O Ai o le a Faamaonia e Ieova?

“Ia outou galulue . . . , ina ia faaolaina outou. Auā o le Atua, o ia lē galue i totonu ia te outou i lona finagalo alofa, ina ia outou loto ma galulue i ai.”—FILIPI 2:12, 13.

1, 2. I le ā le tulaga na maua ai e Iesu le faasilasilaga o le faamaoniga tauatua, ma ai se ā e tatau ai ona tatou naunau i lenei mea?

SA O SE tai liliu i le tala faasolopito. Sa talaʻi e Ioane le Papatiso le feau a le Atua ma faatofuina tagata salamō i le vai. Ona faalatalata atu lea o se tagata na iloa e Ioane o se tagata amiotonu; o ia lea o Iesu. Sa leai sana agasala e manaomia ai ona ia salamō, a e sa ia talosaga atu i ai ina ia papatisoina o ia, ‘ina ia faataunuuina ai o mea tonu uma.’—Mataio 3:1-15.

² Ina ua uma ona usiusitai atu ma le agamalu Ioane, ma ua maliu aʻe Iesu nai le vai, “ua faaavanoaina le lagi ia te ia, ua ia iloa atu foi le agaga o le Atua ua afio ifo e peiseai se lupe.” E sili atu i lena, “o le siufofoga mai le lagi, ua faapea mai, ‘O loʻu Atalii lena, o lē ua pele, ua ou faamaonia o ia.’” (Mataio 3:16, 17, NW; Mareko 1:11) Maeu se faasilasilaga! O i tatou uma lava, tatou te olioli e faafiafia se tasi o lē tatou te faaaloalo i ai. (Galuega 6:3-6; 16:1, 2; Filipi 2:19-22; Mataio 25:21) Seʻi manatu la, i le lagona o le a ia te oe pe afai e faalauiloa mai e le Atua e ona le malosi uma e faapea, ‘Ua ou faamaonia oe!’

3. O le ā e tatau ona tatou manatu mamafa i ai e tusa ai ma le faamaonia e le Atua?

³ Pe e mafai ona faamaonia e le Atua se tagata i aso nei? Mo se faaaʻoaʻoga, sei manatu faapea o se tagata ‘ua leai se faamoemoe ma ua aunoa ma le Atua i le lalolagi,’ ua “tagata ese mai le ola e ā le Atua.” (Efeso 2:12; 4:18, NW) Pe e mafai ona ia see ese mai lena tulaga i le tulaga faamanuiaina o le faamaonia e Ieova? Afai o lea, e faapefea? Seʻi tatou vaai.

O le ā na Uiga i ai Ana Afioga?

4. (a) O le ā le uiga o le upu Eleni mo le “faamaonia” i le faasilasilaga a le Atua? (e) Ai se ā e naunau fiafia faapitoa ai i le faaaogāina i lenei tulaga?

⁴ O faamaumauga o Evagelia e uiga i afioga a le Atua “ua ou faamaonia [Iesu]” ua faaaogā ai le veape Eleni eu·do·keʹo. (Mataio 3:17; Mareko 1:11; Luka 3:22) O lona uiga “ua matuā fiafia, alofa naunau, fiafia i ai,” ma i lona tulaga o se nauna ua faauigaina “o le finagalo lelei, finagalo alofa, finagalo malie, manao, faanaunauga.” O le upu eu·do·keʹo e lē o faatapulaaina i se faamaoniga tauatua. Mo se faataʻitaʻiga, ‘sa fiafia’ Kerisiano i Maketonia e fetufaai i mea tau tupe ma isi. (Roma 10:1; 15:26; 2 Korinito 5:8; 1 Tesalonia 2:8; 3:1) A e o le faamaoniga na maua e Iesu, sa faaalia mai e le Atua a e lē o tagata. O lenei faaupuga ua faaaogā e faasino atu ai ia Iesu i na o le taimi lava faatoa uma ai ona papatiso. (Mataio 17:5; 2 Peteru 1:17) O se mea e naunau i ai, i le Luka 2:52 o loo faaaogā ai se isi upu e ese—khaʹris—i le tautala e uiga ia Iesu o se talavou e leʻi papatisoina, o lē na “alofagia” e le Atua ma tagata.

5. (a) Ua faapefea ona faaalia manino e mafai ona faamaonia e le Atua ni tagata lē lelei atoatoa? (e) O ai “tagata o le finagalo lelei”?

