LESONA 37
Le Manatu o le Tusi Paia i Galuega ma Tupe
Pe e iai se taimi na lofitūina ai oe i le popole ona o le galuega po o tupe? E ono avea o se luʻi le tausiaina o tatou manaʻoga ma avatu iā Ieova le tapuaʻiga e tatau ona avatu iā te ia. E maua i le Tusi Paia fautuaga aogā e mafai ona fesoasoani iā i tatou.
1. O le ā le manatu o le Tusi Paia e faatatau i galuega?
E finagalo le Atua ia tatou fiafia i a tatou galuega. Ua taʻua i le Tusi Paia, ʻe leai se mea e sili i le tagata nai lo o le maua o le fiafia i ana galuega mamafa.’ (Failauga 2:24) E galue mamafa Ieova. Pe a tatou faaaʻoaʻo iā te ia e ala i le galue mamafa, o le a faafiafiaina o ia ma tatou maua ai le faamalieina.
E tāua galuega. Ae e lē tatau ona sili atu lona tāua nai lo le tapuaʻiga iā Ieova. (Ioane 6:27) Ua ia folafola mai o le a ia tausia o tatou manaʻoga faaletino, pe a tatou faamuamua o ia.
2. O le ā le vaaiga paleni e tatau ona iai i tupe?
E ui o loo taʻua i le Tusi Paia ua “fai tupe ma puipuiga,” ae ua lapataʻi mai foʻi, e lē mafai e tupe ona aumaia le fiafia moni. (Failauga 7:12) O lea, ua faalaeiauina i tatou ia ʻalofia le manaʻo tele i tupe ae ia “lotomalilie i mea ua iā [i tatou].” (Faitau le Eperu 13:5.) Pe a tatou lotomalilie i mea ua iā i tatou, o le a ʻalofia ai le manaʻo tele ma le faia o aitalafu e lē manaʻomia. (Faataoto 22:7) O le a tatou sao mai ai foʻi i lamatiaga o taaloga faitupe ma pisinisi faapiʻopiʻo, lea e vave ona maua ai le tele o tupe.
3. E faapefea ona faaaogā tupe i se auala lē manatu faapito?
O Ieova o se Atua limafoaʻi, ma e tatou te faaaʻoaʻo iā te ia e ala i le faaalia o le ʻlimafoaʻi ma ia nofosauni e tufa atu mea i isi.’ (1 Timoteo 6:18) E mafai ona faaaogā a tatou tupe i se auala lē manatu faapito, e ala i le lagolagoina o le faapotopotoga ma fesoasoani atu ai i isi, aemaise lava o tatou uso tapuaʻi. E lē tāua iā Ieova po o le ā le tele o la tatou foaʻi, ae o le uunaʻiga e tatou te faia ai. Pe a foaʻi atu mai i o tatou loto, o le a tatou maua le fiafia ma faafiafiaina ai Ieova.—Faitau le Galuega 20:35.
SAʻILIʻILI ATILI
Mātau aogā o le iai o se vaaiga saʻo e faatatau i galuega, ma le lotomalie i mea ua e maua.
4. E faamamaluina Ieova i le auala e te galue ai
O la tatou faauōga ma Ieova, e aafia ai la tatou vaaiga i galuega. Faaali le VITIŌ, ona talanoa lea i fesili nei:
I le vitiō, o le ā se mea e te fiafia ai i le vaaiga a Iasoni i le galuega ma ona uiga faaalia?
O le ā na ia faia ina ia faatulaga ai pea lana galuega i le tulaga e tatau ona iai?
Faitau le Kolose 3:23, 24, ona talanoa lea i le fesili lenei:
Aiseā e tāua ai la tatou vaaiga i galuega?
E tāua galuega, ae e lē tatau ona sili atu le tāua nai lo le tapuaʻiga iā Ieova
5. E maua aogā pe a tatou lotomalilie i mea ua maua
E toʻatele tagata e taumafai e maua le tele o tupe. Ae e ese le fautuaga a le Tusi Paia. Faitau le 1 Timoteo 6:6-8, ona talanoa lea i le fesili lenei:
O le ā ua faalaeiauina i tatou e le Tusi Paia e fai?
E tusa pe lē tele ni mea tatou te maua, ae e mafai lava ona maua le fiafia. Faaali le VITIŌ, ona talanoa lea i le fesili lenei:
E ui e lē tele ni tupe na maua e nei aiga, ae na faapefea ona latou maua le fiafia?
Ae ā pe afai ua lava mea e tatou te maua, ae manaʻonaʻo pea i nisi mea? Na faailoa mai e Iesu i se talafaatusa le lamatiaga o lenei mea. Faitau le Luka 12:15-21, ona talanoa lea i le fesili lenei:
O le ā ua e aʻoaʻoina mai i le talafaatusa a Iesu?—Tagaʻi i le fuaiupu 15.
Faitau ma faatusatusa le Faataoto 10:22 ma le 1 Timoteo 6:10, ona talanoa lea i fesili nei:
O le ā le mea e sili ona tāua? O le iai o se faauōga ma Ieova po o le mauaina o le tele o tupe? Aiseā?
O ā faafitauli e iʻu i ai pe a manaʻo tele i tupe?
6. O le a tausia e Ieova o tatou manaʻoga
O faafitauli tau tupe ma galuega, e ono tofotofoina ai lo tatou faatuatua iā Ieova. Faaali le VITIŌ ma mātau pe faapefea ona tatou fesagaʻia tofotofoga o le faatuatua, ona talanoa lea i fesili nei:
I le vitiō, o ā luʻi na fesagaʻia e le uso?
O le ā na ia faia ina ia manumalo ai i na luʻi?
Faitau le Mataio 6:25-34, ona talanoa lea i le fesili lenei:
O le ā ua folafola mai e Ieova iā i latou e faamuamua o ia?
UA FAAPEA MAI NISI: “E lē mafai ona ou auai i sauniga i vaiaso uma, ona e tatau ona ou galue mamafa e tausia loʻu aiga.”
O le ā se mau e faamautinoa atu ai iā te oe, o le faamuamua o le tapuaʻiga iā Ieova o le filifiliga sili lea ona tāua?
AOTELEGA
E tāua galuega totogi ma tupe, ae e lē tatau ona faalavelavea ai la tatou auaunaga iā Ieova.
Fesili Autalu
O le ā e fesoasoani iā te oe ina ia iai pea se vaaiga paleni i galuega?
E faapefea ona e maua aogā mai i le lotomalie i mea ua e maua?
E faapefea ona e maufaatuatuaina le folafolaga a Ieova e na te tausia ona tagata?
MANATU FAAOPOOPO
Po o faapea mai le Tusi Paia e leaga tupe?
Mātau ituaiga foaʻi e fiafia i ai le Atua.
“O le ā le Manatu o le Tusi Paia i le Foaʻi Atu?” (Mataupu i le jw.org)
Pe e afāina lou taalo i taaloga faitupe?
“Le Manatu o le Tusi Paia—Taaloga Faitupe” (Mataupu o le Ala Mai!)
O le ā na uunaʻia ai se tagata na taalo i taaloga faitupe ma gaoi, e suia lona olaga?
“Na Ou Matuā Fiafia Tele i Tuuga Solofanua” (Le Olomatamata, Novema 1, 2011)