O le Faatuatua Tatou te Onosai ai ma Tatalo
“Ia onosai foi outou, ia faatumauina o outou loto, auā ua latalata le afio mai o le Alii.”—IAKOPO 5:8.
1. Aisea e tatau ai ona tatou toe tomānatu i le Iakopo 5:7, 8?
O LE “faatasi mai” o Iesu Keriso lea ua leva ona tatali, ua avea nei o se mea moni. (Mataio 24:3-14, NW) Ua sili atu nai lo o se isi lava taimi muamua atu, o i latou uma o ē faapea mai o loo faatuatua i le Atua ma Keriso, ua ia i latou se mafuaaga e toe tomānatu ai i upu nei a le soo o Iakopo: “Le au uso e, onosai ia seia oo i le afio mai o le Alii. Faauta, e faatali lē galue fanua i le fua aoga o le eleele, e faatalitali i ai, seia maua le uaga muamua ma lē mulimuli. Ia onosai foi outou, ia faatumauina o outou loto, auā ua latalata le afio mai o le Alii.”—Iakopo 5:7, 8.
2. O ā nisi o faafitauli sa fesagai ma i latou o ē na tusi atu i ai Iakopo?
2 O i latou o ē na tusi atu i ai e Iakopo lana tusi faagaeeina, sa manaomia ona latou faaalia le onosai ma foia le tele o faafitauli. E toatele sa tetee atu i mea na faatalitalia mai ia i latou o loo faapea mai e faatuatua i le Atua. Mo se faataitaiga, sa iai se mea na manaomia ona fai i nisi o faanaunauga na mapuna aʻe i loto. Sa manaomia ona toe faafoisia le uiga toafimalie ia i latou o uluai Kerisiano. Sa latou manaomia foi fautuaga ina ia onosai ma tausisi i le tatalo. A o tatou talanoaina mea na taʻu atu e Iakopo ia i latou, seʻi o tatou tilofaia pe mafai faapefea ona tatou faatatauina ana upu i o tatou olaga.
O Faanaunauga Sese e Malaia Ai
3. O ā pogai o fevesiaiga i le faapotopotoga, ma o le ā e mafai ona tatou aʻoaʻoina mai lenei mea?
3 Sa leai se filemu i nisi o ē na faapea mai o Kerisiano, ma sa avea faanaunauga sese o le aa o lenei faafitauli. (Iakopo 4:1-3) O le fefinauai sa faapogaia ai vevesiga, ma sa iai nisi na latou faamasinoina ma le lē alofa o latou uso. Sa tupu lenei mea talu ai tuinanauga mo le faamalieina o le tino na oo ai ina feteenai i latou. O i tatou foi la, e manaomia ona tatou tatalo atu mo se fesoasoani ina ia tetee atu i tuinanauga faaletino mo le fia lauiloa, le fia pule, ma le fia maua o mea e tele, ina ia tatou lē faia ai se mea e faagaepuina ai le filemu o le faapotopotoga. (Roma 7:21-25; 1 Peteru 2:11) I nisi o Kerisiano i le uluai senituri, sa tuputupu aʻe ai le uiga losilosivale ua oo atu ai i le uiga o le feainai ma le fia fasioti tagata. Talu ai sa lē faamalieina e le Atua o latou faanaunauga sese, ona latou taumafai ai lava lea e ausia o latou lava sini. Pe afai o loo ia i tatou foi na lava faanaunauga sese, atonu tatou te ole atu ae o le a lē maua, auā e lē tali mai lo tatou Atua paia i ni tatalo faapena.—Auega 3:44; 3 Ioane 9, 10.
4. Aisea ua taʻua ai e Iakopo nisi Kerisiano o “tagata mulilulua,” ma e ao faapefea ona aafia ai i tatou i lenei faaupuga?
