Po o E Tausisia Pea le Amio Lelei?

“Afai foi o se isi amio lelei, po o se tasi mea e viia, ia outou manatunatu i ia lava mea.”—FILIPI 4:8.

1. O le ā le amio leaga, ma aisea ua lē faaleagaina ai le tapuaiga a Ieova?

O LE amio leaga o lona uiga o le paʻū tau amio po o le faaleagaina o amioga tatau. Ua salalau atu i le lalolagi lea o loo tatou ola ai. (Efeso 2:1-3) Peitai ane, o le a lē faatagaina e Ieova le Atua lana tapuaiga mamā ina ia faaleagaina. O lomiga faa-Kerisiano, o sauniga, o fonotaga, ma tauaofiaga ua aumaia ai ia i tatou ni lapataiga fetaui lelei e tetee atu ai i amioga lē tonu. Ua tatou maua fesoasoani faale-Tusi Paia ina ia ‘pipii atu ai i le lelei’ i le silafaga a le Atua. (Roma 12:9) I le avea la o se faalapotopotoga, o loo taumafai ai Molimau a Ieova ina ia mamā ma amio lelei. Ae faapefea i tatou taitoatasi? Po o e tausisia moni ea le amio lelei?

2. O le ā le amio lelei, ma aisea e manaomia ai taumafaiga ina ia tumau i le amio lelei?

² O le amio lelei o lona uiga o se gaoioiga ma se mafaufauga e silisili ona lelei, ma tonu. E lē o se uiga e lē gaoioi ae o se uiga e olaola pea, e mautinoa. E iai isi mea e aofia ai i le amio lelei nai lo le tau ina alofia le agasala; e uiga o le tausisia pea o mea e lelei. (1 Timoteo 6:11) Na timai atu le aposetolo o Peteru i ona uso Kerisiano: “Ia faaopoopoina le amio lelei i lo outou faatuatua.” E faapefea? E ala i le “matuā faamalosi e tali atu ai [i folafolaga tautele a le Atua].” (2 Peteru 1:5, NW) Ona o lo tatou tulaga agasala, e manaomia ai taumafaiga malolosi ina ia tumau i le amio lelei. Ae, sa faia faapena e tagata o ē na matataʻu i le Atua i aso ua mavae, e ui lava i le fesagai ma toʻatugā matuitui.

Sa Ia Tausisia le Amio Lelei

3. O ā gaoioiga leaga na nofosala ai le tupu o Aasa?

³ O loo iai i le Tusi Paia le tele o tala ia i latou o ē na tausisia le amio lelei. Mo se faataitaiga, seʻi manatu ia Esekia le tagata amio lelei. O lona tamā o Aasa, le tupu o Iuta, e foliga mai na tapuai atu ia Moloka. “O le luafulu o ona tausaga na fai ai Aasa ma tupu; e sefulu ma le ono foi tausaga na fai ai o ia ma tupu i Ierusalema; ua na le faia le amiotonu i luma o Ieova lona Atua faapei o Tavita lona tamā. A ua na savali i le ala o tupu o Isaraelu, ma na faaui ane lava lona atalii i le afi, faapei o tu leaga a nuu ese e na tulia e Ieova i luma o le fanauga a Isaraelu. Ua ia faia foi taulaga, ma faamu mea manogi i mea maualuluga, i luga foi o mauga, atoa ma lalo o laau lauolaola uma.” (2 Tupu 16:2-4) E manatu nisi faapea o le ‘faaui ane i le afi’ sa faailogaina ai se ituaiga o tu masani o le faamamāina ae lē faapea o se taulaga na faia i ni tagata. Peitai ane, ua taʻua i le tusi Molech—A God of Human Sacrifice in the Old Testament, na tusia e John Day e faapea: “E iai faamaoniga i tusitusiga anamua ma tusitusiga a tagata Foinie, faapea foi ma faamaoniga i suesuega o toega mea i le eleele, e iloa ai sa faia taulaga i tagata . . . i le vaitaimi o tagata Kanana, ma e leai la se mafuaaga e tau masalosalo ai i faamatalaga a le Feagaiga Tuai [e faatatau i taulaga na faia i tagata].” E lē gata i lea, ua taʻua faapitoa mai lava i le 2 Nofoaiga a Tupu 28:3 e faapea ‘na susunu e Aasa ana fanau i le afi.’ (Faatusatusa i le Teuteronome 12:31; Salamo 106:37, 38.) Pagā ni gaoioiga leaga!

