Talisapaia Faatasitasiga Faa-kerisiano

“Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou.”—EPERU 10:24, 25.

1, 2. (a) Aisea o se faaeaga ai le auai atu i se faatasitasiga a Kerisiano moni? (e) O le ā le uiga o le auai mai o Iesu i faatasitasiga a ona soo?

MAEU se faaeaga o le auai atu i se faatasitasiga faa-Kerisiano, e tusa lava pe lē atoa se toasefulu ia po o ni nai afe foi o tagata tapuai o Ieova o loo iai, auā na fetalai Iesu: “O le mea ua faapotopoto ai se toalua, po o se toatolu i loʻu igoa, ou te i ai faatasi ma i latou”! (Mataio 18:20) E moni, o le folafolaga lena sa faia e Iesu a o ia talanoaina mataupu faafaamasinoga sa manaomia ona taulimaina ma le saʻo e i latou na taimua i totonu o le faapotopotoga. (Mataio 18:15-19) Ae pe e mafai ona faatatauina foi fetalaiga a Iesu faamataupu silisili i faatasitasiga uma faa-Kerisiano ia o loo amata ma faaiu i le tatalo e ala i lona suafa? Ioe. Manatua, ina ua tofia e Iesu ona soo e fai le galuega o le faia o soo, sa ia folafola atu: “Faauta foi, ou te ia te outou i aso uma lava, e oo lava i le gataaga o le lalolagi.”—Mataio 28:20.

² E leai se masalomia o le Ulu o le faapotopotoga Kerisiano, le Alii o Iesu Keriso, e matuā naunau mai o ia i faatasitasiga uma a ona soo faamaoni. E lē gata i lea, e mafai ona tatou mautinoa o loo auai mai o ia ma i latou e ala i le agaga paia o le Atua. (Galuega 2:33; Faaaliga 5:6) E naunau mai foi Ieova le Atua i a tatou potopotoga faatasi. O le fuafuaga autū o na faatasiga ina ia sii atu ai le viiga i le Atua “i totonu o faapotopotoga.” (Salamo 26:12) O lo tatou auai atu i sauniga a le faapotopotoga o se faamaoniga lena o lo tatou alofa mo ia.

3. O ā mafuaaga tāua tatou te talisapaia ai faatasitasiga faa-Kerisiano?

³ O loo iai isi mafuaaga lelei tatou te talisapaia ai faatasitasiga faa-Kerisiano. A o lei tuua e Iesu Keriso le lalolagi, na ia tofia ai ona soo faauuina e gaoioi o se “auauna faamaoni ma le mafaufau” i le faasoasoaina atu o meaʻai tatau i le auaiga o le faatuatua. (Mataio 24:45) O se auala tāua o loo faatinoina ai lena fafagaina faaleagaga e ala atu lea i sauniga a le faapotopotoga faapea foi i faatasitasiga tetele—fonotaga ma tauaofiaga. Ua taitaia e le Alii o Iesu Keriso lenei auauna faamaoni e saunia faamatalaga tāua i na faatasitasiga mo ē uma e mananao ia faasaoina atu i le iuga o lenei faiga amioleaga o mea ma maua ai le ola i totonu o le lalolagi fou amiotonu a le Atua.

4. O le ā le ‘masaniga’ leaga lea o loo taʻua i le Tusi Paia, ma o le ā o le a fesoasoani ia i tatou e alofia ai?

⁴ O lea, e lē lelei mo se Kerisiano le faatupu aʻe o le masaniga leaga lea sa matauina e le aposetolo o Paulo, o lē na tusi mai: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le Aso o loo tāulata mai.” (Eperu 10:24, 25) O le mafaufau loloto i le faaeaga ma aogā o le auai atu i faatasiga faa-Kerisiano o le a fesoasoani lea ia i tatou e faamaoni ai ma loto atoa i le lagolagoina o na faatasitasiga.

Sauniga e Faalaeiauina Ai

5. (a) O ā āuga e tatau ona maua i a tatou faamatalaga i sauniga? (e) Aisea e lē tatau ai ona tatou faatuai e valaaulia ē naunau fiafia e auai mai i sauniga?

