Auauna o le Au Faigaluega Faatuatuaina Faatasi ma Ieova

“Sole, ua faaali atu e ia ia te oe le mea lelei; se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa, ma ia feooai ma lou Atua ma le loto faamaulalo?”—MIKA 6:8.

1. O le ā le faavae faale-Tusi Paia lea ua mafai ona taʻua ai auauna uma a Ieova i aso nei o lana ‘au faigaluega faatasi ma ia’?

NA TUSI MAI le aposetolo Kerisiano o Ioane: “Faauta i le silisili o le alofa ua foaiina mai e le Tamā ia te i tatou, ina ua taʻua i tatou o le fanau a le Atua.” (1 Ioane 3:1) Ma sa tautala le aposetolo o Paulo ia te ia lava ma lana aumea o Apolo: “O le au faigaluega i [maʻua] faatasi ma le Atua.” (1 Korinito 3:9) O nei fuaitau uma e lua sa faia e soʻo faauuina o Iesu Keriso ma sa faatatau ia i latou. A e e faatatau foi le mataupu silisili i auauna moni uma a le Atua. Ua mafai la ona faapuupuu nei manatu i le fai atu faapea: ‘Faauta i le silisili o le alofa ua tuuina mai e le Tamā ia i tatou ina ia avea i tatou ma le au faigaluega faatasi ma Ieova.’

2. Ai se ā e mafai ai ona avea auauna a Ieova o se au faigaluega faatasi ma ia?

² E mafai faapefea e ni tagata vaivai, e lē lelei atoatoa ona avea o se au faigaluega faatasi ma Lē silisili na Foafoaina Mea, o lē e lē gata mai lona malosi ma le atamai, e atoatoa i le faamasinoga tonu, ma o le faatinoga o le alofa? E mafai lenei mea auā na faia o tatou uluai mātua i le faatusa ma uiga o Lē na Foafoaina Mea, faatasi ma lē sa faigaluega faatasi ma ia, o le Upu po o le Lokou. (Kenese 1:26, 27; Ioane 1:1) O lea la, sa tuuina atu i o tatou uluai mātua sina atamai, faamasino tonu, malosi ma le alofa. O le pogai lea ua mafai ai ona fetalai mai Ieova i ana auauna i le lalolagi e ala i lana perofeta: “Sole, ua faaali atu e ia ia te oe le mea lelei; se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa, ma ia feooai ma lou Atua ma le loto faamaulalo?”—Mika 6:8.

3. O le ā o loo faaalia mai i le Mika 6:8, ma o le ā e manaomia mai i se tagata a o leʻi mafai ona avea o ia o se tasi o le au faigaluega faatasi ma Ieova?

³ Pe a tatou faitauina upu, “Se a foi se mea e finagalo ai Ieova ia te oe, pe a le o ia mea...?” e foliga o le manatu o loo mulimuli mai ua faaalia ai le fetaui lelei ona aoteleina ai le tiute tauave ‘a le tagata’ agaʻi i le Atua ma isi uso faaletagata. O le mamao e oo moni ai lenei tiute tauave o le a malamalama i ai a o faagasolo la tatou talanoaga. O le mea moni, e le na so o se tasi e mafai ona savavali faatasi ma Ieova. Ua taofia lenei faaeaga mo i latou o ē ‘ua loto gatasi ma ia ona o le filifiliga,’ pei ona faapea mai. (Amosa 3:3) E faapefea la ona faia? E ala i le faia o se tuuina atu lē mataofia ia Ieova, ma faailogaina i le papatisoga i le vai, e pei ona faaalia i le mataupu ua mavae atu. O lea la, o le ā ua uiga i ai le Mika 6:8 mo i latou nei?