4 O uiga faalelalolagi, le matauʻa, le faamaualuga, sa iai lava i nisi o uluai Kerisiano. (Iakopo 4:4-6) O loo taʻua e Iakopo nisi o i latou na o “tagata mulilulua” talu ai sa latou faauo atu i le lalolagi ma latou agasala ai i le mulilua faaleagaga. (Esekielu 16:15-19, 25-45) E mautinoa lava, tatou te lē mananao e faalelalolagi a tatou amioga, faamatalaga, ma gaoioiga, auā o iina e avea ai i tatou ma fili o le Atua. Ua faaali mai e lana Afioga ia i tatou e faapea o ‘le māfuli atu i le uiga o le matauʻa’ o se vaega o faanaunauga leaga, po o le “agaga,” o loo i tagata agasala. (Kenese 8:21; Numera 16:1-3; Salamo 106:16, 17; Failauga 4:4) Afai la tatou te iloa e manaomia ona tatou teena le matauʻa, faamaualuga, po o nisi lava faanaunauga leaga, seʻi o tatou saili atu i le fesoasoani a le Atua e ala i le agaga paia. O lena malosi, e maua mai i le alofa fua o le Atua, e sili atu lena nai lo o ‘le māfuli atu i le uiga o le matauʻa.’ Ma a o tetee atu Ieova i lē faamaualuga, ae o le a ia foai mai ia i tatou lona alofa fua pe afai tatou te tetee atu i faanaunauga agasala.
5. Ina ia olioli i le alofa fua o le Atua, o ā mea e manaomia ona tatou ausia?
5 E mafai faapefea ona tatou maua le alofa fua o le Atua? (Iakopo 4:7-10) Ina ia olioli i le alofa fua mai ia Ieova, e ao ona tatou usiusitai ia te ia, talia ana sauniuniga, ma gauai atu i so o se mea lava ua ia faafinagaloina. (Roma 8:28) E ao foi ona tatou “tetee,” pe ‘faasagatau’ atu i le Tiapolo. O le a ia ‘sola ese mai ia i tatou’ pe afai tatou te tumau mausalī o ni ē lagolagoina le pule silisili ese aoao a Ieova. Ua ia i tatou le fesoasoani a Iesu, o lē e taofiofia vaega leaga uma a le lalolagi ina ia leai se mea e faaleagaina ai e faavavau i tatou. Ma ia aua lava neʻi galo le mea lenei: O le tatalo, le usiusitai, ma le faatuatua, tatou te faalatalata atu ai i le Atua, ma mafuta vavalalata mai ai o Ia ia i tatou.—2 Nofoaiga a Tupu 15:2.
6. Aisea ua taʻua ai e Iakopo nisi Kerisiano o “tagata agasala”?
6 Aisea ua faatatau atu ai e Iakopo le faaupuga “tagata agasala” i nisi o ē o loo faapea mai e faatuatua i le Atua? Talu ai sa agasala i latou i “taua” ma le ita fia fasioti tagata—o uiga e lē tatau mo ni Kerisiano. (Tito 3:3) Sa faatumulia o latou “lima” i gaoioiga leaga, na manaomia ai ona faamamāina. Sa manaomia foi ona latou faamamāina o latou “loto,” le nofoaga o loo uunaia mai ai gaoioiga. (Mataio 15:18, 19) O na tagata “faalotolotolua” sa fetosoaiina solo lava i le faauo atu i le Atua ma toe faauo atu i le lalolagi. I le lapataia o i tatou i a latou faaaoaoga leaga, seʻi o tatou faaalia le mataala pea ina ia lē faaleagaina lo tatou faatuatua e na mea.—Roma 7:18-20.
