Ia Matuā Inoino i Ala Taʻuvalea o le Lalolagi
“O le mea lea latou te ofo ai ma faaauau ona faifai ai ia te outou, auā tou te lē faaauau ona taufetuli ma i latou i lea auala paʻū maulalo o le ulavale.”—1 PETERU 4:4, NW.
1. Ua faapefea ona faamatala e le Tusi Paia auala muamua faalelalolagi na sa taufetuli ai le toatele o Kerisiano o le uluai senituri?
SE “AUALA paʻū maulalo o le ulavale.” O le faamatalaga lena a Peteru e uiga i le tulaga taʻuvalea na i ai le toatele o tagata o le uluai senituri a o leʻi avea i latou ma Kerisiano. Ua faaupuina e isi faaliliuga lenei mea faapea o se “vaivai palapalā o amioga e masiasi ai” (The New American Bible); o le “lua o otaota o amioga leaga” (The New Testament, a Kleist ma Lilly). O le ā sa i ai i lenei auala paʻū maulalo o le ulavale? Ua taʻua patino lava e le aposetolo o amioga faamatāitu le tuʻinanau, le inu tele i uaina, o poula, inugā ava, ma le ifo i tupua e soli ai le tulafono.—1 Peteru 4:3, 4.
2. Ai se ā e faamalo ai i Kerisiano i aso nei?
2 Maeu le eseesega o i ai i le va o lenei lalolagi ma le faapotopotoga Kerisiano moni! Sa faamalo atu ma le mafana Peteru i Kerisiano o ē na ia tusi atu i ai ona ua latou lē toe taufetuli ma a latou uluai aumea faalelalolagi i lenei vaivai palapalā, i lenei lua o otaota ma amioga leaga. E faafiafiaina tele ai foi i tatou e avatu se faamalo faapena i Kerisiano i aso nei, a o faagasolo atu ina sili ona leaga tulaga o mea na i lo o le uluai senituri. O loo tuuina atu e Molimau a Ieova ni taumafaiga filiga ina ia faatinoina le tapuaiga mamā ma le lē faaleagaina ua faamaonia e lo tatou Atua ma le Tamā, lea o loo aofia ai le ‘tausia o se tasi ia lē pisia mai le lalolagi.’ (Iakopo 1:27) O le maualuga o lo latou tulaga tau amio ua matuā faamamaluina ai le suafa o Ieova.
3. O le ā se mafuaaga o le faanoanoa o Paulo, lea ua faapena foi ia i tatou i aso nei?
3 A e peitai, ina ia tausia le maualuga o lo latou tulaga i le avea o se faalapotopotoga mamā, e i ai nisi taimi e aʻoaʻia ai tagata o le Atua pe oo lava ina faateaeseina se toaitiiti o ē latou te faatagaina i latou e faaseseina i le faia o amioga ulavale a lenei lalolagi. O se mea lea e faanoanoa ai, ma tatou te lagona ai e pei ona sa lagona e le aposetolo o Paulo ina ua ia vaai i se tulaga tutusa faapena i le uluai senituri. Na ia tusi: “Auā e toatele na ou fai atu soo ai ia te outou, a e ua ou toe fai atu nei foi ma le tagi ia i latou o loo savavali e fai mo latou fili le satauro o Keriso, ma o le faaumatiaga o lo latou iuga lea, o lo latou atua o o latou manava ia, ma o lo latou viiga, o le mea lea latou te masiasi ai, ua tuu atu o latou mafaufau i mea o i le lalolagi.” (Filipi 3:18, 19, NW) E mafai faapefea e i tatou taitoatasi, ona aloese mai le tupu o se mea faapea ia i tatou? E ala i lo tatou aʻoaʻoina ia faaaʻoaʻo ia Iesu i le alofa i tulaga maualuluga amiotonu a Ieova ma inoino i le lē mamā a lenei lalolagi.—Eperu 1:9.
