O Isi Mamoe ma le Feagaiga Fou

“O tagata ese . . . , o i latou uma o e tausi i le sapati a e le soli i ai, ma latou taofi mau i laʻu feagaiga; ou te aumaia i latou lava i loʻu mauga paia.”—ISAIA 56:6, 7.

1. (a) E tusa ai o le vaaiga a Ioane, o le ā o loo faataunuuina a o taofiofia matagi o le faamasinoga a Ieova? (e) O le ā le potopotoga ofoofogia e toatele lea na vaaia e Ioane?

I LE vaaiga lona fa i le tusi o Faaaliga, na vaaia ai e le aposetolo o Ioane le taofiofia o matagi matautia o le faamasinoga a Ieova a o faaiuina le faamaufaailogaina o sui uma o “le Isaraelu [a] le Atua.” O i latou nei na muai faamanuiaina e ala mai ia Iesu, le vaega autū o le fanau a Aperaamo. (Kalatia 6:16; Kenese 22:18; Faaaliga 7:1-4) I lena lava vaaiga, na vaaia ai e Ioane se “motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi . . . , ua latou alalaga foi ma leo tetele, ua faapea atu, ‘O i ai le faaolataga i lo tatou Atua, o lē tietie i le nofoālii, atoa ma le Tamai Mamoe!’” (Faaaliga 7:9, 10) I le faapea atu, “O i ai le faaolataga i . . . le Tamai Mamoe,” ua faaalia ai e le motu o tagata e toatele e faapea, ua faamanuiaina foi i latou e ala mai le Fanau a Aperaamo.

2. O anafea na aliaʻe ai le motu o tagata e toatele, ma ua faapefea ona mataulia?

² Sa mataulia lenei motu o tagata e toatele i tuā i le 1935, ma i aso nei ua silia i le lima miliona lo latou aofai. Ona ua faailogaina mo le faasaoina atu i le puapuaga tele, o le a vavaeeseina ai ona sui mo le ola e faavavau pe a vaevaeina e Iesu “mamoe” mai “ʻoti.” O Kerisiano o le motu o tagata e toatele ua iai faatasi ma “isi mamoe” i le tala faatusa a Iesu i lafu mamoe. Latou te faamoemoe ina ia ola e faavavau i le lalolagi parataiso.—Mataio 25:31-46; Ioane 10:16; Faaaliga 21:3, 4.

3. Ua faapefea ona eseese Kerisiano faauuina mai isi mamoe e tusa ai o le feagaiga fou?

³ Mo le 144,000, ua faaooina atu le faamanuiaga o le feagaiga faa-Aperaamo e ala i le feagaiga fou. I le avea o ni sui auai o lenei feagaiga, ua latou oo atu ai i “le alofa tunoa” ma “i le tulafono ia Keriso.” (Roma 6:15; 1 Korinito 9:21) O lea, e na o le 144,000 sui o le Isaraelu a le Atua ua fetaui ona latou ʻaai ma inu i le areto ma le uaina i le taimi o le Faamanatuga o le maliu o Iesu, ma e na o i latou ua faia i ai e Iesu lana feagaiga mo se Malo. (Luka 22:19, 20, 29) O i latou o le motu o tagata e toatele e lē o ni sui auai i le feagaiga fou. Peitai, latou te auaumea faatasi ma le Isaraelu a le Atua ma nonofo faatasi ma i latou i lo latou “nuu.” (Isaia 66:8) Ua talafeagai ai la ona faapea atu ua oo atu foi i latou i le alofa tunoa o Ieova ma nonofo i le tulafono ia Keriso. E ui e lē o ni sui auai i le feagaiga fou, ae o i latou o loo aogā i ai manuia ua maua mai ai.

“Tagata Ese” ma “le Isaraelu [a] le Atua”

4, 5. (a) E tusa ai ma upu a Isaia, o ai le vaega lea o le a auauna atu ia Ieova? (e) Ua faapefea ona faataunuuina le Isaia 56:6, 7 i le motu o tagata e toatele?

