Lomiga mo le Polokalame mo le Sauniga o le Faiva ma le Olaga Faa-Kerisiano
ME 6-12
ʻOA TAUTELE MAI I LE AFIOGA A LE ATUA | 2 KORINITO 4-6
“Tatou te Lē Faavaivai”
(2 Korinito 4:16) O le mea lea tatou te lē faavaivai ai, ae e ui lava ina tauau ina uma atu lo tatou tagata i fafo, ae ua faafouina pea lo tatou tagata i totonu i lea aso ma lea aso.
Lē Lavā Ae e Lē Vaivai Ai
16 E matuā tāua tele le tausia o lo tatou mālōlōina faaleagaga. Pe a iai sa tatou faiā māfana ma Ieova le Atua, e tatou te ono lagonaina le vaivai o le tino, ae o le a lē taitai ona tatou fiu e tapuaʻi atu iā te ia. O Ieova o ia lea e na te “avatua le malosi i ē ua vaivai; a o ē ua leai se malosi, na te faatuputele i ai le malosi.” (Isaia 40:28, 29) Na tusi le aposetolo o Paulo o lē na iloa le moni o nei upu: “Matou te lē faavaivai . . . auā e ui lava ina tauau ina uma lo matou tagata i fafo, ua faafouina lē i totonu i lea aso ma lea aso.”—2 Korinito 4:16.
17 Mātau le faaupuga “i lea aso ma lea aso.” O lona uiga ia tatou faaaogā sauniuniga a Ieova i lea aso ma lea aso. O se misionare sa auauna faamaoni mo le 43 tausaga, sa fesagaʻi ma ni taimi o le vaivai o le tino ma le loto vaivai. Ae e leʻi faavaivai ai. Ua ia faapea mai: “E fai ma aʻu masani le vave ona ala i le taeao ina ia mafai ona ou tatalo ai iā Ieova ma faitau lana Afioga a o leʻi amata galuega o le aso. O lenei faasologa masani, ua fesoasoani iā te aʻu e lavātia ai mea seʻia oo mai lava i le taimi nei.” E mafai moni lava ona tatou faalagolago atu i le malosi mai iā Ieova pe a tatou tatalo iā te ia “i lea aso ma lea aso,” ma manatunatu i ona uiga mataʻina ma ana folafolaga.
(2 Korinito 4:17) E ui lava e puupuu ma māmā puapuaga, ae e iʻu ai ina maua e i tatou le mamalu, o le mamalu e sili atu ma e faavavau;
it-1 724-725
Tumau
E tāua foʻi ona taulaʻi atu pea i le faamoemoe faa-Kerisiano, o le ola lea e faavavau i se tulaga lelei atoatoa. E lē mafai ona aveesea lenā faamoemoe e tusa pe e fasiotia i tatou e i latou e faasauā mai. (Ro 5:4, 5; 1Te 1:3; Fal 2:10) Po o ā lava faafitauli o loo tatou fesagaʻia i aso nei, e galo uma pe a faatusatusa i le taimi o le a faataunuu ai lenā faamoemoe. (Ro 8:18-25) E tusa po o le ā le ogaoga o mafatiaga i le taimi nei, ae o na mafatiaga e “puupuu ma māmā” pe a mafaufau i le ola e faavavau o le a iai. (2Ko 4:16-18) Pe a manatua e lē tumau luʻi o loo iai nei ma taulaʻi atu pea i le faamoemoe faa-Kerisiano, o le a mafai ai e se tasi ona ʻalofia le lolo atu i le lotomafatia ma le lē faamaoni iā Ieova le Atua.
(2 Korinito 4:18) a o taulaʻi atu la tatou vaai i mea e lē vaaia ae e lē o mea e vaaia. Auā o mea ua vaaia e lē tumau ia, a o mea e lē o vaaia e faavavau ia.
Saʻiliʻiliga Loloto mo ʻOa Faaleagaga
(2 Korinito 4:7) Ae peitaʻi, ua iā i matou lenei ʻoa i ipu omea, ina ia matou maua le mana lea e sili atu i le malosi o tagata, o le mana lea e mai i le Atua, ae e lē mai iā i matou lava.
ʻIa Faafiafia le Finagalo o Ieova’
Na talanoaina lenā matua faale-Tusi Paia e le uso o David Splane o se sui o le Vaega Pule. (2 Korinito 4:7) O le ā le ʻoa? Po o faasino atu i le poto po o le atamai? Na tali mai le failauga: “E leai. O le ʻoa na taʻua e Paulo, o loo faasino mai i ʻlenei faiva’ o le ʻfaalauiloaina o le upu moni.’” (2 Korinito 4:1, 2, 5) Na faamanatu e le uso o Splane i le ʻauaʻoʻoga, o masina e lima sa faaaluina i le faia o suʻesuʻega, ua saunia ai i latou mo se tofiga faapitoa i le faiva, ma e tatau ona matuā faatāua lenā tofiga.
Na faamatala e le failauga, o “ipu omea” e faasino mai i o tatou tino. Na ia faia se faaeseesega o ipu e faia i le omea ma ipu e faia i le auro. O ipu auro e seāseā ona faaaogāina, ae e masani ona faaaogā ipu e faia i le omea. Pe afai e tatou te tuuina se ʻoa i totonu o se ipu auro, e ono tutusa la lo tatou uaʻi atu i le ipu auro ma le uaʻi atu i le ʻoa o loo i totonu. Na faapea mai le uso o Splane: “O outou le ʻauaʻoʻoga, e tou te lē mananaʻo e fai outou ma taulaʻiga o mea uma. I le avea ma misionare, e tou te mananaʻo e faauaʻi atu tagata iā Ieova. O outou o ipu omea faatauvaa.”
