‘A Tele le Lulu, e Tele Foi le Selesele’
“O le ua itiiti ana saito e lulu, e itiiti foi ana e selesele mai; a o le na tele ana e lulu, e tele foi ana e selesele mai.”—2 KORINITO 9:6.
1. Ai se a ua avea ai Ieova le Atua o lē sili ona fiafia i le vateatea aoao?
O LO TATOU Atua o Ieova, o le “Atua manuia.” E le tioa ona o le tasi lea o mafuaaga ua avea ai o ia ma le Foai tele mai. Sa faamatala e lona Alo o Iesu Keriso: “E sili le manuia o le na te foai atu, i le manuia o le na te talia mai.” (1 Timoteo 1:11; Galuega 20:35) E leai se tasi e sili atu lana foai nai i lo o Ieova—i le aumaia lea o lona Alo e toatasi, o Lokou, seia oo mai i aso nei. O lea, ma le leai o soo se faaletonu o ia lava o le ua sili ona faafiafiaina i le vateatea aoao.
2, 3. (a) I a auala ua tele ai le lulu a le Atua? (e) Ai se a ua mafai ai ona faapea atu sa seleseleina ma o le a seleseleina foi e Ieova mea e tele?
2 O se mataupu silisili e tali faapena foi o loo faailoa mai i le 2 Korinito 9:6: “O le ua itiiti ana saito e lulu, e itiiti foai ana e selesele mai; a o le ua tele ana e lulu, e tele foi ana e silisili mai.” Maeu se tele o mea na luluina e Ieova le Atua e tusa ai ma ana galuega o le foafoaga! Ua taʻu ma e lana Afioga le faitau selau miliona fetu ua i ai. Pe a tatou tuvae i lenei lalolagi, maeu le uiga ese o le anoanoai o mea, o mea e i ai le ola ma mea e leai se ola, na faia e Ieova le Atua! O le mea moni ua faatumuina le lalolagi ‘i mea na ia foai mai.’ (Salamo 104:24) E le gata i lea ae maeu le tele o mea ua ia tuuina i o tatou mafaufau, i o tatou faalogona, ma o tatou tino! E moni lava na faia i tatou “e ala ai ona matautia ma ofo tele ai.”—Salamo 139:14.
3 E le mafesiligia lea mea, e tele nauā mea na luluina e Ieova. Ua faapea lava ona ia faia e le gata i ana galuega o le foafoaga a e faapea foi ma auala o loo ia feutagai ai ma ana mea faiola faalelalolagi, o lea pe ua tele ea ni mea ua ia seleseleina? Ioe, ua faapea lava! I le a le auala? i le auala faapea, sa ia te ia, o loo ia te ia, ma o le a ia te ia le anoanoai o mea faiola faamaoni o e o loo auauna ia te ia ona o lo latou alofa. O lo latou faia faapena, ua faafiafiaina ai le finagalo o Ieova, a e maise lava ua faamaonia ai faifaiga a le Tiapolo e pepelo.—Faataoto 27:11.
4 Ua faapefea ona faatatauina ai le mataupu silisili i le 2 Korinito 9:6 i taimi uma, e aofia ai ma o tatou aso?
4 Ua i ai i le Tusi Paia le tele o faamaoniga faapea, e amata mai lava i le Lokou, ua faapena foi ona tele mea ua luluina ma seleseleina e le toatele o auauna faamaoni a Ieova le Atua. O le mea tonu lava lena e ao ona i ai, talu ai o mataupu silisili a Ieova le Atua e faatatauina i taimi uma lava ma tagata taitoatasi uma. O lea, o le mataupu silisili e faatatau i le luluina e mafai ona faamaonia lona moni i lou lava olaga.
5, 6. (a) O a fili ua faafaigata ai mo i tatou ona tele ni mea e luluina? (e) O le a e tatau ona tatou nofo sauni e fai, ma i a matata o la tatou auaunaga paia?
5 E ui ina o Tusitusiga o loo tumu i mafaufauga ma faaaʻoaʻoga mo le tele o la tatou lulu, a e e le o se mea e faigofie ai ona fai. Ai se a ua faapea ai? Aua e toatolu fili ia o loo tetee malosi mai i lo tatou faia faapea. Muamua, o loo i ai o tatou lava faanaunauga tuufaasolo agai i le manatu faapito. Ua tatou faitau ai i le Kenese 8:21: “E ui lava ina leaga o manatu o loto o tagata e afua mai ina o tamaiti.” Ua faailoa mai foi e le Afioga a le Atua faapea o le loto o le tagata e taufaaʻoleʻole ma e taofigata. (Ieremia 17:9) O lona lua, e tatau ona tatou tauivi ma omiga mai lenei lalolagi amioleaga, o loo nofo toilalo i loo leaga. (1 Ioane 5:19) O lona tolu, o le Tiapolo lava ia ua nofo sauni nei e ʻaina i tatou pe a le leoleoina i tatou.—1 Peteru 5:8.