4. Sa faapeī ona amioai Esekia i se siomaga na tumu i mea leaga?

⁴ Na faapefea ona sao mai ai Esekia i lenei siomaga ua tumu i mea leaga? E mataina le Salamo lona 119, auā e manatu nisi tagata o Esekia na fatuina lea salamo, sa ia faia faapea a o avea o ia ma aloalii. (Salamo 119:46, 99, 100) Atonu la e faaalia mai i ana upu lona tulaga sa iai: “Sa nonofo lava alii ma fai upu ia te au; a ua mafaufau lau auauna i au tulafono. Ua sisina ifo oʻu loimata ona o le faanoanoa.” (Salamo 119:23, 28) Ona o tagata sa faia lotu sese na iai i ona vaitaimi, atonu ai sa avea Esekia ma taulaʻiga o tauemuga i tagata o le aiga tupu, atonu sa matuā tugā o lea na faigata ai ona ia moe. Peitai, sa ia tausisia le amio lelei, ina ua oo foi i le taimi e avea ai o ia ma tupu, sa “ia faia [pea] le amiotonu i luma o Ieova . . . ua ia faatuatua ia Ieova le Atua o Isaraelu.”—2 Tupu 18:1-5.

Sa Tumau Pea lo Latou Amio Lelei

5. O ā tofotofoga na fesagai ma Tanielu ma ana aumea e toatolu?

⁵ Sa avea foi ma faaaoaoga i le amio lelei Tanielu ma ana aumea Eperu e toatolu, o Hanania, Mesaelu, ma Asaria. Na aveesea faamalosi i latou mai lo latou nuu ma avatu faatagataotaua i Papelonia. Na faaigoa nei talavou e toafā i ni igoa Papelonia—Peletisara, Sataraka, Mesako, ma Apeteniko. Na ofoina atu ia i latou “mea taumafa a le tupu,” e aofia ai meaʻai sa faasaina e le Tulafono a le Atua. E lē gata i lea, sa faamalosia i latou e auai i se aʻoaʻoga e tolu tausaga ina ia aʻoaʻoina ai “i tusi ma le gagana a Kaletaia.” O lenei mea sa aofia ai nisi mea e sili atu nai lo le na ona aʻoaʻoina o se isi gagana, auā e foliga mai o le taʻu “Kaletaia” iinei e mataulia ai se vasega popoto. O lea, na feagai ai nei talavou Eperu ma aʻoaʻoga leaga a Papelonia.—Tanielu 1:1-7.

6. Aisea e mafai ai ona tatou faapea atu sa tausisia pea e Tanielu le amio lelei?

⁶ E ui lava i le anoanoai o omiga sa fesagaia, ae na filifilia e Tanielu ma ana aumea e toatolu le amio lelei nai lo le amioleaga. Ua faapea mai le Tanielu 1:21: “Sa i ai Tanielu ua oo i le tausaga muamua o Kuresa le tupu.” Ioe, ‘sa iai pea’ Tanielu o se auauna amio lelei a Ieova mo le silia i le 80 tausaga—e oo atu lava i taimi na tulai ma toe paʻūū ai le tele o tupu malolosi. Sa tumau pea lona faamaoni i le Atua e ui lava i mea leaga ma faufauga a tagata fai mea piopio o le malo ma amioga leaga faaleituaiga ua salalau atu i lotu a Papelonia. Sa tausisia pea e Tanielu le amio lelei.

