Mataupu Fā

O Lē na Molimau i ai Perofeta Uma

1. O le ā ua faaalia e mea moni i le soifuaga o Iesu a o leʻi avea ma tagata e faatatau i lana faiā ma Ieova?

“O LOO alofa le Tamā i le Atalii, ua faaali mai foi ia te ia mea uma lava e faia e ia.” (Ioane 5:20) Maʻeu se faiā māfana sa iai a le Atalii ma lona Tamā, o Ieova! Na amata le vavalalata o lenā faiā i le taimi na foafoaina ai o ia, i meleniuma e lē mafaitaulia a o lumanaʻi lona soifua mai o se tagata. O ia o le Alo e toʻatasi o le Atua, e na o ia lava na foafoaina toʻatasi e Ieova lava ia. O isi mea uma i le lagi ma le lalolagi, sa foafoaina e ala i le fesoasoani a lenā Alo pele ulumatua. (Kolose 1:15, 16) Sa avea foʻi o ia ma Upu a le Atua, po o le Fofoga Fetalai, o Lē na faaauala ai le faaooina mai o le finagalo o le Atua i isi. O ia lenei, o le Alo sa sili ona fiafia i ai le Atua, na oo ina avea ma tagata, o Iesu Keriso lea.—Faataoto 8:22-30; Ioane 1:14, 18; 12:49, 50.

2. O le ā le tele o loo faasino atu ai valoaga o le Tusi Paia iā Iesu?

² A o leʻi afuafuaina faavavega le Alo ulumatua o le Atua o se tagata, e anoanoaʻi valoaga faagaeeina sa tusitusia e faatatau iā te ia. Na taʻutino le aposetolo o Peteru iā Konelio: “Ua molitinoina mai o ia e le au perofeta uma.” (Galuega 10:43) Ona o le tele o faamatalaga i le Tusi Paia o loo faamatilatila mai ai le matafaioi a Iesu, na iʻu ai ina taʻu atu e se agelu i le aposetolo o Ioane e faapea: “O le agaga o le valoaga o le mau lea ia Iesu.” (Faaaliga 19:10) Na faailoa manino mai e na valoaga o ia o le Mesia. Sa tataʻi atu ai manatu i vala eseese o le a ia faatinoina, i le faataunuuga o fuafuaga a le Atua. O nei mea uma e ao ona tatou matuā naunau i ai i aso nei.

O Mea ua Faailoa Mai e Valoaga

3. (a) I le valoaga i le Kenese 3:15, o ai o loo faaataina e le gata, “le fafine,” ma le ‘fanau a le gata’? (e) Aiseā e fiafia tele ai auauna a Ieova i le ‘tuʻimomomoina o le ulu o le gata’?

³ Sa fofogaina le uluaʻi valoaga, ina ua mavae le fouvalega i Etena. Na fetalai mai Ieova i le gata: “Ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kenese 3:15) O lenā valoaga sa taulaʻi tonu lava iā Satani, o lē sa faaataina e le gata. O “le fafine,” o le faalapotopotoga faalelagi faamaoni a Ieova lava ia, lea e pei o se faletua faamaoni iā te ia. O ‘fanau a le gata,’ e aofia uma ai agelu ma tagata o ē faaalia le agaga o Satani, o i latou e tetee iā Ieova ma Ona tagata. O le ‘tuʻimomomoina o le ulu o le gata,’ e faauiga atu i le faaumatiaga o lē fouvale o Satani i se taimi mulimuli ane, o lē sa taufaaleaga iā Ieova ma aumaia ai le tele o mafatiaga i tagata. Peitaʻi, pe faapefea ona mātaulia le vala autū o le “fanau” lea o le a faia le tuʻimomomoina? O se “mea lilo [“paia,” NW]” lenā mo le tele o senituri.—Roma 16:20, 25, 26.

