Ia Malupuipuia o se Vaega o le Faalapotopotoga a le Atua

“O le suafa o Ieova, o le ʻolo malosi lea; e sola atu i ai lē amiotonu, ona sao ai lea o ia.”—FAATAOTO 18:10.

1. E tusa ai ma le tatalo a Iesu, o le ā le tulaga faigata o loo iai Kerisiano?

A O TOE o se aga oo i lona maliu, na tatalo ai Iesu i lona Tamā faalelagi e fai ai o ia ma sui o ona soo. Ona o lona manatu mamafa ma le alofa, na ia faapea ai: “Ua ou tuu atu lau afioga ia te i latou; ua ʻinoʻino foi le lalolagi ia te i latou, auā e le ni o le lalolagi i latou, faapei o aʻu, ou te le so le lalolagi aʻu. Ou te le ole atu ina ia e ave ese ia te i latou i le lalolagi, a ia e tausi ia te i latou mai lē o loo leaga.” (Ioane 17:14, 15) Na silafia e Iesu o le a avea le lalolagi ma nofoaga matautia mo Kerisiano. O le a faaalia le ʻinoʻino mai o le lalolagi ia i latou e ala i le faia o faamatalaga pepelo e uiga ia i latou ma faasauaina i latou. (Mataio 5:11, 12; 10:16, 17) O le a avea foi ma puna o faiga piopio.—2 Timoteo 4:10; 1 Ioane 2:15, 16.

2. O fea e mafai ona maua i ai e Kerisiano se nofoaga o le saogalemu faaleagaga?

² O le lalolagi lea o le a ʻinoʻino i Kerisiano ua faia aʻe ia i latou o ē ua vavae ese mai le Atua ma o loo pulea e Satani. (1 Ioane 5:19) E sili mamao atu ona telē lenei lalolagi nai lo le faapotopotoga Kerisiano, ma e sili mamao atu foi le malosi o Satani lava ia nai lo so o se tagata. O lea, o le ʻinoʻino mai o le lalolagi o se matuā faamataʻu lava. O fea e mafai e soo o Iesu ona maua ai le saogalemu faaleagaga? O se faamatalaga mai le Watchtower o Tesema 1, 1922, na fautuaina mai le tali e faapea: “Ua tatou iai nei i aso leaga. O loo faia nei le taua i le va o le faalapotopotoga a Satani ma le faalapotopotoga a le Atua. O se taua matautia.” I lenei fetauaiga, ua avea ai le faalapotopotoga a le Atua ma nofoaga o le saogalemu faaleagaga. E lē o iai le upu “faalapotopotoga” i le Tusi Paia, ma i tuā i vaitausaga na amata mai i le 1920, na avea ai le faaupuga “faalapotopotoga a le Atua” o se faaupuga fou. O le ā la, lenei faalapotopotoga? Ma e mafai faapefea ona tatou maua ai iina le puipuiga?

Le Faalapotopotoga a Ieova

3, 4. (a) E tusa ai ma le faamatalaga a se lomifefiloi ma le Watchtower, o le ā le uiga o le faalapotopotoga? (e) I le ā le uiga e mafai ai ona taʻua le auuso faava-o-atunuu a Molimau a Ieova o se faalapotopotoga?

³ O le faalapotopotoga o “se vaega ua faamaopoopoina,” e tusa ai ma le faamatalaga a le Concise Oxford Dictionary. I le manatuaina o lena faauigaga, ua tatou malamalama ai, auā sa faamaopoopo e aposetolo ia Kerisiano o le uluai senituri i ni faapotopotoga e ala i le vaavaaiga a se vaega pule i Ierusalema, ua talafeagai ai ona taʻua lena “auuso” o se faalapotopotoga. (1 Peteru 2:17) Ua iai foi i Molimau a Ieova i aso nei se faatulagaga faapena faalefaalapotopotoga. Sa faamalosia le autasi o le faalapotopotoga i le uluai senituri e “mea alofa i tagata,” e pei o “leoleo [“leoleo mamoe,” NW] atoa ma aʻoaʻo.” O nisi o i latou na, sa faimalaga mai i le tasi faapotopotoga i le isi, a o isi sa avea ma toeaina i a latou lava faapotopotoga. (Efeso 4:8, 11, 12; Galuega 20:28) E faapena foi i “mea alofa” ona latou faamalosia le autasi o Molimau a Ieova i aso nei.

