ia [Iesu] e ia ia te i latou ua soifua” ma aʻoaʻo atu upu moni o le Malo e ala i le faaalia atu o ia i ni tino faitino mo le 40 aso. Sa ia taʻu atu foi i ona soʻo ina ia faatalitali i Ierusalema mo le papatisoga “i le Agaga Paia.” Ona avea ai lea o le talaʻiga ma mea e muamua ona latou manatu mamafa i ai, e pei foi ona iai i Molimau a Ieova i aso nei.—Luka 24:27, 49; Ioane 20:19–21:24.
4. O le ā o le a tupu pe a oo ifo le agaga paia i luga o soʻo o Iesu?
4 A o leʻi papatisoina i le agaga paia, sa manatu sese le au aposetolo faapea o se pule faalelalolagi o le a ia faaiʻuina le pulega a Roma, ina ua latou fesili atu: “Le Alii e, o ona po nei ea e te toe fuatai mai ai le malo ia Isaraelu?” (1:6-8) O le uiga moni, sa fetalai atu Iesu e leai, auā ‘e lē o sa latou aiā lea ona iloa o taimi ma tau.’ ‘Pe a afio ifo le agaga paia i o latou luga,’ o le a faamalosia ai i latou e molimau atu e uiga i le Malo faalelagi o le Atua, ae lē o se malo o lenei lalolagi. O le a latou talaʻi atu i Ierusalema, Iutaia, ma Samaria, “e oo lava i le tuluʻiga o le lalolagi.” Faatasi ai ma le fesoasoani a le agaga, ua faia ai e Molimau a Ieova lea galuega i se fua faataamilo i le kelope atoa i nei aso e gata ai.
5. O le ā faapefea ona afio mai Iesu i le auala lava lea e tasi na ia afio ese ai?
5 Na seʻi faatoʻā uma lava ona tuu atu e Iesu le tofiga o le talaʻiga i le lalolagi aoao ina ua amata ona ia afio aʻe i le lagi. O lena afio aʻe na amata i ni gaoioiga a o siitia ese aʻe i luga mai ona soʻo, ona afio aʻe lava lea i so o se taʻitaʻiga manaomia ina ia ulu atu ai i luma o lona Pule faalelagi ma i le faia o gaoioiga i le nofoaga o agaga. (1:9-11) Ina ua ufitia e le ao le vaaiga a le au aposetolo ia Iesu, ona ia toe faaliliu loa lea ma tuu ese lona tino faaletino. Na faaali mai agelu e toalua ma faapea mai ‘o le a faapena ona toe afio mai’ o ia. Ma sa faapena lava. Sa na o soʻo lava o Iesu na vaai i lona afio ese atu, e faapena foi ona na o Molimau a Ieova lava latou te iloa lona toe afio mai lē vaaia.
Ua Faia e Ieova se Filifiliga
6. Na faapefea ona filifilia se tasi e suitulaga mo Iuta le Sekara?
6 E leʻi pine ae toe foi atu le au aposetolo i Ierusalema. (1:12-26) I se fogafale i luga (pe atonu i le fale o Maria le tinā o Mareko), sa finafinau ai pea le au aposetolo faamaoni e 11 i le tatalo faatasi ma ʻafa uso o Iesu, o isi ona soʻo, ma lona tinā, o Maria. (Mareko 6:3; Iakopo 1:1) Pe tusa ma le 120 soʻo sa iai ina ua filifilia e le Atua se tagata e sui i lē na faalataina Iesu, o Iuta, ma toe faafoisia ai le numera faaaposetolo i le 12. Ae o ai o le a na mauaina le ‘faiva faaovasia’ o Iuta? (Salamo 109:8) O le tagata e tatau ona filifilia sa tatau o se tasi o lē sa avea ma soʻo i le taimi o le faiva a Iesu ma o sē e molimau i lona toetu mai. Ioe, e tatau foi i le tagata ona faailoa atu o Ieova o lona Pule. Ina ua uma le tatalo, ona faia lea o ni vili ia Matatia ma Iosefa e igoa ia Pasapa. Ona faafaasaga lea e Ieova le vili ia Matatia.—Faataoto 16:33.