⁴ Na tusi mai le perofeta o Isaia: “O tagata ese foi o e faatasi mai ia Ieova, ē o auauna ia te ia, ma alolofa i le suafa o Ieova, e fai mana auauna, o i latou uma o e tausi i le sapati a e le soli i ai, ma latou taofi mau i laʻu feagaiga; ou te aumaia i latou lava i loʻu mauga paia, ma aʻu faafiafia ia te i latou i loʻu fale tatalo; o a latou taulaga mu ma a latou taulaga e talia ia i loʻu fata faitaulaga.” (Isaia 56:6, 7) I Isaraelu, o lona uiga o lenei mea, o “tagata ese,” e lē o ni Isaraelu, sa tapuai atu ia Ieova—i le alolofa atu i lona suafa, le usitaia o aiaiga o le feagaiga o le Tulafono, le tausia o le Sapati, ma le ofoina atu o taulaga i le malumalu, le “fale tatalo” lea o le Atua.—Mataio 21:13.

⁵ I o tatou aso, “o tagata ese . . . o e faatasi mai ia Ieova” o le motu lea o tagata e toatele. Ua auauna atu i latou nei ia Ieova e ala i lo latou auaumea faatasi ma le Isaraelu a le Atua. (Sakaria 8:23) Latou te ofoina atu taulaga e talileleia mai e pei lava foi o taulaga a le Isaraelu a le Atua. (Eperu 13:15, 16) Latou te tapuai i le malumalu faaleagaga o le Atua, o lona “fale tatalo.” (Faatusatusa i le Faaaliga 7:15.) Pe latou te tausia le Sapati faalevaiaso? E lē o faatonuina ē faauuina po o isi foi mamoe ina ia latou faia lena mea. (Kolose 2:16, 17) Ae peitai, na faapea atu Paulo i Kerisiano Eperu faauuina: “Ua tuuina mai pea o le malologa faasapati mo tagata o le Atua. Auā o le ua sao atu i lona [le Atua] malologa, ua malolo foi o ia i ana lava galuega, faapei o le Atua i ana lava.” (Eperu 4:9, 10) Na ulu atu na Kerisiano Eperu i lenei “malologa faasapati” ina ua latou gauai atu i le “amiotonu mai le Atua” ma mālōlō ai mai le taumafai e taʻutonuina i latou e ala i galuega o le Tulafono. (Roma 10:3, 4) Ua olioli foi Kerisiano faauuina o Nuu Ese i lena lava malologa e ala i lo latou gauai atu i le amiotonu a Ieova. Ua aufaatasi atu i ai le motu o tagata e toatele ia i latou i lena malologa.

6. Ua faapefea e isi mamoe i aso nei ona nonofo i le feagaiga fou?

⁶ E lē gata i lea, o loo nonofo isi mamoe i le feagaiga fou e pei lava foi ona sa nonofo tagata ese o aso anamua i le feagaiga o le Tulafono. I le ā le uiga? E lē i le avea ai o i latou o ni ona sui, ae ala i lo latou gauai atu i tulafono o loo aofia ai, ma latou maua aogā mai na faatulagaga. (Faatusatusa i le Ieremia 31:33, 34.) I le pei o a latou aumea faauuina, ua iai i isi mamoe le tulafono a Ieova ua tusia ‘i o latou loto.’ E matuā loloto lo latou alofa ma lo latou usitaia o poloaiga ma mataupu silisili a Ieova. (Salamo 37:31; 119:97) I le pei o Kerisiano faauuina, ua latou iloa Ieova. (Ioane 17:3) Ae faapefea i le peritomeina? I le tusa ma le 1,500 tausaga a o lei faavaeina le feagaiga fou, na faalaeiau atu ai Mose i tagata Isaraelu: “Ia outou peritomeina le paʻu o outou loto.” (Teuteronome 10:16; Ieremia 4:4) E ui ua mavae atu le faamalosia o le peritomeina o le paʻu faaletino ina ua soloia le Tulafono, ae e tatau i ē faauuina ma isi mamoe ona “peritomeina” o latou loto. (Kolose 2:11) I le iuga, ua faamagaloina ai e Ieova masei o isi mamoe e faavae aʻe i le “toto o le feagaiga” lea na faamaligiina e Iesu. (Mataio 26:28; 1 Ioane 1:9; 2:2) E lē faia e le Atua i latou ma atalii fai faaleagaga, e pei ona ia faia i le 144,000. Peitai ua ia taʻuamiotonuina isi mamoe, i le uiga lea sa taʻuamiotonuina ai foi Aperaamo o se uo a le Atua.—Mataio 25:46; Roma 4:2, 3; Iakopo 2:23.