7. O le ā e mafai ona aʻoaʻoina mai le ala na uia e Tanielu ma ana aumea e toatolu?

⁷ E tele mea e mafai ona tatou aʻoaʻoina mai ia Tanielu o lē na mataʻu i le Atua, ma ana aumea. Sa latou tausisia le amio lelei ma teena le matuā faaaafia o i latou i agaifanua faa-Papelonia. E ui lava sa faaigoa i latou i igoa faa-Papelonia, ae sa lē tāitai ona mavae ese ai le matauliaina o i latou o ni auauna a Ieova. Ioe, pe tusa o le 70 tausaga mulimuli ane, na talanoa atu ai le tupu Papelonia ia Tanielu e faaaogā ai lona igoa Eperu! (Tanielu 5:13) I le taimi umi o lona soifuaga, sa teena pea e Tanielu le lolo atu e oo lava i ni nai mea laiti. A o avea ma tagata talavou, sa ia ‘manatu ai i lona loto o le a ia lē faaleagaina o ia i mea taumafa a le tupu.’ (Tanielu 1:8) O lenei tulaga lē maluelue na iai ia Tanielu ma ana uo e toatolu e mautinoa sa faamalosia ai i latou ina ia sao mai tofotofoga matuitui ia na latou fesagai mulimuli ane.—Tanielu, mataupu 3 ma le 6.

Le Tausisia Pea o le Amio Lelei i Aso Nei

8. E mafai faapefea e talavou Kerisiano ona latou teena le matuā faaaafia i le lalolagi a Satani?

⁸ I le pei o Tanielu ma ana aumea e toatolu, ua faapena foi i tagata o le Atua i aso nei ona latou teteeina le matuā faaaafia i le lalolagi amioleaga a Satani. (1 Ioane 5:19) Pe afai o oe o se talavou Kerisiano, atonu o loo oo ia te oe ni omiga malolosi mai ē tou te tupulaga ina ia e faataitai atu i o latou ituaiga uigaese o lavalava, teuga, ma musika. Nai lo le mulimuli atu i tifiga po o āʻega taitasi na o loo aʻe mai, ia e tumau mausalī, ma ia e lē faatagaina oe e “amio faatasi ma lenei lalolagi.” (Roma 12:2) “Ia tatou teteʻa ese ma le faalematau atoa ma tuʻinanau faalelalolagi, . . . ia tatou nonofo ma le faautauta ma le amiotonu atoa ma le amio Atua.” (Tito 2:11, 12) O le mea tāua, e lē o le faamaoniga mai ē tou te tupulaga, ae o le faamaoniga mai ia Ieova.—Faataoto 12:2.

9. O ā omiga e ono fesagai ma Kerisiano o loo iai i faiga pisinisi, ma e tatau faapefea ona latou amioai?

⁹ O loo fesagai foi Kerisiano matutua ma omiga ma e tatau ona amio lelei. Atonu e tofotofoina tane faipisinisi ina ia faaaogā ni auala lē saʻo pe lē amanaia aiaiga a le malo ma tulafono tau i lafoga. Peitai ane, e tusa lava po o ā uiga o loo faia e tagata o loo tauva i faiga pisinisi ma tagata o loo tatou faigaluega, ae ia “loto i [tatou] e amio lelei i mea uma lava.” (Eperu 13:18) Ua faatonuina i tatou e le Tusi Paia ina ia faamaoni ma fai mea saʻo i pule o galuega, i tagata faigaluega, o tagata o loo aogā i ai a tatou galuega, ma faiga malo. (Teuteronome 25:13-16; Mataio 5:37; Roma 13:1; 1 Timoteo 5:18; Tito 2:9, 10) Seʻi o tatou taumafai foi ina ia faamaopoopo lelei a tatou mataupu faapisinisi. O le tausia o ni faamaumauga saʻo ma ia tusitusia ni maliega ua fai, e masani ona tatou taofia mai ai ni lē femalamalamaai.

Ia Mataala Pea!

