‘Amuia i Latou o Ē ua Onosai’

1. Talu mai le 1914, o le ā le tulaga o iai i le lalolagi ua faataunuuina ai le Mataio 24:3-8, ma o ā fuafuaga ua lē taulau ai Malo Sosoo ma Malo Aufaatasi?

I LANA tusi The Present Age, o loo tautala ai Robert Nisbet e uiga “i le Fitu Sefululima Tausaga o le Taua sa faaauau pea, e seāseā lava ona malōlō, talu mai le 1914.” Ioe, o “taua ma tala o taua,” e aofia ai taua a le lalolagi—o mea na na valoia e Iesu Keriso mo lenei taimi o le iʻuga. (Mataio 24:3-8) Na aumaia i luma Malo Sosoo i le 1920 ina ia “taofia taua e faavavau.” Pagā lona matuā lē taulau! Na faavaeina Malo Aufaatasi i le 1945 “ina ia faasaoina tupulaga o le lumanai mai mala o taua.” Ae ua taʻua i le tusi a Max Harrelson o le Fires All Around the Horizon e faapea: “E seāseā lava ona iai se aso sa ʻasa ma ni taua i so o se mea talu mai le iʻuga o le Taua Lona Lua a le Lalolagi.”

2. O le ā ua fesili ai nisi tagata e faatatau i tulaga o le lalolagi, ae o ā fesili e ao ona tatou fesili ai?

² O faiga taufaamataʻu ma le sauā, iʻuvale ma le mativa, o vailaau faasaina ma faamaʻi—o nei mea uma ua faaopoopo atu i le ata faanoanoa. Atonu o le a fesili mai nisi tagata: ‘E mafai faapefea e le tulaga faaletagata ona faaauau ona onosai i nei tulaga faigata?’ Ae peitai, e aupito sili ona tāua le tatau ona tatou fesili: ‘Ua faapefea ona onosai le Atua i le faaleagaina o lana foafoaga faalelalolagi? O le ā le umi o le a ia faatagaina ai tagata amioleaga e faaleagaina le lalolagi ma faafaupue atu le faalumaina i lona suafa tautele?’

3. (a) O le ā le fesili na fesili ai le perofeta o Isaia, ma aiseā? (e) O le ā le tali na tuuina atu e Ieova, ma o le ā ua faaalia e lenei mea mo o tatou aso?

³ Na lagā foi e le perofeta o Isaia le fesili faapena. Sa tofia o ia e folafola atu i tagata o lona nuu se feau mai ia Ieova. Ae sa muai lapataia o ia faapea o le a latou lē utagia o ia po o le Atua na auina atu o ia. O lea na fesili ai Isaia: “Le Alii e, seia afea ea?” Ioe, o le ā le umi o le a talaʻi atu ai Isaia i nei tagata ua maaa, ma o le ā le umi o le a faapalepale ai Ieova i lo latou tetee ma le mumusu e utagia lana feau? Na tali Ieova: “Seia faagaogaoina aai ia leai se nofo ai, seia leai foi se tagata i fale, e matuā faatafunaina foi le laueleele.” (Isaia 6:8-11) E faapena foi aso nei, o loo onosai pea le Atua i na upu leaga seia oo i lana taimi atofaina e faaoo atu ai le faamasinoga i luga o le lalolagi o lē o le tetee aupito sili o Kerisinetoma lē faatuatua.

4. O le ā le iʻuga o le onosai o Iopu, ma o le ā le faamautinoaga ua aumaia e lenei mea ia i tatou i aso nei?

⁴ Ua leva ona onosai Ieova i faifaiga a Satani. Pe tusa ma le 3,600 tausaga ua mavae, na onosai ai foi Iopu faatuatua, i le tetee atu o le luʻi a Satani faapea e lē mafai ona ia tausia le faamaoni i lalo o tofotofoga. Maeu le faafiafiaina ai o le finagalo o Ieova i lenei mea! (Iopu 2:6-10; 27:5; Faataoto 27:11) E pei ona taʻua mulimuli ane e le afa uso o Iesu o Iakopo: “Faauta, ua tatou taʻuamuia i e onosai; ua outou faalogologo i le onosai o Iopu, ua outou iloa foi le iuga i la le Alii [Ieova], ina ua mutimuti vale tele le Alii ma le alofa naunau.” E faapena foi, o i latou o ē onosai faatasi ma Ieova i aso nei ua faamautinoa atu i ai se iʻuga fiafia.—Iakopo 5:11.