⁵ Talu ai e tatalo atu Kerisiano mo le agaga paia o Ieova ina ia faatasi mai i sauniga faa-Kerisiano, ua tatau ai i tagata taitoatasi o loo auai ona faia le mea sili na te mafai ina ia galulue faatasi ma le agaga ae ‘lē o le faatiga i le agaga paia o le Atua.’ (Efeso 4:30) Ina ua tusia e le aposetolo o Paulo na upu faagaeeina, na ia talanoaina le faaaogā tatau o le tautala. O a tatou faamatalaga e tatau lava ona faaaogā “e ati ae ai i mea e aoga, e tupu ai le lelei i e faalogologo i ai.” (Efeso 4:29) E sili ona tāua lenei itu i faatasitasiga faa-Kerisiano. I lana tusi atu i uso i Korinito, na faamamafa ai e Paulo le manaoga ina ia avea sauniga o ni mea e faalaeiauina ai, e aʻoaʻoina ai, ma faamalosia ai. (1 Korinito 14:5, 12, 19, 26, 31) E maua e i latou uma o loo auai aogā mai na sauniga, e aofia ai i latou faatoʻā auai, o ē atonu latou te faapea mai: “O ia te outou le Atua.” (1 Korinito 14:25) Ona o lenei mafuaaga, e lē tatau ai ona tatou faatuai e valaaulia ē fou e naunau fiafia ina ia tatou faapotopoto faatasi, auā o le faia faapea o le a vave ai ona latou agaigai i luma faaleagaga.

6. O ā nisi o vala e fesoasoani ina ia maua ai se sauniga e faalaeiauina ai?

⁶ O i latou uma e tofia i ai lauga, o faatalatalanoaga, po o faataitaiga i se sauniga faa-Kerisiano, latou te mananao ina ia mautinoa e lē gata ia maua ni faalaeiauga i a latou faamatalaga, ae ia ogatasi foi ma le Afioga tusia a le Atua, le Tusi Paia. E lē gata ia fofogaina atu ma le saʻo faamatalaga, ae tatau foi ona tatou faaleo atu lagona ma uiga faaalia e ogatasi ma uiga alofa o le Atua ma Keriso. Pe afai e manatunatu mamafa uma i latou o loo taulimaina vaega i le polokalame o se sauniga ina ia latou faaatagia atu ‘fua o le agaga o le Atua,’ e pei o le olioli, le onosai, ma le faatuatua, ona mautinoa lea o le a lagonaina e i latou uma o loo i le aofia le faalaeiauina ai.—Kalatia 5:22, 23.

7. E mafai faapefea e tagata uma o loo auai ona saosaolaumea ina ia maua se faatasitasiga e faalaeiauina ai?

⁷ E ui atonu e na o se vaega toaitiiti e faia ni vaega i le polokalame i sauniga a le faapotopotoga, ae mafai e tagata uma ona saosaolaumea ina ia maua se faatasitasiga e faalaeiauina ai. E masani ona iai ni avanoa mo le aofia e taliina ai fesili. O avanoa nei e faalauiloa atu ai i le lautele lo tatou faatuatua. (Roma 10:9) Aua lava neʻi faaaogaina e fai ma avanoa e faaofi atu ai ni o tatou lava manatu, e mitai atu ai ni mea ua tatou ausia, ia pe faitioina ai se uso talitonu. Pe lē o le faatiga ea lena i le agaga o le Atua? O feeseeseaiga ma uso talitonu e sili atu ona lelei pe a taulimaina e oe lava ia ma lena tagata, i le agaga o le alofa. Ua faapea mai le Tusi Paia: “Ia outou feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.” (Efeso 4:32) Maeu se avanoa sili ona lelei ua aumaia e faatasitasiga faa-Kerisiano ia i tatou, ina ia faatatauina ai lenei fautuaga matagofie! Ina ia faatino la lena mea, ua vave taunuu ai le toatele i sauniga ma faatuatuai foi ona ō ese mai pe a maeʻa. E fesoasoani foi lenei mea i ē fou loto naunau, o ē o loo iai so latou manaoga faapitoa ina ia talileleia mai i latou. O lea ua iai i Kerisiano tuuina atu uma se matafaioi e faatino, ina ia avea sauniga e faalaeiauina ai e ala i le ‘manatunatu o le tasi i le isi ma tau faatupu le alofa ma galuega lelei.’

