Ia Faamalosia Pea Lou Faamoemoe o se Kerisiano

1. O le ā le faamoemoe ua aumaia e Ieova mo i tatou?

UA AUMAIA e Ieova iā i tatou le faamoemoe matagofie o le ola e faavavau. E faamoemoe nisi e ola e faavavau i le lagi o ni foafoaga agaga e lē mafai ona oti. (1 Kori. 15:50, 53) Ae e faamoemoe le toʻatele e ola e faavavau i le lalolagi i se olaga lelei atoatoa ma fiafia. (Faaa. 21:3, 4) Po o le ā lava lo tatou faamoemoe pe ola i le lagi po o le lalolagi, ae e tautele iā i tatou lo tatou faamoemoe.

2. O le ā e faavae ai lo tatou faamoemoe, ma e faapefea ona faamaonia lenā manatu?

² I le Tusi Paia, e faasino atu le upu “faamoemoe” i le faatalitalia o ni mea lelei o le a tutupu. E tatou te mautinoa e taunuu lo tatou faamoemoe i le lumanaʻi, ona e mai iā Ieova. (Roma 15:13) E tatou te iloa mea ua ia folafolaina mai, ma e tatou te iloa e tausisi lava o ia i ana folafolaga. (Nu. 23:19) E tatou te mautinoa e iai iā Ieova le faanaunauga ma le mana, e faataunuu ai so o se mea ua ia folafola mai o le a ia faia. O lea, e lē faavae lo tatou faamoemoe i ni moomooga faivavale, ae e faavae i mea moni.

3. O ā manatu o le a talanoaina i lenei mataupu? (Salamo 27:14)

³ E alofa lo tatou Tamā i le lagi iā i tatou ma e finagalo ina ia tatou maufaatuatuaina o ia. (Faitau le Salamo 27:14.) Pe a malosi lo tatou faamoemoe iā Ieova, o le a mafai ona tatou onosaia tofotofoga ma maua pea le lototele ma le olioli, e tusa lava po o le ā e tupu iā i tatou. Seʻi o tatou iloiloina pe faapefea i lo tatou faamoemoe ona puipuia ai i tatou. Muamua, o le a talanoaina pe faapefea ona avea le faamoemoe e pei o se taula ma se puloutau, ona talanoa lea i le auala e tatou te faamalosia ai lo tatou faamoemoe.

UA PEI LO TATOU FAAMOEMOE O SE TAULA

4. E faapefea ona pei le faamoemoe o se taula? (Eperu 6:19)

⁴ I le tusi a le aposetolo o Paulo i Kerisiano Eperu, na ia faatusaina ai lo tatou faamoemoe i se taula. (Faitau le Eperu 6:19.) Na masani ona folau Paulo i le sami, o lea na ia iloa na faaaogā taula e taofia ai se vaa mai i le tafea. I se tasi taimi na malaga ai o ia i se vaa, a o agi malosi mai se matagi. Na ia vaaia tagata folau ua lafo taula i le sami, ina ia taofia ai le vaa mai i le tafea ma tuʻia i papa. (Galu. 27:29, 39-41) E pei ona taofia e se taula se vaa, e faapena foʻi ona faatumauina i tatou e lo tatou faamoemoe, ina ia lē tafetafea ese mai iā Ieova pe a feagai ma taimi e sili ona faigatā. E mafai e lo tatou faamoemoe ona faatoʻafilemu i tatou pe a feagai ma faafitauli, ona e tatou te mautinoa o le a faaleleia le tulaga o mea. Ia manatua, na lapataʻi mai Iesu o le a sauāina i tatou. (Ioa. 15:20) O le manatunatu la i lo tatou taui ua folafolaina mai, e fesoasoani iā i tatou ina ia tumau ai pea i la tatou tausinioga faaleagaga.

5. Na faapefea i le faamoemoe sa iā Iesu ona faatumauina ai o ia a o lata ina maliu?

⁵ Seʻi mātau pe na faapefea i le iai o se faamoemoe iā Iesu, ona fesoasoani iā te ia e tumau ai ma le faamaoni e ui na ia silafia o le a maliu tigā o ia. I le Penetekoso i le 33 T.A., na sii mai ai e le aposetolo o Peteru se valoaga mai i le tusi o Salamo, lea e faamatalaina ai le toʻafilemu ma le mautinoa o Iesu e faapea: “Ou te faatalitali foʻi ma le faamoemoe; auā e te lē tuua aʻu i le Tuugamau, e te lē tuua foʻi lē ua faamaoni iā te oe ia oo i ai le pala. . . . E te faatumuina aʻu i le matuā fiafia i ou luma.” (Galu. 2:25-28; Sala. 16:8-11) E ui na silafia e Iesu o le a maliu o ia, ae na iai iā te ia se faamoemoe mautinoa o le a toe faatūina o ia e le Atua, ma o le a ia maua le faaeaga e toe faatasi ai ma lona Tamā i le lagi.​—Epe. 12:2, 3.