6 O e matua mataala ea i na fili e tolu? Ona o nei mea e faasaga tau mai, e tatau ai ona tatou naunau e ‘faalogo i aʻoaʻiga ma talia, ina ia avea ai i tatou ma e popoto i lo tatou lumanai.’ (Faataoto 19:20) O le mataupu silisili faapea afai e tele mea tatou te lulu e tele foi tatou te selesele ina mai, e faatatau lea i taualumaga uma o le auaunaga paia o loo auai molimau Kerisiano uma a Ieova. Ioe, tagai i le mea o le a tatou faia, ua tatou iloa e faatatau lenei mataupu silisili i: a tatou sueseuga totino, i lo tatou auai i sauniga, i a tatou tatalo, i lo tatou molimau atu i tulaga fuafuaina ma tulaga e lei fuafuaina, ma i a tatou faia faaleaiga.
Tele o le Lulu i Suesuega Faale-Tusi Paia
7, 8. (a) Ina ia tele e lulu i a tatou suesuega totino faale-Tusi Paia, o le a e tatau ona ia i tatou? (e) O a ni sini e tatau ona tatou faataatitia, ma e faapefea ona tatou ausia na sini?
7 Ina ia avea o ni faifeau fuatele a Ieova le Atua, e tatau ona tele la tatou lulu i a tatou suesuega totino faale-Tusi Paia. E ao ona tatou mananao ia mau se faanaunauga maoti faaleagaga, ia talisapaia faapea tatou te le o ola i na o mea faitino. Ona o le tele o mea e tausi ma galuega masani o le olaga loo omia ai i tatou, ua manaomia ai ni taumafaiga iloga ina ia matua iloa lelei ai o tatou manaoga faaleagaga. (Mataio 13:19) O le mea moni o le a sili ona lelei mo i tatou taitoatasi ona talisapaia le Afioga a le Atua lea foi sa i le faisalamo ina o ia tusia: “Ou te fiafia aʻu i lau afioga, faapei o le ua maua le vete tele.”—Salamo 119:162.
8 O le fesoasoani faapitoa i lenei mea o lo tatou utagia le o le faatonuga ina ia tatou ‘faaeteete i le auala tatou te savavali ai, ia le faapei o e valea, a ia faapei o e popoto, ia faaaogaina aso o lenei olaga.’ (Efeso 5:15, 16) Atonu e manaomia ona siakiina o le avea tusa ai ma lenei mea. Fesili ifo: Pe o oʻu faia ni aʻu fuafuaga i oʻu lava tulaga totino ina ia maua ai se taimi e faitau ai mekasini o le Olomatamata ma le Awake! pe a oo mai? Atonu e le o mafai ona maua pea se itula e tasi pe lua foi e faitauina ai nei tusi, a e o na o le mataala e mafai ai ona maua ni nai minute i inei ma inā e faitau ai se mataupu o le Tusi Paia po o se mataupu foi e se mekasini. E toatele Kerisiano ua fuafua e ala vave mo se 10 po o le 15 minute i aso taitasi e faitau i le taimi lea ua sili ona mataalia ai. Ua iloa e isi e tele ni mea e mafai ona latou faitauina pe a faimalaga i auala o femalagaiga. A e a oe?
9. Atonu e faapefea ona tele ni mea tatou te seleseleina mai ia tatou suesuega totino faale-Tusi Paia?
9 E ala i mea tatou te lulu ina i nei auala, e mafai foi ona tatou faamoemoe e seleseleina mai mea e tele. Faapefea? I le auala, o le a tatou maua ai se faatuatua malosi, se faamoemoe pupula, ma o le a fiafia ai foi ma maua ai se mafaufau mautinoa. A e sili ai i lena, o le a faaauupegaina ai i tatou e molimau atu i isi. E mafai ai foi ona tatou saosaolaumea i talanoaga tau faatupu ma fesoasoani ai i o tatou uso a o maua avanoa. Matau mai le 1 Timoteo 4:15, 16 po o le a le uiga atonu o le a oo i ai.
