Lipoti a Ē Faalauiloa le Malo

“E Malosi” Upu Moni o le Tusi Paia

O LOO faaalu e lenei lalolagi le tele o le taimi ma tupe e taumafai ai e pulea gaoioiga a tagata leaga. Ua mafai e tulafono ona gaoioi faasaga i solitulafono e pel o le faaaogāseseina o vailaau faasaina, le gaoi, ma le fasioti tagata: a e ua lē mafai e nei tulafono ona faia tagata leaga ia avea ma tagata lelei. I le isi itu, o loo i ai le malosi i le Afioga a le Atua le Tusi Paia e liliuina ai, ma o tagta o latou faatatauina ana tulafono ma mataupu silisili ua oo ina amio saʻo, ua faamaoni, ma ua avea o ni tagata agamalu.—Roma 12.2.

◻ Mo se faaaʻoaʻoga sa faia e ni Molimau se toalua i Ausetalia ni toe asiga i ni tama talavou ua leai ni galuega. A o la ulu atu i le fale o i ai nei tama, sa la tau atu i se potu pogisa, ua faatumulia i le asu o tapaa. Sa i ai ni mariuana totō luga o le laulau ma le tele o ata o siva rock e laina i luga o le puipui o le fale. I le tasi pito o le potu e i ai masini lapopoa [amplifiers] mo kitara e alu i le uila. O se potu e fai ai faataʻitaʻiga a le faaili o musika o le siva rock. Sa mafai ona latou amataina se suʻesuʻega faale-Tusi Paia ma le toatolu o nei tama talavou, o i latou o se auso. I ni nai tausaga muamua atu, na suʻesuʻa ai e lo latou tinā le Tusi Paia ma Molimau, ma faatasi ai ma le fesoasoani a le tusi E Mafai ona E Ola e Faavavau i Parataiso i Le Lalolagi, na ia aʻoaʻo ai tama e uiga i le folafolaga a le Atua i se parataiso i le lumanai. Ona siitia loa lea o le aiga, ma taofia ai le suʻesuʻega. Nei la, faatasi ai ma le toe faafouina o lo latou alofa mo le upu moni, sa leʻi pine ai lava a e faatasi atu isi a latou uo e toalua i le suʻesuʻega.

I totonu o le tolu masina, a e talaʻi loa le toatasi o i latou, ma i le masina mulimuli ane, a e aufaatasi atu loa ma le isi toalua ia te ia. Ua latou tuua le faaili, ma i totonu o le fa masina, a e aufaatasi atu uma loa le toatolu i le galuega talaʻi. I le taimi lea, ua amata ai e lo latou tinā, le uso laitiiti, ma lo latou tuafafine matua ua faaipoipo ona suʻesuʻe le Tusi Paia. I sina taimi puupuu mulimull ane, a e fesili atu foi le isi a latou uo mo se suʻesuʻega faale-Tusi Paia. Maeu se olioli i le vaai atu ua papatiso uma le toalima o latou i le aso e tasi i se fonotaga matagaluega! O le isi toalua o loo galulue agaʻi atu i le papatisoga, a o agaʻigaʻi atu pea i luma le tinā ma lana tama teine i se tulaga lelei. E moni, e malosi le Afioga a le Atua.

◻ O se tamaloa i Anitenitina sa i ai sana tagata faigaluega e ese le paie ma le taufaasese ma e aitalafu ia te ia ni tupe. I le tasi aso na teʻi ai lava ua galoma le tagata faigaluega. Ma i ni tausaga mulimuli ane, i le auala e latalata i lona fale, na fetaui ai le tamaloa ma le tagata lea na faigaluega ia te ia. Na faafeiloai o ia e le tagata faigaluega lea muamua, i le faapea atu: “O lea ou te alu atu i lou fale e totogi atu le tupe lea ou te aitalafu ai ia te oe. Ia, lau tupe lea. Faafetai tele lava, ma faamolemole faamagalo mai aʻu ona o le tuai ona toe totogi atu.” I le ofo tele, na fesili atu ai le tamaloa pe ai se ā ua ia faia ai lenei mea. Na ia tali mai: “O lea o loo oʻu suʻesuuʻe le Tusi Paia, ma ua avea nei aʻu o se tasi o Molimau a Ieova. Fai mai le Tusi Paia e aua neʻi ia te outou se mea e tasi a se tasi tagata a e tau lava o le alofa. O le pogai lea ua ou toe faafoi atu ai au mea.” Ona fesili atu lea o le tamaloa: “O le ā le malosi o i le Tusi Paia na te suia ai faapea se tagata?” Na ia amata se suʻesuʻega faale-Tusi Paia ma le tamaloa, ma ua ia aʻoaʻoina ai foi le upu moni, ua mafaia nei mea uma ona o suiga tetele ua faia e le upu moni o le Tusi Paia i lana tagata faigaluega muamua.

E toatele tagata loto faamaoni i Anitenitina ua latou talia upu moni e suia ai o le Tusi Paia, ma ua suia nei ala ō latou olaga, e pei ona faaalia i le mea na tupu lea e mulimuli mai.

◻ “I se tasi aso ina ua ma tuʻituʻi atu i le faitotoa a o mai i ai i le auaunaga,” na taʻua ai e se Molimau, “na ma faalogoina ai le feei mai i totonu o le fale. I le tali mai i la ma tuʻituʻi atu, na sau ai i fafo se tamaloa—ua matuā ita lava. Na amata loa ona ma faamatala atu i ai le fuafuaga o la ma asiasiga, a e sa ia faamataʻu mai i maʻua faapea o le a ia togia i maʻua i fafo ma lona fanua. A e sa faaauau pea ona ma talanoa filemu atu i ai ma upu mālu. Sa amata loa ona faasolosolo lemu atu ina toafilemu o ia. I lo ma matauina o lenei mea, na ma faamatala atili atu loa ia te ia e uiga i le fuafuaga ofoofogia a Ieova mo le fanau a tagata. I le faafiafiaina tele e uiga i lenei mea, na faateia i maʻua e le tamaloa i lona faapea mai: ‘Na auina mai oulua e le Atua i inei.’ Ona ia valaaulia loa lea o i maʻua i totonu o le fale. I inā i le tulimanu o le fale, o loo faapupuu ai lana ‘avā’ ma tamaiti o loo fetagisi. Ona ia faapea mai lea: ‘E te lua ō mai, ua toeitiiti lava ou fasiotia laʻu avā laʻu fanau ona fasiotia ai lea ma aʻu. Ua ou matuā lotovaivai! Ua leai saʻu galuega, ma o le a latou tulia ese matou mai lo matou fale, ma e tele foi aʻu aitalafu e leʻi totogia.’”

O lenei mea na tupu sa oo i se iʻuga fiafia. Na maua e se tuafafine se galuega ma le tamāloa, ma sa toe maua se isi ona fale. Na ia amata loa ma lana “avā” ona suʻesuʻe le Tusi Paia ma faatoʻā faaipoipo ai ina ua mavae le 15 tausaga o nonofo faatasi.

“E malosi” upu moni o le Tusi Paia e pei ona faaalia i nei mea na tutupu, ma e mafai ona ia faia lena mea i so o se tagata loto maulalo o lē e suʻesuʻe le Tusi Paia ma faatatau.

[Faamatalaga faaopoopo i le itulau 21]

“O loo ola le Afioga a le Atua ma e malosi.”—EPERU 4:12