5. Na faaalia faapefea e Iesu faapea o le a manaomia le onosai mai tagata o le Atua i aso nei, ma i le faia o le ā le galuega o le a manaomia ai ona latou onosai?

⁵ Na faaalia manino e Iesu faapea o le tumau o le a manaomia mai tagata o le Atua i o tatou aso. I le valoiaina o le faailoga o le “gataaga o le lalolagi,” na ia fetalai ai: “O lē tumau seia oo i le gataaga, e faaolaina lea.” Tumau a o faia le ā? Ua tali mai isi upu o loo sosoo mai a Iesu: “E talaʻiina atu foi lenei tala lelei o le malo i le atu laulau uma, e fai ma molimau i nuu uma.” (Mataio 24:3, 13, 14) Ona toe pau lava lena ‘ona oo mai lea o le iʻuga.’—Tagai foi i le Mareko 13:10, 13; Luka 21:17-19.

Le Pogai e Onosai ai Ieova

6. Aiseā ua avea ai Ieova o le faaaʻoaʻoga mataʻina o le onosai, ma o le ā le tasi o mafuaaga ua matuā onosai ai o ia?

⁶ Na faamatala e le aposetolo o Paulo faapea “e ui lava ina iai i le finagalo o le Atua e faaalia lona toasa ma ia faalauiloa lona mana, ae ua faapalepale ma le onosai tele i ipu o le toasa na faia ina ia fetaui mo le faaumatiaga.” (Roma 9:22, NW) Aiseā ua onosai ai Ieova a o faaauau pea ona iai le amio leaga, i nei ipu o le toasa? O le tasi lenei o mafuaaga: ina ia faaalia ai faapea o pulega faaletagata, e fia tutoatasi mai Lē na Foafoaina le tagata, ua taʻusalaina ma ua lē taulau. (Ieremia 10:23) Ua toeitiiti, ona faamaualugaina lea o le pule silisili ese a le Atua, e pei ona ia faamaonia faapea ua na o ia lava e mafai ona aumaia le filemu, tulaga talafeagai, ma le fiafia i le aiga faaletagata, e ala i le pulega a Iesu i le Malo.—Salamo 37:9-11; 45:1, 6, 7.

7. Mo le ā le isi mafuaaga na onosai ai Ieova, ma o le ā le aogā ua aumaia e lenei mea i le faitau miliona talu mai le sefulu tausaga mai le 1930 ma agaʻi mai ai?

⁷ E lē gata i lea, ua onosai Ieova ina ia “faailoa mai ai foi le faulai o lona viiga i ipu o le alofa” tunoa. (Roma 9:23) O nei ipu o le alofa tunoa o i latou ia o ē faauuina ua tausia le faamaoni o e ua faatauina nai tagata” ina ia pule faatasi ma Keriso Iesu i lona Malo faalelagi. O loo faaauau pea le faamaufaailogaina o le 144,000 mai taimi o aposetolo. Ua lata atu nei i lona iʻuga. (Faaaliga 7:3; 14:1, 4) Ma faauta! Talu mai tausaga o le 1930 o loo faaauau pea ona faatagaina e le onosai o Ieova le aoaoina o le faitau miliona o isi, le “motu o tagata e toatele mai atu nuu uma,” o ē olioli i le faamoemoe o le faasaoolaina atu i le faaiʻuga o le puapuaga tele ina ia ulu atu i le ola e faavavau i se lalolagi parataiso. (Faaaliga 7:4, 9, 10, 13-17) Pe o oe o se tasi o lena motu o tagata e toatele? Afai o lea, pe e te lē o fiafia ea faapea ua onosai Ieova i le iai pea o ipu o le toasa seia oo mai i le asō? Ae peitai, e tatau ona faaauau pea ona e onosai, e pei ona onosai o Ieova.

