‘E Alofa le Atua i Lē Foai ma le Loto Malie’

O IEOVA ua faaalitino mai ai le aaofoai. O le mea moni ua faapea mai le Tusi Paia ua ia Foai maia “mea lelei uma e foaifuaina mai, atoa ma mea alofa uma e atoatoa ona lelei.” (Iakopo 1:17) Iloilo mo se faaaoaoga, mea na foafoaina e le Atua. Sa ia faia taumafa susua ma le matagofie, ae lē faapea na aunoa ma tofo eseese; o fugālaau felanulanuai, ae lē foliga pepē; o la goto felanulanuai, ae lē sesega vale. Ioe, o vala uma taitasi o le foafoaga a Ieova o loo atagia mai ai lona alofa ma le aaofoai. (Salamo 19:1, 2; 139:14) E lē gata i lena, o Ieova o Lē Foai ma le loto fiafia. E fiafia o ia e fai mea lelei mo ana auauna.—Salamo 84:11; 149:4.

Sa faatonuina tagata Isaraelu ina ia atagia atu le aao māfola o le Atua i a latou feutagaiga a le tasi i le isi. “Aua neʻi e faamaaa atu lou loto, pe uu mau lou lima i lou uso mativa,” na fai atu ai Mose ia te i latou. “E te matuā avatu lava ia te ia, aua foi le avatu ia te ia ma le tiga o lou loto.” (Teuteronome 15:7, 10) Ona o le foai atu sa tatau ona sau mai le loto, sa tatau la i tagata Isaraelu ona matuā fiafia i gaoioiga o le aaofoai.

E tai faapena foi le faatonuga ua aumai mo Kerisiano. O le mea moni, na fetalai Iesu, e maua le “fiafia i le foai atu.” (Galuega 20:35, NW) E fai soo o Iesu ma faaaoaoga i le foai ma le loto malie. Mo se faaaoaoga, ua lipoti mai e le Tusi Paia e faapea o i latou na avea ma ē talitonu i Ierusalema “ua faatau atu foi o latou fanua ma oloa, ma ua tufatufa le tau o ia mea i tagata uma, ua faatatau i le mativa o le tagata.”—Galuega 2:44, 45.

Peitai o nei tagata Iutaia limafoai na iu ina lē tagolima i latou. E lē o faamatala maia e le Tusi Paia po o le ā tonu le mafuaaga na latou oo ai i lea tulaga. E manatu nisi tagata popoto o le Tusi Paia e faapea atonu o le oge lea o loo taʻua i le Galuega 11:28, 29 na māfua ai. Po o le ā lava na pogai ai, ae sa matuā manaomia lava e Kerisiano i Iutaia se fesoasoani, ma sa manao Paulo ia faamautinoa ua tausia o latou manaoga. O le a faapefea la ona ia faia?

O se Aotelega mo Ē na Matitiva

Sa talosagaina e Paulo le fesoasoani mai i faapotopotoga e oo lava i Maketonia, ma sa ia faatulaga se aotelega ina ia faia mo Kerisiano ua faamativaina i Iutaia. Na tusi atu Paulo ia i latou i Korinito e faapea: “[E] pei ona ou poloai atu i ekalesia i Kalatia, ia faapea foi outou ona fai. O le aso muamua o lea vaisapati ma lea vaisapati, ia outou taitasi [“i lou lava fale,” NW] ma tuu ane ai ni ana mea, ia faatatau mea e teu ma lona manuia.”a—1 Korinito 16:1, 2.

Sa naunau Paulo ia vave ona auina atu nei fesoasoani i uso i Ierusalema, peitai sa tuai le tali mai a le au Korinito i faatonuga a Paulo. Aisea? Pe sa latou lē popole ea i mafatiaga o o latou uso i Iutaia? E leai, auā na iloa e Paulo e faapea o i latou i Korinito o loo iai le “faulai o mea uma . . . o le faatuatua, ma le upu, ma le iloa, ma le filigā uma.” (2 Korinito 8:7) E foliga mai sa latou pisi i le faia o isi mea tāua ia na taʻu atu e Paulo i lana uluai tusi ia i latou. Ae o le taimi lea ua faanatinati le tulaga o mea i Ierusalema. O lea ua faailoa atu ai e Paulo le mataupu i lana tusi lona lua i Korinito.

