Taufetuli ma le Onosai i le Tausinioga
“Ia tatou taufetuli ma le onosai i le [tausinioga] o i o tatou luma.”—EPERU 12:1.
1. (a) O le ā ua faataatia mai i o tatou luma pe a tatou faia le tuuina atu ia Ieova le Atua? (e) O le ā le ituaiga o tausinioga e tatau i se Kerisiano ona sauniuni i ai?
I SE tulaga faafaatusa, ina ua tatou tuuina atu i tatou lava ia Ieova e ala ia Iesu Keriso, ua faataatia mai ai e le Atua i o tatou luma, se tausinioga. I le faaiʻuga o le tausinioga, o le a foaiina atu ai se taui ia i latou uma o ē faaiʻuina ma le manuia. O le ā le taui? O le ola e faavavau! Ina ia manumalo i lenei taui matagofie, e manaomia e se Kerisiano e tamoʻe ai ona sauniuni, e lē mo na o sina taufetuliga saosaoa e puupuu, ae mo se tamoʻega umi ma mamao. O lea o le a manaomia ai ona ia onosai. E tatau ona ia onosai i le umi o le tausinioga lava ia, ae faapea foi i toʻatugā e aliaʻe a o faagasolo le tausinioga.
2, 3. (a) O le ā o le a fesoasoani ia i tatou ina ia tamomoʻe i le tausinioga faa-Kerisiano seia oo i le tini? (e) Sa fesoasoani faapefea le olioli ia Iesu ina ia momoʻe ai ma le onosai i le tausinioga?
2 O le ā o le a fesoasoani ia i tatou ina ia taufetuli i lena tausinioga seia oo ina maeʻa? Ia, o le ā sa fesoasoani ia Iesu ina ia onosai ai a o avea o ia ma tagata i le lalolagi? Sa ia maua le malosi e sau mai totonu e ala i le uiga o le olioli. E faitauina faapea le Eperu 12:1-3: “O lenei, o i tatou foi, o loo ua vagavagaia e le faapotopotoga o e matamata mai e faapea ona toatele, ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le [tausinioga] o i o tatou luma, ma ia vaavaai atu ia Iesu o le na te taʻitaʻiina ma le na te faaatoatoaina le faatuatua; o le na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua. Auā, ia outou mafaufau i le na onosai i le faatuʻi ese faapena ia te ia o e agasala, neʻi faavaivai o outou loto ma outou le lavatia.”
3 I le gasologa atoa lava o lana faiva i le lautele, sa mafai ai e Iesu ona momoʻe pea i le tausinioga ona o le olioli o Ieova. (Faatusatusa Neemia 8:10.) Na fesoasoani lona olioli ia te ia ina ia onosai ai e oo lava i se oti matagā i le laau faaoosala, ma ina ua mavae lea, sa oo ia te ia le olioli e lē mafaamatalaina o le toe faatuina mai lea nai le oti ma afio aʻe ai i le itu taumatau o lona Tamā, ina ia silasila i le galuega a le Atua seia oo i lona faamaeʻaina. E ala i lona onosai o se tagata i le itu o le Atua, sa ia taofi mau ai pea i lona aiā i le ola e faavavau. Ioe, e pei ona faapea mai le Luka 21:19: “O lo outou onosai ia maua ai lo outou ola.”
4. O le ā le ituaiga o faaaʻoaʻoga sa faataatia e Iesu mo ana aumea tamomoʻe, ma o le ā e ao ona taulaʻi pea i ai o tatou mafaufau?
4 Ua faataatia e Iesu Keriso le faaaʻoaʻoga e silisili ona lelei mo ana aumea tamomoʻe, ma ua faamautinoa mai e lana faaaʻoaʻoga faapea e mafai foi ona avea i tatou o ni ē manumalo. (1 Peteru 2:21) E mafai ona tatou faia mea ua fetalai mai ai Iesu tatou te faia. E pei ona ia onosai, e mafai foi ona faapena i tatou. Ma a o tatou taofi mau atu e faaaʻoaʻo ia te ia, e tatau ona teu pea i o tatou mafaufau a tatou mafuaaga e olioli ai. (Ioane 15:11, 20, 21) O le olioli o le a faamalosia ai i tatou ina ia faaauau pea ona taufetuli i le tausinioga i le auaunaga a Ieova seia oo ina maua le taui faamamaluina o le ola e faavavau.—Kolose 1:10, 11.
