Le Tuuina Atu ma le Saʻolotoga e Faia Ai Filifiliga
‘O lena le saʻolotoga ua faasaʻoloto mai ai Keriso ia te i tatou.’—KALATIA 5:1.
1. O le ā ua sili ona faatatauina i ai upu Eperu ma le Eleni lea o loo faaliliuina i le “tuuina atu,” “faapaiaina,” po o le “tuutoina atu”?
SA FAAAOGĀ e tusitala o le Tusi Paia nisi o upu Eperu ma upu Eleni e faailoa mai ai le manatu o le vavae ese, po o le tū ese mai, ina ia auauna mo se fuafuaga paia. I Tusi Paia i le gagana Peretania, ua faaliliuina ai nei upu i upu e pei o le “tuuina atu” (dedication) “faapaiaina” (inauguration) po o le “tuutoina atu” (consecration). I nisi taimi e faaaogā ai nei faaupuga e fesootai atu ma ni galuega sa fausia—e pei o le malumalu o le Atua i Ierusalema anamua ma le tapuaiga lea na faia ai iina. E seāseā lava faaaogā nei upu i le faasino atu i ni mataupu e lē faaletapuaiga.
Le Tuuina Atu i “le Atua o Isaraelu”
2. Aisea sa talafeagai ai ona taʻua Ieova o “le Atua o Isaraelu”?
2 I le 1513 T.L.M., na laveaiina ai e le Atua le fanauga a Isaraelu mai le faapologaina i Aikupito. E lei leva talu ona mavae lena mea, ae ia faatulaga ese loa i latou e avea ma ona nuu faapitoa, e ala i le faia o se faiā faalefeagaiga ma ia. Na taʻu atu ia i latou: “Afai tou te matuā faalogo mai i loʻu leo, ma tausiusi i laʻu feagaiga, ona fai lea outou ma oloa tāua moʻu, e sili i nuu uma; auā o loʻu lava le lalolagi uma.” (Esoto 19:5; Salamo 135:4) I le avea o le fanauga a Isaraelu ma ana meatotino faapitoa, sa talafeagai ai ona taʻua Ieova o “le Atua o Isaraelu.”—Iosua 24:23.
3. Aisea na lē faaalia ai e Ieova se faailoga tagata e ala i le filifilia o Isaraelu e avea ma ona nuu?
3 O le avea o le fanauga a Isaraelu ma ona nuu tuuina atu, e lei faapea ai sa faailoga tagata Ieova, auā na ia finagalo alofa atu foi i tagata e lē o ni Isaraelu. Na ia faatonuina lona nuu: “A āumau ia te oe se tagata ese i lo outou nuu, aua tou te faatiga ia te ia. O le tagata ese o loo āumau ia te outou, ia tusa lava ia ia te outou ma le tama a le eleele, e te alofa atu ia te ia e pei o oe lava ia te oe; auā sa āumau outou i le nuu o Aikupito; o aʻu o Ieova lo outou Atua.” (Levitiko 19:33, 34) I senituri mulimuli ane, sa matuā tamauina i le mafaufau o le aposetolo o Peteru le silafaga lenei a le Atua, e pei ona ia tautino mai: “E moni, ua ou iloa e le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu, ua talia i latou e ia.”—Galuega 10:34, 35.
4. O ā tuutuuga o le faiā i le va o le Atua ma Isaraelu, ma pe na usitaia la e le fanauga a Isaraelu na tuutuuga?
4 Ia mātau foi, o le avea ma nuu tuuina atu o le Atua sa iai ni tuutuuga. Seʻi vaganā lava ua latou matuā usiusitai atu i le siufofoga o le Atua ma tausia lana feagaiga ona avea lea o i latou ma ana “oloa tāua.” Ae pagā lea, sa lei taulau ona faataunuuina e Isaraelu nei mea manaomia. Ina ua latou teena le Mesia na auina mai e le Atua i le uluai senituri T.A., ona aveesea ai lea o lo latou tulaga faaeaina. Sa lē toe avea ai Ieova o “le Atua o Isaraelu.” Ma sa lē toe avea foi le fanauga a Isaraelu faaletino ma nuu tuuina atu o le Atua.—Faatusatusa i le Mataio 23:23.