‘Faia le Amiotonu’

4. I le uiga faavae, o le ā le uiga o le “fai le amiotonu”?

⁴ I le amataga, e i ai le manaoga ina ia “fai le amiotonu.” I le avea o le au faigaluega faatasi ma Ieova le Atua, e ao ai ona tatou tausia le loto fuatia ifo lelei. O le uiga faavae lava o le “fai le amiotonu,” o le faia lea o mea saʻo, o le mea o loo manaomia e le Atua mai ia i tatou. O lona uiga, e tatau ona tatou faataunuu a tatou avega tauave, o le silisili o ia mea o le tuutoina atu atoatoa ia Ieova. (Nauma 1:2) Na te lē taliaina se fefalōaiga. E mautinoa la le lē mafai ona tatou auauna i ni matai se toalua.—1 Korinito 10:22; Mataio 6:24.

5. Na faaalia faapefea e Iesu lona naunau i le amiotonu a e ʻinoʻno i le amioleaga?

⁵ E lē gata i lea, ina ia “fai le amiotonu,” e ao ona tatou ‘alolofa i le amiotonu ma ia ʻinoʻino i le amio leaga,’ e pei ona sa faia e Iesu Keriso. Ona o lona alofa i le amiotonu, sa ia tausia ai pea lona “paia, . . . e leai sona leaga, e taumamao ma ē agasala. (Salamo 45:7; Eperu 7:26) Ma talu ai sa ʻinoʻino Iesu i le amioleaga, i lona ita amiotonu, na ia matuā faitioina ai taʻitaʻi lotu faalotolotolua ma le matapeapea o ona aso.—Mataio 23:13-36; Ioane 8:44.

6. Ai se ā tatou te manaomia ai se uiga ia sili atu na i lo o le na ona ioe o le mafaufau faapea, e tatau ona tatou aloese mai mea ua faasaina ona e leaga?

⁶ E pei ona iloa mai i le faaaʻoaʻoga a Iesu, ua lē lava ai le na ona alofa i le amiotonu. E tatau foi ona tatou ʻinoʻino, ioe, matuā tetee, inosia, feita, ia i ai se matuā ʻinoʻino i—le mea e leaga. Talu ai ua leaga o tatou uunaʻiga mai lava i o tatou olaga talavou seia agaʻi mai ai ina matutua, ma o o tatou loto e taufaasese, e taufaaʻoleʻole, ua manaomia ai ia sili atu na i lo o le na ona ioe i le mafaufau faapea, ua faasaina le mea e leaga. (Kenese 8:21; Ieremia 17:9) Seʻi vaganā ua tatou tetee malosi atu i uunaʻiga ma faaosoosoga o le agassla, o le a tatou lolo atu i a latou togafiti. E tatau ona ia i tatou le matuā ʻinoʻino malosi i le mea leaga, e pei o lena na faaalia e Fineaso ina ua ia faaaogāina se tao e tutuʻi ai le ulugalii lea sa faatasi i le tapuaiga lē mamā ia Paala o Peoro.—Numera 25:5-8.

7. O le ā le molimau ua ia i tatou faapea, e lē faaaogāina e Ieova so o se isi e amioleaga, e fai ma ana au faigaluega faatasi ma ia?

⁷ E lē manaomia ma o le a lē faaaogā foi e Ieova so o se tasi e amio leaga, ina ia avea o sana au faigaluega. Ua faamanino mai lenei mea i le Salamo 50:16-18, ua tatou faitau ai: “A ua fetalai ane le Atua i le tagata amio leaga, Se a ea le mea ua e tautala ai i aʻu tulafono, ma e taʻu laʻu feagaiga i lou gutu? o oe foi, ua e ʻinoʻino i le aoaiga, ma ua e lafoaiina aʻu upu i ou tua. Pe a e iloa atu se gaoi, ona e loto gatasi ai lea ma ia; ua fai foi lou tofi faatasi ma e mulilulua.”

8. O le ā le mea na tupu ua faamautinoa ai le faalumaina e mafai ona tatou faatupuina e ala i le lolo atu i le faia o mea sese?