5. E mafai faapefea ona tatou olioli ma faamalosia mo le tausinioga o loo i o tatou luma?
5 Ina ia fesoasoani ia i tatou e taufetuli pea i le tausinioga, ua saunia ai e Ieova le malosi e sili atu i lo le malosi masani. Pe a sauāina i tatou, o le a faamalosia i tatou e lena malosi, atoa ma le iloa o le pogai ua faaeaina ai i tatou ina ia oo i ai sauaga. (2 Korinito 4:7-9) So o se mea e oo mai ona o le faapaiaina o le suafa o le Atua atoa ma le siitiaina o lana pule silisiliese, o se mafuaaga lea mo le olioli e leai se tasi e mafai ona aveesea mai ia i tatou. (Ioane 16:22) Ua faamatalaina e lenei mea le pogai na olioli ai le au aposetolo, ina ua maeʻa ona sasaina e ala i le faatonuga a le au Saniterini Iutaia, ona o le molimau atu i mea ofoofogia a Ieova le Atua sa faataunuuina e ala ia Iesu, “ina ua taʻuaogaina i latou ia faaleagaina ona o lona suafa.” (Galuega 5:41, 42) Sa leʻi maua lo latou olioli mai sauaga lava latou, ae mai le loloto o le faamalieina i totonu i le iloaina faapea sa latou faafiafiaina Ieova ma Iesu.
6, 7. Aiseā e mafai ai ona matuā olioli se Kerisiano tamoʻe e tusa lava pe iai ni ona puapuaga, ma faatasi ma ā iʻuga?
6 O le isi malosi e faatumauina ai i o tatou olaga, o le faamoemoe lea ua faataatia mai e le Atua i o tatou luma. E pei ona faaupuina e Paulo: “O lea ua tatou lelei ai ma le Atua, ona o lo tatou Alii o Iesu Keriso; o ia foi ua tatou maua mai ai le taʻitaʻiga i lenei alofa tunoa, tatou te i ai i le faatuatua; o loo mitamita foi i tatou ma le faamoemoe i le manuia mai le Atua. E le gata foi i lea, a ua tatou mitamita foi i puapuaga, ina ua tatou iloa o le puapuaga e tupu ai le onosai, o le onosai e tupu ai le mautinoa, o le mautinoa e tupu ai le faamoemoe; o le faamoemoe foi e le mā ai.”—Roma 5:1-5.
7 O puapuaga lava latou e lē o se mea e olioli ai, ae mulimuli ane e mafai ona olioli i fua o le filemu e maua mai ai. O ia fua o le onosai, o se tulaga mautinoa, o le faamoemoe, atoa ma le faataunuuga o lena faamoemoe. O lo tatou onosai o le a taʻitaʻia lea i lo tatou mauaina o le faamaoniga tauatua. A tatou maua le faamaoniga a le Atua, e mafai ona tatou faamoemoe ai ma le mautinoa mo le faataunuuga moni o na folafolaga ua ia faia. O lenei faamoemoe ua faatonutonu moni ai i tatou i lo tatou ala ma ua fai ma o tatou taula i lalo o tofotofoga seia oo ina faataunuuina le faamoemoe.—2 Korinito 4:16-18.
E Fiafia i Latou o Ē Onosai!