Ua Tauia le Onosai

8. Aiseā e manaomia ai e i tatou uma le onosai, ma o le ā le faaaʻoaʻoga o le onosai e ao ona tatou manatunatu loloto i ai?

⁸ O i tatou uma lava e iai le manao ina ia onosai pe afai tatou te mananao ia maua folafolaga. Ina ua uma ona taʻua o lenei upu moni faavae i le Eperu 10:36, ua faamatala ai e le aposetolo o Paulo i se tulaga auiliili le faatuatua malosi ma le onosai o le “faapotopotoga o e matamata [molimau, NW]” o aso anamua. Ona ia apoapoai mai lea ia i tatou ina ia “taufetuli ma le onosai i le ala tanu o i o tatou luma, ma ia vaavaai atu ia Iesu o le na te taʻitaʻiina ma le na te faaatoatoaina le faatuatua; . . . ona o le olioli na tuu i ona luma,” na onosai ai Iesu i le auaunaga ma le loto atoa, sa leʻi leiloa lona vaavaai atu i le taui. Maeu le faamalosia foi o i tatou e lana faaaʻoaʻoga ina ia tatou onosai!—Eperu 12:1, 2.

9. O le ā ua iʻu i ai mai faaaʻoaʻoga faaonaponei o le onosai?

⁹ E tele foi faaaʻoaʻoga o le onosai i ona po nei. Atonu o e iloa, pe sa e iloa foi, uso ma tuafafine o ē sa mataʻina i lo latou onosai. Maeu le faagaeeina ai o i tatou i lo latou faatuatua! Ma i tausaga taitasi, a o lipotia mai e Molimau a Ieova i le Sosaiete o le Olo Matamata a latou gaoioiga i le lalolagi aoao, e tele faamatalaga e faafiafiaina ai o le onosai ma le tausia o le faamaoni na maua mai. O le faafanua o loo i itulau e fa o muamua atu o loo faamatilatila ai le galuega sili na faataunuuina i le 1989 a o ‘faaopoopo i lo latou faatuatua le onosai’ e nei Molimau.—2 Peteru 1:5, 6.

O lo Tatou Tausaga Aupito Sili

10. (a) E fia atunuu ma atumotu na auai i le talaʻiga o le tala lelei o le Malo i le 1989, ma e toafia na faia sa latou vaega i lenei galuega? (e) E toafia paeonia na lipotia mai i le masina sa iai le tumutumuga ma o le ā le numera aofai o itula na faaaluina i le auaunaga i le fanua?

¹⁰ E pei ona faaalia e le faafanua o loo muamua atu, e 212 atunuu ma atumotu na auai i le talaʻiga o le Malo o loo sau o Ieova. O oe lē faitau peleina o Le Olomatamata, pe sa faaeaina oe e avea o se tasi o le 3,787,188 o ē na faia sa latou vaega i lenei galuega sili? Pe sa o oe o se tasi o le 808,184 o ē na lipotia mai e avea o ni paeonia i le masina na fai ma tumutumuga mo lea auaunaga? Po o le ā lava se mea na e tuuina atu i le aofaiga atoa faakelope i le 1989 o le fuainumera o le 835,426,538 itula na faaaluina i le auaunaga i le fanua, ua ia te oe la se mafuaaga e olioli ai.—Salamo 104:33, 34; Filipi 4:4.

11. (a) O le ā le aofaiga o i latou na auai i le Faamanatuga ia Mati 22 ua avea ma mafuaaga mo le olioli, ma aiseā? (e) E toafia na papatisoina, ma o a atunuu i le faafanua sa matilatila i lenei itu?

