LESONA 21
Ua Faapefea Ona Talaʻiina Atu le Tala Lelei?
Ua toeitiiti ona aveesea lea e Ieova o tatou faafitauli uma, e ala i lona Malo. E manaʻomia ona iloa e tagata uma lenei tala lelei. Na finagalo Iesu e faailoa atu e ona soo lenei feʻau i tagata uma! (Mataio 28:19, 20) Ua faapefea ona usitaʻia e Molimau a Ieova le faatonuga a Iesu?
1. Ua faapefea ona faataunuuina le Mataio 24:14 i aso nei?
Na valoia mai e Iesu: “O le a talaʻiina atu foʻi lenei tala lelei o le Malo i le lalolagi atoa.” (Mataio 24:14) E fiafia Molimau a Ieova e faia se sao i lenei galuega tāua. O loo matou talaʻia lenei tala lelei i le lalolagi aoao i le silia ma le 1,000 gagana! O lenei galuega tele e manaʻomia ai ni taumafaiga malolosi ma se faalapotopotoga e galulue faatasi. E lē mafai ona faataunuuina lenei galuega e aunoa ma le fesoasoani a Ieova.
2. O ā taumafaiga o loo matou faia ina ia talaʻi atu i tagata?
E matou te talaʻi i so o se nofoaga e maua ai tagata. I le pei o Kerisiano i le uluaʻi senituri, e matou te talaʻi “mai i lea fale i lea fale.” (Galuega 5:42) O lenei auala maopoopo, ua mafai ai ona matou talaʻi atu i le faitau miliona o tagata i tausaga taʻitasi. Talu ai e lē o taimi uma e maua ai tagata i ō latou fale, e matou te talaʻi atu ai foʻi i nofoaga faitele. E matou te faaaogā so o se avanoa e talanoa ai i isi, e faatatau iā Ieova ma lona finagalo.
3. O ai e iai le tiute tauave o le talaʻi atu o le tala lelei?
E iai i Kerisiano moni uma le tiute tauave o le faailoa atu o le tala lelei i isi. E matou te matuā manatu mamafa i lenei tiute tauave, ma talaʻi atu i le tele e mafai ai, ina ia mafai ona faasaoina ola o tagata. (Faitau le 1 Timoteo 4:16.) E lē totogia matou e faia lenei galuega, auā ua faapea mai le Tusi Paia: “Ia outou avatu fua, auā ua outou maua fua.” (Mataio 10:7, 8) E lē o tagata uma e talia lenei feʻau, ae e matou te talaʻi atu pea ona e matou te usiusitaʻi iā Ieova ma faafiafiaina ai o ia.
SAʻILIʻILI ATILI
Ia iloilo atili taumafaiga a Molimau a Ieova ina ia talaʻi atu i le lalolagi aoao, ma le auala o loo fesoasoani mai ai Ieova iā i matou.
Galuega talaʻi i le lalolagi aoao: (A) Costa Rica, (E) Iunaite Setete, (I) Benin, (O) Taialani, (U) Yap, (F) Suetena
4. E matou te taumafai malosi e maua tagata uma
E faia e Molimau a Ieova taumafaiga uma ina ia talaʻi atu le tala lelei i so o se vaipanoa. Faaali le VITIŌ, ona talanoa lea i le fesili lenei:
O le ā se mea e mataʻina ai taumafaiga a Molimau a Ieova ina ia talaʻi atu?
Faitau le Mataio 22:39 ma le Roma 10:13-15, ona talanoa lea i fesili nei:
E faapefea i le galuega talaʻi ona faailoa atu ai le alofa i o matou tuaoi?
O ā faalogona o Ieova iā i latou o loo talaʻia le tala lelei?—Tagaʻi i le fuaiupu e 15.
5. O i matou o le ʻaufaigaluega faatasi ma le Atua
O le tele o tala o mea ua tutupu, e faailoa mai ai o loo taʻitaʻia e Ieova lenei galuega. Mo se faataʻitaʻiga, i Niu Sila na feiloaʻi ai le uso o Paulo i se fafine i le talaʻiga mai i lea fale i lea fale i se aoauli. Ae i le taeao o le aso lava lenā, na tatalo atu ai lenei fafine i le Atua ma taʻua lona suafa o Ieova, ma talosaga atu pe mafai ona asiasi mai se tasi iā te ia. Na faapea mai Paulo: “E tolu itula talu ona uma ona ia tatalo, ae ou taunuu loa i lona fale.”
Faitau le 1 Korinito 3:9, ona talanoa lea i le fesili lenei:
E faapefea ona faaalia mai i tala o mea e tutupu e pei o lenei tala mai i Niu Sila, o loo taʻitaʻia e Ieova le galuega talaʻi?
Faitau le Galuega 1:8, ona talanoa lea i le fesili lenei:
Aiseā e tatou te manaʻomia ai le fesoasoani a Ieova i le galuega talaʻi?
E te silafia?
I a matou sauniga amata o le vaiaso, e toleni ai i matou i le auala e talaʻi atu ai. Pe afai na e auai i se tasi o nei sauniga, o le ā sou manatu e faatatau i nei toleniga?
6. E matou te usiusitaʻi i le faatonuga a le Atua e talaʻi atu
I le uluaʻi senituri, na taumafai tagata tetee e taofia soo o Iesu mai le talaʻi atu. Na puipuia e uluaʻi Kerisiano le latou aiā e talaʻi atu ai, e ala i le “faamautūina faaletulafono o le tala lelei.” (Filipi 1:7) O loo faia foʻi faapena e Molimau a Ieova i aso nei.a
Faitau le Galuega 5:27-42, ona talanoa lea i le fesili lenei:
Aiseā e lē mafai ai ona taofia le talaʻiga?—Tagaʻi i fuaiupu 29, 38 ma le 39.
PE A FESILI MAI SE TASI: “Aiseā e talaʻi atu ai Molimau a Ieova mai i lea fale i lea fale?”
O le ā lau tali?
AOTELEGA
Na faatonuina e Iesu ona soo ina ia talaʻi atu le tala lelei i atunuu uma. O loo fesoasoani Ieova i ona tagata e faataunuu lenei galuega.
Fesili Autalu
Ua faapefea ona talaʻia le tala lelei i le lalolagi aoao?
E faapefea i le talaʻiga ona faailoa atu ai le alofa i o matou tuaoi?
Pe e te manatu e maua le fiafia i le galuega talaʻi? Aiseā?
MANATU FAAOPOOPO
Tagaʻi i le auala o loo talaʻi atu ai Molimau a Ieova i tagata i taulaga tetele.
Na faapefea ona fesoasoani atu Molimau a Ieova i tagata sulufaʻi?
Ia uaʻi atu i se tasi o loo faamatala mai lona fiafia i le avea ma tagata talaʻi faataimi atoa.
Iloilo nisi o iʻuga o faamasinoga, lea na mafai ai ona talaʻi atu le tala lelei.
a O le Atua na faatonuina i tatou e talaʻi atu. O le māfuaaga lenā e lē manaʻomia ai e Molimau a Ieova, se faatagaga mai i pulega a tagata e talaʻi atu ai le tala lelei.