(2 Korinito 6:13) O lea, ou te tautala atu ai iā te outou e pei ona ou tautala i le fanau, ia outou faia e pei ona matou faia, ia faalautele atu o outou loto.
Ia Tuputupu Pea le Alofa Faaleuso
7 Ae faapefea i tatou? E faapefea ona “faalautele atu o tatou loto” i le alofa faaleuso? O le tulaga masani le fiafia i ē e tatou te tupulaga pe nuu faatasi. Ma e faifaimea faatasi i latou e tutusa mea e fiafia i ai. Ae afai ua faigatā ona tatou faamasani i isi ona e eseese mea e tatou te fiafia i ai, e ao ona “faalautele atu o tatou loto.” O se mea lelei le fesili ifo e faapea: ʻPo o seāseā ona matou talaʻi pe tafafao faatasi ma isi o le ʻauuso ona ou te lē masani tele ai? I le Maota mo Sauniga, pe e seāseā ona ou talanoa i ē e fou mai ona ou te manatu seʻi agaʻi i luma ona ou faauō lea i ai? Po o ou faafeiloaʻi atu i ē matutua ma ē iti i le faapotopotoga?’
Faitau Tusi Paia
(2 Korinito 4:1-15) O le mea lea matou te lē faavaivai ai, talu ai ua tuuina mai iā i matou lenei faiva, e tusa ma le alofa mutimutivale na faaalia mai iā i matou; 2 a ua matou lafoaʻia mea pepelo e māsiasi ai, e lē savavali ma le faapiʻopiʻo, e lē faafilogia foʻi le afioga a le Atua, a ua matou faailoa atu le upu moni, ma ua fai i matou ma faaaʻoaʻoga lelei i lotofuatiaifo o tagata uma i le silafaga a le Atua. 3 O lenei, afai ua ufitia le tala lelei o loo matou talaʻia atu, ua ufitia i ē ua faaumatia, 4 ua faatauasoina manatu o i latou o ē e lē talitonu e le atua o lenei faiga o mea a le lalolagi, ina neʻi pupula atu iā i latou le tala lelei matagofie e uiga iā Keriso, o ia o le faatusa o le Atua. 5 Auā ua matou lē talaʻia atu i matou lava a o Keriso Iesu o le Alii lea, ma o i matou o a outou pologa ona o Iesu. 6 Auā o le Atua o lē na fetalai: “Ia susulu atu le malamalama mai i le pogisa,” ma ua faasusulu mai e ia i o matou loto, ina ia malamalama ai i le poto faamamaluina o le Atua e ala i fofoga o Keriso. 7 Ae peitaʻi, ua iā i matou lenei ʻoa i ipu omea, ina ia matou maua le mana lea e sili atu i le malosi o tagata, o le mana lea e mai i le Atua, ae e lē mai iā i matou lava. 8 Ua omia i matou i puapuaga, ae e lē taofiofia ai; ua fememeaʻi i matou, ae e lē matuā fememeaʻi ai; 9 ua sauāina i matou, ae e lē tuulafoaʻiina ai; ua lafotuina i matou, ae e lē faaumatia ai. 10 E onosaia pea e lo matou tino faiga leaga e oti ai na oo iā Iesu, ina ia faaalia i lo matou tino le soifuaga o Iesu. 11 Auā o i matou o loo ola, ua fesagaʻi pea i taimi uma ma le oti ona o Iesu, ina ia faaalia ai i lo matou tino augavale le soifuaga o Iesu. 12 Ua galue le oti i totonu o i matou, a o le ola i totonu o outou. 13 O lenei, ona ua iā i matou lea lava agaga o le faatuatua e pei ona tusia: “Ua ou faatuatua, o le mea lea ou te tautala atu ai,” ua matou faatuatua foʻi, o le mea lea matou te tautatala atu ai, 14 i le iloa o lē na faatūina Iesu e na te faatūina foʻi i tatou, ina ia autasi ma Iesu, ma tuuina atu i matou faatasi ma outou. 15 Auā o mea uma lava e mo lo outou lelei, ina ia faateleina le agalelei faifua ma saga faateleina ai, ona o le toʻatele o tagata ua faafetai atu i le Atua, ma faamamaluina ai o ia.
ME 13-19
ʻOA TAUTELE MAI I LE AFIOGA A LE ATUA | 2 KORINITO 7-10
“La Tatou Faiva o le Foaʻi Atu”
(2 Korinito 8:1-3) O lenei, e matou te faailoa atu iā te outou le ʻauuso e, e uiga i le agalelei faifua o le Atua lea na foaʻiina mai i faapotopotoga i Maketonia; 2 a o mafatia i latou ona o tofotofoga tigā. E ui i lo latou matuā matitiva ae ua tele lo latou olioli, auā ua faaalia lo latou mauʻoa, ona o le tele o lo latou limafoaʻi. 3 E tusa ma mea latou te mafaia, e moni ou te taʻutino atu, na faia e sili atu i lo mea na latou mafaia,
ʻE Alofa le Atua i Lē Foai ma le Loto Malie’
Muamua lava, sa taʻu atu e Paulo i tagata Korinito e faatatau ia i latou i Maketonia, o ē na fai ma faataitaiga le auala na latou tali atu ai. Na tusi atu Paulo faapea: “Auā na tofotofoteleina i latou i puapuaga ua atili ai lo latou olioli, atoa ma lo latou mativa matuā tele, ua sili ai le faulai o lo latou matamau.” Sa lei manaomia ona uunai faamalosi tagata Maketonia e foai atu. Na i lo lena, fai mai Paulo: “Ua matuā aioi mai ia te i matou ina ia talia e i matou le mea alofa.” E mataina le foai ma le fiafia a le au Maketonia pe a tatou manatunatu i lo latou “mativa matuā tele.”—2 Korinito 8:2-4.
