Faamafanafanaga Mai le Atua o le Filemu

“Ia outou fefaamafanafanai i nei upu.”—1 TESALONIA 4:18.

1. O ā olega a Paulo e faaalia ai lona naunau i le filemu?

SA FAANAUNAU ma le fiafia lava le aposetolo o Paulo, faapea e tatau i le faapotopotoga Kerisiano ona olioli i le filemu. O lea, o le 13 o ana tusi, e pei ona faasaoina mai mo i tatou i Tusi Paia faagaeeina o loo amataina lava i ni olega ina ia olioli i latou o avatu i ai, le filemu mai le Atua. Mo se faaaʻoaʻoga, agaʻi i le faapotopotoga vaivai i Tesalonia, ua tusi atu ai Paulo: “Ia ia te outou i le alofa tunoa, ma le manuia [filemu].” I le faaiʻuga o lena lava tusi, ua ia aioi atu ai: “Ia atoatoa ona faapaiaina o outou e le Atua lava e ona le manuia; ia tausia lava lo outou agaga atoa uma, i le ma le loto, atoa ma le tino, ia le mataʻuleagaina, i le afio mai o lo tatou Alii o Iesu Keriso.”—1 Tesalonia 1:1; 5:23.

2. (a) O le ā le ituaiga manatu na faaalia e Paulo agaʻi i faapotopotoga? (e) E mafai faapefea e toeaina Kerisiano i aso nei ona mulimuli i le faaaʻoaʻoga a Paulo?

² Sa leʻi faasaoina e Paulo ma ana uo i latou mai ‘galuega mamafa ma le tiga’ i totonu o na tagata talitonu fou. Na faapea mai Paulo: “A ua matou agamalu ina ua matou i ai ia te outou na, faapei o se failele na te tausi lelei i ana lava tama; sa faapea lava lo matou maelega i le alofa ia te outou e le na o le tala lelei i le Atua, a o matou lava ola foi, auā na alofaina outou e i matou.” Pe tatou te lē lagona ea i na upu se faalogona mafana o le alofa moni loloto lea na lagona e Paulo mo lea faapotopotoga? Ioe, o se fua o lea ituaiga alofa ua faaalia e toeaina Kerisiano i faapotopotoga e 50,000 a Molimau a Ieova i le lalolagi aoao i aso nei.—1 Tesalonia 2:7-9; Ioane 13:34,35; 15:12-14.

3. (a) Na faapefea ona mafai e Timoteo ona maua aogā mai le faapotopotoga i Tesalonia? (e) Ua fetaui lenei ma le ā i aso nei?

³ Na aumaia e le Taufaaosooso, o Satani, puapuaga i luga o na Kerisiano Tesalonia. O lea na auina atu ai e Paulo Timoteo ia i latou, ‘ina ia faamafanafanaina i latou ma faatumauina ona o lo latou faatuatua.’ Na toe foʻi atu Timoteo ia Paulo i Atenai ma se molimau pupula e uiga i lo latou faamaoni ma le alofa. Sa matuā faamafanafanaina i latou uma lava e aʻoaʻoina le faatuatua ma le faamaoni o le tasi ma le isi, ma sa faaauau pea ona latou faatoga atu i le Atua ina ia faaleleia se mea ua latou lē taulau ai. (1 Tesalonia 3:1, 2, 5-7, 10) Ua faaatagia foʻi e lenei mea, le fuafuaga faatiokarate i aso nei, i ovasia faimalaga o loo atiina aʻe faapotopotoga, e oo lava i vaipanoa o loo auauna ai Molimau a Ieova i lalo o faasasaga po o sauaga matuitui.—Isaia 32:1, 2.

‘I Lona Afio Mai’

4, 5. (a) O le ā le olega a Paulo i inei, ma ai se ā e tatau ai ona avea o se mea tatou te naunau faapitoa lava i ai i aso nei? (e) Ai se ā ua faapitoa ai ona uigā o tatou aso?