⁴ Na faapea mai le lomiga o le Watchtower o Novema 1, 1922, e faatatau i le upu “faalapotopotoga”: “O le faalapotopotoga o se faatasiga lea o ni tagata ua tuufaatasia ma le faamoemoe ina ia faatinoina se fuafuaga ua faia.” Na faamatala atili mai e le Watchtower e faapea, o le taʻuaina o Molimau a Ieova o se faalapotopotoga sa lei avea ai i latou o “se lotu mavae i le uiga na faaaogā ai lena faaupuga, peitai ua na ona uiga faapea o loo taumafai Tagata Aʻoga o le Tusi Paia [Molimau a Ieova] e faatinoina fuafuaga a le Atua, ma faia e pei ona faia ai e le Alii mea uma, i se uiga e maopoopo lelei.” (1 Korinito 14:33) Na faaalia e le aposetolo o Paulo faapea sa gaoioi foi faapena Kerisiano i ona aso i se faiga sa maopoopo lelei. Na ia faatusatusa atu le mafutaga faaleauuso a Kerisiano faauuina i le tino o se tagata, lea e tele ona vaega, ma e tofu vaega taitasi ma lana matafaioi ua tofia e faataunuu ina ia mafai ai ona faagaoioia lelei le tino atoa. (1 Korinito 12:12-26) O se faaaoaoga sili ona lelei lena mo se faalapotopotoga! Aisea na faamaopoopoina ai Kerisiano? Ina ia latou auauna mo “fuafuaga a le Atua,” ia faia le finagalo o Ieova.

5. O le ā le faalapotopotoga vaaia a le Atua?

⁵ Na valoia mai e le Tusi Paia faapea o le a autasi Kerisiano moni i aso nei, o le a aumaia faatasi i se ‘laueleele’ e tasi e avea ma “nuu” e tasi, o iina o le a latou “susulu atu i ai faapei o mea e faamalamalama aʻi le lalolagi.” (Isaia 66:8; Filipi 2:15) Ua oo atu nei le aofai o lenei “nuu” ua faamaopoopoina i le silia i le lima ma le ʻafa miliona. (Isaia 60:8-10, 22) Peitai, e lē o le faalapotopotoga atoa lena a le Atua. O loo aofia ai foi ma agelu.

6. I lona uiga e sili ona lautele, o ai ua faia aʻe ai le faalapotopotoga a le Atua?

⁶ E tele faataitaiga o le galulue faatasi o agelu ma auauna a le Atua o i le lalolagi. (Kenese 28:12; Tanielu 10:12-14; 12:1; Eperu 1:13, 14; Faaaliga 14:14-16) Ua fetaui ai la le faapea mai o le lomiga o le Watchtower o Me 15, 1925: “O agelu paia uma lava ua avea i latou ma vaega o le faalapotopotoga a le Atua.” Na toe faapea mai atili: “O lē ua faauluulu i ai le faalapotopotoga a le Atua, ua ia te ia le mana uma ma le pule, o le Alii o Iesu Keriso lea.” (Mataio 28:18) O lea, i se uiga e sili ona lautele, ua faia aʻe ai le faalapotopotoga a le Atua ia i latou uma o i le lagi ma le lalolagi o ē o loo galulue faatasi i le faia o le finagalo o le Atua. (Tagai i le pusa.) Maeu se faaeaga matagofie o le avea ma vaega o lenei faalapotopotoga! Ma e maeu le olioli o le tulimatai atu i le taimi o le a faamaopoopoina ai foafoaga ola uma, i le lagi ma le lalolagi, ina ia latou vivii atu ma le autasi ia Ieova le Atua! (Faaaliga 5:13, 14) Peitai, o le ā le puipuiga o loo aumaia e le faalapotopotoga a le Atua i aso nei?

