‘O le a Faaumatia le Oti’

“O le toe fili e faaumatia, o le oti lea.”—1 KORINITO 15:26.

1, 2. (a) O le ā le faamoemoe na folasia mai e le aposetolo o Paulo mo ē ua maliliu? (e) O le ā le fesili e faatatau i le toetu na talanoaina e Paulo?

“OU TE talitonu i . . . le toetu mai o le tino, ma le ola e faavavau.” O le faamatalaga lea faaaposetolo (Apostles’ Creed). E talitutusa le Katoliko ma le Porotesano i lo latou faamaoni e taulotoina lenei manatu e aunoa ma so latou iloa, o o latou talitonuga e tele ina talitutusa atu ma le filosofia faa-Eleni nai lo so o se mea lava na talitonu i ai le au aposetolo. Peitai, na teena e le aposetolo o Paulo le filosofia faa-Eleni ma sa lei talitonu foi i se agaga [solu] e lē mafai ona oti. Peitai, sa talitonu mausalī pea o ia i se olaga i le lumanai, ma tusi ai i lalo o faagaeega e faapea: “O le toe fili e faaumatia, o le oti lea.” (1 Korinito 15:26) O le ā tonu lava le uiga o lena mea mo le fanau a tagata o loo i le tulaga oti?

² Mo se tali, seʻi o tatou toe foi atu lava i le talanoaina e Paulo o le toetu lea o loo faamauina i le 1 Korinito mataupu e 15. O le a e manatua i fuaiupu amata, na faatulaga ai e Paulo le toetu o se vaega e matuā tāua i le aʻoaʻoga faa-Kerisiano. O lenei la ua ia talanoaina ai fesili patino: “A e fai mai se tasi, ‘Pe faapefea ona toe tutū mai o e ua oti? Se a foi le uiga o le tino latou te o mai ai?’ ”—1 Korinito 15:35.

O le ā le Ituaiga o Tino?

3. Aisea na teena ai e nisi tagata le toetu?

³ I le lāgāina o lenei fesili, atonu sa faanaunau Paulo e tafiesea aafiaga o le filosofia a Palato. Na aʻoaʻo e Palato faapea o loo iai i le tagata se agaga [solu] e lē mafai ona oti, e ola pea pe a oti le tino. Mo i latou na ola aʻe ma aʻoaʻoina i lena manatu, e mautinoa sa matuā lē fetaui ia i latou le aʻoaʻoga faa-Kerisiano o le toetu. Pe afai o loo ola pea le solu pe a oti le tagata, o le ā la le aogā o le toetu? E lē gata i lea, o le toetu e foliga mai e lē fetaui. O le taimi lava e liu efuefu ai le tino, e mafai la faapefea ona iai se toetu? Ua faapea mai se tagata faimanatu i le Tusi Paia o Heinrich Meyer, o le tetee malosi mai o nisi tagata Korinito atonu sa faavae mai “i le manatu faafilosofia faapea e lē mafai ona toe faafoisia mai mea na faia aʻe ai le tino.”

4, 5. (a) Aisea na lē talafeagai ai teteega a tagata e leai se faatuatua? (e) Faamatala mai le talafaatusa a Paulo i le “fua.” (i) O ā ituaiga o tino ua foai atu e le Atua i ē faauuina ua toe tutū mai?

⁴ Ua faaalialia e Paulo le valea o lo latou manatu: “O oe na le valea; o le mea e luluina e oe e le ola lea pe afai e le pala. O le mea foi e te lulu, ua e le luluina le tino e tupu ia; a o le fua lava, atonu se saito, po o se tasi o ia mea. A e avane i ai le tino e le Atua, pei ona finagalo i ai o ia; o fua foi taitasi ma lona lava tino.” (1 Korinito 15:36-38) Sa lei fuafua e le Atua e toe faatutūina mai tino o tagata ia na iai muamua a o ola i le lalolagi. Nai lo lea, o le a iai se toe faafoisiaga.

