“Ia Faaauau Ona Outou Mafaufau Lelei ma ia Mataala!”

1. O le ā le fetalaiga a Iesu i ona soo e faatatau i le taimi o le iʻuga, ma o le ā le lapataʻiga na ia avatu?

A O TOE o ni nai aso maliu Iesu, na fesili atu ona soo e toʻafā iā te ia, ʻO le ā le faailoga o le taufaaiʻuiʻuga o le faiga o mea a le lalolagi?’ (Mata. 24:3) Atonu na fia malamalama nei soo i le auala o le a faamuta ai faiga o mea faa-Iutaia. E lē gata na fetalai atu Iesu i le taimi e faaiʻuina ai le faiga o mea faa-Iutaia, ae na uiga atu foʻi i le “taufaaiʻuiʻuga o le faiga o mea a le lalolagi” lea o loo tatou ola ai. Ina ua fetalai Iesu e faatatau i taimi o le iʻuga, na ia faapea mai: “A o lea aso ma lea itula e lē iloa e se tasi, e oo lava i agelu i le lagi po o le Atalii, ae ua na o le Tamā lava.” O lea, na ia lapataʻia ai ona soo uma ina ia “faaauau ona mataala.”​—Mare. 13:32-37.

2. Aiseā na tāua ai iā i latou na ola i le faiga o mea faa-Iutaia ona faaauau ona mataala?

² Na tatau i Kerisiano Iutaia i le uluaʻi senituri ona faaauau ona mataala ina ia faasaoina ai o latou ola. Na faailoa atu e Iesu i ona soo mea e tatau ona latou iloa e faatatau i le taimi e faaiʻuina ai le faiga o mea faa-Iutaia. Na ia fetalai: “Pe a outou iloa ua siʻosiʻomia Ierusalema e ʻautau, ona outou iloa ai lea ua lata lona faatafunaina.” O le taimi lenā sa tatau ai ona latou utagia le lapataʻiga a Iesu ma “sosola atu [loa] i mauga.” (Luka 21:20, 21) O i latou na utagia lenā lapataʻiga na faasaoina ina ua faaumatia e ʻautau a Roma Ierusalema.

3. O le ā o le a tatou talanoaina i lenei suʻesuʻega?

³ I aso nei, o loo tatou ola i le taufaaiʻuiʻuga o lenei faiga o mea leaga. E tatau la ona faaauau ona tatou mafaufau lelei, ma ia mataala. I lenei suʻesuʻega o le a talanoaina ai auala e tatou te maua ai se vaaiga paleni, a o tatou mātaʻitū mea o loo tutupu i le lalolagi. O le a talanoaina ai foʻi le auala e tatou te uaʻi ai iā i tatou lava, ma le auala sili e faaaogā tatau ai le taimi o totoe.

IA IAI SE VAAIGA PALENI A O TATOU MĀTAʻITŪ MEA O LOO TUTUPU I LE LALOLAGI

4. Aiseā e tatou te naunau ai e iloa le auala o loo faataunuu ai e mea o loo tutupu i aso nei valoaga o le Tusi Paia?

⁴ E iai māfuaaga lelei e tatou te naunau ai e iloa auala ua faataunuu ai e mea o loo tutupu i le lalolagi i aso nei valoaga o le Tusi Paia. O se faaaʻoaʻoga, na taʻua e Iesu se lisi o mea patino e tutupu, e fesoasoani iā i tatou e iloa ai ua matuā lata mai lava le iʻuga o lenei faiga o mea a Satani. (Mata. 24:3-14) Ua faalaeiauina i tatou e le aposetolo o Peteru e uaʻi atu i le faataunuuga o valoaga, ina ia faamalosia ai pea lo tatou faatuatua. (2 Pete. 1:19-21) E amata le tusi mulimuli o le Tusi Paia i upu nei: “O le faaaliga a Iesu Keriso na tuuina atu e le Atua iā te ia, ina ia faailoa mai i ana pologa o mea ua toeitiiti ona tutupu lea.” (Faaa. 1:1) O lea, e tatou te matuā naunau ai e iloa mea o loo tutupu i le lalolagi i aso nei, ina ia tatou malamalama ai i le auala o loo faataunuu ai valoaga o le Tusi Paia. Ia tatou naunau foʻi e fetufaaʻi ma isi e faatatau i na mea.