Ia Sauniuni Lelei

8. (a) O ā faataulagaina mataina ua faia e nisi ina ia auai atu i sauniga? (e) O le ā le faaaoaoga ua faataatia e Ieova i le avea o se leoleo mamoe?

⁸ E ui atonu e tau faigofie mo nisi le auai atu i faatasitasiga faa-Kerisiano, ae mo isi e manaomia ai ni faataulagaina e faifai pea. Mo se faaaoaoga, o se tinā Kerisiano o loo faigaluega totogi ina ia fesoasoani i le saunia o mea manao-mia mo lona auaiga, e masani lava ona mānava mai i le fale ua matuā vaivai. Ona tatau lea ona ia saunia le meaʻai ma tapena lana fanau mo le sauniga. O isi Kerisiano atonu e mamao se mea e faimalaga ai agaʻi i sauniga, pe atonu foi e faafaigata o latou tulaga ona o ni maʻi tumau o le tino po ua matua le soifua. E mautinoa lava, e malamalama Ieova le Atua i tulaga o tagata taitoatasi o loo auai i le sauniga, e pei lava ona malamalama se leoleo mamoe alofa i manaoga faapitoa o mamoe taitasi o lana lafu. Ua faapea mai le Tusi Paia: “Na te [Ieova] leoleoina lona lafu e pei o le leoleo mamoe; na te sapaia tamai mamoe i ona lima, ma tauave i latou i lona fatafata; na te taʻitaʻi filemu i mamoe ua fananau.”—Isaia 40:11.

9, 10. E mafai faapefea ona tatou maua le tele o aogā mai sauniga?

⁹ O i latou o loo tatau ona faia ni faataulagaina tetele ina ia auai e lē aunoa i sauniga, atonu e faatapulaa le tele o se taimi e mafai ona latou faaaluina e suesueina ai se mataupu o le a talanoaina. O le tausisi atu i le faasologa faalevaiaso o le faitauga Tusi Paia e mafai ai ona atili tauia le auai atu i le Aʻoga o le Faiva Faatiokarate. O le muai sauniuni foi faapena mo isi sauniga, e pei o le Suesuega o Le Olomatamata, ma le Suesuega Tautusi a le Faapotopotoga, e atili aogā ai nei sauniga. O le muai faitauina o le mataupu o loo suesueina, ma le iloiloina o nisi o mau o le Tusi Paia o loo na ona taʻu mai, o le a mafai ai e i latou e tele tiute tauave faaleaiga e alu ai le taimi, ona nofo sauni e faia so latou sao uigā i nei talanoaga tāua faale-Tusi Paia.

¹⁰ O isi, o loo tele so latou taimi avanoa mai o latou tulaga, e mafai ona latou faaaluina se taimi tele e sauniuni ai mo sauniga. Mo se faaaoaoga, e mafai ona latou faia ni sailiiliga i mau o loo faasino mai ae lē o siiina mai. Ona mafai ai lea e tagata uma ona sauniuni e maua ni mea e sili ona lelei mai sauniga ma faia ai se sao lelei i le faalaeiauina o le faapotopotoga e ala i a latou lauga ma a latou tali. O le sauniuni lelei, o le a faataatia ai e toeaina ma auauna o le faiva se faaaoaoga lelei i le faia o ni tali e pupuu, ma tuusaʻo. Ona o le faaaloalo i sauniuniga a Ieova, o le a alofia ai e le aofia le faia o ni gaoioiga e faalavelave ai a o faagasolo sauniga.—1 Peteru 5:3.