Le Tuuina Atu o “le Isaraelu [a] le Atua”
5, 6. (a) O le ā na uiga i ai Iesu i ana fetalaiga faavaloaga o loo faamauina i le Mataio 21:42, 43? (e) O anafea ma na faapefea ona amataina “le Isaraelu [a] le Atua”?
5 Po o le uiga ea la ua lē o toe iai nei se nuu tuuina atu o Ieova? E leai. I le sii mai o upu a le faisalamo, na valoia ai e Iesu Keriso: “Tou te lei faitaulia lava ea i Tusi, O le maa na lafoaiina e tufuga fai fale, ua fai lea ma maa tulimanu aupitoaluga; o le mea lea na faia e le Alii [Ieova], tatou te ofo ai pe a vaavaai atu i ai? O le mea lea ou te fai atu ai ia te outou, E aveesea le malo o le Atua ia te outou, a e tuuina atu i se nuu e au mai ai ona fua.”—Mataio 21:42, 43.
6 O le “nuu e au mai ai ona fua” e mautinoa o le faapotopotoga Kerisiano lea. I le vaitaimi lea sa iai Iesu i le lalolagi, sa ia filifilia ai uluai sui fuafuaina mo lena nuu. Ae i le aso o le Penetekoso e 33 T.A., sa faavaeina ai e Ieova le Atua lava ia le faapotopotoga Kerisiano e ala i le liligiina ifo o lona agaga paia i uluai sui, lea sa iai le aofai e tusa ma le 120. (Galuega 1:15; 2:1-4) E pei ona mulimuli ane tusi le aposetolo o Peteru, ona avea ai lea o lenei faapotopotoga fou ua faavaeina o “le tupulaga ua filifilia . . . o tupu ma ositaulaga, o le nuu paia, ma le nuu na faatauina mai e le Atua.” Filifilia mo le ā le mafuaaga? Ina ia latou “taʻutaʻu atu ana galuega lelei—o le na valaau [i latou] nai le pouliuli e oo i lona lava malamalama e matuā ofo ai.” (1 Peteru 2:9) O soo o Keriso, o ē ua faauuina i le agaga o le Atua, sa avea loa ma nuu tuuina atu, “le Isaraelu [a] le Atua.”—Kalatia 6:16.
7. O le ā sa tatau ona olioli ai sui o le Isaraelu a le Atua, ma o lea la, o le ā sa taʻu atu e tatau ona latou alofia?
7 E ui o sui o le nuu paia sa avea o “le nuu na faatauina mai e le Atua,” ae sa lei faia ina ia faapologaina ai i latou. Nai lo lea, sa tatau ona latou olioli i se saʻolotoga e sili atu nai lo le saʻolotoga sa iai i le nuu tuuina atu o Isaraelu faaletino. Na folafola atu e Iesu i sui o lenei nuu fou: “E iloa foi e outou le mea moni, e tuu saʻoloto foi outou e le upu moni.” (Ioane 8:32) Na faasino mai e le aposetolo o Paulo e faapea, sa faasaolotoina Kerisiano mai aiaiga o le feagaiga o le Tulafono. I lenei itu, na ia timai atu ai i ona uso talitonu i Kalatia: “O lenei, ia outou tumau i le saʻolotoga ua faasaʻoloto mai ai Keriso ia te i tatou; a e aua neʻi toe taofia outou i le amo o le pologa.”—Kalatia 5:1.
8. I le ā le vala ua avatu atu ai e le faatulagaga faa-Kerisiano i tagata taitoatasi le saʻolotoga e sili atu nai lo le tulaga sa iai i le feagaiga o le Tulafono?