⁴ Ua faaiʻu mai e le aposetolo o Paulo lenei vaega o lana tusi i se aioiga: “Ia faatele foi e le Alii, ma ia faasilisili ona tele o lo outou alofa, o le tasi i le tasi, atoa ma tagata uma, faapei o i matou nei lava ia te outou; ina ia faatumauina o outou loto e le mataʻuleagaina i le amio lelei i luma o le Atua le Tamā, pe a afio mai lo tatou Alii o Iesu Keriso, faatasi ma ona au paia uma.”—1 Tesalonia 3:12, 13.

⁵ I inei sa vaavaai mamao atu ai Paulo agaʻi i le lumanaʻi, i le taimi o le “maliu mai” o Iesu ma le “gataaga o le lalolagi” pe a “sau le Atalii o le tagata i lona mamalu ma le au agelu paia uma faatasi uma faatasi ma ia.” Na taunuu mai lo tatou Tupu faalelagi i le 1914. Ua faamasinoina nei e Iesu mai lona nofoālii mamalu lē vaaia atunuu uma ma tagata o i le lalolagi, i le tuueseina o tagata loto maulalo pei ni mamoe mo e faasaoina mai le “puapuaga tele,” ma le ola e faavavau i se lalolagi parataiso.—Mataio 24:3-21; 25:31-34, 41, 46.

Poloaiga mo lo Tatou Lelei

6. O le ā le apoapoaiga a Paulo e tatau nei ona tatou utagia?

⁶ O oe ea o se tasi o aapa atu mo lena sini o le ola e faavavau? Afai o lena, e ao ona e utagia le mea o tusia e Paulo i inei agaʻi i tagata Tesalonia: “O lenei, le au uso e, o le toe upu lenei, matou te aioi atu ma apoapoai atu ia te outou ona o le Alii o Iesu, faapei ona talai e outou mai ia te i matou le uiga o le ala e tatau ona outou savavali ai, ia fiafia mai ai le Atua ia te outou, ia faasilisili pea i ai outou. Auā ua outou iloa ia poloaiga na matou tuuina atu ai ia te outou mai le Alii o Iesu.” (1 Tesalonia 4:1, 2) O ā nisi o “poloaiga” ua faamamafaina e Paulo i inei?

7. (a) O le ā le ‘poloaiga’ tāua ua aumaia i inei? (e) Ai se ā e lē tatau ai ona faatalalē i le leoleoina o i tatou, ona ua ia i tatou le agaga o le Atua?

⁷ O le ‘poloaiga’ muamua ua fesoʻotaʻi ma amioga lelei. Ua taʻua tuusaʻo lava e Paulo: “O le finagalo foi lenei o le Atua, ia faapaiaina outou, ina ia faamamao outou ma le faitaaga; ia taitasi outou ma iloa ona fai o lana lava ipu ma le faapaiaina ma le taʻuleleia, aua ma le tuʻinanau o le manao, faapei o nuu ese ua le iloa le Atua.” E fiafia lava ona ua tatou o mai ia “iloa” le Atua ma lona Alo, o Iesu Keriso, ma ua tatou aapa atu mo le ola e faavavau. Pagā se faamāina pe ana tatou tuuina atu i tatou e tosoaʻiina i tua i amioga eleelea a le lalolagi! E faanaoanoa lava e faapea atu, o nisi ua sao mai falepuipui ma nofoaga puipui i le tele o tausaga, pe sa faaaluina tausaga atoa o le olaga i le auaunaga maelega faamisionare, a e ua toe tuuina atu i latou mulimuli ane e puʻea e aunoa ma le leoleoina o i latou mai i amioga lē mamā e le Taufaaosooso. Ua tatou maua le agaga paia o le Atua, o lea, aua lava neʻi ‘faatiga’ o ia i amioga leaga faaleituaiga!—1 Tesalonia 4:3-8; Ioane 17:3; 1 Korinito 10:12, 13; Efeso 4:30.

8, 9. (a) O le ā le “alofa i le au uso”? (e) E faapefea ona mafai ona tatou atiina aʻe lena alofa, faatasi ai ma le ā le aogā?