Ua Puipuia i Totonu o le Faalapotopotoga a le Atua—E Faapefea?

7. I le ā le itu ua puipuia ai i tatou e le faalapotopotoga a le Atua?

⁷ E mafai e le faalapotopotoga a le Atua ona fesoasoani e puipuia i tatou mai ia Satani ma ana togafiti. (Efeso 6:11) E tasi lava le sini autū e māfua ai ona aumaia e Satani omiga, sauaga, ma tofotofoga i tagata tapuai a Ieova: ina ia tosoesea i latou mai ‘le ala e tatau ona latou ui ai.’ (Isaia 48:17; faatusatusa i le Mataio 4:1-11.) E lē tāitai mafai ona tatou alofia atoatoa na osofaiga i lenei faiga o mea. Peitai, o la tatou faauooga mafana ma le Atua ma lana faalapotopotoga e faamalosia ma puipuia ai i tatou, ma fesoasoani mai ai ina ia tatou tumau i “le ala.” O le iuga, e lē mafai ai ona mou ese atu ma i tatou lo tatou faamoemoe.

8. Ua faapefea ona lagolagosua le faalapotopotoga lē vaaia a Ieova i ana auauna i le lalolagi?

⁸ Ua faapefea ona saunia e le faalapotopotoga a le Atua lenei puipuiga? Muamua, ua tatou maua le lagolagosua lē mavae a auauna agaga a Ieova. Ina ua fesagai Iesu ma omiga matuitui, sa faalaeiauina o ia e se agelu. (Luka 22:43) A o iai Peteru i lamatiaga sa ono oti ai, sa laveaia faavavega o ia e se agelu. (Galuega 12:6-11) E ui e lē o iai ni vavega faapena i aso nei, ae ua folafolaina atu foi i tagata o Ieova le lagolagosua faaagelu i la latou galuega talaʻi. (Faaaliga 14:6, 7) Ua masani ona ia i latou se malosi e sili atu nai lo le tulaga e masani aʻi pe a oo ina fetaiai ma tulaga faigata. (2 Korinito 4:7) E lē gata i lea, ua latou iloa lelei “e to lauapi le agelu a Ieova e siosiomia ai e o matatau ia te ia, e laveai foi o ia ia te i latou.”—Salamo 34:7.

9, 10. E mafai faapefea ona faapea atu “o le suafa o Ieova, o le ʻolo malosi lea,” ma ua faapefea ona faatatauina lenei mataupu silisili i le faalapotopotoga atoa a le Atua?

⁹ O le faalapotopotoga vaaia a Ieova, ua avea foi o se puipuiga. E faapefea? I le Faataoto 18:10, tatou te faitau ai: “O le suafa o Ieova, o le ʻolo malosi lea; e sola atu i ai lē amiotonu, ona sao ai lea o ia.” E lē o le uiga o lenei mea faapea o le tau ina taʻua pea o le suafa o le Atua e maua ai le puipuiga. Na i lo lea, o lo tatou sulufai atu i le suafa o le Atua e faaalia ai tatou te faatuatua ia Ieova lava ia. (Salamo 20:1; 122:4) O lona uiga o le lagolagoina o lana pule silisiliese, sapasapaia ana tulafono ma ana mataupu silisili, ma faatuatua i ana folafolaga. (Salamo 8:1-9; Isaia 50:10; Eperu 11:6) E aofia ai le tuutoina atoatoa ia Ieova. E na o i latou o ē tapuai ia Ieova i lenei auala e mafai ona faapea mai faatasi ma le faisalamo: “O loo fiafia ia [Ieova] o tatou loto; auā ua tatou faatuatua i lona suafa paia.”—Salamo 33:21; 124:8.

