LESONA 40
E Faapefea Ona Tatou Mamā i le Silafaga a le Atua?
Seʻi faaata se tinā alofa o loo sauni lana tama i le aʻoga. Ua ia faamautinoa ua uma ona faatāʻele ma siaki po o mamā ona ofu. O nei gaoioiga e lē gata e tausia ai pea le soifua mālōlōina o le tamaitiiti, ae faailoa atu ai foʻi i isi o loo tausia lelei o ia e ona mātua. I se tulaga talitutusa, e finagalo lo tatou Tamā alofa o Ieova ia tatou mamā i le itu faaletino ma mamā tau amio. Pe a tausia le mamā, e tatou te maua ai aogā ma faamamaluina ai o ia.
1. E faapefea ona tatou mamā i le itu faaletino?
Ua fetalai mai Ieova: “E tatau ona paia outou.” (1 Peteru 1:16) E fesootaʻi atu le paia i le mamā tau amio ma le tulaga mamā faaletino. E mafai ona tatou tausia le mamā faaletino e ala i le tāʻeele mamā, faamamā o tatou lavalava, fale ma taavale. E mafai foʻi ona tatou fesoasoani i le faamamāina o le Maota mo Sauniga. Pe a faatumauina pea le mamā faaletino, o le a tatou faamamaluina ai Ieova.—2 Korinito 6:3, 4.
2. Ina ia mamā, o ā masaniga e tatau ona ʻalofia?
Ua faalaeiau mai le Tusi Paia ina ia ʻfaamamā i tatou mai i mea uma e faaleagaina ai le tino ma le agaga.’ (2 Korinito 7:1) O lona uiga, e tatau ona ʻalofia so o se mea e ono faaleagaina ai o tatou tino ma le mafaufau. E tatau ona tatou faafiafiaina Ieova i o tatou mafaufauga. O lea, ia tatou faia le mea sili e teena ai mafaufauga sesē. (Salamo 104:34) Ia taumafai foʻi ia mamā a tatou faamatalaga.—Faitau le Kolose 3:8.
O ā nisi mea e tatou te ono lē mamā ai i le itu faaletino ma le itu tau amio? E iai mea e aafia ai o tatou tino. E tatau ona ʻalofia na mea, e pei o le ulaula tapaa, ma le faaaogāsesēina o fualaau faasāina. O le ʻalofia o na mea, o le a tatou maua ai le soifua mālōlōina lelei ma faaalia ai le faaaloalo i le meaalofa o le ola. E tatou te tausia foʻi le mamā tau amio e ala i le teena o amioga lē mamā, e pei o le taaloalo i totogasā ma le matamata i ata lē mamā tau feusuaʻiga. (Salamo 119:37; Efeso 5:5) E ono faigatā ona teena nei masaniga, ae e mafai ona fesoasoani mai Ieova iā i tatou.—Faitau le Isaia 41:13.
SAʻILIʻILI ATILI
Iloilo pe faapefea ona faamamaluina Ieova pe a tatou mamā faaletino, ma mātau pe faapefea ona tatou teena masaniga lē mama.
3. O le mamā faaletino e faamamaluina ai Ieova
E mafai ona tatou malamalama i le silafaga a Ieova e faatatau i le mamā, e ala i le iloiloina o ana faatonuga na avatu i le nuu o Isaraelu anamua. Faitau le Esoto 19:10 ma le 30:17-19, ona talanoa lea i fesili nei:
O le ā ua faailoa mai e nei fuaiupu e faatatau i le silafaga a Ieova i le mamā faaletino?
O ā ni masaniga lelei o le a fesoasoani iā te oe, ia tumau ai pea ona mamā faaletino?
O le mamā faaletino e manaʻomia ai le tele o le taimi ma taumafaiga. Ae e mafai ona tatou tausia le mamā faaletino e tusa lava po o fea tatou te nonofo ai, ma po o le ā foʻi lo tatou tulaga tau tamaoaiga. Faaali le VITIŌ, ona talanoa lea i le fesili lenei:
E faapefea i le tausia mamā o a tatou meatotino, ona faamamaluina ai le tatou galuega talaʻi?
4. Ia taofia masaniga leaga
E fesoasoani mai Ieova iā i tatou e tuua so o se masaniga leaga
Afai e te ulaula tapaa pe faaaogāina fualaau faasāina, atonu la e te malamalama lelei i le faigatā ona tuua o lenā masaniga. O le ā e mafai ona fesoasoani iā te oe? Seʻi iloilo aafiaga leaga o lenā masaniga. Faitau le Mataio 22:37-39, ma talanoa pe faapefea i le ulaula tapaa po o le faaaogāsesē o fualaau faasāina ona aafia ai . . .
le faauōga a se tasi ma Ieova.
lou aiga ma isi tagata.