8. Aiseā ua lē avea ai lenei vaitaimi faatalitali o se faamāumau taimi mo i tatou?
8 A o faatalitali atu mo le taimi faatulagaina tauatua mo le tufatufaina o faailoga i le au tamomoʻe, e iai suiga o le a oo ia i tatou. O ia suiga o ni faaleleiga faaleagaga ia e mafua mai le faafetaiai ma le manuia o tofotofoga, ma ua avea ia ma auala tatou te manumalo ai i le mauaina o le finagalo malie o le Atua. Ua faamaonia ai le ituaiga o tagata e iai i tatou, ma aumaia ai ia i tatou le avanoa e faatinoina ai ia lava uiga lelei sa faaalia e tagata faatuatua anamua, ae maise lava lo tatou Faaaʻoaʻo, o Iesu Keriso. Ua faapea mai le soʻo o Iakopo: “Oʻu uso e, ia outou manatu, o le mea e fiafia tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai; a ia atoatoa le galuega a le onosai, ina ia atoatoa ai ma ia sao ona lelei ai outou, ia leai se mea e tasi e mativa ai.” (Iakopo 1:2-4) Ioe, atonu tatou te faatalitalia ni tofotofoga eseese, ae o le a avea ia ma auala e faaauau ai pea ona tatou atiina aʻe uiga talafeagai. O le a tatou faaalia ai i lea faapea o le a tatou tumau pea i lenei tausinioga seia oo ina manumalo i le taui, e tusa lava po o ā toʻatugā tatou te fetaiai.
9, 10. (a) Aiseā e fiafia ai i latou o ē onosai i tofotofoga, ma e ao faapefea ona tatou faafesagaʻi ma tofotofoga? (e) O ai ē sa fiafia i aso anamua, ma e mafai faapefea ona aofia ai i tatou i lo latou lotolotoi?
9 E lētioa la, ona faapea mai Iakopo: “Amuia le tagata o lē onosai i le faaosoosoga; auā a uma ona tofotofoina e maua e ia le pale o le ola, ua folafolaina mai e le Alii i e alolofa atu ia te ia”! (Iakopo 1:12) Tau ina ia faaauau pea ona tatou faafetaiaia tofotofoga, ma faaauupegaina i uiga faaleatua na o le a faamalosia ai i tatou ina ia manumalo ia i latou.—2 Peteru 1:5-8.
10 Ia manatua, e lē fou pe ese le auala o loo feutagai ai le Atua ma i tatou. Sa feutagai ‘molimau faamaoni e toatele’ o aso anamua i lea lava auala e tasi a o latou faamaonia lo latou tutumau i le Atua. (Eperu 12:1) Ua faamauina le faamaoniga o i latou e le Atua i lana Afioga, ma tatou te matauina lo latou fiafia uma ona o lo latou tutumau i lalo o tofotofoga. Ua faapea mai Iakopo: “Oʻu uso e, ia outou faaaʻoaʻo i le faatoatoa i le leaga, atoa ma le onosai o le au perofeta, e na tautala mai i le suafa o [Ieova, NW]. Faauta, ua tatou taʻuamuia i e onosai; ua outou faalogologo i le onosai o Iopu, ua outou iloa foi le iuga [na aumaia e Ieova], ina ua mutimuti vale tele [Ieova] ma le alofa naunau.” (Iakopo 5:10, 11) Sa valoia faapea i nei taimi faigata o aso e gata ai, o le a iai i le lalolagi nisi o ē o le a auauna ma le faamaoni ia Ieova, e pei lava ona faia e na perofeta i senituri anamua. Pe tatou te lē fiafia ea ona o loo tatou faia faapea?—Tanielu 12:3; Faaaliga 7:9.
Maua le Malosi mai le Afioga Faalaeiau a Ieova
11. E mafai faapefea ona fesoasoani le Afioga a le Atua ia i tatou ina ia onosai, ma aiseā e lē tatau ai ona avea i tatou e pei o eleele papa i le faataoto a Iesu?
11 Sa faasino atu e Paulo i se isi fesoasoani e onosai ai ina ua ia faapea mai “e ala i le tumau ma le onosai, ma e ala i faalaeiauga e maua mai le Tusi Paia, e mafai ai ona tatou taofi mau i lo tatou faamoemoe.” (Roma 15:4, The Twentieth Century New Testament) E tatau ona loloto le mauaa o le upu moni, le Afioga a le Atua, i totonu o i tatou ina ia mafai ai ona maua atu ia i tatou se tali talafeagai i taimi uma. E augapiu ma se aogā tatou te maua i le avea e pei o le eleele papa foi lea na faamatalaina i le faataoto a Iesu e uiga i lē lūlū saito: “O i latou ia ua faalogo i le upu, ona talia loa lea ma le fiafia. A e peitai ua leai ni o latou aa, ua faaletumau i latou; pe a tupu le puapuaga, po o le saua ona o le upu, ona latou tausuai loa lea.” (Mareko 4:16, 17) E leʻi loloto ona mauaa le upu moni mai le Afioga a le Atua ia i latou na; o lea, i taimi o puapuaga, e leʻi mafai ona latou faalagolago i ai o se puna moni o le malosi ma le faamoemoe.