⁵ O loo faatusatusa atu e Paulo le toetu i le tuputupu aʻe o se fatu laau. O si tamai fatu lamoʻimoʻī lava o se saito e lē mafai ona iloa ai po o le ā le laau o le a ola mai ai. Ua faapea mai le World Book Encyclopedia: “Pe a amata ona tuputupu aʻe se fatu laau, e tele se vai na te mitiiaina. O le vai lena e māfua ai fesuiaiga e tele tau malosiaga i totonu o le fatu. E faapogaia ai foi ona fefete le alavalava o i totonu o le fatu ma oso mai i fafo ma le paʻu sa taʻaiʻai ai le fatu.” Lona uiga, e pē le fatu i lona tulaga o se fatu, ae ua liua e avea ma laau fou ua tupu mai. “E avane i ai le tino e le Atua” i le faatulagaina ai o tulafono faasaienisi ia o loo puleaina lona tuputupu aʻe, ma maua ai e fatu laau taitasi o latou tino e tusa ai ma le ituaiga o iai. (Kenese 1:11) E faapena foi i Kerisiano faauuina, e muamua ona maliliu i latou o ni tagata. Pe a oo i le taimi atofaina a le Atua, ona ia toe faafoisia lea o i latou i le ola i ni tino fou atoatoa. E pei ona taʻu atu e Paulo i Kerisiano i Filipi, “O Iesu Keriso; na te liua o tatou nei tino faatauvaa, ia faatatau i lona tino mamalu.” (Filipi 3:20, 21; 2 Korinito 5:1, 2) E toe tutū mai i latou i ni tino agaga ma ola ai i le nofoaga o agaga.—1 Ioane 3:2.

6. Aisea e talafeagai ai ona talitonu faapea e mafai e le Atua ona saunia mo ē ua toe tutū mai ni tino agaga e talafeagai?

⁶ Pe faigata tele ea lenei mea mo le talitonuina? E leai. Ua taʻua e Paulo faapea e tele ituaiga eseese o tino o meaola. E lē gata i lea, ua ia faia se faaeseesega i agelu faalelagi ma tagata e iai aano ma toto, i le faapea mai: “E i ai foi tino faalelagi ma tino faalelalolagi.” E iai foi se eseesega tele i mea na foafoaina e leai ni o latou ola. “Ua ese le pupula o le tasi fetu i lo le tasi fetu,” o le mea lena ua leva ona taʻua e Paulo, a o lei tāitai mulimuli ane mauaina e suesuega faasaienisi na mea faitino o i le lagi e pei o fetu lanu moana, o fetu tetele lanu mūmū ma fetu laiti papaʻe. I le mātau atu i lenei mea, po ua lē talafeagai ea la ona mafai e le Atua ona ia saunia ni tino agaga e talafeagai mo ē faauuina ua toe tutū mai?—1 Korinito 15:39-41.

7. O le ā le uiga o le lē pala? o le lē oti lava?

⁷ Ona faapea mai lea o Paulo: “E faapea foi le toe tutū mai o e ua oti; e luluina ma le pala, e toe faatuina mai ma le le pala.” (1 Korinito 15:42) O le tino faaletagata, e ui ina lelei atoatoa, ae mafai ona pala. E mafai ona fasiotia. Mo se faaaoaoga, na faapea mai Paulo o Iesu lē na toe faatūina mai sa “le toe foi atu lava i le mea e pala ai.” (Galuega 13:34) E lē toe foi atu lava o ia e ola i se tino e mafai ona pala, e ui o se tino faaletagata e lelei atoatoa. O tino ua foaiina atu e le Atua i ē faauuina ua toe tutū mai e lē mafai ona pala—e lē toe oti pe toe faaleagaina. Ua faaauau mai Paulo: “E luluina ma le matagā, e toe faatuina mai ma le matagofie; e luluina ma le vaivai, e toe faatuina mai ma le malosi; e luluina le tino faaletino, e toe faatuina mai o le tino faaleagaga.” (1 Korinito 15:43, 44) Ua faapea mai atili Paulo: “Ia ofu foi lenei tino oti i le tino le oti lava.” O le lē oti lava o lona uiga o se olaga e lē gata mai, e lē mafai ona faatamaiaina. (1 Korinito 15:53; Eperu 7:16) I lenei auala, ua maua ai e ē ua toe tutū mai “foliga o . . . lē faalelagi,” o Iesu lea, o lē na mafai ai ona maua lo latou toetu.—1 Korinito 15:45-49.