Tusi i lalo auala e fesoasoani iā te oe e taofia ai se masaniga leaga.a Faaali le VITIŌ.
Faitau le Filipi 4:13, ona talanoa lea i le fesili lenei:
E faapefea ona maua e se tasi le malosi e taofia ai se masaniga leaga, e ala i le tatalo e lē aunoa, suʻesuʻe le Tusi Paia, ma auai i sauniga?
5. Ia teena mafaufauga ma amioga lē mamā
Faitau le Kolose 3:5, ona talanoa lea i fesili nei:
E faapefea ona tatou iloa e lē mamā i le silafaga a Ieova ata matagā tau feusuaʻiga, taaloalo i totogasā, ma le lafoina atu o faamatalaga, ata ma vitiō matagā i telefoni feaveaʻi?
Pe e talafeagai ona faatalitalia e Ieova i tatou ina ia mamā tau amio? Aiseā?
Iloilo le auala e teena ai mafaufauga sesē. Faaali le VITIŌ.
Na faaaogā e Iesu se talafaatusa ina ia faailoa mai ai, e tatau ona tatou gaoioi ma le maumauaʻi ina ia tumau ona mamā tauamio. Faitau le Mataio 5:29, 30, ona talanoa lea i le fesili lenei:
E leʻi uiga atu Iesu i le aveesea moni o se vaega o tatou tino, ae na ia faamatilatila mai se gaoioiga e manaʻomia ona tatou faia. O ā gaoioiga maumauaʻi e mafai ona faia e se tasi, ina ia ʻalofia ai mafaufauga lē mamā?b
Pe afai o loo e taumafai malosi e teena mafaufauga lē mamā, e tāua iā Ieova au taumafaiga. Faitau le Salamo 103:13, 14, ona talanoa lea i le fesili lenei:
Pe afai o loo e tauivi ma se masaniga lē mamā, e faapefea ona fesoasoani lenei mau iā te oe e faaauau ai pea ona teena?
Aua le faavaivai pe a e toe lolo atu i le faia o lenā masaniga!
E ono faigofie ona mafaufau se tasi, ʻUa ou lē taulau, ua lē mafai ona ou tuua lenei masaniga.’ Ae seʻi mafaufau i le manatu lenei: Pe a lāvea se tagata tamoʻe ma sulu ai, e lē faapea ai ua faiaʻina pe toe foʻi e amata mai lana tuuga. I se tulaga talitutusa, pe a e lolo atu i le toe faia o se masaniga leaga, e lē faapea ai ua e lē taulau pe faalēaogāina ai au taumafaiga na fai. O le toe lolo atu i ai, o se vaega o au taumafaiga ina ia teena lenā masaniga leaga. Aua e te faavaivai! E mafai lava ona e tuua lenā masaniga leaga, e ala i le fesoasoani a Ieova.
UA FAAPEA MAI NISI: “Ua avea ma aʻu masaniga. E lē mafai ona toe tuua.”
O le ā se mau e te faaaogā e faailoa atu ai i le tagata, e mafai lava ona ia tuua se masaniga leaga e ala i le fesoasoani a Ieova?
AOTELEGA
E tatou te faafiafiaina Ieova e ala i le tausia o le mamā o o tatou tino, mafaufauga ma amioga.
Fesili Autalu
Aiseā e tāua ai le tausia o le mamā?
E faapefea ona e tausia le mamā faaletino?
E faapefea ona e tausia le mamā tauamio ma mafaufauga?
MANATU FAAOPOOPO
O ā gaoioiga faigofie e mafai ona e faia ina ia tumau ai pea ona mamā faaletino, e tusa pe lē tele ni meafaitino tatou te maua?
Tausia Lou Soifua Mālōlōina e Ala i le Fufulu Mamā o Lima (3:01)
Iloilo nisi o auala aogā e mafai ona e tuua ai le ulaula.
Iloilo aafiaga o le matamata i ata matagā taufeusuaʻiga.
“Ata Matagā Taufeusuaʻiga—E Afāina pe Leai?” (Le Olomatamata, Aokuso 1, 2013)
Mātau le auala na mafai ai e se tamāloa ona tuua lana masaniga, o le matamata i ata matagā taufeusuaʻiga.
“Na Ou Lē Taulau i le Tele o Taimi ae ua Ou Manumalo” (Le Olomatamata Nu. 4 2016)
a O loo faamatala i le mataupu “Auala e Tuu ai le Ulaula” i le vaega Manatu Faaopoopo o lenei lesona, auala aogā e mafai ona e tuua ai lenā masaniga.
b Mo se fesoasoani i le auala e taofia ai le masaniga o le taaloalo i totogasā, tagaʻi i le mataupu “E Faapefea Ona Ou Tuua le Masaniga o le Taaloalo i Totogasā?” mataupu 25 o le tusi Ua Fesili Mai Talavou—Tali e Aogā.