“Ia Oofu Outou i Ofutau Atoatoa Mai le Atua”

KERISIANO e oofu i ofutau? Aiseā e ao ai ona latou oofu i na ofu e pei o ni ofutau? Pe e lē o i latou ea o ni tagata e naunau i le filemu? (2 Timoteo 2:24) Ioe, e faapena. Ae peitai, o Kerisiano moni uma lava, o loo auai i se taua—o se taua o loo latou tauivi ai, e le ina ia fasiotia nisi, ae ina ia manumalo.

Ana faapea sa leʻi fouvale Satani, semanū e lē tatau ona faia o lena taua. Ae sa fouvale o ia, ma sa ia faaseseina ai Atamu ma Eva e aufaatasi ma ia i lana fouvalega. Talu mai lena taimi ua nofo toilalo ai le faiga o mea a le lalolagi i le taimi nei i lē “o loo leaga,” o Satani le Tiapolo. (1 Ioane 5:19) O i latou e gauai atu i le Pule tonu Silisiliese, o Ieova, e tatau ona tetee atu i taaʻiga a le lalolagi ma lona pule. E tatau ona latou tau mo o latou ola faaleagaga. O le mea lea ua apoapoaia ai Kerisiano: “Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo.”—Efeso 6:11.

Le Ofutau

Ia matau, tatou te manaomia le “ofutau atoatoa mai le Atua” pe a fai tatou te mananao e puipuia lelei i tatou. Seʻi o tatou vaavaai la i vaega taitasi o lenei ofutau e pei ona faamatalaina e le aposetolo o Paulo, ma ia iloiloina ma le faamaoni i tatou lava ina ia iloa ai po ua faaauupegaina atoatoa mo le taua faaleagaga.—Efeso 6:14-17.

“Ina tutumau ia outou o fusia o outou sulugātiti i le [upu moni].” (Efeso 6:14a) I taimi o le Tusi Paia, sa fusiina ai e fitafita se fusipaʻu e faia i le paʻu manu e oo atu lona lautele i le ono inisi [15 cm]. O lenei fusipaʻu, sa fesoasoani e puipuia ai le sulugātiti. Pe a fusimau e se fitafita lona sulugātiti i le fusipaʻu, e faailoa ai i lenei mea lona nofo sauni mo le taua.

Maeu la le fetaui faapea, ua faatusaina le upu moni mai le Atua i se fusipaʻu o se fitafita! Ua faaatagia lelei ai i lenei mea faapea e ao ona tatou pipii mau i upu moni o le Afioga a le Atua, e pei lava o loo fusia ai i tatou. E ao ona tatou mafaufau loloto i manatu faamalie loto o i le Afioga a le Atua. O le a puipuia i tatou e lenei mea mai le faaseseina e ala i tala pepelo ma mailei taufaasese. E lē gata i lea, o tuleiga mai le fofoga o Ieova e lagolagoina ai ma faamalosia ai i tatou faaleagaga ma faatumauina ai lo tatou faamaoni.

“Ia oofu foi outou i le ufifatafata o le amiotonu.” (Efeso 6:14e) E puipuia e le ufifatafata o se fitafita, se totoga faaletino matuā tāua—o le fatu. O lo tatou ofutau faaleagaga la mai le Atua, e puipuia ai o tatou loto e le amiotonu. E tusa ai ma le Tusi Paia, o le loto o se faatusa talafeagai lea o le mea o i totonu o i tatou—o tatou faalogona, mafaufauga, ma manaoga. Ona ua fai mai foi le Tusi Paia o le loto ua naunau e fai le leaga, e matuā tāua ai la ona atiina aʻe se faanaunauga ina ia taofi mau i tapulaa amiotonu a Ieova. (Ieremia 17:9) O le usiusitai i le Atua e lē tatau ona faataga faafoliga mai i fafo, ae e tatau ona sau mai totonu. E manaomia ai i lenei lo tatou atiina aʻe o se alofa malosi mo le amiotonu ma se matuā inoino i le amioleaga. (Salamo 45:7) I lea, o le a puipuia ai o tatou loto.