¹¹ E olioli foi, ona o lena fuainumera matagofie e 9,479,064 na auai ia Mati 22 i le tausaga ua mavae, i le faamanatuina o le Faamanatuga o le maliu o Iesu i le lalolagi aoao! Ua faaalia foi i lenei mea se faatelega faapea e 5,691,876 o ē faalauiloa o le Malo na faaopoopo mai, tau lava ina ia leoleoina ma le alofa i latou nei o ē naunau pei o ni mamoe ina ia aumaia i totonu o le lotoā mamoe, ina ia faia sa latou vaega e lē aunoa i le auaunaga ia Ieova. Pe mafai ona tatou fesoasoani ia i latou i lenei mea? (Ioane 10:16; Faaaliga 7:9, 15) E toatele ua uma ona tali mai, e pei ona faaalia i le aofaiga tele e 263,855 Molimau fou na papatisoina i le tausaga faaleauaunaga o le 1989.

12. O ā nisi o taualumaga e lē o faaalia i le faafanua (a) e faatatau i fale gaosimea o le Sosaiete o le Olo Matamata? (e) e faatatau i le tufaina atu o mekasini ma tusiga?

¹² O loo iai ni taualumaga e lē o faaalia e le faafanua. O le galala mo lomiga—o Tusi Paia, tusi, polosiua, mekasini—sa lē faamalieina ai. O le iʻuga, ua faaaogāina e fale gaosimea i Niu Ioka le 25,999 tone o pepa e lolomia ai le 35,811,000 Tusi Paia, tusi, ma polosiua, o se faatelega e 101 pasene e sili atu ai i le 1988. O isi fale gaosimea tetele o le Sosaiete o le Olo Matamata, ua matauina i Siamani, Italia, ma Iapani, sa galulue i ni taimi faasili, i le lagolagoina “o le auauna faamaoni ma le mafaufau” i le avatua o ‘meaʻai faaleagaga i ona itu aso e tatau ai.’ (Mataio 24:45) Ia Aperila ma Me, ua lipotia mai ai e nisi atunuu le lelei ona tufaina atu o mekasini ma tusiga, faatasi ai ma se faamamafa faapitoa i le tufatufaina atu o lomiga o Le Olomatamata e uiga ia “Papelonia le Aai Tele.” (Faaaliga 17:5) E lē taumatea, ia Aperila o loo sau, o le a lolofi atu ai paeonia lagolago ma isi Molimau i le fanua o le lalolagi e avea o sa tatou tauiviga aupito sili ona lelei o le molimau atu i le tausaga faaleauaunaga o le 1990.—Faatusatusa Isaia 40:31; Roma 12:11, 12.

13. O a atunuu o loo lisiina i le faafanua sa leʻi lisiina i le tausaga ua mavae? Faamatala.

¹³ Toe tepa i le faafanua. Pe o e iloa ai nisi o atunuu sa lē iai o latou igoa i le lisi i le tausaga ua mavae? Ioe! o Hagakeri ma Polani, ia faatoʻā faatulafonoina ai talu ai nei la tatou galuega. Tatou te loto faafetai i faipule silisili i nei atunuu ona ua latou faaalia nei lo latou magafagafa mo Molimau a Ieova. I lenei itu, ua talia ai tatalo a le au uso i le lalolagi aoao, “ina ia tatou nonofo ma le le atuatuvale ma le filemu, i le [tuutoina uma lava i le Atua] ma le amio matagofie.”—1 Timoteo 2:1, 2.