Aua le Tepa i Tua
4. (a) Ai se ā e ono mafai ai ona maileia i tatou e liliu atu i faiga taʻuvalea a lenei lalolagi? (e) O le ā o le a fesoasoani ia i tatou e alofia le faatupu aʻe o ni faanaunauga sese?
4 Aua lava neʻi faatalale i le malosi o le agasala. E tele ma e malolosi faatosinaga a lenei lalolagi; e faitogafiti faalilolilo ma e feai tele le Tiapolo; e faaʻoleʻole le loto o le tagata. (1 Ioane 2:15-17; 1 Peteru 5:8; Ieremia 17:9) Pe a taotasi le faanaunauga o le loto i se mea ua manao i ai, e masani lava ona lē faalogo ai i aʻoaʻiga. O le mafuaaga lena ua tele ai faamanatuga tatou te maua mai le Afioga a le Atua e fesoasoani ia i tatou e tausia le tuutoina atu o o tatou loto ia Ieova ma i le faia o lona finagalo. E tāua tele lava le aua le tuuina faanaunauga sese e oo ina amata ona tupu aʻe i totonu o le loto. (Iakopo 1:14, 15; Mataio 5:27-30) E tatau ona tausia le faamalosia o o tatou loto i mafuaaga tatou te alolofa ai i le mea ua tonu ma matuā inoino ma tetee i auala eleelea o lenei lalolagi. Ua aotele mai e le aposetolo o Paulo i upu nei: “Aua neʻi faatagā alofa; ia ʻinoʻino i le leaga, ia pipii i le lelei.”—Roma 12:9.
5. Ai se ā ua poto ai le iloiloina ma le faaeteete uunaʻiga o ō tatou loto ma o tatou faanaunauga?
5 I le vaai atu i le matautia o le liliuese mai le ala faa-Kerisiano, o se mea poto mo i tatou taitoatasi ona faaauau pea ona iloiloina uunaʻiga o o tatou loto, o tatou faanaunauga, ma o tatou sini. O pei oe o na Kerisiano o ē na faamalo atu i ai Peteru ona o le lē toe foi i lenei lava “auala paʻū maulalo o le ulavale”? Pe o nisi taimi e te faaalia ai le uiga a le avā a Lota, o lē na tepa i tua ma manao i mea ua uma ona faasaoinaese mai ai o ia?—Kenese 19:26; Luka 17:31-33.
Tele le Amio Leaga i “Ona Aso e Gata ai”
6, 7. (a) O le ā le uiga agaʻi i fiafiaga ua fai mai le Tusi Paia o le a faailogaina ai “aso e gata ai”? (e) Ua faapefea ona faaalialia e tagata o le lalolagi o latou mafaufauga ma gaoioiga lē mamā?
6 Seʻi mafaufau lava mo sina minute e uiga i le lalolagi lea o loo tatou i ai i le faaiʻuga o lenei 20 senituri. Pagā se anoanoai o le amio leaga! E pei ona valoia e le aposetolo o Paulo, ua avea tane ma fafine ma “e ua tele le manao i mea faafiafia a e leai se manao i le Atua.” Ioe, o ‘tagata amio leaga ma le tau faaʻoleʻole ua agaʻi atu ina sili ona leaga, ua taufaasese ma ua faaseseina foi i latou.’—2 Timoteo 3:1, 4, 13.
7 O le mulilua, faitaaga, tauatane, tauafafine, ma le faapaʻū tama—o nei faaupuga ma isi upu ua avea o faaupuga i aso fai soo i le aiga. O na mea ua tautala i ai ma le saoloto ma ua faamaonia ina ia tautalagia i leitio ma televise ma i totonu o lotu ma tulaga tau i aʻoaʻoga. Ua avea tusi ata e faagaee ai faiga tau i feusuaiga ma pisinisi aupito tele ma ua sauni e tuu atu i tagata uma. O nisi o ata tifaga sili ona lauiloa, tala faakoneseti, ma ata faasolo i le tele o faiga lē mamā faaleituaiga i televise (soap operas) e aafia ai tala e fesootai ma nisi ituaiga o amioga lē mamā. Maeu lo tatou loto faafetai i le leai o sa tatou vaega i lenei mea! Ma maeu le manaomia ona tatou tau malosi ina ia mautinoa ai ua lē aafia o tatou loto i na faaupuga taufaaʻoleʻole!