⁸ Atonu ua tatou pisi tele i le auaunaga ia Ieova, i le talaʻia o le tala lelei o le Malo o le Atua. A e a tatou lē matuā faaeteete e faaalia le pulea o i tatou lava, atonu o le a tatou agasala ona o vaivaiga faaletino, ma faalumaina ai le suafa o Ieova. O lea, i ni nai tausaga ua teʻa sa faia ai e se toeaina se mulilua ma se tuafafine faaleagaga, o lē sa lē talitonu lana tane. I le afiafi po la ina ua faasilasila le faateaina o lē sa avea ma toeaina, na faatopetope atu ai loa lenei tane ua tumu i le lotoa i le Maota o le Malo ma se fana, ma tafana ai le toalua lea ua agasala. E leai se tasi o i laua na maliu, a e o le aso lava na sosoo ai na matilatila mai ai lenei tala i le itulau i luma o le nusipepa e sili ona lauiloa i le Iunaite Setete! E moni lava, e aumaia le faalumaina ona o amioga leaga.—Faataoto 6:32.

9. E tusa ai ma le Faataoto 4:23, o le ā e ao ona tatou leoleo maluina, ma ai se ā?

⁹ O lea la, ua talafeagai ai le fautuaina o i tatou: “Ia sili ona leoleaina o lou loto i le leoleoina o mea uma; auā e tupu mai ai le amio [ola, NW]. (Faataoto 4:23) Ioe, e ao ona tatou aoaiina i tatou lava i mea e faataga o tatou fatu faafaatusa (loto) e mafaufau i ai. Ua faatuputeleina pea le anoanoai o mekasini, o televise, ma isi ituaiga o faasalalauga ua faatomua ai mea lē mamā, e aofia ai tusiata o faiga lē mamā faaulugalii. O le mea lea, e tatau ai lava ona tatou flilfili lelei i mea tatou te matamata ai, faalogologo i ai ma faitau i ai. O le pulea o ou lava manatu totino e tāua tele! Mo se faataʻitaʻiga, atonu e faigofie ona tatou maua ni fiafiaga pe a faaofi i o tatou mafaufau ni faiga faaleituaiga, o mea tatou te lē o mafaufauina e faatino moni i le olaga. (Matalo 5:28) A e masani lava, o na mafaufauga e iʻu i ni gaoioiga leaga. O lea, na i lo o le faaalu i ai o o tatou mafaufau i na mea, seʻi o tatou faaalia le fua o le agaga paia o le pulea o i tatou e i tatou lava, ma mafaufau i mea o loo lisiina mai i le Filipi 4:8.—Kalatia 5:22, 23.

“Naunau i le Alofa”

10, 11. (a) O le ā le faaeseesega e mafai ona tatou faia i le va o le faithfulness ma le loyalty [faamaoni]? (e) Na faaalia faapefea e le Alo o le Atua le faithfulness ma le loyalty [faamaoni]?

¹⁰ O le mea manaomia lona lua o loo taʻua i le Mika 6:8 o lo tatou “naunau i le alofa.” “Naunau i le faamaoni [loyalty]” o le auala lea ua faitau ai e The New English Bible. Ua faaalia e le faamatalaga i lalo i le New World Translation Reference Bible faapea, o le upu Eperu cheʻsedh, ua faaliliuina i le “alofa [agalelei, NW],” e mafai foi ona faaliliu i le “alofa agalelei loving-kindness]” po o le “alofa faamaoni [loyal love].” E tusa ai ma ē latou te tusia lomifefiloi, “o le faamaoni [loyal] e faauiga i se tetee mausali i so o se faaosoosoga e taufaasese pe faalata ai.” “E faaopoopo atu e le faamaoni [loyal] i le faamaoni [faithful], se manatu e manao ina ia tulai atu ma tau mo se mea po o se tagata, e tusa lava pe fetaiai ma ni toʻatugā mamafa.” O se mea lelei, ona ua tatou maua foi i le Tusi Paia faa-Peretania se eseesega itiiti i le faaaogāina o nei upu. Mo se faaaʻoaʻoga, o le upu “loyalty [faamaoni]” e lē o faaaogāina lava i ni mea e leai ni ola. A e o le upu “faithful [faamaoni]” e faaaogā soo ai lava. O le mea lea, ua taʻua ai le masina o “le molimau i le lagi e faamaoni [faithful, NW] lava. (Salamo 89:37) O lea foi la, ua faapea atu ai o afioga a le Atua e faamaoni [faithful], o lona uiga, e mafai ona faalagolago i ai.a (Faaaliga 21:5; 22:6) E ui i lea, o le loyalty [faamaoni] ua tuuina atu lava lea na o Ieova le Atua ma ana auauna faamaonia. Ma e tusa ai, e faatatau ia Ieova, ua tatou faitau ai: “E te galue oe ma le faamaoni [loyalty] i lē ua faamaoni.”—2 Samuelu 22:26, NW.