Tele le Lulu a o Auai i Sauniga
10. O a o tatou manatu e ao ona uiga aʻi e tusa ai ma a tatou sauniga?
10 Atonu o le a e fesili: E faatatau foi lenei mataupu silisili o le tele e lulu foi e selesele i lo tatou auai i sauniga a le faapotopotoga? E matuinoa lava e faapena! E ao ona tatou lagona e pei o le faisalamo o Tavita i lona faapea mai: “Na ou fiafia ina ua latou fai mai ia te au: “Tatou te ō i le fale o Ieova.” Ioe, e ao ona tatou lagona lo tatou fia tosina atu e faatasi ma o tatou uso.—Salamo 122:1.
11, 12 E faapefea ona tele la tatou lulu ma la tatou selesele i le auai i a tatou sauniga?
11 O le a le mea e manaomia e lena mai ia i tatou? O lona uiga ia auai e le aunoa ma le faamoni ia tatou sauniga faalevaiaso e lima, aua le faatagaina le loulouā o le tau po o sina faaletonu o le tino e avea ma faamolemolega e nofo ai i le fale. O le a le tele na oso faalava ane ai le tau- vevela pe malulu, timu pe laofie— e faalavelaveina ai lou auai i sauniga? A e peitai, o le tele o toatuga e ao ona tatou foia ina ia auai i sauniga, o le sili foi lena ona tele o faamanuiaga a Ieova e auamai i o tatou luga. E mafai foi ona tele mea tatou te lulu pe a vave oo mai ina ia maua ia talanoaga faalaeiau a o lei amataina sauniga, ma faapea foi ona faatuatuaai ai pe a tuua sauniga mo lena lava mafuaaga. O faapefea ona e faafetaui atu oe e tusa ai ma lenei? E ao ea ona taumafai e lulu ea sili atu ona tele? O le sauniuni lelei mo Suesuega o le Olomatamata ma isi sauniga e aafia ai foi. O le pogai mo lenei mea ona atonu e mafai foi ona tele la tatou lulu i a tatou tali pe a maua le avanoa.
12 O a auala tatou te faamoemoe e tele ai ni mea tatou te seleseleina mai i lenei? E le mafai ona tatou faia ni tali e faalaeiau ai pe afai tatou te lei faalaeiauina i tatou; e le mafai ona tatou faafiafia i le ua faanoanoa pe a le fiafia i tatou. Ioe, e le mafai ona faailoa atu i tatou ia tatou tali i sauniga pe a le faamalosia lo tatou lava faatuatua i upu moni tatou te tautala atu ai. E faigofie lava: “E faatamaoaigaina le tagata matamau; o ia foi lē faasūsū i nisi, e faasūsūina lava o ia.”—Faataoto 11:25.
Tele e Lulu i a Tatou Tatalo
13, 14 E faapefea ona mafai ona (a) tele la tatou lulu, (e) tele le selesele, e tusa ai ma a tatou tatalo?
13 O le mataupu silisili faale-Tusi o le tele e lulu e tele ai le selesele e faatatauina foi i a tatou tatalo totino. O a tatou tatalo ea e tautu i le mea e tasi, pe aʻoaʻo faatauloto, pe o le mea ea e sau moni mai le loto? O faaaofia ai ea e le gata i olega a e atoa foi ma viiga mai le loto ma le faafetai, ma, i taimi, o faatoga? Pe uigā moni ia i tatou le taua o le faaeaga o le tatalo? Tatou te sasaʻa atu ea o tatou loto i lo tatou Tamā faalelagi? Pe o le mea o faanatinati ona fai a tatou tatalo, po o le tele o taimi ua pisi naua ua le mafai ai ona tatalo? Ua faailoa mai e Tusi Paia Kerisiano Eleni faapea o le tatalo sa sili ona taua i le soifuaga o Iesu Keriso ma le aposetolo o Paulo.—Luka 6:12, 13; Ioane 17:1-26; Mataio 26:36-44; Filipi 1:9-11; Kolose 1:9-12.
14 O le tele o la tatou lulu i a tatou tatalo, o le tele foi lena o lo tatou faamoemoe e tele o le a tatou seleseleina mai i le taliina e Ieova o a tatou tatalo, ma e ala ai foi ona tatou maua o se faia lelei ma ia. O tatalo a le aiga e mafai ona tosina ai tagata uma ia lalata atu i lē o faia le tatalo. Sei teu foi i o tatou loto upu a Iesu i le Mataio 7:7 “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuʻituʻi atu; ona toina ai lea ia te outou.”
