Savavali e Pei ona Faatonuina e le Atua
“Tatou o ae ia i le mauga o Ieova, . . . e aʻoaʻo mai ai o ia ia te i tatou i ona ala, ona tatou savavali ai lea i ona ala.”—MIKA 4:2.
1. E tusa ai ma Mika, o le ā o le a faia e le Atua mo ona tagata i aso e gata ai?
NA VALOIA e le perofeta a le Atua o Mika e faapea, “o aso e gata ai,” i o tatou taimi, e toatele tagata o le a saili ma le tiotio i le Atua, ina ia tapuai ia te ia. O le a fefaalaeiauai i latou nei i le faapea atu: “Tatou o ae ia i le mauga o Ieova, . . . e aʻoaʻo mai ai o ia ia te i tatou i ona ala, ona tatou savavali ai lea i ona ala.”—Mika 4:1, 2.
2, 3. Ua faapefea ona faataunuuina le valoaga a Pauro e faatatau i tagata o ē mananao i tupe i aso nei?
2 O lo tatou suesueina o le 2 Timoteo 3:1-5 e mafai ona fesoasoani ia i tatou e iloa ai iuga o le faatonuina e le Atua i “aso e gata ai.” I le mataupu na faatoʻā mavae atu, na amata ai ona tatou iloaina aogā e maua e i latou o ē e aveina i fale le lapataiga a Pauro ina ia aua le avea ma ē “alolofa i latou ia i latou.” Na faaopoopo mai Pauro e faapea i o tatou aso, e iai tagata e “mananao i tupe.”
3 E lē tau manaomia e se tasi se faailoga mai se kolisi i aso nei ina ia malamalama ai i le fetaui lelei o na upu i o tatou aso. Pe tou te leʻi faitau ea e uiga i ē teu tupe, ma ulu o faalapotopotoga faapisinisi o ē e lē o faamalieina i le mauaina o le faitau miliona o tupe i tausaga taitasi? O nei tagata mananao i tupe, e oo lava i le faaaogā ai o auala e lē tusa ma le tulafono. Ua fetaui foi upu a Pauro i le toatele i aso nei o ē, e ui ina e lē o mauoa, ae ua matuā matapeapea lava, e lē taitai ona faamalieina. Atonu e te iloaina le toatele o na tagata i lou vaipanoa.
4-6. Ua faapefea ona fesoasoani le Tusi Paia i Kerisiano e alofia le avea ma ē e mananao i tupe?
4 Pe ua na o se vala lē maalofia ea lenei na taʻua e Pauro o le natura faaletagata? Ua lē tusa lena ma upu a le Tusitala o le Tusi Paia, o lē ua leva ona fetalaia mai lenei upu moni i aso ua mavae e faapea: “O le manao i tupe, o le pogai lea o mea leaga uma lava; ua mananao tele i ai nisi, ona sese ai lava lea o i latou i le upu o le faatuatua, ua tuʻia ai ua ati i latou e i latou i puapuaga e tele.” Ia mātau, e leʻi fetalai mai le Atua, ‘O tupe o le pogai lea o mea leaga uma.’ Na ia fetalai mai, “o le manao i tupe.”—1 Timoteo 6:10.
5 O le mea tāua, ua faailoa mai e faamatalaga o loo siomia ai lena mau e faapea, o nisi o Kerisiano amio lelei o le uluai senituri sa mauoa i lenei faiga o mea, atonu pe ala i so latou tofi pe na maua foi i le galulue faamaoni. (1 Timoteo 6:17) O lea, e ao ona faamaonia, po o ā lava o tatou tulaga tautupe, ua lapataia i tatou e le Tusi Paia e faatatau i le matautia o le avea ma sē e manao tele i tupe. Po o ofoina mai ea e le Tusi Paia se isi aʻoaʻoga atili e fesoasoani ina ia alofia ai lenei pona taatele o le manao tele? Ioe, o loo iai moni, e pei ona taʻua e Iesu i le Lauga i luga o le Mauga. Ua tautaua lona atamai i le lalolagi. Mātau, mo se faaaoaoga le fetalaiga a Iesu i le Mataio 6:26-33.