“Ia faaseevaeina o outou vae i le sauniga o le tala lelei o le filemu.” (Efeso 6:15) Po o le auala ea lenei o faaseevaeina ai ou vae? Po o e savali ea e lē aunoa i ou vae i le faiva i le fanua e folafola atu le tala lelei? Po o e tauivi ina ia faaleleia le uiga o lau talaʻi ma le aʻoaʻo atu? E moni, e matuā lē tali mai lava isi oganuu. Atonu foi e lē manatu mamafa mai tagata, faailoga lanu, pe tetee foi. O la tatou talaʻiga e ono oo mai ai ni sauaga ia i tatou. Ae i le tumau pea, e mafai ai e Kerisiano ona atiina aʻe le onosai, o se uiga na te saunia le puipuiga mai i osofaiga a Satani. E ui lava ina sauaina, ae sa avea Paulo ma tagata talaʻi maelega, ma ua faalaeiauina i tatou ina ia ‘tatou faaaʻoaʻo ia te ia, e pei ona ia faaaʻoaʻo ia Keriso.’—1 Korinito 11:1.

‘O le toʻaga i le galuega talaʻi o le Malo, e faamalosia ai lo tatou mautinoa i le tala lelei. E lē gata i lea, ua faatagaina ai le agaga o Ieova e galue e ala ia i tatou i le faataunuuina o lona finagalo. O le mea moni, o na galuega ua avea ai i tatou ma ē faigaluega faatasi ma le au agelu—e faapea foi ma Ieova lava ia. (1 Korinito 3:9; Faaaliga 14:6) Ma o le ‘tele o mea e fai i le galuega a le Alii’ ua “faatumauina ai ma le le faagaeetia” i tatou. (1 Korinito 15:58) Maeu se puipuiga ofoofogia ua saunia e lenei mea!

Ia “tago atu i le talipupuni [telē] o le faatuatua.” (Efeso 6:16) Faatasi ma se talitā (talipupuni) telē, sa mafai ai e se fitafita i aso anamua ona puipuia o ia mai tao ma aū. Afai na te lē faaaogāina se talitā, e ono matuiā se manuʻa e oo ia te ia pe oo lava ina fasiotia ai o ia. O loo fesagai Kerisiano ma auupega e sili atu ona mataʻutia e ono oo ai le oti—“o u fanafana mu uma lava a loo leaga.” E aofia ai i nei mea eseese uma ua tuuina mai e Satani e fai ma auala e faavaivaia ai lo tatou faatuatua ma fasiotia lo tatou itu faaleagaga. Ua aofia ai i nei mea sauaga, tuuaiga pepelo, faafilosofia tau faasese a le lalolagi, le faatosina o mea faitino, ma faaosoosoga ina ia faia amioga lē mamā. Ina ia puipuia i tatou mai nei mea uma, tatou te manaomia ai se talipupuni telē. E lē tatau ona faaavanoa so o sina vaega o i tatou e lē puipuia lelei.

Sa ia Aperaamo ma lana avā o Sara se faatuatua malosi. Ina ua teʻa mamao lo la matutua ma tausaga e mafai ai ona faia sa la fanau, sa tuu atu lo la faatuatua i le folafolaga a le Atua faapea o le a fanau mai sa la tama. Mulimuli ane, sa faaalia e Aperaamo se faatuatua uigaese ina ua ia usiusitai i le valaau e faataulagaina Isaako, lona atalii e toatasi mai lana pele o Sara. Sa taofia e Ieova le lima o Aperaamo ma saunia ai se suitulaga mo le taulaga. Ae sa nofo sauni lava Aperaamo e usiusitai. Aiseā? Auā sa ia faatuatua aʻiaʻi faapea e mafai e Ieova ona toe faatuina mai lona atalii ma faataunuuina ai folafolaga na faia e uiga ia te ia.—Roma 4:16-21; Eperu 11:11, 12, 17-19.

