Le Tusi Paia—O se Tusi e Tutasi

Ua taʻua le Tusi Paia o se tusi ua sili ona alumia i le lalolagi ma ua matuā talafeagai ona faia faapea. O loo faitauina le Tusi Paia ma e sili atu ona fiafia i ai nai lo o se isi lava tusi. I aso nei, o lona faasalalauina atu (o se tusi atoa po o ni vaega) ua faatatauina e tusa ma le fa piliona kopi i le sili atu i le 2,000 gagana.

Ae peitai, o le mea e sili mamao atu ona fiafia ai nai lo o le faasalalauina atu o le Tusi Paia, o lona faapea mai o le Atua na ia tusia. Na tusia e le aposetolo Kerisiano o Paulo e faapea: “O Tusi Paia uma lava ua faagaeeina e le Atua.” (2 Timoteo 3:16, NW) O le ā le uiga o lena fuaitau? O le fasi fuaiupu “e faagaeeina e le Atua” (faa-Eleni, the·oʹpneu·stos) o le uiga moni “na mānavaina mai e le Atua.” O le upu Eleni e fesootai atu i ai, o le pneuʹma, o lona uiga “agaga.” I lea, ua faapea mai le faamatalaga, o le agaga paia o le Atua na faagaeeina ai tagata tusitala, i se gagana faafaatusa, i le mānava atu lea ia i latou, o lea, na iu ina maua mai ai se galuega, na mafai ona taʻua moni o le Afioga a le Atua, ae lē o upu a tagata. O le mea moni, o le toatele o i latou ua suesueina le Tusi Paia e maofa i le autasi o faamatalaga i le Tusi Paia atoa, o le saʻo aʻiaʻi e tusa ai ma le faasaienisi, o le faamaoni ma le tautala saʻo o ona tusitala, ma le mea e aupito sili ona tāua, o le faataunuuina o valoaga o loo iai—o na valoaga uma ua mafai ona faatalitonuina ai le faitau miliona o tagata faitau ma mafaufau e faapea, o lenei tusi, e mai se puna e sili atu ona maualuga nai lo tagata.a

Ae na faapefea ona taʻitaʻia ma le matuā faaeteete e le Atua le tusiaina o le Tusi Paia? Ua faapea mai nisi na ia faalauina mai i ai upu e tusia i le Tusi Paia. Ua faapea mai isi, sa ia faagaeeina na o manatu ia o loo maua i le Tusi Paia ae lē o upu. Ae ui i lea, o le mea moni, o le faagaeeina o manatu, e lē mafai ona faatapulaa i le tau o se auala e tasi, auā na fetalai mai le Atua ‘i o tatou tamā i faiga eseese, e ala i perofeta.’ (Eperu 1:1; faatusatusa i le 1 Korinito 12:6.) I le mataupu lea e sosoo mai, o le a tatou iloiloina ai auala na fetalai mai ai le Atua i tagata tusitala se toʻa 40 o ē na tusia le Tusi Paia.

[Faaopoopoga i lalo]