6 E pei ona faamauina i le Luka 12:15-21, na fetalai Iesu e uiga i se tagata mauoa o lē na taumafai e faaputu ni oa se tele, ae na faafuasei ona oti o ia. O le ā le manatu sa faamamafa e Iesu? Na ia fetalai mai e faapea: “Ia outou, ia leoleo outou ia te outou auā le matapeapea; auā e le ola se tasi i le tele o ana mea ua ia te ia.” Faatasi ai ma lena fautuaga, ua tausalaina foi e le Tusi Paia le paie ma faamamafa ai le tāua o le galue faamaoni. (1 Tesalonia 4:11, 12) Ae, atonu o le a tetee mai nisi faapea e lē fetaui nei aʻoaʻoga ma o tatou aso—ae e fetaui, ma ua aogā.
Faatonuina ma ua Aogā
7. O le ā le mafuaaga ua ia i tatou e mautinoa ai e faapea, e mafai ona tatou faatatauina ma le manuia le fautuaga a le Tusi Paia e uiga i oa?
7 I le tele o atunuu, o le a e maua ai faaaoaoga moni o tane ma fafine mai vala uma lava ma tulaga tautamaoaiga o le olaga o ē ua latou faatatauina mataupu silisili a le Atua e uiga i tupe. Ua maua ai e i latou lava ma o latou aiga aogā, e pei ona molimauina mai foi e tagata e lē upu moni i fafo. Mo se faataitaiga, i le tusi o le Religious Movements in Contemporary America, mai le tusitala mo le Iunivesite o Princeton, na tusia e se tagata suesue i le natura o le tagata e faapea: “I lomiga [a Molimau] ma i lauga i le faapotopotoga, e faamanatu atu ai ia i latou e faapea, latou te lē faalagolago i ni taavale fou, lavalava taugata, po o ni olaga fiamaumea e lē tusa ma o latou tulaga. I le taimi lava e tasi, e ao i se Molimau ona avatu i lona pule se galuega talafeagai o le aso [ma ia] tatau ona matuā faamaoni . . . O na uiga ua oo lava i se tagata e lē tele ni ona tomai, o le a avea o se tagata faigaluega aogā, ma o nisi o Molimau i Philadelphia i Mātū [Iunaite Setete o Amerika] ua siitia i ni tulaga maualuluga lea e matuā tetele avega tauave tau i le galuega e faia ai.” E manino, o tagata latou te taliaina faatonuga mai le Atua e ala i lana Afioga, ua mataala pea i uiga na e faafaigata ai ona faafetaiaia tulaga o mea i le taimi nei. Ma ua faamaonia i mea na tutupu ia i latou e faapea, o faatonuga a le Tusi Paia e iu ai i se olaga e sili ona lelei ma fiafia.
8. Aisea e mafai ai ona fesootai le “loto vii,” le “faamaualuga,” ma le “upu leaga,” ma o le ā le uiga o nei faaupuga e tolu?
8 E mafai ona tatou faafesootaia atu i ai isi mea e tolu ia e lisi mai e Pauro. I aso e gata ai, e avea ai tagata ma “e loto vii, o e faamaualuga, o e upu leaga.” O nei uiga e tolu e lē tutusa, ae e fesootai uma atu lava i le faamaualuga. O le mea muamua o le “loto vii.” Ua taʻu mai e se lomifefiloi ia i tatou e faapea, o le uiga o le upu autū faa-Eleni i inei o le: “ʻO lē na te faasilia ia lava na i lo o le mea moni’ po o le ‘tele o folafolaga, ae itiiti mea e na te faatinoina.’” E mafai ai la ona e malamalama i le pogai ua faaaogā ai e nisi Tusi Paia le upu “gugutu.” Ona sosoo ai lea ma le “faamaualuga,” pe i se uiga moni o le “faafoliga mai e sili o ia.” O le uiga mulimuli, o le “upu leaga.” Atonu o le a manatu nisi e faapea o le upu leaga, o i latou ia o ē tautatala lē migao i le Atua, peitai, o lena upu e aofia ai le faatiga, faaʻoleʻole, po o le tautala taufaaleaga i tagata. O lea, o loo faasino atu ai e Pauro le upu leaga e faatatau i le Atua ma tagata.
