Po o E Matuā Saʻili iā Ieova?

NA MATUĀ naunau se tamāloa Kerisiano e taʻu atu le tala lelei mai le Tusi Paia i nisi e masani ona latou faimalaga faatasi i le nofoaafi. (Mareko 13:10) Ae ona o le fefe, na lē mafai ona ia talaʻi atu ai. Pe sa ia faavaivai ai? E leai, na ia avea lea mea ma mataupu o ana tatalo faatauanau ma sa ia saʻili i ni auala e amata ai se talanoaga. Na tali mai Ieova le Atua i le talosaga a lenei tamāloa ma avatu ai iā te ia le malosi e molimau atu ai.

E tāua tele lenā faanaunauga pe a tatou saʻili iā Ieova ma lana faamaoniga. Na faapea mai le aposetolo o Paulo: “E tatau i lē alu atu i le Atua ona talitonu o loo soifua o ia, o ia foʻi na te tauia mai o ē matuā saʻili iā te ia.” (Eperu 11:6) E lē lava le na o le saʻili iā Ieova. O le veape Eleni ua faaliliuina i le “matuā saʻili” o loo faaalia ai se taumafaiga maumauaʻi ma le malosi. E aofia ai le loto atoa o se tasi, o le mafaufau, agaga atoa ma le malosi atoa. Afai tatou te matuā saʻili iā Ieova, o le a tatou lē lē lavavā ai, faifailemū, pe paiē. Na i lo lea, tatou te faaalia ai le maelega i le saʻilia o ia.—Galuega 15:17.

O i Latou na Matuā Saʻili iā Ieova

O loo taʻua i le Tusi Paia le tele o faaaʻoaʻoga o i latou o ē na faia ni taumafaiga fitā ia saʻilia Ieova. O se tasi o na tagata o Iakopo, o lē na finau ma le agelu a le Atua seʻia oo ina ao. O le iʻuga, na avatu ai iā Iakopo le igoa o Isaraelu (Lē na finau ma le Atua) talu ai sa ia “finau” pe maumauaʻi a o finau ma le onosai i le Atua. Na faamanuia le agelu iā te ia ona o ana taumafaiga filigā.—Kenese 32:24-30.

O se fafine Kalilaia e lē o faamauina lona suafa, na mafatia i le puna toto mo le 12 tausaga, na faapogaia iā te ia le ‘tele o tigā.’ I lenei tulaga, sa lē tatau ai ona ia paʻi atu i isi tagata. Ae, na faalototeleina o ia e feiloaʻi atu iā Iesu. Na faapea o ia: “Afai ou te paʻi atu tau lava o ona ofu, ona ou mālōlō ai lea.” Seʻi mafaufau a o ia tau faavava atu i le ‘motu o tagata o loo fetaomi atu iā te ia [Iesu].’ Ina ua ia paʻi atu i le ofu o Iesu, ona “utu loa lea o lona puna toto”—na faamālōlōina ai lona maʻi tigā! Ina ua fesili atu Iesu, “Po o ai ea na paʻi mai i oʻu ofu?” ona mataʻu ai lea o ia. Peitaʻi, na faapea atu ma le māfana Iesu iā te ia: “Loʻu afafine e, o lou faatuatua ua e mālōlō ai; inā alu ia oe ma le manuia, ma ia e mālōlō i lou maʻi tigā.” Na tauia ana taumafaiga.—Mareko 5:24-34; Levitiko 15:25-27.

I se isi mea na tupu, na matuā augani atu ai se fafine mai le nuu o Foinie iā Iesu ina ia faamālōlō i lana tama teine. Na tali atu Iesu e faapea e lē tatau ona ave le mea e ʻai a le fanau, ma lafo i ulī. Na ia uiga faapea e lē mafai ona ia auauna atu i tagata e lē o ni Isaraelu, ae tuua tagata Iutaia ua tatau i ai lana auaunaga. I le malamalama ai i le uiga o lana tala faatusa, na augani atu pea le fafine: “Le Alii e, e moni a oe; a e ui i lea ua aai e ulī o momoi mea ua paʻūʻū i laulau a o latou tāula.” O lona faatuatua malosi ma lona faamaoni na uunaia ai Iesu e faapea atu: “Funa e, ua tele lou faatuatua; e pei o lou manaʻo, ia faapea lava ona faia iā te oe.”—Mataio 15:22-28.

