1. E faapefea ona e aafia i uō e te filifilia?

E tatou te ono aafia i tagata e tatou te faifaimea faatasi. E tusa pe e tatou te faifaimea faatasi pe fesootaʻi i luga o le initaneti, e mafai lava ona iai aafiaga lelei po o aafiaga leaga. Ua faapea mai le Tusi Paia, “o lē e savali ma tagata atamamai, e atamai ai o ia, a o lē e faifaimea faatasi ma tagata vālea [tagata e lē alolofa iā Ieova], e leaga ai lava o ia.” (Faataoto 13:20) O uō e alolofa ma tapuaʻi iā Ieova, e mafai ona fesoasoani iā te oe ia vavalalata atu iā Ieova ma faia filifiliga lelei. Ae o uō vavalalata e lē alolofa iā Ieova, e mafai ona latou tosina ese i tatou mai iā te ia. E lētioa a faalaeiau mai le Tusi Paia e filifili ma le atamai a tatou uō! Pe afai tatou te faauō i tagata e alolofa i le Atua, o le a tatou maua faatasi ai ma i latou aogā. O le a tatou “fefaalaeiauaʻi pea ma atiaʻe e le tasi le isi.”​—1 Tesalonia 5:11.

Ina ua foafoaina i tatou e Ieova, na ia tuuina mai iā i tatou se meaalofa tautele, o le tautala. Pe e tāua iā te ia le auala e tatou te faaaogā ai lenā meaalofa? Ioe, e tāua! (Faitau le Iakopo 1:26.) E faapefea la ona faaaogā lo tatou tomai e tautala ai, i se auala e faafiafiaina ai Ieova?

1. E faapefea ona tatou faaaogā lelei le meaalofa o le tautala?

Ua faalaeiauina i tatou e le Tusi Paia, ina ia “fefaalaeiauaʻi pea ma atiaʻe e le tasi le isi.” (1 Tesalonia 5:11) Pe e te iloa se tasi o loo manaʻomia ni faalaeiauga? O le ā e mafai ona e faia e fesoasoani ai iā te ia? Ia faamautinoa i ai lou manatu mamafa iā te ia. E mafai ona e faailoa i ai māfuaaga e te talisapaia ai o ia. Pe e iai se mau e te manatu e mafai ona faalaeiau ai se tasi e te masani ai? E tele mau e mafai ona e filifili ai. E tatau foʻi ona manatua, e mafai ona faalaeiauina se tasi i le auala e te talanoa atu ai, e pei lava ona faalaeiauina i upu o loo e fai atu. O lea, ia taumafai e tautala atu i se auala agalelei ma filemu i taimi uma.​—Faataoto 15:1.

2. O ā ituaiga faamatalaga e tatau ona tatou ʻalofia?

Ua faapea mai le Tusi Paia: “Ia aua neʻi alu atu se upu leaga mai i o outou gutu.” (Faitau le Efeso 4:29.) O lona uiga, e lē tatau ona tatou tautatala i upu masoā, po o faamatalaga sauā ma lē alofa, e faatigā ai i faalogona o isi. E tatau foʻi ona tatou ʻalofia le faitala ma le faia o tala taufaaleaga.​—Faitau le Faataoto 16:28.

3. O le ā e fesoasoani iā i tatou e faia ai ni faamatalaga faalaeiau?

E masani lava, o mea e tatou te talanoa atu ai, e iloa ai mea o loo i o tatou loto ma mafaufau. (Luka 6:45) E ao ona toleni i tatou lava ina ia uaʻi atu i mea lelei, e pei o mea ua tonu, mea ua mamā, mea e faatupu ai le lotofiafia, ma mea e viia ai se tasi. (Filipi 4:8) Ina ia mafai ona tatou uaʻi atu i nei mea, e tatau ona filifili lelei a tatou faafiafiaga ma uō. (Faataoto 13:20) E fesoasoani foʻi le mafaufau muamua i upu o le a fai atu ma le auala e fai atu ai, a o leʻi tautala. Ia mafaufau i aafiaga o au upu i isi. Ua faapea mai le Tusi Paia: “O le tagata e tautala lē mafaufau, ua pei o le tutuʻi o le pelu, a o laulaufaiva o ē e atamamai, e mālōlō ai.”​—Faataoto 12:18.