8 I le lē pei o Isaraelu faaletino o aso anamua, o loo matuā usitaia pea e le Isaraelu a le Atua e oo mai lava i aso nei aiaiga o lo latou tuuina atu. E lē tatau ona ofo i lenei mea auā o loo saoloto ona sui e filifili pe usiusitai. A o avea sui o le Isaraelu faaletino ma ē tuuina atu ina ua latou fananau mai, ae o sui o le Isaraelu a le Atua na avea ma ē tuuina atu e ala i la latou filifiliga. O le faatulagaga faa-Kerisiano ua faapena ona eseese mai le feagaiga o le Tulafono faa-Iutaia, lea sa tatau ai ona tuuina atu tagata taitoatasi uma e aunoa ma le faataga atu ia i latou o le saʻolotoga e filifili ai.
9, 10. (a) Na faapefea ona faaalia e Ieremia o le a iai se suiga e tusa ai o le tuuina atu? (e) Aisea e te faapea mai ai e lē o Kerisiano uma tuuina atu i aso nei o i latou o ni sui o le Isaraelu a le Atua?
9 Sa valoia e le perofeta o Ieremia se suiga e tusa ai o le tuuina atu ina ua ia tusi: “O loo fetalai mai Ieova, Faauta, e oo i ona aso ou te osia ai le feagaiga fou ma le aiga o Isaraelu, ma le aiga o Iuta. E le pei o le feagaiga na ou osia ma o latou tamā i le aso na ou tago ai i o latou lima e aumaia ai i latou mai le nuu o Aikupito; o laʻu feagaiga lea na latou solia, o aʻu foi [“e pei o se tane e ana i latou,” NW ], ua fetalai mai ai Ieova; a o lenei le feagaiga ou te osia ma le aiga o Isaraelu, pe a mavae ia aso, o loo fetalai mai ai Ieova, ou te tuuina laʻu tulafono i totonu ia te i latou, ma ou tusi ai i o latou loto; e fai foi aʻu mo latou Atua, o i latou foi e fai moʻu nuu.”—Ieremia 31:31-33.
10 O le tusia o le tulafono a le Atua “i totonu ia te i latou,” ua tusia i se uiga faafaatusa, “i o latou loto,” ua uunaia ai sui o le Isaraelu a le Atua ina ia ola e tusa ai o lo latou tuuina atu. E sili atu ona malolosi uunaiga o o latou loto nai lo le tulaga sa iai tagata Isaraelu faaletino, o ē na tuuina atu ina ua fananau mai, ae lē i sa latou filifiliga. I aso nei, o le uunaiga malosi ina ia faia le finagalo o le Atua, e pei ona sa faataitaia mai e le Isaraelu a le Atua, ua faia faapena e le silia i le lima miliona uso tapuai i le lalolagi aoao. Ua faapena foi ona tuuina atu o latou ola ia Ieova le Atua ina ia faia lona finagalo. E ui e lē o iai i nei tagata le faamoemoe o le ola i le lagi e pei ona iai ia i latou o loo faia aʻe ai le Isaraelu a le Atua, ae ua latou olioli i le faamoemoe o le ola e faavavau i luga o le lalolagi i lalo o le pulega a le Malo faalelagi o le Atua. Latou te faaalia le talisapaia o le Isaraelu faaleagaga e ala i le lagolagoina ma le maelega o ona sui toaitiiti o loo totoe pea, i le faataunuuina o lo latou tofiga ina ia “taʻutaʻu atu ana galuega lelei—o le na valaau [i latou] nai le pouliuli e oo i lona lava malamalama e matuā ofo ai.”
Faaaogaina ma le Poto le Saʻolotoga Mai le Atua
11. O le ā le tomai na faia aʻe ma le tagata ina ua foafoaina, ma e tatau faapefea ona faaaogā?
11 Na foafoaina e le Atua tagata ina ia faapelepele i le saʻolotoga. Na ia foai ia i latou le tomai e filifili saʻoloto ai. Sa faaaogā e le uluai ulugalii faaletagata lo la saʻolotoga e filifili ai. Peitai ane, na la faia ma le lē atamai ma le lē alofa se filifiliga na taitaia atu i mala e lē gata mo i laua ae faapea foi i a la fanau. E ui i lea, o lenei mea ua faataitaia manino mai ai e lē tāitai ona faamalosia e Ieova ana foafoaga ola atamamai ina ia latou uia se ala e feteenai ma uunaiga moni o o latou loto po o faanaunauga. Ma talu ai “e alofa le Atua i le ua foai ma le loto mālie,” e na o le pau la le tuuina atu e taliaina e ia o lea e faavae aʻe i le alofa, e faia ma le lotomalie ma le loto fiafia, e faavae aʻe i le saʻolotoga e filifili ai. (2 Korinito 9:7) So o se isi lava la tuuina atu e ese mai, e lē taliaina.