7. Aisea ua taʻu atu ai e Iakopo i nisi ina ia “faavauvau, ma fetagisi”?
7 Ua taʻu atu e Iakopo i lana au faitau ina ia “puapuagatia . . . ma ia faavauvau, ma fetagisi.” Pe afai latou te faaalia mai le faanoanoa faale-Atua, o le faamaoniga lena o le salamō. (2 Korinito 7:10, 11) I aso nei, o nisi o ē ua faapea mai e faatuatua, ae o loo faauo atu i le lalolagi. Pe afai e iai se tasi o i tatou o loo uia lena ala, pe lē tatau ea ona tatou faavauvau ona o lo tatou tulaga vaivai faaleagaga, ma faia vave ni laasaga e faasaʻo ai mea? O le faia o ni fetuutuunaiga manaomia ma le mauaina o le faamagaloga a le Atua o le a iu ai i se faalogona o le olioli ona o se loto fuatia ifo ua mamā, ma le faamoemoe fiafia o le ola e faavavau.—Salamo 51:10-17; 1 Ioane 2:15-17.
Aua le Fefaamasinoai
8, 9. Aisea e lē tatau ai ona tatou faiupu leaga pe fefaamasinoai?
8 O se agasala le faiupu leaga i se uso talitonu. (Iakopo 4:11, 12) Peitai ua faitioina e nisi o latou uso Kerisiano, atonu ona o o latou lava uiga fia amiotonu naʻuā po o le mananao foi e faasilisilia i latou ae taʻufaatauvaaina isi. (Salamo 50:20; Faataoto 3:29) O le upu Eleni o loo faaaogā mo le ‘faiupu leaga’ e faaalia mai ai le ʻinoʻino ma e faauiga i le soona faia o ni tuuaiga ae sese. O lenei mea e iu ai i le faamasinoina mamafa o se uso. E faapefea ona tutusa lenei uiga ma le ‘faiupu leaga atu ma faamasino i le tulafono a le Atua’? Manatua, o tusiupu ma Faresaio ‘sa latou faaleaogaina le poloaiga a le Atua’ ae faia a latou faamasinoga e tusa o a latou lava faatulagaga. (Mareko 7:1-13) I se uiga tutusa, afai tatou te taʻusalaina se uso i se mea e lē taʻusalaina ai e Ieova, po ua tatou lē o ‘faamasinoina ea la le tulafono a le Atua’ ma faapea ai ma le agasala e lē o saʻo le tulafono a le Atua? Ma e ala i le faitioina ma le lē tonu o so tatou uso, ua lē atoatoa ai ona tatou faia le tulafono o le alofa.—Roma 13:8-10.
9 Seʻi o tatou manatua le mea lenei: “E toatasi lava lē fai tulafono ma faamasino”—o Ieova lea. E ‘atoatoa ana tulafono,’ e leai se mea e lape ai. (Salamo 19:7; Isaia 33:22) E na o le Atua lava e iai le aiā e faataatia ai tapulaa ma tulafono mo le faaolataga. (Luka 12:5) O lea na fesili ai Iakopo: “O ai ea oe e te faamasino ai i lē lua te tuaoi?” E lē o so tatou avega tauave le faamasinoina ma taʻusalaina isi. (Mataio 7:1-5; Roma 14:4, 10) I le manatunatu i le pule silisili ese ma le lē faailoga tagata o le Atua, faapea foi ma lo tatou lava tulaga agasala, e tatau ona fesoasoani lea ia i tatou e aloese ai mai le faamasinosino atu i isi ona o le faafiaamiotonu naʻuā.