⁵ Pe e mafai foi la e tagata lē lelei atoatoa e pei o i tatou ona maua le faamaoniga a le Atua? Ma le fiafia lava, o le tali i ai, o le ioe. Ina ua fanau mai Iesu, na faasilasila mai e agelu: “O le mamalu i le Atua i mea aupitoaluga, ma le manuia i le lalolagi i tagata o le finagalo lelei [eu·do·kiʹas].” (Luka 2:14) I le faa-Eleni moni, sa vivii agelu ona o le faamanuiaga o le a oo mai i “tagata mafaufau lelei” po o “tagata ua faamaonia e le Atua.”a Ua tusia e Polofesa Hans Bietenhard e uiga i le faaaogāina lenei o le en an·throʹpois eu·do·kiʹas: “O le fasi fuaiupu lenei o loo faasino i tagata o le finagalo alofa o le Atua . . . O lea la, tatou te lē o talanoaina i inei le finagalo alofa mai tagata . . . O loo tatou feagai ma le finagalo silisili ese ma le alofa fua o le Atua, lea na te filifilia mo ia lava se nuu mo le faaolataga.” O lea, e pei lava ona leva ona faamatala atu e Molimau a Ieova, ua faaalia i le Luka 2:14 faapea, e ala i le tuuina atu ma le papatisoga, ua mafai ai e tagata lē lelei atoatoa ona avea ma tagata o le finagalo lelei, tagata ua faamaonia e le Atua!b

6. O le ā e manaomia pea ona tatou aʻoaʻoina e uiga i le faamaoniga a le Atua?

⁶ A e peitai, atonu ua e iloa maeu se eseesega o i ai i le va o le avea ma ‘fili o le Atua i le manatu i galuega leaga’ ma le faamaonia e avea o aumea a lo tatou Atua faamasino tonu ma le atamai. (Kolose 1:21; Salamo 15:1-5) O lea, e ui o le a avea o se mapusaga mo oe i le faalogo atu faapea e mafai ona avea tagata ma ē faamaonia, a e atonu o loo e fia iloa po o le ā o loo aafia ai. E tele mea e mafai ona tatou aʻoaʻoina e uiga i lenei mea mai feutagaiga a le Atua i aso ua mavae.

Na ia Talileleia Tagata

7. O le ā ua aumaia i le Esoto 12:38 e tusa ai ma uiga faaalia o le Atua?

⁷ Mo le tele o senituri a o leʻi faia le faasilasilaga i le Luka 2:14, sa talileleia e Ieova tagata e ō mai ma tapuai ia te ia. Ioe, sa feutagai Ieova ma na o le nuu lava o Isaraelu, lea na tuuina atu ia te ia. (Esoto 19:5-8; 31:16, 17) A e peitai, ia manatua, i le taimi na savavali ese atu ai Isaraelu mai noataga i Aikupito, “ua o ae foi faatasi ma i latou tagata ese e toatele.” (Esoto 12:38) O nei tagata e lē ni Isaraelu atonu sa faia ni feutagaiga ma tagata o le Atua ma molimauina mala na oo ia Aikupito, ua latou filifili nei e ō faatasi ma Isaraelu. E lē taumatea sa faapena ona avea nisi o i latou ma tagata liliu atoatoa.

8. O ā ituaiga e lua o tagata ese sa nonofo i Isaraelu, ma ai se ā na ala ai ona i ai se eseesega i auala na feutagai ai Isaraelu ma i latou?

