LESONA 49
E Faapefea Ona Maua e Lou Aiga le Fiafia?—Vaega 1
E naunau se ulugalii faatoʻā faaipoipo, ina ia tumau le fiafia lea e la te maua i le aso o le la faaipoipoga. E mafai ona tumau lenā fiafia. Ua talitonu ulugalii Kerisiano ua tele tausaga talu ona faaipoipo, ma galulue mamafa e faatatau fautuaga mai le Tusi Paia i le moni o lenā manatu.
1. O le ā le fautuaga mai le Tusi Paia mo tane?
Ua tuuina atu e Ieova i tane le tiute tauave o le avea ma ulu o le aiga. (Faitau le Efeso 5:23.) E faatalitalia o ia e Ieova e faia filifiliga mo le lelei o le aiga. O loo taʻua i le Tusi Paia le fautuaga lenei mo tane: “Ia faaauau ona alolofa atu i a outou avā.” (Efeso 5:25) O le ā le uiga o lenā manatu? O se tane alofa e feutagaʻi ma lana avā i se auala agalelei pe a iai i le fale, ma pe a faatasitasi foʻi ma isi. E na te puipuia lana avā mai lamatiaga, ma faia le mea sili e tausia ai o ia i le itu faaletino ma le itu tau faalogona. (1 Timoteo 5:8) Ae o le mea e sili ona tāua, e tausolomua o ia i le tausia o manaʻoga faaleagaga o le avā. (Mataio 4:4) O se faaaʻoaʻoga, e la te tatalo ma faitau faatasi le Tusi Paia ma lana avā. Pe a tausia ma le alofa e se tane lana avā, o le a faatumauina ai lana faiā lelei ma Ieova.—Faitau le 1 Peteru 3:7.
2. O le ā le fautuaga mai le Tusi Paia mo avā?
O loo taʻua i le Afioga a le Atua, e tatau i se avā ona ʻmatuā faaaloalo i lana tane.’ (Efeso 5:33) E faapefea ona ia faia faapea? E ala i le mafaufau i uiga lelei ma taumafaiga a lana tane o loo fai, e tausia ai o ia ma le la fanau. E na te faaalia foʻi le faaaloalo e ala i le lagolagosua i faaiʻuga e faia e lana tane, ma talanoa atu ma le agalelei iā te ia pe faia ni tala lelei e faatatau iā te ia, e tusa pe e lē tapuaʻi iā Ieova.
3. E faapefea ona faamalosia e se ulugalii le la faaipoipoga?
Ua faapea mai le Tusi Paia e faatatau i ulugalii faaipoipo: “Ona avea ai lea o i laʻua ma tino e tasi.” (Mataio 19:5) O lona uiga, e tatau ona la teena so o se mea e ono mou atu ai le alofa o le tasi i le isi. E la te faia faapea e ala i le faaalu o le tele o le taimi e faifaimea faatasi ai, ma faailoa atu o la manatu ma faalogona i se auala alofa ma faamaoni. E lē faatagaina e le tane po o le avā se isi lava mea e ese mai iā Ieova, ia sili atu nai lo o lana paaga. E matuā faaeteete foʻi i le soona māfana atu i se isi e ese mai i le paaga faaipoipo.
SAʻILIʻILI ATILI
Iloilo po o ā mataupu silisili o le Tusi Paia e mafai ona faamalosia ai lau faaipoipoga.
4. Tane, ia e alofa ma tausia lelei lau avā
Ua faapea mai le Tusi Paia e “tatau i tane ona alolofa atu i a latou avā e pei o o latou lava tino.” (Efeso 5:28, 29) O le ā le uiga o lenā manatu? Faaali le VITIŌ, ona talanoa lea i le fesili o loo mulimuli mai.
O ā ni auala e faaalia ai e le tane lona alofa i lana avā, ma tausia lelei o ia?
Faitau le Kolose 3:12, ona talanoa lea i le fesili lenei:
E faapefea ona faaalia e se tane nei uiga i lana faaipoipoga?