Le Faiva o le Foaʻi Atu
UA IAI se oge tele i Iutaia i le pe tusa o le 46 T.A. O le utiuti o meaʻai ua taugatā ai, ma matuā faigatā ai i Kerisiano Iutaia ona faatauina. O lea, ua matuā galala tagata i le fia aai. Peitaʻi, ua lata i le taimi e maua ai e soo le puipuiga a Ieova, lea e latou te leʻi tofo muamua i ai. O le ā le mea o le a tupu?
(2 Korinito 8:4) auā o lo latou lava lotomalilie, na matuā ʻaiʻoi mai ai iā i matou mo se faaeaga e foaʻi atu ai ma le agalelei, ma se sao i le faiva ua tofia i le ʻaupaia.
Le Faiva o le Foaʻi Atu
4 I le tusi lona lua a Paulo i Korinito, na ia faamatala mai ai e lua vala o le faiva faa-Kerisiano. E ui sa tusi atu Paulo i Kerisiano faauuina, ae e mafai foʻi ona faatatau lana fautuaga i “isi mamoe” a Keriso i aso nei. (Ioa. 10:16) O se tasi vala o la tatou faiva, o le “faiva o le leleiga” po o le galuega talaʻi ma le aʻoaʻo atu. (2 Kori. 5:18-20; 1 Timo. 2:3-6) Ae o le isi vala e aofia ai galuega e tatou te faia mo uso ma tuafāfine. O lea, na taulaʻi patino atu le faamatalaga a Paulo i le “faiva [o le foaʻi atu].” (2 Kori. 8:4) O le faaaogāina o le upu “faiva” i le faaupuga “faiva o le leleiga,” ma le “faiva [o le foaʻi atu],” e faaliliu mai i se vaega o le upu Eleni di·a·ko·niʹa. Aiseā e tāua ai lenei vala?
5 O le faaaogāina o lenei upu Eleni i nei vala e lua, na faafesootaʻi ai e Paulo le faiva o le foaʻi atu i isi vala o la tatou faiva faa-Kerisiano. Na ia faapea mai: ʻE eseese auaunaga, a o le Alii lava e tasi, e eseese foʻi galuega, ae e faia e lea lava agaga.’ (1 Kori. 12:4-6, 11) Na faafesootaʻi atu e Paulo faiva po o auaunaga eseese i le faapotopotoga, i le “auaunaga paia.” (Roma 12:1, 6-8) O le māfuaaga lea na ia manatu ai e faaalu se vaega o lona taimi, e ʻauauna ai i le ʻaupaia.’—Roma 15:25, 26.
6 Na fesoasoani Paulo iā i latou i Korinito e iloa le māfuaaga e avea ai le faiva o le foaʻi atu, ma vaega o la latou faiva ma le tapuaʻiga iā Ieova. Seʻi mātau le auala na ia fefulisaʻi ai i lenei manatu: E faia e Kerisiano le faiva o le foaʻi atu, ona o le “gauaʻi i le tala lelei e uiga i le Keriso.” (2 Kori. 9:13) O lea, o le naunau o Kerisiano e faatatau aʻoaʻoga a Keriso, na latou fesoasoani ai i o latou uso talitonu. Na taʻua e Paulo o galuega lelei na latou faia mo o latou uso, ua faaalia ai le “matuā tele o le agalelei faifua o le Atua.” (2 Kori. 9:14; 1 Pete. 4:10) Na taʻua i le Watchtower o Tesema 1, 1975 le manatu lenei e faatatau i le fesoasoani atu i manaʻoga o o tatou uso, e aofia ai le faiva o le foaʻi atu: “Ia tatou mautinoa e matuā tāua iā Ieova le Atua ma lona Alo o Iesu Keriso lenei vala o le auaunaga.” O le faiva o le foaʻi atu, o se vala tāua o la tatou auaunaga paia.—Roma 12:1, 7; 2 Kori. 8:7; Epe. 13:16.
(2 Korinito 9:7) Ia taʻitoʻatasi ma faia e tusa ma le mea ua filifili i lona loto, aua le faia ma le tigā, aua foʻi le faia faamalosi, auā e alofa le Atua i lē e foaʻi ma le lotofiafia.
O Auala e Faatupe ai Galuega o le Malo
10 Muamua, e tatou te faia foaʻi tauofo ona o lo tatou alolofa iā Ieova, ma mananaʻo e “faia mea e lelei i lana silafaga.” (1 Ioa. 3:22) E fiafia le finagalo o Ieova i se tagata tapuaʻi e faia lana foaʻi mai i le loto. Seʻi o tatou iloiloina le fautuaga a Paulo i Kerisiano e faatatau i le auala e tatau ona faia ai foaʻi. (Faitau le 2 Korinito 9:7.) E lē faia faamalosi e se Kerisiano moni se foaʻi. Nai lo o lea, e na te faia se foaʻi ona ua ia “filifili i lona loto” e faia faapea. E mafaufau muamua o ia i le manaʻoga ua tulaʻi mai faapea le auala e faatino ai lana foaʻi. E fiafia Ieova iā i latou e faia faapea, talu ai “e alofa le Atua i lē e foaʻi ma le lotofiafia.” Ua faapea mai se tasi faaliliuga: “E fiafia le Atua iā i latou e fiafia e foaʻi.”
