Le Uiga Moni o Lou Faatuatua—Ua Tofotofoina Nei

“Oʻu uso e, ia outou manatu, o le mea e fiafia tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai.”—IAKOPO 1:2, 3.

1. Aisea e tatau ai ona faatalitalia e Kerisiano ni tofotofoga o lo latou faatuatua?

E LĒ mananao Kerisiano moni ina ia faapuapuagatiaina i latou, ma latou te lē fiafia foi i ni faiga tiga po o le faalumaina. Peitai, latou te manatua upu ua taʻua i luga na tusia e le ʻafa uso o Iesu o Iakopo. Na faamanino atu e Keriso i ona soo faapea o le a latou faatalitalia sauaga ma isi faigata ona o lo latou pipii mau atu i tapulaa a le Atua. (Mataio 10:34; 24:9-13; Ioane 16:33) E ui i lea, e mafai ona maua le olioli mai na tofotofoga. E faapefea?

2. (a) E mafai faapefea e tofotofoga o lo tatou faatuatua ona iu ai i le olioli? (e) E mafai faapefea e le onosai ona faaatoatoaina lo tatou tulaga?

² O le mafuaaga autū tatou te maua ai le olioli a o fesagai ma puapuaga po o tofotofoga o le faatuatua, talu ai o nei mea e mafai ona maua ai le fua lelei. E pei ona fai mai Iakopo, o le mafai ona tatalia o le fesagai ma tofotofoga po o faigata “e tupu ai le onosai.” E mafai ona aogā ia i tatou le atiina ae o lena uiga tāua faa-Kerisiano. Na tusi Iakopo: “Ia atoatoa foi le galuega a le onosai, ina ia atoatoa ai ma ia sao ona lelei ai outou, ia leai se mea e tasi e mativa ai.” (Iakopo 1:4) E iai le matafaioi a le onosai e fai, o se “galuega.” O lea galuega o le faaatoatoaina o i tatou i vala uma, ia fesoasoani mai ina ia avea i tatou o ni Kerisiano e paleni ma taʻumatuaina. O lea, o le faatagaina o le iai o puapuaga e aunoa ma le taumafai i ni ala lē faale-Tusi Paia e faamuta vave ai, o le a faapena ona tofotofoina ma faamamāina ai lo tatou faatuatua. Pe ana fai ua leai so tatou onosai, alofa mutimutivale, agalelei, po o le alofa i feutagaiga ma tulaga po o uso a tagata, e mafai e le onosai ona faaatoaina mai ia i tatou na uiga faa-Kerisiano. Ioe, o le faasologa e faapea: O tofotofoga e maua ai le onosai; o le onosai e faateleina ai uiga faa-Kerisiano; o le pogai lena o le olioli.—1 Peteru 4:14; 2 Peteru 1:5-8.

3. Aisea e lē tatau ai ona tatou tuumuli ese mai le mataʻu i puapuaga po o tofotofoga o le faatuatua?

³ Na faamatilatila foi e le aposetolo o Peteru le mafuaaga e lē manaomia ai ona tatou matataʻu pe tuumuli ese mai tofotofoga o lo tatou faatuatua. Na ia tusi: “O lea ua outou olioli ai, e ui lava ona faanoanoa o outou i nai aso nei, i tofotofoga eseese. O le tofotofo foi o lo outou faatuatua, e silisili ona aoga i le auro e faaumatia, e ui lava ina tofotofoina i le afi, e avea ma mea e iu ai i le viiga, ma le mamalu, ma le manuia pe a faaalia mai Iesu Keriso.” (1 Peteru 1:6, 7) O nei upu ua sili ona faalaeiau i aso nei ona o le “puapuaga tele”—le taimi o viiga, le mamalu, le manuia, ma le faasaoina—ua matuā lalata mai lava nai lo le tulaga atonu o loo manatu i ai nisi, ma ua sili atu foi ona lalata mai nai lo le taimi a o faatoʻā avea i tatou ma tagata talitonu.—Mataio 24:21; Roma 13:11, 12.