11. Aisea e manaomia ai le pulea e le tagata o ia lava ina ia sauniuni mo sauniga?

¹¹ O gaoioiga ma faafiafiaga e lē o tāua mo lo tatou maloloina lelei faaleagaga atonu e faaaluina ai le tele o o tatou taimi. Afai o le tulaga lena, e manaomia la ona tatou iloiloina i tatou lava ma ia ‘aua neʻi faavaleaina’ i tatou e tusa ai o le faaaogaina o o tatou taimi. (Efeso 5:17) E ao ona avea ma o tatou sini le ‘faasao le taimi’ mai mea e lē tāua tele, ina ia tele ai le taimi e faaalu i se suesuega totino faale-Tusi Paia ma sauniuniga mo sauniga, faapea foi i le auaunaga o le Malo. (Efeso 5:16) Ua ioeina, e lē faigofie i taimi uma lenei mea, ma e manaomia ai le pulea e le tagata o ia lava. O talavou o ē ua latou faaaogaina tatau o latou taimi ua latou faataatia se faavae lelei mo le agaigai i luma i le lumanai. Na tusi atu Paulo i lana aumea talavou o Timo-teo: “Ia e mafaufau i ia mea [fautuaga a Paulo ia Timoteo], ia e faamasani ai; ina ia iloa ai e tagata uma lou alualu i luma.”—1 Timoteo 4:15.

Faaaoaoga Mai le Afioga a le Atua

12. O le ā le faaaoaoga mataina na faataatia e le aiga o Samuelu?

¹² Seʻi manatunatu i le faaaoaoga matagofie na faataatia e le aiga o Samuelu, o ē sa faia e lē aunoa so latou sao i fuafuaga mo faatasitasiga ma isi uso tapuai a o iai le falefetafai o le Atua i Sailo. Sa na o tane na manaomia ona latou asiasi atu e faatasi i le tausaga pe a faamanatuina tausamiga. Peitai, o Elekana le tamā o Samuelu, sa ia ave uma lona aiga, a o ia “alu ae . . . nai lana aai i lea tausaga ma lea tausaga e tapuai, ma fai taulaga i Sailo ia Ieova o ʻau.” (1 Samuelu 1:3-5) O le nuu o Samuelu, o Ramata-sofimo, e foliga mai sa tu e latalata i le sami i le mea ua iai Rentis i ona po nei, i auvae mauga o “le mauga o Efaraima.” (1 Samuelu 1:1) O lea, sa aofia ai i le malaga i Sailo le tusa ma le 20 maila [30 kilomita], o se malaga sa lē lavavā ai i na aso. O le mea lena sa faia ma le faamaoni e le aiga o Elekana “i lea tausaga ma lea tausaga a o masani ona latou ō aʻe i le fale o Ieova.”—1 Samuelu 1:7, NW.

13. O le ā le faaaoaoga na faataatia e tagata Iutaia faamaoni i taimi a o iai Iesu i le lalolagi?

¹³ Sa soifua aʻe foi Iesu i se aiga toatele. I tausaga taitasi e faimalaga atu ai le aiga mai Nasareta i le tusa ma le 60 maila [100 kilomita] i le itu i saute ina ia auai i le tausamiga o le Paseka i Ierusalema. E lua ni auala e ono mafai ona latou ui atu ai. O le auala lea e sili ona vave sa aofia ai le ifoifo atu i le Vanu o Mekito ona toe aʻeaʻe lea i le tusa ma le 2,000 futu [600 mita] e ui atu i laufanua o Samaria ma oo atu ai i Ierusalema. O le isi auala lea sa tele ina faaaogā, o le auala lena na ui ai Iesu i lana malaga mulimuli atu i Ierusalema i le 33 T.A. E aofia ai i lenei le ui atu i le Vanu o le Ioritana e maulalo ifo pe a faatusa i le fogatai, seia oo ina taunuu atu i “laueleele o Iutaia i tala atu o Ioritana.” (Mareko 10:1) Mai lenei vaega, lona uiga o ‘le auala i Ierusalema’ e tusa lona mamao ma le 20 maila [30 kilomita], e aofia ai le aʻeaʻe atu i se maualuga e silia ma le 3,700 futu [1,100 mita]. (Mareko 10:32) O se mea masani, le ō atu o le motu o tagata o ē faamaoni i le faamanatuina o tausamiga, i lea malaga faigata mai Kalilaia e oo atu i Ierusalema. (Luka 2:44) Maeu se faaaoaoga lelei mo auauna a Ieova i atunuu tamaoaiga i aso nei, o le toatele lava e leai se faaletonu o le mafai ona auai atu i potopotoga faa-Kerisiano, e faafetaia ai auala faaonaponei o femalagaiga!

14, 15. (a) O le ā le faaaoaoga na faataatia e Ana? (e) O le ā e mafai ona tatou aʻoaʻoina mai le uiga lelei ua faaalia e nisi o ē faatoʻā auai mai i sauniga?

