Ia Fesoasoani i Fafine ua Oti a Latou Tane i o Latou Puapuaga

O SE tasi o tala e sili ona lauiloa e faatatau i fafine ua oti a latou tane, o le tala lea a le Tusi Paia ia Ruta ma Naomi le tinā o lana tane. Na maliliu uma tane a nei fafine. Ae peitaʻi, e lē gata ina motusia le mafutaga a Naomi ma lana tane, ae na motusia foʻi lana mafutaga ma lana fanau tama e toʻalua, o se tasi o i laʻua na, sa fai ma tane a Ruta. Talu ai sa nonofo i laʻua i se nuu e malosi i le faifaatoʻaga lea sa faalagolago tele i o latou tama tane mo le galueaʻiina, e mautinoa lava la le matuā faigatā o lo laʻua tulaga sa iai.—Ruta 1:1-5, 20, 21.

Ae peitaʻi, sa iai ia Naomi se uō mataʻina ma o sē sa faamāfanafana ia te ia, o Ruta lea le avā a lana tama, o lē na musu e tuua o ia. Mulimuli ane, na faamaonia o Ruta sa “lelei o ia ia [Naomi] e sili i tama tane e toafitu”—e lē gata ona o lona alofa loloto mo Naomi, ae ona o lona alofa foʻi i le Atua. (Ruta 4:15) Ina ua fautua atu Naomi ia Ruta ina ia toe foʻi i lona aiga ma ana uō i Moapi, sa tali mai Ruta i ni faamatalaga sili ona faamomoiloto o le alofa faamaoni ua faamaumauina: “O le mea e te alu i ai, ou te alu ai foi; o le mea e te nofo ai, ou te nofo ai, e fai lou nuu moʻu nuu; e fai lou Atua moʻu Atua; o le mea e te oti ai, ou te oti ai, e tanu ai foi aʻu; ia faapea ona faia e Ieova ia te au, ma ia faaopoopo i ai, pe afai e tuueseeseina i taua ma oe i se tasi mea seʻi vagana le oti.”—Ruta 1:16, 17.

Sa leʻi lilo i le silafaga a Ieova le Atua le uiga na faaalia e Ruta. Sa ia faamanuia mai i le aiga ausage o Naomi ma Ruta, ma mulimuli ane na faaipoipo atu Ruta i le tamāloa Isaraelu o Poasa. O la laʻua tama, o lē na avea ma tupuaga o Iesu Keriso, sa tausia e Naomi e pei o sana lava tama moni. Ua avea lenei tala taʻutaʻua anamua o se faaaʻoaʻoga o le auala e faapelepeleina ai e Ieova fafine ua oti a latou tane, o ē e faalatalata atu ia te ia ma faatuatua ia te ia. E lē gata i lea, ua taʻu mai e le Tusi Paia ia i tatou e faapea, e na te faatāuaina i latou o ē fesoasoani atu ma le alofa i fafine ua oti a latou tane i o latou puapuaga. E mafai la faapefea e i tatou i aso nei ona lagolagoina fafine, o ē ua oti a latou tane, o loo tatou auaumea faatasi?—Ruta 4:13, 16-22; Salamo 68:5.

O Fesoasoani Patino ae Lē Faia ma le Pulepuletutū

Pe a ofo atu se fesoasoani i se fafine ua oti lana tane, e sili ona lelei pe a manino ma patino, ae lē o le faia ma le pulepuletutū. ʻAlofia ituaiga o faaupuga lē patino e pei o le, “Taʻu mai ia te aʻu pe a e manaʻomia se mea.” E tutusa lava lena ma le faapea atu i se tagata o loo maalili ma fiaʻai, ‘Ia e mafanafana, ma ia maona’ ae aunoa ma se gaoioiga e fesoasoani atu i ai. (Iakopo 2:16) E toʻatele tagata o le a lē tapa mai mo se fesoasoani pe a latou manaʻomia se mea; na i lo o lea, e nonofo gūgū ai lava ma o latou mafatiaga. E manaʻomia ai le faautauta i le auala e fesoasoani atu ai i tagata faapena, ina ia iloa lelei mea o loo latou manaʻomia. I le isi itu, o le soona mateletele foʻi—i le soona pule naʻuā i le olaga o le fafine ua oti lana tane—e ono oo atu ai i ni faalogona tigā po o ni lagona tetee. O lea, ua faamamafa mai ai e le Tusi Paia le manaʻomia ona paleni i a tatou feutagaʻiga ma isi. A o faalaeiauina i tatou ina ia naunau totino atu ma le lē manatu faapito i tagata, ae ua faamanatu mai foʻi ina ia aua tatou te isuisu fua i a latou mataupu totino.—Filipi 2:4; 1 Peteru 4:15.

