O “E Anaana i le Upu” ma le Olioli
“Ia talia ma le faamaulalo le upu ua totōina, o lea e mafai ai ona faaolaina o outou agaga. A ia fai outou ma e anaana i le upu, a e aua le na ona faalogologo i ai.”—IAKOPO 1:21, 22.
1. E ao faapefea ona tatou manatu i la tatou mau o le tausaga mo le 1996?
“IA FAI OUTOU MA E ANAANA I LE UPU.” O lenei fuaitau faigofie o loo momoli atu ai se feau malosi. Ua siiina mai i “Le Tusi a Iakopo” i le Tusi Paia, ma o le a faaalia i totonu o Maota o le Malo e avea ma mau o le tausaga a Molimau a Ieova a o faagasolo le 1996.
2, 3. Aisea na talafeagai ai ona tatau ia Iakopo le tusia o le tusi lea e taʻua ai lona igoa?
2 O Iakopo, le ʻafa uso o le Alii o Iesu, sa iloga o ia i le faapotopotoga a uluai Kerisiano. I se tasi taimi ina ua mavae le toetu o Iesu, na faailoa totino atu ai lava lo tatou Alii ia Iakopo ona faailoa atu ai lea i le au aposetolo uma. (1 Korinito 15:7) Mulimuli ane, ina ua tatala faavavega le aposetolo o Peteru mai le falepuipui, na ia taʻu atu ai i se vaega o ni Kerisiano sa faapotopoto: “Ia outou tala atu ia mea ia Iakopo ma le au uso.” (Galuega 12:17) E foliga mai e ui lava e lē o se aposetolo Iakopo, ae o ia sa taʻimua i le fono a le vaega pule i Ierusalema i le taimi lea na ia filifili ai le au aposetolo ma toeaina ina ia lē toe manaomia ona peritomeina tagata o Nuuese ua liulotu. O Iakopo sa ia tāaofaia atoa le mataupu, ma auina atu loa i faapotopotoga uma le faaiuga lea sa faamausalīina e ala i le agaga paia.—Galuega 15:1-29.
3 E manino mai, o manatu taʻumatuaina o Iakopo sa tele sona aogā. Peitai sa ia taʻutino atu ma le faamaulalo o ia ua na o se “auauna a le Atua ma le Alii o Iesu Keriso.” (Iakopo 1:1) O lana tusi faagaeeina o loo iai le oa o fautuaga aogā ma faalaeiauga mo Kerisiano i aso nei. Na faamaeʻaina i le tusa ma le fa tausaga a o lei faia le uluai osofaiga a autau a Roma i le aai o Ierusalema i lalo o le taʻitaʻiga a le Taʻitaʻiau o Cestius Gallus, ina ua uma ona oo atu i le lautele le talaʻiina o le tala lelei “i tagata uma lava i le lalolagi.” (Kolose 1:23) Sa avea o ni taimi faigata, ma sa iloa lelei foi e auauna a Ieova ua lē o toe umi ae faaoo ane Lana sala faafaamasinoga i le nuu o Iutaia.
4. O le ā e faamaonia ai sa tele se faatuatuaina e uluai Kerisiano o le Afioga a le Atua?
4 O le taimi lena ua uma ona mauaina e na Kerisiano Tusitusiga uma faa-Eperu ma le tele lava o Tusitusiga faa-Eleni. E pei ona faaalia mai i a latou faasinoga e tele i uluai tusitusiga, e manino mai ai sa tele se faatuatuaina o le Afioga a le Atua, e tusitala o le Tusi Paia faa-Kerisiano. E pei lava foi i aso nei, tatou te manaomia ai ona suesueina ma le naunautai le Afioga a le Atua ma faatatauina i o tatou olaga. Ina ia mafai ona tatou tutumau, tatou te manaomia ai le malosi faaleagaga ma faalaeiauga ua saunia e le Tusi Paia.—Salamo 119:97; 1 Timoteo 4:13.
5. Aisea tatou te manaomia ai ni taʻiala faapitoa i aso nei, ma o fea o le a tatou maua i ai?
5 I aso nei, ua tutū ai tagata i se tulaga ua matuā lalata atu lava i le “puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.” (Mataio 24:21) O lo tatou faasaoina e faalagolago i le iai o se taʻiala mai le Atua. E mafai faapefea ona tatou maua lenei taʻiala? E ala i le gauai atu o o tatou loto i aʻoaʻoga a le Afioga a le Atua ua faagaeeina e lona agaga. O lenei mea o le a taʻitaʻia atu ai i tatou e ʻfai ma ē anaana i le upu,’ e pei o auauna faamaoni a Ieova i taimi anamua. E tatau ona tatou faitau ma suesueina ma le naunautai le Afioga a le Atua ma faaaogā mo le viiga o Ieova.—2 Timoteo 2:15; 3:16, 17.