¹⁴ O se isi faaaoaoga, o le tinā o Ana, e 84 ona tausaga, o lē ua maliu lana tane. Ua faapea mai le Tusi Paia “e lei alu ese ia i le malumalu.” (Luka 2:37) E lē gata i lea, sa faaalia e Ana se naunau alofa i isi. Ina ua ia vaaia le pepe o Iesu ma ia iloa o le Mesia lea na folafolaina, o le ā na ia faia? Sa ia faafetai atu i le Atua ma amata loa ona “tautala [e uiga i le tamaitiiti] i tagata uma lava [o] e na faatali atu i le togiola i Ierusalema.” (Luka 2:38) Maeu se uiga lelei, o se faaaoaoga mo Kerisiano i aso nei!

¹⁵ Ioe, e ao ona avea o se mea fiafia le auai ma faia se sao i a tatou sauniga, ina ia pei ai o Ana, e lē tāitai ona tatou mananao e misia sauniga. O le lagona foi lena ua oo i le toatele o tagata fou. Ona ua ō ese mai le pouliuli ma ua maua le malamalama ofoofogia o le Atua, ua latou mananao ai e aʻoaʻoina mea uma latou te mafaia, ma e toatele ua faaalia lo latou naunau tele mo sauniga faa-Kerisiano. I le isi itu, o i latou ua loa ona iai i le upu moni e tatau ona faaeteete ina ia lē ‘tuua le uluai alofa sa ia i latou.’ (Faaaliga 2:4) E iai faafitauli matuia i le soifua maloloina po o isi vala e lē maalofia e le tagata, e ono faatapulaa ai i nisi taimi le auai atu i sauniga. Ae ia aua lava neʻi o tatou faatagaina le matapeapea i meafaitino, o faafiafiaga, po o le leai o se naunau, e faapogai ai ona tatou lē sauniuni, faapalapala, po o le seāseā auai i sauniga.—Luka 8:14.

Le Faaaoaoga e Sili Ona Lelei

16, 17. (a) O le ā le uiga na faaalia e Iesu i faatasitasiga faaleagaga? (e) O le ā le masani lelei e tatau i Kerisiano uma ona taumafai e faataitai atu i ai?

¹⁶ Na faataatia e Iesu le faaaoaoga mataina i le faaalia o le talisapaia mo faatasitasiga faaleagaga. A o avea o se talavou e 12 ona tausaga, sa ia faaalia ai lona alofa mo le fale o le Atua i Ierusalema. Na lē iloa e ona mātua po o fea o iai o ia, ae na mulimuli ane la maua atu o loo talanoaina e ia le Afioga a le Atua ma aʻoaʻo i le malumalu. I le tali mai i le popole o ona mātua, na fesili ai ma le faaaloalo Iesu: “Lua te le iloa ea e tatau ona ou [iai] i le fale o loʻu Tamā?” (Luka 2:49) I lona gauai atu, sa toe foi ai le talavou o Iesu ma ona mātua i Nasareta. O iina sa faaauau ai pea ona ia faaalia lona alofa mo sauniga o le tapuaiga e ala i le auai e lē aunoa i le sunako. O lea, ina ua amata lana faiva, ua faapea mai le Tusi Paia: “Ua oo foi o ia i Nasareta, na tupu ai o ia, ona ulufale lea o ia i le sunako i le aso sapati, o lana masani lea; ua tu i luga foi e faitau.” Ina ua uma ona faitau ma faamatala e Iesu le Isaia 61:1, 2, ona amata lea e le aofia ona “ofo foi i upu alofa na paʻū mai lona fofoga.”—Luka 4:16, 22.

¹⁷ O loo faataitai foi sauniga faa-Kerisiano i aso nei i lena lava faaaoaoga autū. Pe a uma ona amata le sauniga i se pese o viiga ma se tatalo, ona faitau lea ma faamatalaina ni fuaiupu mai le Tusi Paia (po o fuaiupu ua sii mai le Tusi Paia o loo iai i se mataupu o suesueina). O se avega tauave a Kerisiano moni le faataitai atu i le masani lelei sa faia e Iesu Keriso. I le tele e mafai ai e tusa ma o latou tulaga, ua latou fiafia ai e auai e lē aunoa i faatasitasiga faa-Kerisiano.