Alofia le Uiga Faamaualuga o le Soona Mautinoa Naʻuā ia te Oe Lava
10. Aisea e tatau ai ona tatou mafaufau ia Ieova i o tatou olaga i aso taitasi?
10 E tatau ona tatou mafaufau ia Ieova ma ana tulafono i taimi uma. (Iakopo 4:13-17) I le faagaloina o le Atua, e faapea ifo ai le tagata o lē ua mautinoa naʻuā ia te ia lava: ‘O le asō po o taeao o le a tatou ō atu ai i nisi aai, nonofo ai mo se tausaga iina, fai ai se pisinisi, ma maua ai ni oloa.’ Pe afai tatou te ‘faaputu oa mo i tatou lava ae tatou te lē mauoa i le Atua,’ atonu e faamutaina o tatou ola taeao ma tatou lē maua ai se avanoa e auauna ai ia Ieova. (Luka 12:16-21) E pei ona faapea mai Iakopo, ua faapei i tatou o le puao i le taeao “ua aliali mai i se itu aso itiiti, ona mou ai lea.” (1 Nofoaiga a Tupu 29:15) E na o le faatinoina o le faatuatua ia Ieova e mafai ai ona tatou faamoemoe atu mo le olioli tumau ma le ola e faavavau.
11. O le ā le uiga o le faapea atu, “A finagalo i ai Ieova”?
11 Nai lo le lē amanaiaina ma le faamaualuga o le Atua, o le uiga lenei e tatau ona ia i tatou: “A finagalo i ai le Alii [Ieova], tatou te ola ai, ma tatou faia lea mea ma lea mea.” O le faapea mai, “A finagalo i ai [Ieova]” e faaalia ai o loo tatou taumafai e gaoioi ia ogatusa ma lona finagalo. Atonu e manaomia le faia o se pisinisi e lagolagoina ai lo tatou aiga, e femalagaai ai i le galuega o le Malo, ma isi mea faapena. Ae ia aua neʻi o tatou fia logovii. “E leaga le mitamita faapena” auā e faagaloina ai le faalagolago atu i le Atua.—Salamo 37:5; Faataoto 21:4; Ieremia 9:23, 24.
12. O le ā ua faauiga atu i ai upu o le Iakopo 4:17?
12 E foliga mai ina ia faaiu ana faamatalaga e faatatau i le soona mautinoa naʻuā ma le faamaualuga, ua faapea mai ai Iakopo: “O le ua iloa e fai le mea lelei, a e le faia, o le agasala lea ia te ia.” E tatau i Kerisiano taitoatasi ona iloa ma le lotomaulalo lona tulaga faalagolago atu i le Atua. Pe afai na te lē faia faapea, “o le agasala lea ia te ia.” O le mea moni, o le mataupu silisili foi lena e faatatau atu i so o se tulaga e lē taulau ai ona faia mea o loo manaomia e le faatuatua i le Atua ona tatou faia.—Luka 12:47, 48.
Lapataiga i le Oa
13. O le ā ua fai mai ai Iakopo e faatatau ia i latou o ē o loo faaaogaseseina a latou oa?
13 Talu ai na oo ina matapeapea nisi uluai Kerisiano i meafaitino pe na latou fiafia i le tamaoaiga, ua faia ai e Iakopo ni faamatalaga malolosi e faatatau atu i nisi tagata mauoa. (Iakopo 5:1-6) O tagata o le lalolagi o ē na faaaogaseseina a latou oa, na ‘fetagisi ma uio ona o puapuaga na oo ia i latou’ ina ua taui atu e le Atua ia i latou e tusa o a latou gaoioiga. I na aso, o le tamaoaiga o le toatele o tagata sa tele ina aofia ai mea e pei o ofutalaloa, le saito, ma uaina. (Ioelu 2:19; Mataio 11:8) O nisi o nei oa e mafai ona pala pe ‘atiatia e mogamoga,’ ae o loo faamamafaina e Iakopo le leai o se aogā o le tamaoaiga, ae lē o lona tulaga e mafai ona leaga. E ui e lē elea le auro ma le siliva, ae afai e na ona teu lava, o le a oo ina leai se aogā e pei lava o mea ua elea. O le “elea” e faaalia mai ai e lē o faaaogaina lelei le oa faaletino. O lea, e tatau ia i tatou uma ona manatua faapea, ‘o se mea e pei o le afi’ o mea na ‘ua faaputu i ona aso e gata ai’ e i latou o ē faatuatua atu i a latou meafaitino, i le taimi e oo mai ai le toasa o le Atua ia i latou. Talu ai o loo tatou ola “i ona po o le iuga,” ua faapitoa ai le uiga o na upu mo i tatou.—Tanielu 12:4; Roma 2:5.
