Le Manatu o le Tusi Paia

Pe e Tatau Ona Tatou Tuuaia Satani mo a Tatou Agasala?

NA TUUAI ia Satani le agasala a le uluai tagata. Na fai mai Eva: “Na faasese mai le gata ia te au, ona ou ʻai ai lea.” (Kenese 3:13) Talu mai lena taimi, “o le gata tuai lea, ua igoa i le tiapolo, i le ma Satani” ua faaauau ona osofaia tagata, ‘⁠faatauaso mafaufau’ o tagata ma “faasese i le lalolagi uma.” (Faaaliga 12:9; 2 Korinito 4:4) E leai se tagata e mafai ona sao mai i ana omiga, ae pe o le uiga o lenei mea e lē mafai lava ona tatou teteeina ana taaʻiga? Ma pe a tatou agasala, pe o Satani ea e māfua ai i taimi uma?

Ua faamatala mai e le Tusi Paia e faapea o le mea moni na faaseseina e Satani ia Eva. (1 Timoteo 2:14) Na faaseseina o ia e mafaufau faapea pe a ia solia le tulafono a le Atua, o le a mafai loa ona ia maua le malamalama faaleatua ma ola tutoatasi. (Kenese 3:4, 5) O le talitonuga lena, na agasala ai o ia. Peitai, na tuuaia foi o ia e le Atua, ma faasalaina ai o ia i le oti. Aisea? Auā e ui sa pepelo Satani, ae na ia matuā iloa lelei lava le faatonuga a le Atua. Sa lei faamalosia o ia ia lē usitai; na i lo lena, sa ia te ia lava le malosi e puleaina ai ana gaoioiga, ma mafai atoatoa ona teteeina taaʻiga a Satani.

Tetee Atu i le Tiapolo

E mafai e i tatou o tagata ona tetee i le Tiapolo. I le Efeso 6:12, ua taʻu mai ai ia i tatou e faapea ‘o loo tatou tau’ faasaga i “agaga leaga i mea o i le lagi.” E manino mai la, e faatalitalia i tatou e le Atua ina ia tatou tau faasaga i taaʻiga a Satani. Ae e mafai faapefea e se tagata ona tau faasaga ia Satani ma ana temoni e sili atu lo latou malolosi i lo le tagata? Po ua talosagaina ea i tatou e tau i se taua e lē tutusa malosi, e mautinoa tatou te faiaʻina ai? E leai, auā e lē o fetalai mai le Atua tatou te tau ma le Tiapolo i so tatou lava malosi. Ua aumaia e Ieova ia i tatou auala eseese ia e mafai ona tatou teteeina ai mailei a le Tiapolo ma manumalo mai ai. Ua taʻu mai e le Tusi Paia po o ai le Tiapolo, o faapefea ona ia gaoioi, ma pe mafai faapefea ona tatou puipuia i tatou lava.—Ioane 8:44; 2 Korinito 2:11; 11:14.

Le Auala e ‘Tetee Atu ai i le Tiapolo’

Ua fautuaina mai e le Tusi Paia se ala e lua ni laasaga e teteeina ai le Tiapolo. Ua lapataia i tatou: “O le mea lea ia outou gauai ai i le Atua; ia outou tetee atu i le tiapolo, ona sola ese ai lea o ia ia te outou.” (Iakopo 4:7) O le laasaga muamua o lo tatou gauai atu i le Atua, e aofia ai le usiusitai i ana faatonuga. O lo tatou iloaina pea o le iai o le Atua, lona lelei, lona mana ofoofogia ma le pule, ma ana mataupu silisili maualuluga, o le a aumaia ai ia i tatou le malosi e teteeina ai Satani. O le finafinau e tatalo i le Atua e tāua foi.—Efeso 6:18.

Seʻi manatu i le mea na tupu ina ua faaosoosoina Iesu e le Tiapolo. O le toe manatua ma le taʻuina atu o poloaiga eseese mai le Atua e mautinoa na fesoasoani ia Iesu e tetee atu ai. Ina ua lē taulau ona maileia Iesu ia agasala, na tuua ai loa o ia e Satani. Ina ua mavae lena tofotofoga tiga, ona faamalosia atili lea o Iesu e Ieova e ala mai i ana agelu. (Mataio 4:1-11) O lea, sa mafai ai e Iesu ona faalaeiauina ma le lototele ona soo ina ia ole atu i le Atua e ‘laveai i latou mai lē o loo leaga.’—Mataio 6:13.

O le laveaiina e le Atua o i tatou e lē faapea na te faia se pa pupuni e puipuia ai i tatou. Na i lo lena, o loo fetalai mai o ia ia i tatou ina ia sailia uiga faaleatua, pei o le faamaoni, amiotonu, filemu ma le faatuatua. O nei uiga e galue o se “ofutau atoatoa,” e mafai ona tatou “tetee atu [ai] togafiti a le tiapolo.” (Efeso 6:11, 13-18) O lea faatasi ma le fesoasoani a le Atua e mafai ai ona faaleaogaina faaosoosoga a le Tiapolo.