7. O le ā le faamoemoe ua avanoa mo isi mamoe i aso nei, o ē ua taʻuamiotonuina e pei ona sa iai Aperaamo?

⁷ Mo le 144,000, o lo latou taʻuamiotonuina ua tatalaina ai le avanoa mo lo latou mauaina o le faamoemoe e pule faatasi ai ma Iesu i le Malo faalelagi. (Roma 8:16, 17; Kalatia 2:16) Mo isi mamoe, o le taʻuamiotonuina o ni uo a le Atua ua mafai ai ona latou maua le faamoemoe o le ola e faavavau i se lalolagi parataiso—a lē i le faasaoola atu ia Amaketo e avea o se vaega o le motu o tagata e toatele, pe ala i le ‘toetu o ē amiotonu.’ (Galuega 24:15) Maeu se faaeaga o le mauaina o lena faamoemoe ma avea ai o se uo a Lē Pule Silisili Ese aoao, e avea o ‘se mālō i lona fale fetafai’! (Salamo 15:1, 2) Ioe, ua taufai faamanuiaina uma ē faauuina ma isi mamoe i se tulaga ofoofogia e ala mai ia Iesu, le Fanau a Aperaamo.

Le Aso Sili o le Togisala

8. O le ā na faaatagia mai e taulaga ia na faia i le Aso o le Togisala i le Tulafono?

⁸ A o talanoaina le feagaiga fou, na faamanatu atu ai e Paulo i lana aufaitau le Aso o le Togisala faaletausaga e tusa ai ma le feagaiga o le Tulafono. O le aso lena e ofoina ai taulaga eseese—o le taulaga mo le ituaiga faaositaulaga o sā Levī, ma le isi taulaga e ofoina mo ituaiga e 12 e lē o ni ositaulaga. Ua leva ona faamatalaina lenei faiga e faapea o se ata lea o le taulaga sili a Iesu lea o le a aogā mo le 144,000 o loo iai le faamoemoe faalelagi, ma aogā foi mo le faitau miliona o ē iai le faamoemoe faalelalolagi.a Na faaalia e Paulo faapea i lena faataunuuga, ua faatinoina ai aogā o le taulaga a Iesu, e ala atu i le Aso sili o le Togisala, i lalo o le feagaiga fou. I lona avea ma Ositaulaga Sili o lenei aso sili, na foaiina ai e Iesu lona soifua lelei atoatoa e fai ma taulaga togiola ina ia mafai ona maua “le togiola faavavau” mo tagata.—Eperu 9:11-24.

9. I le iai i le feagaiga fou, o le ā na mafai ona maua ai e Kerisiano Eperu faauuina?

⁹ E toatele Kerisiano Eperu o le uluai senituri sa ‘maelega pea mo le Tulafono faa-Mose.’ (Galuega 21:20) Ua talafeagai ai la, le faamanatu atu e Paulo ia i latou e faapea: “O loo fai . . . [Iesu] ma puluvaga o le feagaiga fou, ona o lona maliu foi e togiola aʻi agasala na faia a o i le muai feagaiga, ia maua ai e i latou ua valaauina o le tofi faavavau na folafolaina.” (Eperu 9:15) O le feagaiga fou na faasaolotoina ai Kerisiano Eperu mai le feagaiga tuai, lea na faaalialia ai lo latou tulaga agasala. E faafetaia le feagaiga fou, auā ua mafai ai ona latou maua “le tofi [faalelagi e] faavavau na folafolaina.”

10. Mo le ā ua faafetai atu ai ē faauuina ma isi mamoe i le Atua?

¹⁰ ‘So o se tasi’ o lē “faatuatua i le Alo” o le a aogā ia te ia le taulaga togiola. (Ioane 3:16, 36) Na faapea mai Paulo: “Na faapea foi Keriso, ua tasi lava ona avatua o ia ma taulaga, ina ia aveina ai agasala a le toatele, e faaali foi o ia ia te i latou o e faatalitali atu ia te ia i lona foi faalua mai, e le ina ia aveina agasala, a ia faaolaina i latou.” (Eperu 9:28) I aso nei, o i latou o ē saili atu ma le naunautai ia Iesu e aofia ai Kerisiano faauuina o loo soifua pea o le Isaraelu a le Atua, ma le faitau miliona o ē faia aʻe ai le motu o tagata e toatele, o ē o loo iai foi so latou tofi e faavavau. E faafetaia uma e na vasega e lua le Atua mo le feagaiga fou ma faamanuiaga foaiola ua maua mai ai, e aofia ai le Aso sili o le Togisala ma le faiva a le Ositaulaga Sili, o Iesu, i le Mea e Sili ona Paia faalelagi.