6. O le ā le faamatalaga a se uso e faatatau i le faamoemoe?

⁶ O lo tatou faamoemoe o ni Kerisiano, ua fesoasoani i le toʻatele o uso ma tuafāfine e tutumau ai. Seʻi mātau le faaaʻoaʻoga a Leonard Chinn, o se uso faamaoni sa nofo i Egelani. I le vaitaimi o le Taua Muamua a le Lalolagi, na faafalepuipuiina ai o ia ona o le musu e auai i vaegaʻau. E lua masina na lokaina ai o ia i se sela, ona sosoo ai lea ma le faamalosia o ia e faia galuega mamafa. Na tusi o ia, “O mea na tutupu iā te aʻu, na ou iloa ai le tāua o le iai o se faamoemoe ina ia mafai ai ona tumau. O loo iai i le Tusi Paia faaaʻoaʻoga a Iesu, le ʻauaposetolo, ma le ʻauperofeta, faapea le tele o folafolaga matagofie. O na mea uma ua faamalosia ai lo tatou faamoemoe i le lumanaʻi ma mafai ai ona tatou tumau.” Na pei le faamoemoe o se taula iā Leonard, ma e mafai foʻi ona avea o se taula iā i tatou.

7. E faapefea i tofotofoga ona faamalosia ai lo tatou faamoemoe? (Roma 5:3-5; Iakopo 1:12)

⁷ E faamalosia atili lo tatou faamoemoe pe a tatou tumau i tofotofoga, ma tofo i le auala ua fesoasoani mai ai Ieova ma maua lona finagalo malie. (Faitau le Roma 5:3-5; Iakopo 1:12.) O lea ua sili atu ai ona malosi lo tatou faamoemoe, nai lo o le taimi faatoʻā tatou maua ai le upu moni. E manaʻo Satani ina ia lofitūina i tatou i tofotofoga, ae o le fesoasoani a Ieova e mafai ai ona tatou taulau i le fesagaʻia o na tofotofoga taʻitasi.

UA PEI LO TATOU FAAMOEMOE O SE PULOUTAU

8. E faapefea ona pei le faamoemoe o se puloutau? (1 Tesalonia 5:8)

⁸ Ua faatusaina foʻi e le Tusi Paia lo tatou faamoemoe i se puloutau. (Faitau le 1 Tesalonia 5:8.) E faia e se fitafita le puloutau ina ia puipuia ai lona ulu mai i osofaʻiga a lona fili. I la tatou taua faaleagaga, e manaʻomia foʻi ona puipuia o tatou mafaufau mai i osofaʻiga a Satani. E na te faaaogāina le tele o faaosoosoga ma manatu e faasesēina ai o tatou mafaufau. E pei lava ona puipuia e se puloutau le ulu o se fitafita, e faapena foʻi ona puipuia e lo tatou faamoemoe o tatou mafaufau, ina ia tatou tumau ai ma le faamaoni iā Ieova.

9. O le ā e tupu i tagata e leai se faamoemoe?

⁹ O le a fesoasoani lo tatou faamoemoe o le ola e faavavau, e tatou te gaoioi ai ma le atamai ma le faautauta. Ae pe afai e vaivai lo tatou faamoemoe ma faataga manatu faaletagata e taaʻina o tatou mafaufau, o le a galo ai iā i tatou lo tatou faamoemoe o le ola e faavavau. Ia mātau le mea na tupu i nisi o Kerisiano i Korinito anamua. Na mou atu lo latou faatuatua i se folafolaga tāua a le Atua, o le faamoemoe o le toetū. (1 Kori. 15:12) Na tusi Paulo, o i latou e lē talitonu i le toetū e pau lava le fuafuaga o o latou olaga, o le faamalie lea o latou lava tuʻinanauga. (1 Kori. 15:32) O le toʻatele i aso nei o ē e lē talitonu i folafolaga a le Atua, e latou te faia so o se mea e fiafia i ai. Peitaʻi e ese mai ai i tatou, ona e tatou te maufaatuatuaina le lumanaʻi ua folafola mai e le Atua. E pei lo tatou faamoemoe o se puloutau faafaatusa, lea e puipuia o tatou mafaufau ma leoleoina i tatou mai i le faia o le mea e manaʻo ai le tagata lava ia, ma faaleagaina ai la tatou faiā ma Ieova.​—1 Kori. 15:33, 34.