4. Sa faapefea i le gafa na tupuga mai ai Iesu, ona fesoasoani i le mātauliaina o ia o le Fanau folafolaina?

⁴ Ina ua mavae le tusa ma le 2,000 tausaga o le talafaasolopito o le tagata, na saunia ai e Ieova nisi auʻiliʻiliga. Sa ia faaalia faapea, o le a aliaʻi mai le Fanau i le gafa o le aiga o Aperaamo. (Kenese 22:15-18) Ae peitaʻi, e lē faalagolago le gafa e ui mai ai le Fanau i le faagasologa masani o gafa faaletino, ae faalagolago i le filifiliga a le Atua. E ui i se alofa o Aperaamo i lona atalii o Isamaeli, lea sa fanau mai e Akara, ae na fetalai Ieova: “O laʻu feagaiga ou te faatumauina lea ia Isaako, o le a fanau mai e Sara ia te oe.” (Kenese 17:18-21) Mulimuli ane sa faamautūina lenā feagaiga, e lē iā Esau le atalii ulumatua o Isaako, ae iā Iakopo, lea na tupuga mai ai ituaiga e 12 o Isaraelu. (Kenese 28:10-14) Mulimuli ane sa faaalia e faapea, o le a soifua mai le Fanau i le ituaiga o Iuta, i le gafa o Tavita.—Kenese 49:10; 1 Nofoaiga a Tupu 17:3, 4, 11-14.

5. Ina ua amata e Iesu lana faiva i le lalolagi, o le ā sa faamaninoina ai e faapea o ia o le Mesia?

⁵ O ā isi faamaoniga na saunia e mātaulia ai le Fanau? I tuā lava i le silia ma le 700 tausaga muamua atu, sa taʻua ai e le Tusi Paia Peteleema, o le nofoaga lea o le a soifua mai ai o se tagata le Fanau folafolaina. Sa taʻua ai foʻi le muaʻi iai o le Fanau “talu mai ona po o le vavau,” talu mai le taimi na foafoaina ai o ia i le lagi. (Mika 5:2) Sa valoia foʻi e ala mai i le perofeta o Tanielu, le taimi tonu o lona aliaʻi mai i le lalolagi o le Mesia. (Tanielu 9:24-26) E lē gata i lea, ina ua faauuina Iesu i le agaga paia, ma avea moni o Lē na Faauuina e Ieova, sa faamanino mai e le siʻufofoga o le Atua lava ia mai le lagi e faapea o ia o Lona Alo. (Mataio 3:16, 17) Sa faailoa mai ai le Fanau! O le pogai lenā sa mafai ai ona faapea mai ma le maumauaʻi Filipo: “Ua matou maua o ia le ua tusia e Mose i le tulafono, atoa ma le au perofeta, o Iesu lea.”—Ioane 1:45.

6. (a) E tusa ai ma le Luka 24:27, o le ā se mea na oo ina iloatino e soo o Iesu ? (e) O ai le vala autu o le ‘fanau a le fafine,’ ma o le ā le uiga o lona tuʻimomomoina o le ulu o le gata?

⁶ Ina ua mavae lenā, na oo ina iloatino e soo o Iesu, o le tele o faamatalaga faavaloaga e faasino atu iā te ia, ua avea ma vaega o le Tusi Paia faagaeeina. (Luka 24:27) Na oo ina manino atili, o Iesu o le vala autū lea o le ‘fanau a le fafine,’ o lē o le a tuʻimomomoina le ulu o le gata, ma nutipalaina Satani e lē toe iai. E ala iā Iesu, o le a faataunuuina ai folafolaga uma a le Atua i tagata, o mea uma ua loa ona tatou moomoo i ai.—2 Korinito 1:20.

7. E lē gata i le mātauliaina o Lē ua faasino atu i ai nei valoaga, ae o le ā le isi mea e aogā foʻi ona iloa lelei?

⁷ E tatau faapefea ona aafia ai i tatou i le iloaina o lenei mea? O loo taʻua e le Tusi Paia se eunuka Aitiope, o lē sa ia faitauina nisi o nei valoaga e faatatau i le Togisala ma le Mesia o le a afio mai. Ona o le lē malamalama, na ia fesili atu ai i le faievagelia o Filipo: “Ua fai mai lenei mea e le perofeta ia te ai?” Peitaʻi sa leʻi muta ai i inā le fia iloa e le eunuka o le mataupu ina ua ia maua le tali. Ina ua māeʻa ona faalogologo lelei i le faamalamalamaga na avatu e Filipo, ona iloa ai lea e le tamāloa, o lona malamalama i le faataunuuga o lenei valoaga e manaʻomia ai sana ia lava gaoioiga. Sa ia malamalama e manaʻomia ona papatisoina o ia. (Galuega 8:32-38; Isaia 53:3-9) Po o faapena ea foʻi la tatou tali atu?