Tutumau ma le Olioli
6. Aisea e ao ai ona tatou olioli a o fetaiaʻi ma tofotofoga?
6 I le amataga o lana tusi, ua taʻua ai e Iakopo le olioli, o le fua lona lua lea o le agaga o le Atua. Ua ia tusi mai: “Oʻu uso e, ia outou manatu, o le mea e fiafia [“olioli,” NW] tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai. Ia atoatoa foi le galuega a le onosai, ina ia atoatoa ai ma ia sao ona lelei ai outou, ia leai se mea e tasi e mativa ai.” (Iakopo 1:2-4; Kalatia 5:22, 23) E mafai faapefea ona faapea atu o se mea e “olioli tele ai” le fetaiaʻi ma tofotofoga e tele? Auā e oo lava foi ia Iesu na fetalai o ia i lana Lauga i luga o le Mauga: “Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o aʻu. Ia outou olioli ma fiafia lava; auā o i le lagi lo outou taui e tele.” (Mataio 5:11, 12) Ua iai le faamalieina ma le olioli i le vaai atu o loo faamanuia mai e Ieova a tatou taumafaiga a o tatou faamalolosi atu pea i le sini o le ola e faavavau.—Ioane 17:3; 2 Timoteo 4:7, 8; Eperu 11:8-10, 26, 35.
7. (a) E mafai faapefea ona tatou maua se fesoasoani e tutumau ai? (e) I le pei o Iopu, e mafai faapefea ona tauia i tatou?
7 E oo lava foi ia Iesu sa tumau o ia “ona o le olioli sa tuu i ona luma.” (Eperu 12:1, 2) O le tulimataʻia o le faaaoaoga lototele a Iesu, e mafai ai foi ona tatou tutumau! E pei ona taʻua e Iakopo i le tau faaiuiuga lava o lana tusi, e matuā tauia e Ieova ē tausia le faamaoni. Ua faapea mai Iakopo: “Faauta, ua tatou taʻuamuia i e onosai. Ua outou faalogologo i le onosai o Iopu, ua outou iloa foi le iuga i la le Alii [Ieova], ina ua mutimuti vale tele le Alii [Ieova] ma le alofa naunau.” (Iakopo 5:11) Seʻi toe manatu i le auala na tauia ai le faamaoni o Iopu, ina ua toe faafoisia lona soifua mālōlōina, ma olioli ai i se olaga atoatoa ma le fiafia faatasi ma ē pele ia te ia. O le tumau i le faamaoni e mafai ona aumaia ai ia te oe lea lava fiafia i le Parataiso na folafolaina mai o le lalolagi fou a le Atua, e avea ma tumutumuga i le olioli o le auauna atu ia Ieova i le taimi lava lenei.
Le Sailia o le Atamai
8. E mafai faapefea ona tatou maua le atamai e moni ma e aogā, ma o le ā le aogā o le tatalo i lenei itu?
8 O a tatou suesuega maeʻaeʻa i le Afioga a le Atua, faatasi ai ma ona faatatauga aogā, o le a iu ai i le atamai faale-Atua, lea e mafai ona tatou onosaia ai tofotofoga e ui o loo lotolotoi i le tulaga leaga o le faiga o mea a Satani lea ua faasolo ina mou atu. E mafai faapefea ona tatou faamautinoa le mauaina o lena atamai? Ua taʻu mai e Iakopo ia i tatou: “A e afai ua leai se poto i so outou, ina ole atu ia i le Atua, o lē foai tele mai i tagata uma ma le le toe taʻutaʻua; ona foaiina mai ai lea ia te ia. A ia ole atu ma le faatuatua, aua lava neʻi masalosalo; auā o lē masalosalo e tusa ia ma le peau o le sami ua sousou i le matagi ma felafolafoaiina.” (Iakopo 1:5, 6) E tatau ona tatou tatalo naunautai, ma le mautinoa atoatoa o le a faafofogaina e Ieova a tatou faatoga ma o le a ia taliina mai i lana lava taimi tatau ma i lana lava auala.