8. O le ā o fai mai ai le Tusi Paia e tatau ona tatou faia ma mea e lē tatau foi ona faia e tusa ai ma faiga lē mamā a lenei lalolagi?
8 O Kerisiano popoto, latou te utagia le lapataiga a Paulo: “A o le faitaaga, ma mea leaga uma, ma le [matapeapea], aua neʻi taʻua lava ia te outou, e pei ona tatau i e ua paia. . . . Ia suesue outou pe se a se mea e fiafia i ai le Alii. . . . O lenei, ia faaeteete outou ina ia outou savavali ma le faautauta, aua neʻi faapei o e valelea, a ia faapei o e popoto.” Na i lo o lena, na faapea mai Paulo, e tatau ona tatou manatunatu i mea uma e moni, e tonu, e mamā, e taʻuleleia, ma matagofie.—Efeso 5:3-16; Filipi 4:8.
9. O le ā e faigofie ona tupu pe a tatou filifilia faafiafiaga e lagā ai ni fesili?
9 Pe e te utagia ma le faaeteete lenei fautuaga poto pe a filifilia faafiafiaga? Ia manatua, o le tele o lo tatou faalogologo i mea taʻuvalea, o le tele foi lena o le foliga mai o faiga o olaga o le lalolagi o se mea lelei, e leai sona leaga naʻuā. Atonu e oo ai lava ina amata ona tatou faalilolilo ona tatou viiviia pe faaaʻoaʻo i tagata lauiloa i taaloga po o faafiafiaga, o ē o loo latou faia mea faapena. Ia mataala i so o se faanaunauga faapena.
Aua Neʻi Maileia i Manatu o Lenei Lalolagi
10. O le ā le filosofia i le olaga ua faia e tagata Epicureans o le uluai senituri?
10 I aso o Paulo, e toatele tagata sa latou ioe i aʻoaʻoga faafilosofia a le ituaiga o Epikuro, o ē sa ola i na o faafiafiaga lava, ma le faamalieina o lagona. A e a oti, ona latou fai mai lea, ua uma mea uma e tusa ai ma lou manatu. O lea, ai se ā e lē matuā fuli ai e faafiafia oe i fiafiaga uma o le olaga e mafai ona e maua a o e ola, auā o a taeao atonu o le a e oti ai.
11. Ua faapefea ona faataʻitaʻi le toatele o tagata o le lalolagi i aso nei i manatu ma gaoioiga a Epicureans?
11 E toatele tagata i aso nei o loo i ai lea lava uiga e tasi. Latou te matuā tuuina atu i latou e aunoa ma le masiasi i uiga soonafai i so o se ituaiga o faafiafiaga, a e itiiti lava sina manatu i le pe o faapefea ona aafia ai isi i a latou amio. I o latou manatu, e pei lava e lē o i ai le Atua, a e afai foi o i ai o ia, e lē o i ai se faailoga o lona manatu mai i mataupu faaletagata. Talu ai ona o le tagata o le fua o le faaevolusione—e pei ona latou fai mai ai—e leai moni lava la se tasi latou te tali atu i ai seʻi vagana ai i latou lava atoa ma le sosaiete lea o loo latou ola ai. O lona uiga, e i ai le faamolemolega ona o a latou gaoioiga faamanu. Afai e aumaia e faiga tau i amioga lē mamā, ia e taʻuvaleaina i le Tusi Paia, le faafiafiaina ai o lagona, e mautinoa lava la e lē tatau ona taʻuvaleaina. Ua manatu nei tagata faapea, ai se ā la e ola ai i se olaga e faafitia ai oe ma faaumatia ai le faamoemoe, pe afai e tasi lava le iʻuga o i tatou uma—o le tuugamau?