⁸ Na faailoa mai e le feagaiga o le Tulafono le tulaga o tagata e lē ni Isaraelu i le feagai ai ma le Atua ma ona tagata. O nisi o tagata ese o ni tagata na aumau ai, sa na ona nonofo ai lava i le laueleele o Isaraelu, i inā sa tatau ai ona latou usiusitai i tulafono faavae, e pei o tulafono faasaga i le fasioti tagata ma le manaomia ona tausi le Sapati. (Neemia 13:16-21) Na i lo o le taliaina ma le naunau o ia tagata aumau e avea o ni uso, sa faaeteete le tagata Isaraelu pe a talanoa atu pe faia ni feutagaiga ma i latou, ona e leʻi oo ina avea i latou ma se vaega o le nuu o le Atua. Mo se faaaʻoaʻoga, a o lē faatagaina le tagata Isaraelu e faatau mai ma ʻai le aano o se manu mate e leʻi sasaaina le toto a e na pe lava ia, a e sa mafaia e nei tagata ese, o ē sa lē avea ma tagata liliu. (Teuteronome 14:21; Esekielu 4:14) I le gasologa o le taimi, o nisi o nei tagata ese sa aumau ai atonu na mulimuli atu i le ala o isi tagata ese o ē na avea o tagata liliu ua peritomeina. Ona pau lava lena o le taimi e faia ai i latou e pei o uso i le tapuaiga moni, e manaomia ai ona tausia le Tulafono atoa. (Levitiko 16:29; 17:10; 19:33, 34; 24:22) O Ruta le Moapi, ma Naamanu le lepela Suria, o tagata e lē o ni Isaraelu na talia e le Atua.—Mataio 1:5; Luka 4:27.

9. Na faapefea ona faamautinoa e Solomona uiga o le Atua agaʻi i tagata ese?

⁹ I aso o le Tupu o Solomona, ua tatou vaaia ai foi le uiga talileleia o le Atua agaʻi i tagata e lē ni Isaraelu. Ina ua faaulufaleina le malumalu, na tatalo Solomona: “O le tagata ese foi, e le so lou nuu o Isaraelu, a ua sau o ia mai le nuu mamao ona o lou suafa . . . ma tatalo i lenei fale; ia e faafofoga mai mai le lagi, . . . ina ia iloa lou suafa e nuu uma lava i le lalolagi, ma ia latou matatau ia te oe, e faapei o lou nuu o Isaraelu.” (1 Tupu 8:41-43) Ioe, sa talileleia e Ieova tatalo a tagata ese faamaoni o ē na saili atu ia te ia. Atonu o le a aʻoaʻoina foi e i latou nei ana tulafono, gauai atu ina ia peritomeina, ma oo ai ina avea ma sui ua talia o ona tagata faamanuiaina.

10. Na faapefea ona feagai tagata Iutaia ma le eunuka Aitiope, ma ai se ā na aogā ai le peritomeina ia te ia?

¹⁰ O le tasi tagata na ia faia lenei mea i taimi mulimuli ane, o le teu oloa a le Tupu Fafine o Kanake i Aitiope mamao. Atonu sa faapena foi, ina ua ia muai faalogo i tagata Iutaia ma la latou tapuaiga, faapea e lē talia e Ieova ia ituaiga o auala o lona olaga po o auala o lana lotu. O lea, sa tatau ai i tagata Iutaia ona faaalia sina faapalepale a o suesueina le Tulafono e lenei tamaloa ese o loo i ai ia i latou, e aʻoaʻoina ai e uiga i mea e manaomia e le Atua. E foliga mai sa ia agaʻigaʻi i luma ma faia suiga manaomia ina ia agavaa ai mo le peritomeina. Ua taʻu mai ia i tatou e le Galuega 8:27 e faapea “na alu o ia i Ierusalema e tapuai ai.” (Esoto 12:48, 49) Ua faaalia ai i lenei mea, sa o ia o se tagata liliu atoatoa. O lea, sa i ai o ia i se tulaga e talia ai le Mesia ma avea ai o ia ma ona soʻo papatisoina, ma i lea, ua ōgatasi ai ma le finagalo agaʻigaʻi i luma o le Atua.

O Ē Lē Talitonu ma le Faapotopotoga Kerisiano

11, 12. (a) O le ā le isi suiga atili na oo i ai ina ua papatisoina le Aitiope? (e) Na faapefea ona ōgatasi lenei mea ma le Filipi 2:12, 13?

¹¹ Na fetalai atu e Iesu i ona soʻo: “Ia outou o atu e fai nuu uma lava ma soo, ma papatiso atu ia te i latou i le suafa o le Tamā ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou.” (Mataio 28:19, 20) Sa maua e le tagata liliu mai Aitiope na seʻi faatoa taʻua le poto ia Ieova ma le agaga paia. O lea, ina ua fesoasoani Filipo ia te ia ia malamalama ma talia Iesu o le Alo faamesia o le Atua, ona mafaia loa lea ona papatisoina o ia. Na faapea ai ona avea o ia o se sui ua faamaonia o tagata o Ieova o ē na mulimuli atu ia Keriso. O le mea moni, na avea o ia ma tagata e tatau ona ia tala atu i le Atua, na manaomia ona ‘tausi i mea uma ua poloaiina’ mo Kerisiano. Peitai na ō mai faatasi lenei tala atu ma se faamoemoe ofoofogia: o le faaolataga!