9. I le eseesega ma uiga leaga malolosi o loo iai pea, o ā uiga ua faalaeiauina e le Tusi Paia tagata ina ia atiina aʻe?
9 O le ā sou lagona pe a siomia oe e tagata e fetaui lelei i ai le faamatalaga a Pauro, e tusa lava po o tagata e faigaluega faatasi, uo i aʻoga, po o aiga? Pe faafaigofie ai ea lou olaga i lena tulaga? Po o le mea o faafaigata e na tagata lou olaga, ma faigata atili ai ia te oe ona feagai ma o tatou aso? O lea, ua aʻoaʻoina i tatou e le Afioga a le Atua ina ia alofia nei uiga, i le ofoina mai o fautuaga e pei o ia e maua i le 1 Korinito 4:7; Kolose 3:12, 13; ma le Efeso 4:29.
10. O le ā ua faaalia ai e faapea ua maua e tagata o Ieova aogā mai le taliaina o faatonuga mai le Tusi Paia?
10 E ui lava e lē lelei atoatoa Kerisiano, ae o le faatatauina o nei aʻoaʻoga lelei, ua fesoasoani tele ia i latou i nei aso faigata. Ua faapea mai le mekasini Italia o le La Civiltà Cattolica, o le mafuaaga e tasi ua faatuputeleina ai pea Molimau a Ieova, “ona o lenei lotu, ua avatua ai i ona tagata se faailoaga maʻoti ma le malosi.” Ae, e ala i le “faailoaga maʻoti,” pe sa faauiga ea e le tusitala faapea, o ni “e loto vii, o e faamaualuga, o e upu leaga”? I le tuufaafeagai, na matauina e le mekasini a le au Jesuit e faapea, o lena lotu “ua avatu ai i ona sui se faailoaga maʻoti ma le malosi, ma o se nofoaga lea mo i latou e talileleia ai i latou i se uiga mafana ma le alofa faaleuso ma le autasi.” Pe e lē o faamaonia mai ai o loo fesoasoani i Molimau mea ua aʻoaʻoina ai i latou?
Aogā Faatonuga i Sui o le Aiga
11, 12. Na faapefea ona faaalia ma le saʻo e Pauro le tulaga o le a iai le tele o aiga?
11 Atonu e mafai ona tatou tuufaatasia isi mea e fa ia e sosoo ai e tai fesootai. Na valoia e Pauro e faapea, o aso e gata ai, e toatele o le a “le faalogo i mātua, o e le faafetai, o e amio leaga [“lē faamaoni,” NW], o e le lotoaiga.” Ua outou silafia o le lua o nei pona—o le lē faafetai ma le [“lē faamaoni”]—o loo siomia ai i tatou. Ae ua faigofie ona tatou iloa le pogai na tuu ai e Pauro ia uiga i le va o le “le faalogo i mātua” ma le “le lotoaiga.” O nei uiga e fa e milo faatasi.