8. (a) Tatou te iloa faapefea o ē ua toe tutū mai o tagata lava ia sa iai muamua a o latou soifua i le lalolagi? (e) O ā valoaga e faataunuuina pe a faatinoina le toetu?

⁸ E ui lava i lenei toe faafoisiaga, ae o loo avea pea ē ua toe tutū mai o tagata lava ia sa iai muamua a o latou lei maliliu. O le a toe faatutūina mai lava i latou ma o latou manatunatuga, ma uiga lelei faa-Kerisiano sa iai muamua. (Malaki 3:3; Faaaliga 21:10, 18) O lena vala ua pei ai i latou o Iesu Keriso. Na suia mai o ia i le tino agaga e avea ma tino tagata. Ona maliu ai lea o ia ma toetu mai o se agaga. Peitai, “o Iesu Keriso e le liu lava ia, o ananafi, ma le asō, e oo foi i le faavavau.” (Eperu 13:8) Maeu se faaeaga mamalu ua maua e ē faauuina! Ua faapea mai Paulo: “Pe a ofu foi lenei tino iu vale i le tino ola pea, a ofu foi lenei tino oti i le tino le oti lava, ona taunuu ai lea o le upu ua tusia, Ua faaumatia le oti i le manumalo. Le oti e, o fea o i ai lou manumalo? Le oti e, o fea o i ai lou tui?”—1 Korinito 15:54, 55; Isaia 25:8; Hosea 13:14.

Pe Iai se Toetu Faalelalolagi?

9, 10. (a) I le aotelega o le 1 Korinito 15:24, o le ā “le gataaga,” ma o ā mea tutupu e fesootai atu i ai? (e) O le ā e tatau ona tupu ina ia faaumatia ai le oti?

⁹ Pe e iai se lumanai mo le faitau miliona o ē e lē o ia i latou le faamoemoe o le ola o ni agaga e lē mafai ona oti i le lagi? E mautinoa e iai! Ina ua uma ona faamatala faapea e faia le toetu faalelagi i le taimi o le faatasi mai o Keriso, ona otooto lea e Paulo mea e faasolosolo ona tutupu, i le faapea mai: “Ona oo ai lea i le gataaga, e tuuina atu ai e ia le malo i le Atua, o le Tamā lea, pe a uma ona faaumatia e ia o alii sili uma, ma faipule uma, ma e malolosi.”—1 Korinito 15:23, 24.

¹⁰ O “le gataaga” o le iuga lea o le Pulega a Keriso i le Afe Tausaga, pe a toe faafoi atu ma le lotomaulalo ma le faamaoni e Iesu le Malo i lona Atua ma o lona Tamā. (Faaaliga 20:4) I lea taimi, ona faataunuuina ai lea o le fuafuaga a le Atua “ina ia na faaopoopoina ia Keriso” o mea uma lava. (Efeso 1:9, 10) Ae muamua, o le a faaumatia e Keriso “alii sili uma, ma faipule uma, ma e malolosi” o ē tetee i le finagalo o le Atua Pule Silisiliese. O lenei vala e sili atu ni mea e aofia ai nai lo le faaumatiaga lea e faia ia Amaketo. (Faaaliga 16:16; 19:11-21) Ua faapea mai Paulo: “E tatau ona pule o ia [Keriso], seia tuuina e ia [le Atua] ona fili uma lava i lalo o ona vae. O le toe fili e faaumatia, o le oti lea.” (1 Korinito 15:25, 26) Ioe, o le a aveesea āuga uma o le agasala ma le oti na tuufaasolo mai ia Atamu. O le a talafeagai ai la ona faagaogaoina e le Atua “tuugamau” e ala i le toe faafoisia mai i le ola o ē ua oti.—Ioane 5:28.

11. (a) Tatou te iloa faapefea e mafai e le Atua ona toe foafoaina tagata [solu] ua maliliu? (e) Ma o ā ituaiga o tino o le a saunia mo i latou e toe tutū mai i le lalolagi?

