Le Aso a le Atua mo le Tauimasui

E PEI ona sa tatou iloa i le mataupu na seʻi mavae atu, o loo iai ni nai mafuaaga e sese ai mo i tatou ona fia tauimasui. E sese ona i le iʻuga, e lē foia ai se mea. E sese ona e mauʻaa ai le feitagai na i lo le atiina aʻe ai o ni faiā faauō. Ma e sese, ona o se mea e faaleagaina totino ai lē o teulotoina ni mafaufauga fia tauimasui.

Ae peitai o le mafuaaga aupito sili ona tāua e sese ai le fia tauimasui o le tagata, o loo vaaia i upu a Mose ia Isaraelu: “O Ieova lou Atua, o le Atua alofa [mutimutivale] ia.” (Teuteronome 4:31) Ona o le Atua e alofa mutimutivale, e ao ai la ona tatou alolofa mutimutivale e pei o ia. Na taʻu atu e Iesu i ona soʻo: “Ia mutimuti vale [pea] lo outou alofa, pei ona alofa mutimuti vale o lo outou Tamā.”—Luka 6:36.

Ae peitai, ua faamatala foi e le Tusi Paia Ieova o le “Atua o le taui ma sui.” (Salamo 94:1) O loo tautala le perofeta o Isaia e uiga i le “tausaga e talileleia mai ai e Ieova” faapea foi ma le “aso e taui ai ma sui e lo tatou Atua.” (Isaia 61:2) E mafai faapefea ona avea le Atua o le Atua o le alofa mutimutivale toe tauimasui? Ma afai tatou te mananao e faataʻitaʻi i le alofa mutimutivale o le Atua, aiseā la tatou te lē faataʻitaʻi ai ia te ia i le faia o le tauimasui?

Ina ia tali le fesili muamua, e alofa mutimutivale le Atua ona o lona alofa i le fanau a tagata, ma i lea ua ia faamagalo ai i se tulaga sili na te mafaia, auā o lona faia faapea ua mafai ai ona tuuina atu i le fanau a tagata le avanoa e faaleleia ai a latou amioga leaga. E toatele tagata e pei o le aposetolo o Paulo ua latou faaaogā lelei lenei alofa mutimutivale. Ae o le Atua foi e tauimasui—i le uiga faapea na te tuuina atu le faamasinoga tonu—auā o lena alofa mutimutivale e mafai ona faaauau mo na o sina taimi faatapulaaina. Afai e faaalia e nisi faapea o le a lē mafai lava ona suia o latou ala, ona faaooina atu loa lea e le Atua o le faamasinoga i le taimi ua taʻua o lana aso o le tauimasui.

O le tali i le fesili lona lua, e leai, e lē taʻutonuina i tatou i le tuuina atu o le tauimasui, auā o le Atua e ana le tauimasui. O Ieova e lelei atoatoa i le tuuina atu o le faamasinoga tonu. O tagata e leai. E silasila le Atua i itu uma o se mataupu ma na te faia pea lava se faaiʻuga amiotonu. E lē mafai ona faatuatuaina i tatou e faia lena mea. O le mea lena na fautua mai ai Paulo: “Le au pele e, aua le taui atu ma sui, a ia outou tuu atu i le toasa; auā ua tusia, Ua faapea mai [Ieova], O ia te au le taui ma sui, ou te taui atu.” (Roma 12:19) Mo lo tatou lava lelei, e tatau ona tatou tuu atu le tauimasui i aao o Ieova.

Aiseā ua Iai ai se Aso o le Tauimasui?

Ae peitai, ua iloa e le Tusi Paia le tele o vaipanoa e manaomia ai le tala atu o se tala mai tagata fai mea sese e lē salamō. Mo se faaaʻoaʻoga, na valoia e le aposetolo o Paulo faapea o le Atua, e ala ia Iesu, “na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu Keriso.” (2 Tesalonia 1:8) Ua ia i tatou ni mafuaaga lelei e uaʻi totoʻa atu ai i na upu. Aiseā?

Mo le tasi o mea, ona o le toatele i aso nei o loo tausisi pea e tetee atu i le pule silisiliese a Lē na Foafoaina Mea, ua latou lē amanaia foi ana tulafono amiotonu. E tusa lava pe latou te fai mai e talitonu i le Atua pe leai, ae ua faaalia manino i a latou amio e lē o ia i latou se lagona faapea o loo nofo aitalafu i le Atua. Ua faatatauina upu a le faisalamo i na mea uma: “Se a le mea ua ʻinoʻino ai i le Atua le ua amio leaga? Ua fai ifo i lona loto, E te le suesuea.” (Salamo 10:13) E mautinoa lava, o le a lē faatagaina e faavavau e Ieova ona tauemua o ia lava i lenei auala. E ui lava o ia o le Atua o le alofa, ae o ia foi o le Atua o le faamasinotonu. E faafofoga o ia i alaga a i latou o ē manatu mamafa moni i le faamasinoga tonu: “Ieova e, ia e tulai mai; le Atua e, ina sii ia lou aao; aua neʻi galo ia te oe e ua puapuagaina.”—Salamo 10:12.