12. O le ā e lē tatau ona faaseseina ai i tatou pe a taliaina le tala lelei?
12 So o se tasi e taliaina le tala lelei o le Malo e lē tatau ona faaseseina ia lava e uiga i mea o le a mulimuli mai. Ua ia uia se ala o le olaga o le a faapea ona oo mai ai puapuaga po o sauaga. (2 Timoteo 3:12) Ae e ao ona ia manatu i ai o se “mea e fiafia tele ai” le mauaina o le faaeaga o le uia o tofotofoga eseese ona o le taofimau i le Afioga a le Atua ma le faailoa atu i isi e uiga i ai.—Iakopo 1:2, 3.
13. Sa faapefea ma aiseā na olioli ai Paulo i Kerisiano i Tesalonia?
13 I le uluai senituri, sa faatupuina e tagata tetee i Tesalonia se faasoesa ona o le talaʻiga a Paulo. Ina ua alu atu Paulo i Perea, sa mulimuli atu ia te ia na tagata faasauā ina ia saveʻu atili ai ni faafitauli. Na tusi atu le aposetolo sa sauāina, ia i latou o ē faamaoni na faamuli atu i Tesalonia: “E tatau ona matou faafetai e le aunoa i le Atua ona o outou, le au uso e, e faapei ona tusa, auā ua tupu tele lava lo outou faatuatua, ua faateleina foi lo outou fealofani o outou uma lava taitoatasi. O lea matou te mitamita ai ia te outou o i matou nei lava, i ekalesia a le Atua, ona o lo outou onosai ma lo outou faatuatua, i ona po o sauaga uma ma puapuaga ua outou faatoatoa ai; o le faailoga lea o le faamasinoga tonu a le Atua, ina ia taʻuaogaina outou i le malo o le Atua, o le mea lea e tigaina ai outou.” (2 Tesalonia 1:3-5) E ui lava i o latou mafatiaga i lima o fili, ae na tuputupu aʻe Kerisiano i Tesalonia i uiga e pei o Keriso ma i lo latou faitau aofai. Sa mafai faapefea lena mea? Ona sa latou mauaina le malosi mai le Afioga faalaeiau a Ieova. Na latou usiusitai i poloaiga a le Alii ma sa taufetuli ma le onosai i le tausinioga.—2 Tesalonia 2:13-17.
Mo le Faaolataga o Isi
14. (a) Mo ā mafuaaga tatou te tumau ai ma le olioli i le faiva e ui i ni faigata? (e) Mo ā mea tatou te tatalo ai, ma aiseā?
14 E muamua lava, ona o le taʻumamāina o le Atua, ua tatou onosai ai ma le faamaoni ma le lē faitio i faigata ma sauaga. Peitai, e iai se isi mafuaaga lē manatu faapito tatou te gauai ai i na mea: ina ia mafai ai ona tatou faaooina atu mea lelei o le Malo i isi ina ia toatele ai ni tagata talaʻi o le Malo o le Atua e mafai ona maua e ‘taʻutino atu i le lautele mo le faaolataga.’ (Roma 10:10) O i latou o loo auai i le auaunaga a le Atua e ao ona tatalo ina ia faamanuia e le Matai o le seleselega la latou galuega e ala i le faaopoopoina mai o nisi tagata talaʻi o le Malo. (Mataio 9:38) Na tusi atu Paulo ia Timoteo: “O mea foi na e faalogologo mai ai ia te au i molimau e toatele, ia e tuuina atu ai i tagata faamaoni, o e ua mafaia ona aʻoaʻoina atu i nisi. O lenei, ia e onosai i mea e tiga ai, faapei o se tagata tau e lelei a Iesu Keriso.”—2 Timoteo 2:2, 3.