¹¹ O lona uiga o lenei mea o le toe foafoaina solu faaletagata? Pe faigata ea? E leai, auā ua faamautinoa mai e le Salamo 104:29, 30 ia i tatou e mafai e le Atua ona faia faapena: “Ua e aveeseina a latou mānava, ona mamate ai lea, ua toe liu efuefu. E te auina atu lou Agaga, ua faia ai i latou.” E ui o ē faatutūina mai o tagata lava ia sa iai a o lei maliliu, ae o le a lē manaomia ona toe iai o latou tino sa iai muamua. E pei o i latou e faatutūina aʻe mo le lagi, o le a foai atu e le Atua ia i latou se tino e pei ona finagalo i ai o ia. E mautinoa o o latou tino fou o le a maloloina faaletino ma talafeagai lelei atu i o latou tino sa muai iai, ina ia mafai ona mataulia ai i latou e ē pele ia i latou.

12. O afea e faatino ai le toetu faalelalolagi?

¹² O afea o le a faatino ai le toetu faalelalolagi? Na taʻua e Mareta e faatatau i lona tuagane ua oti, o Lasalo: “Ua ou iloa e toe tu mai lava ia i le toe tu i le aso gataaga.” (Ioane 11:24) Na faapefea ona ia iloa lena mea? Sa avea le toetu ma mataupu o fefinauaiga i ona aso, talu ai sa talitonu i ai le au Faresaio ae lē talitonu i ai le au Satukaio. (Galuega 23:8) Peitai, atonu sa iloa e Mareta molimau anamua a o lei oo mai i taimi o uluai Kerisiano, ia sa faamoemoe atu i le toetu. (Eperu 11:35) Atonu foi sa mafai ona ia malamalama mai le Tanielu 12:13 faapea o le a tupu le toetu i le aso gataaga. Atonu foi na ia iloa lenei mea mai ia Iesu lava ia. (Ioane 6:39) O lena “aso gataaga” e tutusa lea ma le Pulega a Keriso i le Afe Tausaga. (Faaaliga 20:6) Seʻi manatu i se fiafiaga o le a iai a o faagasolo lena “aso” pe a amata lenei mea sili ona mataina!—Faatusatusa i le Luka 24:41.

O Ai e Toe Tutū Mai?

13. O le ā le vaaiga e faatatau i le toetu o loo faamauina i le Faaaliga 20:12-14?

¹³ I le Faaaliga 20:12-14 o loo faamauina ai le vaaiga na iloa e Ioane e faatatau i le toetu faalelalolagi: “Na aʻu iloa foi o e na oti, o tagatānuu atoa ma alii, o tutū i luma o le Atua, ona fofola lea o tusi; ua fofola foi ma le tasi tusi, o le tusi lea o le ola; ona faamasinoina ai lea o e na oti i mea ua tusia i tusi, e tusa ma a latou amio. Ua avae foi e le sami e na oti sa i ai, ua avae foi e le oti ma seoli e na oti sa i ai; e taitasi foi o i latou ma faamasinoina e tusa ma a latou amio. Ua lafoina foi le oti ma seoli i le lepa afi; o le oti faalua lea, o le lepa afi lea.”

14. O ai o le a aofia ia i latou e toe faatutūina mai?

¹⁴ O le a aofia uma i le toetu “o tagatānuu atoa ma alii,” o ē lauiloa ma tagata e lē taualoa o ē na soifua ae ua maliliu. Ioe, e oo lava i tama meamea o le a aofia ai! (Ieremia 31:15, 16) Ua faaali mai i le Galuega 24:15, le isi auiliiliga tāua: “O le a toe tutū mai e ua amiotonu atoa ma e ua amioletonu.” O le a sili ona mataulia i ē “amiotonu” tane ma fafine faatuatua anamua, e pei o Apelu, Enoka, Noa, Aperaamo, Sara, ma Raava. (Eperu 11:1-40) Seʻi manatu i le mafai ona talatalanoa ma na tagata ma maua mai ai ni faamatalaga o ni molimau vaaitino i mea ua leva ona tutupu o loo taʻua i le Tusi Paia! O “e ua amiotonu” o le a aofia ai foi le faitau afe o tagata e matataʻu i le Atua o ē na maliliu i ni taimi e lei mamao atu ma sa latou lei maua le faamoemoe faalelagi. Po o iai se tagata o lou aiga po o sē pele ia te oe atonu e aofia ia i latou nei? Maeu le faamafanafanaloto o le iloaina e mafai ona e toe vaai atu ia i latou! Ae, o ai tagata “amioletonu” na foi o le a toe faatutūina mai? E aofia ai le faitau miliona, pe atonu e faitau piliona, o ē na maliliu e aunoa ma se avanoa na latou iloa ai ma faatatauina upu moni o le Tusi Paia.