Tele Mea e Fai i le Auaunaga Paia

11. Faatasi ai ma ni loto fuatia ifo ua faamamāina e ala i le taulaga a Iesu, o le ā ua faia nei ma le fiafia e ē faauuina ma isi mamoe?

¹¹ I lana tusi i uso i Eperu, na faamamafa ai e Paulo le silisili ona tāua o le taulaga a Iesu i le feagaiga fou pe a faatusatusa atu i taulaga o agasala sa ofoina i le feagaiga tuai. (Eperu 9:13-15) O le taulaga e sili atu ona lelei a Iesu ua mafai ai ona ‘faamamāina o tatou loto fuatia ifo mai galuega e oti ai ina ia mafai ona tatou ofoina atu le auaunaga paia i le Atua soifua.’ Mo Kerisiano Eperu, o “galuega e oti ai” sa aofia ai “agasala na faia a o i le feagaiga muamua.” Mo Kerisiano i aso nei, ua aofia ai agasala sa faia i taimi ua tuanai ia ua salamō moni mai ai ma ua faamagaloina e le Atua. (1 Korinito 6:9-11) Ona ua faamamāina o latou loto fuatia ifo, ua tuuina atu ai e Kerisiano faauuina le ‘auaunaga paia i le Atua soifua.’ Ma ua faapena foi i le motu o tagata e toatele. Ona ua faamamāina o latou loto fuatia ifo e ala i le “toto o le Tamai mamoe,” ua mau ai i latou i totonu o le malumalu sili faaleagaga o le Atua, o loo “auauna foi ia te ia . . . i le ao ma le po.”—Faaaliga 7:14, 15.

12. E faapefea ona tatou faaalia o loo ia i tatou le “faatuatua ua mautinoa lava”?

¹² E lē gata i lea, na faapea mai Paulo: “Ina tatou faalatalata atu ia ma le loto faamaoni i le faatuatua ua mautinoa lava, o sausauina o tatou loto nai le manatu ifo ua leaga, o taelea foi o tatou tino i le vai manino.” (Eperu 10:22) E mafai faapefea ona tatou faaalia o loo ia i tatou le “faatuatua ua mautinoa lava”? Na faalaeiau atu Paulo i Kerisiano Eperu: “Ina tatou taofi mau ia i le faamoemoe [faalelagi] ua tatou taʻutino atu ma le le fefoifoiai; auā e faamaoni o ia ua folafola mai; ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le Aso o loo tāulata mai.” (Eperu 10:23-25) Pe afai e ola lo tatou faatuatua, o le a tatou lē ‘faagaloina foi le faapotopoto faatasi o i tatou.’ O le a tatou fiafia e faatupu le alofa ma galuega lelei i o tatou uso ma faatupuina ai foi e i latou ia i tatou, ma faamalolosi ai mo le galuega tāua o le folafola atu i le lautele o lo tatou faamoemoe, po o le faamoemoe faalelalolagi po o le faamoemoe faalelagi.—Ioane 13:35.

“Le Feagaiga Faavavau”

13, 14. I ā auala e faavavau ai le feagaiga fou?

¹³ O le ā e tupu pe a maua e le tagata mulimuli lava o le 144,000 lona faamoemoe faalelagi? Po o le a faamutaina ai foi ma le faatatauina o le feagaiga fou? O le taimi lena o le a lē toe iai i le lalolagi se tasi o le Isaraelu a le Atua. O sui auai uma o le feagaiga o le a iai faatasi ma Iesu “i le malo o [lona] Tamā.” (Mataio 26:29) Ae tatou te manatua upu a Paulo i lana tusi i uso Eperu: “O le Atua e ona le manuia, . . . na toe faatuina mai nai e ua oti le Leoleo mamoe sili, . . . ona o le toto o le feagaiga faavavau.” (Eperu 13:20; Isaia 55:3) O le ā e uiga i ai le faavavau o le feagaiga fou?