8. (a) O le ā na faaataina mai i le taumafaiga a Aperaamo e ofoina atu Isaako? (e) Aiseā na fetalai ai Ieova iā Aperaamo e faapea e ala i le Fanau, o le a manuia ai atunuu uma, ma e faapefea ona faatatau mai lenei mea iā i tatou i aso nei?

⁸ Seʻi manatu foʻi i le tala faamomoiloto i le taumafaiga a Aperaamo e ofoina atu Isaako, o lona atalii e toʻatasi na fanauina mai e Sara. (Kenese 22:1-18) Na faaataina mai ai le mea o le a faia e Ieova—e ofoina mai lona Alo pele e toʻatasi: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola [e] faavavau.” (Ioane 3:16) Ua faamautinoa mai e lenei mea iā i tatou e faapea, e pei lava ona foaʻi mai e Ieova lona Alo pele e toʻatasi ina ia faataunuuina Lana fuafuaga, o le a faapena foʻi ona Ia ‘foai fua mai ia te i tatou mea uma lava.’ (Roma 8:32) O le ā se mea e manaʻomia mai iā i tatou? E pei ona faamauina i le Kenese 22:18, na fetalai atu Ieova iā Aperaamo e faapea, e ala i le Fanau o le a manuia ai atunuu uma, “auā ua . . . usiusitai [Aperaamo] i . . . upu [a le Atua].” E manaʻomia foʻi ona tatou faalogo atu iā Ieova ma lona Alo: “O lē faatuatua i le Alo, ua ia te ia le ola [e] faavavau; a o lē lē faatuatua i le Alo e le iloa e ia le ola, a o le toasa o le Atua o loo tumau lava i ona luga.”—Ioane 3:36.

9. Pe afai tatou te lotofaafetai mo le faamoemoe o le ola e faavavau ua mafai ona o le taulaga a Iesu, o le ā o le a tatou faia?

⁹ Pe afai tatou te lotofaafetai mo le faamoemoe o le ola e faavavau ua mafai ona o le taulaga a Iesu, o le a tatou mananaʻo la e fai mea ua fetalai ai Ieova iā i tatou e ala mai iā Iesu. E fesootaʻi atu nei faatonuga i lo tatou alofa mo le Atua ma o tatou tuaoi. (Mataio 22:37-39) Sa faaalia e Iesu e faapea, o lo tatou alofa mo Ieova o le a uunaʻia ai i tatou e aʻoaʻo atu i isi ina “ia tausi i mea uma ua fai [mai ai Iesu] ia te [i tatou].” (Mataio 28:19, 20) E ao foʻi ona tatou faasoa atu lenā alofa i isi o tatou uso auauna a Ieova, e ala i le lē aunoa ona “faapotopotoina o i tatou.” (Eperu 10:25; Kalatia 6:10) A o tatou faalogologo atu foʻi i le Atua ma lona Alo, e lē tatau ona tatou manatu faapea ua la soona tagisā maia so tatou lelei atoatoa. Ua taʻua e le Eperu 4:15, ona o Iesu o lo tatou Ositaulaga Sili, e mafai ona ia ‘tiga alofa faatasi ma i tatou i o tatou vaivaiga.’ Maʻeu se faamāfanafanaloto o lenā mea, aemaise pe a tatou faalatalata i le Atua i le tatalo e ala atu iā Keriso, mo le fesoasoani ina ia foʻia o tatou vaivaiga!—Mataio 6:12.