¹² Mulimuli ane, na tusi atu Paulo faapea e manaomia e Kerisiano uma ona ‘galulue aʻiaʻi ma le mataʻu ma le gatete mo lo latou lava faaolataga.’ A e peitai, sa mafai ona faia lena mea, “auā o le Atua, o ia lē galue i totonu ia te outou i lona finagalo alofa [eu·do·kiʹas], ina ia outou loto ma galulue i ai.”—Filipi 2:12, 13.

13. Na faapefea ona feagai ai Kerisiano ma i latou o ē sa leʻi vave ona papatiso e pei o le eunuka Aitiope?

¹³ E lē o tagata uma na feiloai ma Kerisiano moni sa faapena ona nofo sauni ma agavaa e agaʻi vave atu i le papatisoga e pei o lena Aitiope. O nisi, o ē sa lē o ni Iutaia po o ni tagata liliu, sa itiiti po o le leai foi o se poto ia Ieova ma ona ala; sa leʻi taʻitaʻiina foi a latou amio e ana tapulaa. O le a faapefea la ona feagai ai ma i latou? Sa tatau i Kerisiano ona mulimuli i le faaaʻoaʻoga a Iesu. E mautinoa lava na te leʻi faalaeiauina pe faatagaina agasala. (Ioane 5:14) A e sa faapalepale pea o ia i tagata agasala o ē na lalata atu ia te ia ma i latou o ē faanaunau e aumaia o latou ala ia ōgatasi ma ala o le Atua.—Luka 15:1-7.

14, 15. E ese ai mai Kerisiano faauuina, o ā ituaiga o tagata sa auai i sauniga i Korinito, ma sa faapefea ona eseese o latou agaʻigaʻi i luma faaleagaga?

¹⁴ O loo manino mai lava i faamatalaga a Paulo e uiga i sauniga i Korinito, e faapea, sa feutagai ma le faapalepale Kerisiano ma i latou o ē ua aʻoaʻoina e uiga i le Atua. I le talanoaina o le aogā o meaalofa faavavega a le agaga ia na muai faailogaina ai le faa-Kerisiano faapea ua i ai le faamanuiaga a le Atua, na taʻua ai e Paulo “e faatuatua” ma “e le faatuatua” [“ē talitonu” ma “ē lē talitonu,” NW]. (1 Korinito 14:22) O “e faatuatua” o i latou na sa talia Keriso ma papatisoina. (Galuega 8:13; 16:31-34) “E toatele foi tagata Korinito o e na faalogo ua faatuatua i latou, ma ua papatisoina.”—Galuega 18:8.

¹⁵ E tusa ai ma le 1 Korinito 14:24, ‘o ē lē talitonu po o tagata a lautele’ sa ō mai foi i sauniga i Korinito ma sa talileleia i inā.c E lē taumate, sa eseese i latou i lo latou agaʻigaʻi i luma i le suesueina ma le faatatauina o le Afioga a le Atua. Atonu sa i ai nisi sa faia pea agasala. O nisi atonu sa maua sina faatuatua, ua uma ona faia ni nai suiga i o latou olaga, ma a o leʻi oo ina papatisoina, a e ua amata ona tautala atu i isi i mea ua latou aʻoaʻoina.

16. Sa mafai faapefea e na tagata ona maua aogā mai lo latou i ai faatasi ma Kerisiano i sauniga a le faapotopotoga?

¹⁶ E moni, e leai se isi o na tagata e leʻi papatisoina sa “i le Alii.” (1 Korinito 7:39) Afai na aafia o latou olaga i aso ua mavae i ni sese matuiā tau amio ma faaleagaga foi, ua manino lava la le umi o se taimi o le a latou faaaluina ina ia ōgatasi ai i latou ma tapulaa a le Atua. A e i lena taimi, tau lava ina ia aua neʻi o latou taumafai ma le loto leaga e faaliliuina le faatuatua ma le tulaga mamā o le faapotopotoga, sa talileleia i latou. O mea na latou vaai i ai ma faalogo ai i sauniga, sa mafai ona ʻaoaia ai i latou,’ a o faaalia mai ‘mea lilo sa i o latou loto.’—1 Korinito 14:23-25; 2 Korinito 6:14.