Saʻiliʻiliga Loloto mo ʻOa Faaleagaga
(2 Korinito 9:15) E faafetai i le Atua mo lana meaalofa foaʻifua e lē mafaamatalaina.
Faamalosia Ona o le “Meaalofa Foaʻifua” a le Atua
2 Na mautinoa e Paulo o le a faataunuuina folafolaga matagofie uma a le Atua e ala i le taulaga lelei atoatoa a Keriso. (Faitau le 2 Korinito 1:20.) O lenei “meaalofa foaʻifua e lē mafaamatalaina” e aofia uma ai le lelei ma le alofa faamaoni o Ieova, lea ua faalautele mai iā i tatou e ala iā Iesu. O lea, o lenei meaalofa mataʻina e lē mafai ona faamatalaina atoatoa i ni upu. E faapefea la i le mauaina o lenā meaalofa ona aafia ai i tatou? E faapefea ona avea lenei meaalofa o se uunaʻiga lelei a o tatou sauniuni mo le Faamanatuga o le maliu o Keriso i le Aso Lulu o Mati 23, 2016?
(2 Korinito 10:17) “Ae o lē e mitamita, ia mitamita o ia iā Ieova.”
g99-SM 10/8 30-31
Pe Sesē le Faamaualuga?
I Tusitusiga Kerisiano Eleni, o le veape kau·khaʹo·mai, ua faaliliuina i le “faamaualuga, mimita, gugutu,” ua faaaogāina i se uiga lē lelei ma se uiga lelei foi. Mo se faaaʻoaʻoga ua faapea mai Paulo, e mafai ona “mitamita foi i tatou ma le faamoemoe i le manuia mai le Atua.” Ua ia fautua mai foi: “O lē mitamita, ia mitamita o ia i le Alii.” (Roma 5:2; 2 Korinito 10:17) O le uiga o lenei mea, o le faamaualuga lea ona ua avea Ieova ma o tatou Atua, o se faalogona lelei e ono taʻitaʻia ai i tatou e mitamita ona o lona suafa ma lona talaaga lelei.
Faitau Tusi Paia
(2 Korinito 7:1-12) O le mea lea le ʻaupele e, ona ua tuuina mai iā i tatou o nei folafolaga, o lea seʻi o tatou faamamā ai iā i tatou mai i mea uma e faaleagaina ai le tino ma le agaga, a ia faaatoatoaina le faapaiaina i le mataʻu i le Atua. 2 Ia faaavanoa mai o outou loto iā i matou. Matou te leʻi sesē i se tasi, matou te leʻi faaleagaina se tasi, matou te leʻi ʻolegiaina se tasi. 3 Ou te lē fai atu lenei mea e taʻusala ai outou. Auā na ou fai atu muamua, pe tatou te oti pe ola foʻi, ae ua iai outou i o matou loto. 4 Ua ou matuā saʻoloto e tautala atu iā te outou. Ua ou matuā mimita e uiga iā te outou. Ua tumu foʻi aʻu i faamāfanafanaga, ua matuā tele loʻu olioli i o matou puapuaga uma. 5 Ina ua matou taunuu i Maketonia, e leʻi mapu o matou tino, a ua faaauau pea ona puapuagatia i matou i mea uma, o taua i fafo ma popolega i totonu. 6 A o le Atua, o lē na te faamāfanafanaina ē ua lotomafatia, ua ia faamāfanafanaina i matou i le faatasi mai o Tito; 7 e lē na o lona faatasi mai, a o le faamāfanafanaga foʻi ua faamāfanafanaina ai o ia ona o outou, a o ia faamatala mai foʻi upu o lo outou naunau tele, o lo outou faanoanoa, ma lo outou maelega mo aʻu; o lea ua atili ai loʻu olioli. 8 Afai ua ou faatigā iā te outou ona o laʻu tusi, ou te lē salamō ai. E tusa lava pe na ou salamō muamua (ua ou iloa o lenā tusi na outou faanoanoa ai, a ua na o sina taimi,) 9 ae ua ou olioli i le taimi nei, e lē ona ua outou faanoanoa, ae ona ua iʻu lo outou faanoanoa i le salamō; auā ua outou faanoanoa e tusa ai ma le finagalo o le Atua, ina neʻi afāina outou i se mea ona o i matou. 10 Auā o le faanoanoa e tusa ai ma le finagalo o le Atua, e tupu ai le salamō ma oo ai i le faaolataga, lea e lē tatau ona faanoanoa ai; ae o le faanoanoa o le lalolagi e iʻu ai i le oti. 11 Faauta foʻi i lenei mea, o lo outou faanoanoa e tusa ai ma le finagalo o le Atua, ua outou matuā filigā ai, ua taʻumamāina ai outou, ua outou lototigā ai, ua outou matataʻu ai, ua outou naunau tele ai, ua outou maelega ai e faasaʻo mea sesē! Ua outou faaalia ai i mea uma la outou amio mamā e tusa ai ma lenei mataupu. 12 E ui lava ina ou tusi atu iā te outou, ae na ou tusi atu e lē ona o le tagata na faia le mea sesē, po o lē na faia i ai le mea sesē, ae ina ia faaalia ai i luma o le Atua lo outou naunau e faalogo mai iā i matou.