14. Aumai ni mea tāua na tutupu o Tauaofiaga Itumalo o le “Tuutoina i le Atua” i Polani.

¹⁴ “Tuutoina i le Atua”! Ioe, o Tauaofiaga Itumalo o le “Tuutoina i le Atua” sa mafai foi ona faia i Polani, i nofoaga e tolu, ia Aokuso! Maeu se agaga talimalo sa faamaonia le iai i o tatou uso e 91,024 i Polani! (Eperu 13:1, 2, 16) Sa pei lava o se vavega, i le faitau sefulu afe o uso—mai Sekesolovakia, Siamani, Rusia, ma isi—na maua faailoga o faamaoniga e ō mai ai i pasi, nofoaafi, sa oo foi ina savavali. O le isi faitau afe na felelei atu mai Amerika, Europa i Sisifo, faapea motu mamao o le Pasefika ma Iapani. O fale matamata tetele, sa matuā faamamāina e o tatou uso, o fale e matuā sili lava ona tetele sa lava ma totoe e ofi ai le 65,710 i Chorzów, e 40,442 i Poznan, ma le 60,366 i Warsaw—o se aofaiga matuā tele na auai e 166,518! I nei nofoaga autū taitasi, na maligi loimata ona o faalogona olioli o le vaaiga sili o le papatisoga. I Poznan na faatofuina ai le tasi e 9 tausaga le matua ma le tasi e ova i le 90 tausaga, ma o le aofaiga e 6,093 i tauaofiaga e tolu sa aofia ai le lē mafaitaulia o le au talavou, o le toatele o i latou nei e mai atunuu sa faapea mai ua mou atu lava le lotu faatasi ma tagata matutua. A e lē faapea le lotu moni e faavae i le Afioga a le Atua! (Faatusatusa Salamo 148:12, 13; Galuega 2:41; 4:4.) Maeu le ofoofogia na tauia ai le onosai o ō tatou uso i Europa i Sasaʻe!

Faaauau i le Faamaoni i Lalo o Tofotofoga

15. Ua faapefea ona faaalia le onosai ma le maumauai o Molimau i Lepanona, ma faatasi ai ma ā iʻuga lelei?

¹⁵ I le pei o le aposetolo o Paulo, ua valaauina ai Molimau a Ieova ina ia faaalia le onosai i lalo o le tele o tulaga eseese. (2 Korinito 11:24-27) I Lepanona o loo matuā aasa ai taua sivili. O le ā le tali atu a o tatou uso? I le tumau ma le maumauai. Na vaaia i le tausaga e 1989 le matuā mamafa o le pomuina, e oo lava i nofoaga sa aupito sili ona mamafa ai pomu, sa filifilia ai e ō tatou uso ina ia lē faavaivai. Ua lipotia mai e se faapotopotoga i Beirut: “Sa fuafuaina vaega e lē aunoa mo le auaunaga i le fanua i afiafi po uma lava o le vaiaso. E ui lava e faigata tulaga o le saogalemu, ae sa leʻi faavaivai ai uso. Sa matou galueaiina oganuu e sili atu na i lo o le taimi muamua. Ia Aperila sa maua ai sa matou tumutumuga i le aofaiga o paeonia. Na amataina ni suesuega fou faale-Tusi Paia, ma e sili atu mekasini ma tusi na tufaina atu.”

16. Ua faapefea ona faaalia e o tatou uso i Kolomepia le onosai e ala i le aumaia o le tala lelei i aai sa lē iai ni Molimau?

¹⁶ Na faatomua mai i tala fou Kolomepia ona o fefaatauaiga o vailaau faasaina ma faiga sauā. Ae o le faamaoni ma le onosai o Kerisiano i inā na faia ai foi ni tala fou. Talu ai nei, na aauina atu ai ni paeonia faapitoa lē tumau i aai e 31 o le sefuluafe po o le sili atu o tagata o loo ʻaināina nofoaga e lē o iai ni Molimau. I se tasi aai, ina ua iloa e tagata naunau fou faapea o le a ō atu i inā ni paeonia mo na o ni nai masina, na latou talosaga atu mo paeonia ina ia nonofo. I se isi mea, e 18 tagata naunau na sainia se tusi o le talisapaia mo le fesoasoani faaleagaga na tuuina atu i le taimi o le tolu masina na nonofo ai paeonia ma talosaga ai mo se fesoasoani faaopoopo. “O se galuega tāua lenei,” na latou fai mai ai. O le mea moni matou te faapea atu, i tulaga uma e lua, na faia ai ni fuafuaga ina ia faaauau ona atiina aʻe le naunau. O le atiina aʻe o sea oganuu mamao e manaomia ai le onosai, ae na matuā oa le taui o le galuega fitā a paeonia o ē na faia faapea.

17, 18. (a) I lalo o ā tulaga na onosai ai Molimau a Ieova i Italia? (e) Na faapefea ona taulau Molimau e ui lava i le salalau atu o tala pepelo e uiga ia i latou?