¹¹ Sa faamaoni [faithful ma loyal] le Alo o le Atua ia Ieova i le lagi. I le lalolagi, sa ia uia le tele o tofotofoga i le avea o le tagata o Iesu Keriso, ma faamaonia ai i lona usiusitai faapea na avea ai i ia o se tagata loyal [faamaoni] ma faithful [faamaoni]. Ua faamaonia lenei i le Eperu 5:7-9, ua tatou faitau ai: “O ia [Keriso) lenei sa tatalo atu i ona po na tino tagata mai ai, ma aioi atu ma le tagi tele ma loimata i le na mafaia ona faaola ia te ia nai le oti, na faafofogaina foi o ia i le mea na ia fefe ai. E ui lava o ia o le Alo, a o mea sa tiga ai o ia na aʻoaʻoina ai o ia ia usiusitai, ua faaatoatoaina foi o ia, ona avea ai lea o ia ma tupuga o le ola e faavavau ia i latou uma o e usiusitai ia te ia.”

Tofotofoina o le Faamaoni [Loyalty]

12. O le ā atonu e tofotofoina ai lo tatou faamaoni i nisi taimi, ma ua faapefea ona talia nisi o na tofotofoga?

¹² O le faamaoni [loyalty] ia Ieova le Atua, e manaomia ai lo tatou faamaoni foi i ana auauna o loo i le lalolagi, o o tatou uso Kerisiano. Ua faamanino mai e le aposetolo o Ioane lenei manatu ina ua ia faamanatu mai ia i tatou: “O le le alofa i lona uso ua ia vaai atu i ai, pe mafai faapefea ona alofa o ia i le Atua ua ia le vaai atu i ai.” (1 Ioane 4:20) Atonu e tofotofoina lo tatou faamaoni e tusa ai ma lenei itu, ona o mea lē lelei atoatoa o isi. Mo se faataʻitaʻiga, pe a tiga nisi, o le a faaalia e i latou le vaivai o lo latou faamaoni i le faalapotopotoga a Ieova, i le lē toe auai i sauniga faa-Kerisiano. O se isi tofotofoga o lo tatou faamaoni i o tatou uma, e mapuna aʻe lea pe a sese ni faamasinoga a i latou o ē ua faaaogā e Ieova e fai ma taʻitaʻi. I nisi taimi, ua avea ai lava na masei ma faamolemolega i nisi e faameo ai ma vavaeese ai i latou e i latou lava mai le faalapotopotoga vaaia a Ieova. A e pe o tonu ea le auala o a latou gaoioiga? E matuā leai lava!

13. Ai se ā ua lē tonu ai le vavaeese mai le faalapotopotoga a Ieova, ma o ā filifiliga ua tuuina atu i na tagata lē faamaoni?