14. E masani faapefea ona gaoioi le mauoa, ma o le ā e tatau ona tatou faia i ai?
14 O lē e tamaoaiga e masani lava ona olegiaina lana aufaigaluega, o i latou nei o loo taofiofia totogi o loo ‘alalaga’ mai mo le taui ma sui. (Faatusatusa i le Kenese 4:9, 10.) O tagata mauoa o le lalolagi ua “nonofo i le nuu ma le sololelei.” I le maoona i faafiafiaga faaletino, ua latou faatupu aʻe ai ni loto fefete, ma le lē talilelei mai, ma o le a faia pea faapena i le “aso” ua faatulaga e faaumatia ai i latou. Ua latou “faasala ma fasioti le amiotonu.” Ua fesili Iakopo: ‘Ua lē tetee mai ea o ia ia te outou?’ Ae i se isi faaupuga, “o lē amiotonu; e lē o tetee mai o ia ia te outou.” I so o se tulaga lava, e lē tatau ona tatou faailoga tagata i ē mauoa. E tatau ona tatou faamuamuaina manaoga faaleagaga i o tatou olaga.—Mataio 6:25-33.
E Fesoasoani ia i Tatou le Faatuatua Ina ia Onosai Ai
15, 16. Aisea e tāua tele ai le faaalia o le onosai?
15 Ina ua maeʻa ona taʻua o tagata mauoa fiasili o le lalolagi, na sosoo ai ma le faalaeiauina e Iakopo o Kerisiano o loo mafatia ina ia latou onosai. (Iakopo 5:7, 8) Afai e onosaia e tagata talitonu tulaga faigata o loo latou fetaiai, o le a tauia ai i latou mo lo latou faatuatua i le taimi o le faatasi mai o Keriso, pe a oo mai le faamasinoga i ē o loo faatiga ia i latou. (Mataio 24:37-41) Sa manaomia e na uluai Kerisiano ona faapei o sē galue fanua o lē e faatalitali atu ma le onosai mo uaga muamua o le tau e toulu ai lau o laau, lea e mafai ona ia totō ai mea, ma faatalitali atu i uaga mulimuli o le tau totogo lea e fua mai ai laau. (Ioelu 2:23) E manaomia foi e i tatou ona onosai ma ia mausalī o tatou loto, ae maise lava o le “faatasi mai o lo tatou Alii” o Iesu Keriso ua iai nei!
16 Aisea e tatau ai ona tatou onosai? (Iakopo 5:9-12) O le onosai e fesoasoani ia i tatou e lē oi ma mapuitiga ai pe a faatiga mai ni uso talitonu ia i tatou. Pe afai tatou “te femuimuiai” i se uiga leaga, o le a faasalaina i tatou e le Faamasino o Iesu Keriso. (Ioane 5:22) Talu ai o lea ua amata lona “faatasi mai,” ma o loo ‘tu o ia i luma o le faitotoa,’ seʻi o tatou faatupuina pea le filemu e ala i le onosaia o o tatou uso, o ē o loo fesagai ma le tele o tofotofoga o le faatuatua. E faamalosia lo tatou lava faatuatua pe a tatou manatuaina faapea, na tauia e le Atua Iopu talu ai sa ia tumau ma le onosai i ona tofotofoga. (Iopu 42:10-17) Pe afai tatou te faatuatua ma onosai, o le a tatou iloa ai, e “mutimuti vale tele le Alii [Ieova] ma le alofa naunau.”—Mika 7:18, 19.
