E Taʻitaʻi e le Agaga o Ieova Ona Tagata

“Ia taʻitaʻiina atu aʻu e lou Agaga lelei i le laueleele laulelei.”—SALAMO 143:10.

1, 2. O le ā atonu e faapogaia ai mafatiaga i auauna faamaoni a Ieova?

‘UA MATUĀ lagona lava loʻu mafatia! O fea ea e mafai ona ou maua ai sina faamafanafanaga? Po ua tuulafoaiina aʻu e le Atua?’ Pe na ia te oe ea lena lagona? Afai na iai, e lē na o oe la. E ui lava ina o loo nonofo auauna faamaoni a Ieova i se parataiso olaola faaleagaga, ae i nisi taimi e fesagai ai i latou ma faafitauli e mafatia ai, o tofotofoga, ma faaosoosoga e masani ona oo i tagata.—1 Korinito 10:13.

² Atonu po ua osofaia oe e ni tofotofoga faaumiumi po o se mea ua e mafatia tele ai. Atonu o e faanoanoa ona o le maliu o sē pele, ma atonu ua lagona ai le tuua toatasi. Po ua ootia foi lou loto ona o le maʻi o se uō pele. O na tulaga e mafai ona faoa ai le olioli ma le filemu mai ia te oe, ma atonu ua oo ai lava ina faamataʻuina lou faatuatua. O le ā e ao ona e fai?

Talosaga atu i le Atua mo Lona Agaga

3. Afai e iai se mea ua faoa ai na uiga e pei o le filemu ma le olioli, o le ā e atamai ona faia?

³ Afai e iai se mea ua faoa lou filemu, lou olioli, po o se isi lava uiga faaleatua, e atamai la ona tatalo mo le agaga paia o le Atua, po o lona mana galue. Aiseā? Auā e saunia e le agaga o Ieova fua lelei na e fesoasoani i se Kerisiano ina ia faafetaiaia ai faafitauli, tofotofoga, ma faaosoosoga. Ina ua uma ona lapataia e uiga i “galuega a le tino,” ona tusi mai lea o le aposetolo o Paulo e faapea: “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le lē gaoia [“pulea totino,” NW]; e le faatulafonoina mea faapena.”—Kalatia 5:19-23.

4. Pe a fesagai ma se tofotofoga po o se faaosoosoga, aiseā e alagātatau ai ona patino a tatou tatalo?

⁴ Ona o le ituaiga o tofotofoga o loo lua fesagai, atonu ua e iloa ai ua e oo i se lamatiaga o le leiloa lea o lou agamalu po o le loto agamalu. E ao la ona patino lau tatalo ia Ieova le Atua mo le fua o le agaga o le agamalu. Afai o lua fesagai ma ni faaosoosoga, e te manaomia faapitoa lava la le fua o le pulea totino. E moni, o se mea tatau foi ona tatalo atu mo le fesoasoani a le Atua e tetee atu ai i le faaosoosoga, mo le laveaiina mai ia Satani, ma mo le atamai e manaomia ina ia tumau ai i le tofotofoga.—Mataio 6:13; Iakopo 1:5, 6.

5. Afai ua e matuā mafatia i ni tulaga ma ua e lē iloa ai po o lē fea fua o le agaga e tatalo i ai, o le ā e mafai ona faia?

⁵ Ae peitai, i nisi taimi, atonu e oo mai ai ni tulaga e matuā mafatia ai po ua lē mautonu ai, ua e lē iloa ai po o lē fea fua o le agaga o loo e manaomia. O le mea moni, atonu ua faigata foi ona maua le olioli, le filemu, le agamalu, ma isi uiga uma faaleatua. Ona ā lea? Aiseā e lē talosaga atu ai i le Atua mo le agaga paia lava ia ma tuu atu ia te ia na te faatupuina fua manaomia e tusa ai ma lou tulaga? O fua manaomia atonu o le alofa po o le olioli po o le filemu ia po o fua uma lava o le agaga. Ia tatalo foi ina ia fesoasoani le Atua ia te oe ina ia e lolo atu i le faasinoga a lona agaga, auā o loo ia faaaogāina lea e taʻitaʻiina ai ona tagata.