12 O le mea moni, so o se tagata na te matauina mea, pe talavou pe matua, o le a ioe mai e faapea ua matuā salalau atu le lē faalogo i mātua, ma ua faateleina le leaga. Ua faitio mai le toatele o mātua e faapea, e foliga mai ua matuā leai lava se loto faafetai o tagata talavou mo mea uma ua faia mo i latou. Ua tetee mai le toatele o talavou faapea, e lē faamaoni o latou mātua ia i latou (po o i le aiga lautele), ae ua aafia tele i a latou galuega, faafiafiaga, po o i latou lava. Na i lo o le taumafai e faavasega po o ai e sese, seʻi mātau iuga. O le feeseeseaiga i le va o tagata matutua ma talavou, e masani lava ona iu ai i le faia e talavou o a latou lava tapulaa tau amio mamā, po o amioga lē tatau. O le ā le iuga? Ua maualuga ai le aofai o talavou e maito, faapaʻū tama, ma faamaʻi pipisi ona o feusuaiga. O nei mea uma, e masani lava ona tutupu ona o le leai o se lotoaiga, e iu ai i faiga sauā. Atonu e mafai ona e taʻua ni faaaoaoga mai lou lava vaipanoa, e faamaonia ai le mou atu o le lotoaiga.
13, 14. (a) I le feagai ai ma le faaleagaina o le tele o aiga, aisea e ao ai ona tatou uai atu i le Tusi Paia? (e) O le ā le fautuaga poto ua ofoina mai e le Atua e faatatau i olaga faaleaiga?
13 Atonu ua faamatalaina ai e lenei mea le mafuaaga ua liliu atu ai le toatele ma le anoanoai o tagata e faasagatau ia i latou o ē na foliga mai sa avea muamua ma vaega o lo latou aiga potopoto, o le aiga e tasi, ituaiga, po o vaega masani o aiga. Ia manatua, tatou te lē o aumaia nei mea e faamatilatila ai itu leaga o le olaga i aso nei. O o tatou faanaunauga autū: Pe e mafai e aʻoaʻoga a le Tusi Paia ona fesoasoani ia i tatou e alofia ai mafatiaga mai mea faaletonu na taʻua e Pauro, ma pe o le a tatou mauaina ea ni aogā mai le faatatauina o aʻoaʻoga a le Tusi Paia i o tatou lava olaga? E mafai ona tali atu ioe i na fesili, auā o le faamaoniga lena e tusa ai ma na manatu e fa o loo lisiina mai e Pauro.
14 O se faamatalaga lautele ua manino lelei: E leai se aʻoaʻoga e sili atu na i lo o aʻoaʻoga mai le Tusi Paia i lona fuaina mai o olaga faaleaiga e faamafanafanaina ai le loto, ma taulau manuia ai. O se faaaoaoga lenei o lana fautuaga e mafai ona fesoasoani i sui taitasi o aiga ina ia lē tau ina alofia mailei e pauu ai, ae ia taulau manuia. Ua faataitaia lelei mai i le Kolose 3:18-21 lena mea, ma o loo tele isi taiala matagofie ma aogā e faatatau i tane, avā, ma fanau. Ua aogā moni lenei fautuaga i o tatou aso. O le mea moni, e oo lava i aiga Kerisiano moni, e iai lava faalavelave ma luʻi. Peitai, o iuga i se fualautele ua faamaonia ai o loo saunia e le Tusi Paia ni aʻoaʻoga aogā mo aiga.
15, 16. O le ā le tulaga na maua e se tagata suesue ina ua suesueina Molimau a Ieova i Zambia?
15 Mo le tausaga ma le ʻafa, na suesueina ai e se tagata suesue mai le Iunivesite o Lethbridge, i Kanata le olaga lautele i Zambia. Na faaiu mai lenei mafine e faapea: “Ua maua e Molimau a Ieova se taulau sili ona manuia na i lo o sui o isi lotu i le tausia o noataga mau faalefaaipoipoga. . . . O lo latou taulau manuia ua atagia ai le faiā felagolagomai i le va o le tane ma le avā, o ē i lo latou faiā fou, e lē faamatauina, e felagolagomai i a latou taumafaiga, ua iu ai i le feagai ai o le tasi ma le isi e tusa ai ma lo latou taʻitaʻi fou, o le Atua lea. . . . Ua aʻoaʻoina le tane Molimau a Ieova ina ia taumatuaina i le faatinoina o le avega tauave mo le lelei o lana avā ma le fanau. . . . Ua faalaeiauina le tane ma le avā ina ia avea o ni tagata e faamaoni . . . O lenei poloaiga mamafa mo le faamaoni, ua faamausaliina ai le faaipoipoga.”