10. Aisea e manaomia ai ona ‘mataala pea’ pe a oo mai i a tatou filifiliga o musika?

¹⁰ I le Salamo 119:9 o loo faamatilatila mai ai le isi tāfa o le tumau i le amio lelei i le silafaga a le Atua. Na pese le faisalamo: “E faapefea ea ona faamamāina e le taulealea o lona ala? Ona ua tausi i ai e tusa ma lau afioga.” O se tasi o auupega a Satani o loo sili ona taulau manuia o musika, lea o loo iai le malosi e faagaeeina ai faalogona. E faanoanoa lava, ua lē taulau nisi Kerisiano ina ia ‘mataala pea’ pe a oo mai i musika, ma ua latou tosina atu ai i ituaiga musika e sili ona matautia, e pei o musika rap ma heavy metal. Atonu e finau mai nisi e lē o afaina ai i latou i na musika pe latou te lē o manatu lava i upu o pese. Ua faapea mai isi ua na ona latou fiafia lava i se tuʻituʻi malosi po o le leotetele o kitara. Peitai, mo Kerisiano, o le mataupu autū e lē fuafuaina po o se mea e fiafia ai. E tatau ona latou manatu mamafa pe o lena mea e “fiafia [“taliaina,” NW] i ai le Alii.” (Efeso 5:10) I so o se tulaga lava, o musika heavy metal ma rap e uunaia ai na amioga leaga e pei o gagana masoā, le faitaaga, e oo lava i faiga faa-Satani—o mea e mautinoa e leai so latou nofoaga i olaga o tagata o le Atua.a (Efeso 5:3) Pe talavou pe ua matutua, e lelei mo i tatou taitoatasi ona toe mafaufau lelei i lenei fesili, E ala i laʻu filifiliga o musika, pe o oʻu tausisia ea le amio lelei po o amioga leaga?

11. E mafai faapefea e se Kerisiano ona mataala pea e tusa ai o polokalame o televise, vitiō, ma tifaga?

¹¹ E tele polokalame o televise, vitiō, ma tifaga o loo uunaia ai amioga leaga. E tusa ai o le faamatalaga a se tasi tagata ua iloga lona atamai i suesuega tau i le mafaufau e faapea, ‘o mea faafiafia, o feusuaiga, o faiga sauā, le matapeapea, ma le manatu faapito’ ua faasilisiliina i le tele o ata tifaga ia ua faia i aso nei. O lea la, o le mataala e aofia ai le filifili lelei i mea o loo tatou matamata ai. Na tatalo le faisalamo: “Ia e liliueseina oʻu mata neʻi ou vaai i mea le aoga.” (Salamo 119:37) Sa faatatauina e se talavou Kerisiano e igoa ia Iosefa lenei mataupu silisili. Ina ua amata ona faaali mai i se ata vaaiga matagā o feusuaiga ma faiga sauā, sa alu ese loa o ia mai le faletifaga. Pe na mā ea o ia e faia lenei mea? Ua faapea mai Iosefa: “E leai, e matuā leai lava. Sa ou mafaufau muamua ia Ieova ma le faafiafiaina o lona finagalo.”

Le Vaega a le Suesue ma le Mafaufau Loloto

12. Aisea e manaomia ai suesuega totino ma le mafaufau loloto ina ia tausisia ai le amio lelei?

¹² E lē lava le alofia o mea leaga. O le tausisia o le amio lelei e aofia ai foi le suesue ma mafaufau loloto i mea lelei o loo tusia i le Afioga a le Atua ina ia mafai ai ona faatatauina i le olaga na mataupu silisili amiotonu. Na alaga mai le faisalamo: “Ua tele lava loʻu naunau i lau tulafono; ou te mafaufau i ai i le aso atoa.” (Salamo 119:97) Pe o avea ea le suesueina totino o le Tusi Paia ma lomiga faa-Kerisiano o se vaega o lau faasologa faalevaiaso? E moni, e avea o se luʻi le faaavanoa o se taimi mo le suesueina maelega o le Afioga a le Atua ma le mafaufau loloto i ai faatasi ma le tatalo. Peitai e masani lava ona mafai ona mauaina le taimi mai isi gaoioiga. (Efeso 5:15, 16) Atonu a o lei tāitai le taeao o nisi na o taimi e lelei e tatalo, e suesue, ma mafaufau loloto ai.—Faatusatusa i le Salamo 119:147.

13, 14. (a) Aisea e lē mafaatusalia ai le tāua o le mafaufau loloto? (e) O ā mau e tatau ona mafaufau loloto i ai ina ia fesoasoani ia i tatou e ʻinoʻino i amioga lē mamā faaleituaiga?

