Lomiga mo le Polokalame mo le Sauniga o le Faiva ma le Olaga Faa-Kerisiano
IUNI 3-9
ʻOA TAUTELE MAI I LE AFIOGA A LE ATUA | KALATIA 4-6
“ʻSe Tala Faafaatusa’ ma Lona Uiga mo i Tatou”
(Kalatia 4:24, 25) O nei mea o se tala faafaatusa; auā e faasino atu nei fafine i ni feagaiga se lua, o le tasi na faia i le Mauga o Sinai, lea na aumaia ai ni fanau e fai ma pologa, o Akara lea. 25 Ua faasino atu Akara iā Sinai, o se mauga i Arapi, ma ua tutusa o ia ma Ierusalema i aso nei, auā o loo nofo pologa o ia ma lana fanau.
it-1 1018 ¶2
Akara
E tusa ai o le faamatalaga a le aposetolo o Paulo, ua faaataina mai e Akara i lenei talafaatusa le nuu o Isaraelu faaletino, lea na noatia iā Ieova e ala i le feagaiga o le Tulafono lea na faavaeina i le mauga o Sinai, ma ua “aumaia ai ni fanau e fai ma pologa.” O le tulaga agasala o tagata, na lē mafai ai e le nuu ona tausisia āiāiga o lenā feagaiga. O le iai o tagata Isaraelu i lalo o le feagaiga o le tulafono e leʻi avea ai i latou ma tagata saʻoloto, ae na taʻusalaina ai o ni tagata agasala ua tatau i ai le oti. O lea, na avea i latou ma pologa. (Ioa 8:34; Ro 8:1-3) E tutusa Ierusalema i aso o Paulo ma Akara, auā o Ierusalema le laumua, na faaata mai ai le nuu o Isaraelu faaletino, ma ua avea o ia ma lana fanau o ni pologa. Ae o Kerisiano ua faauuina i le agaga paia, o fanau ia a le “Ierusalema i lugā,” le fafine faafaatusa a le Atua. O le Ierusalema i lugā e pei o Sara le fafine saʻoloto e leʻi faapologaina lava o ia. Peitaʻi, e pei ona sauāina Isaako e Isamaeli, e faapena foʻi ona sauāina le fanau a le “Ierusalema i lugā” lea na tuusaʻoloto e le Alo, e le fanau a le Ierusalema na faapologaina. E ui i lea, o le tuliesea o Akara ma lana tama ua faaata mai ai le teena e Ieova o Isaraelu faaletino e avea ma ona nuu.—Ka 4:21-31; tagaʻi foʻi i le Ioa 8:31-40.
(Kalatia 4:26, 27) A o Ierusalema i lugā e saʻoloto o ia, ma o ia o lo tatou tinā. 27 Auā ua tusia: “Ia fiafia oe le fafine pā e lē fanau; inā alaga ia ma le olioli oe le fafine e leʻi tigā i le tigā a fanau; auā e toʻatele atu le fanau a le fafine ua tuulafoaʻiina, nai lo o le fafine e nofotane.”
Ia Mausalī Lou Faatuatua i le Malo
11 Sa iai se faataunuuga faaletino o le feagaiga ma Aperaamo i ē na tupuga mai iā te ia, ina ua latou ulu atu i le Nuu Folafolaina. Ua taʻua i le Tusi Paia e iai foʻi se faataunuuga faaleagaga o lenā feagaiga. (Kala. 4:22-25) Na faagaeeina le aposetolo o Paulo ma ia taʻua e faapea, o le vaega autū o le fanau a Aperaamo, o Iesu Keriso. O le vaega lona lua e faasino atu i Kerisiano faauuina e 144,000. (Kala. 3:16, 29; Faaa. 5:9, 10; 14:1, 4) E faasino atu le fafine i “le Ierusalema i lugā,” le vaega faalelagi o le faalapotopotoga a le Atua, lea e faia aʻe i foafoaga agaga faamaoni. (Kala. 4:26, 31) E pei ona folafolaina mai i le feagaiga ma Aperaamo, o le a aumaia e le fanau a le fafine faamanuiaga i tagata.
(Kalatia 4:28-31) Uso e, o i tatou o le fanau o le folafolaga e pei foʻi o Isaako. 29 O lē na fanau mai i le auala masani, na sauā o ia i na aso i lē na fanau mai e ala i le agaga, e faapena foʻi i aso nei. 30 Ae peitaʻi, o le ā le mea ua fai mai ai Tusitusiga Paia? “Inā tuliese ia le auauna teine ma lana tama, auā e lē mafai ona avea uma ma suli le tama a le auauna teine faatasi ma le tama a le fafine saʻoloto.” 31 O le mea lea le ʻauuso e, o i tatou o fanau a le fafine saʻoloto, ae lē o le auauna teine.
Saʻiliʻiliga Loloto mo ʻOa Faaleagaga
(Kalatia 4:6) Ona o outou o atalii, ua auina mai ai e le Atua i totonu o o tatou loto le agaga paia lea na tuuina atu i lona Alo, ma ua alaga mai e faapea: “Ava, le Tamā e!”
E te Silafia?
Aiseā na faaaogā ai e Iesu le faaupuga “Ava, loʻu Tamā e,” ina ua tatalo iā Ieova?
O le upu faa-Arama ʼab·baʼʹ e mafai ona uiga atu i le “tamā” po o le “Tamā e.” I taimi taʻitasi e tolu ia e aliaʻe mai ai lea faaupuga i le Tusi Paia, e lē gata o le vaega o se tatalo, ae o loo faaaogā foʻi e faasino atu i le Tamā i le lagi, o Ieova. O le ā le uiga o lenei upu?