16 O lena suesuega sa faavae i le anoanoai o mea moni na tutupu. Mo se faataitaiga, na faapea mai lenei tagata suesue, i le tuufaafeagai ma tulaga masani, “ua iloa e sili atu ona fesoasoani e lē aunoa tane Molimau a Ieova i a latou avā i le faia o togalaau, e lē gata i le taimi e sauniuni ai le uluai faamamāina, ae faapea foi i le totoina ma le eliina.” Ua faaalia i na faamaoniga e faapea, e lē mafaitaulia tala o mea moni e tutupu i le lalolagi aoao ua faaalia ai le pāʻia moni e faatonuga a le Tusi Paia o olaga.
17, 18. O ā iuga e ofo ai ua faailoa mai i se suesuega e uiga i tofi faalelotu ma feusuaiga a o leʻi faaipoipoina?
17 O le mataupu na faatoʻā mavae atu na taʻua ai ni mea na maua i sailiiliga i le Journal for the Scientific Study of Religion. I le 1991, sa iai i lea mekasini se mataupu na faaulutalaina “Tofi Faalelotu ma Feusuaiga a o Leʻi Faaipoipoina: Faamaoniga Mai se Suesuega Faaleatunuu o Tagata Talavou.” E lē taumatea ua outou silafia le matuā salalau atu o le faia o feusuaiga a o leʻi faaipoipo. I le toatele o talavou, o le toatele ua lolo atu i le mu o o latou loto i lagona alofa, ma o le toatele o talavou ua tele ni a latou paaga mo le faia o feusuaiga. Pe e mafai e aʻoaʻoga a le Tusi Paia ona suia lenei mea ua taatele?
18 E toatolu ni polofesa na aufaatasi e suesueina le mataupu ma le manatu ‘e faapea, o ē ua matutua ma talavou na ola aʻe i tulaga e maumauai tu faa-Kerisiano o le a toaitiiti le aofaiga o ē e faia feusuaiga a o leʻi faaipoipo.’ Ae o ā mea ua faaalia e mea moni na latou mauaina? I le aotelega, e i le va o le 70 ma le 82 pasene na latou faia feusuaiga a o leʻi faaipoipo. Ua manatu nisi e faapea, “ona o aganuu faavae e fesootai atu i le faa-Kerisiano [ua faaitiitia] ai le faia o feusuaiga faapena a o leʻi faaipoipo, ae e lē faapena ai le tulaga o ‘feusuaiga a talavou laiti e leʻi faaipoipo.’” Sa faia e le au suesue ni faamatalaga i nisi o talavou e foliga e ō mai i aiga e toaaga i lotu o ē “atonu e sili atu ona maualuga le aofai o i latou e faia feusuaiga a o leʻi faaipoipo pe a faatusatusa atu i tagata lautele o le lotu Porotesano.”—O upu faasisipa o a matou.
19, 20. Ua faapefea ona fesoasoani faatonuga mai le Atua ma puipuia ai le toatele o talavou o Molimau a Ieova?
19 Ua iloa e polofesa le eseesega ma talavou o Molimau a Ieova, o ē sa iai i le “vaega sa sili ona faaesea mai i isi.” Aisea? “O se fua o le tuutoina atu ma le faafaatauaina ona o mea tutupu, faatalitalia, ma le aafia i gaoioiga faalelotu . . . atonu ua masani ona fafau aʻe ai le gauai atu i mataupu silisili o le faatuatua.” Ua latou faaopoopo mai: “Ua faatalitalia e Molimau latou te faataunuuina avega tauave faamisionare a o laiti pe matutua foi.”