17. Aisea ua faapea mai ai Iakopo, “Aua lava neʻi outou tauto”?
17 Pe afai tatou te lē onosai, tatou te ono faaaogā sese ai le laulaufaiva pe a fetaiai ma mafatiaga. Mo se faaaoaoga, atonu tatou te soona vavevave ai i le faia o ni tautoga. I lona lapataia o le vave faia o ni tautoga e aunoa ma le manatu mamafa i le uigā, ua faapea mai Iakopo: “Aua lava neʻi outou tauto.” O le faamautinoa soo mai o ni faamatalaga e ala i ni tautoga e ono foliga mai ai foi e faatagā fai. O lea, e tatau ai ona tatou tautala i le upu moni, ia ioe la tatou ioe, ma la tatou leai ia leai. (Mataio 5:33-37) O le mea moni, e lē o faapea mai Iakopo e sese le faia o se tautoga e taʻu ai le mea moni i se faamasinoga.
Le Faatuatua ma a Tatou Tatalo
18. I lalo o ā tulaga e tatau ai ona tatou ‘tatalo pea’ ma ‘pepese i salamo’?
18 E ao ona telē se vaega a le tatalo e faia i o tatou olaga pe afai tatou te puleaina a tatou faamatalaga, ia onosai, ma tausisia se faatuatua moni i le Atua. (Iakopo 5:13-20) E tatau ona tatou ‘faaauau pea ona tatalo’ ae maise lava pe a fesagai ma tofotofoga. Pe afai tatou te fiafia, ia tatou ‘pepese i salamo,’ e pei ona sa faia e Iesu ma ona aposetolo ina ua ia amataina le Faamanatuga o lona maliu. (Mareko 14:26, faamatalaga i le pito i lalo o le mau i le NW) E iai ni taimi, atonu e faatumulia o tatou loto i lena agaga faafetai i le Atua ona tatou pepese ai lea i totonu o le loto. (1 Korinito 14:15; Efeso 5:19) Ma e maeu se olioli pe a vivii atu ia Ieova i pesega i sauniga faa-Kerisiano!
19. O le ā e tatau ona tatou faia pe afai tatou te mamaʻi faaleagaga, ma aisea e uia ai lena laasaga?
19 Atonu tatou te lē fia pepese pe afai o loo faamaʻia i tatou faaleagaga, atonu pe ona o se amioga sese po ua lē taulau ona tatou aai e lē aunoa i le laoai a Ieova. Pe afai o le tulaga lena o loo tatou iai, seʻi o tatou saili atu ma le lotomaulalo i toeaina, ina ia mafai ona latou ‘tatalo mo i tatou.’ (Faataoto 15:29) O le a latou ‘faauu foi ia i tatou i le suauu i le suafa o Ieova.’ E pei o le uu ua faamālūina ai se manuʻa, ua faapena i a latou upu faamafanafana ma fautuaga faale-Tusi Paia ona fesoasoani e faamāmā ai mafatiaga, le lē mautonu, ma le mataʻu. ‘O tatalo o le faatuatua o le a faamalosia ai i tatou’ pe afai e lagolago mai i ai ma lo tatou lava faatuatua. Pe a iloa e toeaina na māfua lo tatou maʻi faaleagaga ona o se agasala matuia, o le a latou faamanino maia ma le agalelei o tatou sese, ma taumafai e fesoasoani mai ia i tatou. (Salamo 141:5) Ma pe afai tatou te salamō, e mafai ona tatou faatuatua o le a faafofoga mai le Atua i a latou tatalo ma faamagalo mai i tatou.