ME 20-26
ʻOA TAUTELE MAI I LE AFIOGA A LE ATUA | 2 KORINITO 11-13
“ʻLe Mea Matuitui i le Tino’ na Feagai ma Paulo”
(2 Korinito 12:7) ona o le tele o faaaliga. Ina neʻi oʻu soona faamaualuga, ua tuuina mai ai iā te aʻu le mea matuitui i le tino, o le agelu lea a Satani, ua pō mai pea iā te aʻu ina neʻi oʻu faamaualuga naʻuā.
Malosi Pea e Ui i Mea e Vaivai Ai
Na talosaga atu se tasi o auauna faamaoni iā Ieova ina ia aveese “le mea matuitui i le tino,” o se faafitauli na fai ma faalavelave iā te ia. E faatolu ona tatalo le aposetolo o Paulo i le Atua e aveese lenā faafitauli mai iā te ia. Po o le ā lava le faafitauli na iai lea e pei o se mea matuitui, sa ono mou atu ai le fiafia o Paulo i lana auaunaga iā Ieova. Na faatusa e Paulo lenā faafitauli e pei o se isi e faaauau ona tā atu iā te ia. Na tali mai Ieova e faapea: “Ua lava le agalelei faifua ua ou faaali atu iā te oe; auā ua faaatoaina loʻu mana i vaivaiga.” E leʻi aveesea e Ieova lenā mea matuitui i le tino. Sa tatau ona tauivi Paulo ma lenā faafitauli, ae sa ia toe faapea mai: “Pe a ou vaivai, ona ou malosi ai lea.” (2 Kori. 12:7-10) O le ā le uiga o lenā faamatalaga?
(2 Korinito 12:8, 9) O le mea lea na ou ʻaiʻoi faatolu ai i le Alii, ina ia aveese lenei mea mai iā te aʻu; 9 ae na faapea mai o ia iā te aʻu: “Ua lava le agalelei faifua ua ou faaali atu iā te oe; auā ua faaatoaina loʻu mana i le mea e vaivai ai.” E sili ai loʻu mitamita i mea ua ou vaivai ai, ina ia tumau ai le mana o le Keriso i luga iā te aʻu e pei o se faleʻie.
E Foaʻi Mai e Ieova le ʻAgaga Paia i Ē Ōle Atu iā te Ia’
17 Na tali mai Ieova i tatalo a Paulo, i le fetalai mai iā te ia: “O loʻu nei alofa tunoa e lava lea e fesoasoani iā te oe; auā o le vaivai e faaatoaina ai loʻu mana.” Na faapea mai Paulo: “O lea ua tele ai lava loʻu fiafia i le mitamita i mea ua ou vaivai ai, ina ia tumau i oʻu luga le mana o Keriso.” (2 Korinito 12:9; Salamo 147:5) O lea la ua iloa e Paulo, sa faamalumalu i ona luga e pei o se faleʻie le puipuiga a le Atua e ala mai iā Keriso. I aso nei, e faapena foʻi le auala o loo tali mai ai Ieova i a tatou tatalo. O loo ia faamalumalu mai lana puipuiga i luga o ana auauna.
18 O le mea moni, e lē avea le iai o se faleʻie ma itu e taofia ai le totō ifo o timuga po o le agi mai o matagi. Peitaʻi o le faleʻie e maua ai se puipuiga mai na mea. E faapena foʻi le faleʻie faafaatusa po o le puipuiga ua saunia e “le mana o Keriso.” E lē faapea o le a taofia ai le oo mai o puapuaga ma faigatā iā i tatou. Peitaʻi, o le a avea o se puipuiga faaleagaga mo i tatou, e teena ai mea leaga o lenei lalolagi, ma osofaʻiga a lē o pulea, o Satani lea. (Faaaliga 7:9, 15, 16) E tusa lava la po o e tauivi ma se puapuaga e lē o ʻalu ese ma oe,’ ae ia e mautinoa o loo silafia mai e Ieova lou mafatiaga, ma e tali mai o ia i lau “alaga atu.” (Isaia 30:19; 2 Korinito 1:3, 4) Na tusi mai Paulo: “Ua faamaoni le Atua, o lē na te lē tuuina atu outou i le faaosoosoga e sili i se mea ua outou lavātia, a e sauni foʻi faatasi ma le faaosoosoga se mea e sao ai, ina ia outou lavā oono.”—1 Korinito 10:13; Filipi 4:6, 7.
(2 Korinito 12:10) O lea, ua ou fiafia ai i mea ua ou vaivai ai, i le upuleagaina, i le mativa, i sauāga ma mea faigatā ona o Keriso. Auā pe a ou vaivai, ona ou malosi ai lea.
“E Na te Avatu le Malosi i Lē ua Vaivai”
8 Faitau le Isaia 40:30. E tusa lava po o le ā lo tatou agavaa, e tapulaa lava mea e mafai ona tatou faataunuuina i lo tatou lava malosi. O se lesona lenā e tatau ona tatou iloaina. E ui lava o le aposetolo o Paulo o se tane tomai, ae na iai mea na gata mai ai lona malosi ma lē mafai ai ona ia faia mea uma na manaʻo e fai. Ina ua ia faaleo atu i le Atua ona popolega, na fetalai mai o ia: “Ua faaatoaina loʻu mana i le mea e vaivai ai.” Na malamalama Paulo i le uiga o lenā fetalaiga ma na ia faapea mai: “Pe a ou vaivai, ona ou malosi ai lea.” (2 Kori. 12:7-10) O le ā na ia uiga atu i ai?