E Naunau Ieova e Fesoasoani

6. Na faapefea ona faamamafa atu e Iesu i ona soʻo le manaomia ona tatalo e lē aunoa?

⁶ Ina ua saili soʻo o Iesu Keriso mo se fautuaga e uiga i le tatalo, sa ia uunaia i latou ina ia tatalo mo le agaga o le Atua. Sa muai faaaogāina e Iesu se tala faatusa na fuafuaina ina ia uunaia ai i latou e tatalo e lē aunoa. Na fetalai o ia: “O ai so outou e ana le uo, e alu atu ia te ia i le tulua o po, ma fai atu ia te ia, Sole, seʻi au mai ni areto e tolu gafua, a e taui atu; auā ua sau laʻu uo ia te au i lana malaga, a e leai ni aʻu mea e laulau atu i ai; e tali mai o ia mai totonu o le fale, ua faapea mai, Aua e te faasoesa mai ia te au; ua uma ona pupuni o le faitotoa, ua matou taooto ma laʻu fanau; ou te le mafai ona tulai e avatu mā oe. Ou te fai atu ia te outou, E ui lava ina le tulai o ia, ma avatu ia te ia, ona o ia o lana uo, a e tulai, ma avatu mea uma e manao ai o ia, ona o lana faatauanau ane.”—Luka 11:5-8.

7. O le ā le uiga o upu a Iesu i le Luka 11:11-13, ma o le ā le faamautinoaga ua aumaia ai ia i tatou e faatatau i le Atua ma lona agaga?

⁷ O loo naunau Ieova e fesoasoani i tagata taitoatasi uma o ana auauna faamaoni tuuina atu, ma e faafofoga mai foi o ia i a latou faatoga. Ae afai e ʻole atu pea ma le faatauanau’ lena tagata, e pei ona uunaia e Iesu, ua faaalia ai i lenei mea lona loto naunau ma o se faaaliga foi lea o lona faatuatua. (Luka 11:9, 10) Na faaopoopo mai Keriso: “O ai se tamā ia te outou e avatu ea e ia i lona atalii . . . pe a ole mai se iʻa, e avatu ea ia te ia se gata a e le o se iʻa? pe a ole mai se fuāmoa, e avatu ea ia te ia se akarava? O lenei, o outou e leaga, afai ua iloa e outou ona avatu o mea lelei mā a outou fanau; e le sili ea ona foaiina mai e lo outou Tamā o i le lagi le Agaga Paia i e ole atu ai ia te ia?” (Luka 11:11-13) Afai o se matua faalelalolagi, e ui lava pe tele pe itiiti ni ona leaga ona o le agasala tuufaasolo, ae na te avatu i lana tama o mea lelei, e mautinoa la o le a faaauau foi e lo tatou Tamā faalelagi ona foai mai lona agaga paia i so o se tasi o ana auauna faamaoni o lē e ole atu i ai ma le loto maulalo.

8. Ua faapefea ona faatatauina ia Tavita, Iesu, ma auauna a le Atua i aso nei le Salamo 143:10?

⁸ Ina ia maua aogā mai le agaga o le Atua, e tatau ona tatou matuā naunau e mulimuli i lana taʻitaʻiga e pei ona sa faia e Tavita. Na ia tatalo: “Ia e aʻoaʻo mai ia te au e fai lou finagalo; auā o oe lava loʻu Atua; ia taʻitaʻiina atu aʻu e lou Agaga lelei i le laueleele laulelei.” (Salamo 143:10) Sa manao Tavita, o lē na fesolasolataʻi ona o le tupu o Isaraelu o Saulo, e taʻitaʻiina o ia e le agaga o le Atua ina ia mautinoa ai sa saʻo lona ala. I se taimi na alu atu ai Aviata ma le efota a le faitaulaga sa faaaogā e saili ai le finagalo o le Atua. Ona o ia o se sui ositaulaga a le Atua, na faatonu atu ai e Aviata Tavita i le auala e faafiafiaina ai Ieova. (1 Samuelu 22:17–23:12; 30:6-8) E pei o Tavita, na taʻitaʻiina foi Iesu e le agaga o Ieova, ma sa moni foi lenei mea i le vasega o soʻo faauuina o Keriso. I le 1918-1919, sa iai i latou uma i se tulaga e pei o ni tagata ese i manatu o tagata o le lalolagi, ma sa manatu o latou fili faalelotu faapea e mafai ona latou faaumatiaina nei soʻo faauuina. Sa tatalo le vaega faauuina mo se auala e sao mai ai i lo latou tulaga o le lē gaoioi, ma i le 1919, na tali mai ai le Atua i a latou tatalo, laveaiina i latou, ma toe faagaoioia ai i latou i lana auaunaga. (Salamo 143:7-9) E mautinoa lava, sa fesoasoani le agaga o Ieova i lena taimi e taʻitaʻiina ona tagata, e pei lava ona ia faia e oo mai lava i aso nei.