Ua taʻua i le International Standard Bible Encyclopedia e faapea: “I le gagana i aso faisoo i taimi o Iesu, sa tele lava ina faaaogā le upu ʻAva, le Tama e,ʼ o se faaupuga o se faiā vavalalata, ma o se faaupuga e faaalia ai le faaaloalo o tamaiti i o latou tamā.” O se faaupuga o lagona faapelepele e tautala ai se tasi i sona tamā, ma o se tasi lea o upu e muamua lava ona aʻoaʻoina e se tamaitiiti. Sa faaaogā e Iesu lenei faaupuga i sana tatalo faatauanau i lona Tamā. I le faatoʻaga i Ketesemane, i ni nai itula a o leʻi maliu o ia, na faalagi ai e Iesu Ieova i lana tatalo i upu e faapea, “Ava, loʻu Tamā e.”—Mareko 14:36.
Ua taʻua atili i le lomifefiloi o le Tusi Paia na taʻua i luga e faapea, “O le faaaogāina o le faaupuga ʻAva, le Tamā e,ʼ o se auala e talanoa ai i le Atua, sa seāseā ona faaaogāina i tusi faa-Iutaia sa iai i vaitaimi o Eleni ma Roma, ona e foliga mai o se lē faaaloalo le talanoa i le Atua i lenei faaupuga soona māfana tele.” Peitaʻi, “o le faaaogāina . . . e Iesu o lenei faaupuga i lana tatalo, o se faamautinoaga lea e taʻu mai ai le iai o se la faiā vavalalata ma le Atua.” O isi mau e lua o loo taʻua ai le upu “Ava, le Tama e,”—i tusitusiga uma a le aposetolo o Paulo—ua faaalia mai ai sa faaaogā foʻi e Kerisiano i le uluaʻi senituri lea faaupuga i a latou tatalo.—Roma 8:15; Kalatia 4:6.
(Kalatia 6:17) O lea, aua neʻi faalavelave mai se tasi iā te aʻu, auā ua ou tauave i loʻu tino le faailoga o se pologa a Iesu.
E te Silafia?
O le ā le uiga o upu a le aposetolo o Paulo ua ia tauave i lona tino “le faailoga o se pologa a Iesu”?—Kalatia 6:17.
▪ Atonu na eseese manatu o tagata o le uluaʻi senituri i na upu a Paulo. O se faaaʻoaʻoga, sa faaaogā i aso anamua se uʻamea aasa e faailoga ai pagota o le taua, ʻaufaomea o malumalu ma pologa na sosola. Ina ua faia faapea i tagata, sa manatu i ai i le faailoga o se luma mo i latou.
Peitaʻi, e lē o taimi uma na manatu ai i na faailoga e leaga. O le toʻatele o tagata anamua na faaaogā na mea e iloa ai o i latou o ni tagata o se ituaiga po o se lotu. O se faaaʻoaʻoga, e tusa ai o le Theological Dictionary of the New Testament, “na iloa ua tuuina atu tagata Suria i atua o Hatata ma Atakati, e ala i faailoga na susunu i o latou tapulima po o ua . . . Na susunu se ata o se laulaau i tino o ē e tapuaʻi iā Dionysus.”
Ua faapea mai le toʻatele o le ʻaufaitofā i aso nei, sa faasino atu Paulo i maʻila i lona tino na māfua mai i sauāga na oo iā te ia, a o fai lana galuega faamisionare. (2 Korinito 11:23-27) Peitaʻi, atonu sa faasino atu Paulo i lona olaga lea na iloa ai o ia o se Kerisiano, ae e lē o ni maʻila o le tino.
Faitau Tusi Paia
(Kalatia 4:1-20) Ou te fai atu foʻi e faapea, a o laʻitiiti le suli, e leai lava se mea e ese ai o ia ma le pologa, e ui lava o ia o le alii o mea uma lava, 2 ae ua pule iā te ia o tane ma auauna pule seʻia oo i le aso na muaʻi tofia e lona tamā. 3 Na faapea foʻi a o tatou laiti, na faapologaina pea i tatou i mataupu faavae a le lalolagi. 4 Ae ina ua atoa le taimi na atofaina, ona auina mai ai lea e le Atua o lona Alo, o lē na fanau mai i se fafine ma sa nofo i le tulafono, 5 ina ia faasaʻolotoina i latou o ē e nonofo i le tulafono e ala i le faatauina o i latou, ina ia avea foʻi i tatou ma ataliifai. 6 Ona o outou o atalii, ua auina mai ai e le Atua i totonu o o tatou loto le agaga paia lea na tuuina atu i lona Alo, ma ua alaga mai e faapea: “Ava, le Tamā e!” 7 O lea, ua lē toe avea ai oe ma pologa, a o le atalii; afai o oe o le atalii, o le suli foʻi lea ona o le Atua. 8 Ae peitaʻi, ina o outou lē iloa le Atua, na outou nofo pologa ai i mea e lē o ni atua. 9 A o lenei ua outou iloa le Atua, ae o le mea tāua, ua iloa outou e le Atua, e faapefea la ona outou toe liliu atu i mea muamua e faatauvaa ma lē aogā, ma mananaʻo e toe fai outou ma pologa i na mea? 10 Ua outou matuā naunau e faamanatu aso, ma masina, ma tau, ma tausaga. 11 Ou te popole iā te outou, ina neʻi iʻu ina lē aogā laʻu galuega na faia iā te outou. 12 Uso e, ou te ʻaiʻoi atu iā te outou, Ia outou pei o aʻu, auā na ou pei foʻi o outou. E leai se mea sesē na outou faia iā te aʻu. 13 Ae ua outou iloa, o loʻu maʻi na ala ai ona ou muaʻi folafola atu le tala lelei iā te outou. 14 E ui lava o se tofotofoga iā te outou loʻu maʻi, ae e tou te leʻi agaleaga pe ʻinoʻino mai iā te aʻu; a ua outou talia aʻu faapei o se agelu a le Atua, e pei foʻi o Keriso Iesu. 15 O fea ea lo outou fiafia na iai muamua? Auā ua ou iloa, pe ana outou mafaia, semanū ua outou sali ese o outou mata ma aumai iā te aʻu. 16 O lea la, po ua avea ea aʻu ma o outou fili auā ua ou taʻu atu le upu moni iā te outou? 17 E lē lelei le māfuaaga ua latou naunau atu ai iā te outou, ma ua mananaʻo ai e vavaeese outou mai iā te aʻu, ina ia outou naunau atu iā i latou. 18 Ae e lelei pe a naunau atu isi iā te outou i taimi uma lava ona o se māfuaaga lelei, ae e lē na o le taimi lea ou te iai iā te outou, 19 si aʻu fanau e, ua ou tigā ona o outou, e pei o le tigā o se fafine o le a fanau, seʻia afuafua Keriso i totonu iā te outou. 20 Ae maʻimau pe ana tatou faatasi i le taimi nei, ma ou tautala atu iā te outou i se leo mālū, auā ua ou lē iloa le mea a fai iā te outou.