Talosagaina le Limafoai

Muamua lava, sa taʻu atu e Paulo i tagata Korinito e faatatau ia i latou i Maketonia, o ē na fai ma faataitaiga le auala na latou tali atu ai. Na tusi atu Paulo faapea: “Auā na tofotofoteleina i latou i puapuaga ua atili ai lo latou olioli, atoa ma lo latou mativa matuā tele, ua sili ai le faulai o lo latou matamau.” Sa lei manaomia ona uunai faamalosi tagata Maketonia e foai atu. Na i lo lena, fai mai Paulo: “Ua matuā aioi mai ia te i matou ina ia talia e i matou le mea alofa.” E mataina le foai ma le fiafia a le au Maketonia pe a tatou manatunatu i lo latou “mativa matuā tele.”—2 Korinito 8:2-4.

I le viiviia o tagata Maketonia, pe sa taumafai ea Paulo e faagaee i tagata Korinito le agaga tauva? E matuā leai lava, auā foi na ia iloa lelei e lē o le auala saʻo lea e uunaia ai. (Kalatia 6:4) E lē gata i lena, sa ia iloa e lē manaomia e Korinito ona masiasi i le faia o le mea saʻo. Na i lo lena, sa ia mautinoa e alolofa moni lava tagata Korinito i o latou uso i Iutaia ma faanaunau e foai atu i taumafaiga laveai. Sa ia faapea atu ia i latou: “O e na muai amataina e le na ona fai, a ua loto foi i ai talu le tausaga ua mavae.” (2 Korinito 8:10) O le mea moni, sa fai tagata Korinito ma faaaoaoga i nisi vaega o taumafaiga e fesoasoani atu. “Ua ou iloa lo outou loto fesoasoani, lea ua ou mitamita ai i luma o Maketonia,” na fai atu ai Paulo ia i latou ma toe faapea atu: “O lo outou maelega foi na faagaeetia ai le toatele o i latou.” (2 Korinito 9:2, NW) Ae, o lea la, sa manaomia e tagata i Korinito ona faatino mai lo latou maelega ma lo latou loto fesoasoani e ala i gaoioiga.

O lea la, na taʻu atu e Paulo ia i latou: “Ia taitoatasi ma foai e pei ona filifili i lona loto; aua ma le tiga, aua foi ma le faatauanauina; auā e alofa le Atua i le ua foai ma le loto malie.” (2 Korinito 9:7) O le faanaunauga la sa iai ia Paulo, e lē ia faamalosia tagata Korinito, auā e lē faigofie i se tasi ona foai ma le loto malie pe a faamalosia. E manino mai, sa manatu Paulo ua uma ona iai i uso le uunaiga saʻo, ua latou taitoatasi ma filifili e foai atu. E faaopoopo atu i lena, na taʻu atu e Paulo ia i latou faapea: “Afai ua i ai le loto fiafia, e talileleia lea, e tusa ma mea ua ia te ia, a e le tusa ma mea e le o ia te ia.” (2 Korinito 8:12) Ioe, afai e iai le loto fiafia—pe a uunaia le tagata e le alofa—e talia e le Atua mea na te ofoina atu, e tusa lava pe e foliga mai e laitiiti.—Faatusatusa i le Luka 21:1-4.