Faaaoaoga i Ona Po Nei

18, 19. O ā faaaoaoga mataina ua faataatia e uso o loo i atunuu e lē o matuā tele ai se tamaoaiga, e tusa ai o sauniga, fonotaga, ma tauaofiaga?

¹⁸ I vaega o le lalolagi e lē o matuā tele ai se tamaoaiga, ua faataatia ai e o tatou uso ma tuafāfine se faaaoaoga lelei o le talisapaia o faatasitasiga faa-Kerisiano. I Mozambique e tusa ma le 45 itula na savavali ai se ovasia itumalo, o Orlando, ma lana avā o Amélia, i se mamao e 55 maila [90 kilomita] i luga o se mauga maualuga ina ia faia se fonotaga. Ona la toe taliu mai foi lea i le mamao lava lena e toe fai le isi fonotaga. Na lipotia mai i se uiga maulalo e Orlando faapea: “Sa ma lagona o se mea noa lena malaga na faia ina ua ma feiloai atu i uso mai le faapotopotoga a Bawa. O lo latou auai mai i le fonotaga ma le toe foi atu i o latou aiga sa aofia ai se faigamalaga e ono aso le umi, e tusa ma le 250 maila [400 kilomita] e savavali ai, ma sa iai faatasi ma i latou se uso e 60 ona tausaga!”

¹⁹ Ae faapefea le talisapaia o sauniga faalevaiaso a le faapotopotoga? O Kashwashwa Njamba o se tuafafine ua silia i le 70 ona tausaga ma ua apoia lava i maʻi. E nofo o ia i Kaisososi, o se tamai nuu e tusa ma le tolu maila [5 kilomita] le mamao ese mai le Maota o le Malo i Rundu, i Namibia. E savali o ia ina ia auai i sauniga, i se malaga faataamilo e ono maila [10 kilomita] e ui atu i le togavao. Na iai nisi sa osofaia i lenei auala, ae sa faaauau pea ona ui atu ai Kashwashwa. O le tele o sauniga e faia i gagana e na te lē malamalama ai. E faapefea la ona aogā lona auai? “E ala i le mulimuli atu i mau,” o le tala lea a Kashwashwa, “ou te taumafai e iloa po o le ā le mea o loo agaʻi i ai le lauga.” Ae lē iloa foi faitau, e faapefea la ona ia mulimuli atu i mau? “Ou te faalogo atu mo mau ia ua ou taulotoina,” o lana tali lea. Ma a o faagasolo tausaga, e tele mau ua mafai ona ia taulotoina. Mo le faaleleia o lona tomai e faaaogā le Tusi Paia, e auai atu ai o ia i se vasega ua fuafuaina e le faapotopotoga e aʻoaʻo ai le faitau ma le tusitusi. Fai mai a ia: “Ou te fiafia tele e auai i sauniga. E iai lava mea fou e aʻoaʻoina i taimi uma. Ou te fiafia tele e auaufaatasi ma uso ma tuafāfine. E ui e lē mafai ona ou talanoa atu ia i latou uma, ae latou te ō mai lava ma faafeiloai aʻu. Ae o le mea e sili ona tāua, ua ou iloa o le auai i sauniga, o loo oʻu faafiafiaina ai le finagalo o Ieova.”

20. Aisea e lē tatau ai ona tatou lafoaia a tatou faatasitasiga faa-Kerisiano?

²⁰ I le pei o Kashwashwa, e faitau miliona tagata tapuai o Ieova i vaega eseese o le lalolagi o loo latou faaalia se talisapaia mataina mo faatasitasiga faa-Kerisiano. A o agaʻi atu le lalo-lagi a Satani i lona faaumatiaga, e lē lelei mo i tatou ona lafoaia le faapotopotoina faatasi o i tatou. Nai lo lea, seʻi o tatou tumau i le mataala faaleagaga ma faaalia se talisapaia loloto mo sauniga, fonotaga, ma tauaofiaga. E lē gata o lena mea o le a fiafia ai le finagalo o Ieova, ae o le a tele foi se aogā ia i tatou a o tatou faaaogaina aʻoaʻoga tauatua e taitaia ai i le ola e faavavau.—Faataoto 27:11; Isaia 48:17, 18; Mareko 13:35-37.