7. (a) Na faapefea e Iuta ona “faatau foi . . . le fanua i le totogi o le amio leaga”? (e) Na faapefea ona oti Iuta?
7 E mautinoa sa leʻi faailoaina atu e Iuta le Sekara Ieova e avea ma ona Pule. Ioe, sa ia faalataina le Alo o le Atua mo le 30 tupe siliva! Na toe faafoi e Iuta lena tupe i le ositaulaga sili, ae na faapea mai Peteru, o lē na faalata na ia “faatau foi . . . le fanua i le totogi o le amio leaga.” Faapefea? Ia, sa ia saunia le tupe ma le pogai na faatauina ai le “fanua o le toto,” e pei ona sa taʻua ai. Sa mataulia mai lea i se fanua laugatasi i le itu i saute o le Vanu o Hinoma. O lana faiā ma le Pule faalelagi na matuā faaleagaina, ma o Iuta “ua noa o ia e ia” lava. (Mataio 27:3-10) Ae atonu po o le maea na motu po o le lala o le laau na gau, o lea na ‘titō ifo ai o ia e muamua lona ulu i lalo, ma le paʻō tele na pa ai lona manava’ ina ua paʻū ifo o ia i totonu o le va i papa. Seʻi aua lava neʻi iai se tasi o i tatou e avea o se uso pepelo!
Ua Faatumulia i le Agaga Paia!
8. O anafea na papatiso ai soʻo o Iesu i le agaga paia, ma faatasi ai ma ā iʻuga?
8 Ae faapefea le folafolaga o le papatisoga i le agaga paia? Na tupu lena mea i le Penetekoso 33 T.A., i le sefulu aso talu ona afio aʻe Iesu i le lagi. (2:1-4) Maeu se mea e faafiafiaina ai o le papatisoga lea! Seʻi vaai faalemafaufau i le vaaiga. Pe ā ma le 120 soʻo sa iai i le fogafalealuga ina ua ‘faafuaseʻi ona taalili mai le lagi se leo e pei o le pesi mai o le matagi ma faatumulia ai le fale.’ Sa lē o se matagi ae sa faalogoina e pei o se matagi. O se laulaufaiva “peiseai o le afi” sa nofo i luga o soʻo ma aposetolo taitoatasi. “Ua faatutumuina foi i latou uma i le Agaga Paia, ua afua ai ona tautala i gagana eseese.” Ina ua faia lena papatisoga, ona fanauina ai foi lea o i latou e le agaga paia, faauuina, ma faamaufaailogaina e fai ma faailoga o le tofi faaleagaga.—Ioane 3:3, 5; 2 Korinito 1:21, 22; 1 Ioane 2:20.
9. E uiga i le ā na tautatala atu ai soʻo na faatutumuina i le agaga?
9 O lenei mea na tupu na aafia ai tagata Iutaia ma tagata faatoʻā liliu i Ierusalema mai ‘nuu uma lava i lalo o le lagi.’ (2:5-13) Ma le ofo lava, na latou fesili atu: ‘Ua faapefea ona tupu lenei mea o le faalogo o i matou taitoatasi i lana lava gagana na fanau mai ai?’ Atonu o le gagana a atunuu na e pei o Metai (i sasae o Iutaia), Ferukia (i Asia Itiiti), ma Roma (i Europa). A o tautatala le au soʻo i gagana eseese e uiga “i vavega o le Atua,” sa maofa le toatele o le au faalogologo, ae sa fai mai tagata aamu faapea sa onanā i latou.
Ua Avatu e Peteru se Molimau e Faagaee Ai
10. O le ā le valoaga na faataunuuina i le mea na tupu i le Penetekoso 33 T.A., ma pe o iai se tulaga tutusa o lenei mea i ona po nei?