O Ē Foai ma le Loto Malie i Aso Nei

O taumafaiga e fesoasoani i Kerisiano Iutaia ua aumaia ai se faaaoaoga lelei tele mo o tatou aso. O loo faia e Molimau a Ieova se tauiviga o le talaʻiga i le lalolagi atoa, o le faaooina atu o meaʻai lelei i le faitau miliona o ē o loo matelaina faaleagaga. (Isaia 65:13, 14) Latou te faia lenei mea i le usiusitai i le faatonuga a Iesu: “O lenei, ia outou o atu e fai nuu uma lava ma soo, ma papatiso atu ia te i latou . . . ia outou aʻoaʻo atu ia te i latou ia tausi i mea uma ua ou fai atu ai ia te outou.”—Mataio 28:19, 20.

E lē faigofie le faataunuuina o lenei tofiga. E aofia ai le tausia o fale o misionare ma le sili atu i le selau nofoaga o lālā i le lalolagi. E aofia ai foi le fausiaina o Maota o le Malo ma Maota Fono ina ia iai ni nofoaga talafeagai mo tagata tapuai o Ieova e feiloai ai ma faalaeiau le tasi i le isi. (Eperu 10:24, 25) E iai foi taimi e saunia ai e Molimau a Ieova fesoasoani laveai i vaipanoa e faaleagaina i faalavelave faalenatura.

Manatunatu foi i le matuā taugata o le galuega lomitusi. I vaiaso taitasi, o se fuafaatatau e silia i le 22,000,000 kopi o Le Olomatamata ma le 20,000,000 kopi o le Ala Mai! e lomiaina. E faaopoopo atu i lenei sapalai faifai pea o taumafa faaleagaga le faitau miliona o tusi, o polosiua, ma lipine pue leo, ma kaseti vitiō o loo saunia i tausaga taitasi.

E faapefea ona lagolagoina uma lenei galuega? E ala i foai tauofo. E faia nei mea, e lē ina ia lauiloa i le lautele pe ona o ni faanaunauga manatu faapito, peitai ina ia faaauiluma ai le tapuaiga moni. O lea, o nei foai e maua ai le fiafia i lē o foai atu, faatasi ai ma le faamanuia a le Atua. (Malaki 3:10; Mataio 6:1-4) E oo lava i tamaiti o loo iai i Molimau a Ieova e latou te faaalia mai lo latou limafoai, o ē foai ma le loto malie. Mo se faaaoaoga, ina ua faalogo atu i le faatamaiaga ona o se afā i se tasi o vaipanoa i le Iunaite Setete, sa foai atu ai e Allison e fa tausaga le matua le $2. Sa tusi mai lana tusi e faapea: “Na pau lava lena o laʻu tupe sa faaputuputu, ou te iloa ua leiloloa uma mea taalo ma tusi ma pepe meataalo a tamaiti. Atonu e mafai ona tou faaaogaina lenei tupe e faatau ai se api mo se teineitiiti laitiiti e pei o aʻu le matua.” O Maclean e valu tausaga le matua, na tusi mai faapea ua ia fiafia lava ona e leai se uso na maliu i le afā. Na ia faapea mai: “E $17 laʻu tupe na maua mai i ufiufi o uili taavale sa ma faatauina atu ma loʻu tamā. Sa ou mafaufau i saʻu mea e faatau i laʻu tupe, ae teʻi ua ou manatuaina uso.”—Tagai foi i le pusa i le pito i luga.

E mautinoa lava, e olioli le finagalo o Ieova e silasila mai o loo faamuamua manaoga o lona Malo e ē iti ma ē matutua e ala i le ‘ava ia Ieova ia latou oa.’ (Faataoto 3:9, 10) O le mea moni lava, e leai se isi e mafai ona ia faaoaina Ieova, auā o ia e ana mea uma. (1 Nofoaiga a Tupu 29:14-17) Peitai o le lagolagoina o le galuega o se faaeaga lea e mafai ai e le tagata tapuai ona maua le avanoa e faaali atu ai lona alofa ia Ieova. Tatou te matuā faafetaia i latou uma o ē o loo uunaia i latou e o latou loto e faia ai faapea.