15. Aiseā e tatau ai ona tatou pulea i tatou lava e pei o ni tagata tau ma o ni ē tauivi “i le fia malo”?
15 E faaesea e se fitafita tau o ia mai le olaga e itiiti taofiofiga o se tagata savili e lē auai i le ʻautau. E faapena foi, e lē tatau ona faalavelavea i tatou lava i mea fai a i latou o ē e lē o auai i le ʻautau a le Alii, a o le mea moni, o ni ē o loo auai i le itu tetee. O lea, na tusi atili atu ai Paulo ia Timoteo: “E leai sē tau i le taua na te faalavelavea e ia ia te ia i mea a lenei olaga, ina ia faafiafia o ia i lē na filifili ia te ia e fai ma tagata tau. Afai foi e finau se tasi i le fia malo, e le faapaleina o ia pe a le finau e tusa ma tulafono.” (2 Timoteo 2:4, 5) I le tauiviga ina ia manumalo i le tausinioga mo le “pale o le ola,” e tatau i tagata tamomoʻe ona faatinoina le pulea o le tagata lava ia ma ia alofia mea mamafa e lē aogā ma mea e faalavelavegofie ai. I lenei auala e mafai ai ona latou uaʻi atu i le faaooina atu o le tala lelei o le faaolataga i isi.—Iakopo 1:12; faatusatusa 1 Korinito 9:24, 25.
16. O le ā e lē mafai ona taofia, ma mo le lelei o ai tatou te onosai ai?
16 Ona tatou te alolofa i le Atua atoa ma ē pei ni mamoe o loo saili ia maua o ia, ua tatou onosai ai ma le fiafia i le tele o mea ina ia mafai ai ona faaoo atu i isi le tala lelei o le faaolataga. Atonu e taofiofia i tatou e fili ona o le talaʻia o le Afioga a le Atua. Peitai e lē mafai ona taofia le Afioga a le Atua, ma e lē mafai foi ona taofia le tautala e uiga i ai mo le faaolataga o isi. Sa faamatala e Paulo ia Timoteo le pogai na ia naunau ai e faafetaiaia tofotofoga: “Ia e manatua Iesu Keriso o le fanau lava a Tavita, ua faatuina mai o ia nai e ua oti, e tusa ma laʻu tala lelei; ona o lea ua tigaina ai aʻu, ua oo ina noanoatia o aʻu, peiseai se pagota; a o le afioga a le Atua e le noatia lava lea. O le mea lea ou te onosai ai i mea uma ona o le au filifilia, ina ia maua e i latou lava le ola o loo ia Keriso Iesu ma le manuia e faavavau.” (2 Timoteo 2:8-10) I aso nei ia teu pea i o tatou mafaufau e lē gata i le vaega totoe toaitiiti o i latou o loo faatalitali mo le Malo faalelagi ae faapea foi le motu o tagata e toatele o isi mamoe a le Leoleo Mamoe Lelei, o Iesu Keriso, le motu o tagata e toatele lea o ē mauaina le Parataiso faalelalolagi e ala i le Malo o Keriso.—Faaaliga 7:9-17.
17. Aiseā e lē tatau ai ona tatou faamaamulu mai le tausinioga, ma o ā iʻuga pe afai tatou te faaauau pea i le tausinioga seia oo i le tini?
17 Afai o i tatou o ni ē faamaamulu, o le a lē mafai la ona tatou fesoasoani ia i tatou lava po o so o se tasi ina ia maua le faaolataga. E ala i le onosai i le tausinioga faa-Kerisiano, e ui i ni toʻatugā e oo mai, tatou te faatumauina ai pea i tatou lava i le laina mo le taui ma e mafai ai ona fesoasoani tuusaʻo i isi ina ia maua le faaolataga, a o avea o se faaaʻoaʻoga e uunaʻia ai o le malosi i isi. Po o le ā lava lo tatou faamoemoe, faalelagi pe faalelalolagi, ae o le uiga o Paulo i le “tausisi atu i le faailoga, ia maua ai le taui,” o se uiga lelei lea e faataʻitaʻi i ai.—Filipi 3:14, 15.