5. O le ā e tatau ona tatou ʻalofia, ma o le ā e tatau ona tatou faia? (Tagaʻi foʻi i ata.)

⁵ Pe a talanoaina valoaga o le Tusi Paia, e tatau ona tatou ʻalofia le taumatemate. Aiseā? Talu ai e tatou te lē mananaʻo e fai atu se tala e ono saveʻu ai le autasi o le faapotopotoga. O se faaaʻoaʻoga, e tatou te ono faalogo i taʻitaʻi o malo o talanoa e faatatau i se auala e foʻia ai se fevaevaeaʻiga ina ia maua ai le filemu ma le saogalemu. Nai lo o le taumatemate ma faapea o lenā auala ua faataunuu ai le valoaga o loo i le 1 Tesalonia 5:3, ae e manaʻomia ona tatou iloa malamalamaga fou ua lomia. Pe a faavae a tatou talanoaga i mataupu ua lomia e le faalapotopotoga a Ieova, ua tatou fesoasoani ai i le faapotopotoga ina ʻia autasi o tatou manatu.’​—1 Kori. 1:10; 4:6.

6. O ā lesona e tatou te aʻoaʻoina mai i le 2 Peteru 3:11-13?

⁶ Faitau le 2 Peteru 3:11-13. Ua fesoasoani mai le aposetolo o Peteru ina ia iai pea se vaaiga paleni pe a talanoaina valoaga o le Tusi Paia. Ua ia uunaʻia i tatou ina ia “tāmau i mafaufau le oo mai o le aso o Ieova.” Aiseā? E tatou te lē o taumafai ia iloa ʻle aso ma le itula’ e aumaia ai e Ieova le taua o Amaketo, ae e tatou te mananaʻo e faaaogā tatau le taimi o loo totoe e faia ai “amioga paia ma galuega o le faamaoni i le Atua.” (Mata. 24:36; Luka 12:40) O lona uiga e tatou te mananaʻo ia tonu pea a tatou amioga, ma faamautinoa o a tatou taumafaiga i le auaunaga iā Ieova ua faaalia ai le loloto o lo tatou alofa mo ia. Ina ia faia pea na mea, e tatau ona tatou uaʻi iā i tatou lava.

O LE Ā E UIGA I AI LE UAʻI IĀ I TATOU LAVA?

7. E faapefea ona faaalia o loo tatou uaʻi iā i tatou lava? (Luka 21:34)

⁷ Na fetalai Iesu i ona soo ia uaʻi atu i mea e tutupu i le lalolagi ma i latou lava. Na faamanino mai lenā manatu i le lapataʻiga o loo faamauina i le Luka 21:34. (Faitau.) Ia mātau le fetalaiga lenei a Iesu: “Ia outou uaʻi atu iā te outou lava.” O se tagata e uaʻi iā te ia lava, e mataala i so o se lamatiaga e faaleagaina ai le la faiā ma Ieova, ma e na te faia taumafaiga uma e ʻalofia ai na lamatiaga. O le auala lenā e faatumau ai iā te ia le alofa o le Atua.​—Faata. 22:3; Iuta 20, 21.