10 Na amata e Peteru ona molimau e ala i le faailoa faapea o le iva i le taeao o se taimi ua matuā vave tele e onā ai. (2:14-21) Na i lo lea, o lenei mea na tupu o le faataunuuga o le folafolaga a le Atua ina ia liligiina ifo le agaga paia i luga o ona tagata. Sa faagaeeina e le Atua Peteru e faasino atu i o tatou taimi e ala i le faaopoopo atu o upu nei “aso e gata ai” ma “latou te perofeta mai ai.” (Ioelu 2:28-32) O le a faia e Ieova vavega i le lagi ma faailoga i le lalolagi a o leʻi oo i lona aso tele, ma e na o i latou lava e valaau i lona suafa i le faatuatua o le a faasaoina. O le liligiina ifo foi faapena o le agaga paia i luga o ē faauuina o aso nei ua mafai ai e i latou ona “perofeta” ane ma le matuā sogasogā ma le uigā i aso nei.
11. E faatatau ia Iesu, o le ā na faia e tagata Iutaia ma le mea na faia e le Atua?
11 Ona sosoo ai lea ma le faailoa mai e Peteru o le Mesia. (2:22-28) Sa faamaonia e le Atua le tulaga faa-Mesia o Iesu e ala i le mafaia e ia ona faatino galuega mamana, faailoga, ma vavega. (Eperu 2:3, 4) Ae na faamauina o ia e tagata Iutaia i le satauro e ala i “lima o tagata faaletaupulea,” o tagata Roma o ē na lē utagiaina le tulafono a le Atua. Na “tuuina mai e le pule tonu ma le silafaga a le Atua anamua” Iesu, ona o le finagalo tauatua lea. Ae peitai, na toe faatuina Iesu e le Atua ma aveesea lona tino faaletino i se auala sa lē mafai ai ona oo i ai le pala.—Salamo 16:8-11.
12. O le ā na muai iloa e Tavita, ma i luga o le ā e faalagolago i ai le faaolataga?
12 Sa faamamafaina atili le valoaga faa-Mesia e pei ona faaauau pea le molimau a Peteru. (2:29-36) Na ia faapea mai sa muai iloa e Tavita le toe faatuina o lona alo silisili, o Iesu le Mesia. Mai se nofoaga faaeaina i le itu taumatau o le Atua i le lagi, na liligi ifo ai e Iesu le agaga paia lea na ia maua mai lona Tamā. (Salamo 110:1) Sa ‘vaai ma faalogo’ le au faalogologo a Peteru i le galueaiina o le agaga paia i le matauina o laulaufaiva e pei ni afi i luga o ulu o le au soʻo ma faalogo ai o tautatala i latou i gagana eseese. Sa ia faaalia foi faapea o le faaolataga e faalagolago lea i le faailoa atu o Iesu e avea o le Alii ma o le Mesia.—Roma 10:9; Filipi 2:9-11.
Ua Aumaia e Ieova le Faatelega
13. (a) Ina ia papatisoina ma le tonu, o le ā sa tatau ona faailoaina atu e tagata Iutaia ma tagata liliu? (e) E toafia na papatisoina, ma faatasi ai ma ā iʻuga i Ierusalema?
13 Maeu le uigā sa iai upu a Peteru! (2:37-42) Sa tuia loto o lana au faalogologo ona o lo latou faatagaina o le fasiotia o le Mesia. O lea na ia uunai atu ai: “Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala; ona maua lea e outou o le mea foai fua mai, o le Agaga Paia lea.” Ua uma ona faailoa atu e tagata Iutaia ma tagata liliu o Ieova lo latou Atua ma lo latou manaoga mo lona agaga. Ae ua manaomia nei ona latou salamō ma talia Iesu e avea o le Mesia ina ia papatisoina i le suafa (le iloaina lea o le tulaga po o le galueaiina) o le Tamā, le Alo, ma le agaga paia. (Mataio 28:19, 20) E ala i le molimau atu i na tagata Iutaia ma tagata liliu, na faaaogā ai e Peteru le uluai ki faaleagaga na avatu ia te ia e Iesu e tatala ai le faitotoa o le poto ma le avanoa mo tagata Iutaia talitonu ina ia ulu atu ai i le Malo faalelagi. (Mataio 16:19) I lena aso e tasi, e 3,000 na papatisoina! Seʻi vaai faalemafaufau faapea e toatele molimau a Ieova o loo talaʻi i le oganuu itiiti o Ierusalema!