¹⁷ I Italia, na fesagaʻi ai Molimau a Ieova ma se tetee malosi mai i le au taʻitaʻi lotu, ae ona o le malosi mai ia Ieova na latou tumau ai. I nofoaga eseese o taʻitaʻi lotu a le Lotu Katoliko, na tufatufaina atu ai e patele ni pepa ina ia faapipii i faitotoa o fale e nonofo ai tagata o ā latou au lotu e taʻu atu ai i Molimau a Ieova e aua neʻi oomiina le logo i le faitotoa. O le toatele o patele na latou totogiina tama talavou ina ia faapipii nei pepa i faitotoa uma lava i le oganuu lea—ua oo lava i fale o Molimau a Ieova! Ae peitai, e lē faigofie ona faamataʻuina Molimau, ma e masani lava ona latou faaaogā pepa faapipii e amata ai a latou talanoaga. A e lē gata i lea, na faasalalau atu e fale lomitusi ma le televise a le malo le mataupu i se tulaga lautele, i le taʻusalaina o le lē faapalepale faalotu na faaalia, ma sa faamamafa ai faapea o ni tulaga faapea ua o ni faailoga lava ia o le vaivai i le vaega a le lotu. Sa matuā ita se tasi polofesa i se Iunivesite i pepa faapipii taufaasese e faasagatau ai i Molimau o lea na ia faia ai ni tusiga mo Le Olomatamata ma le Awake!

¹⁸ Ua oo lava foi ina faaaogā e le Lotu Katoliko i Italia aposetate e faasalalau ai tala pepelo e uiga i tagata o Ieova, ae e leʻi mafai foi ona galue ma le manuia lenei mea auā e 172,382 tagata talaʻi ua lauiloa ma faaaloalogia. Na taʻu atu e se tasi tamaloa i Molimau na asiasi ane faapea sa ia faitau i ni mea leaga e uiga ia i tatou i se lomiga na tusia e ni tagata sa avea muamua o ni Molimau. O le mea lea, sa matuā tetee ai lava o ia ina ua avea lona uso o se tasi o Molimau a Ieova. Peitai, ina ua mavae sina taimi, na ia matauina ai maeu ni āuga lelei na iai ia te ia ina ua suia le lotu a lona uso. Sa ia tau manatu: ‘Pe ua mafai faapefea e se mea leaga ona fua mai ia iʻuga lelei?’ O lea, na ia talosaga atu ai i Molimau na asiasi ane mo se suesuega faale-Tusi Paia.—Faatusatusa Kolose 3:8-10.

Feagai ai ma Tulaga Faaleogalua

19, 20. (a) O le ā le tulaga ua manaomia ai le onosai i le vaega a Molimau i Finilani, ma o le ā ua faaalia moni e uiga i se palota a le lotu? (e) O le ā le mea na tupu ua faataʻitaʻia ai le tāua o le onosai i le talaʻiina o le tala lelei?

¹⁹ I atunuu e asiasi atu i ai e lē aunoa Molimau, ua masani ona salalau tele atu ai le faaleogalua i le tala lelei. O le tulaga moni lava lenei i Finilani. Na faia e le lotu i lena atunuu se palota ma iloa ai faapea e 70 pasene o le faitau aofai e lē fiafia i Molimau e asiasi atu i o latou aiga. Ae peitai, e 30 pasene e lē tetee malosi, ma mai ia i latou nei, e 4 pasene na faapea mai latou te fiafia moni lava i Molimau a Ieova. O se fuainumera mautinoa ma tāua lenei. O le fa pasene o le faitau aofai o Finilani ua fai ma sui o le 200,000 tagata. Faatusatusa lena ma le fuainumera o le au talaʻi o loo iai nei e 17,303!