10. E faapefea i lo tatou faamoemoe ona puipuia ai i tatou mai i mafaufauga sesē?

¹⁰ O lo tatou faamoemoe e puipuia ai foʻi i tatou mai i le mafaufau, e leai se aogā e taumafai ai e faafiafia le finagalo o Ieova. O se faataʻitaʻiga, e ono manatu nisi: ʻE lē mafai ona avea aʻu o se tasi o i latou ia e maua le ola e faavavau. E lē mafai ona ou ausia tapulaa a le Atua.’ Ia mātau, na faaaogā foʻi e Elifasa o se tasi o le ʻaufaamāfanafana pepelo na ituaiga faamatalaga, ina ua talanoa atu iā Iopu. Na ia faapea atu: “O ai ea le tagata e mamā ai o ia?” Na ia faapea atu foʻi e faatatau i le Atua: “Faauta! Ua lē faatuatua o ia i ona tagata paia, ma e oo foʻi i le lagi ua lē mamā i lana silafaga.” (Iopu 15:14, 15) Pagā le mataʻutia o nei pepelo! Ia manatua o Satani lea o loo manaʻo e te mafaufau faapena. E na te iloa pe afai e faaauau ona e mafaufau faapena, o le a amata ona mou atu lou faamoemoe. O lea, ia teena na pepelo ma taulaʻi i folafolaga a Ieova. Ia e mautinoa o lona finagalo ia e ola e faavavau, ma o le a ia fesoasoani iā te oe ina ia ausia lenā sini.​—1 Timo. 2:3, 4.

IA FAAMALOSIA PEA LOU FAAMOEMOE

11. Aiseā e tatau ai ona tatou faatalitali ma le onosaʻi seʻia faataunuu lo tatou faamoemoe?

¹¹ E lē o taimi uma e faigofie ai ona faamalosia pea lo tatou faamoemoe. Atonu e lē lava lo tatou onosaʻi a o tatou faatalitali i le faataunuuga o folafolaga a le Atua. Peitaʻi e tumau e faavavau Ieova, ma e ese le auala e na te silasila ai i le taimi mai i le auala e tatou te vaai i ai. (2 Pete. 3:8, 9) E na te faia le mea sili e faataunuu ai lona finagalo, ae atonu e na te lē faataunuuina i le taimi e tatou te mafaufau e tatau ona faataunuu ai. O le ā e fesoasoani iā i tatou ina ia faamalosia ai pea lo tatou faamoemoe, a o tatou faatalitali ma le onosaʻi i le faataunuuga o folafolaga a le Atua?​—Iako. 5:7, 8.

12. E tusa ai ma le Eperu 11:1, 6, o le ā le fesootaʻiga o le faamoemoe i le faatuatua?

¹² E faamalosia pea lo tatou faamoemoe pe a tatou vavalalata pea iā Ieova, o lē e faataunuuina lo tatou faamoemoe. I le Tusi Paia, e iai le fesootaʻiga o le faamoemoe i le faatuatua o loo soifua Ieova, ma “e na te tauia o ē e matuā saʻili iā te ia.” (Faitau le Eperu 11:1, 6.) Pe afai e moni Ieova iā i tatou, o le atili foʻi lenā ona tatou maufaatuatuaina o le a ia faia mea uma ua ia folafolaina mai. Seʻi o tatou iloiloina ni auala aogā e faamalosia ai la tatou faiā ma Ieova, ma atili ai ona malosi lo tatou faamoemoe.

13. E faapefea ona tatou mafuta vavalalata atu i le Atua?

¹³ Ia tatalo iā Ieova ma faitau i lana Afioga. E ui e lē mafai ona tatou vāai iā Ieova, ae e mafai ona tatou mafuta vavalalata atu iā te ia. E mafai ona tatou talanoa iā te ia i le tatalo ma le mautinoa, o le a ia faafofoga mai iā i tatou. (Iere. 29:11, 12) E tatou te faalogo i le Atua, e ala i le faitau i lana Afioga ma manatunatu loloto i ai. A o tatou faitau i le auala na tausia ai e Ieova i latou na faamaoni iā te ia i taimi ua teʻa, o le a atili ai ona faamalosia lo tatou faamoemoe. O mea uma o loo iai i le Afioga a le Atua, “na tusia e faatonu ai i tatou, ina ia tatou maua le faamoemoe e ala i lo tatou tumau, ma le faamāfanafana mai o Tusitusiga Paia.”​—Roma 15:4.