IUNI 10-16
ʻOA TAUTELE MAI I LE AFIOGA A LE ATUA | EFESO 1-3
“Le Pulega a Ieova ma Mea ua Faataunuuina Ai”
(Efeso 1:8, 9) O le mea lenā na ia matuā foaʻi mai ai iā i tatou, faatasi ma le atamai uma ma le faautauta, 9 ina ua ia faailoa mai iā i tatou le mea lilo paia o lona finagalo. O lona finagalo lenei e tusa ma lona faanaunauga
it-2 837 ¶4
Mea Lilo Paia
Le Malo Faa-Mesia. I tusitusiga a Paulo, o loo ia faamatala manino ai le faaaliga i le mea lilo paia e faatatau i le Keriso. I le Efeso 1:9-11, na talanoa ai Paulo e faatatau i le faailoaina mai e le Atua o “le mea lilo paia” o lona finagalo. Na ia faapea mai: “O lona finagalo lenei e tusa ma lona faanaunauga mo se pulega i le atoaga o le taimi na atofaina, o lona uiga, ina ia aoaoina ai mea uma lava ma toe faatasia iā Keriso, o mea o loo i le lagi ma mea o loo i le lalolagi. Ioe, ua aoaoina mea uma iā te ia ina ia matou autasi ma ia, o i matou foʻi ua tofia e avea ma suli, auā na muaʻi tofia i matou e tusa ma le finagalo o lē ua galueaʻiina mea uma, e tusa ma lana filifiliga.” O lenei “mea lilo paia” e aofia ai se pulega, o le Malo faa-Mesia lea o le Atua. “O mea o loo i le lagi” lea na taʻua e Paulo, e faasino i ē o le a avea ma suli faatasi ma Keriso i le Malo i le lagi. Ae o “mea o loo i le lalolagi,” o ona tagatānuu i le lalolagi. Na faailoa atu e Iesu i ona soo o lenei mea lilo paia e fesootaʻi atu i le Malo, ina ua ia fetalai: “Ua tuuina atu iā te outou mea lilo paia o le malo o le Atua.”—Mar 4:11.
(Efeso 1:10) mo se pulega i le atoaga o le taimi na atofaina, o lona uiga, ina ia aoaoina ai mea uma lava ma toe faatasia iā Keriso, o mea o loo i le lagi ma mea o loo i le lalolagi. Ioe, ua aoaoina mea uma iā te ia
“O Ieova e Toʻatasi Lava Ia” ua Aoaoina Lona ʻAuaiga
3 Na faailoa atu e Mose iā Isaraelu: “O Ieova lo tatou Atua, o Ieova e toʻatasi lava ia.” (Teu. 6:4) E gaoioi Ieova e faataunuu lana fuafuaga. Ua ia sauniunia ana foafoaga i le lagi ma le lalolagi ina ia autasia o se aiga e tasi. E taʻua nei sauniuniga o “se pulega.” (Faitau le Efeso 1:8-10.) O lenei pulega e lua ona vaega. O le vaega muamua ua sauniunia ai le vaega faauuina, ina ia soifua i le lagi i lalo o le taʻitaʻiga a lo latou Ulu o Iesu Keriso. Na amata lenei vaega i le Penetekoso 33 T.A., ina ua amata ona aoaoina e Ieova i latou e pule faatasi ma Keriso i le lagi. (Galu. 2:1-4) Ua latou iloa ua vaetamaina i latou e avea ma “fanau a le Atua,” ona ua taʻuamiotonuina i latou i le taulaga togiola a Keriso.—Roma 3:23, 24; 5:1; 8:15-17.
4 Ua sauniunia e le vaega lona lua o le pulega, i latou o le a ola i le lalolagi Parataiso i le Malo faa-Mesia a Keriso. O le a avea le “motu o tagata e toʻatele” ma faavae o lenā vaega. (Faaa. 7:9, 13-17; 21:1-5) O le a faamaonia atili e le sauniuniga o le toetū lo tatou autasi. A o faagasolo le Pulega o le Afe Tausaga, o le a ola faatasi le motu o tagata e toʻatele ma le faitau piliona o i latou o le a toe faatutūina mai. (Faaa. 20:12, 13) I le iʻuga o le afe tausaga, o le a tuuina atu ai “mea o loo i le lalolagi” i le tofotofoga mulimuli. O i latou o le a faamaonia lo latou faamaoni, o le a vaetamaina e avea ma “fanau a le Atua” i le lalolagi.—Roma 8:21; Faaa. 20:7, 8.