¹³ Ai se ā ua lē tonu ai na tagata i lo latou tuua o le faalapotopotoga a le Atua? Talu ai ua faamautinoa mai i tatou e lana Afioga: “Ua tele le filemu o e naunau i [le] tulafono [a Ieova]; e leai fai se mea e tausuai ai i latou.” (Salamo 119:165) E lē gata i lea, ua poloaiina i tatou ina ia maua “le alofa naunau o le tasi i le tasi, auā o le alofa e ufiufi ai agasala e tele.” (1 Peteru 4:8; Faataoto 10:12) E lē gata i lea, seʻi faapea ua faaesea mai e se tagata ia lava mai tagata o Ieova. O fea la o le a ia agaʻi atu i ai? Pe ua ia lē fesagaʻi ea ma le luʻi lava lea e tasi na fetaiaʻi ma aposetolo o Iesu ina ua ia fesili atu i ai po ua latou fia ō ese foi ma i latou mai ia te ia? Na tali ma le mautinoa mai le aposetolo o Peteru: “Le Alii e, a matou o ea ia te ai? o ia te oe upu o le ola e faavavau.” (Ioane 6:68) E leai lava la se isi mea e toe foi atu i ai, a e ua na o “Papelonia le aai tele,” le emepaea o lotu sese i le lalolagi, po o le uumau e le “manu feai” faapolotiki a Satani. (Faaaliga 13:1; 18:1-5) I le tele o taimi, o ē ua lē faamaoni ma ua o ese atu mai le faalapotopotoga vaaia a Ieova, ua latou faia uiga masani faatasi ma i latou o i “Papelonia le aai tele,” o ē lē faaaloalo i le Atua.

“Feooai ma Lou Atua ma le Loto Faamaulalo”

14, 15. (a) O ā uiga ua i ai i le upu faa-Peretania “modest” [loto faamaulalo]? (e) Faatasi ai ma lē fea uiga o le “loto faamaulalo” lea o loo tatou manatu i ai i inei, ma mo ā mafuaaga? (i) Ai se ā e tatau ai i Kerisiano ona ‘faataatia se fua faatatau talafeagai i o latou tomai po o tāua’?

¹⁴ E tele uiga o le upu faa-Peretania “modest [Ioto faamaulalo].” E mafai ona faatatau atu i se mea e lē fiailoa, “e tapulaa lona lapoa, lona tele, po o le lautele.” Pe e mafai foi ona faauiga i le mamā, “i le matauina o tulaga talafeagai i laei ma amioga.” (1 Timoteo 2:9) Ona i ai lea o se uiga o le “loto faamaulalo” o loo faapitoa ona tatou manatunatu mamafa i ai, o le vaai totoʻa lea i mea e gata mai ai le tagata lava ia, po o le “faataatia o se fua faatatau talafeagai i tomai po o tāua o ia lava.” E lē taitai ona mafai ona avea o i tatou o le au faigaluega faatasi ma Ieova, pe afai tatou te faamaualuluga i o tatou manatu, i le uaʻi atu ia i tatou lava na i lo le uaʻi muamua atu ia Ieova le Atua.

¹⁵ O le ‘faataatia o se fua faatatau talafeagai i o tatou tomai po o tāua,’ o le uiga ua fetaui ma tatau ona faapipii atu i le upu Eperu ua faaliliuina i le “loto faamaulalo” o loo i le Mika 6:8. Ua faamaonia lenei i le auala o loo faaaogā ai le upu i lona toe taʻua e tasi i Tusi Paia Eperu. I le Faataoto 11:2, e lē o faaeseesea ma amioga lē mamā faaleituaiga a e o le faamaualuga, lea e iʻu i i ai ona o manatu faamaualuga o se tasi ia te ia lava. Ua tatou faitau ai: “A sau le faamaualuga, ona sau ai lea o le mā; a o i ai le atamai i e faamaulalo.” E fuifuilua le loto faamaulalo ma le mataʻu ia Ieova, lea foi e faatasi ai ma le atamai. (Salamo 111:10) E mataʻu ia Ieova le tagata loto maulalo, auā ua ia iloa le telē o le eseesega o loo i ai i lo la va ma le Atua, i le va o le amiotonu ma le malosi o Ieova ma si ona lē lelei atoatoa ma vaivaiga. O lea la, e galueaiina ai e le tagata loto maulalo lona faaolataga i le mataʻu ma le gatete.—Filipi 2:12.