Le Auala e Fesoasoani ai le Agaga

9. (a) Ua faapefea ona avea le agaga paia o se “Fesoasoani”? (e) E faapefea ona tatou iloa, o le agaga paia e lē o se peresona? (Tagai i le faamatalaga i lalo.)

⁹ Sa taʻua e Iesu le agaga paia o se “fesoasoani.” Mo se faataʻitaʻiga, na ia taʻu atu i ona soʻo e faapea: “Ou te fai atu foi i le Tamā, ona foai mai ai lea e ia ia te outou le tasi Fesoasoani, ina ia tumau pea o ia ia te outou e faavavau; o le Agaga lea e tupu mai ai le upu moni, e le mafai e le lalolagi ona talia o ia, auā, ua le vaaia o ia, ua le iloa foi o ia, a o outou, ua outou iloa o ia; auā e tumau pea ia ia te outou, e i ai foi o ia i totonu ia te outou.” E lē gata i lea, o lena “Fesoasoani” o le a avea o se faiaʻoga, auā na folafola mai e Keriso: “O le Fesoasoani, o le Agaga Paia lea, e auina mai e le Tamā i loʻu igoa, o ia lava na te aʻoaʻo ia te outou i mea uma lava; e faamanatu mai foi o ia ia te outou i mea uma ua ou fai atu ai ia te outou.” E fai foi le agaga ma molimau ia Keriso, ma na ia faamautinoa atu i ona soʻo: “E aoga ia te outou pe a aʻu alu ese; auā afai ou te le alu ese, e le oo mai le Fesoasoani ia te outou; ae afai ou te alu, ou te auina mai o ia ia te outou.”—Ioane 14:16, 17, 26; 15:26; 16:7.a

10. I ā auala ua faamaonia ai le avea o le agaga paia o se fesoasoani?

¹⁰ Na liligi ifo e Iesu mai le lagi le agaga paia i luga o ona soʻo i le aso o le Penetekoso i le 33 T.A. (Galuega 1:4, 5; 2:1-11) Ona o se fesoasoani, na avatu ai e le agaga ia te i latou se malamalama faateleina i le finagalo o le Atua ma lana fuafuaga ma tatalaina atu ia te i latou lana Afioga faavaloaga. (1 Korinito 2:10-16; Kolose 1:9, 10; Eperu 9:8-10) O lena fesoasoani na faamalosia ai foi soʻo o Iesu ina ia molimau atu i le lalolagi uma lava. (Luka 24:49; Galuega 1:8; Efeso 3:5, 6) I aso nei, e mafai e le agaga paia ona fesoasoani i se Kerisiano tuuina atu ina ia tupu aʻe i le poto pe afai na te faaavanoaina ia lava mo sauniuniga faaleagaga na faia e le Atua e ala i “le auauna faamaoni ma le mafaufau.” (Mataio 24:45-47) E mafai e le agaga o le Atua ona saunia le lototele ma le malosi e manaomia, ina ia molimau atu ai o se tasi o auauna a Ieova. (Mataio 10:19, 20; Galuega 4:29-31) Ae peitai, e fesoasoani foi le agaga paia i tagata o le Atua i isi auala.