9. Ua faamatalaina faapefea e Iakopo le atamai faale-Atua ma lona faatatauga?
9 O le atamai faale-Atua o se meaalofa mai ia Ieova. I le faamatalaina o na meaalofa, ua faapea mai ai Iakopo: “O mea lelei uma e foaifuaina mai, atoa ma mea alofa uma e atoatoa ona lelei, mai lugā lava ia, e alu ifo mai le Tamā o malamalama, e le o ia te ia se mea faaletumau, po o sina liliu itiiti.” A o faagasolo pea lana tusi, ua faamatala ai e Iakopo le iuga o le mauaina o le atamai moni ina ua ia faapea mai: “O ai ea so outou ua poto ma ua malamalama? Ina faaali mai ia e ia ai le amio lelei o ana lava galuega, i le agamalu o i ai le poto. . . . O le poto mai lugā e muamua ona mamā, i le ua filemu, e agamalu, e ganagofie, e tumu i le alofa ma fua lelei, e le alofa faapito, e le faatagā fai.”—Iakopo 1:17; 3:13-17.
10. Ua faaeseeseina faapefea le lotu sese mai le lotu moni?
10 I le emepaea o lotu sese a le lalolagi, pe i Kerisinetoma pe i isi atunuu, e masani ai lava ona avea ma tū masani a tagata lotu le pese o ni peselotu, faalogologo atu i tatalo ua aʻo faatauloto, pe faalogologo foi i se lauga. E leai ni faalaeiauga e avatu i le folafolaina o le feau o le faamoemoe, auā o le tele lava o lotu e leai ni o latou faamoemoe pupula mo le lumanai. O le faamoemoe mamalu o le Malo faa-Mesia o le Atua, atonu pe e lei taʻua lava po o le matuā lē malamalama foi i ai. Ua fetalai faavaloaga mai Ieova e uiga i ē o loo auai atu ia Kerisinetoma: “Auā e lua mea leaga ua faia e loʻu nuu; ua latou tuua aʻu le puna o le vai ola, a ua latou eli mo i latou o vaieli, o vaieli māvaevae e le tali ai ni vai.” (Ieremia 2:13) Latou te lē o mauaina vai o le upu moni. Ua lē o iai se atamai faalelagi.
11, 12. (a) E ao faapefea ona uunaia i tatou e le atamai mai le Atua? (e) E faatatau i le ā ua lapataia ai i tatou e le atamai mai le Atua?
11 Maeu se ese mai ai o Molimau a Ieova i aso nei! Ona o le malosi uigaese ua foaiina mai e le Atua, ua latou lolofi atu ai i le lalolagi e avatu le tala lelei e uiga i Lona Malo o loo fotuai mai. O le atamai o loo latou tautalagia ua faavae mausalī aʻe i le Afioga a le Atua. (Faatusatusa i le Faataoto 1:20; Isaia 40:29- 31.) Ua latou matuā faaaogā tatau lava le poto moni ma latou malamalama i le folafolaina atu o fuafuaga sili a lo tatou Atua ma o Lē na Foafoaina i tatou. E ao ona tatou faanaunau ina ia mafai e tagata uma o loo i le faapotopotoga ona “atoatoa ona [latou] iloa lelei o lona finagalo [le finagalo o le Atua] i le poto [“atamai,”NW] uma atoa ma le mafaufau faaleagaga.” (Kolose 1:9) O le iai o lenei faavae, o le a uunaia uma ai ē talavou ma ē matutua ina ia avea pea i latou ma “e anaana i le upu.”
12 “O le poto [“atamai,”NW] mai lugā” e lapataia ai i tatou e uiga i agasala e ono iu i le lē mauaina ai o le finagalo malie o le Atua. Ua faapea mai Iakopo: “O lenei, oʻu uso pele e, ia taitasi le tagata ma faataalise ona faalogologo, ia faagesegese ona tautala atu, ia faagesegese ona ita. Auā e le tupu le amiotonu mai le Atua i le ita o tagata.” Ioe, e tatau ona faavave, ma naunautai, ona tatou faalogo atu i fautuaga mai le Atua, ma ia faatatauina. Peitai, e tatau ona leoleomalu i tatou mai le faaaogaseseina o lea “mea itiiti,” o le laulaufaiva. O le gugutu, le faitala lē tatau, po o le tautala fiasili, e mafai ai e le laulaufaiva ona faatupuina aʻe faafaatusa se afi i se ʻvaomatua tele.’ Tatou te manaomia ai la ona atiina aʻe le uiga fiafia ma le pulea o le loto i a tatou auaufaatasiga uma.—Iakopo 1:19, 20; 3:5.