15. O le ā le uiga faapea o ē toe tutū mai o le a “faamasinoina . . . i mea ua tusia i tusi, e tusa ma a latou amio”?

¹⁵ O le a faapefea i ē o le a toe faatutū mai ona “faamasinoina . . . i mea ua tusia i tusi, e tusa ma a latou amio”? O nei tusi e lē o ni faamaumauga o a latou amio i taimi ua teʻa; ina ua latou maliliu, na tuusaʻoloto ai i latou mai agasala na latou faia a o soifua i latou. (Roma 6:7, 23) Peitai ane, o tagata e toe faatutūina mai o le a iai pea i le agasala tuufaasolo mai ia Atamu. I le taimi lea, o nei tusi o le a fofola mai ai faatonuga tauatua e tatau i tagata uma ona usitaia ina ia maua ai aogā atoatoa mai le taulaga a Iesu Keriso. Pe a soloiesea le āuga mulimuli o le agasala tuufaasolo mai ia Atamu, ona atoatoa ai lea o le uiga o le ‘faaumatiaina o le oti.’ E oo atu i le iuga o le afe o tausaga, o le a “pule aoao le Atua i le aoao o mea.” (1 Korinito 15:28) O le a lē toe manaomia e le tagata se faalaa ane a se Ositaulaga Sili po o Sē faia le Togiola. O le a toe faafoisia tagata uma i le tulaga lelei atoatoa lea na uluai olioli ai Atamu.

Se Toetu ua Faatulaga Lelei

16. (a) Aisea e talafeagai ai ona talitonu faapea o le a faagasolo le toetu i se faatulagaga lelei? (e) O ai e foliga mai o le a iai i tagata e muamua ona toe faatutūina mai le oti?

¹⁶ Talu ai ua faatulagaina lelei le toetu faalelagi, “e taitoatasi ma lona lava tofi,” e faamaonia la o le toetu faalelalolagi o le a lē tupu ai se faafitauli o le matuā fenumiai o le faateleina o le faitau aofai o tagata. (1 Korinito 15:23) O le mea mautinoa, o le a manaomia ona tausia lelei i latou faatoʻā toe tutū mai. (Faatusatusa i le Luka 8:55.) O le a latou manaomia se tausiga faaletino—ae sili atu ona tāua—le tausiga faaleagaga i le mauaina o le poto foai ola e uiga ia Ieova le Atua ma Iesu Keriso. (Ioane 17:3) Pe afai o le a toe faatutūina faatasi mai lava i le taimi e tasi tagata uma, o le a faigata la ona tausia lelei i latou. E talafeagai ai ona manatu faapea, o le a faasolosolo le faatinoina o le toetu. O Kerisiano faamaoni o ē e lei leva ona maliliu a o lei muta le faiga o mea a Satani, e foliga o i latou na o le a muamua ona toe tutū mai. E mafai foi ona tatou faatalitalia se toetu faalelalolagi mo tane faamaoni o aso anamua o ē o le a auauna o ni “alii sili.”—Salamo 45:16.

17. O ā nisi o mataupu e uiga i le toetu e lē o tali mai i ai le Tusi Paia, ma aisea e tatau ai i Kerisiano ona lē soona popole ai fua i na mataupu?