4. Na faapeī lagona o se tasi uso e faatatau i tofotofoga na latou tofo i ai faatasi ma isi Kerisiano faauuina?

⁴ I le mataupu ua mavae atu, sa tatou talanoaina ai tofotofoga na fesagai ma le vaega totoe faauuina mai le 1914 ma faasolo mai ai. Po o na ea mea o se faavae lea mo le olioli? O le manatu lenei na ofoina mai e A. H. Macmillan e tusa ai o mea ua tuanai: “Ua ou vaai i le tele o puapuaga ogaoga na oo mai i le faalapotopotoga ma tofotofoga o le faatuatua o i latou na iai. O le fesoasoani a le agaga o le Atua ua faasaoina mai ai ma faaauau ona olaola. Ua ou vaai i le atamai o le faatalitali atu ma le onosai ia Ieova na te faamaninoina mai lo tatou malamalamaga i mea faale-Tusi Paia nai lo le lē fiafia i se manatu fou. . . . E tusa lava po o ā fetuutuunaiga e tatau ona tatou fai mai lea taimi i lea taimi i o tatou manatu, ae o le a lē suia ai le sauniuniga agaalofa o le togiola ma le folafolaga a le Atua i le ola e faavavau. O lea sa lē manaomia ai ona tatou faavaivai i lo tatou faatuatua ona o mea sa faatalitalia ae ua lē faataunuuina po o suiga i manatu.”—The Watchtower, Aokuso 15, 1966, itulau 504.

5. (a) O ā aogā na maua ona o le fesagaia e le vaega totoe o tofotofoga? (e) Aisea e tatau ai ona tatou naunau i le mataupu o le tofotofoina i le taimi nei?

⁵ O Kerisiano faauuina o ē na sao mai le vaitaimi o tofotofoga o le 1914 e oo i le 1919, sa saʻoloto i latou mai taaʻiga malolosi a le lalolagi ma saʻoloto mai le tele o faiga faalotu a Papelonia. Na agaʻi pea i luma le vaega totoe o ni tagata ua faamamāina, o loo latou ofoina atu ma le naunautai viiga i le Atua ma maua le faamautinoaga faapea o i latou o ni tagata ua taliaina e ia. (Isaia 52:11; 2 Korinito 6:14-18) Na amata mai le faamasinoga i le aiga o le Atua, ae sa lei faamaeʻaina i se vaitaimi faatulagaina e tasi. O loo faaauau pea le tofotofoina ma le faamamāina o tagata o le Atua. O i latou o loo faamoemoe e faasaoina atu i le “puapuaga tele” o loo fotuai mai o le “motu o tagata e toatele,” ua faapena foi ona tofotofoina lo latou faatuatua. (Faaaliga 7:9, 14) Ua faia lenei mea i auala e tali tutusa ma auala sa fesagai ma le vaega totoe faauuina faapea foi i nisi auala.

E Ono Faapefea Ona Tofotofoina Oe?

6. O le ā se tasi o tofotofoga matuitui ua tofo i ai le toatele?

⁶ E toatele Kerisiano ua mafaufau i le luʻi o le tetee atu i tofotofoga e ala mai i ni ituaiga o sauaga tuusaʻo. Ua latou manatua le lipoti lenei: “Ua aami foi [e taʻitaʻi o Iutaia] le au aposetolo, ua sasa ia te i latou, ma fai atu, ia soia le tautala i le igoa o Iesu; ona tuuina atu lea ia te i latou e ō. Ona ō lea o i latou nai luma o le fono, ua olioli ina ua taʻuaogaina i latou ia faaleagaina ona o lona suafa.” (Galuega 5:40, 41) Ma o le talafaasolopito faaonaponei o tagata o le Atua, ae maise lava i vaitaimi o taua a le lalolagi, ua manino mai ai o le toatele o Molimau a Ieova na oo moni i ai le sasaina, ma isi mea e sili atu ona leaga, mai i tagata faasauā.