[Faaopoopoga i lalo]

[Pusa i le itulau 26, 27]

Auala ua Filifili ai Nisi e Foai Atu Meaalofa mo le Galuega i le Lalolagi Aoao

E toatele tagata latou te tuuesea se vaega tupe, po o se vaega faaagaga, se tino o tupe e lafo i pusa o loo faailogaina o: “Meaalofa mo le Galuega a le Sosaiete i le Lalolagi Aoao—Mataio 24:14.” E avatu e faapotopotoga i masina taitasi ia tupe i le ofisa ulu i Brooklyn, i New York, po o se ofisa o le lālā o lea lava vaipanoa.

O foai tauofo o tupe, e mafai ona aauina saʻo atu lava i le Treasurerʻs Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, pe aauina atu i le ofisa o le Sosaiete lena o loo vaavaaia lo outou atunuu. E mafai foi ona foai atu maatāua po o isi mea tāua. O na foai e tatau ona aauina atu faatasi ma se tusi puupuu e faamanino atu ai o lena foai o se foai patino lava.

Fuafuaga o Foai e Iai ma ni Tuutuuga

E mafai ona aauina atu i le Watch Tower Society se tupe e teuina ai i lalo o se faatulagaga faapitoa lea, afai e iai se manaoga totino a lē e ana le tupe, o le a toe faafoisia ia te ia lena foai. Mo nisi faamatalaga atili, faamolemole faafesootai le Treasurer’s Office i le tuatusi o loo taʻua i luga.

Foai ua Uma Ona Fuafuaina

E lē gata i foai tuusao tautupe ma fuafuaga o foai tautupe e iai ma ni tuutuuga, e iai foi isi auala e foai atu ai e aogā mo le auaunaga o le Malo i le lalolagi aoao. Ua aofia ai mea nei:

Inisiua: E mafai ona avea le Watch Tower Society ma faalapotopotoga e faaui i ai le inisiua o le ola o le tagata po o taui e maua pe a faamālōlō litaea pe penisiona le tagata.

Teuga Tupe: O teuga tupe, o tusi o teuga tupe e tiposi, po o ni vaega tupe a le tagata pe a faamālōlō litaea, e mafai ona tuu faamavaega i le Watch Tower Society pe totogi atu i ai pe a maliu le tagata e ana ia mea, e tusa ai ma faatulagaga manaomia a le faletupe a lea atunuu.

Oloa ma Pepa Faamaonia mo Tupe: O oloa ma pepa faamaonia mo tupe e mafai ona foai atu i le Watch Tower Society, a lē o se meaalofa e tuusao po o se fuafuaga e faapea o se tupe maua e faaauau pea ona totogi atu i le tagata e ana le foai.

Fanua ma Fale: O fanua ma fale e mafai ona faatauina atu, e mafai ona foai atu i le Watch Tower Society e ala i le faia o se meaalofa e tuusao po o le taofia lea ia faaauau ona nofo ai pea lē e ana, seia maliu. E ao i lena tagata ona faafesootai le Sosaiete a o ia lei faapepaina faaletulafono so o se fanua totino o le a ia foai atu mo le Sosaiete.

Uili ma Mavaega: E mafai ona faaui atu se mea totino po o se vaega tupe i le Watch Tower Society e ala i se uili ua faatulafonoina, pe avea foi le Sosaiete ma lē e mauaina le mavaega. O se mavaega e faia mo le manuia o se faalapotopotoga faalelotu e mafai ona maua ai faamanuiaga tau lafoga.

E pei ona faailoa mai e le faaupuga “foai ua uma ona fuafuaina” o nei ituaiga o foai e manaomia ai la ni fuafuaga lelei a lē e ana le foai. Ina ia fesoasoani i tagata taitoatasi o loo mananao e mauaina e le Sosaiete aogā e ala i nisi o vaega o le faatulagaga fuafuaina mo le foai, ua saunia ai nei e le Sosaiete se polosiua i le gagana Peretania ua faaulutalaina faapea Planned Giving to Benefit Kingdom Service Worldwide. Na tusia le polosiua e tali atu ai i le tele o fesili sa mauaina e le Sosaiete e tusa ai ma meaalofa, uili ma mavaega. O loo iai foi faamatalaga aogā faaopoopo e faatatau i fanua, fuafuaga tau tupe ma lafoga. Ma ua faatulagaina e fesoasoani i tagata taitoatasi i le Iunaite Setete o loo fuafua e faia se meaalofa faapitoa i le Sosaiete i le taimi nei, pe tuu se uili mo le taimi e maliu ai ina ia filifilia ai le mea e sili ona lelei ma auala aogā ina ia faia faapea i le manatunatu i o latou aiga ma tulaga totino.