¹⁴ Muamua, e lē pei o le feagaiga o le Tulafono, o le a lē toe suia lava. Lona lua, e faavavau āuga o lona faagaoioiga, e pei lava o le tulaga tautupu o Iesu. (Faatusatusa le Luka 1:33 i le 1 Korinito 15:27, 28.) E iai le nofoaga e faavavau o le Malo faalelagi i faatulagaga a Ieova. (Faaaliga 22:5) Ma lona tolu, o le a faaauau pea ona maua e isi mamoe aogā mai le feagaiga fou. A o faagasolo le Pulega a Keriso i le Afe Tausaga, o le a faapena foi i tagata faamaoni ona latou “auauna . . . ia [Ieova] i lona malumalu i le ao ma le po” e pei lava ona latou faia i le taimi nei. O le a lē toe manatua e Ieova a latou agasala o aso ua tuanai, lea na faamagaloina e faavae i le “toto o le feagaiga” a Iesu. O le a latou olioli pea i se tulaga amiotonu o ni uo a Ieova, ma o le a tusia pea ana tulafono i o latou loto.

15. Faamatala mai le faiā a Ieova ma ona tagata tapuai i le lalolagi pe a oo i le lalolagi fou.

¹⁵ Pe o le a mafai ea e Ieova i lena taimi ona fetalai mai e faatatau i nei auauna faaletagata: ‘O aʻu o lo latou Atua, o i latou foi o loʻu nuu’? Ioe. “E mau foi o ia ma i latou; e fai foi i latou mona nuu, e ia te i latou le Atua lava.” (Faaaliga 21:3) O le a avea i latou ma “toagālauapi a le au paia,” o sui faalelalolagi o “le aai ua faapelepeleina,” le faatoanofotane faalelagi a Iesu Keriso. (Faaaliga 14:1; 20:9; 21:2) O le a mafaia nei mea uma ona o lo latou faatuatua atu i le “toto o le feagaiga” ua faamaligiina e Iesu, ma lo latou gauai atu i tupu ma ositaulaga faalelagi, o ē sa avea o le Isaraelu a le Atua a o iai i le lalolagi.—Faaaliga 5:10.

16. (a) O ā faamoemoega o loo faatalitalia mo i latou o ē toe faatutūina aʻe i le lalolagi? (e) O ā faamanuiaga o le a oo mai i le iuga o le afe tausaga?

¹⁶ Ae faapefea i latou ua maliliu ua toe faatutūina mai i le lalolagi? (Ioane 5:28, 29) O le a valaaulia foi i latou ina ia “manuia” e ala mai ia Iesu, le Fanau a Aperaamo. (Kenese 22:18) O le a tatau foi ona latou alolofa atu i le suafa o Ieova, i le auauna atu ia te ia, ofoina atu taulaga e talileleia, ma tuuina atu le auaunaga paia i lona fale tatalo. O i latou o ē faia faapea o le a ulu atu i le malologa a le Atua. (Isaia 56:6, 7) E oo atu i le iuga o le afe tausaga, o le a toe oo ē uma e faatuatua i le lelei atoatoa faaletagata e ala i le auaunaga a Iesu Keriso ma ana ositaulaga e 144,000. O le a amio-tonu i latou, e lē i le na o le taʻuamiotonuina o ni uo a le Atua. O le a “toe ola” i latou, i se uiga e matuā saʻoloto atoatoa mai le agasala ma le oti lea na tuufaasolo mai ia Atamu. (Faaaliga 20:5; 22:2) Maeu se faamanuiaga o le a iai! I la tatou vaaiga i aso nei, e foliga mai o le a faaiuina i lena taimi le galuega faaositaulaga a Iesu ma le 144,000. Ua faatatauina atoatoa faamanuiaga o le Aso sili o le Togisala. E lē gata i lea, o le a toe ‘faafoi atu e Iesu le malo i lona Atua, ma o lona Tamā.’ (1 Korinito 15:24) O le a iai se tofotofoga faaiu mo tagata, ona faaumatia ai loa lea e faavavau Satani ma ana temoni.—Faaaliga 20:7, 10.

17. I le manatu atu i le olioli o loo faatalitalia maia i tatou, o le ā e tatau ia i tatou taitoatasi ona maumauai e fai?