Saʻiliʻiliga Loloto mo ʻOa Faaleagaga
(Efeso 3:13) O le mea lea ou te talosaga atu ai, ia aua neʻi outou faavaivai i nei puapuaga ua oo iā te aʻu ona o outou, auā o nei mea e faamamaluina ai outou.
Taofimau le Mamalu Mai le Atua
15 O lo tatou tutumau, o se tasi lea o auala e fesoasoani ai i isi e maua le mamalu o le Atua. Na tusi Paulo i le faapotopotoga i Efeso e faapea: “Ou te talosaga atu ai, ia aua neʻi outou faavaivai i nei puapuaga ua oo iā te aʻu ona o outou, auā o nei mea e faamamaluina ai outou.” (Efe. 3:13) Na faapefea i puapuaga o Paulo ona faamamaluina ai le faapotopotoga i Efeso? O lona auauna i ona uso e ui i puapuaga, na faailoa atu ai e sili ona tāua i le olaga o se Kerisiano lana auaunaga. Pe ana faavaivai Paulo, atonu e ono mafaufau uso e lē tāua la latou faauōga ma Ieova, o la latou faiva, faapea lo latou faamoemoe. O le tumau o Paulo, na faailoa atu ai o le avea ma soo o Keriso e sili atu nai lo o se isi lava faataulaga.
(Efeso 3:19) ma ia iloa le alofa o Keriso lea e sili atu i le poto, ina ia faatutumuina outou i le tumu uma lava ua foaʻi mai e le Atua.
“Ia Iloa Foʻi le Alofa o Keriso”
21 O le upu Eleni ua faaliliuina i le “ia iloa” o lona uiga, ia iloa “i se tulaga aogā, e ala i le faatinoina.” E mafai ona tatou faaalia le alofa i le auala foʻi na faaalia ai e Iesu. E faapefea? Ia fesoasoani atu ma le lē manatu faapito i isi, ia fesoasoani atu ma le alofa i o latou manaʻoga, ma ia moni lo tatou faamagaloina o ni o latou sesē. O le faia faapea, o le a mafai ai ona tatou malamalama lelei i ona faalogona. Ona o le faatinoina o nei mea, ua tatou ʻiloa ai le alofa o Keriso ua silisili ese e lē mailoa.’ Aua lava neʻi galo iā i tatou, o le tele o lo tatou faataʻitaʻi atu iā Keriso, o le atili foʻi lea ona tatou faalatalata atu i lē ua matuā faataʻitaʻia lelei e Iesu, o Ieova, lo tatou Atua alofa.
Faitau Tusi Paia
(Efeso 1:1-14) O aʻu o Paulo, o le aposetolo a Keriso Iesu e ala i le finagalo o le Atua, o le tusi lenei i le ʻaupaia o i Efeso ma ē faamaoni ua autasi ma Keriso Iesu: 2 Tau ina ia iā te outou le agalelei faifua ma le filemu mai i le Atua lo tatou Tamā, ma le Alii o Iesu Keriso. 3 Ia viia le Atua, o le Tamā lea o lo tatou Alii o Iesu Keriso, auā ua ia faamanuiaina i tatou i manuia faaleagaga uma i mea o i le lagi, i le autasi ma Keriso, 4 auā a o leʻi faavaeina le lalolagi, na ia filifilia ai i tatou ia autasi ma Keriso, ina ia paia i tatou ma ia lē ponā i ona luma i le alofa. 5 Auā na ia muaʻi tofia i tatou e avea ma ona lava ataliifai e ala iā Iesu Keriso, e tusa ma le mea ua ia finagalo malie i ai, 6 e viia ai lona agalelei faifua lea e mamalu, na ia foaʻi mai ma le agalelei iā i tatou e ala i lona Alo pele. 7 Ua ia faasaʻolotoina i tatou i le togiola e ala i lona toto, ioe, o le faamagaloina o a tatou agasala e tusa ma le matuā tele o lona agalelei faifua. 8 O le mea lenā na ia matuā foaʻi mai ai iā i tatou, faatasi ma le atamai uma ma le faautauta, 9 ina ua ia faailoa mai iā i tatou le mea lilo paia o lona finagalo. O lona finagalo lenei e tusa ma lona faanaunauga 10 mo se pulega i le atoaga o le taimi na atofaina, o lona uiga, ina ia aoaoina ai mea uma lava ma toe faatasia iā Keriso, o mea o loo i le lagi ma mea o loo i le lalolagi. Ioe, ua aoaoina mea uma iā te ia 11 ina ia matou autasi ma ia, o i matou foʻi ua tofia e avea ma suli, auā na muaʻi tofia i matou e tusa ma le finagalo o lē ua galueaʻiina mea uma, e tusa ma lana filifiliga, 12 ma e ala iā i tatou o ē na muamua ona faamoemoe iā Keriso, ua viia ma faamamaluina ai le Atua. 13 Ua outou faamoemoe foʻi iā te ia ina ua outou faalogo i le upu moni, o le tala lelei lea i lo outou faaolataga. Ina ua outou talitonu, ona faamaufaailogaina ai lea o outou e ala iā te ia i le agaga paia lea na folafolaina mai, 14 o le faamaoniga lea na tuuina mai muamua o lo tatou tofi, ina ia faasaʻolotoina ai tagata o le Atua e ala i le togiola, ina ia viia ai lona mamalu.
IUNI 17-23
ʻOA TAUTELE MAI I LE AFIOGA A LE ATUA | EFESO 4-6
“Ia Oofu i le Ofutau Atoatoa Mai i le Atua”
(Efeso 6:11-13) Ia oofu i le ofutau atoatoa mai i le Atua, ina ia mafai ai ona outou tutū mausalī e tetee atu i togafiti a le Tiapolo; 12 auā tatou te lē o tau ma tagata a o malo, ma pule, ma taʻitaʻi o le lalolagi o loo pulea lenei lalolagi pogisa, ma agaga leaga uma i mea o i le lagi. 13 O le mea lea, ia oofu ai i le ofutau atoatoa mai i le Atua, ina ia mafai ona outou tetee atu pe a oo i le aso leaga, ma ia outou tutū mausalī ai pe a uma ona outou faia māeʻaeʻa o nei mea uma.