7. O le ā le tele ua oo i ai nisi Kerisiano i ona po nei i le faaalia o le faatuatua?

⁷ E tusa ai ma le avea o Kerisiano o taulaʻiga o sauaga, ua lē faia ai e le lalolagi se faaeseesega i le va o le vaega totoe faauuina ma le motu o tagata e toatele o “isi mamoe.” (Ioane 10:16) A o faagasolo mai tausaga, ua matuā tofotofoina ai sui o vaega uma e lua i le faafalepuipuiina ma oo lava ina faamaturoina ona o lo latou alofa i le Atua ma lo latou faatuatua ia te ia. Ua manaomia e vaega uma e lua le agaga o le Atua, e ui lava i lo latou faamoemoe o iai. (Faatusatusa i Le Olomatamata o Iuni 15, 1996, itulau 31.) I vaitausaga mai le 1930 ma vaitausaga mai le 1940 i pulega a Nasi i Siamani, e toatele auauna a Ieova, e aofia ai tamaiti, na latou faaalia se faatuatua uigaese, ma e toatele na matuā tofotofoina lava i le mea e gata mai ai. I ni taimi e lei mamao tele atu, na fesagai ai tagata o Ieova ma tofotofoga o sauaga i na atunuu e pei o Aitiope, Burundi, Eritrea, Malawi, Mozambique, Rwanda, Sāʻia ma Sigapoa. Ma o loo faaauau pea nei ituaiga o tofotofoga.

8. Ua faapefea i faamatalaga a se tasi uso Aferika ona faaalia ai e tele isi mea o loo aofia i le tofotofoina o lo tatou faatuatua nai lo le onosaia o sauaga e ala i le sasaina?

⁸ Peitai, e pei ona taʻua, e tofotofoina foi lo tatou faatuatua i le tele o nisi auala e iloagatā. O nisi o tofotofoga e lē matuā tuusaʻo ma e faigata ona mataulia. Seʻi manatu i le pe faapefea ona e gaoioi i nisi o mea ia o loo mulimuli mai. O se uso i Angola e toasefulu lana fanau, sa iai i se faapotopotoga na lē toe maua i se tasi o taimi ni a latou fesootaiga ma uso o loo taimua ai. Mulimuli ane, na toe mafai e isi ona asiasi atu i le faapotopotoga. Na fesiligia o ia pe na mafai faapefea ona ia fafagaina lona aiga. Sa lei faigofie mo ia ona tali mai, ma na pau le tala na ia fai maia e faapea, sa faigata le tulaga o mea. Po ua mafai ea ona ia fafagaina lana fanau i se ʻaiga se tasi i le aso? Na ia tali mai: “E seāseā lava. Ua matou iloa ona ola e tusa ai ma mea ua matou maua.” Ona sosoo lea ma lona faapea mai i se leo na matuā maumauai: “Ae pe lē o mea ea nei o loo tatou faatalitalia i nei aso e gata ai?” O lena faatuatua ua matuā mataina lava i le lalolagi, ae lē o se mea fou i Kerisiano faamaoni, o ē ua iai le mautinoa atoatoa faapea o le a faataunuuina lava folafolaga o le Malo.

9. Ua faapefea ona tofotofoina i tatou e tusa ai ma le 1 Korinito 11:3?

⁹ Ua tofotofoina foi le motu o tagata e toatele e tusa ai ma taualumaga faatiokarate. O loo faatonutonuina le faapotopotoga Kerisiano i le lalolagi aoao e tusa ai o mataupu silisili tauatua ma faatulagaga faatiokarate. O le uiga o lenei mea, ia muamua ona amanaia Iesu o ia o le Taʻitaʻi, o lē ua tofia e avea ma Ulu o le faapotopotoga. (1 Korinito 11:3) O le lotomalie e gauai atu ia te ia ma i lona Tamā ua faaalia e ala i lo tatou faatuatua i tofiga ma filifiliga faatiokarate e fesootai atu i lo tatou faia ma le autasi o le finagalo o Ieova. E lē gata i lea, i faapotopotoga taitasi, o loo iai tane ua tofia e fai ma taimua. O i latou o ni tane e lē lelei atoatoa atonu e faigofie lava ona iloa o latou masei; peitai, ua uunaia i tatou ina ia faaaloalo atu i na ovasia ma ia gauai i ai. (Eperu 13:7, 17) Pe iai ea ni taimi e te iloa ai le faigata o lena mea? Po o se tofotofoga moni ea lenei mo oe? Afai e moni, po o ē maua ai la ni aogā mai lenei tofotofoga o lou faatuatua?