14. Aiseā e tatou te manatunatu ai i mea ua faataunuuina e Ieova mo isi?

¹⁴ Ia manatunatu i le auala na tausia ai e Ieova ana folafolaga. Seʻi mafaufau i le mea na faia e le Atua mo Aperaamo ma Sara. Ua la oo i le matutua e lē mafai ai ona toe fanauina ni fanau. Ae na folafola mai e le Atua, o le a la maua se tama. (Kene. 18:10) O le ā le auala na tali atu ai Aperaamo? Ua taʻua i le Tusi Paia, ʻna faatuatua o ia o le a avea o ia ma tamā o atunuu e tele.’ (Roma 4:18) I le vaaiga faaletagata e leai se faamoemoe o le tulaga na oo iā Aperaamo, ae na ia mautinoa o le a faataunuu e Ieova lana folafolaga. Na tauia le faatuatua o lenā tane faamaoni. (Roma 4:19-21) Ua tatou aʻoaʻoina mai i lenei tala, e mafai ona tatou faalagolago pea iā Ieova e na te faataunuuina ana folafolaga, e tusa pe e tatou te manatu e lē mafai ona faataunuuina.

15. Aiseā e tatau ai ona tatou manatunatu i mea ua faia e le Atua mo i tatou?

¹⁵ Ia manatunatu i mea ua faia e Ieova mo oe. Ia mafaufau i le auala ua aogā patino ai iā te oe le faataunuuga o folafolaga o loo i le Afioga a le Atua. O se faataʻitaʻiga, na folafola mai e Iesu o le a saunia mai e lona Tamā, mea e te manaʻomia i le olaga. (Mata. 6:32, 33) Ua faamautinoa mai foʻi e Iesu, o le a foaʻi mai e Ieova lona agaga paia pe a e talosaga atu ai. (Luka 11:13) Na faataunuuina e Ieova na folafolaga. Atonu e te manatunatu i nisi folafolaga ua faataunuuina e le Atua mo oe. O se faataʻitaʻiga, ua ia folafola mai e na te faamagalo oe, faamāfanafana iā te oe, ma fafagaina oe i le itu faaleagaga. (Mata. 6:14; 24:45; 2 Kori. 1:3) Pe a e manatunatu i mea ua faia e le Atua mo oe, o le a faamalosia ai lou faamoemoe i mea o le a ia faia mo oe i le lumanaʻi.

IA OLIOLI I LE FAAMOEMOE

16. Aiseā ua avea ai le faamoemoe o se meaalofa tautele?

¹⁶ O lo tatou faamoemoe o le ola e faavavau, o se meaalofa tautele mai i le Atua. E tatou te tulimataʻia se lumanaʻi matagofie lea e mautinoa o le a tupu. E pei lo tatou faamoemoe o se taula, lea e faatumauina i tatou ina ia mafai ona onosaia tofotofoga, sauāga, ma e oo lava i le oti. E pei foʻi lo tatou faamoemoe o se puloutau, lea e puipuia o tatou mafaufau e teena ai le mea sesē ae faia le mea saʻo. O lo tatou faamoemoe lea e faavae i le Tusi Paia, ua tatou vavalalata atu ai i le Atua ma ua faaalia mai ai lona alofa loloto iā i tatou. E tatou te mauaina le tele o aogā, a o tatou taumafai e faamalosia pea lo tatou faamoemoe.

17. E faapefea i lo tatou faamoemoe ona maua ai le olioli?

¹⁷ I le tusi a le aposetolo o Paulo i Kerisiano i Roma, na ia faalaeiau atu ai ina “ia olioli i le faamoemoe.” (Roma 12:12) Sa mafai ona olioli Paulo ona na ia mautinoa, pe afai e tumau ma le faamaoni o le a ia maua le ola e faavavau i le lagi. E mafai foʻi ona tatou olioli i lo tatou faamoemoe, ona e tatou te mautinoa o le a faataunuu e Ieova ana folafolaga. E pei ona tusi le faisalamo, “e fiafia le tagata . . . o lē e faamoemoe iā Ieova lona Atua, . . . o Lē e tumau ona faamaoni i taimi uma.”​—Sala. 146:5, 6.