Talavou—Ia Tutū Mausalī e Tetee Atu i le Tiapolo
NA FAATUSA e le aposetolo o Paulo o tatou olaga o ni Kerisiano i ni fitafita o loo tau i se taua. O loo tatou tau i se taua faaleagaga, ma e iai moni lava o tatou fili. O Satani ma temoni o ni fili malolosi ma e tele lo latou tomai. Atonu e foliga mai e lē mafai ona tatou manumalo iā i latou, aemaise lava talavou Kerisiano. E ono foliga atu e leai so latou puipuiga. Pe e mafai ona latou manumalo i nei agaga leaga malolosi? Ioe e mafai, ma o loo latou manumalo i lenei taua. Aiseā? Talu ai e latou te ʻmaua pea le mana mai i le Alii.’ Peitaʻi, e lē tau na o lo latou faalagolago i le mana o le Atua. Ua faaauupegaina i latou mo lenei taua. I le pei o fitafita e toleni lelei, ua latou “oofu i le ofutau atoatoa mai i le Atua.”—Faitau le Efeso 6:10-12.
(Efeso 6:14, 15) O lenei, ia tutū mausalī, a o fusia o outou sulugātiti i le upu moni, ma oofu i le ufifatafata o le amiotonu, 15 ia faaseevaeina o outou vae e nofosauni e talaʻi le tala lelei o le filemu.
Talavou—Ia Tutū Mausalī e Tetee Atu i le Tiapolo
4 I se tulaga talitutusa, o upu moni o loo tatou aʻoaʻoina mai i le Afioga a le Atua e puipuia ai i tatou mai i lamatiaga faaleagaga ia e māfua mai i aʻoaʻoga pepelo. (Ioa. 8:31, 32; 1 Ioa. 4:1) O le tele e tatou te naunau ai i upu moni mai i le Tusi Paia, o le faigofie foʻi lenā ona tatou ofuina o lo tatou “ufifatafata,” po o le ola lea i tapulaa amiotonu a le Atua. (Sala. 111:7, 8; 1 Ioa. 5:3) O lo tatou mauaina foʻi o se malamalamaga saʻo i upu moni mai i le Afioga a le Atua, o le a mafai ai ona tatou tutū atu ma le lototetele e puipui na upu moni mai i tagata tetee.—1 Pete. 3:15.
7 Maʻeu le talafeagai o lenā faataʻitaʻiga o le auala e mafai ai e tapulaa amiotonu a Ieova ona puipuia o tatou loto! (Faata. 4:23) E lē fesuiaʻia e se fitafita le ufifatafata e faia mai i uʻamea malolosi mo se isi ufifatafata e faia mai i ni uʻamea vaivai. E faapena foʻi ona tatou lē mananaʻo e suia tapulaa amiotonu a Ieova ina ia fetaui ma mea e tatou te manatu e saʻo. E lē lava le atamai o loo iā i tatou e puipuia ai o tatou loto. (Faata. 3:5, 6) O le māfuaaga lea e manaʻomia ai ona tatou faamautinoa mai i lea taimi i lea taimi, o loo puipuia pea o tatou loto e lo tatou “ufifatafata.”
10 Na fesoasoani seevae o fitafita Roma iā i latou e savavali ai i le taua. I se tulaga talitutusa, e fesoasoani foʻi seevae faafaatusa o loo faia e Kerisiano e latou te folafola atu ai le feʻau o le filemu. (Isa. 52:7; Roma 10:15) Peitaʻi, e manaʻomia le lototele e talaʻi atu ai pe a maua le avanoa. Ua faapea mai Bo e 20 tausaga, “Na ou fefe e talaʻi i tamaiti o la matou vasega. Sa ou lagona le māsiasi. Ae pe a ou toe mafaufau i ai, ou te lē iloa pe aiseā na ou mā ai fua. O le taimi lenei ua ou fiafia e talaʻi i isi.”
(Efeso 6:16, 17) A o le mea e sili ona tāua, ia outou ave le talita telē o le faatuatua, lea e mafai ai ona outou tineia ai aū fanafana mū uma a lē o loo leaga. 17 Ia talia foʻi le puloutau o le faaolataga, ma le pelu a le agaga, o le afioga lea a le Atua,
Talavou—Ia Tutū Mausalī e Tetee Atu i le Tiapolo
13 O nisi o “aū fanafana mū” e ono faaaogā e Satani e osofaʻia ai oe, o tala pepelo e faatatau iā Ieova e faapea, e lē manatu mamafa ma alofa mai o Ia iā te oe. E tauivi Ida e 19 tausaga ma faalogona o le leai o se aogā. Ua ia faapea mai, “E masani ona ou manatu e lē o vavalalata mai Ieova iā te aʻu ma e lē manaʻo e avea ma aʻu Uō.” E faapefea ona ia taulimaina na ituaiga o mafaufauga? Ua faapea mai Ida: “E fesoasoani sauniga e matuā faamalosia ai loʻu faatuatua. E masani lava e na o loʻu auai i sauniga ae e lē faia ni aʻu tali, ma le manatu e leai se isi e fia faalogo mai i ni aʻu tali. Ae o le taimi lenei, ou te sauniuni mo sauniga ma taumafai e fai ni aʻu tali se lua pe tolu. E faigatā, ae ou te lagona le fiafia pe a ou faia faapea. E matuā faalaeiauina aʻu e uso ma tuafāfine. O so o se taimi lava e uma ai le sauniga, ou te lagonaina le alofa o Ieova iā te aʻu.”