“Ma le Oi e Lē Mafai ona Talatalaina”

11. Afai e foliga mai ua lofituina i se tofotofoga, o le ā e ao i se Kerisiano ona fai?

¹¹ Afai ua faalavelavea se Kerisiano i se tofotofoga e foliga mai ua lofituina ai, o le ā e ao ona ia fai? Ia, tatalo mo le agaga paia, ma tuu atu ia te ia e galue! Na faapea mai Paulo: “E faapea foi le Agaga ona fesoasoani mai i lo tatou vaivai; auā tatou te le iloa mea tatou te ole atu ai ma le tusa, a e peitai o le Agaga, e fautua o ia mo i tatou i le oi e le mafai ona talatalaina. A o lē suesue i loto, ua silafia e ia le finagalo o le Agaga, auā o loo fautua o ia mo le au paia e tusa ma le finagalo o le Atua.”—Roma 8:26, 27.

12, 13. (a) E faapefea ona faatatauina le Roma 8:26, 27 i tatalo e ofoina atu ae maise lava i tulaga faigata? (e) O le ā na faia e Paulo ma ana aumea ina ua oo i latou i se tulaga matuā mafatia i le itumalo o Asia?

¹² O le au paia o ē o loo fautua atu ai le agaga o le Atua, o soʻo faauuina ia o Iesu, ua iai se faamoemoe faalelagi. Ae e tusa lava pe valaauina faalelagi po o se faamoemoe faalelalolagi, e mafai lava ona e maua le fesoasoani a le agaga paia i le avea ma Kerisiano. I nisi taimi e aumai ai e Ieova se tali tuusaʻo i se tatalo patino. Ae peitai, i nisi taimi, atonu ua e matuā mafatia lava, ua lē mafai ona e faaupu ou faalogona, ma atonu ua na ona mafai ona e ole atu ia Ieova ma le ōi e lē mafai ona faamatala atu. O le mea moni, atonu ua e lē iloa po o le ā e sili ona lelei mo oe, ma oo ai ina ole atu mo se mea sese seʻi vaganā ua e tatalo mo le agaga paia. Ua silafia e le Atua o loo e manao e faia lona finagalo, ma ua ia silafia lelei lava le mea moni o loo e manaomia. E lē gata i lea, e ala i lona agaga paia, na ia faapogaia ai le faamauina o le tele o tatalo i lana Afioga, ma o loo faatatau na tatalo i tulaga faigata. (2 Timoteo 3:16, 17; 2 Peteru 1:21) I lea, e mafai ona silasila Ieova i nisi o manatu o loo i na tatalo faagaeeina, o ni faaupuga e te manao e fai atu ia te ia i le avea o oe o se tasi o ana auauna, ma e mafai ona ia talia na tatalo mo oe.

¹³ Atonu sa lē iloa e Paulo ma ana aumea po o le ā e tatalo atu ai ina ua oo i puapuaga i le itumalo o Asia. Ina ua feagai ma ‘mafatiaga e sili atu na i lo o lo latou malosi, na oo ia i latou le manatu faapea o le a oti i latou.’ Ae na latou saili atu mo faatoga a isi ma faalagolago i le Atua, o lē e mafai ona toe faatutū i ē ua oti, ma na ia laveaiina i latou. (2 Korinito 1:8-11) Maeu se faamafanafanaga i le iloa faapea e faafofoga ma gaoioi Ieova le Atua e tusa ma tatalo a ana auauna faamaoni!

14. O le ā se lelei e mafai ona iʻu i ai pe a faataga e Ieova tofotofoga e faaauau mo sina taimi?

¹⁴ E masani lava ona faalavelavea tagata o le Atua i tofotofoga i le avea o se faalapotopotoga. E pei ona mātauina muamua, na sauāina i latou i le taimi o le Taua Muamua a le Lalolagi. E ui lava sa leʻi iai so latou malamalamaga manino i lena taimi i lo latou tulaga, ma latou te lē iloa foi po o le ā tonu se mea e ao ona tatalo atu ai, ae sa iai i le Afioga a Ieova tatalo faavaloaga na ia tali mai ai ia i latou. (Salamo 69, 102, 126; Isaia, mataupu e 12) Ae faapefea pe a faatagaina e Ieova se tofotofoga e faaauau pea mo sina taimi? E mafai ona iʻu lenei mea i le avatua ai o se molimau, atonu e uunaia ai nisi e talia le upu moni, ma maua ai e Kerisiano se avanoa e faaalia ai lo latou alofa faaleuso e ala i le tatalo mo i latou, a lē o lena foi, ia po o le fesoasoani atu i uso talitonu o puapuagatia. (Ioane 13:34, 35; 2 Korinito 1:11) Ia manatua, o loo taʻitaʻia e Ieova ona tagata e ala i lona agaga paia, o loo faia le mea sili ona lelei mo i latou, ma o loo faataunuuina pea foi mea i se auala e faamamaluina ma faapaiaina ai lona suafa paia.—Esoto 9:16; Mataio 6:9.