5. Avā, ia e alofa ma faaaloalo i lau tane
Ua faalaeiauina e le Tusi Paia le avā ina ia faaaloalo i lana tane, e tusa pe e auauna iā Ieova pe leai. Faitau le 1 Peteru 3:1, 2, ona talanoa lea i fesili nei:
Pe afai e lē talitonu lau tane, e mautinoa e te manaʻo ia tapuaʻi o ia iā Ieova. O le ā le auala sili e te fesoasoani ai iā te ia? Pe e tatau ona e talaʻi atu iā te ia i taimi uma, pe e sili atu le faaalia o uiga lelei ma faaaloalo? Aiseā?
E mafai e tane ma avā ona faia faatasi ni filifiliga lelei. Peitaʻi, e iai taimi e ono lē ioe ai le avā i manatu o le tane. E mafai ona ia faailoa atu i lana tane ona manatu i lenā taimi, i se auala toʻafilemu ma faaaloalo. Ae e tatau ona ia manatua, na tuu atu e Ieova i le tane le tiute tauave, o le faia o filifiliga mo le lelei o le aiga. E ao ona ia faia le mea sili e lagolagoina ai le faaiʻuga a lana tane. O le faia faapea, o le a ia fesoasoani ai i le mauaina o se siʻomaga fiafia i le aiga. Faitau le 1 Peteru 3:3-5, ona talanoa lea i le fesili lenei:
O ā faalogona o Ieova pe a faaalia e se avā le faaaloalo i lana tane?
6. E mafai ona oulua foʻia faafitauli i la oulua faaipoipoga
E leai se faaipoipoga e lelei atoatoa. O lea, e tatau i le ulugalii ona galulue faatasi e foʻia faafitauli. Faaali le VITIŌ, ona talanoa lea i fesili o loo mulimuli mai.
I le vitiō, o ā faailoga na iloa ai ua lē toe māfana le mafutaga a le ulugalii?
O le ā na la faia ina ia toe faamalosia ai la laʻua faaipoipoga?
Faitau le 1 Korinito 10:24 ma le Kolose 3:13. Ia faitau mau taʻitasi ma talanoa i le fesili lenei:
E faapefea i le faatatauina o lenei fautuaga ona faamalosia ai se faaipoipoga?
Ua faapea mai le Tusi Paia, e tatau ona faaaloalo le tasi i le isi. O le faaalia o le faaaloalo, e aofia ai le feutagaʻi ma le isi tagata i se auala agalelei. Faitau le Roma 12:10, ona talanoa lea i fesili nei:
Pe e tatau i le tane po o le avā ona faatali seʻi faaalia muamua mai e le isi o i laʻua le faaaloalo? Aiseā?
UA FAAPEA MAI NISI: “Ua lē toe māfana le ma mafutaga e pei o le taimi muamua.”
E faapefea ona e faamatala atu le auala e fesoasoani ai le Tusi Paia iā i laʻua?
AOTELEGA
E maua e le tane ma le avā le fiafia pe a alofa ma faaaloalo le tasi i le isi, ma faatatauina mataupu silisili o le Tusi Paia.
Fesili Autalu
E faapefea ona saosaolaumea le tane i le mauaina o se faaipoipoga fiafia?
E faapefea ona saosaolaumea le avā i le mauaina o se faaipoipoga fiafia?
Pe afai ua e faaipoipo, o le ā se mataupu silisili o le Tusi Paia e fesoasoani e faamalosia ai lau faaipoipoga?
MANATU FAAOPOOPO
Mātau fautuaga aogā e fesoasoani iā te oe ina ia maua ai se aiga fiafia.
Maimoa i se vitiō o musika o loo faailoa mai ai faamanuiaga o le faatatauina o fautuaga a le Atua i lau faaipoipoga.
Iloilo po o le ā e uiga i ai le gauaʻi i le tulaga ulu o le tane.
“Avā e, Aiseā e Gauaʻi ai i le Tulaga Ulu?” (Le Olomatamata, Me 15, 2010)
Na faapefea ona fo‘ia e se ulugalii ni faafitauli ogaoga, e aofia ai ma le tatalaina o le la faaipoipoga?
Na Toe Lelei le Ma Faaipoipoga Ona o le Fesoasoani a le Atua (5:14)