Ia Tumau ona Faamaonia e le Atua mo le Faaolataga

17. O le ā le faataunuuga o le Luka 2:14 i le uluai senituri?

¹⁷ E ala i le talaʻiga a Kerisiano papatisoina o le uluai senituri i le lautele, e faitau afe sa faalogo ai i le tala lelei. Sa latou faatuatua i mea na latou faalogo ai, sa salamō i o latou auala o le olaga ua mavae, ma papatisoina i latou, i lea sa ‘taʻutino atu ai i le lautele mo lo latou faaolataga.’ (Roma 10:10-15; Galuega 2:41-44; 5:14; Kolose 1:23) E mautinoa lava sa faamaonia e Ieova tagata sa papatisoina i le taimi lena, auā na ia faauuina i latou i le agaga paia, ma talia i latou e avea ma tamafai faaleagaga. Na tusi le aposetolo o Paulo: “Ua na tofia i tatou anamua, ina ia avea ma tamafai māna, ona o Iesu Keriso, e tusa ma le pule tunoa [eu·do·kiʹan] a lona finagalo.” (Efeso 1:5) O lea, i lena senituri, na amata ai ona faamaonia le moni o mea na valoia e agelu i le taimi na fanau ai Iesu: “O le manuia i le lalolagi i tagata o le finagalo alofa [po o tagata ua maua le faamaoniga a le Atua].”—Luka 2:14.

18. Ai se ā e lē mafai ai e Kerisiano faauuina ona lē toe manatu mamafa i lo latou tulaga faamaonia e le Atua?

¹⁸ Ina ia tausia pea lena manuia, sa manaomia mo na “tagata o le finagalo alofa” ona “galulue aʻiaʻi ma le mataʻu ma le gatete ina ia faaolaina [i latou].” (Filipi 2:12) Sa lē o se mea faigofie, ona o i latou o ni tagata sa lē lelei atoatoa pea. Sa latou fesagai ma faaosoosoga ma omiga ina ia faia mea sese. Afai sa latou lolo atu i le faia o mea sese, o le a latou lē iloa le faamaoniga a le Atua. O lea la, na fuafuaina ai ma le alofa e Ieova leoleo mamoe faaleagaga o ē o le a lē gata ina fesoasoani a e o le a latou puipuia foi faapotopotoga.—1 Peteru 5:2, 3.

19, 20. O ā sauniuniga na faia e le Atua ina ia mafai ai e Kerisiano papatisoina ona avea pea ma ana auauna faamaonia?

¹⁹ O na toeaina o le faapotopotoga o le a latou ave i fale le fautuaga a Paulo: “E ui lava ua faia e se tagata se laasaga sese a o leʻi iloaina, o outou ua agavaa faaleagaga, ia taumafai e toe faafoi mai lē o faapea ma le loto agamalu, ia vaavaai ia te outou taitoatasi, ona o le mataʻu ina neʻi faaosoosoina foi outou.” (Kalatia 6:1, NW) E pei ona mafai ona tatou malamalama, o le tagata ua faia lenei laasaga tāua o le papatisoina o le a tele sana tala e tala atu, e faapena foi ona moni e tusa ai ma se tagata ese o lē sa avea o se tagata liliu ua peritomeina i Isaraelu. A e peitai, afai e faia se sese e se Kerisiano ua papatisoina, e mafai lava ona ia maua le fesoasoani alofa i totonu o le faapotopotoga.

²⁰ E mafai e se vasega o toeaina i le faapotopotoga ona ofo atu le fesoasoani i se tasi ua paʻū atu i le faia o se sese matuiā. Na tusi Iuta: “Ia outou faaauau ona alolofa mutimutivale atu i nisi o i ai ni masalosaloga; ia faaola ia i latou i le seʻi mai ia i latou mai le afi. A e ia outou faaauau ona alolofa mutimutivale atu i isi, ia faia ma le mataʻu, a ia outou inoino i le ofu i totonu ua pisia i le tino.” (Iuta 22, 23, NW) O le sui papatiso o le faapotopotoga o lē ua fesoasoania i lenei auala e mafai ona faaauau pea ona olioli i le faamaoniga a Ieova ma le manuia lea na tautala i ai agelu i le fanau mai o Iesu.

