‘Tautala i le Afioga a le Atua ma le Faamalosi’

E MAFAI e Ieova le Atua ona aumaia le malosi i ana auauna e ‘tautala ai i le Afioga a le Atua ma le faamalosi.’ (Galuega 4:31) E oo lava ia i latou o tamameamea i auala o upu moni o le Tusi Paia ma ē leʻi lava se tomai i le galuega faaevagelia e lē manaomia ona faatalatū e tautala atu i le tala lelei ma le faamalosi. I Côte d’Ivoire, e toalua ni tagata talaʻi o le tala lelei na auai i le faiva mai le fale i le fale ma la fetaiai ai ma se polofesa i se iunivesite. O le Molimau talavou o Seriki, i le lagona faapea e lē agavaa e tautala atu i se tagata e maualuga le aʻoaʻoina faapena, na ia tuu atu ai i le isi Molimau e faia le talanoaga.

Na faalavelaveina le polofesa i uiga faailogalanu ma tuuaʻia le Atua mo faafitauli o loo tutupu i le va o lanu, i le lagona faapea o le Atua o lē na foafoaina lanu eseese. Ina ua uma se talanoaga umi faapea na foliga mai e leai se iʻuga, na maua e Seriki le lototele mulimuli ane e tautala atu, ma sa ia faasalavei atu ma le faaaloalo i le talanoaga. (1 Tesalonia 2:2) I lona matauina o loo teuteuina le fale o le polofesa i lanu mananaia felanulanuai, ona fesili atu lea o Seriki i le polofesa, “Aiseā na e lē vali ai lou fale atoa i se lanu e tasi?”

“Ua e manatu oe o aʻu e valea!” na tali faatopetope atu ai le polofesa. Na tali Seriki: “E leai, ae aiseā ua tatou faatalitalia ai le Atua e faia mea uma ma tagata uma i le lanu e tasi?” Sa manino le manatu. O lena faataʻitaʻiga faigofie na faamaonia ai le uigā, ma o se molimau lelei na tuuina atu e se tasi na muai lotovaivai e pei o Seriki.