Mo se faaaoaoga, taumafai e mafaufau loloto i upu a le aposetolo o Paulo o loo maua i le 2 Korinito 7:1: “O lenei, le au pele e, ona ua ia te i tatou o ia upu ua folafolaina mai, ia tatou faamamā ia te i tatou i mea uma e leaga ai le tino atoa ma le agaga, ia faaatoatoaina lo outou faapaiaina i le mataʻu i le Atua.” Ia maua le uiga moni o na upu. Fesili ifo ia te oe lava, ‘Po o ā “ia upu ua folafolaina mai” o loo taʻua e Paulo?’ O le faitauina o le manatu autū o le mau, o le a mafai ai ona e iloaina le uiga o fuaiupu muamua: “O lea ia o mai ai outou nai totonu ia te i latou, ma ia outou vavae mai, ua fetalai mai ai le Alii [Ieova], aua foi tou te papai atu i se mea leaga; ona ou talia ai lea o outou, e fai foi aʻu mo outou Tamā, e fai foi outou moʻu atalii ma oʻu afafine, ua fetalai mai ai le Alii e ona le malosi uma lava.”—2 Korinito 6:17, 18.

O le poloaiga a Paulo ina ia ‘faamamā i tatou mai mea e faaleagaina ai,’ ua iai nei se isi uunaiga faaopoopo! Ua avea le folafola mai a le Atua na te ‘talia i tatou,’ o lona uiga, o le tuuina lea o i tatou i lana puipuiga o se uunaiga malosi e faia ai faapea. Atonu o le a e fesili ifo ia te oe lava, ‘Po o le a mafai ona ou olioli i se faiā mafana ma ia—e pei o se faiā a se atalii po o se afafine ma se tamā?’ Pe e lē o se mea faaoso fiafia le manatu faapea, o loo ‘taliaina’ po o loo alofaina e se Atua atamai, ma le alofa? Afai e foliga mai e ese lena manatu ia te oe, ia mātau le auala e faaalia atu ai e tamā alolofa le alofa ma le agalelei i a latou fanau. Seʻi mafaufau nei la i le iai o se faiā faapea i le va o oe ma Ieova! O le tele o lou mafaufau loloto i ai, o le tele foi lena o lou naunau ina ia faatupuina lena faiā.

Ae mātau: E faatoʻā mafai ona iai se faiā mafana ma le Atua pe afai e te ‘lē papai atu i se mea leaga.’ Fesili ifo ia te oe lava: ‘Pe e lē o aofia ai i “mea leaga” e inosia e le Atua le masani lea o le ulaula tapaa? Po o le faaaogaina ea o lenei mea e “faaleagaina ai le tino,” ma oo ai ina ou aafia i lamatiaga uma o le soifua maloloina? Talu ai o Ieova o se Atua mamā, ma e “paia,” pe faamata e fiafia o ia i loʻu faaleagaina o aʻu lava ma le loto i ai i lenei auala?’ (1 Peteru 1:15, 16) Ia mātau foi le lapataiga a Paulo faasaga i le ‘faaleagaina o le agaga,’ po o mafaufauga o le loto o se tasi. Ia e fesili ifo: ‘Po o pulea e lenei masaniga leaga oʻu mafaufauga? Po o le a ou oo atu i se mamao ina ia faamalieina ai oʻu tuinanauga, ma atonu e oo ai ina lamatia loʻu soifua maloloina, loʻu aiga, e oo lava i loʻu tulaga i luma o le Atua? O le ā le tele ua oo i ai loʻu faaaogaina o le tapaa e faaleagaina ai loʻu olaga?’ I le feagai ai ma nei fesili e faaoso ai le lē fiafia, atonu o se mea lelei lea mo oe e maua ai le lototele e tuu ai!

A o lei aʻoaʻoina le upu moni, na totō ai e le au Lin le 1,300 o laau betel nut i lo la fanua. E ui lava e lima tausaga faatoʻā aogā ai laau mo fefaatauaiga, ae a oo loa ina fua uma mai, e ono faatalitalia e le au Lin se aofaiga tupe e 77,000 tālā Amerika i le tausaga. A o tau lata mai le uluai seleselega, na tatau i le au Lin ona faia se filifiliga tāua. Na la aʻoaʻoina e ala i le la suesuega o le Tusi Paia le tatau i Kerisiano ona faamamā i latou mai “mea uma e leaga ai le tino atoa ma le agaga” e ala i le alofia o le faaaogaina po o le faaauilumaina o na faiga masani lē mamā o le ulaula tapaa, o le faaaogaseseina o vailaau faasaina, ma le lamuina o le fua o le betel nut. (2 Korinito 7:1) O le ā o le a la faia?

Ona o omiga mai i se loto fuatia ifo lē lelei, na filifili ai le susuga ia Lin e lē toe faaauauina lana suesuega. Ae i le taimi lava lena, na faatau atu e le faletua o Lin betel nuts mai isi o la laau tuai ma maua mai ai se tupe mamā e sili atu ma le 3,000 tālā Amerika. O lenei tulaga ua na o se faataimuaga i mea o le a la ono maua pe afai e tuu pea a la laau. Ae peitai, na faaauau pea ona faalavelavea le susuga ia Lin ona o lona loto fuatia ifo.

Na tauivi o ia ma le mataupu seia oo ai i se tasi aso ina ua ia talosaga atu i Molimau i lona vaipanoa ina ia taina i lalo ana laau betel nut. Na faamalamalama atu e Molimau o ia e ana le faaiuga, o lea e tatau ai ona “ave i lana lava avega,” ma tago lava ia e tā i lalo laau. (Kalatia 6:4, 5) Na latou faalaeiau ia te ia e manatua le folafolaga i le 1 Korinito 10:13, lea e faapea: “Ua le maua outou e se faaosoosoga e ese i lo tagata; a ua faamaoni le Atua, o le na te le tuuina atu outou i le faaosoosoga e sili i se mea ua outou lavatia, a e sauni foi faatasi ma le faaosoosoga se mea e sao ai, ina ia outou lavā oono.” Na faamalamalama atu foi e Molimau ia te ia e faapea: “A matou tāina i lalo au laau mo oe, atonu e te toe salamō ma e tuuaia i matou i le ta i lalo o laau.” I se taimi puupuu mulimuli ane, na faateia le moe a le faletua o Lin i le leoleoā o le paʻō o le ʻili afi. Sa tāina i lalo laau e lana tane ma le fanau!

Na iloa e le susuga a Lin le faamaoni o Ieova i lana folafolaga. Na ia mauaina se galuega e lē faalavelavea ai lona loto fuatia ifo, lea e mafai ai ona avea o ia o sē vivii atu ia Ieova. Na papatiso o ia i se fonotaga matagaluega a Molimau a Ieova ia Aperila, 1996.