16 E pei lava ona puipuia e se puloutau le faiʻai o se fitafita, e mafai foʻi e lo tatou “faamoemoe i le faaolataga” ona puipuia o tatou mafaufau. (1 Tesa. 5:8; Faata. 3:21) E fesoasoani le faamoemoe iā i tatou ina ia taulaʻi atu ai pea i folafolaga a le Atua, ma iai se vaaiga saʻo i o tatou faafitauli. (Sala. 27:1, 14; Galu. 24:15) Ae ina ia mafai ona aogā lo tatou “puloutau,” e tatau ona fai le pulou ae e lē o le uu i o tatou lima.
20 Ua faatusaina e Paulo le Afioga a le Atua i se pelu ua tuuina mai e Ieova iā i tatou. Ae e manaʻomia ona tatou iloa le auala e faaaogā ai ma le poto pe a puipuia o tatou talitonuga, pe fetuunaʻi foʻi o tatou manatu. (2 Kori. 10:4, 5; 2 Timo. 2:15) E faapefea ona e faaleleia ou tomai i le auala e faaaogā ai le Afioga a le Atua? Ua faapea mai Sebastian e 21 tausaga, “Pe a fai laʻu faitauga Tusi Paia, e taʻitasi fuaiupu ou te tusiina i lalo mai i mataupu taʻitasi. O loo oʻu faia se lisi o mau e sili ona ou fiafia i ai. O le faia faapea, e fesoasoani iā te aʻu e atili malamalama ai i manatu o Ieova.” Ua faapea mai Daniel lea na taʻua i se tasi o palakalafa, “Pe a fai laʻu faitauga Tusi Paia, ou te filifilia mau ou te manatu o le a fesoasoani i tagata ou te feiloaʻi i ai i le talaʻiga. Ua ou mātauina e talilelei mai tagata pe a vaai mai e te matuā naunau i le Tusi Paia, ma faia le mea sili e fesoasoani atu ai iā i latou.”
Saʻiliʻiliga Loloto mo ʻOa Faaleagaga
(Efeso 4:30) Aua foʻi tou te faatigā i le agaga paia o le Atua, ua faamaufaailogaina ai outou mo le aso e faasaʻolotoina ai e ala i le togiola.
it-1 1128 ¶3
Paia
Agaga Paia. O le mana galue po o le agaga o Ieova, lea e na te faatonutonuina ma e faataunuuina le mea e finagalo i ai o ia. O lenā agaga e mamā, lē ponā, paia, ma ua tuuesea mo le faaaogāina e Ieova. O le mea lea e taʻua ai o le “agaga paia” ma le “mana o le agaga paia.” (Sl 51:11; Lu 11:13; Ro 1:4; Efe 1:13) Pe a galue i se tasi, o le a avea ai lenā agaga ma uunaʻiga mo le paia, po o le mamā. O so o se gaoioiga sesē pe lē mamā e tatou te faia, e mafai ona iʻu atu ai i lo tatou teena pe “faatigā” i le agaga paia. (Efe 4:30) E ui o le agaga paia e leai se tino, ae mafai lava ona tatou “faatigā” i ai. Talu ai o le agaga paia o loo fuaina mai fua e atagia mai ai uiga paia o le Atua, o le faatigā la i le agaga paia, o le faatigā foʻi lenā iā Ieova. O le faia o so o se gaoioiga sesē, e masani ona iʻu atu ai i le ʻtineia o le mumū o le agaga.’ (1Te 5:19) Pe afai e faaauau pea, e mafai ona tatou faatigā ai i le agaga paia o le Atua, ma iʻu ina suia ai Ieova e fai ma fili o lē fouvale. (Isa 63:10) E mafai e se tasi o loo faatigā i le agaga paia ona oo lava ina upuleaga i le agaga paia, o se agasala lea na taʻua e Iesu Keriso e lē mafai ona faamagaloina i le taimi nei atoa ma le lumanaʻi.—Mat 12:31, 32; Mar 3:28-30.
(Efeso 5:5) Auā ua outou iloa ma malamalama lelei i lenei mea, o sē e faitaaga, pe amio lē mamā, po o lē e matapeʻapeʻa, o lona uiga o le tagata e ifo i tupua lea, e lē fai mo latou tofi le malo o le Keriso ma le Atua.
it-1 1006 ¶2
Matapeʻapeʻa
E Faaalia i Gaoioiga. E faaalia le matapeʻapeʻa e ala i ni gaoioiga iloagofie lea e iloa atu ai ni tuʻinanauga sesē o loo iai i se tasi, ma lona matuā manaʻonaʻo i le tele o mea. Na taʻua e Iakopo o se tusitala o le Tusi Paia pe a tō lenā tuʻinanauga sesē, ona fanau mai ai lea o le agasala. (Ia 1:14, 15) O lea la, e iloa le tagata matapeʻapeʻa i ana gaoioiga. Na taʻua e le aposetolo o Paulo o le avea o se tasi ma sē e matapeʻapeʻa, e tusa lenā ma sē e ifo i tupua. (Efe 5:5) O tuʻinanauga matapeʻapeʻa o se tasi e na te avea ai se mea o loo tuʻinanau i ai ma ona atua, ma ua faamuamua lenā mea nai lo o le tapuaʻiga ma le auaunaga i Lē na Foafoaina Mea.—Ro 1:24, 25.