Tele e Lulu i la Tatou Faiva
15. O fea tonu lava atonu o le a avea ai le tele o le lulu, tele le selesele o se mea e fiafia ai?
15 Atonu e leai se isi tulaga e sili ai ona manino ma malamalama la tatou matua na i lo o la tatou molimau atu. O le mea moni, o le tele o taimi tatou te faaaluina ai, e faapena foi ona tele mea tatou te seleseleina e ala i mea fiafia tatou te asā, o toe asiga fuatele, ma le tele o suesuega faale-Tusi Paia i aiga, ua iu ai i le maua o ni tusi e faagaee ai e aumaia ai le faamalo.—2 Korinito 3:2.
16, 17 (a) O le tele o le lulu e tusa ai ma la tatou auaunaga i le fanua e manaomia ai le a mai ia i tatou? (e) I le faia faapea, o a iuga e mafai ona tatou faatalitalia?
16 A e peitai, o le tele o le lulu i le faiva i le fanua, o se mataupu e le na o se aofaiga a o mo se uiga lelei foi. Tatou te mananao ia “malosi le loto” pe a auai i le faiva. (Roma 12:11) E tatau ona tatou faafeiloai atu i tagata ma le saolotoga e tautala ai, i le laumata ataata mafana. E faatatau foi lena i lo tatou o atu mai lea fale i lea fale po o le auai foi i le molimau atu i ala tetele. Pe afai ua maua i la tatou gagana, o lo tatou fesoasoani fou o le tusi Reasoning From the Scriptures e ao ona fesoasoani ia i tatou uma ia sili atu ona agavaa ma faapea ai ona fuatele, ma seleseleina ai foi e sili atu mai taimi ma le malosi ua tatou faaaluina i le faiva.
17 Pe le o le tele foi o mea e lulu i la tatou faiva i le fanua, o lona uiga o le faamaoni lea e vaai po o fea tatou te maua ai se tagata loto naunau? E fesootai atu i lena o lo tatou talia o le tiute tauave e toe foi atu ai e asia ma atiina a e le naunau i lona tulaga e mafai ai ona amata se suesuega fale-Tusi Paia pe afai e mafai. E sili atu i lena, e tatau ona tatou faaeteete i na ia fausia ae i mea e le mu i le afi. O le uiga o lenei mea ia tatou aʻoaʻo ma le mautinoa, a e ia iloa foi le vaai i manatu o le tagata ma ia malamalama i ai, ia i ai foi le tomai e taumafai e to mai i fafo po o le a le faalogona o le tagata aʻoga o le Tusi Paia. Ua na o lo tatou lulu tele e tusa ia ma nei tulaga, o le a mafai ai ona tatou faamoemoe o le a maua ai ni uiga faa-Kerisiano o le a mafai ona tetee atu i lalo o osofaiga saua a Satani ma lana faiga o mea.—1 Korinito 3:12-15.
Tele e Lulu i Faia i le Aiga
18. O a faatonuga e ao ona teu i o tatou mafaufau e tusa ai ma a tatou faia faaleaiga?
18 O le mataupu silisili faatiokarate faapea tatou te selesele e tusa ma mea tatou te luluina e faapena foi ona faatatauina i le lio faaleaiga. I inei e manatua ai i o tatou manatu upu a Iesu i le Luka 6:38: “Ia outou foa atu, e foaiina mai ai ia te outou; e foai mai e i latou i lo outou lava ie pulupulu le fua lelei, e lolomi ma luluina, e tumu ma solo i tua. Auā o le fua tou te fuaina atu ai, e fuaina mai ai ia te outou.”
19. E faapefea i tane ma avā ona tele le lulu ma aoga e maua mai ai?
19 E tele lava avanoa e mafai ai e tane ma avā ona luluina mea e tele e ala i galuega alofa o le manatu i isi, ma le manatu faapito! Ua aumaia e le aposetolo o Paulo ni fautuaga aoga i le Efeso 5:22-23. Faamolemole faitau fuaiupu nei a o e manatunatu pe faapefea ona e luluina ni mea se tele. I lona tulaga lautele o se avā Kerisiano e gauai moni lava, e auaufaatasi, ma lagolagosua, ma i lena tulaga o le a faapena foi ona tele o mea na te seleseleina mai. I a auala? I le naunau ma le talisapaia loloto o ia e lana tane ua uunaia ai o ia e alofa ia te ia e pei o lona lava tino. E faapena foi, le tele e tatau ai i se tane Kerisiano ona uunaia o ia i le faaalia mai o fautuaga o lo uunaia mai i le 1 Peteru 3:7, ma le alofa e le manatu faapito o loo faamatilatila mai i le Efeso 5:28, 29, i lena tulaga, o le a mafai ai ona ia faamoemoe e seleseleina mai le gauai ma le lagolagosua faamaoni a lana avā.