¹⁷ O le ā le matafaioi, pe afai e iai, o le a faia e le “feagaiga [e] faavavau” i le vaitaimi matagofie lena o le a amata? E lē o sa tatou mataupu lena e talanoaina. O mea ua oo atu i ai le faailoaina mai e Ieova, ua lava lena mo lenei taimi. Ua matuā tatou maofa ai lava. Seʻi tau ina mafaufau—i le ola e faavavau o se vaega o le “lagi fou ma le lalolagi fou”! (2 Peteru 3:13) Tau ina ia aua neʻi iai se mea e faavaivaia lo tatou faanaunauga ina ia fai mo tatou tofi lena folafolaga. Atonu e lē faigofie le tumau mausalī. Na faapea mai Paulo: “Ua aoga ia te outou le onosai, ina ia maua e outou le mea na folafolaina, pe a uma ona faia e outou le finagalo o le Atua.” (Eperu 10:36) Ae ia manatua, po o ā lava ni faafitauli o tau foia, ni teteega o tau faaitiitia, e matuā lē faatusatusalia i le olioli o loo tatali maia i tatou. (2 Korinito 4:17) O lea, tau ina ia leai se tasi o i tatou e avea “o ni e tuumuli i le malaia.” Ae tau ina ia faamaonia atu o i tatou “o ni e faatuatua e ola ai le agaga [tagata].” (Eperu 10:39) Ia maua e i tatou uma le faatuatua atoatoa ia Ieova, le Atua o feagaiga, seia oo ina mauaina le faamanuiaga e faavavau mo i tatou uma taitoatasi.

[Faaopoopoga i lalo]

Pe na E Malamalama?

◻ E lē gata i Kerisiano faauuina, ae o ai isi ua faamanuiaina e ala mai le Fanau a Aperaamo?

◻ Ona ua faamanuiaina e ala i le feagaiga fou, ua faapefea ona pei isi mamoe o tagata liulotu i lalo o le feagaiga tuai?

◻ Ua faapefea ona faamanuiaina isi mamoe e ala i le Aso sili o le Togisala?

◻ Aisea na faaigoa ai e Paulo le feagaiga fou o le “feagaiga [e] faavavau”?

[Pusa i le itulau 21]

LE AUAUNAGA PAIA I LE MALUMALU

O loo tapuai faatasi le motu o tagata e toatele ma Kerisiano faauuina i le lotoā faalelalolagi o le malumalu sili faaleagaga a Ieova. (Faaaliga 7:14, 15; 11:2) E leai se mafuaaga e manatu ai faapea o loo iai i latou i se Lotoā o Nuu Ese ua faaesea mai. A o iai Iesu i le lalolagi, sa iai se Lotoā o Nuu Ese i le malumalu. Peitai, i atatusi ia sa faagaeeina tauatua mo le malumalu o Solomona ma le malumalu o Esekia, e lei iai se fuafuaga mo se Lotoā o Nuu Ese. I le malumalu o Solomona sa iai le lotoā i fafo, o iina na faia faatasi ai le tapuaiga a tagata Isaraelu ma tagata liulotu, o tane ma fafine. O le ata faavaloaga lena o le lotoā faalelalolagi o le malumalu faaleagaga, lea na vaaia ai e Ioane le motu o tagata e toatele o loo faia la latou auaunaga paia.

Peitai ane, sa na o ositaulaga ma sā Levī na mafai ona ulu atu i le lotoā pito i totonu, o iina sa faatū ai le fata faitaulaga sili; sa na o ositaulaga na mafai ona ulu atu i le Mea Paia; ae na o le ositaulaga sili na mafai ona ulu atu i le Mea e Sili ona Paia. O le lotoā pito i totonu ma le Mea Paia e mautinoa le faaāta mai ai o le tulaga tutasi faaleagaga o Kerisiano faauuina i le lalolagi. Ae o le Mea e Sili ona Paia e faaāta mai ai le lagi lava ia, o iina o loo maua ai e Kerisiano faauuina ma lo latou Ositaulaga Sili faalelagi le ola e lē mafai ona oti.—Eperu 10:19, 20.

[Ata i le itulau 23]

Ona o le olioli o loo tatali maia i tatou, tau ina ia tatou maua le ‘faatuatua e ola ai le tagata’