13. Aisea ua tāua ai lo tatou talia o “le upu ua totōina”?
13 Ua tusi mai Iakopo: “O lea foi ia lafoai ai mea eleelea uma ma le leaga e silisili, ia talia ma le faamaulalo le upu ua totōina, o lea e mafai ai ona faaolaina o outou agaga.” (Iakopo 1:21) Ua toetoe nei ina mavae atu lenei lalolagi matapeʻapeʻa, ma ana faiga faalialiavale, le manao tele i meafaitino, le uiga fia matamuamua ma ona tulaga tau amio ua matuā matagā lava. “A o lē fai le finagalo o le Atua, e tumau lea e faavavau.” (1 Ioane 2:15-17) Maeu la le tāua, o lo tatou taliaina o “le upu ua totōina”! O le atamai ua saunia mai i le Afioga a le Atua ua matuā manino mai lona eseesega ma tulaga leaga o lenei lalolagi ua faasolo ina mou atu. Tatou te lē mananao i na tulaga leaga. (1 Peteru 2:1, 2) Tatou te fia maua le alofa o le upu moni ma le faatuatua malosi ua totōina i o tatou loto, ina ia tatou maumauai ai e aua lava neʻi o tatou see ese mai ala amiotonu o Ieova. Ae pe ua lava ea le faalogologo atu i le Afioga a le Atua?
Ia Avea ma “E Anaana i le Upu”
14. E mafai faapefea ona avea i tatou o ni ē “faalogologo” ma o ni ē foi e “anaana” i le Upu?
14 I le Iakopo 1:22, ua tatou faitau ai e faapea: “A ia fai outou ma e anaana i le upu, a e aua le na ona faalogologo i ai, o faaseseina ai outou e outou.” “Ia fai outou ma e anaana i le upu”! E mautinoa le faamatilatila mai o lenei matua i le tusi a Iakopo. E tatau ona tatou faalogo atu, ona “faapea lava” lea ona fai! (Kenese 6:22) E toatele tagata i aso nei e manatu faapea ua lava le tau ina faalogo atu i se lauga po o le faia mai lea taimi i lea taimi o se vaega i ni tapuaiga tau ina fai, ona lava ai lea iina. Atonu latou te manatu, o le mea tāua pe afai o loo latou ola i se ʻolaga lelei’ e ogatusa ma a latou tuutuuga, ua lava ai lena. Peitai na taʻua e Iesu Keriso: “Ai se tasi e fia mulimuli mai ia te au, ia faafiti o ia ia te ia, ma ave lona satauro, i le mulimuli mai ia te au.” (Mataio 16:24) O gaoioiga faataulagaina totino ma le tutumau i le usitaia o le faaaoaoga a Iesu o le faia o le finagalo o le Atua ua matuā manino le manaomia mai Kerisiano moni. O le finagalo o le Atua mo i latou i aso nei, e tutusa lava ma lea sa iai i le uluai senituri ina ua tuuina atu e Iesu lea na toe faatūina aʻe le poloaiga e faapea: “O lenei, ia outou o atu e fai nuu uma lava ma soo.” (Mataio 28:19) O faapeī mai oe i lenei itu?
15. (a) O le ā le faataʻitaʻiga ua aumaia e Iakopo, e faaalia ai le auala e mafai ona ʻfai ai i tatou ma ē anaana i le upu’ ma le fiafia? (e) Aisea ua lē lava ai le na ona iai o se tapuaiga?
15 Pe afai tatou te vaavaai atu pea i le Afioga a le Atua, e mafai ona pei o se faʻata i lona toe faaali maia ia i tatou le ituaiga moni o tagata o loo tatou iai. Ua faapea mai Iakopo: “O lē matuā matamata i le tulafono o le saʻolotoga ua atoatoa ona lelei, ma ua tumau i ai o ia, e le se faalogologo ma le faagalogalo lena tagata, a o le anaana i le galuega, e manuia [“fiafia,” NW] o ia i lona lava anaana.” (Iakopo 1:23-25) Ioe, o le a avea o ia ma ʻsē anaana i le upu’ ma le fiafia. E tāua foi le avea ma ʻsē anaana’ i vala uma o lo tatou olaga faa-Kerisiano. E lē tatau lava ona faaseseina i tatou i le mafaufau faapea ua lava le tau ina faia o sina tapuaiga. Ua fautuaina i tatou e Iakopo ina ia usitaia nisi vala o le tapuaiga moni na e oo lava i ni Kerisiano maelega, ua latou lafoaia. Ua ia tusi mai: “O lenei lava le toaga i lotu e lelei ma le faamaoni i luma o le Atua o le Tamā lea, ina ia tauasiasi atu i e mātua oti ma fafine ua oti a latou tane i o latou tiga, ia leoleo foi o ia ia te ia, ina neʻi pisia mai o ia i le lalolagi.”—Iakopo 1:27.