O le ā e ono tupu iā i latou nei pe anafai latou te lē maumauaʻi i a latou taumafaiga? Pe na latou mauaina ea faamanuiaga pe anafai na latou solomuli ina ua faatoʻā feagai ma faigatā ma lē taliaina? E leai! Ua faaalia e nei faaaʻoaʻoga le manatu na aʻoaʻo atu e Iesu, aemaise lava o le “faatauanau” e talafeagai ma e tāua foʻi i le saʻilia o Ieova.—Luka 11:5-13.

E Tusa ma Lona Finagalo

I tala na muaʻi taʻua iā i latou na faamālōlōina faavavega, pe e na o le naunau ea o le mea e manaʻomia mo le faamālōlōina? E leai, e tatau ona ōgatusa a latou olega ma le finagalo o le Atua. Na tuuina atu iā Iesu le mana faivavega e na te faamaonia ai i se uiga mataʻina o ia o le Alo o le Atua, le Mesia na folafolaina. (Ioane 6:14; 9:33; Galuega 2:22) E lē gata i lea, o vavega na faia e Iesu, o se faataʻimuaga lea o faamanuiaga o le a aumaia e Ieova i le fanau a tagata i le taimi o le Pulega Faa-Meleniuma a Keriso i le lalolagi fou.—Faaaliga 21:4; 22:2.

Ua lē o toe finagalo le Atua, e maua e i latou o i le tapuaʻiga moni le mana faivavega, e pei o le mana e faamālōlō ai maʻi ma tautala ai i gagana eseese. (1 Korinito 13:8, 13) O Lona finagalo i o tatou aso, o le faalauiloaina atu lea o le tala lelei o le Malo i le lalolagi uma ‘ina ia faaolaina o tagata uma lava, ma oo ina iloa lelei le upu moni.’ (1 Timoteo 2:4; Mataio 24:14; 28:19, 20) E talafeagai ona faatalitalia e auauna a le Atua le faafofogaina o a latou tatalo faatauanau, pe afai latou te faia ni taumafaiga faamaoni e tusa ai ma lona finagalo.

Atonu e tōmanatu nisi, ‘Aiseā tatou te finafinau ai fua pe afai o le a faataunuuina e le Atua lana fuafuaga?’ O le a faataunuuina e Ieova lana fuafuaga e tusa lava po o ā taumafaiga a tagata, ae e fiafia lona finagalo i tagata taʻitoʻatasi o loo faia lona finagalo. E mafai ona faatusa Ieova i se tagata na te fausia se fale. Ua iai i le kamuta se ata tusia o le fale, ae na te filifilia meafaufale talafeagai lelei i lenā vaipanoa. I se tulaga talitutusa faapena, i aso nei, o loo iai se galuega a Ieova e ao ona faataunuuina ma ua ia fiafia e faaaogā ana auauna o ē ua ofoina atu i latou lava ma le lotomalie.—Salamo 110:3; 1 Korinito 9:16, 17.

Seʻi mātau le mea na tupu iā Toshio. A o iai o ia i le aʻoga maualuga, sa ia manaʻo e avatu se molimau i le tele e na te mafai ai i le aʻoga. E masani ona alu i le aʻoga ma lana Tusi Paia ma sa ia mafaufau pea i le faaalia o le amio lelei. A o lata i le faaiʻuga o lona tausaga muamua i le aʻoga, sa iai se avanoa e avatu ai se lauga i le vasega. Na tatalo Toshio iā Ieova mo se fesoasoani ma sa ia fiafia i le vaaia o le uaʻi o le vasega atoa i lana lauga ua faamatuaina “O Loʻu Sini o le Avea o le Auaunaga Paeonia o Saʻu Galuega.” Na ia faamatalaina e manaʻo e avea o ia o se faifeʻau faataimi atoa o Molimau a Ieova. Na manaʻo se tasi o tamaititi o le vasega e suʻesuʻe le Tusi Paia ma Toshio ma na papatisoina o ia. Na faamanuiaina taumafaiga maumauaʻi a Toshio talu ai sa ōgatusa ma ana tatalo.