12, 13. Ua faapefea ona avea Timoteo o se faaaoaoga mo le toleniina lelei o se tamaitiiti, ma o le ā ua taitaia atu ai e lana faaaoaoga le toatele o talavou?
12 I le amanaiaina atoatoa o lenei tulaga manaomia, ua lagolagoina ai e Molimau a Ieova le tuuina atu o se tasi i le Atua, ae lē tāitai ona latou faia faamalosi so o se tasi e faia lena tuuina atu, e oo lava i a latou fanau. I le ese mai le tele o lotu, e lē papatisoina e Molimau a latou fanau a o pepe meamea, peiseai e mafai ona faamalosia i latou e faia se tuuina atu e aunoa ma se filifiliga totino. O le faaaoaoga faale-Tusi Paia e ao ona mulimuli ai o lea sa mulimuli ai le taulealea o Timoteo. Ina ua avea o se tagata matua, na taʻu atu e le aposetolo o Paulo ia te ia: “Ia e tumau i mea ua aʻoaʻoina ai oe, ma ua mautinoa ia te oe, ina ua e iloa o ia na aʻoaʻo atu ai ia te oe; talu foi ina o e tama itiiti [“tamameamea,” NW] ua e iloa tusi paia, e mafaia ona faapoto ai ia te oe e iu ai i le faaolataga i le faatuatua ua ia Keriso Iesu.”—2 Timoteo 3:14, 15.
13 E lelei ona matauina sa iloa e Timoteo tusitusiga paia talu ai sa aʻoaʻoina ai o ia mai lava i le tamameamea. Sa faamautinoa atu ia te ia—e lei faamalosia—e lona tinā ma le tinā o lona tinā, ina ia talitonu i aʻoaʻoga faa-Kerisiano. (2 Timoteo 1:5) O le iuga, na iloa e Timoteo le atamai o le avea ma se soo o Keriso ma faia ai lana lava filifiliga totino o le tuuina atu faa-Kerisiano. I aso nei, e faitau sefulu afe tama ma teine talavou o ē Molimau a Ieova o latou mātua, ua latou mulimuli atu i lenei faaaoaoga. (Salamo 110:3) O isi ua lē o faapena. O se mataupu tau i filifiliga totino.
O Loo Filifili e Avea ma Pologa a Ai?
14. O le ā ua taʻu mai e le Roma 6:16 ia i tatou e faatatau i le saʻolotoga atoatoa?
14 E leai se tagata ua matuā saʻoloto atoatoa. E faatapulaa mai tagata uma lava i o latou saʻolotoga ona o tulafono masani, e pei o le tulafono o le kalave, lea e lē mafai ona faalēamanaia e aunoa ma ni āuga e oo i ai. E faapena foi i le uiga faaleagaga, e leai se tasi ua matuā saʻoloto atoatoa. Na faapea mai Paulo: “Tou te lei iloa ea, o lē tou te tuuina atu i ai outou e fai ma auauna [pologa] e anaana i ai, o ana auauna [pologa] outou tou te anaana i ai, po o le agasala e oo ai le oti, po o le anaana e oo ai le amiotonu?”—Roma 6:16.
15. (a) E faapeī lagona o tagata e uiga i le avea o ni pologa, ae o le ā o loo iu lava ina faia e le toatele? (e) O ā fesili talafeagai tatou te ono fesiligia ai i tatou lava?