14. Aiseā ma i le ā le auala na ‘tuu tele ai e tagata talitonu a latou lava mea uma’?
14 O le toatele mai nofoaga mamao sa leai ni sauniuniga mo se taimi umi e nonofo ai ae sa faanaunau ina ia aʻoaʻoina atili e uiga i lo latou faatuatuaga fou ma talaʻi atu i isi. O lea sa fesoasoani ai ma le alofa uluai soʻo o Iesu o le tasi i le isi, e pei lava ona faia e Molimau a Ieova i aso nei. (2:43-47) O tagata talitonu sa leʻi tumau ona “tuu tele a latou mea uma lava.” Sa faatauina atu e nisi a latou mea totino, ma o tupe na maua mai ai sa tufatufaina atu i so o se tasi sa iai le manaomia. O lenei mea sa maua ai e le faapotopotoga se amataga lelei a o ‘faaopoopo atu e Ieova ia i latou i aso taitasi ē ua faaolaina.’
Se Faamalologa ma Ona Iʻuga
15. O le ā na tupu a o ulu atu Peteru ma Ioane i le malumalu, ma o ā uiga faaalia ane o tagata?
15 Sa lagolagoina e Ieova soʻo o Iesu e auala i “faailoga.” (3:1-10) I lea, a o ulu atu Peteru ma Ioane i le malumalu i le 3:00 i le afiafi, mo le taimi o talosaga e fai faatasi ma le taulaga afiafi, sa faaaioi ane se tagata na pipili lava talu ina fanau mai sa nofo i tafatafa o le Faitotoa o le Matagofie, mo ni “mea alofa.” ‘E leai saʻu ario po o saʻu auro,’ na fai atu ai Peteru, ‘ae o le mea o ia te aʻu ou te avatua ia te oe: I le suafa o Iesu Keriso le Nasareta, inā savali ia!’ Ona faamaloloina loa lea o le tamaloa. A o ia ulu atu i le malumalu “o loo savali ia, ma oso, ma vivii atu i le Atua,” ‘na matuā ofo’ tagata. Atonu sa toe manatua e nisi upu nei: “Ona osooso ai lea o le pipili e pei o le aila.”—Isaia 35:6.
16. Na mafai faapefea e aposetolo ona faamaloloina se tamaloa pipili?
16 Ua faapotopoto atu tagata na maofa i le faapaologa o Solomona, o se faapaologa e i le itu i sasae o le malumalu. O i inā na avatu ai e Peteru se molimau. (3:11-18) Na ia faaalia atu faapea na tuuina e le Atua i aposetolo le mana e faamalōlō ai le tagata pipili e ala i Lana Auauna faamamaluina, o Iesu. (Isaia 52:13–53:12) Sa faafitia e tagata Iutaia “lē Paia ma lē Amiotonu,” ae na toe faatuina o ia e Ieova. E ui lava sa lē iloa e tagata ma o latou pule faapea ua latou fasiotia le Mesia, ae na faataunuuina ai lava i lea e le Atua upu faavaloaga faapea “e tiga [lana] Keriso.”—Tanielu 9:26.
17. (a) O le ā le gaoioiga sa manaomia ona faia e tagata Iutaia? (e) O le ā ua tupu talu le ‘auina mai o Keriso’ i o tatou aso?
17 Ona o a latou faiga i le Mesia, na faaalia ai e Peteru le mea sa tatau i tagata Iutaia ona faia. (3:19-26) Sa manaomia ona latou “salamo,” pe ia lagona le faanoanoa ona o a latou agasala, ma “liliu,” pe ia faaliliuina, i le uia o se auala e matuā ese lava. Afai sa latou faaalia le faatuatua ia Iesu o le Mesia, talia le togiola, o le a oo mai ia i latou le faamalologa mai ia Ieova e pei o i latou ua faamagaloina a latou agasala. (Roma 5:6-11) Sa faamanatu atu i tagata Iutaia faapea o i latou o le fanau o le feagaiga na osia e le Atua ma o latou augā tamā, i le taʻuina atu ia Aperaamo: “O so lau fanau foi e manuia ai aiga uma lava o le lalolagi.” O lea na muamua ona auina mai e le Atua lana Auauna faa-Mesia e faasaoina tagata Iutaia salamō. Ma le fiafia lava, talu le ‘auina mai o le Keriso’ i le mana o le Malo faalelagi i le 1914, ua iai se toe faafoisia faafouina o upu moni ma le faalapotopotoga faatiokarate i Molimau a Ieova.—Kenese 12:3; 18:18; 22:18.