O le ā le Tele o Lou Maumauaʻi?

E mafai ona e faaalia i ni vala eseese o loo e matuā saʻili iā Ieova ma ana faamanuiaga. Muamua, e iai ni mea tāua e mafai ona e faia, e pei o le sauniuni lelei mo sauniga faa-Kerisiano. E ala i au tali lava saunia, lauga faagaeeloto, faataʻitaʻiga uigā, ua e faaalia ai po o le ā le tele o lou maumauaʻi o loo e saʻilia ai Ieova. E mafai ona e faaalia lou maumauaʻi e ala i le faaleleia o le uigā o lau faiva. E ā pe a e taumafai e faaleuō pe a talanoa atu i le tagata o le aiga ma faaaogā faatomuaga uigā e talafeagai lelei ma lau oganuu? (Kolose 3:23) E ala i le faatatauina ma le lotoatoa o fautuaga a le Tusi Paia, atonu e mafai ai e se tane Kerisiano ona mauaina ni tofiga i le faapotopotoga, e pei o le auauna o le faiva po o se toeaina. (1 Timoteo 3:1, 2, 12, 13) O le faaavanoa atu o oe lava, e mafai ai ona e maua ai le olioli o le foaʻi atu. Atonu e mafai ona e talosaga atu e galue i le polokalame o faugāfale a se lālā po o se ofisa o le lālā o Molimau a Ieova. Afai o oe o se uso agavaa nofofua, atonu e te manaʻo e auai i le Aʻoga mo Toleniga i le Faiva, lea e faaauupegaina ai tane faaleagaga ia avea ma leoleo mamoe lelei. Afai ua e faaipoipo, atonu o le auaunaga faamisionare o se auala e faaalia ai lou matuā naunau e faateleina lau auaunaga iā Ieova. O le siitia atu i le mea o loo tele ai le manaʻomia o tagata talaʻi o le Malo, atonu o se avanoa lelei lea mo oe.—1 Korinito 16:9.

O le mea aupito i sili ona tāua o le agaga o loo e faataunuuina ai se tofiga. Po o ā lava tiute tauave e tuuina atu iā te oe, ia faia ma le filigā, matuā faamalosi ma le “loto lelei.” (Galuega 2:46; Roma 12:8) E tatau ona e manatu i tofiga taʻitasi o se avanoa lea e faaalia ai lou naunau e viia Ieova. Ia tatalo faatauanau mo le fesoasoani a Ieova ma faia le mea sili e te mafai. Ona e selesele ai lea i le tamaoaiga o faamanuiaga.

Tauia Taumafaiga Filigā

O e manatua le tane Kerisiano lea na ia tatalo ia foʻia lona fefe, ina ia mafai ai ona ia talaʻi atu i isi e masani ona latou faimalaga faatasi i le nofoaafi? Sa faamanuia Ieova i lona faanaunauga faamaoni. Na taumafai le uso e faafeiloaʻi atu ma le fiafia i tagata ma filifilia ni mataupu eseese e amata ai talanoaga. Na mafai ona ia faaaogā ma le uigā le Tusi Paia e molimau atu ai i se tamāloa na manatu mamafa i le faigatā o faiā a tagata. Na toe asia o ia i le nofoaafi ma na iʻu ai i le faia o se suʻesuʻega faale-Tusi Paia. O le mea moni, na faamanuia Ieova iā te ia ona o ana taumafaiga filigā!

E mafai foʻi ona e maua ni iʻuga faapena pe afai o faaauau ona e saʻili ma le filigā iā Ieova. Pe afai e te finafinau ma le lotomaulalo ma lou loto atoa i so o se auaunaga i le Atua o loo e faia, o le a faaaogā oe e Ieova e tusa ma lana fuafuaga ma sasaa atu le sosia o ana faamanuiaga iā te oe.

[Ata i le itulau 26]

O le ā e ono tupu i lenei fafine pe ana lē maumauaʻi?

[Ata i le itulau 27]

Pe e te ole faatauanau atu iā Ieova mo lana faamanuiaga?

[Ata i le itulau 28]

E faapefea ona e faaalia o loo e matuā saʻili iā Ieova?