E lē gata i lea, o tagata solitulafono ua latou faaleagaina le lalolagi lava lenei o loo tatou ola ai. Ua latou faanamuleagaina le ea, le laueleele, ma le vai; ua latou faatumuina le lalolagi i le faamasinoga lē tonu ma le sauā. Ma ua latou faaputuina faupuega o vailaau oona, auupega faaniukelea, ma isi auupega e oti ai ua faamataʻuina ai le faasaoina o le fanau a tagata. Ua tatau ai le faalaa tauatua ina ia mafai ai ona faamautinoa se lumanai saogalemu mo le fanau a tagata usiusitai. (Faaaliga 11:18) O le faalaa lenei na faasino atu i ai Isaia faapea o le aso o le tauimasui.

O le ā o le a Faataunuuina e le Aso o le Tauimasui a le Atua?

E tusa ai ma le Vine’s Expository Dictionary of Old and New Testament Words i le Tusi Paia Eleni, o le upu mo le tauimasui, pe a faaaogā e faatatau i le Atua, o lona uiga moni lava “‘faapea e faia ona o le faamasinoga tonu,’ ae lē pei ona masani ai i tauimasui faaletagata, e faia ona o le lagona fia faaoolima po o le na o le iai o se lagona ita ona o se mea lē tonu.” I lea, o le tauimasui a le Atua faasaga i ona fili o le a lē o se taimi o le lē pulea o le toto masaa, e pei o se tauimasui totino. “Ua silafia e [Ieova] se mea e laveai mai ai [tagata o le tuutoina faaleatua] ai le faaosoosoga, a e taofi i e amio leaga e oo i le aso faamasino ina ia faasalaina i latou,” ua taʻu mai ai e le Tusi Paia ia i tatou.—2 Peteru 2:9.

E tulimatai atu e auauna a le Atua le aso o le tauimasui a le Atua faapea o le taimi lea o le a manumalo ai le amiotonu ma laveaiina ai ē amiotonu mai sauaga a lē o leaga. E lē o le uiga o lenei mea faapea o i latou, e faia le tauimasui pe taui atu. “O le ua fiafia i le mala (e oo i se tasi) e le faasaoina o ia,” ua lapatai mai ai le Tusi Paia. (Faataoto 17:5) I le isi itu, latou te atiina aʻe le alofa mutimutivale ma le tiga alofa, ma tuuina atu so o se filifiliga e uiga i le tauimasui i le Atua.

E moni, e lē faigofie mo tagata feita ona gaoioi i lenei auala. Ae mafai ona fai, ma e toatele ua faia faapea. Mo se faaaʻoaʻoga, o Pedro, sa lē fiafia lona olaga i le taimi a o tamaitiiti, ma sa masani lava ona fasi o ia e lona uso matua. O lea, na ia tupu aʻe ai e avea ma tagata sauā, e masani lava ona tutupu ni faalavelave ia te ia sa logoina ai leoleo, ma ua sauā ai i lana avā ma le fanau ona o le ita sa ia lagona agaʻi i lona uso. I le iʻuga, sa ia faalogo ai i se tasi o Molimau a Ieova ma mulimuli ane amata ona suesue le Tusi Paia. “Faatasi ma le fesoasoani a Ieova,” ua ia faamatala mai ai, “ua suia ai aʻu, ma nei la, na i lo le tauaʻifusu ma tagata, ua ou fesoasoani ia i latou i le avea o se toeaina Kerisiano.” Ona o le fesoasoani a le Tusi Paia ma le agaga paia, ua faapena ai foi ona suia le lē mafaitaulia o isi mai le fia tauimasui i le faaalia o le alofa ma le onosai agaʻi i isi.

O le ā o le a E Faia?

O le manatua o le oo mai o le aso o le tauimasui a le Atua, o le a fesoasoani ia i tatou e faaaogā tatau le onosai o Ieova. Ae e lē o faatapulaaina le avanoa e faia ai faapea. Ua lē pine ae oo mai lena aso. Na faaalia e le aposetolo o Peteru le mafuaaga ua leʻi oo mai ai: “E le faatuai mai [Ieova] i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia i tatou, ona ua le finagalo ia fano se tasi, a ia oo uma lava i le salamo.”—2 Peteru 3:9.

Ua faanatinati nei la ona sauniuni mo le aso o le Atua e tala atu ai le tala e ala i le suesueina o Tusitusiga Paia ma faatatauina a latou fautuaga. O le a fesoasoani lenei mea ia i tatou e mulimuli i upu a le faisalamo: “Ina soia e te ita, ma ia tuu lou tiga; aua e te faameo, neʻi e faia se mea leaga. Auā e faaumatia o e fai amio leaga; a o e faatalitali ia Ieova, o i latou lava ia e fai mo latou le nuu [laueleele].”—Salamo 37:8, 9.

[Ata i le itulau 7]

Pe a mavae le aso o le tauimasui a le Atua, ‘o i latou e faamoemoe ia Ieova o le a mau i le lalolagi’