15 O le manatu o le avea o se pologa a se tasi e tetee i ai le toatele o tagata faapea e lē manaia. Peitai, o le mea moni lava i le lalolagi i aso nei, ua masani ona faaseseina ma taaʻina tagata i le tele o auala taufaasese e iloagatā, na e iu atu ai i lo latou faia ma le lē iloa o ni mea e mananao isi tagata latou te faia. Mo se faataitaiga, e taumafai vaega o loo faasalalauina oloa ma i latou o puleaina faafiafiaga ia tutusa uma mea e mafaufau ma faia e tagata, i le faatuina o ni tapulaa mo i latou e mulimuli i ai. E uunaia e faalapotopotoga faapolotiki ma lotu tagata ina ia lagolagoina o latou manatu ma o latou sini, e lē masani ona faia i ni talanoaga e faatalitonu ai, ae masani ona faatosina i se uiga o le faifai mea faatasi po o le faamaoni. Talu ai sa matauina e Paulo ‘o pologa i tatou a i latou o loo tatou usiusitai atu i ai,’ e lelei ai ia i tatou taitoatasi ona fesili ifo i le tagata lava ia, ‘O ai lea ou te pologa i ai? O ai o loo tele ana aafiaga i aʻu filifiliga ma loʻu olaga? Po o taʻitaʻi lotu ea, taʻitaʻi faapolotiki, tagata e tele tupe, po o tagata lauiloa i faafiafiaga? O ai ou te usiusitai i ai—o le Atua po o tagata?’
16. I le ā le uiga o loo avea ai Kerisiano ma pologa a le Atua, ma o le ā le manatu e talafeagai ona manatu ai i lena faapologaina?
16 E lē manatu Kerisiano i le usitai i le Atua faapea o se solia ma le lē talafeagai lea o le saʻolotoga totino a le tagata. Latou te lotomalilie e faatino lo latou saʻolotoga i le uiga sa faaalia e lo latou Faaaʻoaʻo, o Iesu Keriso, i le taumafai e ogatasi faanaunauga ma mea o loo faamuamuaina totino ma le finagalo o le Atua. (Ioane 5:30; 6:38) Ua latou atiina ae “le finagalo o Keriso,” i lo latou gauai atu ia te ia o le Ulu o le faapotopotoga. (1 Korinito 2:14-16; Kolose 1:15-18) E tai pei lenei mea o se fafine o lē ua faaipoipo ma lotomalie e lagolagosua atu i le tamaloa ua ia alofa i ai. O le mea moni, ua taʻua Kerisiano faauuina o le taupou faamaoni ua tauto e faaipoipo atu i le Keriso.—2 Korinito 11:2; Efeso 5:23, 24; Faaaliga 19:7, 8.
17. O le ā ua filifili Molimau a Ieova uma lava ina ia avea ai i latou?
17 O Molimau a Ieova taitoatasi, pe ia te ia le faamoemoe mo le lagi po o le faamoemoe i le lalolagi, ua uma ona faia se tuuina atu totino i le Atua ina ia faia lona finagalo ma usiusitai atu ia te ia o le Pule. Mo Molimau uma taitoatasi, ua avea le tuuina atu o se filifiliga totino ina ia sili atu ona fai ma pologa a le Atua nai lo le avea ma pologa a tagata. Ua ogatusa lenei ma le fautuaga a le aposetolo o Paulo: “Ua faatauina outou i le tau, aua neʻi avea outou ma pologa o tagata.”—1 Korinito 7:23.
Ia Iloa Ona Fai Mea mo lo Tatou Lava Lelei
18. O le ā le taimi e agavaa ai mo le papatisoga se tagata o le a ono avea o se Molimau?
18 A o lei mafai ona agavaa se tasi e avea ma Molimau a Ieova, e tatau ona ia ausia ni agavaa faale-Tusi Paia. E iloiloina ma le faaeteete e toeaina pe ua malamalama moni sē o loo fia avea ma Molimau i le uiga o le tuuina atu faa-Kerisiano. Po o ia manao moni lava e avea ma se tasi o Molimau a Ieova? Po o ia lotomalie e ola e tusa ma mea e manaomia e lenei tuuina atu? Pe afai e leai, e lē talafeagai la o ia mo le papatisoga.