9 Na iloa e Paulo e faatapulaa mea e mafai ona ia faia pe a aunoa ma le fesoasoani a le Atua. Na mafai ona foaʻi atu e le agaga paia o le Atua le malosi na manaʻomia e Paulo. E lē gata i lea, na mafai e le agaga o le Atua ona faamalosia Paulo e faia ni galuega e lē mafai ona ia faataunuuina i sona lava malosi. E faapena foʻi i tatou. Pe afai o lo tatou malosi e mai iā Ieova, o le a tele la lo tatou malosi!
Saʻiliʻiliga Loloto mo ʻOa Faaleagaga
(2 Korinito 12:2-4) Ua ou iloa le tagata, o le soo o Keriso, ua sefulu fā tausaga talu ona ave faafuaseʻi i le lagi lona tolu, ou te lē mautinoa pe na i le tino pe e leʻi i le tino, ae e na o le Atua e na te silafia. 3 Ioe, ua ou iloa lenā tagata, ou te lē mautinoa pe na i le tino pe e leʻi i le tino, ae ua silafia e le Atua 4 na ave faafuaseʻi o ia i le parataiso, ma faalogo ai i upu e lē tatau ona taʻua, e sā foʻi ona tautala i ai se tagata.
Fesili Mai le ʻAufaitau
O “le lagi lona tolu” i le 2 Korinito 12:2, e foliga mai e faatatau atu i le Malo faa-Mesia lea o loo nofotupu ai Iesu Keriso ma le 144,000, ma o “le lagi fou” foʻi lenā.—2 Pete. 3:13.
E taʻua foʻi lenā pulega o “le lagi lona tolu,” auā o le Malo o le Atua o se pulega e sili ona lelei, ma sili ona maualuga.
O le “parataiso” lea na “ave faafuaseʻi” i ai Paulo i le faaaliga, e foliga mai e faasino atu i le (1) parataiso faaletino i le lalolagi i le lumanaʻi, (2) parataiso faaleagaga i le lalolagi fou, lea o le a sili atu ona telē nai lo o le parataiso faaleagaga i le taimi lenei, ma le (3) o “le parataiso a le Atua” i le lagi, lea o le a iai faatasi ma le lalolagi fou.
(2 Korinito 13:12) Ia faafeiloaʻi e le tasi le isi i le sogi paia.
it-2 177
Sogi
Le “Sogi Paia.” I taimi o uluaʻi Kerisiano, na iai le “sogi paia” (Ro 16:16; 1Ko 16:20; 2Ko 13:12; 1Te 5:26) po o le “sogi alofa” (1Pe 5:14), lea e foliga mai na fai i le va o ni tagata o le itupā e tasi. O lenei auala o faafeiloaʻiga na faia e uluaʻi Kerisiano, atonu e fesootaʻi atu i se tū masani faa-Eperu anamua o le faafeiloaʻi o se tasi e ala i le sogi atu. E ui e lē o taʻua i Tusitusiga Paia ni faamatalaga auʻiliʻili, ae o le “sogi paia” po o le “sogi alofa” na faailoa mai ai le alofa ma le autasi na iai i le faapotopotoga Kerisiano.—Ioa 13:34, 35.
Faitau Tusi Paia
(2 Korinito 11:1-15) O loʻu manaʻo, ia outou faapalepale mai iā te aʻu i loʻu lē fetuutuunaʻi. Ae o le mea moni, ua outou faapalepale mai lava iā te aʻu! 2 Auā ua ou fuā iā te outou e pei o le fuā o le Atua, auā na ou tautō e foaʻiina atu outou e faaipoipo i le tane e toʻatasi, ina ia ou tuuina atu outou iā te ia o se taupou mamā i le Keriso. 3 Ae ou te popole ina neʻi pei ona faasesēina o Eva e le gata i ana togafiti, e faapena foʻi ona faaleagaina o outou mafaufau, ia liliuese mai i le faamaoni ma le amio mamā e tatau ona outou faaalia i le Keriso. 4 Auā afai e alu atu se tasi ma talaʻi atu se Iesu e ese mai i lea na matou talaʻiina atu, pe e talia e outou se agaga e ese mai i lea na outou talia, po o se tala lelei e ese mai i lea na outou maua, ona vave lea ona outou talia o ia. 5 Auā ua ou manatu e leai se mea e tasi ou te itiiti ai i o outou aposetolo silisili. 6 Afai foʻi ou te valea i le upu, ou te lē valea lava i le poto; ae ua matou faailoa atu ai iā te outou i ala uma i mea uma lava. 7 Pe na ou faia ea se agasala i loʻu faamaulaloina o aʻu lava ina ia faaeaina ai outou, auā na ou naunau e folafola atu le tala lelei i le Atua e aunoa ma se taui mai iā te outou? 8 Na ou faoa mea mai i isi faapotopotoga, i le taliaina o la latou fesoasoani ina ia ou auauna atu ai iā te outou, 9 a o oʻu faatasi ma outou, na ou mativa ae e leʻi fai aʻu ma avega mamafa i se tasi, auā na saunia e uso na ō mai mai Maketonia le tele o mea mo aʻu. E leʻi fai aʻu ma avega mamafa iā te outou i mea uma lava ma ou te faia pea faapea. 10 Ou te taʻu atu le upu moni iā Keriso, e lē taofia lava loʻu mitamita i vaipanoa o Akaia. 11 Aiseā? Po ona ua ou lē alofa ea iā te outou? Ua silafia e le Atua ou te alofa lava iā te outou. 12 O lenei ou te faia pea lava le mea o loo oʻu faia, ina ia ou taofia ai i latou o loo mananaʻo e faia se mea e tutusa ai i latou ma i matou, i le galuega lea o loo latou mitaʻi maia. 13 Auā o na tagata, o aposetolo pepelo i latou, o le ʻaufaigaluega faaʻoleʻole, ua liua e i latou i latou lava e avea ma aposetolo a Keriso. 14 E lētioa lava, auā e fai ma liua e Satani o ia lava e avea ma agelu o le malamalama. 15 E lē o se mea tele la, pe afai e fai ma liua e ana auauna i latou lava e fai ma auauna o le amiotonu. Peitaʻi, o lo latou iʻuga e tusa lea ma a latou galuega.