Aua Lava Neʻi Faatiga i le Agaga Paia

15. O le ā le mea e mafai ona faalagolago i ai Kerisiano ina ia faia e le agaga o Ieova mo i latou?

¹⁵ Afai o oe o se auauna a Ieova, o lea la, ia tatalo mo le agaga paia i le taimi o tofotofoga ma i isi foi taimi. Ona faamautinoa lea ua e mulimuli i lana taʻitaʻiga, auā na tusi mai Paulo: “Aua foi tou te faatiga i le Agaga Paia o le Atua, ua faamaufaailogaina ai outou ia te ia seia oo i le aso e faaolaina ai [“e ala i le togiola,” NW].” (Efeso 4:30) Sa avea ma o loo avea foi le agaga o le Atua ma faamaufaailoga, po o se ‘faamaoniga o le mea o loo sau,’ mo Kerisiano faamaoni faauuina—o le ola faalelagi lea e lē mafai ona toe oti. (2 Korinito 1:22; Roma 8:15; 1 Korinito 15:50-57; Faaaliga 2:10) E mafai e i latou uma o Kerisiano faauuina ma i latou o iai le faamoemoe faalelalolagi ona faalagolago i le agaga o Ieova ina ia faia le tele o mea mo i latou. E mafai ona ia taʻitaʻiina i latou i se olaga faamaoni ma fesoasoani ia i latou e aloese mai galuega agasala na e oo ina lē fiafia ai le Atua, e leiloa ai lona agaga paia, ma e lē taulau ai ona maua le ola e faavavau.—Kalatia 5:19-21.

16, 17. E faapefea ona faatiga se Kerisiano i le agaga?

¹⁶ E ono faatiga faapefea se Kerisiano i le agaga, pe iloa po o le lē iloa foi? Ia, o loo faaaogā e Ieova lona agaga e siitia ai le autasi ma tofia ai tane agavaa i le faapotopotoga. O lea la, afai e muimui se sui o le faapotopotoga i toeaina ua tofia, ma faasalalau atu tala taufaaleaga, ma isi mea faapena, ua lē mulimuli la o ia i taʻitaʻiga a le agaga o le Atua ina ia maua le autasi ma le filemu. O lona uiga moni la, o le a ia faatiga ai i le agaga.—1 Korinito 1:10; 3:1-4, 16, 17; 1 Tesalonia 5:12, 13; Iuta 16.

¹⁷ Ina ua tusi atu i Kerisiano i Efeso, na lapatai atu ai Paulo faasaga i tuʻinanau e faasese ai, le ita umi, le gaoi, upu faaulaula, le matuā tuʻinanau i le faitaaga, amioga e masiasi ai, ma le tausua i tala leaga. Afai e faatagaina e se Kerisiano ia lava e tafetafea mālie ese atu i le faia o ia mea, ua ia tetee ai la i le fautuaga a le Tusi Paia na faagaeeina e le agaga. (Efeso 4:17-29; 5:1-5) Ioe, o lona uiga, ua ia faatiga ai i le agaga o le Atua.

18. O le ā e mafai ona tupu i so o se Kerisiano o lē e amata ona ia faaleamanaia le fautuaga a le Afioga a le Atua na faagaeeina e lona agaga?

¹⁸ O le mea moni, so o se Kerisiano lava e amata ona faaleamanaiaina le fautuaga a le Afioga na faagaeeina e le agaga o Ieova, atonu o le a amata ona ia atiina aʻe uiga po o auala e ono iʻu ai ina lē toe finagalo malie le Atua ia te ia. E ui lava atonu na te lē o faia se agasala i lena taimi, ae e mafai lava ona ia agaʻi atu i lena itu. O se Kerisiano faapena e tetee i le taʻitaʻiga a le agaga, o loo faatigā foi i le agaga. I lea foi, ua ia teena ai ma faatigā ia Ieova, le Puna o le agaga paia. E lē taitai mafai e sē e alofa i le Atua ona manao e faia lena mea!