16. O ā itu na avea ai Aperaamo ma ʻuo a Ieova,’ ma e faapefea ona tatou maua le faauooga a Ieova?
16 E lē lava le tau ina faapea mai, ʻOu te talitonu i le Atua,’ ona gata ai lea iina. E pei ona mātauina i le Iakopo 2:19: “Ua e talitonu e toatasi lava le Atua; ua lelei lava lea; ua talitonu foi temoni—ma latou tetemu.” Ua faamamafa mai e Iakopo e faapea, o le “faatuatua, pe afai e le i ai galuega, e mate lava ia ina ua na o ia,” ona ia faasino atu lea ia Aperaamo, i le faapea mai: “Na galulue faatasi le faatuatua ma ana galuega, o galuega foi ua atoatoa ai le faatuatua.” (Iakopo 2:17, 20-22) O galuega a Aperaamo sa aofia ai le sauniunia o mea e tausi ai lona auaiga, le faaalia o le agaga talimālō, le sauni e faataulagaina Isaako, ma le ʻfaailoa atu i le lautele’ o lona faatuatua lē maluelue i le folafolaga a le Atua e uiga i “se aai ua faavaeina,” o le Malo faa-Mesia lea i le lumanai. (Kenese 14:16; 18:1-5; 22:1-18; Eperu 11:8-10, 13, 14; 13:2) Ua talafeagai ai le “taʻua . . . o [Aperaamo] o le uo a le Atua [Ieova].” (Iakopo 2:23) E mafai foi ona taʻua i tatou o ʻuo a Ieova’ a o tatou faailoa atu ma le maelega lo tatou faatuatua ma le faamoemoe i lona Malo o le amiotonu o loo fotuaʻi mai.
17. (a) Aisea na “taʻuamiotonuina” ai Raava, ma na tauia faapefea o ia? (e) O le ā le lisi umi ua saunia e le Tusi Paia o i latou na ʻfai ma ē anaana i le upu’? (i) Na faapefea ona tauia Iopu, ma aisea?
17 O i latou ua ʻfai ma ē anaana i le upu’ ua matuā “taʻuamiotonuina . . . i galuega, a e le na o le faatuatua.” (Iakopo 2:24) O Raava o se tasi na ia faaopoopo atu ana galuega i lona faatuatua i le “upu” lea na ia faalogo i ai e faatatau i vavega a Ieova. Na ia faalafiina sipai Isaraelu ma fesoasoani e faasosola ese i laua, ona ia aoaoina mai lea o lona auaiga mo lo latou faasaoina. Maeu sona olioli i le taimi o le a toetu aʻe ai, i le iloa ane, o lona faatuatua, lea na faamalosia e ana galuega, na oo ai ina avea o ia ma tupuaga o le Mesia! (Iosua 2:11; 6:25; Mataio 1:5) Ua saunia e le mataupu e 11 o le Eperu se lisi umi o isi o ē na ʻfai ma ē anaana’ i le faatinoina o lo latou faatuatua, ma o le a matuā tauia i latou. Aua foi neʻi o tatou faagaloina Iopu, o lē na faapea mai a o iai i tofotofoga matuitui: “Ia faamanuina [“pea,” NW] le suafa o Ieova.” E pei ona ua tatou mātauina, o lona faatuatua ma ana galuega na iu ai i se taui sili. (Iopu 1:21; 31:6; 42:10; Iakopo 5:11) Ua faapena foi i lo tatou tumau i aso nei i le ʻfai ma ē anaana i le upu,’ o le a tatou mauaina ai le finagalo malie o Ieova.
18, 19. Ua faapefea i uso ua leva o fesagai ma omiga, ona ʻfai ma ē anaana i le upu,’ ma o ā faamanuiaga ua aumaia ai e a latou gaoioiga?
