O le ā le Māfuaaga o Mafatiaga ma Mea Leaga?

E masani ona tuufesili tagata pe aiseā e tutupu ai mea leaga. Ae e tatou te fiafia ona ua faailoa mai i le Tusi Paia le tali o lenā fesili!

1. Na faapefea ona aumaia e Satani mea leaga i le lalolagi?

Na fouvale Satani le Tiapolo i le Atua. Na manaʻo e na te pulea isi, ma uunaʻia le uluaʻi ulugalii o Atamu ma Eva e fouvale atu foʻi i le Atua, e ala i lona fai atu o se pepelo iā Eva. (Kenese 3:​1-5) Na ia faapea atu iā Eva, o loo taofia e le Atua se mea lelei mai iā te ia, ma o le a sili atu ona fiafia tagata pe a lē usiusitaʻi i le Atua. Na faia e Satani le uluaʻi pepelo e ala i le faapea atu iā Eva e lē oti lava o ia. O le māfuaaga lenā ua taʻua ai o ia “o sē e pepelo ma le tamā o le pepelo.”​—Ioane 8:​44.

2. O le ā na filifili Atamu ma Eva e fai?

Na faaalia e Ieova le limafoaʻi iā Atamu ma Eva. Na ia faapea atu e mafai ona la aai i laau uma o le faatoʻaga o Etena, seʻi vaganā ai le laau e tasi. (Kenese 2:​15-​17) Ae na la filifili lava e aai i le fua o lenā laau. “Ona tago atu lea o [Eva] i le fua ma ʻai ai.” Mulimuli ane “ua ʻai ai foʻi” ma Atamu. (Kenese 3:6) Na la lē usiusitaʻi uma i le Atua. Na lelei atoatoa Atamu ma Eva ma na mafai ona la faia le mea saʻo. Ae o lo la lē usiusitaʻi ma le loto i ai i le Atua, ua la agasala ai ma teena lana aiā e pule ai. O lenā filifiliga na iʻu atu ai i le tele o mafatiaga.​—Kenese 3:​16-​19.

3. Ua faapefea ona tatou aafia i le filifiliga a Atamu ma Eva?

Ina ua agasala Atamu ma Eva, na lē lelei atoatoa ai ma tuufaasolo mai ai le tulaga lē lelei atoatoa, i ē uma na tupuga mai iā i laʻua. Ua faapea mai le Tusi Paia e faatatau iā Atamu: “E pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma.”​—Roma 5:​12.

E tele māfuaaga ua tatou mafatia ai. E tatou te mafatia ona o filifiliga lē lelei e tatou te faia, o filifiliga lē lelei e faia e isi, po o mea foʻi e tutupu faafuaseʻi i le taimi e leʻi faatalitalia.​—Faitau le Failauga 9:​11.

SAʻILIʻILI ATILI

4. O ai e māfua ai o tatou mafatiaga?

E toʻatele tagata e talitonu o loo pulea e le Atua le lalolagi atoa. Ae pe e moni lenā manatu? Faaali le VITIŌ.

VITIŌ: O Ai o Loo Pulea le Lalolagi? (1:​24)

Faitau le Iakopo 1:​13 ma le 1 Ioane 5:​19, ona talanoa lea i le fesili lenei:

• Pe e tuuaʻia le Atua i mafatiaga ma mea leaga?

5. Iloilo iʻuga o le pule a Satani

VITIŌ: Aiseā ua Lē Taofia ai e le Atua Mafatiaga?​—Vaaiga Puupuu (3:​07)

Faitau le Kenese 3:​1-6, ona talanoa lea i fesili nei:

• O le ā le pepelo na fai atu e Satani?​—Tagaʻi i fuaiupu 4 ma le 5.

• Na faapefea ona faaupu atu e Satani le manatu sesē, o loo taofia e Ieova se mea lelei mai le mauaina e tagata?

• Pe a fua i faamatalaga a Satani, pe e toe manaʻomia la e tagata le pule a Ieova ina ia maua ai se olaga fiafia?

Faitau le Failauga 8:​9, ona talanoa lea i le fesili lenei:

• O le ā ua tupu ina ua lē toe pulea e Ieova le lalolagi?