SAʻILIʻILI ATILI

4. Ia faaeteete i faamatalaga e fai atu, o le taimi, ma le auala e fai atu ai

E iai taimi e tatou te faia ai ni faamatalaga e tatou te toe salamō ai. (Iakopo 3:2) Faitau le Kalatia 5:22, 23, ona talanoa lea i fesili nei:

• O fea o nei uiga e mafai ona e tatalo atu ai, ina ia fesoasoani e pulea ai lau tautala? E faapefea ona fesoasoani nei uiga iā te oe?

Faitau le 1 Korinito 15:33, ona talanoa lea i le fesili lenei:

• E faapefea i uō ma faafiafiaga e te filifilia ona aafia ai le auala e te tautala ai?

Faitau le Failauga 3:1, 7, ona talanoa lea i le fesili lenei:

• O le ā se taimi e lē tatau ai ona fai atu se tala, pe faatali foʻi i se taimi talafeagai e fai atu ai?

5. Ia faia faamatalaga lelei e faatatau i isi

VITIŌ: Tautala i “Upu Lelei e Atiaʻe ai” Isi (4:03)

• I le vitiō, aiseā na manaʻo ai le uso e sui le auala e talanoa ai e faatatau i isi?

• O le ā na ia faia ina ia suia ai le auala e tautala ai?

Faitau le Failauga 7:16, ona talanoa lea i le fesili lenei:

• O le ā e tatau ona tatou manatua pe a faaosoosoina i tatou e faia se tala lē lelei e faatatau i se isi?

Faitau le Failauga 7:21, 22, ona talanoa lea i le fesili lenei:

• E faapefea ona fesoasoani lenei mau iā te oe, e ʻalofia ai le vave ita pe a faia e se tasi se tala lē lelei e faatatau iā te oe?

6. Ia talanoa atu ma le agalelei i lou aiga

VITIŌ: O le Alofa ma le Faaaloalo e Autasia ai Aiga (3:08)

• O le ā e fesoasoani iā te oe e talanoa atu ai ma le agalelei i lou aiga?

Faitau le Efeso 4:31, 32, ona talanoa lea i le fesili lenei:

• O ā ituaiga faamatalaga e atiaʻe ai se aiga?

Na faailoa mai e Ieova ona faalogona e faatatau i lona Alo o Iesu. Faitau le Mataio 17:5, ona talanoa lea i le fesili lenei:

• E faapefea ona e faaaʻoaʻo iā Ieova i le auala e te fesootaʻi ai ma lou aiga?

AOTELEGA

E telē le aafiaga o faamatalaga e tatou te faia. E tatau la ona tatou faaeteete i faamatalaga e fai, o le taimi e fai ai, ma le auala e fai atu ai.

Fesili Autalu

• E faapefea ona e faaaogā le meaalofa o le tautala e fesoasoani ai i isi?

• O ā ituaiga faamatalaga e te manaʻo e ʻalofia?

• O le ā e fesoasoani iā i tatou ina ia faia ai faamatalaga agalelei ma atiaʻe ai i taimi uma?

MANATU FAAOPOOPO

O le ā e fesoasoani iā i tatou ina ia fai atu ni upu e atiaʻe ai?

Ia iā i Tatou le Laulaufaiva o Ē e Atamamai (8:04)

O le ā e fesoasoani iā te oe e ʻalofia ai le tautala i upu masoā?

“O le ā le Matuiā o le Palauvale?” (Mataupu i le jw.org)

Mātau pe faapefea ona e ʻalofia le mailei o le faitala taufaaleaga.

E Faapefea Ona Ou ʻAlofia le Faitala? (2:36)

Mātau pe na faapefea ona fesoasoani Ieova i se tamāloa, na taumafai malosi e taofia le faaaogāina o upu masoā.

“Na Amata ai Ona Ou Mafaufau Loloto i le Mea e Tatau Ona Fai i Loʻu Olaga” (Le Olomatamata, Aokuso 1, 2013)