12, 13. (a) O le ā le matautia pe afai e lolo atu Kerisiano i manatu faalelalolagi? (e) O le ā le aa o le faafitauli sa i Korinito? (i) O le ā e tatau ona faia e taofia ai i tatou mai le aafia ai i se vaaiga manatu faapito o le olaga?
12 E aogā ona matauina faapea e foliga mai sa aafia nisi o Kerisiano i Korinito i lenei ituaiga o manatu. I le tusi atu a Paulo i le faapotopotoga i inā na ia faailoa atu ai e faapea “pe afai e le toe tutū e ua oti,” ua moni ai la le faaupuga taatele i na aso: “Ina tatou aai ma inu, auā o a taeao tatou te oti ai.” A e sa vave lava ona ia faaalialia mai lenei manatu sese: “Aua neʻi faaseseina outou, O le feoai ma e amio leaga e leaga ai amio lelei. Ina ala mai ia i le amiotonu, a e aua neʻi agasala; auā ua pouliuli nisi i la le Atua; ou te faapea atu ia te outou e faamā ia te outou.”—1 Korinito 15:32-34.
13 Matau le maua tonu e Paulo o le aa o le faafitauli i na Kerisiano i Korinito. O ō latou manatu sese sa maua mai i aumea leaga. E mafai ona tatou aʻoaʻoina mai ai i lenei mea. Afai tatou te lē faaeteete, e mafai lava ona amata ona tatou manatu faapea e tatau foi ona tatou tofotofo i ni fiafiaga e faasaina a o leʻi oo ina tatou tagata matutua naʻuā e olioli ai i ia fiafiaga pe leʻi oo foi ina tatou oti. Afai o ia i tatou se faanaunauga e manatu ai i lenei auala, e manaomia vave lava ona suia ala o ō tatou mafaufau. Faapefea? Ia manatua, o lenei vaaiga manatu faapito ua lē amanaia ai tulaga amiotonu a le Atua. Ua faaalia ai le leai o se faatuatua i le folafolaga mautinoa a le Atua, e aofia ai ma le faamoemoe i le toetu. E tusa lava po o se vaaiga mai se tulaga aogā, o i latou o loo ola i ni olaga ulavavale ua aumaia ai ia i latou le tele o le loto tiga ma faalavelave. Ina ia maua le uiga saʻo, e manaomia ona latou “ala mai ia i le amiotonu.” E lē mafai ona latou mafaufau saʻo ma ala mai pe afai e “pouliuli [i latou] i la le Atua.”
14. O ai o le a lē mauaina faamanuiaga o le Malo o le Atua, a e peitai, o le ā na faailoa mai e Paulo e uiga i olaga o nisi i aso ua mavae?
14 Muamua lava i lana tusi i tagata Korinito, na faamanino atu ai e le aposetolo o Paulo faapea o ē faitaaga, o ē mulilulua, o ē ifo i tupua, o ē tauatane, o ē gaoi, o ē matapeapea, o ē onā, o ē agatele, ma ē faomea, o i latou uma lava na sa tele i Korinito, o le a lē avea o se vaega o le Malo o le Atua. Na ia faaopoopo mai: “Sa faapea foi nisi o outou; a ua taeele outou, a ua faapaiaina outou.” O le faamamāina o i latou i lenei auala na faaalia ai le mana o le Afioga a le Atua ma le taulaga togiola. (1 Korinito 6:9-11) E mautinoa lava, o le a sili atu ona valea pe afai e toe foi atu i uiga lē mamā o le lalolagi tuai!
15. O le ā le gagana manino na faaaogā e Peteru e faamatalaina ai le tulaga o i latou o ē na toe liliu atu i faiga eleelea a lenei lalolagi?