Ia Faaalia le Faatuatua iā Keriso

10. Aiseā ua lē maua ai se faaolataga seʻi vaganā ua ala mai iā Iesu Keriso?

¹⁰ Ina ua māeʻa ona faamatala atu i le faamasinoga sili faa-Iutaia i Ierusalema e faapea, sa faataunuuina valoaga o le Tusi Paia iā Iesu, ona taaofaʻi lea ma le malosi e le aposetolo o Peteru i le faapea mai: “E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata, e mafaia ona faaolaina ai o i tatou.” (Galuega 4:12) Talu ai o le fanau uma lava a Atamu o ni tagata ua agasala, e lē mafai la ona faaaogā le maliu o se tasi o i latou e togiola ai isi. Peitaʻi sa lelei atoatoa Iesu, ma sa talafeagai lona soifua e fai ma taulaga. (Salamo 49:6-9; Eperu 2:9) Sa ia ofoina atu i le Atua se togiola e tutusa lelei lona tāua ma le ola lelei atoatoa lea na leiloa iā Atamu. (1 Timoteo 2:5, 6) O lenei mea ua tatalaina ai le auala mo i tatou ina ia maua le ola e faavavau i le lalolagi fou a le Atua.

11. Ia faamatala le auala ua matuā aogā ai le taulaga a Iesu iā i tatou.

¹¹ O le togiola na tatalaina ai foʻi mo i tatou le auala e mauaina ai isi aogā, e oo lava i le taimi nei. Mo se faaaʻoaʻoga, e ui lava o i tatou o ni tagata agasala, ae o le taulaga a Iesu ua mafai ai ona tatou maua se lotofuatiaifo mamā, ona ua faamagaloina a tatou agasala. Ua sili mamao atu lenei i lo mea sa mafai ona faia mo tagata Isaraelu, e ala i taulaga sa faia i manu e tusa ma le Tulafono faa-Mose. (Galuega 13:38, 39; Eperu 9:13, 14; 10:22) Peitaʻi, o le mauaina o lenā faamagaloga e ao ai ona tatou amanaʻia moni le telē o lo tatou manaʻomia o le taulaga a Keriso: “Afai tatou te faapea, E leai sa tatou agasala, ua sese ai i tatou ia i tatou, e le o i totonu ia te i tatou le upu moni; a e afai tatou te taʻu atu a tatou agasala, e faamaoni o ia, ma le amiotonu e faamagalo ai a tatou agasala, ma faamamā mai ia i tatou i amioletonu uma lava.”—1 Ioane 1:8, 9, LF.

12. Aiseā ua avea ai le faatofuina i le vai o se vala tāua i le mauaina o se lotofuatiaifo lelei i luma o le Atua?

¹² E mafai faapefea e tagata agasala ona faaalia le faatuatua iā Keriso ma lana taulaga? Ina ua avea tagata i le uluaʻi senituri o ni tagata talitonu, sa latou faailoaina atu i le lautele lenā mea. E faapefea? Sa papatisoina i latou. Aiseā? Auā sa poloaʻiina e Iesu, e tatau i ona soo uma ona papatisoina. (Mataio 28:19, 20; Galuega 8:12; 18:8) O le a lē toe mataofiofia se tasi pe a faagaeetia moni lona loto e le sauniuniga alofa na faia e Ieova e ala mai iā Iesu. O le a ia faia so o se fetuutuunaʻiga manaʻomia i lona olaga, e tuuina atu o ia i le Atua e ala i le tatalo, ma faailogaina lona tuuina atu e ala i le faatofuina i le vai. O le faaalia o le faatuatua i lenei auala ua ia ‘talosaga atu ai i le Atua mo se lotofuatiaifo lelei.’—1 Peteru 3:21, NW.