¹⁰ Nei la ua faapea atu faatasi ma Mika i latou uma lava o i le faalapotopotoga vaaia a le Atua: “O i tatou foi, tatou te savavali i le suafa o Ieova lo tatou Atua e faavavau faavavau lava.” (Mika 4:5) O loo potopoto atu le faalapotopotoga faaonaponei i “le Isaraelu [a] le Atua,” lea ua taʻua i le Tusi Paia o “se nuu mo lona suafa.” (Kalatia 6:16; Galuega 15:14; Isaia 43:6, 7; 1 Peteru 2:17) O lea, ina ia avea ma vaega o le faalapotopotoga a Ieova o lona uiga ia avea ma vaega o tagata o ē saili, ma maua, le puipuiga e ala i le suafa o le Atua.

11. I ā auala patino ua saunia ai e le faalapotopotoga a Ieova le puipuiga mo i latou o ē ua avea ma sona vaega?

¹¹ E faaopoopo i ai, ua avea le faalapotopotoga vaaia a le Atua o se nuu o ē faatuatua, se faatasiga o le auuso talitonu o ē fefaalaeiauai ma fefaamafanafanaai. (Faataoto 13:20; Roma 1:12) O iina le nofoaga e avatu ai e leoleo mamoe Kerisiano le tausiga mo mamoe, e faalaeiau ai i ē mamaʻi ma ē mafatia, ma saili e toe faafoisia mai i latou o ē ua faavaivai. (Isaia 32:1, 2; 1 Peteru 5:2-4) Ua saunia e “le auauna faamaoni ma le mafaufau . . . mea e ʻai i ona itu aso” e ala mai i le faalapotopotoga. (Mataio 24:45) Ua saunia mai e lena “auauna,” o loo faia aʻe i Kerisiano faauuina, le mea e silisili o mea lelei faaleagaga—o le poto saʻo e faavae aʻe i le Tusi Paia lea e taitaia atu ai i le ola e faavavau. (Ioane 17:3) E faafetaia le taitaiga mai le “auauna,” auā o lea ua maua ai e Kerisiano se fesoasoani e tausisia tapulaa maualuluga tau amio mamā ma latou “atamamai [ai e] pei o gata, a ia fifilemu e pei o lupe” i totonu o se siomaga lamatia o loo siomia ai i latou. (Mataio 10:16) Ma ua latou maua pea fesoasoani ina ia “faamalolosi [ai] i le galuega a le Alii,” lea ua avea foi o se puipuiga malosi.—1 Korinito 15:58.

O Ai ua Fai ma Vaega o le Faalapotopotoga a le Atua?

12. O ai ua mataulia o se vaega o le faalapotopotoga faalelagi a le Atua?

¹² Talu ai o lenei puipuiga e mafai ona maua e i latou o ē o fai ma vaega o le faalapotopotoga a le Atua, o ai la i latou e aofia ai? E tusa ai o le faalapotopotoga faalelagi, e leai se masalomia o le tali i lenei fesili. E lē o toe iai Satani ma ana agelu i le lagi. Peitai, o loo iai pea iina agelu faamaoni i “le faapotopotoga.” A o faagasolo aso e gata ai, na vaaia ai e le aposetolo o Ioane “le Tamai Mamoe,” o kerupi (o “mea ola e fa”), ma “agelu e toatele” o loo tutū latalata atu i le nofoalii o le Atua. O loo iai faatasi ma i latou toeaina e toʻa 24—ua fai ma sui o na Kerisiano faauuina o ē ua uma ona ulu atu i lo latou tofi mamalu faalelagi. (Eperu 12:22, 23; Faaaliga 5:6, 11; 12:7-12) Ua matuā manino mai le avea o i latou uma ma vaega o le faalapotopotoga a le Atua. Peitai, e lē o matuā manino lelei mai tulaga o mea iinei i tagata.