Sa ia Mose foi le ituaiga o faatuatua lea tatou te manaomia. Na ia teena le oa uma o Aikupito, ae filifili ina ia puapuagatia faatasi ma tagata o le Atua. Aiseā? Auā sa ia faatuatua faapea o loo soifua Ieova ma o le a ia aumaia le faaolataga i tagata Isaraelu. Sa matuā malosi lava le faatuatua o Mose o lea “na faamalosi [ai] o ia pei o sē iloa atu i le le o vaaia.”—Eperu 11:6, 24-27.

O faapena ea lo tatou faatuatua ia Ieova? Po o vavalalata la tatou faiā ma Ieova e pei lava o loo mafai ona tatou vaai atu ia te ia? Po o tatou loto malie ea e faia so o se taulaga pe onosaia ni faigata ina ia tausia ai la tatou faiā ma le Atua? Tatou te faatuatua atoatoa ea ia Ieova? (Eperu 11:1) Afai e faapea, o le a lē mafai la e ū fanafana mu uma a Satani ona ofi faamalosi mai i lo tatou talipupuni o le faatuatua.

“Ave le puloutau o le olataga.” (Efeso 6:17a) O le puloutau o se fitafita, e puipuia ai lona ulu faapea ma lona faiai—o se totoga o neura o loo galulue faatasi ma mafaufauga. O le faamoemoe o Kerisiano i le faaolataga, ua pei o se puloutau auā na te puipuia le mafaufau. Ua uma ona faaafouina le mafaufau o se Kerisiano e ala i le poto saʻo, peitai, o loo iai pea i se tagata vaivai ma le lē lelei atoatoa. (Roma 7:18; 12:2) Afai tatou te faatagaina le mafaufau e fafagaina i mafaufauga lē mamā ua saunia e le agaga o lenei lalolagi e faaumatia ai le faatuatua, o le a mavae atu la lo tatou mautinoa e uiga i le faaolataga ma atonu e iʻu ai lava ina mate. I le isi itu, afai tatou te maumauaʻi i le fafagaina o o tatou mafaufau i upu faamalosiau mai le Afioga a le Atua, ona tumau pea lea ona pupula ma manino lo tatou faamoemoe. Po o e tausia ina ia matuā mau lelei lou puloutau o le faaolataga?

“Le pelu a le agaga, o le afioga lea a le Atua.” (Efeso 6:17e) I le taua faa-Kerisiano, ua moni ai le alagaupu faapea, o le auala sili e puipuia ai i le taua, o le osofai atu lea. A o faaseevaeina o tatou vae i le tala lelei o le filemu tatou te savavali atu ai i tagata e lē talitonu, ua le tuua ai i tatou e aunoa ma ni auupega. Ua gaoioi le Tusi Paia, le Afioga a le Atua e pei o se pelu mamana e motusi ese ai mea pepelo ma talitonuga sese faaleagaga ma fesoasoani atu ai i tagata e saʻo o latou loto ina ia maua le saolotoga faaleagaga.—Ioane 8:31, 32.

Na faaalia e Iesu le mana o lenei auupega i se taua na ia faia ma Satani le Tiapolo. Ina ua faaosoosoina i le vao, sa mafai e Iesu ona puipuia o ia mai osofaiga faasatani e tolu, e ala i lona faaaogāina ma le uigā o le Afioga a le Atua i lona fetalai atu: “Ua tusia.” (Mataio 4:1-11) Afai tatou te aʻoaʻo ina ia faaaogāina ma le tomai lenei pelu, ona mafai ai lea ona tatou fesoasoani atu i ē agamalu ina ia ō ese mai i lalo o le mana o Satani. O lea, e mafai foi e toeaina o le faapotopotoga ona faaaogā le Afioga a le Atua e puipuia ai le lafu, mai tagata o ē o loo taumafai e faavaivaia le faatuatua o ē vaivai.—Galuega 20:28-30.