Sa faaalia e Ruta lena uiga paleni i a Naomi. E ui na pipii faamaoni atu Ruta i le tinā o lana tane, ae sa ia leʻi faamalosiina pe pulepuletutū i le loomatua. Sa ia tausolomua i ni tulaga talafeagai, e pei o le saʻilia mai o meaʻai mo laʻua ma Naomi, ae sa ia usiusitai foʻi i faatonuga a Naomi.—Ruta 2:2, 22, 23; 3:1-6.

O le mea moni, atonu e matuā telē lava se eseesega o manaʻoga o le tasi tagata mai le isi. O Sara lea na taʻua i le amataga, ua ia faapea mai: “Sa ou maua fesoasoani manaʻomia i oʻu mafatiaga—o ni uō sili ona pele ma sili ona alolofa, o ē na mafuta mai pea ia te aʻu.” Ae i le isi itu, o Eleni lea na taʻua muamua, sa manaʻo o ia e iai ni taimi mo na o ia lava. O lea la, o le lotofesoasoani o lona uiga ia faautauta ma ia iai le paleni i le vā o le faaaloalo i le tulaga totino o le tasi tagata, ma le faaavanoa atu o oe pe a manaʻomia.

Le Lagolagosua a le Aiga

E telē lava se vaega e mafai ona fai e se aiga māfana ma le alofa, pe afai e iai se aiga faapena, ina ia faamautinoa ai i le fafine ua oti lana tane o le a mafai ona ia feagai ma lea tulaga ma manuia ai. E ui atonu e eseese le tele o ni fesoasoani e mafai ona ofo atu e tagata o le aiga, ae o tagata uma lava e mafai ona fesoasoani atu. “Afai . . . o i ai i se fafine ua oti lana tane ni ana tama po o fanau a ana tama, ia aʻoaʻoina i latou ia muamua ona agalelei i lo latou lava aiga, ma taui atu i o latou mātua: auā o le mea mālie lea i luma o le Atua.”—1 Timoteo 5:4, LF.

E tele tulaga atonu e lē manaʻomia ai se lagolagosua tautupe po o se “taui.” O nisi fafine ua feoti a latou tane o loo lava ma totoe sa latou seleni e tausia ai o latou lava manaʻoga, ae o isi ua mafai ona maua ni a latou penefiti mai le malo e pei ona faia ai i nisi atunuu. Peitaʻi, afai e iai ni tulaga o loo manaʻomia ai e fafine ua oti a latou tane se fesoasoani, e tatau lava ona fesoasoani atu tagata o le aiga. Pe afai e leai ni tauaiga vavalalata o le fafine ua oti lana tane e mafai ona avatuina se lagolagosua pe e lē mafai foʻi e na tauaiga ona fesoasoani atu, o loo fautuaina la e le Tusi Paia uso talitonu ina ia fesoasoani atu i lena tinā: “O lenei lava le toaga i lotu e lelei ma le faamaoni i luma o le Atua o le Tamā lea, ina ia tauasiasi atu i e mātua oti ma fafine ua oti a latou tane i o latou tiga.”—Iakopo 1:27, LF.