10. O le ā le tofotofoga o loo tatou fesagaia e tusa ai ma le faiva i le fanua?

¹⁰ Ua tofotofoina foi i tatou e tusa ai o faaeaga ma mea manaomia ina ia auai ai e lē aunoa i le faiva i le fanua. Ina ia tatou manumalo i lenei tofotofoga, e tatau ona tatou iloa o le faia o se sao atoatoa i le faiva e tele isi mea e aofia ai nai lo sina talaʻiga itiiti, pe e tau ina fai. Seʻi manatu i le fetalaiga faamaonia a Iesu e faatatau i le fafine mativa ua oti lana tane o lē na ia foai mea uma sa ia te ia. (Mareko 12:41-44) Tatou te ono fesiligia i tatou lava, ‘Po o faapena ea foi ona ou foaiina atu aʻu lava e tusa ai ma laʻu faiva i le fanua?’ O i tatou uma lava e tatau ona avea ma Molimau a Ieova i taimi uma, e nofo sauni i avanoa uma e faasusulu atu lo tatou malamalama.—Mataio 5:16.

11. E mafai faapefea ona avea o se tofotofoga suiga i le malamalamaga po o ni fautuaga i amioga?

¹¹ O le isi tofotofoga tatou te ono fesagaia e fesootai atu i le telē o lo tatou talisapaia o le malamalama faateleina ua faasusulu mai i upu moni o le Tusi Paia ma i fautuaga ua saunia mai e le vasega o le auauna faamaoni. (Mataio 24:45) I nisi taimi e manaomia ai i lenei mea ni fetuutuunaiga i amioga a le tagata lava ia, e pei o le taimi ina ua manino mai faapea o i latou o ē faaaogaina le tapaa e ao ona latou lafoaia pe a fia tumau pea i totonu o le faapotopotoga.a (2 Korinito 7:1) Po o le tofotofoga o lo tatou taliaina lea o le manaoga ina ia fuafua lelei a tatou filifiliga o musika po o isi ituaiga o faafiafiaga.b Po o le a tatou fesiligia ea le atamai o le fautuaga ua aumaia? Po o le a tatou faataga le agaga o le Atua e faaaafia ai o tatou mafaufauga ma fesoasoani ia i tatou e faaofu i le tagata fou faa-Kerisiano?—Efeso 4:20-24; 5:3-5.

12. O le ā e manaomia ina ia faamalosia ai le faatuatua o se tasi pe a uma ona papatisoina o ia?

¹² Mo le faitau sefulu o tausaga, ua faateleina ai le aofai o i latou o le motu o tagata e toatele, ma ina ua uma lo latou papatisoga, o loo faaauau pea ona faamalosia la latou faiā ma Ieova. O lenei itu e tele mea e aofia ai nai lo le tau ina auai i se fonotaga faa-Kerisiano, le auai i nisi o sauniga i le Maota o le Malo, po o le faia o se sao i nisi o taimi i le auaunaga i le fanua. Ina ia faataitai: Atonu i le vaaiga faaletino o loo i fafo se tagata mai ia Papelonia le Aai Tele, le emepaea a le lalolagi o lotu sese, ae po ua ia tuua moni ea? Po o ia pipii atu pea i mea na e atagia mai ai le agaga o Papelonia le Aai Tele—le agaga o loo faifai atu i tapulaa amiotonu a le Atua? Po o māmā ea lona manatu i amioga tatau ma le faamaoni i le faaipoipoga? Faamata o sili atu lona faamamafaina o manaoga totino ma meafaitino nai lo manaoga faaleagaga? Ioe, po o tumau ea lona lē ponā mai le lalolagi?—Iakopo 1:27.

Aogā e Maua Mai i se Faatuatua ua Tofotofoina

13, 14. O le ā na faia e nisi ina ua uma ona latou amataina le olaga i le tapuaiga moni?