ME 27–IUNI 2
ʻOA TAUTELE MAI I LE AFIOGA A LE ATUA | KALATIA 1-3
“Na Ou Fai Saʻo Atu Lava iā te Ia”
(Kalatia 2:11-13) Ae ina ua sau Kefa i Anetioka, na ou fai saʻo atu lava iā te ia e sesē lana mea na fai. 12 Auā a o leʻi taunuu ane nisi o tane mai iā Iakopo, na masani ona ʻai o ia faatasi ma tagata o nuu ese; ae ina ua latou taunuu ane, ona vavaeese lea o ia ma lē toe faifaimea faatasi ma i latou, ona o le fefe i tagata ua peritomeina. 13 Ua aufaatasi atu foʻi isi Iutaia uma iā te ia i lona faagutugutulua, ua oo foʻi ina taaʻina atu ai ma Panapa i lo latou faagutugutulua.
Po o Tutusa Lau Vaaiga ma le Silafaga a Ieova i le Mea e Tonu?
16 Faitau le Kalatia 2:11-14. Sa maileia Peteru i le fefe i tagata. (Faata. 29:25) E ui lava sa iloa e Peteru le silafaga a Ieova e faatatau i tagata o Nuu Ese, ae sa popole o ia i manatu o uso Iutaia ua peritomeina i le faapotopotoga i Ierusalema. Sa iai foʻi le aposetolo o Paulo i le fono lea na faia i Ierusalema i le 49 T.A., ma na ia taʻu saʻo atu iā Peteru i Anetioka lona faagutugutulua. (Galu. 15:12; Kala. 2:13) O le a faapefea ona tali atu Kerisiano mai i Nuu Ese, o ē na aafia totino i lenei gaoioiga lē tonu na faia e Peteru? Po o le a latou tausuai ai? Po o le a aveesea ai faaeaga o Peteru ona o lana mea sesē na fai?
(Kalatia 2:14) Ae ina ua ou iloa latou te lē o savavali tonu e tusa ai o le upu moni o le tala lelei, ona ou fai atu lea iā Kefa i luma o i latou uma e faapea: “Afai o oe o se Iutaia a ua e ola e pei o tagata o nuu ese ae e lē pei o tagata Iutaia, aiseā la ua e manaʻo ai e tauanau tagata o nuu ese ina ia tausia tū a tagata Iutaia?”
O Ē Alolofa iā Ieova ʻe Leai se Mea e Tautevateva Ai’
12 Na tautevateva Peteru i le tele o taimi ona o le fefe i tagata. Na faatolu ona ia faafitia Iesu. Peitaʻi, na ia faamaoni pea iā Ieova ma Iesu. (Luka 22:54-62) Na gaoioi Peteru i se auala lē talafeagai, e ala i lona faasilia o Kerisiano Iutaia ua peritomeina nai lo o Kerisiano mai Nuu Ese. Na iloa lelei e Paulo e lē tatau ona iai le uiga faaituʻau i le faapotopotoga. A o leʻi lepetia e le vaaiga sesē na iai iā Peteru le autasi o le ʻauuso, na matuā faasaʻo o ia e Paulo. (Kala. 2:11-14) Pe na faataga e Peteru le faamaualuga e taofia o ia mai le tuuga o le ola? E mautinoa e leai. Na ia manatunatu ma faatatau le fautuaga a Paulo, ma faaauau pea i le tamoʻega.
Saʻiliʻiliga Loloto mo ʻOa Faaleagaga
(Kalatia 2:20) Ua tutuʻi aʻu i luga o le laau faatasi ma Keriso. Ua ou lē toe ola mo aʻu lava, a o Keriso o loo ola e autasi ma aʻu. O le mea moni, o le ola lea ua ou ola ai i le tino, ou te ola ai i le faatuatua i le Alo o le Atua, o lē na alofa mai iā te aʻu ma foaʻiina mai lona ola mo aʻu.
Ia Auauna Faamaoni i le Atua e ui i le “Tele o Puapuaga”
20 Ae faapefea osofaʻiga iloagatā? O se faaaʻoaʻoga, e faapefea ona tatou feagai ma faalogona o le lotovaivai? O se tasi o auala e sili ona aogā, o le manatunatu loloto lea e faatatau i le togiola. O le mea lenā sa faia e le aposetolo o Paulo. Sa ia iloa o nisi taimi e na te lagona ai o ia o le tagata malaia. Ae sa ia iloa foʻi, e leʻi maliu Keriso mo tagata lelei atoatoa, ae mo tagata agasala, e aofia ai ma ia. Na tusi Paulo: “Ou te ola ai i le faatuatua i le Alo o le Atua, o lē na alofa mai iā te aʻu ma foaʻiina mai lona ola mo aʻu.” (Kala. 2:20) Ioe, sa talia e Paulo le togiola, ma sa ia iloa e aogā iā te ia.