13. Na faapefea ona faaalia mai e Iesu i latou o faia se vaega i le faalapotopotoga a le Atua, ma i latou e lē o faia i ai se vaega?

¹³ Na fetalai Iesu e faatatau i nisi o ē na faapea mai o loo mulimuli ia te ia: “E toatele latou te fai mai ia te au i lea aso, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele? Ona ou taʻutino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.” (Mataio 7:22, 23) Afai e avea se tasi o sē fai amioleaga, e mautinoa la e lē avea o ia ma vaega o le faalapotopotoga a le Atua, e tusa lava po o le ā sona manatu i ai, ma e tusa lava foi po o fea o loo ia agaʻi atu e tapuai ai. Na faaalia foi e Iesu le auala e mataulia ai lē o loo avea ma vaega o le faalapotopotoga a le Atua. Na ia fetalai: “E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o loʻu Tamā o i le lagi.”—Mataio 7:21.

14. O ā vala o le finagalo o le Atua ua mataulia o se matafaioi a i latou o ē o loo fai ma vaega o le faalapotopotoga a le Atua?

¹⁴ O lea, ina ia avea ma se vaega o le faalapotopotoga a le Atua—lea ua avea ai “le malo o le lagi” ma vaega autū—e tatau i se tasi ona ia faia le finagalo o le Atua. O le ā lona finagalo? Na faailoa mai e Paulo se vala matuā tāua o lea mea ina ua ia faapea mai: “O [le] finagalo [o le Atua] ina ia faaolaina o tagata uma lava, ma ia oo ina iloa lelei le upu moni.” (1 Timoteo 2:4) Afai e saili moni se tagata ina ia maua le poto saʻo mai le Tusi Paia, ia faatatauina i lona olaga, ma ia faasalalau atu i “tagata uma lava,” o lona uiga o lena o loo ia faia le finagalo o le Atua. (Mataio 28:19, 20; Roma 10:13-15) O le finagalo foi o le Atua ina ia fafaga ma tausia mamoe a Ieova. (Ioane 21:15-17) Ua faia e sauniga faa-Kerisiano se vaega matuā tāua i lenei itu. O se tagata o loo saʻoloto e auai atu i na sauniga ae o loo ia faatalalē i le faia faapea, o lona uiga ua ia lē talisapaia lona nofoaga i totonu o le faalapotopotoga a le Atua.—Eperu 10:23-25.

Le Fefaauoai ma le Lalolagi

15. O le ā le lapataiga na avatu e Iakopo i faapotopotoga i ona aso?

¹⁵ Pe tusa ma le 30 tausaga talu ona maliu Iesu, na faailoa mai ai e lona ʻafa uso o Iakopo nisi tāfa e mafai ona lamatia ai le nofoaga o se tasi i totonu o le faalapotopotoga a le Atua. Na ia tusi: “O outou tagata mulilulua e, tou te le iloa ea o le fefaauoai ma le lalolagi o le ita lea i le Atua? O lenei, o sē fia uo ma le lalolagi, ua avea o ia ma ita i le Atua.” (Iakopo 4:4) O sē e ita i le Atua e mautinoa lava le leai o sana vaega i lana faalapotopotoga. O le ā la, le fefaauoai ma le lalolagi? Ua faamatalaina faapea e eseese lava auala e faaalia mai ai, e pei o le faia po o le auai faatasi ma ni aumea leaga. E lē gata i lea, sa taulai atu Iakopo i se mea e matuā patino lava—o mafaufauga sese e taitaia ai i le faia o ni amioga lē tatau.