¹³ Pe afai ua tatou sosola ese moni mai ia Papelonia le Aai Tele ma ō ese mai le lalolagi, seʻi aua neʻi o tatou toe tepa atu i mea ua tuanai. Ina ia ogatusa ma le mataupu silisili o loo i le Luka 9:62, so o se tasi o i tatou e toe tepa i tua e mafai ona misia ai le avea o i tatou ma tagatanuu o le Malo o le Atua. Na fetalai Iesu: “O lē tago lona lima i le suotosina, ma tepa i tua, e le tatau ia i le malo o le Atua.”

¹⁴ Peitai o nisi o ē na avea ma Kerisiano i aso ua tuanai, ua latou toe faataitai atu i lenei faiga o mea. Latou te lei teena le agaga o le lalolagi. (2 Peteru 2:20-22) O faatosinaga faalelalolagi ua mitiia ai lo latou naunau ma o latou taimi, ma ua punitia ai lo latou agaigai i luma. Nai lo le taulai atu o o latou mafaufau ma loto i le Malo o le Atua ma lana amiotonu, i le faamuamuaina o lena mea i le olaga, ae ua latou liliu ese ina ia sailia sini matapeapea i mea faitino. Ua iai i latou i se lamatiaga o le leiloa o la latou faiā tautele ma Ieova ma lana faalapotopotoga, seʻi vaganā ua uunaia i latou e iloa lo latou faatuatua vaivai ma lo latou tulaga faaleogalua ua iai, ma suia ai o latou olaga e ala i le sailia o fautuaga tauatua.—Faaaliga 3:15-19.

15. O le ā e manaomia ina ia taliaina ai pea e le Atua?

¹⁵ O lo tatou mauaina o le faamaoniga ma lo tatou agavaa e faasaoina atu i le puapuaga tele o loo matuā lalata tele mai, e faalagolago lea i lo tatou tausia o le mamā, ia ‘tāina o tatou ofu i le toto o le Tamai Mamoe.’ (Faaaliga 7:9-14; 1 Korinito 6:11) Pe a tatou lē tausisia se tulaga mamā, amiotonu i le silafaga a le Atua, o le a lē taliaina foi la tatou auaunaga paia. E mautinoa, e tatau ia i tatou uma taitoatasi ona iloa o le a fesoasoani ia i tatou le tofotofoina o le uiga moni o lo tatou faatuatua, e onosaia ma alofia ai le faia o se mea e lē fiafia ai le finagalo o le Atua.

16. I ā auala e ono avea ai foi pepelo ma tofotofoga o lo tatou faatuatua?

¹⁶ E iai taimi, e faia ai e le ʻau faasalalau ma faipule faalemalo ni faamatalaga sese e faatatau i tagata o le Atua, i le talaseseina o o tatou talitonuga faa-Kerisiano ma le auala o loo tatou ola ai. E lē tatau ona tatou faateʻia ai, auā ua faaalia manino e Iesu o le a ‘ʻinoʻino mai le lalolagi ia i tatou auā e lē ni o le lalolagi i tatou.’ (Ioane 17:14) Po o le a tatou faatagaina ea i latou ua faatauasoina e Satani e faafefe ma faalotovaivaia i tatou ma aumaia ni lagona mā ia i tatou ona o le tala lelei? Po o le a tatou faataga ea pepelo e uiga i le upu moni e faaaafia ai lo tatou auai e lē aunoa i sauniga ma la tatou galuega talaʻi? Po o le a tatou tutū mausalī ma loto tetele ma sili atu ona maumauai nai lo muamua, e faaauau pea ona folafola atu le upu moni e uiga ia Ieova ma lona Malo?