16. O ā nisi o mau o faaalia ai pe ai se ā ua tatau ai i Kerisiano ona loto faamaulalo?

¹⁶ E tele lava mafuaaga e tatau ai ona loto maulalo le au faigaluega faatasi ma Ieova! E tusa lava po o le ā le atamai ua ia i tatou, le malosi faaletino ua tatou mauaina, po o le ā le tele o mea faitino ua ia i tatou, a e leai se faavae e tatau ai ona tatou gugutu. (Ieremia 9:23) Ai se ā ua lē faapea ai? Ona o le mataupu silisili i le 1 Korinito 4:7: “Auā o ai ea na te faaeseina oe? se a foi se mea ua ia te oe e lei foaiina atu? A e afai na foaiina atu ia te oe, se a le mea ua e mitamita ai, peiseai e lei foaiina atu lava?” E leai foi se mafuaaga tatou te gugutu ai ona o ni fua o la tatou faiva, auā o le ā ua tatou faitau ai i le 1 Korinito 3:6, 7? Ua fai mai Paulo i inā: “Na ou totōina, na faaasūsūina e Apolo; a e peitai o le Atua ua faatupuina. O lenei, e le o lē totō, e le o lē faasūsū; a e peitai o le Atua o le na te faatupuina.” E tatau foi ona fesoasoani fetalaiga a Iesu i le Luka 17:10 ina ia tatou tumau ai i le loto faamaulalo, auā na ia fetalai: “Pe a uma ona fai o mea uma na poloaiina atu ia te outou, tou te fai ane, o auauna le aoga i matou nei; auā o mea e tatau ona matou fai, o mea ia ua matou faia.”

17. Ai se ā ua avea moni ai le loto maulalo ma ala o le atamai?

¹⁷ O le mea moni, o le loto faamaulalo o le ala lea i le atamai. O le loto faamaulalo ua mafai ai ona tatou loto malie i so o se tulaga lava ua faaeaina i tatou e auauna ai. Afai tatou te loto maulalo, o le a tatou lē taumafai ai e susulu ma le fiasili, a e o le a loto malie e avea i tatou e pei o sē “aupito itiiti.” (Luka 9:48) O le a tatou maua ai foi uiga e pei o le faisalamo o lē na faalauiloa mai: “E sili le aso e tasi i ou lotoā i lo le afe [i se isi mea, NW]. E sili loʻu manao ia aʻu tu i le faitotoa o le fale o loʻu Atua, i le manao e mau i fale ie o e amio leaga.” (Salamo 84:10) E lē gata i lea, afai tatou te loto faamaulalo, o le a ia i tatou le alofa lea o le a uunaʻia ai i tatou e taʻimua i le faaalia o le āva i isi.—Roma 12:10.

E Talafeagai le Loto Faamaulalo i Talavou

18. (a) Ai se ā ua fetaui faapitoa ai le loto faamaulalo mo talavou? (e) O le ā se faamaumauga o aofia ai talavou i aso nei, ua lagolagoina ai le manaoga mo le loto maulalo?