16. O le ā le agaga o le mataupu o le lapataiga a Iakopo faapea o le fefaauoai ma le lalolagi o le ita lea i le Atua?

¹⁶ I le Iakopo 4:1-3, ua tatou faitau ai: “Maifea taua ma misa o ia te outou? E le o lenei ea, mai o outou manao leaga o loo tau i o outou tino uma? Ua outou tuʻinanau, a e lei maua; o lea ua outou fasioti. Ua outou losilosi, a e tou te le mafai ona maua; o lea foi ua outou femisai ma fai taua. E lei maua e outou, aua ua outou le ole atu. Ua outou ole atu, a e lei maua, auā ua ole atu ma le faaletatau, ina ia faauma ai ia mea i o outou manao leaga.” O le maeʻa ona tusia o nei upu, na lapataia ai loa e Iakopo le fefaauoai ma le lalolagi.

17. I le ā le itu na iai ai “taua” ma “misa” i le faapotopotoga Kerisiano i le uluai senituri?

¹⁷ I le tele o senituri talu ona maliu Iakopo, na fetauai moni ai lava Kerisiano pepelo ma fefasiotiai. Peitai, sa tusi atu Iakopo i tagata o “le Isaraelu [a] le Atua” i le uluai senituri, o ē o le a avea ma ‘ositaulaga ma tupu’ i le lagi. (Faaaliga 20:6) Sa latou lei fefasiotiai i ni taua moni. Aisea la na taʻua ai e Iakopo na mea i Kerisiano? Manatua, na taʻua e le aposetolo o Ioane so o se tasi e ita i lona uso o le fasioti tagata. Na tautala foi Paulo e faatatau i feteenaiga o uiga totino ma feitagaiga i totonu o faapotopotoga faapea o ni “fefinauaiga” ma ni “femisaaiga.” (Tito 3:9; 2 Timoteo 2:14; 1 Ioane 3:15-17) E tusa ai o lenei lava manatu, e foliga mai sa mafaufau Iakopo i le leai o se alofa mo uso Kerisiano. I totonu o lo latou lava va, sa gaoioi ai Kerisiano i se uiga o loo atagia mai ai le auala ua masani ona feutagai ai tagata o le lalolagi.

18. O le ā e ono taitaia atu ai i ni gaoioiga ma ni lagona lē alofa i le va o Kerisiano?

¹⁸ Aisea na tutupu ai na mea i faapotopotoga Kerisiano? Ona o uiga sese, e pei o le losilosi ma le “manao leaga.” O le faamaualuga, le loto leaga, ma le fiasili, e mafai foi ona lepetia ai se feoeoeaiga alofa o Kerisiano i totonu o se faapotopotoga. (Iakopo 3:6, 14) O uiga faapena e avea ai se tasi ma uo a le lalolagi, ma i lea, o sē e ita i le Atua. E leai se tasi o lē na te teulotoina ni uiga e pei o na uiga, e mafai ona ia faatalitalia lona avea pea ma vaega o le faalapotopotoga a le Atua.

19. (a) O ai e muai tuuaʻia pe a iloa e se Kerisiano ua tutupu aʻe mafaufauga sese i lona loto? (e) E mafai faapefea e se Kerisiano ona manumalo i mafaufauga sese?