E lē faigofie ona maua le tomai o se fitafita i le faaaogāina o le pelu. E manaomia ai se toleniga ma le faaaogāina atoatoa mo se taimi umi, ina ia mafai ai ona tomai i le faaaogāina. E faapena foi i le taua faaleagaga, e manaomia le matuā suesue ma ia faataʻitaʻia pea e lē aunoa i le faiva ina ia avea o se tagata e tomai i le faaaogāina o le Afioga a le Atua. I auala eseese uma, seʻi o tatou faia se taumafaiga e manaomia ina ia avea ai i tatou o ni tagata taupelu tomai faaleagaga, e agavaa i le “vaevaetonuina o le upu moni.”—2 Timoteo 2:15.

Ia Finafinau pea i le Tatalo ma ia Tutumau

E matuā tāua lava vaega uma o lo tatou ofutau faaleagaga mo le tausia o le faamaoni i le Atua. Ae e mafai faapefea ona tatou oofu pea i lenei ofutau? E ala lea i le suesue o le Tusi Paia e lē aunoa, ia muai sauniuni mo sauniga faa-Kerisiano, ma i le faalogologo ma le faaeteete, ma le tinoū e faia ai se sao i na sauniga, o le a fesoasoani lea ia i tatou ina ia ofuina pea lo tatou ofutau. (2 Timoteo 3:16; Eperu 10:24, 25) O le auai pea ma le maelega i le faiva i le fanua, faatasi ma se aufaatasiga lelei faa-Kerisiano, o le a fesoasoani foi e tausia ai lo tatou ofutau faaleagaga o osofaiga ma le puipuiga i se tulaga lelei.—Faataoto 13:20; Roma 15:15, 16; 1 Korinito 15:33.

O le atiina aʻe o mafaufauga saʻo e tāua foi. E lē tatau ona tatou faatagaina faatosinaga a lenei lalolagi e faavaivaia i tatou. Na i lo o lea, ia ‘faafaigofie la tatou vaai.’ (Mataio 6:19-24) I le faaaʻoaʻo ia Iesu Keriso, e tatau foi ona tatou aʻoaʻo ina ia alolofa i le amiotonu ma inoino i le amioleaga. (Eperu 1:9) O nei mea uma lava e fesoasoani ia i tatou ina ia tausia ai pea le ofuina o lo tatou ofutau faaleagaga.

Ina ua uma ona talanoaina vaega taitasi o le ofutau faaleagaga, ona fai mai lea o le faaiʻuga a Paulo e faapea: “Ia outou tatalo i le Agaga i aso uma lava i talotaloga ma faatoga uma; ia outou mataala pea i lenei lava mea, ma matuā tausisi i le faatoga mo tagata paia uma lava.” (Efeso 6:18) E tausia pea e fitafita faamaoni a latou fesootaiga ma le ofisa autū o le vaegaau ma usiusitaʻi i faatonuga. I le avea o ni fitafita Kerisiano, e manaomia ai ona matuā tausia pea a tatou fesootaiga ma lo tatou Pule Silisiliese, o Ieova le Atua, e ala i lana ‘taʻitaʻiau sili o vaega o atunuu’ o Iesu Keriso. (Isaia 55:4) E mafai ona faia o lenei mea e lē ala i ni tatalo faaviivii, ae e ala i talotaloga e sau mai le loto, e faaatagia ai le matuā vavalalata ma le tuutoina atu ia Ieova. I le fesootaʻi atu pea e lē aunoa ma Ieova, tatou te maua ai le malosi i aso taitasi ina ia faamalosia ai i tatou i le taua.

Na fetalai Iesu: “Ua ou manumalo i le lalolagi.” (Ioane 16:33) E finagalo foi Ieova ina ia tatou manumalo. A o latalata le maliu o le aposetolo o Paulo, sa mafai ona ia faapea mai: “Ua ou tau le taua lelei, ua iu ia te aʻu le tausinioga, ua ou taofi i le upu o le faatuatua.” (2 Timoteo 4:7) Talosia ia mafai foi ona tatou fai atu lena faaupuga lava e tasi e uiga i la tatou vaega i le taua. Afai tatou te faanaunau moni i lenei mea, ‘seʻi tatou tutumau ia, ina ia tatou mafai ai ona tetee atu i togafiti a le Tiapolo’ e ala i le ofuina pea o le ofutau atoatoa mai le Atua.—Efeso 6:11.