¹³ E lē mafaatusalia le tāua o le mafaufau loloto, auā e fesoasoani ia i tatou ina ia taofi mau ai i mea ua tatou aʻoaʻoina. E sili atu ona tāua, e mafai ona fesoasoani ia atili maua ai manatu faale-Atua. Seʻi faataitai: O se tasi mea le iloa e faasaina e le Atua le faitaaga ae o se isi foi mea le ‘ʻinoʻino i mea leaga ma pipii atu i mea lelei.’ (Roma 12:9) E mafai moni lava ona tatou lagona le auala o loo lagona ai Ieova e faatatau i amioga lē mamā faaleituaiga e ala i le mafaufau loloto i mau autū i lea mataupu o le Tusi Paia, e pei o le Kolose 3:5, lea o loo faalaeiau mai: “O lenei, ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tuʻinanau leaga, ma le matapeapea, o le ifo i tupua lava lea.” Fesili ifo ia te oe lava: ‘O le ā le ituaiga o tuʻinanau i faiga faaleituaiga e tatau ona ou fasiotia? O le ā e tatau ona ou alofia lea atonu e faagaee aʻe ai faanaunauga lē mamā? Po o iai ea ni suiga e manaomia ona ou faia i le auala o loo oʻu feutagai ai ma le tagata o le isi ituaiga?’—Faatusatusa i le 1 Timoteo 5:1, 2.

¹⁴ Ua faalaeiau mai Paulo i Kerisiano ina ia faamamao ese mai le faitaaga ma faaalia le pulea totino ina ia lē “sopo tapulaa se tasi, ma agaleaga i lona uso.” (1 Tesalonia 4:3-7) Fesili ifo ia te oe lava: ‘Aisea e leaga ai le faia o le faitaaga? O le a faapefea ona ou faaleagaina aʻu lava po o se isi foi pe afai ou te agasala i lenei itu? O le a faapefea ona aafia ai loʻu itu faaleagaga, oʻu faalogona, ma loʻu tino? Ae faapefea tagata taitoatasi i le faapotopotoga o ē ua solia tulafono a le Atua ma e lē o salamō? O ā iuga ua latou oo i ai?’ O le teulotoina o mea o loo fai mai ai le Tusi Paia e uiga i na amioga e mafai ona tatou matuā ʻinoʻino ai i mea e leaga i le silafaga a le Atua. (Esoto 20:14; 1 Korinito 5:11-13; 6:9, 10; Kalatia 5:19-21; Faaaliga 21:8) Ua faapea mai Paulo o le tagata faitaaga “ua ia le faaleaoga i tagata, a o le Atua.” (1 Tesalonia 4:8) O ai se Kerisiano moni ua faaleaoga pe lē faaaloalo i lona Tamā faalelagi?

Le Amio Lelei ma Aumea

15. O le ā le vaega a aumea e fai i lo tatou tausisia o le amio lelei?

¹⁵ O se tasi fesoasoani i le tausisia o le amio lelei o aumea lelei. Na pese le faisalamo: “Ua matou uo ma i latou uma o e matatau ia te oe [Ieova], ma e ua tausi i au feau.” (Salamo 119:63) Tatou te mananao i aumea lelei o loo maua mai i sauniga faa-Kerisiano. (Eperu 10:24, 25) Pe afai tatou te faaesea i tatou lava, e mafai ona tatou manatu faapito ai i o tatou mafaufauga, ma e faigofie ona puleaina ai i tatou e amioga leaga. (Faataoto 18:1) Peitai ane, o aufaatasiga māfana faa-Kerisiano e mafai ona faamalosia ai la tatou filifiliga ina ia amio lelei. O le mea moni, e tatau foi ona tatou leoleo e tetee atu i aumea leaga. E mafai ona tatou faaalia le faaaloalo i tuaoi, i aumea i galuega, ma ē tatou te aʻoʻoga. Ae afai o loo tatou savavali moni lava ma le atamai, o le a tatou alofia ai la le soona faauo atu i ē latou te lē o tausisia amioga lelei faa-Kerisiano.—Faatusatusa i le Kolose 4:5.

16. E mafai faapefea e le faatatauina o le 1 Korinito 15:33 ona fesoasoani ia i tatou e tausisia le amio lelei i aso nei?