¹⁹ O ai e mafai ona tatou tuuaʻia pe a tatou iloa ua tutupu aʻe mafaufauga sese i o tatou loto? Po o Satani ea? I se isi itu, e saʻo. O ia o “le taʻitaʻi o le au faipule i le va nimonimo” o lenei lalolagi, lea ua salalau atu i ai na uiga. (Efeso 2:1, 2; Tito 2:12) Peitai, e masani lava, o le pogai o mafaufauga sese e paʻū tonu lava i o tatou tino lē lelei atoatoa. Ina ua uma ona lapatai mai Iakopo e faatatau i le fefaauoai ma le lalolagi, ona ia tusi lea: “Fa te outou ea ua fai mai fua le Tusi, O le loto o loo nofo i totonu ia te outou ua naunau ia i le mataua?” (Iakopo 4:5) O i tatou uma lava na fananau mai ma se faanaunauga e faia le mea sese. (Kenese 8:21; Roma 7:18-20) Peitai, e mafai ona tatou tau e tetee atu i lena faanaunauga, pe a iloaina o tatou vaivaiga ma faalagolago atu i le fesoasoani a Ieova ina ia foia ai. Ua faapea mai Iakopo: “Ua foai mai e [le Atua] le alofa tunoa e sili [na i lo o tatou faanaunauga i le matauʻa na fananau mai ma i tatou].” (Iakopo 4:6) E faafetaia le fesoasoani a le agaga paia o le Atua ma le lagolagosua a uso Kerisiano faamaoni, ma e ala foi i le aogā o le taulaga togiola a Iesu, ua lē mafai ai ona faatoilaloina Kerisiano faamaoni e vaivaiga o o latou tino. (Roma 7:24, 25) Ua saogalemu i latou i totonu o le faalapotopotoga a le Atua, o ni uo a le Atua, ae lē o ni uo a le lalolagi.

20. O ā faamanuiaga e tele ua olioli ai i latou o loo avea ma vaega o le faalapotopotoga a le Atua?

²⁰ Ua folafola mai e le Tusi Paia e faapea: “E aumaia e Ieova le malosi i lona nuu; e faamanuia e Ieova lona nuu i le filemu.” (Salamo 29:11) Pe afai o i tatou o se vaega moni o le “nuu” faaonaponei a Ieova, o lana faalapotopotoga vaaia, o le a tatou tofusia ai la i le malosi ua ia foaiina mai ma tatou olioli i le filemu lea na te faamanuiaina ai ona tagata. O le mea moni lava, e telē mamao atu le lalolagi a Satani na i lo le faalapotopotoga vaaia a Ieova, ma e sili mamao atu ona malosi Satani na i lo i tatou. Ae peitai o Ieova, o ia Lē Ona le Malosi Uma Lava. E lē mafaatoilaloina lona mana galue. O loo aufaatasi mai foi ia i tatou ana agelu malolosi i le auauna atu i le Atua. O lea la, e ui lava ina tatou fesagai ma feitagaiga, ae mafai ona tatou tūtūmau mausalī. I le pei o Iesu, e mafai ona tatou manumalo mai ai i le lalolagi.—Ioane 16:33; 1 Ioane 4:4.

E Mafai Ona E Faamatala?

◻ O le ā le faalapotopotoga vaaia a le Atua?

◻ I ā auala ua saunia mai ai e le faalapotopotoga a le Atua le puipuiga?

◻ O ai ua avea ma vaega o le faalapotopotoga a le Atua?

◻ E mafai faapefea ona tatou alofia le fefaauoai ma le lalolagi?

[Pusa i le itulau 9]

O le ā le Faalapotopotoga a le Atua?

I lomiga a Molimau a Ieova, o loo faaaogā ai le faaupuga “faalapotopotoga a le Atua” i ni auala se tolu.

1 O le faalapotopotoga faalelagi, e lē vaaia a Ieova, o loo faia aʻe i foafoaga agaga faamaoni. Ua taʻua lena o le “Ierusalema i lugā” i le Tusi Paia.—Kalatia 4:26.

2 O le faalapotopotoga vaaia a Ieova, o loo faia aʻe i tagata. I aso nei, o loo faia aʻe lea i le vaega totoe faauuina ma ua faatasi atu i ai ma le motu o tagata e toatele.

3 O le faalapotopotoga aoao a Ieova. I aso nei, o loo faia aʻe i le faalapotopotoga faalelagi a Ieova faatasi ma lana au faauuina, o ataliifai o loo iai pea i le lalolagi, o ē ua iai le faamoemoe faaleagaga. I se taimi, o le a aofia atu i ai ma tagata lelei atoatoa o ē ola i le lalolagi.

[Ata i le itulau 10]

O meaʻai faaleagaga e sili ona lelei ua saunia e ala mai i le faalapotopotoga a Ieova