⁸ O le isi ‘poloaiga’ a Paulo o loo avatu i le phil·a·del·phiʹa, o le “alofa i le au uso.” (1 Tesalonia 4:9, 10) O se faaaliga faapitoa lenei o le alofa e faavae i mataupu silisili, a·gaʹpe lea foʻi sa fautuaina ai ma le mafana, e Paulo i inei i le 1Te 4 fuaiupu e 9, faapea foʻi ma le 1Te mataupu 3, fuaiupu e 6 ma le 12. O le phil·a·del·phiʹa,o se alofa mafana, e pei ona faamaonia sa i le va o Iesu ma Peteru, ma le va o Tavita ma Ionatana. (Ioane 21:15-17; 1 Samuelu 20:17; 2 Samuelu 1:26) E mafai foʻi ona faaopoopo atu le a·gaʹpe i le atiina aʻe o se faauoga mafana, e pei ona vaaia, mo se faaaʻoaʻoga, o le olioli fetufaʻi ua maua e le toatele o Molimau a Ieova i ʻauʻaufaatasiga i le faiva faapaeonia ma isi gaoioiga faatiokarate.

⁹ Fai mai Paulo: “Ia faasilisili pea i ai.” E mafai lava ona faalautele atu pea lo tatou alofa faaleuso. E masani lava ona masua atu ai lenei auiga pea a taʻimua le autoeaina ma auauna o le faiva i le auaunaga maelega o le Malo. Fai e matuā faasaga atu le faapotopotoga uma ‘e muai saili le Malo,’ ona avea ai lea o eseesega ona o le lē lelei atoatoa, o uiga lē malie, po o uiga tetee, ma faafitauli faapena ma mea tulaga lua. Seʻi tatou tepa taulaʻi atu pea i le sini!—Mataio 6:20, 21, 33; 2 Korinito 4:18.

10. E mafai faapefea i le avea o i tatou o ni Kerisiano, ona ‘savavali ma le poto’?

¹⁰ Ua faapipii mai foʻi e Paulo i inei le isi ‘poloaiga’— faapea ia avea ma o tatou sini le nonofo fifilemu, aua tatou te aiā fua i mea a isi, ma ia tagi ifo i o tatou lava lima. O lea, a o tatou ‘savavali ma le poto’ i aso uma o lo tatou olaga, i le faaalia o le alofa sili ma le alofa i le au uso, ona tatou maua ai lea o mea uma tatou te mananao ai.—1 Tesalonia 4:11, 12; Ioane 13:35; Roma 12:10-12.

Faamafanafana e le Faamoemoe i le Toetu

11. (a) Ai se ā ua faailoa mai ai nei e Paulo le toetu? (e) E tatau faapefea ona aafia ai i tatou i lenei fautuaga a Paulo?

¹¹ Ua sosoo ai ma le faasino atu e le aposetolo i le faamoemoe sili o le toetu. A e ai se ā ua tatau ai ona faailoa mai e Paulo lenei mataupu? Sa ia manao ina ia faamalosia ona uso ina ia tumau ai i sauaga o loo agaʻi mai ia i latou. Sa i ai i latou i se tulaga mataʻutia e lē iloa ai o latou ola. E foliga mai faapea i nisi taimi na momoe ai nisi i le oti. Sa manaomia lava e uso talitonu ni faamafanafanaga. (1 Tesalonia 2:14-20) I le manatu faapea ua i lima le toe “afio mai” o Keriso, sa latou tau manatu ai po o le ā ua tupu ia i latou o maliliu. A o le mea ua tusia iinei e Paulo ua saunia ai e lē gata o se faamafanafanaga mo i latou ua lē iloa ē pele Kerisiano a e o ni faalaeiauga foʻi ina ia tumau seʻia pa mai le “aso” o Ieova. E tatau ona fesoasoani le fautuaga a Paulo ia i tatou uma lava e faaalia lo tatou tumau faaleagaga a o tatou faalauiloa atu pea le tala lelei, i lo tatou iloa o le iʻuga atoa o lenei faiga o mea. —2 Tesalonia 1:6-10.