21, 22. O le ā o le a iʻu i ai pe afai e avea se tasi o se tagata agasala e lē salamō, ma o ā uiga faaalia o sui faamaoni o le faapotopotoga?

²¹ E ui lava e lē taatele, a e sa i ai ni tulaga sa faaalia ai le lē salamō o lē fai mea sese. O lea sa tatau ai i toeaina ona faateaina o ia ina ia puipuia ai le faapotopotoga mamā mai le faaleagaina. O le mea lena na tupu i le tamaloa papatiso i Korinito o lē sa tausisia pea se faiā le mamā. Na lapataia e Paulo le faapotopotoga: “Aua tou te feoai ma e faitaaga, a e le matuā faapea foi i e faitaaga i lenei lalolagi, atoa ma e matapeapea, ma e fao mea, ma e ifo i tupua; ana faapea, e ao ina outou o ese atu i le lalolagi. A o lenei, ua ou tusi atu ia te outou, ai se tasi ua taʻuusoina a e faitaaga, pe matapeapea, pe ifo i tupua, pe agatele, pe onā, pe fao mea; aua lava neʻi tou feoai, aua foi tou te aai faatasi ma le o faapea.”—1 Korinito 5:9-11.

²² Talu ai ona o le tamaloa Korinito ua uma ona ia faia le laasaga tāua o le papatisoga, ua oo ina faamaonia e le Atua ma avea ma sui o le faapotopotoga, o le faateʻa la o ia sa o se mataupu matuiā. Na faailoa mai e Paulo faapea, e lē tatau i Kerisiano ona feoai faatasi ma ia, auā ua ia teena lona tulaga faamaonia ma le Atua. (Faatusatusa 2 Ioane 10, 11.) Na tusi foi Peteru faatatau i tagata na ua faateʻaina: “Auā e lelei pe ana latou le iloa le ala o le amiotonu, a e leaga ina ua latou iloa, ma toe liliu ese i le poloaiga paia sa tuuina mai ia te i latou. A ua taunuu ia te i latou le upu faataoto moni, Ua toe foi le uli i lona lava puaiga.”—2 Peteru 2:21, 22.

23. I le uluai senituri, o le ā le tulaga lautele sa i ai i totonu o Kerisiano e tusa ai ma lo latou taofimau o le faamaoniga a le Atua?

²³ E manino lava le lē toe silasila o Ieova i na tagata faapea o ni tagata ua ia faamaonia, auā ua tuuesea i latou ona o i latou o ni tagata fai mea sese lē salamo. (Eperu 10:38; faatusatusa le 1 Korinito 10:5.) Ua foliga mai, e toaitiiti na faateʻaina. O le toatele o ē sa maua le “alofa tunoa, ma le manuia mai le Atua” ma na ‘talia i latou o ni tamafai e tusa ma le faafiafiaina lelei o lona finagalo,’ sa tumau ma le faamaoni.—Efeso 1:2, 5, 8-10.

24. O le ā le vala o lenei mataupu ua manaomia lo tatou uaʻi atili atu i ai?

²⁴ E faapena foi i o tatou aso. A e peitai, seʻi o tatou iloiloina la pe ua faapefea i tagata ‘lē talitonu po o tagata a lautele’ ona fesoasoania ina ia avea ai o ni ē faamaonia e le Atua i aso nei, ma o le ā e mafai ona faia e fesoasoani ai ia i latou pe afai latou te sese i le faagasologa o le olaga. O le mataupu o loo mulimuli mai, o le a feagai ma nei tulaga.

[Faaopoopoga i lalo]

E te Manatua?

◻ E tusa ai ma le Tusi Paia, talu mai anafea ma i le ā le auala e mafai ai ona faamaonia e le Atua tagata?

◻ O le ā le silafaga a le Atua e faatatau i tagata ese sa i ai i totonu o ona tagata, peitai, ai se ā sa manaomia ai e tagata Isaraelu le paleni i le faaeteete ma le faapalepale?

◻ O le ā le faaiuga e mafai ona tatou faia mai le mea moni faapea, sa i ai tagata “lē talitonu” sa ō mai i sauniga faa-Kerisiano i Korinito?

◻ Pe na faapefea ona faia e le Atua sauniuniga e fesoasoani atu ai i Kerisiano papatisoina ia tumau o ana auauna faamaonia?