Ia Tatalo e Lē Aunoa mo le Agaga Paia

19. Aiseā e manaomia faapitoa ai e tagata o Ieova lona agaga i aso nei?

¹⁹ Afai o oe o se auauna a Ieova, ia faaauau pea ona tatalo mo lona agaga paia. Ae maise lava i nei “aso e gata ai,” ma ona taimi ua sili ona faigata ona faafetaiaia, ua matuā manaomia ai e Kerisiano le fesoasoani a le agaga o le Atua. (2 Timoteo 3:1-5) Ona ua lafo ifo le Tiapolo ma ana temoni mai le lagi, ma ua iai nei i le nofoaga maulalo i le lalolagi, ua latou sii taua atu ai i le faalapotopotoga a Ieova. I lea, ua sili atu ai foi la i le taimi nei i lo o se isi lava taimi ona manaomia e tagata o le Atua lona agaga paia e taʻitaʻiina ai i latou, pe faatonutonuina i latou ma mafai ai ona latou tumau i mea faigata ma sauāga.—Faaaliga 12:7-12.

20, 21. Aiseā tatou te mulimuli atu ai i le taʻitaʻiga a le Afioga a Ieova, lona agaga, ma lana faalapotopotoga?

²⁰ Ia faaalia pea le talisapaia o le fesoasoani ua saunia e Ieova le Atua e ala i lona agaga paia. Ia mulimuli i le faasinoga a lana Afioga ua faagaeeina e lona agaga, le Tusi Paia. Ia felagolagomai atoatoa ma le faalapotopotoga faalelalolagi o loo taʻitaʻiina e le agaga o le Atua. Aua neʻi e faatagaina oe lava e see ese atu i se auala e lē faale-Tusi Paia e iʻu ai i lou faatigā i le agaga paia, ona atonu e iʻu atu ai i le aveesea o le agaga ma oo ai i se mala faaleagaga.—Salamo 51:11.

²¹ O le taʻitaʻiina e le agaga o Ieova ua na o lea le auala e faafiafiaina ai o ia, ma maua ai se olaga filemu ma olioli. Ia manatua foi na taʻua e Iesu le agaga paia o se “fesoasoani” po o se “faamafanafana.” (Ioane 14:16, NW, faamatalaga i lalo) E ala i le agaga paia, ua faamafanafana ai e le Atua Kerisiano ma faamalosia i latou i le feagai ai ma o latou tofotofoga. (2 Korinito 1:3, 4) E faamalosia e le agaga tagata o Ieova ina ia talaʻi le tala lelei, ma fesoasoani foi ia i latou ina ia manatua manatu faale-Tusi Paia e avatu ai se molimau lelei. (Luka 12:11, 12; Ioane 14:25, 26; Galuega 1:4-8; 5:32) E ala i le tatalo ma le taʻitaʻiga a le agaga, ua mafai ai e Kerisiano ona faafetaiaia tofotofoga o le faatuatua faatasi ma le atamai faalelagi. O le mea lea, i so o se vala lava o le olaga, latou te tatalo ai pea mo le agaga paia o le Atua. O le iʻuga, ua taʻitaʻiina pea e le agaga o Ieova ona tagata.

[Faaopoopoga i lalo]

O ā Au Tali?

◻ Aiseā e tatalo ai mo le agaga paia o Ieova?

◻ Ua avea faapefea le agaga paia o se fesoasoani?

◻ O le ā le uiga o le faatiga i le agaga, ma e faapefea ona tatou alofia le faia faapea?

◻ Aiseā tatou te tatalo ai e lē aunoa mo le agaga paia ma mulimuli ai pea i lana taʻitaʻiga?

[Ata i le itulau 34]

E pei ona avatua e se tamā alofa o mea lelei ma lona atalii, e faapena foi la ona avatu e Ieova lona agaga paia i ana auauna o ē e tatalo atu i ai

[Ata i le itulau 36]

E te iloa le auala e fautua atu ai le agaga o le Atua mo Kerisiano e tatalo?