Faaauau ma le Tutumau i le Tūʻuga
18. O le ā e faalagolago i ai le manumalo i le taui, peitai ina ia faaauau pea seia oo i le tini, o le ā e tatau ona alofia?
18 O le faaiʻuina ma le manumalo o lo tatou ala faa-Kerisiano ina ia taʻumamāina Ieova ma manumalo ai i le taui ua ia teuina mo i tatou, e faalagolago lea i lo tatou faaauau pea ma le tutumau i le umi atoa o le tausinioga. O lea, e lē mafai ona tatou faaauau pea seia oo i le iʻuga pe afai tatou te faamamafaina i tatou lava i mea e lē o faapogaia ai le amiotonu. E tusa foi pe aveeseina na mea, ae e lava ma totoe pea mea manaomia e maua mai ai le faamalosiaga e mafai ona tatou tāea. O lea, ua fautua mai ai Paulo: “Ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le [tausinioga] o i o tatou luma.” (Eperu 12:1) I le pei o Iesu, e lē tatau ona tatou soona manatu mamafa i mafatiaga e oo mai, a ia manatu i ai ua na o se tau itiiti lea e totogia mo le taui e sili ona olioli ai.—Faatusatusa Roma 8:18.
19. (a) O le ā le mautinoa sa faamatala e Paulo a o latalata le mutaaga o lona ola? (e) A o tatou tu lata atu i le faaiʻuga o le tausinioga o le onosai, o le ā le mautinoa e ao ona ia i tatou e uiga i le taui folafolaina?
19 Ina ua latalata i le mutaaga o lona olaga, sa mafai ona faapea mai Paulo: “Ua ou tau le taua lelei, ua iu ia te au le tausinioga, ua ou taofi i le upu o le faatuatua. O lenei, ua teuina mo aʻu le pale o le amiotonu.” (2 Timoteo 4:7, 8) O loo tatou auai i lenei tausinioga o le onosai ina ia mauaina ai le taui o le ola e faavavau. Afai e uma lo tatou onosai ona e foliga ua umi atu le tausinioga na i lo le mea sa tatou faatalitalia ina ua tatou faatōʻa amata, o le a tatou lē taulau ai la a o tatou tulata atu i le mauaina o le taui folafolaina. Aua neʻi faaseseina. E lē tau fesiliga faapea o loo iai le taui.
20. O le ā e ao ona avea ma a tatou filifiliga seia oo ina tini le tausinioga?
20 O lea, tau ina ia aua lava neʻi puaoa la tatou vaai i le matauina o le amataga o le puapuaga tele, lea e muamua lava aumaia ai le faaumatiaga ia Papelonia Tele ona sosoo ai lea ma le toe vaega o le faalapotopotoga a le Tiapolo. (2 Peteru 3:11, 12) I le manatu atu i faailoga uma ua fai ma faamaoniga o loo siomia ai i tatou, seʻi o tatou tepa taulaʻi atu ia i luma ma le faatuatua. Inā tatou fusi aʻe ia sulugatiti o o tatou malosi o le onosai, ma tau ina ia faaauau pea ma le vilivilitaʻi i le tausinioga ua faataatia mai e Ieova le Atua i o tatou luma, seia oo ina tini i le faaiʻuga ma ia maua ai le taui ma le olioli tele, ina ia taʻumamāina ai Ieova e ala ia Iesu Keriso.
E Faapefea ona E Tali
◻ O le ā le ituaiga o tausinioga e tatau i se Kerisiano ona sauniuni i ai?
◻ Aiseā e matuā tāua ai le olioli i le taufetuliga i le tausinioga?
◻ O ā mafuaaga autū ua tatou tutumau ai i le faiva e ui lava i ni faigata?
◻ Aiseā e lē tatau ai ona tatou faamaamulu mai le tausinioga ua faataatia e le Atua i o tatou luma?
[Ata i le itulau 15]
E tatau ona onosai Kerisiano, e pei ona iai i se tausinioga e mamao
[Ata i le itulau 17]
I le aapa atu mo le “pale o le ola,” e tatau i ē tamomoʻe ona faaalia le pulea o le tagata lava ia