¹⁷ E ui i lea, e lē tatau ona tatou soona maumauai i na mataupu. E tele mataupu e lē o tali mai i ai le Tusi Paia. E lē o auiliili uma mai pe faapefea, o afea, pe i fea nofoaga o le a toe faatutūina mai ai tagata taitoatasi. E lē o taʻu maia ia i tatou pe faapefea ona faanonofo, fafaga, ma faalavalava i latou o le a toe tutū mai. E lē mafai foi ona tatou taʻua ma le mautinoa po o le a faapefea ona galueaiina e Ieova mataupu e pei o le tausiaina o tamaiti e toe tutū mai po o le a faapefea ona ia tausia nisi o tulaga patino e ono aofia ai a tatou uo ma ē pele. E moni, o se uiga faalenatura le tau mānatu e uiga i na mea; ae o le a lē atamai ona faaalu se taimi tele e taumafai ai e tali fesili atonu e lē o mafai ona taliina i le taimi nei. E tatau ona taulaʻi atu o tatou mafaufau i le auauna ma le faamaoni ia Ieova ma maua ai le ola e faavavau. E faalagolago atu le faamoemoe o Kerisiano faauuina i le toetu mamalu faalelagi. (2 Peteru 1:10, 11) E faamoemoe “isi mamoe” mo se tofi e faavavau i le nofoaga faalelalolagi o le Malo o le Atua. (Ioane 10:16; Mataio 25:33, 34) Mo le tele o auiliiliga e lē iloa e uiga i le toetu, tau lava ina tatou faatuatua atu ia Ieova. O lo tatou fiafiaga i le lumanai o loo malupuipuia i aao o Lē e mafai ona ia “faamaoona le manao o mea ola uma lava.”—Salamo 145:16; Ieremia 17:7.

18. (a) O le ā le manumalo o loo faamatilatila e Paulo? (e) Aisea tatou te faatuatua atu ai ma le mautinoa i le faamoemoe o le toetu?

¹⁸ Ua faaiu e Paulo lana finauga i lona faapea mai: “Faafetai i le Atua, o le na te foaiina mai le manumalo ia te i tatou e ala mai i lo tatou Alii o Iesu Keriso.” (1 Korinito 15:57) Ioe, o le manumalo ua malo ai i le oti na tuufaasolo mai ia Atamu e ala i le taulaga togiola a Iesu Keriso, ma ua auai uma ē faauuina ma “isi mamoe” i lena manumalo. O le mea moni, o “isi mamoe” o loo soifua pea i aso nei ua ia i latou se faamoemoe lea e uigaese lava i lenei augatupulaga. I le avea ma vaega o se “motu o tagata e toatele,” ua matuā faatoateleina pea, atonu latou te faasaoola atu ai i le “puapuaga tele” o loo fotuai mai ma lē oo ai lava i le oti! (Faaaliga 7:9, 14) Peitai ane, e oo lava ia i latou o ē maliliu ona o “tausaga ma le mea e tupu ai” pe ala mai i sui a Satani, e mafai lava ona tuu atu lo latou faatuatua mautinoa i le faamoemoe o le toetu.—Failauga 9:11.

19. O le ā le timaiga e ao i Kerisiano uma i aso nei ona utagia?

¹⁹ O lea la, ua tatou faatalitali atu ai ma le naunautai i lena aso mamalu pe a oo ina faaumatia le oti. O lo tatou faatuatua lē maluelue i le folafolaga a Ieova i le toetu e aumaia ai ia i tatou se vaaiga moni e faatatau i mataupu. Po o le ā lava e tupu ia i tatou i lenei olaga—e tusa lava pe tatou te oti—e leai lava se mea e mafai ona aveesea maia ia i tatou le taui ua folafola mai e Ieova. O lea, ua talafeagai ai i aso nei le timaiga na tuuina atu e Paulo i Kerisiano i Korinito, e pei lava ona sa talafeagai i le luaafe tausaga ua tuanai: “O lenei, oʻu uso pele e, ia outou tumau, ma le le faagaeetia, ia alualu lo outou faamalosi i le galuega a le Alii ma le le aunoa, ina ua outou iloa e le se mea faaleaoga lo outou tautiga i le Alii.”—1 Korinito 15:58.

Pe Mafai Ona E Faamatala?

◻ Na faapefea ona tali e Paulo le fesili e faatatau i ituaiga o tino o le a maua e ē faauuina pe a toe tutū mai?

◻ E faapefea ma o afea o le a faaumatia ai loa le oti?

◻ O ai o le a aofia ai i le toetu faalelalolagi?

◻ O ā o tatou uiga e tatau ona faaalia e tusa ai o mataupu ia e lē o tali mai i ai le Tusi Paia?

[Ata i le itulau 20]

E “pē” se fatu e ala i le uia o se suiga mataina

[Ata i le itulau 23]

O tane ma fafine faatuatua anamua, e pei o Noa, Aperaamo, Sara, ma Raava, o le a iai faatasi ma i latou e toe tutū mai

[Ata i le itulau 24]

O le a avea le toetu o se taimi o le olioli tele!