Fesili Mai le Au Faitau

Na taulai atu “Le Olomatamata” o Novema 1, 1995, i le mea na fetalai i ai Iesu i le Mataio 24:34 e faatatau i “lenei tupulaga.” Po o le uiga ea la ua fesiligia pe na faavaeina le Malo o le Atua i le lagi i le 1994?

E lē o iai ma se suiga na ofoina mai e lena talanoaga o Le Olomatamata i la tatou aʻoaʻoga faavae e faatatau i le 1914. Na tolaulau e Iesu le faailoga e faailoa ai lona faatasi i le mana o le Malo. Ua lava faamaoniga ua ia i tatou e faapea o lenei faailoga ua iai i se faasologa o le faataunuuina talu mai le 1914. O mea moni e faatatau i taua, o oge, o mala, o mafuie, ma isi lava faamaoniga ua mautinoa ai e faapea, e talu mai le 1914 ua gaoioi ai Iesu o se Tupu o le Malo o le Atua. Ua faailoa ai e lenei mea e faapea, e talu mai lena vaitaimi, ua tatou iai nei i le vaitaimi faaiuiu o le faiga o mea.

Ae, o le ā la, sa faamanino mai e Le Olomatamata? Ia o le manatu autū, o le uiga na faaaogā ai e Iesu le upu “tupulaga” o i le Mataio 24:34. E faitauina faapenei lena fuaiupu: “E moni, ou te fai atu ia te outou, E le mavae atu lava lenei tupulaga, seia oo mai nei mea uma.” O le ā na uiga i ai fetalaiga a Iesu i le “tupulaga,” i ona aso ma i o tatou foi vaitaimi?

E tele mau e faamautinoa mai ai e faapea sa lē faaaogaina e Iesu le “tupulaga” e faatatau atu i se vaega toaitiiti po o se vaega maʻoti, e faapea na faauiga atu i taʻitaʻi lotu Iutaia po o na o ona soo faamaoni. Nai lo lea, na ia faaaogaina le “tupulaga” i le tausalaina o le anoanoai o Iutaia o ē na teena o ia. E ui i lea, o se mea e fiafia ai ona sa mafai e tagata taitoatasi ona faia le mea na uunaia ai i latou e Peteru e fai i le aso o le Penetekoso, ia salamō ma “ia faaolaina outou ai lenei tupulaga faapiopio.”— Galuega 2:40.

I lena faamatalaga, e manino lava sa lei maʻoti se faamatalaga a Peteru e faatatau atu i se vaega o tagata ua faatapulaa mai ni o latou tausaga po o le umi o se vaitaimi, na te lei faafesootai atu foi le “tupulaga” i so o se aso patino. Sa lei faapea atu o ia e tatau ona faaolaina tagata mai le tupulaga lea na fananau i le tausaga lava lea e tasi na fanau mai ai Iesu po o le tupulaga lea na fananau mai i le 29 T.A. Na faatatau atu faamatalaga a Peteru i Iutaia lē talitonu o lena vaitaimi—o nisi atonu na talavou, o isi ua matutua—o ē na faaalialia i lauga a Iesu lo latou tulaga, na vāai po o le faalogo foi i vavega a Iesu, ma na latou lē talia o ia o le Mesia.

E mautinoa o le auala lena na malamalama ai Peteru i le faaaogaina e Iesu o le upu “tupulaga” i le taimi lea na iai o ia ma isi aposetolo e toatolu ma Iesu i le Mauga o Olive. E tusa ai ma upu faavaloaga a Iesu, o Iutaia i lena vaitaimi—i se uiga faavae, o ē na feola i lea vaitaimi o Iesu—o le a oo iai po o le faalogo foi i taua, o mafuie, o oge, ma isi faamaoniga e iloa ai ua latalata le iuga o le faiga o mea faa-Iutaia. O le mea moni, o lena tupulaga sa lē mavae atu a o lei oo ane le iuga i le 70 T.A.—Mataio 24:3-14, 34.

E ao ona faailoa atu e faapea tatou te lei faauigaina i taimi uma fetalaiga a Iesu i se uiga e talafeagai ai faapena. E iai pea se faanaunauga o le tagata e lē atoatoa ona lelei e manao ina ia faamaʻoti le taimi o le a oo mai ai le iuga. Manatua foi e oo lava i aposetolo na latou fesili atu ina ia faamaʻoti mai, e ala i le faapea atu: “Le Alii e, o ona po nei ea e te toe fuatai mai ai le malo ia Isaraelu?”— Galuega 1:6.

I faanaunauga faamaoni faapea, ua taumafai ai auauna a le Atua i ona po nei ina ia iloa mai i fetalaiga a Iesu e faatatau i le “tupulaga” se vaitaimi maʻoti e ala lea i le faitauina mai o le taimi mai le 1914. E fai ma faataitaiga, o se tasi o manatu ua iai e faapea o le umi o se tupulaga e mafai ona 70 po o le 80 tausaga, o lea la, afai na avea Iesu ma Tupu i le 1914 ma na tatau ona lava le matutua o tagata e malamalama ai i uiga tāua o le taua ma isi faagasologa; ua mafai ai la ona tatou faia se faitauga tonu o le taimi po o le ā le mamao po o le lalata tele mai o le iuga.

E tusa lava po o le ā le lelei o ni manatu faapena sa iai, ae pe sa talafeagai ai ma le fautuaga na fetalai atili i ai Iesu? Na fetalai mai Iesu: “A o lea aso ma lea itu aso e le iloa e se tasi, e le iloa lava e agelu i le lagi, e le iloa foi e le Atalii, ua na o le Tamā lava. . . . O lea, ia outou mataala ai; auā tou te le iloa po o le fea aso e sau ai lo outou Alii.”—Mataio 24:36-42.

O lea la o le faamatalaga fou o loo i Le Olomatamata e faatatau i “lenei tupulaga” sa lei suia ai lo tatou malamalamaaga i le mea na tupu i le 1914. Ae ua aumaia ai ia i tatou se malamalamaga manino i le faaaogaina e Iesu o le faaupuga “tupulaga,” ua fesoasoani lea ia i tatou e iloa ai o le auala na ia faaaogā ai e leai se faavae mo le fuafuaina—faitauina o le taimi mai le 1914—e iloa ai po o le ā lo tatou latalata tele atu i le iuga.