20. Aisea e tatau ai ona tatou faailoa a tatou agasala ma tatalo le tasi mo le tasi?
20 ʻO le faailoa o a tatou agasala’ e tatau ona avea o se puipuiga e lē toe agasala ai. E tatau ona faamausaliina ai se lagona alofa māfana, o se uiga o le a uunaia ai i tatou e “tatalo le tasi mo le tasi.” E mafai ona tatou faatuatua faapea, o le a aogā lenei mea auā o le tatalo a le “tagata amiotonu”—o lē faaalia le faatuatua ma tauamiotonuina e le Atua—e tele ni mea o le a faataulauina ai faatasi ma Ieova. (1 Peteru 3:12) Sa iai i le perofeta o Elia vaivaiga e pei foi o o tatou vaivaiga, peitai sa aogā ana tatalo. Sa ia tatalo, ma na lei iai ni uaga mo le tolu ma le ʻafa tausaga. Ina ua ia toe tatalo, ona totō ifo ai lea o uaga.—1 Tupu 17:1; 18:1, 42-45; Luka 4:25.
21. O le ā atonu e mafai ona tatou faia pe afai “ua sese i le upu moni” se uso Kerisiano?
21 Ae faapefea pe a iai se tasi o le faapotopotoga “ua sese i le upu moni,” ua see ese mai le faia o aʻoaʻoga ma amioga lelei? Atonu e mafai ona tatou toe laveaiina o ia mai lona sese e ala i fautuaga faale-Tusi Paia, tatalo, ma isi fesoasoani. Pe a tatou taulau, ona aogā ai lea ia te ia le taulaga a Keriso ma faasaoina ai o ia mai le oti faaleagaga ma le taʻusalaina mo le faaumatiaga. O le fesoasoani atu i lē ua sese, e faaalia ai lo tatou ufiufia o ana agasala e tele. Pe a liliu ese le tagata agasala o lē ua aoaia mai lona ala sese, ua salamō, ma saili atu mo le faamagaloga, tatou te olioli ai auā na tatou galulue agaʻi atu i le ufitiaina o ana agasala.—Salamo 32:1, 2; Iuta 22, 23.
Ua Iai i le Tusi se Mea mo i Tatou Uma
22, 23. E tatau faapefea ona aafia i tatou i upu a Iakopo?
22 E manino lava, o loo iai i le tusi a Iakopo se mea e aogā mo i tatou uma. Ua faaalia mai ai ia i tatou le auala e manumalo ai mai tofotofoga, o fautuaga ina ia tatou teena le faailoga tagata, ma faalaeiauga ia i tatou ina ia auai i le faia o galuega e tonu. Ua faalaeiauina i tatou e Iakopo ina ia pulea le laulaufaiva, ia tetee atu i aafiaga faalelalolagi, ma faatupuina le filemu. O ana upu foi e tatau ona tatou maua ai le onosai ma le tausisi atu i le tatalo.
23 O le mea moni, o le tusi a Iakopo sa muai auina atu i uluai Kerisiano faauuina. Ae ao ia i tatou uma ona faaaogā ana fautuaga e fesoasoani mai ina ia tatou taofi mau atu i lo tatou faatuatua. E mafai e upu a Iakopo ona faamalosia ai le faatuatua lea e uunaia ai i tatou e faia gaoioiga maumauai i le auaunaga a le Atua. Ma o lenei tusi ua faagaeeina tauatua ua atiina aʻe ai se faatuatua tumau, lea e mafai ai ona avea i tatou o ni Molimau a Ieova, o ē onosai ma tatalo i nei aso, i le taimi o le “faatasi mai o le Alii” o Iesu Keriso.
E Faapefea Ona E Tali?
◻ Aisea na manaomia ai e nisi uluai Kerisiano ona suia o latou uiga ma amioga?
◻ O le ā le lapataiga ua tuuina mai e Iakopo i ē mauoa?
◻ Aisea e tatau ai ona tatou onosai?
◻ Aisea e tatau ai ona tatou tatalo e lē aunoa?
[Ē Ana le Ata i le itulau 19]
Pictorial Archive (Near Eastern History) Est.
[Ata i le itulau 23]
Sa tatau i nisi o uluai Kerisiano ona matuā faaalia le onosai i uso talitonu
[Ata i le itulau 24]
E manaomia i Kerisiano ona onosai, ia alolofa, ma tatalo