Fesili Autalu

◻ Aisea o se faaeaga ai le auai atu i faatasitasiga faa-Kerisiano?

◻ E mafai faapefea e tagata uma o loo auai ona saosaolaumea ina ia maua se sauniga e faalaeiauina ai?

◻ O le ā le faaaoaoga mataina na faataatia e Iesu Keriso?

◻ O le ā le lesona e mafai ona aʻoaʻoina mai uso i atunuu e lē o matuā tele ai se tamaoaiga?

[Pusa i le itulau 17]

Latou te Talisapaia Sauniga Faalevaiaso

E faitau miliona tagata e nonofo i aai o loo pagatia i le mativa ma soligatulafono. E ui i na tulaga, ae o loo faaalia pea e Kerisiano moni o loo iai iina se talisapaia tāua mo faatasitasiga faa-Kerisiano. Ua lipotia mai e se toeaina o loo auauna i se tasi o faapotopotoga a Soweto i le itumalo o Gauteng, i Aferika i Saute e faapea: “I se faapotopotoga e toʻa 60 Molimau ma tagata talaʻi e lei papatisoina, e oo atu i le va o le 70 i le 80, i latou e auai mai i a matou sauniga, ae o nisi foi taimi ua sili atu. E ui e lē mamao tele se mea e faimalaga mai ai uso ma tuafāfine ina ia auai, ae e faigata tele tulaga o mea i lenei itu o Soweto. Na iai se tasi uso sa tuiina lona papatua a o savali atu i se sauniga. E iai nisi tuafāfine se toalua na pueina faamalosi i se taumafaiga e gaoia ni mea sa ia i laua. Peitai sa lei taofia ai e nei mea i latou mai le ō mai. I Aso Sa, e fai ai si a matou aʻogā pese puupuu o pese o le Malo pe a uma ona faaiu la matou sauniga i le tatalo. A itiiti mai e 95 pasene e masani lava ona nonofo e usu uma pese ia e ao ona faaaogā i sauniga i le vaiaso e sosoo ai. O le auala lenei e fesoasoani ai i tagata fou naunau fiafia e aʻoaʻoina pese ma latou pepese ai foi.”

E iai foi isi toatuga e fesagai ma i latou o loo nonofo i nuu maotua, e pei o le mamao o le mea e tatau ona latou faimalaga mai ai faatolu i le vaiaso ina ia auai i sauniga. E iai se ulugalii naunau fiafia e iva maila [15 kilomita] le mamao e nonofo ese ai mai le Maota o le Malo i Lobatse, i Botswana. I le tausaga na teʻa nei, sa latou auai mai e lē aunoa i sauniga ma le la fanau e toalua. O le galuega a le tane e tausi ai le aiga, o le toe faafou lea o seevae. E faatau atu e le avā ni nai mea laiti e faaopoopo i le tupe maua a le aiga ina ia mafai ona totogi o latou pasese i le ō atu ma le toe foi mai i sauniga.

I se tasi o afiafi o le taumafanafana talu ai nei, ina ua uma se sauniga ma le ovasia matagaluega, na poloka ai si aiga lenei i le fale faatali pasi i le 9:00 i le po. Sa vave ona faamuta malaga a pasi ona o le leaga o le tau. Na tu i ai le veni a se leoleo ma fesiligia po o ā a latou mea o loo fai. I le faalogo atu i lo latou mafatiaga, sa alofa i ai le leoleo ma ia momoliina ai i latou i le fale i le mamao e iva maila [15 kilomita]. Na faapea atu le avā, lea ua avea o se tagata talaʻi e lei papatiso, i lana tane: “Seʻi vaai la, afai tatou te faamuamuaina sauniga, e saunia mai lava e Ieova mea.” I le taimi nei ua faaalia ai e le tane lona faanaunauga ina ia avea foi o ia ma se tagata talaʻi o le tala lelei.

[Ata i le itulau 18]

O Molimau e pei o nei i Romania ua latou faataatia se faaaoaoga lelei o le talisapaia o faatasitasiga faa-Kerisiano