O i latou o loo faatinoina nei mataupu silisili faale-Tusi Paia ua latou ‘ava [moni atu lava] i fafine ua oti a latou tane.’ (1 Timoteo 5:3) O le āva atu i se tagata o lona uiga, ia faaalia atu le faaaloalo i lena tagata. O tagata ua faaalia atu i ai le āva, e iai le lagona ua faatāua, faapelepele, ma faamamaluina i latou. E lē oo ia i latou ni faalogona faapea, e na o le pau le māfuaaga e fesoasoani atu ai isi ona o se tiute tauave e ao ona fai. E ui lava sa umi se taimi o avea Ruta ma fafine ua oti lana tane, ae sa ia āva moni atu lava ia Naomi e ala i lona naunautaʻi ma lona alofa ina ia faamautinoa sa tausia lelei manaʻoga faaletino ma manaʻoga tau faalogona o Naomi. O le mea moni, o le uiga lea o Ruta na vave ai lava ona ia maua se talaaga taʻuleleia, lea na mafai ai e lē na avea mulimuli ane ma ana tane ona faapea mai e uiga ia te ia: “Ua iloa e le aai uma o loʻu nuu, o le fafine amio lelei lava oe.” (Ruta 3:11) I le taimi e tasi, o le alofa o Naomi i le Atua, o ona uiga lē soona tagisā, ma lona talisapaia loloto o taumafaiga sa fai e Ruta mo sona lelei, e mautinoa o le māfuaaga lena na fiafia ai Ruta e fesoasoani atu ia Naomi. Maʻeu se faaaʻoaʻoga matagofie ua faataatia e Naomi mo fafine ua oti a latou tane i aso nei!

Ia Faalatalata Atu i le Atua

O le mea moni, e lē mafai e tagata o le aiga ma uō ona latou faatumuina le avanoa lea ua iai ona o le toesea o se paaga e le oti. O le māfuaaga lenei e tāua ai mo le tagata o loo faavauvau ona faalatalata faapitoa atu lava i “le Tamā e ona le alofa mutimuti vale, o le Atua foi e ana le faamafanafanaga uma; o le na te faamafanafanaina mai ia te i [tatou] i lo [tatou] puapuaga uma.” (2 Korinito 1:3, 4) Seʻi manatu i le faaaʻoaʻoga a Ana, o se fafine faamaoni ua oti lana tane, ma e 84 tausaga o lona soifuaga i le taimi na fanau mai ai Iesu.

Ina ua maliu le tane a Ana ae faatoʻā fitu tausaga talu ona la faaipoipo, sa ia liliu atu ai ia Ieova mo se faamāfanafanaga. “E lei alu ese ia i le malumalu, a ua auauna o ia i le Atua i anapogi ma talosaga i le ao ma le po.” (Luka 2:36, 37) Pe na tali mai ea Ieova i le tuutoina atu o Ana ia te ia? Ioe! Sa ia faaali mai lona alofa i a Ana i se auala matuā faapitoa, e ala i le faataga o ia e vaai i le pepe o le a tupu aʻe e avea ma Faaola o le lalolagi. Maʻeu le faafiafiaina ma le faamāfanafanaina o Ana i lenei mea! E manino lava la, sa tofo o ia i le moni o le Salamo 37:4: “Ia e fiafia lava oe ia Ieova, ona foaiina lea e ia ia te oe o mea e manao i ai lou loto.”

E Galue le Atua e Ala Mai i Uso Kerisiano

Ua faapea mai Eleni: “Na umi lava se taimi talu ona maliu Tavita, sa ou logo ai i le tigā o loʻu tino, e pei o loo soʻati solo ivi o loʻu fatafata e se naifi. Sa ou faapea e pei ua tumu loʻu moa. Na oo i se tasi aso, sa ou matuā maʻi tigāina lava ma ou manatu ai o le a seʻi vaai se fomaʻi. E iai se tuafafine atamai ma o se uō foʻi, sa ia faapea mai, atonu e māfua oʻu tigā ona o le tulaga faavauvau lea ou te iai, ma sa ia faalaeiauina ai aʻu ina ia ou ole atu ia Ieova mo se fesoasoani ma se faamāfanafanaga. Sa ou faatatauina i le taimi lava lena lana fautuaga ma fai ai loa saʻu tatalo lē leoa mai loʻu loto, ma ou ole atu ia Ieova ina ia lagolago mai ia te aʻu i loʻu faavauvau. Ma na ia faia faapena!” Sa amata ona toe lelei faalogona o Eleni, ma e leʻi pine ae toe teʻa ese atu tigā o lona tino.