¹⁶ Na tusi mai Paulo: “O le feoai ma e amio leaga e leaga ai amio lelei.” I le faia o lenei faamatalaga, sa ia lapataia ai tagata talitonu i le ono mafai ona mou atu lo latou faatuatua pe a auaumea ma tagata e faapea mai o Kerisiano ae latou te teena aʻoaʻoga a le Tusi Paia e faatatau i le toetu. O le mataupu silisili o loo iai i le lapataiga a Paulo e faatatau foi i a tatou aumea e lē gata i fafo atu a o totonu foi o le faapotopotoga. (1 Korinito 15:12, 33) O le mea moni, tatou te lē mananao e alofia atoatoa o tatou uso ma tuafāfine faaleagaga ona latou te lē ioe i nisi o manatu totino o loo tatou manatu ai. (Mataio 7:4, 5; Roma 14:1-12) E ui i lea, e manaomia le faaeteete pe afai e faia e nisi i le faapotopotoga ni amioga lē saʻo pe faaalia se agaga ita ma le faitio. (2 Timoteo 2:20-22) O se faiga atamai le pipii atu ia i latou o ē mafai ona tatou olioli ai i “se fetufaaiga o faalaeiauga.” (Roma 1:11, 12, NW) O le a fesoasoani lenei mea ia i tatou ina ia tausisia ai se ala o amioga lelei ma tumau ai i “le ala o le ola.”—Salamo 16:11.

Ia Tausisia Pea le Amio Lelei

17. E tusa ai o le Numera mataupu e 25, o le ā le mala na oo i le fanauga a Isaraelu, ma o le ā le lesona ua aumaia e lenei mea mo i tatou?

¹⁷ A o toeitiiti oo atu le fanauga a Isaraelu e nofoia le Nuu o le Folafolaga, e faitau afe i latou na filifili e faia amioga leaga—ma puapuagatia ai i mala. (Numera, mataupu 25) I aso nei, ua tulata atu tagata o Ieova i faitotoa o le lalolagi fou amiotonu. O le ulu atu i ai o le a avea o se faaeaga faamamaluina mo i latou o ē faaauau ona teena amioga leaga a lenei lalolagi. Ona o ni tagata lē lelei atoatoa, e ono mafai ona iai ni o tatou faanaunauga sese, ae mafai e le Atua ona fesoasoani mai ia i tatou ina ia mulimuli i taitaiga amiotonu a lona agaga paia. (Kalatia 5:16; 1 Tesalonia 4:3, 4) O lea la, seʻi o tatou utagia le timaiga a Iosua ia Isaraelu: “Ia outou matatau ia Ieova, ma auauna ia te ia ma le loto sao ma le faamaoni.” (Iosua 24:14) O le mataʻu ma le migao ina ia lē faatiga i le finagalo o Ieova o le a fesoasoani lea ia i tatou e tausisia ai se ala amio lelei.

18. E tusa ai o amioga leaga ma amioga lelei, o le ā e tatau ona maumauai i ai Kerisiano uma?

¹⁸ Pe afai o le faanaunauga o lou loto ina ia faafiafia i le Atua, ia e maumauai la e utagia le timaiga a Paulo: “O mea uma ua moni, o mea uma ua taʻuleleia, o mea uma ua tonu, o mea uma ua mamā, o mea uma ua matagofie, ma mea uma ua logoleleia, afai foi o se isi amio lelei, po o se tasi mea e viia, ia outou manatunatu i ia lava mea.” Pe afai e te faia lenei mea, o le ā e iu i ai? Na faapea mai Paulo: “Ia outou faia ia lava mea; ona ia te outou lea o le Atua e ona le manuia.” (Filipi 4:8, 9) Ioe, o le fesoasoani a Ieova o le a mafai ai ona e teena amioga leaga ae tausisia le amio lelei.

[Faaopoopoga i lalo]

Manatu mo le Autaluga

◻ O le ā e manaomia ina ia tausisia ai le amio lelei?

◻ I lalo o ā tulaga, sa tumau ai i le amio lelei Esekia, Tanielu, ma talavou Eperu e toatolu?

◻ E mafai faapefea ona tatou faapei o Tanielu i le teteeina o mailei a Satani?

◻ Aisea e tatau ai i Kerisiano ona mataala pea e tusa ai o faafiafiaga?

◻ O le ā le vaega ua faia e le suesue, le mafaufau loloto, ma aumea, i le tausisia o le amio lelei?

[Ata i le itulau 15]

Sa tausisia e le talavou o Esekia le amio lelei e ui lava sa iai faatasi o ia ma tagata na tapuai atu ia Moloka

[Ata i le itulau 17]

E tatau i Kerisiano ona mataala pea pe a oo mai i faafiafiaga