21 E matuā fesoasoani foʻi iā te oe le manatunatu i le taulaga o se meaalofa a Ieova mo oe. Ae e lē faapea ai o le a vave ona mou atu faalogona o le lotovaivai. O nisi o i tatou atonu e tauivi ma lenei osofaʻiga iloagatā seʻia oo mai le lalolagi fou. Ae ia manatua: O le a maua le taui e i latou e lē faavaivai. Ua lata mai le aso matagofie o le a aumaia ai e le Malo o le Atua le filemu, ma toe faafoʻisia tagata faamaoni uma i le tulaga lelei atoatoa. O lea, ia maumauaʻi e ulu atu i lenā Malo, e ui lava i le tele o puapuaga.
(Kalatia 3:1) Tagata Kalatia vālea e, o ai na faasesēina outou, ae ua outou malamalama lelei i le tutuʻiina o Iesu Keriso i luga o le laau?
it-1 880
Le tusi i Kalatia
Ina ua faia e Paulo le faamatalaga “Tagata Kalatia vālea e,” e leai se faamaoniga e faapea atu ai na faasino o ia i se ituaiga patino o tagata e tupuga mai i tagata Kalatia māoʻi na iai i le vaega i mātū o Kalatia. (Ka 3:1) Nai lo o lea, na aʻoaʻia e Paulo nisi i faapotopotoga i Kalatia ona o lo latou lolo atu i taaʻiga a tagata Iutaia na latou faatasi, o ē na taumafai e saʻili la latou lava amiotonu e ala i galuega o le Tulafono a Mose, nai lo o le ʻtaʻuamiotonuina ona o le faatuatua’ e ala i le feagaiga fou. (2:15–3:14; 4:9, 10) O le “faapotopotoga i Kalatia” (1:2) lea na tusi atu i ai Paulo, na aofia ai tagata Iutaia faapea tagata e lē o ni Iutaia o ē liulotu ua peritomeina, ma tagata o Nuu Ese e leʻi peritomeina. E lē taumatea na aofia ai foʻi ma nisi na tupuga mai i tagata Kalatia māoʻi. (Ga 13:14, 43; 16:1; Ka 5:2) O i latou uma na sa tusi atu i ai Paulo o Kerisiano Kalatia, ona o le vaipanoa na latou nonofo ai na taʻua o Kalatia. Pe a fua i le agaga atoa o le tusi a Paulo, e iloa ai na tusi atu o ia i ē na masani lelei ai i le itu i saute o lenei itumalo o Roma, ae e lē o i latou e lē masani ai i le itu i mātū lea e foliga mai e leʻi oo muamua i ai.
Faitau Tusi Paia
(Kalatia 2:11-21) Ae ina ua sau Kefa i Anetioka, na ou fai saʻo atu lava iā te ia e sesē lana mea na fai. 12 Auā a o leʻi taunuu ane nisi o tane mai iā Iakopo, na masani ona ʻai o ia faatasi ma tagata o nuu ese; ae ina ua latou taunuu ane, ona vavaeese lea o ia ma lē toe faifaimea faatasi ma i latou, ona o le fefe i tagata ua peritomeina. 13 Ua aufaatasi atu foʻi isi Iutaia uma iā te ia i lona faagutugutulua, ua oo foʻi ina taaʻina atu ai ma Panapa i lo latou faagutugutulua. 14 Ae ina ua ou iloa latou te lē o savavali tonu e tusa ai o le upu moni o le tala lelei, ona ou fai atu lea iā Kefa i luma o i latou uma e faapea: “Afai o oe o se Iutaia a ua e ola e pei o tagata o nuu ese ae e lē pei o tagata Iutaia, aiseā la ua e manaʻo ai e tauanau tagata o nuu ese ina ia tausia tū a tagata Iutaia?” 15 O i tatou o ni tagata Iutaia moni, ae e lē o ni tagata agasala mai i nuu ese, 16 ua tatou iloa e taʻuamiotonuina le tagata, e lē ona o galuega o le tulafono, ae ona o le faatuatua iā Keriso Iesu. Ua tatou faatuatua foʻi iā Keriso Iesu ina ia taʻuamiotonuina ai i tatou ona o le faatuatua iā Keriso, ae lē ona o galuega o le tulafono, auā e lē taʻuamiotonuina se tagata ona o galuega o le tulafono. 17 O lenei, afai ua tatou saʻili ina ia taʻuamiotonuina i tatou e ala iā Keriso, ae ua iloa o i tatou o ni tagata agasala, po o lona uiga ea ua uunaʻia i tatou e Keriso ina ia agasala? Aua lava neʻi faapea! 18 Auā afai ou te toe atiaʻe mea na ou lepetia, ua ou faaalia ai o aʻu o se tagata solitulafono. 19 A o aʻu, na ou oti i le tulafono ona o le tulafono, ina ia ou ola mo le Atua. 20 Ua tutuʻi aʻu i luga o le laau faatasi ma Keriso. Ua ou lē toe ola mo aʻu lava, a o Keriso o loo ola e autasi ma aʻu. O le mea moni, o le ola lea ua ou ola ai i le tino, ou te ola ai i le faatuatua i le Alo o le Atua, o lē na alofa mai iā te aʻu ma foaʻiina mai lona ola mo aʻu. 21 Ou te lē teena le agalelei faifua o le Atua; auā ana oo mai le amiotonu ona o le tulafono, ua lē aogā la le maliu o Keriso.