E sili ona fiafia toeaina o le faapotopotoga e ofo atu se faauōga agalelei i fafine ua oti a latou tane, o loo fesagaʻi ma ni faavauvauga. E mafai e toeaina ona fesoasoani i nei fafine ina ia faalatalata atu pea i a Ieova e ui i o latou puapuaga, e ala lea i le faifai pea ona latou avatuina le lagolagosua faaleagaga ma faamāfanafanaga i se auala atamai ma le faautauta. I tulaga e talafeagai ai, e mafai foʻi e toeaina ona fesoasoani e ala i le faatulagaina o ni fesoasoani faaletino. O na toeaina alolofa mutimutivale, ma le faautauta, ua avea moni lava e pei o “se lafitaga i le matagi.”—Isaia 32:2; Galuega 6:1-3.

O Faamāfanafanaga Tumau Mai le Tupu Fou o le Lalolagi

Ua avea nei ma Tupu Faa-Mesia o le Malo faalelagi a le Atua, ia lē na olioli le tinā matua o Ana ina ua ia vaai atu i ai i le pe tusa o le lua afe tausaga ua mavae. Ua lē o toe pine ona soloiesea lea e lenei pulega ia pogai uma lava o faanoanoaga, e aofia ai ma le oti. E tusa ai o lenei mea, ua faapea mai le Faaaliga 21:3, 4 (LF): “Faauta, ua i ai le afioaga o le Atua faatasi ma tagata . . . E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” Pe sa e mātauina o loo faatatau atu lenei fuaitau i “tagata”? Ioe, o le a faasaʻolotoina tagata mai le oti ma auēga uma ma faanoanoaga e aumaia ai.

Ae e iai foʻi ma nisi tala lelei! O loo folafola mai foʻi e le Tusi Paia se toetū mo ē ua maliliu. “E oo mai le aso e faalogo ai i lona [Iesu] leo o i latou uma ua i tuugamau, ma latou o mai ai.” (Ioane 5:28, 29) I le pei o Lasalo lea na toe faatūina aʻe e Iesu nai le oti, o le a faapena foʻi ona latou toetutū aʻe o ni tagata, ae lē o ni foafoaga agaga. (Ioane 11:43, 44) O i latou o le a mulimuli ane faia ‘amioga lelei’ i lena taimi, o le a latou maua le tulaga lelei atoatoa faaletagata ma tofo totino ai i le tausiga faatamā a Ieova a o ia ‘faamafola lona aao ma faamaoona le manao o mea ola uma lava.’—Salamo 145:16.

O i latou ua motusia le mafutaga ma se tasi e pele ona o le maliu, ma o loo faatuatua i lenei faamoemoe mautinoa, ua latou iloa le avea o lenei faamoemoe o se puna o faamāfanafanaga sili. (1 Tesalonia 4:13) O lea la, afai o oe o se tinā ua maliu lau tane, ia mautinoa lou “tatalo e le aunoa” mo se faamāfanafanaga ma se fesoasoani o loo e manaʻomia i aso taʻitasi ina ia mafai ai pea ona e onosaia avega mamafa eseese o loo e tauaveina. (1 Tesalonia 5:17; 1 Peteru 5:7) Ma ia faaalu se taimi i aso taʻitasi e faitau ai le Afioga a le Atua, ina ia mafai e mafaufauga mai le Atua ona faamāfanafanaina ai oe. Pe a e faia nei mea, o le a e tofo ai lava oe i le auala e mafai moni lava ona fesoasoani mai ai Ieova ina ia e maua le filemu, e ui lava i puapuaga uma ma luʻi o loo e fesagaʻia i le avea o oe o se tinā ua maliu lau tane.

[Faamatalaga faaopoopo i le itulau 5]

O le lotofesoasoani o lona uiga ia iai le paleni i le vā o le faaaloalo i le tulaga totino o le tasi tagata, ma le faaavanoa atu o oe pe a manaʻomia

[Ata i le itulau 7]

Na faamanuia le Atua ia Ana le fafine matua ua oti lana tane