1. A. Na lelei atoatoa Atamu ma Eva ma sa ola i le Parataiso. Ae na la faalogo iā Satani ma fouvale ai iā Ieova

2. E. Ina ua māeʻa le fouvalega, na faatumulia le lalolagi i le agasala, mafatiaga ma le oti

3. I. O le a aveesea e Ieova le agasala, mafatiaga, ma le oti. O le a toe lelei atoatoa tagata ma ola i le Parataiso

6. E manatu mamafa mai Ieova i o tatou mafatiaga

Pe e manatu mamafa mai Ieova pe a tatou mafatia? Mātau faamatalaga na tusia e le tupu o Tavita ma le aposetolo o Peteru. Faitau le Salamo 31:7 ma le 1 Peteru 5:​7, ona talanoa lea i le fesili lenei:

• O ā ou faalogona i le iloaina e silafia ma manatu mamafa mai Ieova i o tatou mafatiaga?

AOTELEGA

E tuuaʻia Satani le Tiapolo ma uluaʻi tagata i mea leaga ua tutupu i le lalolagi. Ae e matuā manatu mamafa mai Ieova i o tatou mafatiaga, ma ua toeitiiti ona ia aveesea lea.

Fesili Autalu

• O le ā le pepelo na fai e Satani le Tiapolo iā Eva?

• Ua faapefea ona tatou aafia uma i le fouvalega a Atamu ma Eva?

• E faapefea ona tatou iloa e manatu mamafa mai Ieova i o tatou mafatiaga?

MANATU FAAOPOOPO

Tagaʻi i le uiga o le agasala o loo faamatala i le Tusi Paia.

“O le ā le Agasala?” (Mataupu i le jw.org)

Faitau atili e faatatau i le mataupu na lāgā e Satani le Tiapolo i le faatoʻaga i Etena.

“Aiseā ua Lē Taofia ai e le Atua Puapuaga?” (Le Olomatamata, Ianuari 1, 2014)

Iloilo tali faalaeiau i se fesili faigatā.

“Aiseā na Tupu ai le Fasiotiga Tagata na Faia e le ʻAu Nasi? Aiseā e Leʻi Taofia ai e le Atua?” (Mataupu i le jw.org)

Mātau po o le ā na aʻoaʻoina e se tamāloa e faatatau i mafatiaga o loo tutupu.

Ua Lē o Toe Tuua na o Aʻu (5:​09)

Ua tatou agasala, mafatia, ma feoti ona na lē usiusitaʻi le uluaʻi ulugalii o Atamu ma Eva i le Atua.a Ae e lē faapea ai ua leai so tatou faamoemoe. Ua saunia e Ieova se auala e faasaoina ai i tatou mai i āuga o le agasala ma le oti, e ala i lona Alo o Iesu Keriso. Ua aʻoaʻo mai i le Tusi Paia, na saunia e Iesu le togiola e ala i lona maliu. O le togiola o se tau e totogi e faasaʻolotoina ai se tagata. O le tau na totogi e Iesu, na tutusa lelei ma lona ola lelei atoatoa. (Faitau le Mataio 20:28.) O le lotomalie o Iesu e foaʻi atu lona ola lelei atoatoa, na tatala ai le avanoa mo i tatou e toe maua ai mea uma na leiloloa iā Atamu ma Eva. Na faailoa mai ai foʻi e Iesu le tele o lo la alofa ma Ieova mo i tatou. O le a fesoasoani lenei lesona e faalolotoina ai lou talisapaia o le maliu o Iesu.

1. E faapefea ona tatou maua i aso nei aogā o le maliu o Iesu?

Ona o lo tatou tulaga agasala, ua tatou faia ai le tele o mea e lē fiafia ai le finagalo o Ieova. Ae pe a tatou salamō moni ma tatalo atu mo le faamagaloga a Ieova e ala iā Iesu Keriso, ma faia le mea sili e ʻalofia ai le toe faia o lenā mea sesē, o le a tatou olioli ai i se faiā vavalalata ma le Atua. (1 Ioane 2:1) Ua faapea mai le Tusi Paia: “E na o le faatasi lava ona maliu o Keriso mo agasala, o le tagata amiotonu mo ē amiolētonu, ina ia taʻitaʻiina e ia outou i le Atua.”​—1 Peteru 3:​18.