12. O le ā le faamafanafanaga moni ua mafai ona tatou maua pe a oti se tasi e pele, ma e mai le ā le puna?

¹² Fai mai Paulo: “Ou te loto ina ia outou iloa, le au uso e, i le mataupu i e o momoe, ina neʻi outou faanoanoa, pei o isi e leai so latou faamoemoe.” (1 Tesalonia 4:13) Maeu ni faamafanafanaga ma le filemu o le mafaufau ua maua i le faamoemoe o le toetu! I le lima tausaga mulimuli ane, na faailoa atu ai e Paulo lana tusi e lua i Kerisiano o i Korinito i lona faapea atu: “Ia ia te outou le alofa tunoa ma le manuia mai le Atua lo tatou Tamā, atoa ma le Alii o Iesu Keriso. Ia faamanuiaina le Atua, o le Tamā o lo tatou Alii o Iesu Keriso, o le Tamā e ona le alofa mutimuti vale, o le Atua foi e ana le faamafanafanaga uma; o le na te faamafanafanaina mai ia te i matou i lo matou puapuaga uma lava, ina ia matou mafaia ona faamafanafana atu ia te i latou ua maua i se tasi lava puapuaga, i le faamafanafanaga ua faamafanafanaina ai i matou e le Atua.”—2 Korinito 1:2-4.

13, 14. (a) Ai se ā na manao ai Paulo ina ia faailoa atu i Kerisiano le uiga o le oti? (e) O le ā ua faaalia mai e le Tusi Paia e uiga i le tulaga o le oti?

¹³ Sa leʻi manao le aposetolo ia tatou pouliuli faatatau i le tulaga o ē ua oti. O le taimi lena, na mauaa ai i totonu o ē ua taʻua o Kerisiano se aposetasi tele, ma i lea ua latou toe foʻi atu ai i aʻoaʻoga ma le poto faa-Papelonia ma Eleni. O na aposetate ua latou talia le aʻoaʻoga faa-Plato o le ola pea o le solu—lea ua avea nei ma aʻoaʻoga faavae i le lalolagi atoa i emepaea o lotu sese. O aiaiga o le mealilo lea e faavae pe siomia ai le “ola pe a mavae le oti,” pe faapea mai e i le lagi, pulekatolio, po o se nofoaga e faapuapuagatia ai e faavavau, e lē o aumaia ai se faamafanafanaga moni. E lē gata i lea, o le ola pea o le solu i se isi mea e feteenaʻi ma le aʻoaʻoga i le toetu, auā e faapefea ona toe faatuina se tagata i le ola pea a lē oti le solu?

¹⁴ I inei ua tusi ai Paulo faatatau “i le mataupu i e ua momoe [i le oti].” Ioe, “momoe.” O se tagata o loo moe na te lē o toe iloa se mea ma e lē toe mafai foʻi ona fai ni galuega. (Faatusatusa le Failauga 9:5, 10) Sa i ai se faatasiga na aofia i se tasi taimi i le faiva a Iesu na ia fetalai atu ai faapea “o loo moe” Lasalo ma o le a ia, [Iesu], alu e “fafagu ia te ia.” Talu ai sa leʻi malamalama soʻo o Keriso i na upu, “ona taʻutino atu lea e Iesu ia te i latou, ua oti Lasalo.” Sa faamafanafanaina Maria ma Mareta o tuafafine o Lasalo i le faamoemoe o le toetu, ma na avatu atili foʻi i ai e Iesu nisi faamanafanafaga. Peitaʻi maeu se faamalosia o lo latou faatuatua ina ua faatuina mai e Iesu lana uo, ua fa aso talu ona oti, mai le moe o le oti!—Ioane 11:11-14, 21-25, 43-45.

15. (a) Ua faapefea ona faamalosia tatou faamoemoe i le toetu? (e) Ua mafai faapefea ona fesoasoani ia i tatou e faafetaui atu e tusa ai ma lea tulaga pe a oti se ua pele?

¹⁵ O lena vavega, faatasi ai ma isi galuega a Iesu i le toe faatutuina o ē na oti, ma le toe faatuina ofoofogia o Iesu lava ia e Ieova—o nei faamaoniga lelei uma o mea na tutupu ua faamalosia ai lo tatou mautinoa i le faamoemoe ofoofogia o le toetu. (Luka 7:11-17; 8:49-56; 1 Korinito 15:3-8) E moni, e aumaia e le oti loimata ma faanoanoaga, ma e faigata tele foʻi ona faafetaui atu ona o le toesea o se ua pele. A e maeu ni faamafanafanaga ma ni faamalosiau tatou te maua mai le mautinoa faapea o le Alii Silisili Ese o Ieova o le a “faaumatia e ia le oti e faavavau; e soloiesea foi . . . loimata i mata uma lava”! (Isaia 25:8, Faaaliga 21:4) O se tasi o vaifofo aupito sili mo le faanoanoa o le faatumu lea o lou olaga i mea tau le auaunaga a le Atua o le filemu, ma tufa atu i isi le faamoemoe faamafanafana loto o le Malo lea foʻi ua uma ona tatou talia ma le loto faafetai.—Ia faatusatusa le Galuega 20:35.