¹⁸ O se itu ua matuā fetaui lelei pe a teuteuina e talavou Kerisiano i latou i le ofu o le loto maulalo. Maeu se faaaʻoaʻoga lelei sa saunia e Eliu mo i latou! E ui lava sa ia te ia tali saʻo, a e sa loto malie e faatali ma le faaaloalo seia maeʻa ona saunoa ane tane matutua. (Iopu 32:6, 7) E masani lava ona puʻea faamanu i ofaga le au talavou i o latou lagona mautinoa ia i latou lava, ma manatu māmā ai i a latou mea e gata mai ai. Talu ai ua i ai lo latou malosi faaletina ma maua sina poto, atonu o le a latou vaai maulalo ai i tagata matutua. A e peitai e lē uiga tutusa le poto ma le atamai, o lona uiga o le faatatauina o le poto. Ua masani ai le faamaumauga faanoanoa o mea o loo faia e talavou i aso nei i le Iunaite Setete. I iinā, e 63 pasene e saisaia ona o solitulafono matautia, e aofia ai le au talavou e oo i luga i le 24 tausaga le matutus, fastasi ai ma le 30 pasene e saisaia o ē i lalo ifo o le 18 tausaga. Ua lipotia mai foi faapea o le “aveina o le taavale a o onā pe faaleagaina foi e fualaau faasaina, o le pogai autū lea mo le maliliu o tagata Amerika o ē i le va o le 15 i le 24 tausaga.” I lea atunuu, “ua faateleina pea faaipoipoga a tagata talavou ua iʻu i le tatalaina,” a e sa lipotia mai faapea “e foliga mai e sili atu ona umi faaipoipoga pe a tele ni nai tausaga o le atamai o le tama ma le teine faaipoipo i le taimi o la la faaipoipoga.”

19. O le ā le fautuaga faale-Tusi Paia e lelei ona teu i loto o le au talavou?

¹⁹ O lea la, maeu le atamai o le fautuaga a le Afioga a le Atua! Ma le talafeagai lava, ua ia faatonuina talavou ina ia āva i o latou tamā ma tinā, ma ia usiusitai ia i latou i mea uma. (Efeso 6:1-3; Kolose 3:20) A e maise lava le tatau i talavou ona faagoto i o latou loto le fautuaga poto: “ Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”—Faataoto 3:5,6.

20. O ā taui e mafai e tagata uma lava ua tuuina atu ma papatisoina ona faatalitalia pe afai latou te utagia le Mika 6:8?

²⁰ O ā ni taui e mafai e i tatou uma lava ona faatalitalia pe afai, ua uma ona faataʻitaʻia lo tatou faatuatua ia Ieova e ala i le tuuina atu ma le papatisoga i le vai, ua tatou ‘faia foi le amiotonu, faaalia le alofa faamaoni, ma o loo feoai ma lo tatou Atua ma le loto faamaulalo’? O le mea e sili ona tāua i na mea uma, o le a tatou maua ai le faamaoniga a Ieova ona o le faataunuuina o mea o ia finagalo ai, ma o lea o le a faafiafiaina ai lona finagalo e ala i le saosaolaumea i le faapaiaina o lona suafa silisili ma le matautia. (Faataoto 27:11) E lē gata i lea, o le a tatou iloatino ai i o tatou lava olaga le moni o le mataupu silisili faapea, “o le amio Atua e aoga lea i mea uma lava, o loo i ai le mea ua folafolaina mai i la le olaga nei atoa ma lē atali.”—1 Timoteo 4:8.

[Faaopoopoga i lalo]

O ā Au Tali?

◻ E tusa ai ma le Mika 6:8, o le ā e manaomia ina ia “fai le amiotonu?”

◻ O le ā le fesootaiga o le faamaoni (loyalty] ia Ieova ma lo tatou faiā ma uso Kerisiano?

◻ Ai se ā e tatau ai ona tatou ‘feoai ma le Atua i le loto faamaulalo’?

◻ Ai se ā ua fetaui faapitoa ai le loto faamaulalo mo talavou Kerisisno?

[Ata i le itulau 17]

O e leoleo maluina ea lou loto i lou filifilia lelei lea o mea o e matamata, faalogologo, ma faitau i ai?

[Ata i le itulau 18]

Sa iloa e Peteru e leai lava se isi mea e ono alu atu iai, auā sa ia Iesu “upu o le ola e faavavau.” O e maumauai foi la e tumau ma le faamaoni i le faalapotopotoga a Ieova?