Ina ua maeʻa ona faitauina le polosiua ma filifili faatasi ma i latou o loo galulue i le Ofisa o Foai ua Uma Ona Fuafuaina (Planned Giving Desk), ua toatele ai i latou ua mafai ona fesoasoani i le Sosaiete ma i le taimi e tasi ua faateleina ai faamanuiaga tau lafoga i le faia faapea. E tatau ona faafesootai atu le Ofisa o Foai ua Uma Ona Fuafuaina ma maua mai ai se kopi o so o se faamatalaga o loo maua e faatatau i so o se tasi o nei faatulagaga. O i latou e fia iloa le polosiua po o so o se tasi o nei faatulagaga mo foai ua uma ona fuafuaina, e tatau ona faafesootai le Ofisa o Foai ua Uma Ona Fuafuaina, i le tusi atu po o le telefoni atu, i le tuatusi o loo lisi mai lalo po o le ofisa o le Sosaiete o loo vaavaaia lo outou atunuu.

Planned Giving Desk

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (914) 878-7000

[Pusa i le itulau 28]

E Foai Foi Tamaiti ma le Loto Malie!

Ou te manao e avatu ia te outou lenei tupe ina ia fai ai nisi tusi mo i matou. O le tupe sa ou teuina mai i loʻu fesoasoani i loʻu tamā. Faafetai tele lava mo galuega fitā uma o loo outou faia.—Pamela, e fitu tausaga le matua.

Ua ou auina atu ia te outou lenei $6.85 e fesoasoani e fau ai nisi Maota o le Malo. Sa ou maua lenei tupe mai i aʻu vai tipolo sa faatau atu i le vaitau mafanafana na teʻa nei.—Selena, e ono tausaga le matua.

Sa iai laʻu matuāmoa sa fafaga na iu ina maua mai ai se toa ma se isi matuāmoa. Sa ou tuuina atu le moa mulimuli mo Ieova. Na iu ina fofoa mai ai isi moa e tolu, ua uma ona ou faatauina atu. O lea ua ou lafoina atu le tupe mo le galuega a Ieova.—Thierry, e valu tausaga le matua.

Na pau lava lena o laʻu tupe! Faamolemole faaaogā ma le atamai. Sa lei faigofie ona faaputuputu. O le $21 lena.—Sarah, e sefulu tausaga le matua.

Sa ou manumalo i se tofiga faaleaʻoga, ona sosoo lea ma loʻu alu i se tauvaga sa fai na aofia ai le atunuu. Na ou mauaina foi le faailoga muamua iina ma le faailoga lona lua i tauvaga mulimuli i le itumalo. O nei faailoga uma, sa ou mauaina ai tupe. Ou te manao e avatu se vaega o lena tupe mo le Sosaiete. Ou te manatu na ala ona ou manumalo i nei faailoga ona o le toleniga sa ou maua mai le Aʻoga o le Faiva Faatiokarate. Sa ou lagona le mautinoa e avatu ai laʻu lipoti i luma o faamasino o le tauvaga.—Amber, e ­vasega ono.

Ou te fia avatu ia te outou le mea lenei mo Ieova. Fesili ia te ia po o le ā le mea e faaaogā i ai. Na te silafia mea uma.—Karen, e ono tausaga le matua.

[Ata i le itulau 25]

O galuega a Molimau a Ieova e lagolagoina e meaalofa tauofo