Faitau Tusi Paia
(Efeso 4:17-32) O lea, ou te fai atu iā te outou ma taʻutino atu lenei mea i luma o le Alii, aua tou te toe savavali e pei o tagata o le lalolagi o ē o loo savavali i le pōuliuli o o latou mafaufau, 18 a o pogisa pea o latou mafaufau, ma vavaeese i latou i le ola mai i le Atua, ona o le valea ua iā i latou ma le maaa o o latou loto. 19 Ona ua lē toe lagona e i latou le mā, ua latou faia ai amioga matagā, ma amioga lē mamā uma ona o le manaʻo tele. 20 A ua aʻoaʻoina outou e lē faapena le Keriso, 21 pe afai e moni na outou faalogo iā te ia ma aʻoaʻoina outou e ia, e tusa ma le upu moni na aʻoaʻoina e Iesu, 22 ia outou tuu ese le tagata tuai e tusa ai ma a outou amioga sa faia muamua, lea ua faaleagaina i ona tuʻinanauga taufaasesē; 23 a ia faafouina le malosi e pulea ai o outou mafaufau, 24 ma ia oofu i le tagata fou na foafoaina e tusa ma le finagalo o le Atua, i le amiotonu moni ma le faamaoni. 25 O lenei, ona ua outou tuu ese le pepelo, ia taʻitasi outou ma tautala i le mea moni ma lona tuaoi, auā o i tatou o itutino o le tino e tasi. 26 Pe a outou ita, aua neʻi agasala ai, aua neʻi goto le lā o tumau pea lo outou ita, 27 aua foʻi neʻi tuua e outou se mea e mautū ai le Tiapolo. 28 O lē e gaoi, aua neʻi toe gaoi, a ia galue mamafa o ia, ma ia faia e ona lima galuega lelei, ina ia mafai ai ona ia avatu ni mea i se tagata mativa. 29 Ia aua neʻi alu atu se upuleaga mai i o outou gutu, a ia fai atu ni upu lelei e atiaʻe ai i taimi e tatau ai, ina ia aogā i ē o faalogologo i ai. 30 Aua foʻi tou te faatigā i le agaga paia o le Atua, ua faamaufaailogaina ai outou mo le aso e faasaʻolotoina ai e ala i le togiola. 31 Ia tuu lo outou ita umi, ma le itaitagofie, ma le lotoa, ma le soona ʻeʻē, ma upu masoā, atoa foʻi ma mea leaga uma. 32 Ae ia agalelei le tasi i le isi, ia māfana lo outou alofa, ma ia fefaamagaloaʻi ma le lotoatoa, e pei ona finagalo malie le Atua e faamagaloina outou e ala iā Keriso.
IUNI 24-30
ʻOA TAUTELE MAI I LE AFIOGA A LE ATUA | FILIPI 1-4
“Aua Neʻi Popole i se Mea”
(Filipi 4:6) Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai;
O le “Filemu Mai i le Atua, e Silisili i Mea Uma Lava e Manatu i Ai”
10 O le ā e fesoasoani iā i tatou ia lē popole ai i so o se mea ma maua le “filemu mai i le Atua”? Ua faaalia mai i upu a Paulo i Kerisiano i Filipi, o le vaifofō o le popole o le tatalo. O lea, pe a tatou popole, ia tatalo. (Faitau le 1 Peteru 5:6, 7.) Ia tatalo atu ma le faatuatua atoatoa iā Ieova i le iloaina e manatu mamafa mai iā te oe. Ia tatalo atu iā te ia “ma le faafetai,” ma ia manatua faamanuiaga ua tatou maua. O le a atili faamalosia lo tatou mautinoa iā te ia pe a manatua, e mafai ona ia faia “mea e matuā sili atu i lo o mea tatou te talosaga atu ai pe e mafaufau i ai.”—Efe. 3:20.
(Filipi 4:7) ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai, e ala iā Keriso Iesu.
O le “Filemu Mai i le Atua, e Silisili i Mea Uma Lava e Manatu i Ai”
7 E mautinoa ina ua faitau uso i Filipi i le tusi a Paulo iā i latou, na latou manatua le mea na tupu iā te ia ma le auala na gaoioi ai Ieova, lea e latou te leʻi faatalitalia. O le ā le lesona na aʻoaʻo atu e Paulo iā i latou? Pe a faafaigofie: Aua le popole. Ia tatalo, ona outou maua ai lea o le filemu mai i le Atua. Ae ia mātau, o le “filemu mai i le Atua, e silisili i mea uma lava e manatu i ai.” O le ā lona uiga? Ua faaliliu e nisi tagata lenei faaupuga e faapea, “e silisili i mea uma lava e tatou te moomoo i ai” pe “e silisili i fuafuaga uma a tagata.” O le uiga o le manatu o Paulo, o so o se mea e tatou te mafaufau i ai, e lē mafaatusalia i le “filemu mai i le Atua.” Atonu i manatu o tagata, e lē mafai ona tatou sao mai i o tatou faafitauli. Peitaʻi, i le silafaga a Ieova e mafai ona tatou sao mai ai, ma e mafai foʻi ona ia gaoioi i auala e sili atu i lo o mea e faatalitalia.—Faitau le 2 Peteru 2:9.
O le “Filemu Mai i le Atua, e Silisili i Mea Uma Lava e Manatu i Ai”
16 O le ā le faamanuiaga o lo tatou mauaina o le “filemu mai i le Atua, e silisili i mea uma lava e manatu i ai”? Ua taʻua i le Tusi Paia o le a ʻleoleoina ai o tatou loto ma mafaufau e ala iā Keriso Iesu.’ (Fili. 4:7) O le upu i le uluaʻi gagana mo le “leoleoina,” o se upu sa faaaogā e vaegaʻau. Sa faasino atu i se vaega o fitafita sa tofia e leoleoina se aai malupuipuia i aso anamua, e pei o le aai o Filipi. Na momoe saogalemu tagata o Filipi i le pō ona na latou iloa o loo leoleo e fitafita faitotoʻa o le aai. I se tulaga talitutusa, pe a iā i tatou le “filemu mai i le Atua,” o le a faaauau ona toʻafimālie o tatou loto ma mafaufau. E tatou te iloa e manatu mamafa mai Ieova iā i tatou ma e finagalo ia tatou taulau manuia. (1 Pete. 5:10) O le iloaina o lenā mea e puipuia ai i tatou mai i le lofitūina i le popole ma le lotovaivai.