8. O le ā le apoapoaʻiga na avatu e le aposetolo o Paulo i Kerisiano?

⁸ Na apoapoaʻi atu le aposetolo o Paulo i Kerisiano ina ia uaʻi iā i latou lava. O se faaaʻoaʻoga, na ia faapea atu i Kerisiano i Efeso: “Ia outou matuā faautauta ina ia aua neʻi outou savavali e pei o ē e vālea, ae ia pei o ē e atamamai.” (Efe. 5:15, 16) O loo taumafai pea Satani e faaleagaina la tatou faauōga ma Ieova. O lea ua aumaia ai e le Tusi Paia se fautuaga mo i tatou, “ia faaauau ona [tatou] iloa po o le ā le finagalo o Ieova” ina ia mafai ai ona tatou fesagaʻia so o se mea e faamataʻu mai.​—Efe. 5:17.

9. E faapefea ona tatou malamalama i le finagalo o Ieova mo i tatou?

⁹ E lē o taʻuina mai i le Tusi Paia lamatiaga uma e ono faaleagaina ai la tatou faauōga ma Ieova. O le tele o taimi e tatou te faia ai filifiliga i mataupu e lē o taʻua patino i le Tusi Paia. Ina ia faia filifiliga atamai, e manaʻomia ona tatou malamalama pe iloa “le finagalo o Ieova.” E tatou te faia faapea e ala i le suʻesuʻe e lē aunoa o le Afioga a le Atua ma manatunatu loloto i ai. O le tele lava e tatou te malamalama ai i le finagalo o Ieova ma taumafai ia maua “le finagalo o Keriso,” o le tele foʻi lenā e tatou te savavali ai e “pei o ē e atamamai,” e tusa lava pe e leai ni tulafono maʻoti e taʻitaʻia ai i tatou. (1 Kori. 2:14-16) O isi lamatiaga e faigofie ona iloa, ae o isi e iloagatā.

10. O ā nisi o lamatiaga e tatau ona tatou teena?

¹⁰ O nisi lamatiaga e tatau ona tatou teena, e aofia ai le faatafai, inu tele, ʻai tele, faia o faamatalaga e faatigā ai i isi, faapea le matamata i faafiafiaga sauā, ata matagā taufeusuaʻiga ma isi mea faapena. (Sala. 101:3) O loo taumafai pea le Tiapolo lo tatou fili e saʻili ni avanoa e faaleagaina ai la tatou faauōga ma Ieova. (1 Pete. 5:8) Pe a tatou lē mataala, e mafai e Satani ona totō i o tatou loto ma manatu le matauʻa, lē faamaoni, manaʻo tele, ʻinoʻino, faamaualuga, ma le teuloto o le ita. (Kala. 5:19-21) Atonu i le taimi muamua e lē malolosi tele na faanaunauga. Peitaʻi, pe a lē vave ona tatou gaoioi e liaʻiese na faanaunauga, o le a tuputupu aʻe e pei o se laau oona e faaleagaina ai i tatou.​—Iako. 1:14, 15.

11. O le ā se lamatiaga iloagatā e tatau ona tatou teena, ma aiseā?

¹¹ O se tasi o lamatiaga iloagatā, o aumea leaga. Seʻi mātau se mea e ono tupu. Atonu e te lua faigaluega faatasi ma se tasi e lē tapuaʻi iā Ieova. O lea e te manaʻo ia iai i lenā tagata se vaaiga saʻo e faatatau i Molimau a Ieova, o le māfuaaga lenā e te faaalia ai le agalelei ma lotofesoasoani. O nisi taimi e te lua faiʻaiga faatasi ai i le aoauli. E leʻi umi lava ae fai ma au masani le lua aai faatasi i le aoauli. I nisi taimi, e talanoa mai ai lenā tagata i mataupu taufeusuaʻiga ma e te taumafai i le taimi muamua e teena. O se tasi o aso na e talia ai lana valaaulia e te lua ō e inu se lua fagu ina ua mānava le galuega. E leʻi umi ae amata ona e mafaufau e pei o ia. I lenā taimi, o le ā le umi ae amata ona e gaoioi e pei o lenā tagata? E moni e tatou te agalelei ma faaaloalo i tagata uma, ae e tatau ona tatou manatua e matuā taaʻina lava i tatou e i latou e tatou te faauō i ai. (1 Kori. 15:33) Pe a tatou uaʻi iā i tatou lava e pei ona faalaeiauina i tatou e Iesu e fai, o le a tatou teena ai le faauō atu iā i latou e lē o ola e tusa ai ma tapulaa a Ieova. (2 Kori. 6:15) O lea, e mafai ona tatou iloa atu le lamatiaga ma ʻaloese mai ai.