18 O isi o ē na tutumau mo le tele o tausaga, o o tatou uso o loo i Europa i Sasae. I le taimi nei ona o lea ua aveesea le tele o faasasaāga, ua avea moni ai i latou nei ma “e anaana i le upu” i se tulaga fou ua latou iai. O misionare ma paeonia mai atunuu tuaoi, ua latou ō ane ina ia fesoasoani i le galuega o le aʻoaʻo atu ma le faamaopoopoina. Ua auina ane e le lālā a Finilani ma isi lālā e lalata ane i ai o le Sosaiete o le Olo Matamata, ni tagata atamamai faapitoa i galuega faafaugafale, ma o le limafoai o uso i le lalolagi aoao ua faatupeina ai le fausiaina o ni ofisa fou o lālā ma Maota o le Malo.—Faatusatusa i le 2 Korinito 8:14, 15.
19 Maeu se tali mai ma le maelega i le auaunaga i le fanua, a na uso ua leva ona fesagai ma omiga! O loo latou ʻgalulue mamafa ma naunautai’ e fia maua uma mai avanoa, na sa latou lei mauaina a o iai i le ʻvaitau sa lei taugalemu ai.’ (1 Timoteo 4:10; 2 Timoteo 4:2) Mo se faaaoaoga, i le masina o Aperila na seʻi mavae atu nei i Albania, i le mea sa matuā tetele ai faasasaāga, sa tufatufa atu ai le uta atoa o Tala o le Malo lea ua faaulutalaina “Aisea ua Tumu ai le Olaga i Faafitauli?” i le na o le tolu lava aso. O se sosooga sili ona mataina atu i le Faamanatuga o le maliu o Iesu, lea na auai tagata e 3,491—na sili atu ona toatele nai lo le latou autalaʻi e 538.
20. O le ā ua faamaonia mai e aofia sa auai i Faamanatuga talu ai nei, ma e mafai faapefea ona fesoasoani atu i tagata e toatele?
20 Sa faia foi e isi atunuu se sao mataina i aofia na iai i Faamanatuga, lea na faatuputupulaia aʻe i tausaga talu ai i le silia ma le 10,000,000. I le tele o nofoaga, o ē fou sa faamalosia lo latou faatuatua i le auai atu ma mātauina le Faamanatuga, ua ʻfai ma ē anaana i le upu.’ Pe mafai ea ona tatou faalaeiauina atili ē fou ua auaufaatasi mai ina ia agavaa mo lena faaeaga?
21. Ina ia ogatusa ma la tatou mau o le tausaga, o le ā le laasaga e ao ona tatou tuliloaina, faatasi ai ma le ā le sini?
21 I le pei o na Kerisiano maelega i le uluai senituri, ma le toatele o isi na iai i vaitaimi na sosoo mai ai, seʻi o tatou faapena foi ona tatou faamalolosi e “tausisi atu i le faailoga [“sini,” NW]” o le ola e faavavau, pe o le a maua lena i le Malo faalelagi po o lona nofoaga faalelalolagi. (Filipi 3:12-14) E tauia ai a tatou taumafaiga uma mo le mauaina o lena sini. E lē o se taimi lenei e paʻū atu ai i le avea o ni ē e na ona faalogologo, ae o le taimi silisili lenei e ʻfaamalolosi ai ma galulue.’ (Hakai 2:4; Eperu 6:11, 12) I le ʻtaliaina o le upu ua totōina,’ tau ina ia ʻfai i tatou ma ē anaana i le upu ma le olioli’ i le taimi nei ma i le faasolo atu lava i le faavavau.
O le a Faapefea ona E Tali?
◻ E mafai faapefea ona tatou tutumau ma le olioli?
◻ O le ā “le poto mai lugā,” ma e mafai faapefea ona tatou tuliloaina?
◻ Aisea e tatau ai ona ʻfai i tatou ma ē anaana i le upu, ae lē na o ni ē faalogologo i ai’?
◻ O ā lipoti e ao ona uunaia ai i tatou ina ia ʻfai i tatou ma ē anaana i le upu’?
[Ata i le itulau 17]
Tau ina ia tatou faaavanoa atu foi o tatou loto mo aʻoaʻoga mai le Atua
[Ata i le itulau 18]
Na tauia le faamaoni o Iopu ina ua ia toe maua se olaga atoatoa ma le fiafia faatasi ma ē pele ia te ia