20 O lea, ua taaina e faatonuga a le Tusi Paia Molimau a Ieova mo le lelei, i le fesoasoani ia i latou e aloese ai mai amioga lē mamā. O lona uiga, ua puipuia ai i latou mai faamaʻi pipisi ona o feusuaiga lē mamā, o nisi o nei faamaʻi ua lē matogafitia, a o isi ua iu ai i le oti. E uiga i le lē uunaia e faia le faapaʻū tama, lea ua aʻoaʻoina e le Tusi Paia e tutusa lava ma le fasioti tagata. E uiga foi faapea, e mafai ona latou ulu atu, o ni talavou i se faaipoipoga ua iai se loto fuatiaifo mamā. O le uiga o lena mea, ua atiina aʻe ai le faaipoipoga i se faavae mautu. O aʻoaʻoga moni na ua mafai ona fesoasoani ia i tatou e manumalo, ma soifua maloloina lelei ma sili ona fiafia.
Faatonuga Mautinoa
21. O ā mea na valoia ma le saʻo e Pauro mo o tatou aso?
21 O lea, seʻi o tatou toe foi i tua i le 2 Timoteo 3:3, 4, ma mātau le isi mea na fai mai ai Pauro o le a faafaigata ai i le toatele ona fesagai ma o tatou aso faigata—ae lē mo tagata uma: [O le a avea tagata ma] e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, [ma] e ua tele le manao i mea faafiafia a e leai se manao i le Atua.” Maeu le saʻo o na mea! E ui i lea, o faatonuga mai le Tusi Paia e mafai ona puipuia ma faaauupegaina ai i tatou, ina ia taulau manuia.
22, 23. Na faaiu e Pauro lana lisi faatasi ma se timaiga mautinoa, ma o le ā lona tāua?
22 Na faaiua e le aposetolo o Pauro lana lisi i se manatu mautinoa. Sa ia liliuina le vaega mulimuli e fai o se poloaiga faaleatua ma e mafai ai foi ona aumaia ia i tatou ni aogā e lē mafuafuatia. Na taʻua e Pauro i latou “o e ua peiseai ua amio Atua, a o le mana ua i lea mea ua latou teena; ia e ʻalo ese lava i tagata faapena.” Manatua ua sili atu ona maualuga le faitau aofai o talavou i isi lotu ua faia feusuaiga a o leʻi faaipoipoina na i lo o le tulaga masani. Ioe, e tusa lava pe ua na o se fua faatatau o ē o loo ō i lotu o faia amioga leaga, ae pe lē o faamaonia ai ea e faapea ua lē aogā la latou tapuaiga? E lē gata i lea, po o suia moni ea e aʻoaʻoga faalelotu le auala o gaoioi ai tagata i faiga faapisinisi, le auala o amio ai ma le gauai i le pule, po o le auala o loo latou feagai ai ma o latou tauaiga?
23 Ua faaalia i upu a Pauro e faapea, e ao ona tatou faatinoina mea ua tatou aʻoaʻoina mai le Afioga a le Atua, o se auala o le tapuaiga e faaalia ai le aogā moni o le Faa-Kerisiano. E tusa ai ma i latou o ē o faia se tapuaiga lē aogā, ua taʻu mai e Pauro ia i tatou e faapea: “Ia e ʻalo ese lava i tagata faapena.” O se poloaiga manino lena, e maua ai e i tatou aogā tumau.