²⁰ O se tasi tagata talaʻi sa i le fanua na faatosina atu lona manatu i lenei palota ma na fesiligia o ia: “Tou te lē iloa ea o le 70 pasene o i matou matou te lē fiafia ia te outou? Aiseā tou te ō mai ai pea i o matou aiga?” Na tali le tagata talaʻi: “Ioe, ae o lena lava suesuega na faaalia ai faapea e 4 pasene o outou o loo mananao ia i matou. O loo matou taumafai la e saili tagata na. E tusa lava pe na o le tasi le pasene, ae matou te ō atu lava i lea fale ma lea fale e taumafai e saili i latou.” Sa tau manatu le tagata e ona le fale mo sina minute ona fai atu lea: “Pe tāua faapena la outou feau ia i latou?” Na tali le tagata talaʻi i lona fesili atu: “E te fia faalogo i ai?” Sa leʻi pine ae faaalia e lenei tagata e ona le fale le naunau i le tala lelei.

Le Mea o Taofia e le Lumanai

21. (a) O le ā le ituaiga o taua e tatau ona tatou tauina i lenei faiga o mea, ma aiseā? (e) O le ā atonu e tatau ona tatou onosai ai, ma o le ā ua faamautinoa mai e le valoaga a Sapakuka ia i tatou?

²¹ Ae faapefea i tatou uma lava i aso nei? Pe o tatou filifili e onosai faatasi ma Ieova ma Keriso Iesu seia oo i le iʻuga? Atonu e lē o toe mamao, a e tatau ona tatou onosai! I le faiga o mea a Satani, e tatau ona tatou tau ai se taua malosi mo le faatuatua, a o siomia i tatou mai itu uma e amioga lē mamā, iʻuvale, ma le inosia mai le lalolagi. (Iuta 3, 20, 21) Atonu e tatau ona tatou onosai i so o se ituaiga o sauaga. E oo lava i le taimi nei, e faitau afe o tatou uso o loo puapuagatia i fale puipui, ma o nisi ua matuā sasa leagaina. Ua loto faafetai i latou nei ona o a tatou tatalo. (2 Tesalonia 3:1, 2) Ua lē o pine, a e lē toe iai le faiga o mea o iai nei! E pei ona taʻua e Sapakuka: “O le faaaliga ua tuuina mo ona aso ua tuupoina, a e tautala mai pe a oo i le iuga, e le pepelo lava; e ui lava ina tuai mai, a ia faatalitali pea i ai; auā e oo mai lava, e le faatuai mai.”—Sapakuka 2:3.

22. O ā iʻuga e mafai ona tatou faatalitalia ma le mautinoa pe afai tatou te faatinoina le onosai o le au perofeta ma le tumau pea o Iopu?

²² Ua taʻu mai ma le alofa lava ia i tatou e le soʻo o Iakopo: “Oʻu uso e, ia outou faaaʻoaʻo i le au perofeta na puapuagatia i le leaga ma faaalia le onosai, o e na tautala mai i le suafa o [Ieova, NW].” O i tatou foi i aso nei o ē tautatala i le suafa o Ieova e mafai ona avea o ni ē tausia le faamaoni i le taimi o tofotofoga matuitui, e pei ona sa iai Isaia, Ieremia, Tanielu, ma isi. I le pei o Iopu, e mafai ona tatou onosai. Maeu le ofoofogia o lona taui ona o lona onosai! O le alofa tunoa ma le agalelei o Ieova o le a aumaia ai ia i tatou taui e lē mafaatusaina—pe afai tatou te onosai seia oo i le iʻuga. Ma tau ina ia faataunuuina agaʻi ia i tatou taitoatasi upu a Iakopo: “Faauta, ua tatou taʻuamuia i e onosai.”—Iakopo 5:10, 11; Iopu 42:10-13.

O le ā Lau Tali?

◻ O le ā le manaoga mo le onosai na faamamafa e Iesu?

◻ Mo ā mafuaaga ua onosai ai Ieova?

◻ O ā nisi o mea tāua o le galuega ofoofogia na faataunuuina i le 1989?

◻ Ua faapefea ona tauia le tumau pea o o tatou uso i Polani?

◻ Ua faapefea ona faaalia le faamaoni o Molimau i Lepanona, Kolomepia, ma Italia i lalo o tofotofoga?

[Siata i le itulau 18-21]

LIPOTI A MOLIMAU A IEOVA I LE LALOLAGI AOAO MO LE TAUSAGA FAALEAUAUNAGA O LE 1990

(Tagaʻi i le lomiga)