20. E faapefea i le tele o le lulu ona faatatauina i le tausia o le fanau, ma faatasi ai ma a ni iuga?
20 E le tatau foi ona faagaloina la tatou tiute tauave i le tausia o a tatou fanau i aʻoaʻiga ma apoapoaiga a Ieova. (Efeso 6:4) E mautinoa lava, e muamua lenei mea i isi tiute faatiokarate ma faaeaga. E faanoanoa lava e faapea atu, o le mataupu silisili lenei ua faagaloina e isi matua Kerisiano. I le tasi itu, e tatau i matua ona nofo sauni e faataulagaina faafiafiaga ma tulaga o le maua o mea faitino e tele, aua le lelei o la laua fanau i faalogona ma le faaleagaga, ia faalu se taimi e sili ona tatau ma i latou ma faaalia i ai le alofa mo i latou. I le isi itu, e tatau i matua ona maumauai. Ua faatonuina i latou: “Ia e aʻoaʻi i lou atalii, ona e maua ai lea se filemu; e tupu ai le fiafia i lou loto.” O le luluina i nei auala, o le a faapena foi ona tele mea atonu ete seleseleina mai e ala i le i ai o se fanau e tausisi i le faamaoni o ē faaaloalo ma lalata atu ia te oe.—Faataoto 29:17.
Ia Avea ma Se e Selesele Aoga!
21, 22. O a auala eseese e mafai ai ona tele ai le lulu, tele le selesele e tusa ai ma la tatou auaunaga paia ma a tatou faia faaleaiga?
21 O lea, ua tatou vaaia nei la, o le mataupu silisili faapea tatou te selesele le mea na tatou lulu e faatatauina i matatā uma lava o le faa-Kerisiano. Afai e tele la tatou lulu i a tatou suesuega faale-Tusi Paia totino, o le a tatou selesele se faatuatua malosi, se faamoemoe pupula, ma e nofo sauni ai foi la tatou faiva. A tele la tatou lulu i a tatou sauniga, o le a faamalosia ai lo tatou lava faatuatua, ma o le a tatou faamalosia ai foi le faatuatua o isi. Afai e tele la tatou lulu e tusa ai ma a tatou tatalo, o le a tatou selesele mai ai se faia lelei ma lo tatou Tamā faalelagi ma talia foi e ia a tatou tatalo. Ma a tele la tatou lulu i le molimau atu, o le a tatou maua aoga totino, ma mafai ai ona faamoemoe o le a maua mai ni tusi e faamalo mai ai ia tatou taumafaiga.
22 E faapena lava, ona aua nei o tatou faagaloina e faatatauina foi lenei mataupu silisili i a tatou faia i le aiga. E ala i le tele o le lulu i le faaalia o le manatu alofa ma gaoioiga le manatu faapito, o i tatou i le avea o tane, avā, matua, po o fanau e mafai ona faamoemoe e seleseleina mai se olaga faaleaiga e tele se taui i aumea ma mea foi e oo i ai. O le a avatua ai foi se molimau lelei i e o i fafo, e faamalo mai ai i ala o loo tatou ola ai.
23. E sili ona tatou lelei pe a tatou utagia le a le fautuaga?
23 O lea sei fesili ifo le molimau Kerisiano ia a Ieova ia te ia lava: E mafai ea ona tele ni mea ou te lulu? O upu a Paulo i le 1 Tesalonia 4:1 e sili ona fetaui: “O lenei, le au uso e, o le toe upu lenei, matou te aioi atu ma apoapoai atu ia te outou ona o le Alii o Iesu Keriso, faapei ona talia e outou mai ia te i matou le uiga o le ala e tatau ona outou savavali ai, ia fiafia mai ai le Atua ia te outou, ia faasilisili pea i ai outou.” Ioe, o le mea moni, sei o tatou taumafai uma e luluina ni mea se tele e sili atu ina ia mafai foi ona tele ni mea tatou te seleseleina mai, mo le viiga o Ieova ma le faamanuiaga o i tatou lava ma o tatou uso.
Manatu mo Autaluga
◻ Ua faapefea ona faataʻitaʻia e Ieova le upu moni o loo maua le 2 Korinito 9:6?
◻ O le a e te faia ina ia sili atu ona tele ni mea e te seleseleina e tusa ai ma suesuega faale-Tusi Paia ma sauniga faa-Kerisiano?
◻ E faapefea ona e lulu ma selesele atoatoa e tusa ai ma le auaunaga i le fanua?
◻ O a tulaga poto atonu e mafai ona fesoasoani i lou aiga ia tele e lulu ma selesele mai ai ni mea se tele?