Sa Lē Taofia i Laua!
18. O le ā le “maa” na lafoaia e “tufuga fai fale” a Iutaia, ma ua na o ai lava o iai le faaolataga?
18 I le feita ona o le folafola atu e Peteru ma Ioane o le toetu mai o Iesu, na taofia ai e ositaulaga sili, le pule o le malumalu, ma le au Satukaio i laua i le falepuipui. (4:1-12) Sa lē talitonu le au Satukaio i le toetu, ae toatele isi sa oo ina talitonu, i na o tane lava pe ā ma le 5,000. Ina ua fesiligia i luma o le faamasinoga maualuga i Ierusalema, na faapea atu Peteru na faamaloloina le tagata pipili i “le suafa o Iesu Keriso o le Nasareta,” lea na latou faasatauroina ae na toe faatuina mai e le Atua. O lenei “maa” na lafoaiina e “tufuga fai fale” Iutaia na avea “ma maa tulimanu aupitoaluga.” (Salamo 118:22) ‘E lē gata i lea,’ na fai atu ai Peteru, “e leai foi se tasi ua i ai le ola.”
19. O le ā le tali atu a le au aposetolo ina ua faatonuina e taofia le talaʻiga?
19 Sa faia se taupulepulega ina ia taofia ai le toe tautala faapena. (4:13-22) Ona ua iai faatasi ma le tagata na faamaloloina i o latou luma, sa faigata ai ona latou faafitia lenei “faailoga sili,” ae na faamataʻuina Peteru ma Ioane ina ia ‘aua neʻi toe tautala pe aʻoaʻo atu e faavae i le suafa o Iesu.’ O le ā la la tali atu? ‘E lē mafai ona ma taofia lo ma tautala i mea ua ma vaai ma faalogo i ai.’ Sa la usiusitai ia Ieova o lo la Pule!
Na Talia Tatalo!
20. Mo le ā na tatalo ai le au soʻo, ma faatasi ai ma le ā le iʻuga?
20 E pei ona tatalo Molimau a Ieova i sauniga, sa faapena foi ona tatalo le au soʻo ina ua lipotia mai e aposetolo na toe tatalaina le mea na tupu ia i laua. (4:23-31) Sa matauina faapea o pule e pei o Herota Anetipa ma Ponotio Pilato, faatasi ai ma tagata Roma o Nuu Ese ma tagata o Isaraelu, sa faapotopoto faatasi e tetee atu i le Mesia. (Salamo 2:1, 2; Luka 23:1-12) I le tali atu i le tatalo, na faatumuina ai e Ieova le au soʻo i le agaga paia, o lea sa mafai ai ona latou tautatala i le afioga a le Atua ma le faamalosi. Sa leʻi talosaga atu i lo latou Pule ina ia faaiʻu sauaga ae ina ia mafai e i latou ona talaʻi ma le faamalosi e ui lava i sauaga.
21. O ai Panapa, ma o ā uiga na ia te ia?
21 Sa faaauau ona maua e ē talitonu mea uma lava, ma e leai se tagata e toatasi na iai se manaomia. (4:32-37) O se tasi o lē na fai meaalofa o le sa Levī o Iose o Kuperu. Sa avatu e le au aposetolo ia te ia le igoa faaiʻu o Panapa, o lona uiga: “O le tagata faamafanafana,” atonu ona sa ia fesoasoani atu ma sa faamafanafana loto i isi. E moni lava, o i tatou uma e mananao e avea o lena ituaiga o tagata.—Galuega 11:22-24.