17. O le ā le faamautinoaga e mafai ona uunaia ai i tatou e faaalia pea le faatuatua?

¹⁷ E tusa ai ma valoaga ua faataunuuina a le Tusi Paia, ua tatou ola nei i le faaiuiuga o taimi o le iuga. O mea o loo tatou faatalitalia e faavae mai le Tusi Paia mo se lalolagi fou o le amiotonu e mautinoa le avea o se mea moni e fiafia ai. A o lei oo mai lena aso, tau ina ia tatou faaalia uma le faatuatua lē maluelue i le Afioga a le Atua ma faamaonia atu lo tatou faatuatua e ala i le lē faavaivai i le talaʻia o le tala lelei o le Malo i le lalolagi aoao. Seʻi manatu i le faitau afe o soo fou ua papatisoina i vaiaso taitasi. Po ua lē lava ea lena mafuaaga mo i tatou e talisapaia ai faapea, o le onosai o Ieova e tusa ai o le faaooina mai o lana sala faafaamasinoga, e mafai ona iu ai i le faaolataga o isi tagata e toatele? Pe tatou te lē olioli ea ona o le faataga e le Atua o le galuega talaʻi faasaoola o le Malo e faaauau pea? Ma pe tatou te lē fiafia ea ona o le faitau miliona o ē ua talia le upu moni ma faaalia mai lo latou faatuatua?

18. O le ā lou faanaunauga maumauai e tusa ai o le auauna atu ia Ieova?

¹⁸ E lē mafai ona tatou iloa po o le ā le umi o le a faaauau ai le tofotofoina o lo tatou faatuatua e pei ona iai nei. Ae o le mea lenei ua mautinoa: Ua uma ona faatulaga e Ieova le aso e feutagai ai ma le lagi ma le lalolagi amioleaga o loo iai nei. Ae i le taimi nei, seʻi o tatou maumauai e faataitai le uiga silisili o le faatuatua ua tofotofoina lea na faaalia mai e Lē na te faaatoatoaina lo tatou faatuatua, o Iesu. Ma seʻi o tatou mulimuli atu i le faaaoaoga a le vaega totoe faauuina ua loa lo latou soifua, faapea ma isi o ē o loo auauna ma le loto tetele faatasi ma i tatou.

19. O le ā e mafai ona e mautinoa o le a manumalo i lenei lalolagi?

¹⁹ E tatau ona tatou maumauai e folafola atu ma le lē faavaivai le tala lelei e faavavau i nuu uma, i ituaiga, i gagana, ma tagata i le lagolagosua atu i le agelu o loo feleleai i le taulotoaiga o le lagi. Seʻi o latou faalogoina le folafolaga faaagelu: “Ia outou matatau i le Atua, ma avatu ia te ia le viiga, auā ua oo mai le itu aso o lana faamasinoga.” (Faaaliga 14:6, 7) Pe a faaoo mai lena faamasinoga tauatua, o le ā le iuga o le a iai mo le uiga moni o lo tatou faatuatua ua tofotofoina? Po o le a lē avea ea o se manumalo faamamaluina—le laveaiina mai le faiga o mea o iai nei ma oo atu ai i totonu o le lalolagi fou a le Atua? O le onosaia o tofotofoga o lo tatou faatuatua, o le a mafai ai ona tatou faapea atu, e pei ona sa faia e le aposetolo o Ioane: “O lenei foi le manumalo e manumalo ai i le lalolagi, o lo tatou faatuatua lava.”—1 Ioane 5:4.

[Faaopoopoga i lalo]

E te Manatua?

◻ E faapefea ona avea tofotofoga o lo tatou faatuatua ma pogai o le olioli?

◻ O ā nisi o tofotofoga o lo tatou faatuatua atonu e lē faigofie ona mataulia?

◻ E mafai faapefea ona tatou maua aogā e ala i le tumau ma le manumalo mai tofotofoga o lo tatou faatuatua?

[Ata i le itulau 17]

A. H. Macmillan (le itu agavale i luma) e tusa lena o le taimi sa faafalepuipui ma le lē tonu ai o ia ma isi sui o le ofisa a le Sosaiete o le Olo Matamata

O ia o se sui usufono i le tauaofiaga i Detroit, i Michigan, i le 1928

I ona tausaga mulimuli, sa faaalia pea e le uso o Macmillan le faatuatua

[Ata i le itulau 18]

I le pei o lenei aiga, e toatele Kerisiano i Aferika ua latou faaalia le uiga moni o le faatuatua ua tofotofoina