“Talu Ina o E Tama Meamea ua E Iloa”

E TUSA ai ma suesuega faasaienisi lata mai nei, o le talatalanoa atu i tama meamea e matuā tele sona aafiaga i le atiina ae o o latou faiʻai, le faavaeina o o latou agavaa e mafaufau ai, e fefulifulisaʻi ai, ma foia faafitauli. E sili ona moni lenei mea i le tausaga muamua o le olaga o se pepe. Na lipotia e le International Herald Tribune e faapea ua talitonu nei isi tagata suesue “o le faitau aofai o upu e faalogo i ai se pepe i aso taitasi, o se faaataga pito i sili lea o lona poto i le lumanai, le taulau i le aʻoga faapea ma le lelei o lona vafealoai ma tagata.”

Ae peitai, o upu ia e faaleo atu e tatau ona faaupu e se tagata. E lē tatau ona sui tulaga ai le televise po o se leitiō.

Na faapea mai se saienitisi tau neura o le tino, i le University of Washington i Seattle i le Iunaite Setete o Amerika: “Ua matou iloa nei, e vave lava ona faia i le amataga o le olaga sootaga tau neura ma o loo faatalitali mai le faiʻai o le pepe mo ni mea e tutupu ina ia iloa ai le auala e faia ai ni sootaga. Ua matou faatoʻā iloa nei lava le vave amata o lenei sootaga. Mo se faataitaiga, ua aʻoaʻoina e tama meamea le faaleoina o upu o la latou lava gagana i le taʻi ono masina le matutua.”

Ua luitauina e suesuega lata mai nei le faamatalaga taatele lea e taulau manuia ai le poto o le pepe pe afai e tau ina avatu i ai le tele o le alofa. O loo faamamafa ai foi le tāua o le vaega a mātua i le tuputupu aʻe o le tamaitiiti.

Ua faamanatu mai ai e lenei mea ia i tatou faaupuga a le tusi faagaeeina a le aposetolo o Paulo ia Timoteo: “Talu foi ina o e tama meamea ua e iloa tusi paia, e mafaia ona faapoto ai ia te oe e iu ai i le faaolataga.” E foliga mai o tusitusiga paia ia na taʻu atu i le tama meamea o Timoteo e lona tinā talitonu ma le tinā o lona tinā, na iai se vaega autū i lona tuputupu aʻe o se auauna mataina a le Atua.—2 Timoteo 1:5; 3:15, NW.