24. Ua faapefea i le timaiga i le Faaaliga mataupu e 18 ona tutusa lelei ma le fautuaga a Pauro?
24 I le ā le auala tatou te maua ai aogā? Ia, ua valoia e le tusi mulimuli o le Tusi Paia se fafine faafaatusa, se fafine talitane, ua taʻua o Papelonia le Aai Tele. Ua faaalia i mea moni e faapea, o Papelonia le Aai Tele ua faaatagia ai le emepaea o lotu sese i le lalolagi, lea ua uma ona suesueina e Ieova le Atua ma ua teena. Peitai, e lē tatau ona aofia ai i tatou. Ua apoapoai mai le Faaaliga 18:4 ia i tatou e faapea: “Loʻu nuu e, ia outou o ese ia te ia, ina neʻi faatasia outou i ana agasala, ina neʻi tofusia foi outou i ona mala.” Pe e lē o le feau ea lava lena e tasi lea na taʻua e Pauro, “ia e ʻalo ese lava i tagata faapena”? O lo tatou gauai atu o le isi lena auala e mafai ai ona tatou maua aogā mai faatonuga a le Atua.
25, 26. O le ā le lumanai o teuina mo i latou o ē ua taliaina nei ma faatatauina faatonuga mai ia Ieova le Atua?
25 Ua toeitiiti ona faalaa tuusao mai loa lea o le Atua i mataupufai a tagata. O le a ia soloiesea lotu sese uma, ma lenei faiga leaga o mea o iai nei. O le a faapogaia ai e lena mea se olioli tele e pei ona faaalia mai i le Faaaliga 19:1, 2. I le lalolagi, o i latou o ē e taliaina ma mulimuli i faatonuga a le Atua o le a faatumauina i latou e faaauau pea ona mulimuli i ana aʻoaʻoga, pe a soloiesea toatuga uma o nei aso faigata.—Faaaliga 21:3, 4.
26 E mautinoa lava, o le ola i lena Parataiso faalelalolagi toe faafoisia, o le a avea o se mea e olioli tele ai e lē matāea e o tatou mafaufau. Ua folafola mai e le Atua e faapea, e mafai ona tatou maua, ma ua tatou iloa e mafai ona faatuatua atoatoa ia te ia. O lea, ua aumaia ai ia i tatou le anoanoai o mafuaaga e talia ai ma mulimuli i ana aʻoaʻoga aogā. O afea? Seʻi o tatou mulimuli nei i ana faatonuga i o tatou aso faigata ma oo atu ai lava i le Parataiso ua ia folafola mai.—Mika 4:3, 4.
Manatu ia Manatua
◻ Ua faapefea ona maua e tagata o Ieova aogā mai lana fautuaga e faatatau i oa?
◻ O ā aogā lelei ua taʻutino mai e se mekasini a le au Jesuit ua maua e auauna a le Atua e ala i le faatatauina o lana Afioga?
◻ O ā aogā na faaalia mai i se suesuega i Zambia ua maua e aiga e faatatauina faatonuga mai le Atua?
◻ O le ā le puipuiga ua saunia e faatonuga mai le Atua mo tagata talavou?
[Pusa i le itulau 15]
PAGĀ NI IUGA LEAGA E OO I AI!
Ua fai mai se lipoti na tuuina mai e se fonotaga e uiga i le AIDS ma talavou e faapea: “Ua fesagai talavou ma se lamatiaga tele e ono maua ai i le AIDS, talu ai ona latou te mananao e tofotofo i feusuaiga ma fualaau faasaina, faia ma le lē mautinoa ma ola mo na o le taimi nei e aunoa ma le manatu i le lumanai, ma talu ai ona ua latou manatu e lē feoti i latou ma lē ava i le pule.”—Daily News a Niu Ioka, Aso Sa, Mati 7, 1993.
“O teine talavou maʻi vālea i feusuaiga ua aliae mai le ‘saoaluma’ i mala pipisi o le AIDS, na mauaina e se suesuega a Malo Aufaatasi i Europa, Aferika ma Asia i Saute i Sasaʻe.”—The New York Times, Aso Faraile, Iulai 30, 1993.
[Ata i le itulau 16, 17]
Ua aogā faatonuga mai le Tusi Paia i Molimau a Ieova i le faapotopotoga, ma i le aiga