IA FAAAOGĀ TATAU LOU TAIMI

12. O le ā na tatau ona faia e soo o Iesu a o latou faatalitali i le iʻuga o le faiga o mea faa-Iutaia?

¹² Na tatau i soo o Iesu ona galulue mamafa pea a o latou faatalitali i le iʻuga o le faiga o mea faa-Iutaia. Na avatu e Iesu se galuega e latou te faia. Na ia faatonuina i latou ia talaʻi le tala lelei “i Ierusalema, i Iutaia uma ma Samaria, ma tuluʻiga uma o le lalolagi.” (Galu. 1:6-8) Maʻeu se galuega tele na tofia soo o Iesu e fai! O le tuutoina o i latou i lenei tofiga ua faaaogā tatau ai lo latou taimi.

13. Aiseā e tatau ai ona faaaogā tatau lo tatou taimi? (Kolose 4:5)

¹³ Faitau le Kolose 4:5. Ina ia uaʻi iā i tatou lava, e manaʻomia ona iloilo le auala e faaaogā ai o tatou taimi. E “tutupu faafuaseʻi mea” ma tatou aafia ai. (Fai. 9:11) E tatou te ono maliliu faafuaseʻi foʻi.

14-15. E faapefea ona faaaogā tatau lo tatou taimi? (Eperu 6:11, 12) (Tagaʻi foʻi i le ata.)

¹⁴ E faaaogā tatau lo tatou taimi pe a tatou faia le finagalo o Ieova ma faamalosia la tatou faauōga ma ia. (Ioa. 14:21) E manaʻomia ona tatou “tutumau, ia mausalī, ma ia tele pea mea e fai i le galuega a le Alii.” (1 Kori. 15:58) Auā pe a oo mai le iʻuga o o tatou ola po o le iʻuga o lenei faiga o mea, e leai se mea e tatou te salamō ai.​—Mata. 24:13; Roma 14:8.

¹⁵ I aso nei, o loo faaauau ona taʻitaʻia e Iesu ona soo a o latou talaʻia le Malo o le Atua i le lalolagi aoao. Ua faia e Iesu lana vaega e ala i le faataunuuina o lenā folafolaga. E ala i le faalapotopotoga a Ieova ua toleni ai i tatou e Iesu i le auala e talaʻi ai, ma ua ia saunia mai foʻi meafaigaluega e tatou te manaʻomia e talaʻi ai le tala lelei. (Mata. 28:18-20) E faia la tatou vaega e ala i le maelega i le galuega talaʻi ma le aʻoaʻo atu, ma faaauau ona mataala a o faatalitali iā Ieova e aumaia le iʻuga o lenei faiga o mea. O le faatatauina o le fautuaga o loo i le Eperu 6:11, 12, ua tatou taofimau ai i lo tatou faamoemoe “e oo i le iʻuga.”​—Faitau.

16. O le ā ua tatou maumauaʻi e fai?

¹⁶ Ua atofaina e Ieova le aso ma le itula e faaoo mai ai le iʻuga o le faiga o mea a Satani. Pe a oo mai lenā aso, o le a faataunuuina ai e Ieova valoaga o loo faamauina i lana Afioga. Ae e iai taimi e foliga mai ai ua tuai le oo mai o le iʻuga o lenei lalolagi. Peitaʻi, “e lē faatuai mai” lava le aso o Ieova! (Sapa. 2:3) O lea, ia tatou maumauaʻi e “vaavaai atu pea iā Ieova,” ma “faatalitali atu pea i le Atua o [lo tatou] faaolataga.”​—Mika 7:7.