15 Na faapea mai Peteru: “Auā afai na latou sosola ai mea leaga a le lalolagi ina ua iloa lelei o le Alii o le Faaola lea o Iesu Keriso, a e toe faalavelaveina, ma toilalo i latou i na mea, ona tele ai lea o le leaga o lo latou iuga i lo latou amataga. A ua taunuu ia te i latou le upu faataoto moni, Ua toe foi le ulī i lona lava puaiga; i le ma lea, O le puaa na faataeleina ua toe foi ia e taafili i le palapala.” (2 Peteru 2:20, 22) O se faaupuga malosi! Peitai, ua tatau ni upu e faamalosia ai i nisi taimi ina ia tamau ai ia i tatou le uigā o le fautuaga ua aumaia. O lenei lapataiga na tuuina atu i Kerisiano o le uluai senituri, ua sili atu ona alagātatau mo i tatou i aso nei.
Tatou te Selesele Mea Tatou te Lulu
16. I ā auala e ‘selesele ai e le tagata le mea na ia lulu’ a o ola i se olaga ulavale?
16 Ua iloa e Kerisiano faamaoniga i mea o loo siomia ai i latou faapea, o amioga lē mamā, ma le olaga ulavale o lenei lalolagi e afaina ai, ma e oti ai. (Roma 1:18-32) I le na o le vaipanoa lava o faiga faaleituaiga, seʻi manatu i le loto tiga, ma mafatiaga e iʻu i ai pe a lē faaaloalo i le tulafono a le Atua tau i amio: o aiga malepelepe, maʻito e lē faaletulafono, faapaʻū tama, le toso teine, faaleagaina o tamaiti laiti, atoa ma faamaʻi pipisi ona o feusuaiga, o ni nai mea itiiti na. Ona i ai lea o faafitauli tau i le soifua maloloina e oo mai pe a faaleagaina le tino ona o le ʻai tele ma le inu tele, ma le tagofia o vailaau faasaina mo le faafiafiaina. O le faatagaina foi o le matapeapea e masani lava ona iʻu i le gaoi ma le taufaasese. E seāseā lava ona i ai se soliga o le tulafono a le Atua e lē iʻu ina afaina ai faaletino ma tau i faalogona i lē ua ia solia. E pei lava ona faamanatu mai e le aposetolo o Paulo i Kerisiano: “Aua neʻi faaseseina outou, e le ulagia le Atua auā o le mea e luluina e le tagata, o le mea lava lea e seleseleina mai ai e ia; [auā] o sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola e faavavau.”—Kalatia 6:7, 8.
17. Ai se ā e tatau ai ona uunaʻia se Kerisiano ina ia ola i tulaga amiotonu a le Atua?
17 I le isi itu, maeu le malolosi o manatu ua aumaia e le Tusi Paia mo le tausisi atu i tulaga a le Atua. Maeu le moni o mea o fai mai ai le Afioga a le Atua: “O le tagata faamaoni, e tele mea e manuia ai o ia”! (Faataoto 28:20) O ē ua inoino i ala taʻuvalea o lenei lalolagi ua latou aloese mai iʻuga matautia o le olaga ulavale. Ua latou olioli i se faiā mamā ma o latou uso ma tuafafine, faapea ma lo latou Atua o Ieova. E sili i lea, ua i ai so latou faamoemoe ofoofogia o le mauaina o le taui o le ola e faavavau i le lalolagi fou a le Atua. Ona ua tatou tulata atu nei i le iʻuga o lenei faiga o mea, o i latou la o “isi mamoe” ua oo foi ina i ai le faamoemoe faapitoa o le ola e oo atu i le “puapuaga tele” ma e lē taitai ona oo i ai le oti. Ua ia i latou se faatuatua maumaututu faapea, a oo mai le oti, a o leʻi oo mai na mea, ua folafola mai e le Atua o le a toe faatutuina i latou uma o i tuugamau. (Ioane 5:28, 29; 10:16; Faaaliga 7:14) I le vaai atu i nei mea uma, ai se ā o le a manatu ai se tasi e oo lava i sina manatu puupuu e fia aafia i faiga inosia a lenei lalolagi?—Roma 6:19-23; 1 Peteru 4:1-3.