2. E faapefea ona tatou maua aogā i le lumanaʻi ona o le maliu o Iesu?

Na auina mai e Ieova Iesu e ofo atu lona ola lelei atoatoa, “ina ia lē fano tagata uma e faatuatua iā [Iesu], ae ia maua le ola e faavavau.” (Ioane 3:​16) E ala i le taulaga a Iesu, ua toeitiiti ona aveesea atoatoa lea e Ieova mea uma na māfua mai i le lē usiusitaʻi o Atamu. O lona uiga, pe a tatou faaalia le faatuatua i le taulaga togiola a Iesu, o le a tatou maua se olaga fiafia e faavavau i le lalolagi parataiso!​—Isaia 65:​21-​23.

SAʻILIʻILI ATILI

3. O le maliu o Iesu ua faasaʻoloto ai i tatou mai i le agasala ma le oti

VITIŌ: Aiseā na Maliu ai Iesu?​—Vaega 1 (2:​01)

• O le ā le avanoa na lē maua e Atamu ina ua lē usitaʻi i le Atua?

Faitau le Roma 5:​12, ona talanoa lea i le fesili lenei:

• Ua faapefea ona e aafia i le agasala a Atamu?

Faitau le Ioane 3:​16, ona talanoa lea i le fesili lenei:

• Aiseā na auina mai ai e Ieova lona Alo i le lalolagi?

1. A. O Atamu o se tagata lelei atoatoa na lē usitaʻi i le Atua, ma tuufaasolo mai ai le agasala ma le oti i tagata uma

2. E. O Iesu o se tagata lelei atoatoa na usitaʻi i le Atua, ma aumaia le tulaga lelei atoatoa ma le ola e faavavau i tagata uma

4. E maua e tagata uma aogā mai le maliu o Iesu

VITIŌ: Aiseā na Maliu ai Iesu?​—Vaega 2 (2:​00)

• E faapefea ona maua e tagata uma aogā mai i le maliu o se tagata e toʻatasi?

Faitau le 1 Timoteo 2:​5, 6, ona talanoa lea i le fesili lenei:

• O Atamu o se tagata lelei atoatoa, ae ona na agasala, ua agasala ma feoti ai foʻi tagata uma. Na lelei atoatoa foʻi Iesu. Na faapefea la ona ia saunia se “togiola e fetaui lelei”?

5. O le togiola o se meaalofa mai iā Ieova mo oe

E vāai uō a Ieova i le togiola o se meaalofa. Mo se faataʻitaʻiga, faitau le Kalatia 2:​20, ona talanoa lea i le fesili lenei:

• Na faapefea ona vaai le aposetolo o Paulo i le togiola o se meaalofa?

Ina ua agasala Atamu, na faasalaina ai o ia ma ē uma na tupuga mai iā te ia i le oti. Ae na foaʻi mai e Ieova lona Alo e maliu, ina ia e maua ai le avanoa e olioli ai i le ola e faavavau.

A o e faitauina fuaiupu o loo mulimuli mai, ia faaata faalogona o Ieova a o mafatia lona Alo. Faitau le Ioane 19:​1-7, 16-​18, ona talanoa lea i le fesili lenei:

• O ā ni ou faalogona i mea ua faia e Ieova ma Iesu mo oe?

AOTELEGA

O le maliu o Iesu ua saunia ai se faavae mo le faamagaloina o a tatou agasala e Ieova, ma maua ai se olaga fiafia e faavavau.

Fesili Autalu

• Aiseā na maliu ai Iesu?

• Na faapefea ona avea le ola lelei atoatoa o Iesu ma togiola e fetaui lelei?

• E faapefea ona e maua aogā mai i le maliu o Iesu?

MANATU FAAOPOOPO

Iloilo pe aiseā ua taʻua ai le ola lelei atoatoa o Iesu o se togiola.

“E Faapefea i le Taulaga a Iesu Ona Avea o se ʻTogiola mo Tagata e Toʻatele’?” (Mataupu i le jw.org)

O le ā e manaʻomia ona tatou faia ina ia faasaoina ai i tatou?

“Na Faapefea ona Faasaoina i Tatou e Iesu?” (Mataupu i le jw.org)

Pe e faamagaloina e Ieova agasala matuiā?

“Taliina Fesili Faale-Tusi Paia” (Le Olomatamata, Me 1, 2013)

Iloilo pe na faapefea i le aʻoaʻoina e faatatau i le taulaga togiola a Keriso, ona fesoasoani i se tamāloa e suia ai lona olaga.

“Ua Ou Lē Toe Pologa i Faiga Sauā” (Mataupu i le jw.org)