Saʻiliʻiliga Loloto mo ʻOa Faaleagaga
(Filipi 2:17) Ae e ui lava ua liligiina aʻu e pei o se taulaga i meainu, i luga o la outou auaunaga lea ua outou faia ona o lo outou faatuatua, ua ou fiafia ma ou olioli faatasi ma outou uma.
it-2 528 ¶5
Taulaga
Taulaga i meainu. O taulaga i meainu na ofoina atu faatasi ma le tele o isi taulaga, aemaise lava ina ua nofoia e tagata Isaraelu le Nuu Folafolaina. (Nu 15:2, 5, 8-10) O taulaga i meainu e aofia ai le uaina (“ʻava malosi”) ma na sasaa i luga o le fata faitaulaga. (Nu 28:7, 14; faatusatusa i le Eso 30:9; Nu 15:10.) Na tusi atu le aposetolo o Paulo i Kerisiano i Filipi: “[Pe afai] ua liligiina aʻu e pei o se taulaga i meainu, i luga o la outou auaunaga lea ua outou faia ona o lo outou faatuatua, ua ou fiafia.” I inei, na ia faaaogā faafaatusa ai taulaga i meainu e faamatala ai lona lotomalie e faaaogā lona malosi, taimi ma alagaʻoa mo ona uso Kerisiano. (Fil 2:17) A o toeitiiti oo i lona maliu na ia tusi atu iā Timoteo: “Ua liligiina atu aʻu e pei o se taulaga i meainu, ma ua lata le taimi e faasaʻolotoina ai aʻu.”—2Ti 4:6.
(Filipi 3:11) ina ia iloa ai pe e mafai lava ona ou maua le uluaʻi toetū mai i le oti.
“Le Uluaʻi Toe Tū”—O Loo Faagasolo Nei!
5 Ona sosoo lea ma sui faauuina o “le Isaraelu o le Atua,” lea e tatau ona aufaatasi atu i latou i le Alii o Iesu Keriso i le mamalu faalelagi, o inā o le a latou ʻfaatasi ai pea lava ma le Alii.’ (Kalatia 6:16; 1 Tesalonia 4:17) E taʻua lenā mea o “le uluaʻi toe tū.” (Faaaliga 20:6) Pe a māeʻa lenā toe tū, ona oo loa lea i le taimi mo le toe faatutūina mai i le lalolagi o le faitau miliona, o ē ua iai le faamoemoe e ola e faavavau i le Parataiso. O lea la, pe tatou te faamoemoe e ola i le lagi pe i le lalolagi, ae tatou te naunau uma lava e fia iloa “le uluaʻi toe tū.” O le ā lenā ituaiga o toe tū? O afea e tupu ai?
Faitau Tusi Paia
(Filipi 4:10-23) Ou te matuā olioli i le autasi i le Alii, ona o lea ua outou toe mafaufau mai ai iā te aʻu, lea foʻi sa outou manatunatu i ai, ae e leʻi maua se avanoa e faaalia mai ai. 11 Ou te lē o fai atu ona o le lē tagolima, auā ua aʻoaʻoina aʻu, e tusa lava po o ā tulaga e oo iā te aʻu, ae ia lotomalie i mea ua ou maua. 12 O le mea moni, ua ou tofo i le lē tagolima, ua ou tofo foʻi i le tele o mea e maua. O mea uma lava ma tulaga uma lava, ua ou iloa ai ona feagai ma le maʻona ma le matelāina, atoa ma le tele o mea, ma le pagatia i le lē tagolima. 13 O mea uma lava, ua ou maua le malosi mai iā te ia o lē na foaʻi maia iā te aʻu le mana. 14 Ae e ui i lea, sa matuā lelei tele lo outou fesoasoani mai iā te aʻu i oʻu puapuaga. 15 O outou Filipi e, ua outou iloa foʻi, i le taimi na amata ai ona ou folafola atu le tala lelei ma ou tuua ai Maketonia, e leai lava se faapotopotoga na aufaatasi ma aʻu i le foaʻi atu ma le talia mai, e na o outou lava; 16 auā foʻi a o oʻu iai i Tesalonia, e leʻi faatasi ae e faalua ona outou auina mai iā te aʻu o se mea na ou lē tagolima ai. 17 E lē ona ua ou naunau e saʻili se meaalofa, ae ona o loʻu naunau faamaoni e saʻili le fua e atili ai ona lelei o outou tulaga. 18 Ae peitaʻi, ua atoatoa mea uma iā te aʻu ma ua matuā tele lava. Ua faamalieina aʻu talu ai ua ou maua meaalofa mai iā te outou e ala iā Epaferoti, o se mea manogi lelei, o le taulaga talileleia, e matuā finagalo malie i ai le Atua. 19 O le mea lea, e foaʻi atu e loʻu Atua iā te outou mea uma ua outou lē tagolima ai mai i le anoanoaʻi o lona tamaoaiga e ala iā Keriso Iesu. 20 O lenei, ia faamamaluina lo tatou Atua, o le Tamā lea, e faavavau, faavavau lava. Amene. 21 E momoli atu oʻu alofaaga i le ʻaupaia uma o ē ua autasi iā Keriso Iesu. E momoli atu foʻi iā te outou alofaaga o le ʻauuso o loo matou faatasi. 22 O loo momoli atu alofaaga o le ʻaupaia uma, aemaise lava i latou o le aiga o Kaisara. 23 Tau ina ia iai le agalelei faifua o le Alii o Iesu Keriso i le agaga ua outou faaalia.