O le laasaga lona lua ua fautuaina mai i le Iakopo 4:7 o le “tetee atu i le tiapolo.” E aofia ai i lenei, gaoioiga malolosi o le sosola ese lea mai ana taaʻiga leaga. E ao i se tasi ona alofia lona mana taufaasese ma teena le manao tele i meafaitino ma filosofia tau amioga lē mamā ua matuā taatele i le lalolagi i aso nei. O lena teteeina o le Tiapolo faatasi ai ma se olaga e tuuina atu e faafiafia le Atua e matuā sili atu ona tāua i la tatou taua faasaga ia Satani. Ae pe o agasala uma ea o se iuga tuusaʻo ia o taaʻiga a le Tiapolo?

Le Taua o Loo Tatou Tauina i Totonu

Ua faamatala mai e le tusitala o le Tusi Paia o Iakopo: “Ua taitasi ma faaosoosoina, pe a tosina ma maileia i lona lava tuʻinanau. Pe a to le tuʻinanau ona fanau mai ai lea o le agasala; a matua le agasala ona fanaua mai ai lea o le oti.” (Iakopo 1:14, 15) O se tulaga faanoanoa, e lē mafai ona tatou foia atoatoa vaivaiga ma le lē lelei atoatoa na fananau mai ma i tatou. (Roma 5:12) Ua fai mai le Tusi Paia: “E leai lava se tagata amiotonu i le lalolagi, o le na te faia amio lelei, ma le le agasala.”—Failauga 7:20.

E lē o le uiga o lea mea faapea o agasala uma lava ua matuā lē mafai ona tatou puleaina. I nisi foi tulaga, e ala i a tatou filifiliga sese, tatou te aumaia ai tofotofoga ia i tatou lava. O lea e ui lava o se faanaunauga sese e ono tuuaia i lo tatou lava lē lelei atoatoa po o taaʻiga a Satani, ae o lo tatou talia po o le teena e paʻū atoa lea ia i tatou. Ma le talafeagai ai, na tusi le aposetolo o Paulo faapea: “O le mea e luluina e le tagata, o le mea lava lea e seleseleina mai ai e ia.”—Kalatia 6:7.

Talia Avega Tauave

E masani lava e faigata mo tagata ona ioeina o latou lava vaivaiga, o mea e lē taulau ai, masei—ioe, o agasala. (Salamo 36:2) O se tasi o mea e mafai ona fesoasoani ia i tatou ia talia ai le avega tauave mo a tatou agasala o le iloa lea faapea e lē o faatalosagaina mai nei e le Atua i tatou ia tatou atoatoa ona lelei. “E lei faia e ia ia i tatou e tusa ma a tatou agasala; e lei taui mai foi o ia ia i tatou e tusa ma a tatou amio leaga,” ua faalauiloa mai ai le faisalamo o Tavita. (Salamo 103:10) E ui e faamagalo mai le Atua, ae na te faatalitalia mai pea i tatou ina ia tatou tau malosi, ia aoaia i tatou lava, faasaga i faatosinaga a le Tiapolo ma o tatou lava faanaunauga i le agasala.—1 Korinito 9:27.

E tatau ona tatou malamalama e faapea a o silafia e le Atua e mafai e le Tiapolo ona puleaina a tatou gaoioiga ma tuuaia ai i se tulaga tele o avega tauave mo le tulaga agasala o tagata, ae e lē faasaolotoina ai i tatou i le talaina atu o se tala i a tatou lava gaoioiga fai. O lea, ua faapea mai ai le Roma 14:12: “E taitasi i tatou ma tala i lana amio i le Atua.”

Peitai, afai tatou te “ʻinoʻino i le leaga” ma “pipii i le lelei,” e mafai ona tatou manumalo i le leaga. (Roma 12:9, 21) O le uluai fafine, o Eva, na lē taulau ona faia lena mea ma sa faasalaina ai mo lona lē usiusitai; sa ono mafai ona ia tetee atu ma usitai i le Atua. (Kenese 3:16) Ae peitai, e lē faapea na lei amanaiaina e le Atua le vaega a le Tiapolo na fai i le faaseseina o ia. Sa faamalaiaina le Tiapolo ma faasala i le faasolo atu lava ina matuā faaumatia aʻiaʻi e lē toe iai. (Kenese 3:14, 15; Roma 16:20; Eperu 2:14) E lē o toe mamao ona tatou lē toe tauivi ai lea ma ana taaʻiga leaga.—Faaaliga 20:1-3, 10.

[Ē Ana le Ata i le itulau 18]

Erich Lessing/Art Resource, NY