Faasologa o le Toetu

16, 17. (a) O le a faapefea ona faaumatia “le toe fili”? (e) O le ā le faasologa o le toetu ua faamatalaina mai nei e Paulo?

¹⁶ Ua malosi lo tatou faatuatua ona o Keriso ua avea ma “faapolopolo” o le toetu ma ua nofo tupu i le itu taumatau o le Atua i le lagi, o le a na tauaveina le faataunuuga o fuafuaga a le Malo mamalu o Ieova. (Eperu 6:17, 18; 10:12, 13) E faapei ona taʻua e Paulo i le isi ana tusi: “E tatau ona pule o ia [Iesu Keriso], seʻia tuuina e ia ona fili uma lava i lalo o ona vae.” Faapefea? I sona vaega e ala i le toetu ma le aveesea o auga o oti ia Atamu. E pei lava ona sa faamatalaina mai e le aposetolo faapenei: “Ua oo mai le oti talu le tagata, ua oo mai foi le toe tutū o e ua oti talu le tagata. Auā faapei ona oti uma ia Atamu, e faapea foi ona faaolaina uma ia Keriso. A e peitaʻi e taitoatsi ma lona lava tofi; o le faapolopolo o Keriso lea, mulimuli ane o e o ia Keriso e toe tutū i lona afio mai.” (1 Korinito 15:20-26) O le faasologa po o le faiga lenei o le toetu lea na toe faasino atu ai e Paulo i lana uluaʻi tusi i Tesalonia, i lona faapea atu:

¹⁷ “Afai tatou te talitonu, ua maliu Iesu ma toe tu mai, e faapea foi ona aumaia e le Atua faatasi ma ia e o momoe ona o Iesu. Matou te fai atu foi lenei mea ia te outou i le afioga a le Alii, o i tatou o e ola ma totoe pe a afio mai le Alii, tatou te le muamua i e o momoe. Auā e afio ifo mai le lagi le Alii lava, ma le alaga, ma le leo o le agelu sili, ma le pu a le Atua; ma le leo o le agelu sili, ma le pu a le Atua; e muamua foi ona toe tutū mai o e ua oti o ia Keriso.”—1 Tesalonia 4:14-16.

18. O anafea na toe faatutuina ai i latou faaauuina o “e o momoe“?

¹⁸ Ina ua mavae le 1914, i le “afio mai” po o le faatasi mai o Iesu i le mana o le Malo, i le avea o le agelu sili, na ia tuuina atu ai se poloaiga faalelagi mo i latou “o ia Keriso” ina ia faapotopoto. E tusa ai ma le tulaga o nei tagata faauuina o “e o momoe [i le oti],” o lenei poloaiga e pei o se pu ua valaauina ai lo latou toe tutū faaleagaga i le lagi. Ua leva ona faailoa mai e le Olomatamata le vaaiga faapea o lenei toetu o Kerisiano faauuina mai le oti na amataina i le 1918.

19. O afea ma o le a faapefea ona “aveina ae . . . i ao” ē o totoe, ma o le ā le fuafuaga?

¹⁹ A e peitaʻi, e faapefea le vaega totoe o Kerisiano faauuina i luga o le lalolagi, se vaega ua tauāu nei ina faaitiitia i le itiiti ifo i le 10,000? O latou foʻi nei, e tatau ona faaiʻuina o latou olaga faalelalolagi ma le faamaoni. Ona e pei lava sa i ai Paulo faatasi ma i latou i le toe afio mai o Keriso, ua tusi mai o ia: “Ona faafuaseʻi lea ona aveina ae o i tatou o e ola ma totoe, faatasi ma i latou i ao, ina ia fetaiai ma le Alii i le va nimonimo; ona tatou faatasi pea lava lea ma le Alii.” (1 Tesalonia 4:17; faatusatusa le Faaaliga 1:10) E tusa ai ma le mafuaaga lena, o le a faatutuina aʻe uma lava le 144,000 e auauna o ni tupu ma ositaulaga i le Mauga faalelagi o Siona faatasi ma le Tamaʻi Mamoe o Iesu Keriso. “O le uluai toe tu lena.” (Faaaliga 14:1, 4; 20:4, 5.) Peitaʻi, o le ā o faatali mo le faitau piliona o le fanau a tagata o ē o i ai nei i ō latou tuugamau?