19. Aisea ua leai ai se mafuaaga mo le faitioina o se tasi ua filifili e avea ma auauna tuuina atu a le Atua?
19 Peitai, afai e ausia e se tasi mea manaomia uma, aisea la e faitioina ai le faia ma le loto i ai o lana lava filifiliga totino ina ia taaʻina lona olaga e le Atua ma Lana Afioga faagaeeina? Pe itiiti ea le taliaina pe a manao se tasi ia taaʻina lona olaga e le Atua nai lo le taaʻina e tagata? Pe itiiti ea se aogā e maua mai lenei mea? E lē manatu faapena Molimau a Ieova. Latou te ioe ma le loto atoa i afioga a le Atua sa tusia e Isaia: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai.”—Isaia 48:17.
20. O ā vala e tuusaʻoloto ai e upu moni o le Tusi Paia tagata?
20 O upu moni a le Tusi Paia e tuusaʻoloto ai tagata mai le talitonu i aʻoaʻoga sese faalotu, e pei o le faapuapuagatia e faavavau i se afi i seoli. (Failauga 9:5, 10) Nai lo lea, e faatumulia ai o latou loto i le agaga faafetai mo le faamoemoe moni mo ē ua maliliu—le toetu ua mafai ona o le taulaga togiola a Iesu Keriso. (Mataio 20:28; Galuega 24:15; Roma 6:23) O upu moni o le Tusi Paia ua tuusaʻoloto ai tagata mai lagona fiu ona o le faalagolago atu i folafolaga faapolotiki na e lē o taulau pea. Nai lo lea, e faapogaia ai ona tumu o latou loto i le olioli i le iloa ua leva ona pule le Malo o Ieova i le lagi ma ua lē o toe mamao ona pule mai lea i le lalolagi atoa. O upu moni o le Tusi Paia e tuusaʻoloto ai tagata mai gaoioiga na, e ui ina manaia i le tino augavale, ae lē faamamaluina ai le Atua ma iu ai i se iuga faigata e pei o ni faiā lelei ua lē taulau, o maʻi, ma le vave oti a o lei tāitai le olaga. Pe a faapuupuu le manatu, o le avea ma pologa a le Atua e matuā sili atu ona aogā nai lo le avea ma pologa a tagata. O le mea moni, o le tuuina atu i le Atua ua folafola mai ai le mauaina o aogā “i lenei olaga . . . [ma] le ola atali e maua ai le ola faavavau.”—Mareko 10:29, 30.
21. E faapeī manatu o Molimau a Ieova i le tuuina atu i le Atua, ma o ā o latou faanaunauga?
21 O Molimau a Ieova i aso nei sa lei avea i latou ma vaega o se nuu tuuina atu ina ua latou fananau mai, e pei ona sa iai le fanauga a Isaraelu anamua. Ua avea Molimau ma vaega o se faapotopotoga o Kerisiano tuuina atu. Ua avea Molimau papatisoina taitoatasi ma sē ua tuuina atu e ala i lona faaaogaina o lana lava saʻolotoga e filifili ai i le faia o se tuuina atu. Ioe, mo Molimau a Ieova, o le tuuina atu e iu ai i se faiā totino mafana lea ma le Atua ua faailogaina e ala i le auauna atu ma le lotomalie ia te ia. O lenei faiā olioli ua latou faanaunau ma le loto atoa e tausisia, ua faavavau ai ona latou pipii mau atu i le saʻolotoga lea na faasaʻoloto ai i latou e Iesu Keriso.
E Faapefea Ona E Tali?
◻ Aisea sa lē faailoga tagata ai le Atua i le filifilia o Isaraelu e avea ma ana “oloa tāua”?
◻ Aisea e te faapea mai ai e lē aveesea e le tuuina atu faa-Kerisiano le saʻolotoga?
◻ O ā aogā o le tuuina atu ia Ieova le Atua?
◻ Aisea e sili atu ai ona lelei le avea ma auauna a Ieova nai lo le avea ma pologa a tagata?
[Ata i le itulau 15]
I Isaraelu anamua, o le tuuina atu i le Atua sa faalagolago i lo latou fananau mai
[Ata i le itulau 16]
O le tuuina atu faa-Kerisiano o se mataupu tau filifiliga