13. Pe afai tatou te iloa ua tatou faia se agasala, o le ā e tatau ona tatou fai, ma aiseā?

¹³ E mautinoa, e tusa lava po ua uma ona faatinoina lenei laasaga, ae o le a aliali mai pea uiga agasala. O le ā la e ao ona fai? Na faapea mai le aposetolo o Ioane: “Ou te tusi atu nei mea ia te outou, ina neʻi agasala outou; pe afai foi e agasala se tasi, o ia te i tatou le fautua i luma o le Tamā, o Iesu Keriso lea, o lē amiotonu. O le togiola foi o ia mo a tatou agasala.” (1 Ioane 2:1, 2) Po o lona uiga ea o lenei manatu, e tusa lava po o le ā le ituaiga agasala tatou te faia, ae afai tatou te tatalo i le Atua mo le faamagaloga, ona toe lelei lava lea o mea uma? E lē o le manatu lenā. O le ki i le faamagaloga o le salamō moni. E ono manaʻomia foʻi se fesoasoani mai i ē matutua o i le faapotopotoga Kerisiano, o ē ua sili atu ona tele lo latou poto masani. E ao ona tatou iloa le sesē o le mea na faia ma lagona ai le faanoanoa moni, ina ia mafai ona tatou fai se taumafaiga e ʻalofia le toe faia. (Galuega 3:19; Iakopo 5:13-16) Pe afai tatou te faia lenei mea, e mafai ona tatou mautinoa o le a fesoasoani mai Iesu, ma tatou toe maua le finagalo malie o Ieova.

14. (a) Ia faamatala se auala tāua lea ua aogā ai le taulaga a Iesu iā i tatou. (e) Pe afai e iā i tatou moni lava le faatuatua, o le ā o le a tatou faia?

¹⁴ Ua tatalaina e le taulaga a Iesu le auala i le ola e faavavau i le lagi mo le “lafu mamoe itiiti,” o le vaega lona lua o le fanau lea e taʻua i le Kenese 3:15. (Luka 12:32; Kalatia 3:26-29) Ua tatalaina ai foʻi le auala mo le ola e faavavau i luga o se lalolagi parataiso mo le faitau piliona o isi o le fanau a tagata. (Salamo 37:29; Faaaliga 20:11, 12; 21:3, 4) O le ola e faavavau “o le mea foaifuaina mai lea e le Atua, i lo tatou Alii o Keriso Iesu.” (Roma 6:23; Efeso 2:8-10) Pe afai tatou te faatuatua i lenā meaalofa ma lotofaafetai i le auala ua ala mai ai, o le a tatou mananaʻo la e faalauiloa atu lenei mea. O le iloaina o le auala ofoofogia ua faaaogā ai e Ieova ia Iesu i le faataunuuina o Lona finagalo, faapea le matuā tāua iā i tatou uma ona mulimulituʻi i tulaga aao o Iesu, o le a avea ai le faiva faa-Kerisiano ma se tasi o galuega e sili ona tāua i o tatou olaga. O le a faamaonia lo tatou faatuatua e ala i lo tatou maumauaʻi e taʻu atu i isi lenei meaalofa matagofie mai le Atua.—Galuega 20:24.

15. E faapefea ona iai ni āuga autasi i le faatuatua iā Iesu Keriso?

¹⁵ Maʻeu ni āuga lelei ma le autasi ua iai i lenā faatuatua! O le faatuatua lea ua mafai ai ona tatou tosina vavalalata atu iā Ieova, i lona Alo, ma i isi uma o i le faapotopotoga Kerisiano. (1 Ioane 3:23, 24) Ua faapogaia ai ona tatou olioli ina ua foaʻi atu ma le agalelei e Ieova i lona Alo, “le suafa e silisili i suafa uma lava [vaganā le suafa o le Atua]; ina ia tootuli o tulivae uma lava i le suafa o Iesu, o e o i le lagi, ma e o i le lalolagi, ma e o i lalo o le lalolagi; ma ia taʻutaʻu atu e laulaufaiva uma lava o Iesu Keriso o le Alii lava ia, ia iu ai i le viiga o le Atua le Tamā.”—Filipi 2:9-11.

Talanoaga Autalu

• Ina ua aliaʻi mai le Mesia, aiseā na manino ai le mātaulia o ia e i latou sa talitonu moni i le Afioga a le Atua?

• O ā nisi o mea e ao ona tatou faia e faaalia ai lo tatou lotofaafetai mo le taulaga a Iesu?

• I ā auala ua uma ona aogā ai le taulaga a Iesu iā i tatou? E faapefea ona fesoasoani lenei mea iā i tatou pe a tatou tatalo iā Ieova mo le faamagaloina o agasala?

[Ata i le itulau 36]

Na fetalai Iesu i ona soo e ao ona latou aʻoaʻo atu i isi ina ia tausi i poloaʻiga a le Atua