20, 21. (a) O le ā o taatia mai i luma mo le faitau piliona o le fanau a tagata o i ō latou tuugamau? (e) O le ā le vaega o le a lē manaomia ona feoti mai le lalolagi, ma ai se ā? (i) Afai e oti nisi o lenei vaega, o le ā le faamoemoega fiafia o i ai i inā mo i latou?

²⁰ E ui lava e lē o taʻua patino mai e Paulo i latou nei i lana uluaʻi tusi i tagata Tesalonia, a e ua faamautinoa mai e le Faaaliga 20:12 ia i tatou faapea “o e na oti, o tagatānuu atoa ma alii,” o le a toe faatutuina aʻe ina ia tutu i luma o le nofoa faamasino o le Atua. (Tagaʻi foʻi i le Ioane 5:28, 29) Peitaʻi i aso nei, ua uma ona aoaoina le faitau miliona o le “motu o tagata e toatele” i luma o le nofoalii. I le avea o se vaega, o le a faasaoolaina i latou nei mai le “puapuaga tele” o loo faaloloʻu mai. O loo leoleoina i latou e le Tamai Mamoe ma taʻitaʻiina atu i latou “i puna o vai ola,” ina ia lē oti ai lava i latou mai le lalolagi. A e talu ai ona o tausaga po o mea tutupu lē mailoa, atonu o le a oti ai nisi o i latou i le taimi o le “afio mai” o le Alii. (Faaaliga 7:9, 14, 17; Failauga 9:11) O le ā o le a tupu ia i latou nei?

²¹ O se faamoemoe e olioli ai o le toetu o loo taatia mai i luma mo i latou uma lava nei o “isi mamoe.” (Ioane 10:16) O lo latou faatuatua ma galuega, e pei o Aperaamo anamua, ua uma ona aumaia ai i latou i se tulaga faauo ma le Atua. E pei o na tane ma fafine faatuatua o loo faamatalaina i le Eperu mataupu 11, ua faapena foʻi i latou i aso nei o “isi mamoe” ona tumau i lalo o tofotofoga. E mautinoa lava, o le a faapena foʻi ona latou tofo i se “toe tu mai

a e sili ona lelei,” e aunoa ma se faaletonu e muamua lava i le vaitaimi pe a mavae Amaketo. (Eperu 11:35; Iakopo 2:23) O le mea moni, o i latou uma lava na ‘aai i le tino o Iesu ma inu i lona toto’ i le faatuatua, o le a auai i le faataunuuga o lana folafolaga: “Ua ia te ia le ola e faavavau; ou te toe faatuina foi o ia i le aso gataaga.”—Ioane 6:54; Roma 5:18, 21; 6:23.

22. E mafai faapefea ona tatou fefaamafanafanai?

²² Ina ua uma ona talanoaina le faamoemoe pupula o le toetu, ua apoapoaʻi mai Paulo: “Ia outou fefaamafanafanai i nei upu.” (1 Tesalonia 4:18) Ona ia toe talanoa atili mai lea e uiga i isi mataupu tāua faatatau “i le afio mai o lo tatou Alii o Iesu.” (1 Tesalonia 5:23) O ā nei mea? Tagaʻi i le mataupu o le “Filemu mai le Atua.—O Afea?”

I le Aotelega

◻ O ā olega ua faia e Paulo ona o Kerisiano?

◻ O ā “poloaiga” ua aumaia e le aposetolo mo lo tatou lelei?

◻ Ua faapefea ona faamafanafanaina i tatou faatatau i ē ua oti e le Afioga a le Atua?

◻ O le ā le faasologa po o le faiga o le toetu ua faamatalaina mai e Paulo?