18. (a) O le a faapefea ona faaoo atu e Ieova lana faamasinoga faasaga i “tagata faalematau” i le “puapuaga tele”? (e) E tusa ai ma le faamasinoga, ua faapefea ona faailoa mai e Ieova ia lava i ana fetalaiga faaiʻu o loo faamauina i le Tusi Paia?
18 Ua faailoa manino mai i le Tusi Paia faapea ua tatou ola i aso mulimuli o le mea ua taʻua o “le gataaga o le lalolagi.” (Mataio 24:3) Na faapea mai Peteru: “o le lagi nei ma le lalolagi ua tuu ona o lea lava afioga, ia taofia mo le afi i le aso e faamasino ai ma fano ai tagata faalematau.” (2 Peteru 3:7) Ma a oo mai lenei aso ua loa ona faatalitali atu i ai, o le manatu na faapea mai e mafai lava e le tagata ia ona gaoioi tutoatasi mai le Atua, ma o ana amioga leaga, amioga sauā, ua o se fua o le faaevolusione, o le a faafuasei ona faaumaina e aunoa ma ni mea e totoe. (Kolose 3:5, 6) Faalogo i le auala ua faamatala mai ai e le Atua lava ia, i ana fetalaiga faaiʻu na faamauina i le Tusi Paia, le iʻuga mo i latou e auauna ia te ia ma ē e lē auauna ia te ia: “Faauta! Ou te vave alu atu, ua ia te aʻu foi le taui ou te taui taitasi atu ia tusa ma lana galuega ua fai. . . . Amuia i latou ua ta o latou ofu, ina ia taga ia i latou ona ō atu i le laau o le ola ma ia latou ulu atu i le aai i ona faitotoa. A ua i tuapā, o ulī ma ē faia mea faataulāitu ma ē faitaaga ma ē fasioti tagata ma ē ifo i tupua ma ē uma o fiafia i le pepelo ma faia le tala pepelo.”—Faaaliga 22:12-15, NW.
19. O le ā e tatau ona avea o la tatou faaiʻuga a o tatou fesagaʻi ma le lumanai?
19 A o faateleina le leaga o tulaga o amioga a lenei lalolagi, ia maumauai i lau faaiʻuga ina ia faafiafia Ieova i le faia o le mea ua mamā, mamalu ma ia tonu. Ia aapa atu pea mo le taui o le ola. Ia teena le mitiia i le paʻū atu i “auala paʻū maulalo o le ulavale” o lenei lalolagi, o le lua lea e oti ai. E mafai ona e manumalo i le taua faasaga i mafaufauga o amioga ulavale, pe afai e te matuā inoino i auala taʻuvalea o lenei lalolagi!
O le ā Lau Tali?
◻ Ai se ā e matautia ai le aafia i faiga taʻuvalea a lenei lalolagi?
◻ Ai se ā e manaomia ai lo tatou matuā faaeteete i le filifilia o faafiafiaga?
◻ O ā manatu e ono oti ai e faigofie ona taaʻina ai i tatou pe afai tatou te auaufaatasi ma tagata o aso nei o ē pei o Epicureans?
◻ O le ā le faamasinoga a Ieova faasaga ia i latou ua liliu atu ma le lē salamō i auala taʻuvalea o lenei lalolagi?
◻ O ā faamanuiaga o loo i luma mo i latou o ē tausia le saoloto mai amioga inosia a lenei lalolagi?
[Ata i le itulau 16]
O le matuā inoino i auala taʻuvalea o lenei lalolagi o le a fesoasoani i auauna a le Atua e maua le ulufale atu i le lalolagi fou o le amiotonu
[Ata i le itulau 18]
O faafiafiaga taʻuvalea a lenei lalolagi e mafai ona maileia ai se Kerisiano o loo nofo faasamasamanoa