Sa Faaalialia Tagata Pepelo
22, 23. O le ā le agasala a Anania ma Safaira, ma e mafai faapefea ona aogā ia i tatou le mea na tupu ia i laua?
22 Ae peitai, o Anania ma lana avā o Safaira, na la teena le faailoaina o Ieova o lo la Pule. (5:1-11) Sa la faatau se fanua ma tuu nisi o tupe ae faatagā faafoliga na la avatu uma le tupe i aposetolo. O le poto na tuuina mai e le agaga o le Atua na mafai ai e Peteru ona iloa lo la tala pepelo, na taʻitaʻiina atu ai i lo la oti. Maeu se lapataiga mo i latou o ē o loo tofotofoina e Satani ina ia taufaasese!—Faataoto 3:32; 6:16-19.
23 Ina ua mavae lenei mea, na leai se tagata sa faanaunau leaga na toe lototele ina ia aufaatasi atu ma le au soʻo. Ae o isi na oo ina avea ma tagata talitonu. (5:12-16) E lē gata i lea, a o tuu atu e i latou o ē mamaʻi ma ē sa faalavelavea e agaga lē mamā lo latou faatuatua i le mana o le Atua, ‘sa matuā faamaloloina tagata uma.’
Usiusitai i le Atua na i lo Tagata
24, 25. Aiseā na sauāina ai e taʻitaʻi Iutaia le au aposetolo, ae o le ā le tulaga na faataatia e nei tagata faamaoni mo auauna uma a Ieova?
24 Ona taumafai loa lea o le ositaulaga sili ma le au Satukaio e taofia le tuputupu aʻe ofoofogia e ala i le faafalepuipuia o le au aposetolo uma. (5:17-25) Ae na tatalaina e se agelu a le Atua i latou i lena po. Ma e oo ane i le tafa o ata ae ua latou iai i le malumalu ua aʻoaʻo atu! E lē mafai e sauaga ona taofia auauna a Ieova.
25 Peitai, sa faatatauina omiga ina ua tuuina atu le au aposetolo i luma o le au Saneterini. (5:26-42) Ae peitai, ina ua poloaiina e taofi le aʻoaʻo atu, na latou faapea atu: “E tusa ona sili o lo matou anaana i le Atua i lo matou anaana i tagata.” O lenei mea na faataatia ai se tulaga mo soʻo o Iesu, lea ua mulimuli atu i ai Molimau a Ieova i aso nei. Ina ua uma ona lapataia e le faiaʻoga o le Tulafono o Kamalielu, ona sasaina lea e taʻitaʻi le au aposetolo, ma faatonuina i latou e taofi le talaʻiga, ma tatalaina atu e ō.
26. Sa faapefea ona faatusatusa le faiva a le au aposetolo ma le faiva a Molimau a Ieova i aso nei?
26 Sa olioli le au aposetolo ona ua taʻuaogāina i latou e faaleagaina ona o le suafa o Iesu. “Ua le mapu foi i latou i aso uma ona aʻoaʻo atu, ma talaʻi atu i le malumalu, ma lea fale ma lea fale le tala lelei.” Ioe, sa avea i latou o ni faifeau i le fale i le fale. Ua faapena foi Molimau a Ieova i aso nei, o ē ua latou mauaina foi lona agaga ona o lo latou usiusitai ia te ia ma faapea atu, “O Ieova o lo matou Pule!”
O le a Faapefea ona E Tali?
◻ O le ā le tofiga e tatau ona faataunuuina e soʻo o Iesu, i aso ua tuanai ma aso nei?
◻ O le ā na tupu i le aso o le Penetekoso 33 T.A.?
◻ O anafea ma na faapefea ona faaaogā e Peteru le uluai ki faaleagaga lea na tuuina atu e Iesu ia te ia?
◻ O le ā e mafai ona tatou aʻoaʻoina mai le mea na tupu ia Anania ma Safaira?
◻ Ina ua faatonuina e taofia le talaʻiga, o le ā le tulaga na faataatia e le au aposetolo mo Molimau uma a Ieova?